أســــــــــــــرار عـــــلنية..(مــــمنوع الـــدخول لأقــــل مــن 30)

الدخول لاقل من 30 سنة علي مسؤولية صاحبه..!!

29 سنه و 11 شهر كيف ممكن تثتثنو
بس للمعلوميه

سلام يا اختنا صباح

بالجد بقيت اخاف من علامات تقدم السن البقت تظهر علي دي ..
وواحدة من العلامات دي النسيان الشديد ..!!
والله خايفة يوم القي روحي نسيت اسمي او اسم اولادي او زوجي اوحتى محل بيتي وين

عاد علي كيفك يا اخوي هجو..!!

_____

كدي خلوني احكي ليكم حاجة حصلت الليلة الصباح..
بعد ما جينا انا وتواد بتي من الروضة _ودينا حمودي لانو العربية لما جات لقتوا لسة ما جاهز_ ما عرفت ختيت الموبايل وين
قلبت ليه البيت قلب و ما خليت حتة ما فتشتها..سألت تواد منو قالت لي ما شافته ..(اول شئ ما شفتو يا ماما).._طبعا بتدخل عبارة اول شئ في اي كلام دايرة تقولوا_
والله العظيم حتى سلة القمامة الفي المطبخ فتشتها وعندي كيس قمامة في الحوش مشيت فتشتوا قلت يمكن تواد جدعت الموبايل فيه..
ولو ما كنت سمعت صوت رسالة بعد ما جينا من الشارع كنت اقول وقع مني برة البيت..
وفي النهاية قنعت منو خالص وقلت كدي التصبح الواطة شوية يا ضرب لي زول وسمعت صوت النغمة يا جانا زول وقلت ليه اصرب لي في موبايلي..
المهم..بعد اكتر من ساعة تواد قالت دايرة موية مشيت المطبخ وفتحت التلاجة اديها موية القي ليك موبايلي قاااااعد جوة التلاجة..

طبعا دسيت الموضوع من الهادي راجلي قلت هيييييييي يا زولة احسن ما تحكي ليه الحصل دة عشان ما يفتكر انك كبرت خلاص...

_مع ملاحظة انو الهادي اصلا عنده رأي في حكاية عمري دي _ بقول انا بصغر عمري وحتى شهادة الميلاد حقتي دي غالبا تكون مزورة

واتمني ما يقرأ البوست دة ويمسك علي الحاجات البتجي فيه لاني ما ناقصة مشاكل..

(وش ضاحك)

طبعا عادي جدا انسي اسماء الناس.. او الخبط فيها..
او اشوف زول اقول يا ربي الزول دة انا لاقيتو وين..
مرات كتيرة اقوم من محلي بس انسي انا قمت عشان اسوي شنو..
ومرات برضو امسك التلفون في يدي بس انسي انا كنت دايرة اضرب لي منو ,,
وحتى لو اتذكرت الزول الدايرة اضرب ليه انسي انا كنت دايرة اضرب ليه لشنو..!!

خدر اخوي _الله يرحمو ويغفر ليهو_ قبل كدة جاء حكي لينا انو كان بسمع زول بكورك في الشارع: يا خدر يا خدر..
بس ما اشتغل بيه لحدي ما الزول دة جاء حصلوا ومسكوا من يده وقال ليه مالك يا زول ما بترد علي ما سامعني ولا شنو؟؟1
الغريبة انو خدر اخوي حلف بالتقطعوا قال انو ما كان بفتكر الزول دة بنادي فيهو لانو نسي تماما انو هو اسمه خدر..!!

والله يا صباح الحاجات دى لو بيقيسو بيها الكِبر وكده ،، أكون عمرى الآن كده زى عشرين ألف سنة أو يزيد قليلا هههههههههههه

عادى يا صباح ولا تشيلى أى هم ،، وتيرة الحياة المتسارعة المثقلة بالهموم من كل صوب هى السبب فى ذلك ،،

مع التحية

ماهر

يا اختي الموضوع لا عمر ولا شئ
القصه كلها هموم ومعايش
تعرفي عمر الرجل مفروض يكبر بي متواليه هندسيه
وعمر المراءه بي متواليه عدديه
ولكن نقول شنو في عمر الزمن ده
وعموما ما تشيلي هم
ربنا يحفظك انت والاسره

Quote: والله خايفة يوم القي روحي نسيت اسمي او اسم اولادي

Quote: تواد بي..

