Post: #1
Title: ســــيد الـــــكارو يـــعاين لي..الـــوشو صــارو يــعاين لـي..!!
Author: صباح احمد
Date: 07-08-2013, 10:14 AM
Parent: #0
جارة البحر وعطشانة
سيد الكارو يعاين لي الوشو صارو..يعاين لي..
_________
* (يا ريت لو كان عندي كاميرا كنت صورتك ونشرت الصورة وكتبت تحتها :صحفية مشهورة زهجانة من عدم الموية) ..دة كان اول تعليق قالوا زوجي الهادي محمد الامين وهو شايفني اول ما وصل البيت وانا بنقل الموية من بيت الجيران..الغريبة ما كان عندي نفس اضحك او حتى اعلق عليه لانو في الساعة ديك كانت روحي محرقاني من ناس البيت الساكنيين معاهم ومن ناس الموية ومن الحكومة ذاتا ولو لقيت قدامي في الساعة ديك مدير الموية كنت كشحتة في وشه بجدرل الموية الانا شايلاه دة..
المهم..لينا يومين الست الماسورة حقتنا ما نقطتت نقطة واحدة وصوت شخيرها وهي نايمة_اقصد قاطعة_ كان ببوظ اعصابي الغريبة الجيران مويتهم شغالة وناس البيت يقولوا ليك في ازمة موية ..طبعا مجبورين نصدق ناس البيت لانهم(حكومة) والحكومة ما بتكضب كلو كلو_عشان ما يجوا ناطين لي الجماعة اياهم ويكرهوني حياتي اكتر ما كارهاها.. وامس بالذات دايرين نموت من العطش خليه من الحمام والصلاة و...و..و..هلمجرا علي قولة سيدي الامام.. والعصر لمن خلاااس تعبنا حنست روحي ومشيت (ضربت جرس) الجيران _المابعرف حتي شكلهم خلي اسمهم_ لانو طبعا واحدة من مشاكل ناس العمارات ديل انو اي زول قافل شقته عليه والله لو كتلك زول ما تلقي زول يجيب خبرك الا كان يشموا ريحة الجثة المعفنة ويبلغوا ال999.. _يا حليل اركويت وناس اركويت _ فتحت لي الشغالة الباب وطبعا ما فهمت منها وما فهمت مني اي حاجة اللهم الا من الجردل الشايلاهو ..وبعد اشارات تاكت مني الباب ودخلت ..قلت اجي يا اخواني البت دي جنت ولا شنو..وقبل ما ارجع البيت جات مارقة بت شابة من البيت سلمت علي وطبعا اضطريت احكي ليها قصة حياتي فطلبت مني ادخل ومشت شغلت الموتور ..عاد موية الهنا..مليت لي كم جردل كدي..ختيت منهم في الحمام والمطبخ ومليت التلاجة وغسلت العدة ..وقلت بكرة عليك يا الله..اها اصبحت الواطة والحال ياهو الحال ولا نقطة موية والناس الساكنيين معاهم جروا خرطوش من الجيران وملوا وماهماهم الناس المساكين المعاهم ديل..لكن الحاجة البسطتني انو امس ماقدروا يشغلوا المكيفات لانو موية مافي ونحنا الصقط داير يكتلنا لانو مكيفنا غاز.. ودي احلي حاجة في الشقة الساكنيين فيها دي..
قويت عيني وتاااني مشيت ليك علي الجيران بس المرة دي قالوا لي ما عندنا موية _طبعا ما كل سنة حلاوة زي ما بقول المثل الدراج_ فتحت التلاجة وشلت لي قارورة موية غسلت منها عدة الشاي وشديت الشاي ..اها بعد شوية الجرس ضرب لقيتها الحاجة الساكنة في بيت الجيران كتر خيرها جابت لي جردل موية صغير واعتذرت لي انو ما كان عندهم موية الا ولدها الكبير مشي جابها من المايقوما..
بتصدقوا..حمودي الصباح مسحتوا ساااي من عدم الموية حتي وشوا ما غسلوا ومشي الروضة؟!!
المهم..اتصلت بسيد الدكان الكان جنبنا لمن كنا ساكنين الجريف شرق قلت ليه دايرة عم عوض الله وعم عوض الله دة كان جارنا برضو وعندو كارو حق موية ..ومشكور بعد شوية عمل لي مسكول رجعت ليه اداني عم عوض الله لكن عمك اصر البرميل بي 30 جنيه لانو المسافة بعيدة وكدة ..طبعا حاجة مبالغة وطوالي قلت ليه شكرا..وبالصدفة وانا مشاة اودي لحمودي الفطور في الروضة لقيت سيد كارو كلمتوا ووصفت ليه البيت قال البرميل بي 20 جنيه قلت ليه مادايرة برميل اديني بالباقة وجاء كبً لينا 10 باقات موية بي 10 جنيه ..
*اخيرا: بتصدقوا اذا قلت ليكم نحنا ساكنين جيران البحر عدييل كدة ومع دةعطشانيين؟!!
|
Post: #2
Title: Re: ســــيد الـــــكارو يـــعاين لي..الـــوشو صــارو يــعاين لـي..!!
Author: صباح احمد
Date: 07-08-2013, 10:47 AM
Parent: #1
اها الكهرباء تمت الناقصة و..قطعت
____
يا شيخ (اسامة) تلحقنا وتفزعنا..!!
|
Post: #3
Title: Re: ســــيد الـــــكارو يـــعاين لي..الـــوشو صــارو يــعاين لـي..!!
Author: امير طمبل
Date: 07-08-2013, 11:08 AM
Parent: #2
دي معاناة قاسية جداجدا....
ربنا يسهل ليكم أموركم ...لييه ما تشتري ليك (موتور)
و خزان موية و ترتاحي منالعذاب ده...
صباح....رمضان كريم
|
Post: #4
Title: Re: ســــيد الـــــكارو يـــعاين لي..الـــوشو صــارو يــعاين لـي..!!
Author: garjah
Date: 07-08-2013, 11:09 AM
Parent: #2
| Quote: *اخيرا: بتصدقوا اذا قلت ليكم نحنا ساكنين جيران البحر عدييل كدة ومع دةعطشانيين؟!! |
والبحر فيهو موية؟؟
الحكاية / صباح
يا زولة فشي خلقك فينا
واحكي وفضفضي
اخوك مافي حاجة بتجننو غير قطعة الموية
بتجنن عديييل كده
مرة ضربت لاختي قلت ليهم جايي اجازة قالت لي
هووووي يا اخوي اوعك تجي
الموية مافي
|
Post: #5
Title: Re: ســــيد الـــــكارو يـــعاين لي..الـــوشو صــارو يــعاين لـي..!!
Author: كمال سالم
Date: 07-08-2013, 12:42 PM
Parent: #4
Quote: دي معاناة قاسية جداجدا....
ربنا يسهل ليكم أموركم ...لييه ما تشتري ليك (موتور)
و خزان موية و ترتاحي منالعذاب ده... |
أها يا البصيره أم حمد . موتور وخزان حته واحده يا طمبل ؟!!
عشان تشترى ليك موتور وخزان فى السودان إلا تبيع البيت وتجى تأجروا من المالك الجديد .
يا طمبل شوف ليها حل غير ده !
صباح ما تبغروا من المصريين ديل وتعملوا ليكم حركة تمرد .
كامل تضامنى معاك .
|
Post: #6
Title: Re: ســــيد الـــــكارو يـــعاين لي..الـــوشو صــارو يــعاين لـي..!!
Author: Asim Fageary
Date: 07-08-2013, 12:49 PM
التيمم .. اليتمم ..التيمم
|
|