كم سعر شاشات LCD في الخرطوم ؟؟

الأخوة بورداب الخرطوم
بسأل عن سعر شاشات LCD الـ 32 بوصة - أي شركة ما مهم -
سمعت أن تكلفة جمارك الشاشة في السودان ضعف سعرها هنا في السعودية لذلكـ من الأفضل شرائها من السودان .... هل هذا الكلام صحيح؟


و لكم جزيل الشكر

السلام عليكم يا خالد

Quote: سمعت أن تكلفة جمارك الشاشة في السودان ضعف سعرها هنا في السعودية لذلكـ من الأفضل شرائها من السودان .... هل هذا الكلام صحيح؟

نعم .من ألأفضل أن تشتريها من هناك..أولأ بتبعد مخاطر الكسر فى الشحن..وبتوفر قيمة الوزن والجمارك وتكسب ضمان الشركة هناك لو حصل أى عطل..

أنا إشتريتها من هناك قبل سنتين تقريباً وجدت أفضل أن تشتريها من الخرطوم...

تقديرى وإحترامى وتحياتى.

غايتو الـ32 كانت بحوالى 5000 جنيه تزيد او تنقض حبة

أنت جادي يا أحمد ؟؟

شاشة تلفزيون بي خمسة مليون ؟ كم لبثنا يا أبو حميد


ياخ هنا في شاشات 32 بوصة بأقل من 700 ريال !!!

أنا زاتي قلت كده يا أسماعيل بس كمان ما بتضمن الأسعار هناكـ مرات بكون مبالغ فيها شوية

Quote: فضل تشتري هناك مهما كان السعر

أخونا حسين من نواحي الفيس

علي بالأيمان لو صحي بي خمسة مليون ده طرفي منها ...

خالد عبد الله سلامات
الشاشة ال32 سعرها 3200 جنية
ودا عرض رمضان من سامسونج
تسلم

ثلاثة مليون يا سليمان ممكن تكون معقولة شوية مع أنها برضها كتيرة

سامسونج ال اي دي 32 بوصة 3300 ومعاها موبايل هدية لفترة محدودة
لمن تبقى عليها خليني ارسل ليك تلفون زول هناك

السعر ده ناو اسي دي

Quote: سامسونج ال اي دي 32 بوصة 3300 ومعاها موبايل هدية لفترة محدودة لمن تبقى عليها خليني ارسل ليك تلفون زول هناك السعر ده ناو اسي دي

يعني دي قريب 2000 ريال يا هندسة ؟ هو الريال زاتو بقي بي كم ؟




لو بقيت عليها برجع ليكـ يا عمكـ

Quote: بسأل عن سعر شاشات LCD الـ 32 بوصة - أي شركة ما مهم - سمعت أن تكلفة جمارك الشاشة في السودان ضعف سعرها هنا في السعودية لذلكـ من الأفضل شرائها من السودان .... هل هذا الكلام صحيح؟

سؤالك دا أحسن منه سؤال مهر العروس في السودان كم

ليس كل شاشة LCD تساوي شاشة LCD أخرى بنفس الأبعاد

Quote: سؤالك دا أحسن منه سؤال مهر العروس في السودان كم ليس كل شاشة LCD تساوي شاشة LCD أخرى بنفس الأبعاد

صدقت يا فرانكلي!
___
يا خالد الـ LCD خشم بيوت، تختلف الشركات، وتختلف الإمكانيات، وتختلف الجودة.
الـ LCD ذاتها تكنلوجيا قديمة جائت بعدها الـLED بكل حاجاتها العجيبة، لكن ما عارف الليلة في تكنلوجيا أحدث منها ولّ لا.
عشان تكون في الصورة مع من تسألهم في السودان، خليك دقيق في وصفك، الشركة الصانعة، والموديل والمساحة، وشف سعرها في السعودية بكم وقارن بسعر السودان، عشان تقارن تفاحة بتفاحة، لا تفاحة بي دومة.

طبعا يا خالد ال ال سي دي بقت موضة قديمة حاول جيب معاك ال اي دي ولو بقت سمارت يكون افضل لانها ممكن تشغلا انترنت .. تقريبا ما في فرق كبير لكن لو جبتها معاك حسب تجربتي افضل ...