غايتو دي ليك حق تنسيها ..

تخريمة :
نتو بيتكم ده مالو كلو أكياس قمامة :) :)

عمر الفاروق يا اخوي مالك علي؟!!

دة خطأ املائي ما خطأ (نسياني)




______

حالتي ما ذكرت ليك باقي سلات القمامة الما فتشتها..
(وشك ضاحك)

هجو يا اخوي

انا برضو ما حكيت ليكم انو آخر مرة مشيت فيها الدكتور اشكي من الام في المفاصل لقيت الرطوبة 95..

غايتو الله يستر علينا

سلامات ياصباح

أولا أهنيك علي حاجتين: إنتي عرفتي المشكلة شنو؟؟؟؟ وتاني حاجة القدرة علي البوح بها ودي شجاعة متناهية....(برغم إنو ناس الطب النفسي بيحبو إنو البوح يكون ليهم بس......أنانية وكدا يعني)


بكدا يبقي علاج المشكلة أسهل جدا.......



تحياتي

يا دكتور ياسر شكرا على الاطراء..
بس علاج المشكلة ساهل كيف؟!!
قصدك اعترف باني كبرت خلاص ولا امشي لطبيب نفسي؟!!

عموما في الحالتين ..دي مشكلة..!!

قلت لي اخي ماهر:


(عادى يا صباح ولا تشيلى أى هم,,)

ما اشيل هم؟!!

حالتي لسة ما حكيت ليكم عن حكاية الشيب البدا يغزو شعري..!!

الشيب وقار
ولا يهمك
في ناس صلعت و اتبهدلت
بس الشباب شباب القلب
وليك التحيه

الشباب شباب القلب دي ياهجو ذكرتني عبارة بتتقال عشان ترفع من معنويات (بعضهن)..
وهي عبارة الجمال جمال الروح..



___
ما عارفة ليه اتذكرت صديقنا منعم بيجو _رد الله غربته_ ولو انو يمكن يكون ما داير الله يرد غربته للبلد..
قبل كدة قال لي (شناتك اتعرفت بعد دة جملي دواخلك بس)

Quote: ما عارفة ليه اتذكرت صديقنا منعم بيجو _رد الله غربته_ ولو انو يمكن يكون ما داير الله يرد غربته للبلد.. قبل كدة قال لي (شناتك اتعرفت بعد دة جملي دواخلك بس)

لانو صديقنا منعم بيجو بيفتكر الشباب شباب الصلعه

تحياتنا ليهو ولي كل الزملاء في الغربه

يا صباح يا بتي .. سلام. دايرة النصيحة ولا بت عمها؟
كان دايرة النصيحة دخل الما بدَّاوا .. أوعك تبقى حبوبة وتمشي الحج.. أها بعد دا قطرك بصفِّر.. تواد ما تعرسي ليها إلا لمن تكوني عاوزة تقطعي تذكرة خروج نهائي كما يقول المغتربون. الله يديك العافية ويطوِّل عمرك.
. تحياتي



كبـّاشي الصـّـافي

(العوج راي والعديل راي)

cantona_1 زمن والله..كيفك وكيف احوالك؟


حادرس نصائحك دي بمهلة واتفحصها واجيك راجعة..
بس الله يستر ما انسي كمان..

Quote: المهم..بعد اكتر من ساعة تواد قالت دايرة موية مشيت المطبخ وفتحت التلاجة اديها موية القي ليك موبايلي قاااااعد جوة التلاجة..

تصدقى بالله اما اكثر من 15 مرة بشيل رموت التلفزيون واخته فى جيبى واجى المكتب وطبعا مفتكره موبايل واكون نسيت الموبايل فى البيت الحمد ما انا براى


// سلام صباح

احمد حمودي..شكرا علي المرور والتطمينات..

بس كلامك دة قولوا لي زول لسة بادي ينسي..!!
اما نحنا فلا ينطبق علينا باي حال من الاحوال كلام الغنَاي(من هسة وبقيت تنسي)

يا اختي والله الحال من بعضه
قبل اسبوع فقدت مفتاح العربية محل ختيته وين ما عرفت
والمشكلة انه ما عندي اسبير ليه والمصيبة انه المفتاح مشفر
وما خليت محل في النهاية جبت واحد عمل ليها مفتاح وبرمجه بواسطة لاب توب جابه معاه بي 400 جنيه
و بعد كم يوم لقيت المفتاح محل وضعت بي يدي

النسيان أحيانا يكون بسبب التوتر و القلق ، الاكتئاب أيضاً من الأسباب المهمة هذا بالإضافة لبعض الأدوية و منها دواء اسمه Tagamet يستخدم لعلاج
حموضة المعدة و القرحة. قلة النوم سبب مهم جداً و يعاني منه أناس كثر.
الغريبة الهادي ذاكرتو ما شاء الله كويسة و قوية ، ليه ما يوريك السر :)

يا سيف النصر يا اخوي هو انا قادرة اكلم الهادي بالحاصل لي دة عشان يديني السر ؟!!..
الخوف لو عرف يحيلني لـ(الصالح العام)..

__________
(وش مُكَشِر)


صدقية لي كلامك دة انا عندي قرحة وفعلا بتناول دواء القرحة والتوتر والقلق دة ما اظن في زول في السودان ما بعاني منهن الا زولن قلبوا ميت
اما النوم فحدث ولا حرج ننوم كيف نحنا بلا نوم جايينا اللوم..

أختى صباح
سلامى لك
أنه الزهايمر المبكر و الحال من بعضه و الله شئ لمن يخوف
أصعب موقف مررت به كنت فى طريقى الى مكة المكرمة من جدة
قبل توجهى لمكة مررت على قريبى للسلام و ودعته و خرجت معى
كيس فيه ساعتين قيمتهم ( 34000 ) ريال سعودى ... أى والله
أشترتهم المؤسسة لتقديمهما هدايا و ذهبت من مكة و أستلمتها من جدة
وضعت الكيس على المقعد الأمامى و شغلت سيارتى خرج قريبى وجدنى عند
السيارة ...
قال لى : يا أخى العشاء أذن صلى و أمشى
قلت له : و الله أحسن
و نزلت دخلت المسجد و الباب مفتوح و الساعات فى كيسها
ربنا قدر ولطف جيت من الصلاة لقيت باب السيارة مفتوح
و الكيس قاعد محله ....
الحمد لله رب العالمين .

تحياتي اختي صباح
والله كان الشغل دا كبر معناها نحن
خلاص عجزنا تب انا امبارح القريبة دي
ضرب لي زول عندي معاهو شغل وتميت
موضوعي معاهو بعد ساعة بفتش في التلفون
بقيت بتزكر في الرقم دا حق منو وقال شنو
والله لي المساء بحاول افتكر ماقدرت لمن
اتصلت عليهو تاني حتي افتكرت
اما نسيان المفتاح دا ايييييييييك والله بي
اختصار اي سفرة من البيت ومعاي الاولاد
برجع بكسر الطبل طوالي برنامج ثابت
فما تخافي النسيان دا عادي
تسلمي

ما شاء الله ذاكرتك تمام..
كيف اتذكرتي الحاجات الناسياها دي كلها.. ^___^

شكرا للاخوة والاصدقاء الحرسو (الاسرار العلنية)
ومنعوا (النسيان) ما يصل ليها..

الغريبة يا عطا المنان انو ذاكرتي في بعض الاحيان فل الفل..لما تحيرك
يعني هو نسيان شديد بس كمان ما دائم ..
اخواتي بقولوا لي (بتنس الدايرة تنسيه وبتتذكري الدايرة تتذكريه)..
يمكن.. بالجد ما عارفة