طبعا يا ابو الخلد أخوك أحسن زول ممكن تسألوا في الشاشات دي ..:) :)
معليش معايز أضغط عليك لكن فكرة تلفزيون 32 بوصة فييي الأساس ماجايبة همها..بغض النظر عن ال سي دي ولا إل إي دي ..
قررت تشتري اشتري من 46 ولي فوق..
بعد داك شف موضوع السعر..
الاشات اما سوني أو سامسونج أو إل جي..
يقال إنو ساسمونج هب الافضل من حيث الصورة والتكنولوجي..عن تجربة السوني لا يعلى عليهم ..أخوك جاب كل انواع الشاشات دي مرضة ساااي كده وكانت السوني هي التوب..
ثم وإنو لو اشتريت تلفزيون في عرض من هنا وقدرت تحنك ناس الجمارك بيكون أفضل..علما بي نو جمارك السودان بقت تجمرك التلفزيون بي البوصة ...ما متأكد سعر البوصة كم !!! وكمان بيفرق ال سي دي من الاي دي..حسب مزاج اضابط..

أسأل مجرب وما تسأل طبيب ..

أسأل أخونا الزبير صالح .. السنة الفاتت جاب معاهو شاشة .. رخيصة من هناك دفعوهو جمارك قدر سعرها مرتين تقريبا ..

قالوا الجمارك بتاعت الشاشات هنا بالبوصة .. بس ما عارف البوصة بي كم ..


في كل الحالات اشتري من الخرطوم حتى لو كانت غالية لأنها شاملة الترحيل والتركيب والضمان وما شابه ..

الجمارك 16 دولار لكل بوصة
قالو الكلام دا حصل بضغط من الشركات هنا عشان مبيعاتها ما تتاثر بالشاشات البجيبوها الناس من الخارج.

...


واحد من الناس الشغالين في المجال دا (شكر) لي شاشات ال جي ، قال انها الافضل في السوق ، خصوصا 32 بوصة

!!!!!!!!!!

Quote: الجمارك 16 دولار لكل بوصة

يا النبي نوح !!

16 في 7 = 112 جنيه
112 في 32 = 3584 جنيه !!

خال عبد الله .سلام

يا اخوى خلينى من كلام العنقالة ناس عمر الفاروق وناذر الخليفة ده وهاك العلم من المقددنها:


LCD : شاشات الكريستال السائل (Liquid crystal display)
LED : الدايود الباعث للضوء (Light Emitting Diodes)
Plasma : تترجم بالعربية الى نفس الاسم البلازما
نبذة مختصرة :-
LCD : يعتمد فى الاساس على حركة سائل الكريستال للاظهار الصورة وعلى مصباح فلورسنت كاثودي بارد (CCFL) للاضاءة .
LED : تعتبر فى الاساس عبارة عن شاشات LCD ولكن بها تطوير بسيط وهو استبدال مصابيح CCFL بمصابيح من نوع LED ومميزات هذا التعديل سوف نسردها لاحقا
Plasma : تعتمد على خلايا متناهية الصغر تحتوي على غازات معينة بالإضافة إلى نسبة من الزئبق. عندما تتعرض هذه الخلايا إلى نبض كهربي، فإنها تتوهج و يتكون بداخلها ما يعرف بـالـ Plasma.
الوزن :-
LCD ,LED : تعتبر هذه الشاشات خفيفة الوزن اذا ما قورنت بغيرها ولكن شاشات LED تتميز بصغر سمكها نسبيا ايضا.
Plasma : اثقل من شاشات LCD,LED.
زاوية المشاهدة :-
LCD : تتأثر الرؤية قليلا بتغيير زوايا الرؤية والتى تعد كافية فى معظم الشاشات الحديثة , ولذلك اسأل عند الشراء عن زويا الرؤية القصوى .
LED : تتفوق كثيرا وقد تقترب من شاشات البلازما
Plasma : لا تتأثير بزويا الرؤية مطلقا .
انعكاس الضوء :-
LCD ,LED : أفضل بكثير فهى تمتص الضوء ولا تعكسه لذلك فهى مناسبة أكثر فى الاماكن المضيئة .
Plasma : تعطى انعكاس أكثر للضوء والذى يسبب الازعاج فى بعض الاحيان ولكنها تطورت كثيرا فى الموديلات الحديثة .
العمر الافتراضى:-
LCD : تتميز بعمر افتراضى طويل نسبيا وذلك للانها تحتوى على مصابيح فلورسنتية.
LED : تعتبر الأعلى فى العمر الافتراضى لتفوق مصابيحها عن المصابيح الفلورسنتية فى العمر الافتراضى .
Plasma : قليل الى حد ما , نتيجة اعتمادها على الغاز لذلك يقل الوضوح بمرور الوقت ويصعب صيانتها.
سرعة الاستجابة :-
وهو الزمن الذى تستغرقه الشاشة لعرض المشهد ثم التوقف وعرض المشهد الآخر , واذا كنت من الذين يعرضوا مشاهد سريعة والعاب وبعض افلام الأكشن فسوف يكون هذا الزمن مهم جدا بالنسبة لك ( كلما قل كلما كانت الاستجابة اسرع)
LCD : تعتبر سرعة الاستجابة بها بطيئة نسبيا وقد تقدر فى بعض الاجهزة بنحو 8 ميلى ثانية قد يقل فى بعض الاجهزة الحديثة وقد تصل الى 5 ميلى ثانية.
LED : احدثت طفرة هائلة فى هذه النقطة بالأخص فبعض الاجهزة تتميز بمعدل منخفض جدا , وقد اعلنت شركة سامسونج فى اطار الدعاية لشاشاتها انها تتميز بزمن يصل الى 2 ميلى ثانية.
Plasma : تعتبر قليلة ومناسبة جدا للمشاهد السريعة .
استهلاك الطاقة:-
LCD : تعتبر موفرة جدا للاستخدامها مصابيح فى الاضاءة .
LED : تعتبر الأقل فى استهلاك الطاقة.
Plasma : مكلفة جدا وقد تصل الى ضعف استهلاك شاشات LCD .
فى النهاية تجميع لما سبق واضافات صغيرة :-
LCD : يتوفر منها احجام صغيرة واسعارها مناسبة ولكنها غير ملائمة كليا للمشاهد السريعة وموفرة فى الطاقة.
LED : تعتبر الأفضل من بين الشاشات ,سواء فى ملائمتها كليا للمشاهد السريعة ووضوحها وتوفيرها للطاقة الى ابعد الحدود بنسبة تفوق ال LCD بنحو 20 -30 %, وتتميز بعمر افتراضى ممتد , ولكنها باهظة الثمن بعض الشىء ويتوفر منها مقاسات صغيرة ايضا.
Plasma : متفوقة من ناحية الوضوح وزوايا الرؤية والمشاهد السريعة ايضا , ولكنها لا يتوفر منها احجام صغيرة , ومكلفة من ناحية الطاقة وعمرها الافتراضى قليل .

وحات سيد الضريح ده كلام اليابانى الكاتبو لينا فى البروشور...
اما السعر فحكومة على كيفك دى ما تسأل ممكن الجمارك تكون الف جنيه وممكن تكون مليون انت وعلاقاتك،،،

صديق الموج
و الله بالشايفو ده لو عايز تدخل ليكـ شاشة السودان إلا تقلب كوز مع الجماعة ديل

16 دولار دي ما كتيرة يا وائل ؟
يعني الشاشة 32 بوصة جماركها 512 دولار ؟؟

ياخ هو سعرها كلو ما تامي 200 دولار الناس دي بتبالغ و لا شنو !!!!

أبو النيز
يا زول لما أجي الخرطوم ببقي لي في رقبتكـ ...


أجدع لي تلفونكـ بالله

دي كانت النظرية يا عمر الفاروق لكن البتاعة دي قالو جماركها بقت بالبوصة فقلنا خلينا في الوسط أحسن
لذلكـ أخترت شاشة ما كبيرة شديد و لا صغيرة شديد



بعدين عبودي ده لا فارز ليكـ سامسونج و لا إل جي المهم شوية أطفال بنططو و خلاص

والله يا نستا حسب الأسعار دي يتخيل لي لو شلتها من هنا يكون أفضل و أضمن

Quote: لـ LCD ذاتها تكنلوجيا قديمة جائت بعدها الـLED بكل حاجاتها العجيبة

و الله يا أبو عمار الكلام ده كلو أنا عارفو لكن الغرض العايزين ليهو الشاشة أبسط من كده
الحكاية كلها إني نازل إجازة شهر
عبودي ولدي عندو قنوات كده ناس طيور الجنة و ما أدراك براعم و كراميش و حاجات كده بعرفها براهو و محتل التلفزيون تماماً عندنا هنا
لمن نمشي السودان حيعمل نفس الحكاية و أنا ما عايزو يعمل الحاجة دي
فقلت أجيب ليهو شاشة أختها ليهو في الغرفة لحدي ما الإجازة تخلص فتفجأت بإنو الجماركـ ضعف سعر الشاشة
قلت يمكن تكون أرخص لو أشتريتها من هناكـ فتفجأت بالأسعار الإنت شايفها دي


شكلو عبودي حيحتل تلفزيون بيتنا مده الشهر دي

Quote: سؤالك دا أحسن منه سؤال مهر العروس في السودان كم ليس كل شاشة LCD تساوي شاشة LCD أخرى بنفس الأبعاد

الغريبة الناس فهمت السؤال يا كمال !!!