امس الضهر كنت انا وزميلة في استقبال احد الصحف منتظرين حضور احد الزملاء لمكتبه وبعد وصول هذا الزميل ذهبنا معه لمكتبه وبعد دخولنا المكتب قام بتشغييل المكيف والمروحة وفجأة قام قفل النور الاصلو مولع..
اتخلعنا انا وصديقتي لكن بسرعة ولع النور وهو يعتذر بقوله:( والله كنت قايله مقفول وداير افتحه)..
وضحك وهو يقول (معليش الكُبر دخل)..
الغريبة انو (الزميل) دة زي ما بتقول الاغنية (لسة في عمر الشباب)..فضحكت الزميلة وهي تقول له:(محمد معانا ما تغشانا)..
بتصدقوا اذا قلت ليكنم اني ما ضحكت ولا علقت علي الكلام دة لانو الحكاية دي كتير بتحصل لي..
اكون دايرة اولع النور وهو فاتح واقفل المروحة بقصد اني اشغلها وما اكون منتبهة انها اصلا شغالة..وانسي (حلة اللبن) في النار.. وعااااااااادي جدا انسي الباقي حقي عند الكمساري اوافوت المحطة و...و...و...هلمجرا

الغريبة يا اخ سليمان لو حكيت بالحاصل ليك دة لزول بفتكر انك بتستهبل او بتكضب او بتبالغ..
والحاجة دي خلتني اتأكد انو في حالتين من النسيان (نسيان طبيعي ) و(نسيان مصطنعي ).. يعني ممكن تلقي ليك زول يشوفك ويعمل فيها ناسيك او ناسي اسمك..
انا شخصيا بعرف واحدة حتى لو متذكرة اسم شاب بتعرفوا بتقول ليه في الكلام ( يا اسمك منو..)؟!! او غالبا تعمل فيها رايحة من اسمه.. بس والله حكاية نسياني دي شيتن مختلف..
الغريبة انو امي _ربنا يديها الصحة والعافية_ لما كانت تطلب مني اعمل حاجة وانسي ..وتسألني سويتي الحاجة الفلانية واقول ليها نسيت تقول لي :(نسيتي تاكلي)..؟!!
(نسيتي تشربي)..؟!!
وبالطبع بتكون اجابتي بالنفي وطوالي تقتنع انو انا بستهبل يا دايرة ازوغ من الشغل..
الغريبة انو امي طوالي مفاتيحها ضائعة ولو ختت حاجة في محل منو العوض وليه العوض لانو الحتة البتدس فيها امي حاجة ما بتخطر علي بال زول..

يا سيد علي دة لو ما الزهايمر شيتن قريب منو ..
انا بحمد الله الما ختيت بتي جوة التلاجة وبركة الجات في الموبايل وقديما اهلنا قالو..
الجاتك في مالتك سامحتك..

يا 7abib_alkul



اخير انت نسيت مفتاح العربية ختيتو وين واتذكرت العربية..
الغريبة انا هسة ناسية عندي عربية ولا ما عندي..!!

____
(وش ضاحك)

كما قلت الدخول لهذا البوست على مسئولية صاحبه ..
ولا تتحمل صاحبة البوست اي مسؤولية تترتب على هذا الدخول ..
والتعليق في هذا البوست و(الاسرار) التى تخرج لـ(العلن )..على مسؤولية صاحبها..

ست البوست إزيك

أنا غايتو أشك في أن هذا البوست كمين، سوف يتم تجميع المعلومات في مقال متكامل

ويكون شبه اغستطلاع للمقال المحتمل

غايتو اشكر الله كتير أنا عندي ذاكرة ما شاء الله تبارك الله بالله كلكم قولوا ما شاء الله

كان لاقيت لي زول في الطواف وعيني وقعت في وشه بعد عشرين سنة لو لاقيتو بعرف أنا لاقيتو في طواف في الكعبة

دا طبعاً مثال لفقط لكن تعالوا شوفوا الونسة البتتحكي على مسمعي بحفظها غصباً عني حرف حرف

مسألة ال>اكرة أعتقد أنها تمرين لو الواحد مرن نفسه للحفظ سواء بالنظر |و السمع أو الإتنين مجتمعات حينمي قدرات ال>اكرة

والله اعلم

الاخ عاصم فقيري
تحياتي
بتتخيل انو البوست دة يمكن يكون كمين بغرض اعداد مقال قادم او استطلاع ,,
لكن فات عليك اني بقيت بعيدة تماما من عالم الصحافة الى اجل غير مسمي ..
المهم..خليني اقول ما شاء الله وتبارك الله على قوة ذاكرتك الله يستر ما نديك فيها عين وتبقي زينا او اكعب مننا



تحياتي

صباح سلام

نسيت داير اقول شنو استنوني في بوست تاني

الاخت صباح موضوعك يذكرني وحده حبوبتنا الله يرحمها كانت تنسى كثير قالوا مرة عندها ولدا الصغير وكان خفيف الوزن وهي شايلاهو وتدخل بيوت الجيران يا فلانه انتي منصور ولدي ما شفتو الي ان جاءت الي بيته اختها ... ستنا اختي منصور ولدي ما شفتو قالت ليها سجم خشمك الفي صفحتك دا منو وحبوبتنا قلبت الشهادة وكما واحد اخونا نساي ذهب بعيالوا عند جماعة وخلاهم وقال بيرجع بعد الشغل وبعد انتهاء الشغل نسى اولادو عند منو وذهب لجماعة تانين ودق الجرس ودخل بعد داك اتذكر هو جاء الخطأ وعادي الحاجات دي بتحصل

Quote: Ummoayad Moayad · الأكثر تعليقا عليكِ بالتسبيح الكتير والصلى علي النبي عليه افضل ا الصلاة لسلام ودي عن تجربة مني انا ما من مركز الافتاء . ولا تموتي لين يتم اجلك على قول النكتة . بس انا حكايتي قربت يكون فيها تسفير . علاقة مفاتيح فيها مفتاح خزنة المكتب والخزتة فيها كل جوازات العمال والاختام ومفتاح البريد وما عندهم اسبير تاني الا مع صاحب الشركة ومفتاح البيت والعربية وديل مقدورات عليهم عندهم اسبير ومفتاح المكتب اتناولتهم من ابو مؤيد ومن الباب رجع تاني يجيب ليه حاجة من الدكان ويجي والدنيا صيام وبعديها طبعا نكرت حطب انه ما استلمتهم انا ولا شفتهم وبي حليفتا كمان وبقينا الليل كلو نفتش ونسأل وقلبنا البيت فوق تحت وواصلنا التفتيش للصباح والنهار كلو بنفتش وخلاص يئسنا وبدينا نشوف الحل شنو في الحالة دي . وبديت اطلع عشان اسخن الافطار قرب لقيت ليك العلاقة كلها غاطسة في علبة البليلة وباااااااااااااردة ولا جايبة خبر غلبني اتراجع بعد الحليفة ديك كلها برااااااااحة ختيتا محل هو بيخت العلاقة وعملت فيها ميته .

الشينة منكورة يا أم مؤيد... هنالك كورس يدرس في بريطانيا لتنسى النسيان .. فاهمين حاجة.. أنا دخلت الكورس قبل 10سنوات ونفع معاي خاصة في مسألة تذكر أسماء الناس البتقابلهم. تحياتي.


كبـّاشي الصـّـافي

(العوج راي والعديل راي)

صباح الخير
تعرفي قصة مفتاح العربية زكرتني
موقف يوم كنت في البلد والمواصلات
في الوقت داك كانت في الفترة الصباحية
بس أها بعد الفطور عندي قريبي ماشي
الخرطوم مشيت وصلتو الزلط وقفت العربية
من الناحية التانية للزلط وقعدنا في مظلة
وكان في مجموعة والونسة جرت وزولي
سافر انا بقيت افكر في الطريقة البترجعني
البيت شنو نسيت العربية كلو كلو اها في لحظة
التفكير دي ظهر بوكس ماشي الحلة طوالي
جريت ولمن وصلت تب واقسم بالله لو مافي
واحد سالني قالي انت العربية الفي الظلط
دي مش حقتك اكان زمن مااعرفا
وتقولي انتي نساية ههههههههههه

صباحك خير اخي سليمان القرشي..