بعدين شاشة LCD 32 أعتقد أنها بتساوي LCD 32 تانية في الأبعاد و لا شنو ؟

Quote: الغريبة الناس فهمت السؤال يا كمال !!! بعدين شاشة LCD 32 أعتقد أنها بتساوي LCD 32 تانية في الأبعاد و لا شنو ؟

يا خالد الشاشات LCD ,LED من نفس الشركة وبنفس الأبعاد يتراوح سعرها بين 300 يورو 3700 يورو تتصور ليه؟

لانّ ما ذكرته أنت هو فقط معلومات الإطار أو الصندوق والصندوق دا فيه إمكانيات كثيرة جداً تبدأ من الResolution وعدد المخرجات والمدخلات وإمكانية توصيل الإنترنت والتسجيل الداخلي وزاوية الاطلاع والضوء الخلفي واستهلاك الكهرباء و.........................

وعشان أكون دقيق معاك وتوضح ليك الصورة اقرب شوف شركة Samsung لوحدها عندها كم تلفزيون LCD مقاس 32 بوصة

32" A656 LCD TV
32" C350 LCD TV
32" C450 LCD TV
32" C530 LCD TV
32" C650 Series 6 Full HD LCD TV
32" C652 Series 6 Full HD LCD TV
32" D403 Series 4 LCD TV
32" D450 Series 4 LCD TV
32" D550 Series 5 Full HD LCD TV
32" D580 Series 5 Full HD LCD TV
32” C580 LCD TV
32” C654 LCD TV

والتحت دي شاشات LED من شركة Samsung مقاس 32 بوصة

32" C6600 LED TV
32" D4003 Series 4 LED TV
32" D5000 Series 5 Full HD LED TV
32" EH5300 Series 5 SMART Full HD LED TV
32" ES5500 Series 5 SMART Full HD LED TV
32" F4000 Series 4 LED TV
32" F4500 Series 4 Smart LED TV
32" F4510 Series 4 Smart LED TV
32" F5000 Series 5 Full HD LED TV
32" F5500 Series 5 Smart Full HD LED TV
32" F6200 Series 6 Smart Full HD LED TV
32'' 4010 Series 4 LED TV
32’’ 4020 Series 4 LED TV
32” C5800 HD LED TV
32” C6510 Full HD LED TV
32” C6530 HD LED TV
32” C6540
32” D4000 Series 4 LED TV
32” EH4000 Series 4 LED TV
32” EH5000 Series 5 Full HD LED TV

وكل شركة عندها نفس التنوع دا نسبة لإمكانيات كل شاشة

عشان كدا السؤال لا بد يكون دقيق

أنت تعزل شاشة من شاشات Samasung مثلاًُ في السعودية وتسجل رقمها تماماً وتسأل من سعرها في السودان عشان المقارنة تطلع حقيقية

لكن مثلاً لو عجبتك شاشة مقاس 32 بوصة في السعودية وسعرها كان 5 ألف ريال وجاء واحد وقال ليك يا زول عندي ليك واحدة بنفس المقاس هنا ب3500 جنيه بس لا دوشة جمارك لا زيادة وزن لا تلتلة نقل هل ح تفتكر أنّم ح تلقى نفس الشاشة بنفس المواصفات؟؟؟؟

أها أخير ليك سؤالي بتاع المهر لأنّو برضو بيوصلك لنفس النتيجة

وشكراً لياسر طيفور لتفهم النقطة دي

سلام

معلوم يا كمال لكن أخوكـ ما دقيق للدرجة دي
بعدين أنا حددت LCD عشان سعرها أقل من LED

عايزين حاجة تمشي الحال و خلاص

يا خالد يا حبوب..
غايتو و ساكن امدرمان ف عتبر مشكلتك محلولة :)..
اخوك عندو هوس بي اللفزيونات وكذ الحال ناس بيتنا ..أها البيت حالياً فيهو زي جغلومية تلفزيون ..انا عندي نفس الاحتلال ..للدرجة العملنا تلفزيون بورتبول زيو وزي الشنطة :) ..ماشين لي أهلأمهم نشيل التلفزيون ..راجعين لينا نشيل التلفزيون :)
أها يا حبوب لو مدتو شهر فبوصف ليك البيت تمشي تشيل ليك واحد والشهر الأولمجااان ..بعد داك أي يوم زيادة الدقيقة بي دولارين ..انت قايل البوصات برااااها البي الدولار؟؟

LCD ..من LG .
32 بوصة
شهر 11 الفات كان سعرها 2 مليون و550 الف ...

كاش

يعني حوالى 1400 ريال

حلوة خالصة

هسي ما بعرف