طبعا عااادي جدا انسي مواعيد شغل حددتها مع زول..
واطرف واحرج موقف حصل لي عند زيارتي لاسمرا في العام 2005م _ان لم تخني الذاكرة كعادتها_ وقتها حددت مواعيد حوار مع الراحل الدكتور خليل ابراهيم ربنا يرحمه ويغفر ليه ..
اها يا سيدي نسيت ليك المواعيد تماما وما اتذكرتها الا بالصدفة لما جات سيرة الرجل ونحن جلوس باستقبال فندق(امباسدور) حيث كنا نقيم مجموعة من قيادات وكوادر جبهة الشرق_ربنا يطراها بالخير_
اتخلعت عشان عارفة انو خليل ابراهيم دقيق في مواعيده ونبه علي ما اتأخر عن الموعد لانو عنده مشوار مهم بعد الحوار مباشرة..
اها طوالي قمت شلت ليك (عدتي الصحفية) وقطعت ظلط (شارع كمشتاتو) وركبت البص لحي اسبيس الساكن فيه الراجل وقتها..وللاسف لاني اتأخرت عن مواعيدي اكتر من ساعة لقيتو مرق ..
واضطريت انتظروا لمن يجي راجع ولمن جاء خجلت اقول ليه نسيت المواعيد يفتكر اني ما جادة او بستهزأ بمواعيده ووقته فقمت طوالي طلعت لي (كضبة بيضا) واعتذرت اني كنت تعبانة شوية ..
لكن مع دة كلو ما اتضايق مني لكني اداني درس في احترام المواعيد واهمية احترام الزمن بالنسبة للصحفي وفي نهاية اللقاء قام باهدائي ساعة تربيزة ذهبية علي شكل علامة مرسيدس تصدر صوت جميل علي راس كل ساعة او اذا ظبطت المنبه على زمن محدد وقال لي عشان تكوني صحفية ملتزمة فالشطارة وحدها لا تكفي..

________
للاسف الساعة دي ضاعت مني نتيجة للتنقل من بيت لاخر او اتسرقت ما عارفة ولو اتسرقت (الكلام ليك يا المنطر عينيك)..!!

صبوحة يا حليك وأخبارك وأحوالك ووليداتك ..


غايتو قطعتي مصاريني بالضحك ..


الحال محصل بعضه ياحبيبة ..

أنا غايتو مشكلتي الدايمة والمزهجة كل الحولي ..(النضارة) ـ أي لبست نضارة ياصباح هههههه ـ دايما انا في حالة سؤال عنها المشكلة أنو لمن أسال منها غالبا بكون شايلها في يدي او معلقة فوووق رويسي ..

فاااشنو خلي الطابق مستور

Quote: الغريبة انو امي طوالي مفاتيحها ضائعة ولو ختت حاجة في محل منو العوض وليه العوض لانو الحتة البتدس فيها امي حاجة ما بتخطر علي بال زول..

قطع شك وراثة من أمك هههه

اها اذكرت

صباح سلام

هاك التلاتة ديل زهايمر عديل

مرة دخلت الحمام شلت فرشة الاسنان مليت ليك معجون حلاقة وفرشة الحلا قة كبيت فيها معجون سيجنال

جوطت ليك البيت جوطة شديدة باحثا عن نظارتي يا عالم يا ناس الشاف نضارتي منو؟ والسيدة المدام والعيال يضحكون

بتضحكوا مالكم؟ السيدة المدام مالك يا راجل جنيت نضارتك ما ياها ديك معلقة في اضنيك

واحد صاحبي سافر من مسندم في سلطنة عمان علي بعد اكثر من 6 ساعات من العاصمة مسقط سافر مسقط يجيب المدام من المطار ولانه الزمن فيه مهلة شوية قال يمشي الحديقة يريح شوية ويرجع المطار

أهة زولنا هاك يا رقدة في النجيلة يقرا في الجريدة الي ان دخل في غفوة صحا بعدها مدورا محرك عربيته عائدا لمسندم بدون المدام

الغريبة يا محمد عبد الله انو امي اصلا ما بتعترف بانها نساية ..
وطوالي لما تضيع منها حاجة او تنسي ختتها وين تقول انا ختيتها في مكان واضح بس اكيد في زول جاء وحركها من مكانها..
او تقول لو ماكنتو بتهبشوا الحاجات ما كنت حاضطر ادس منكم حاجة..

يا عمر الفاروق اظن اخير انا منك شوية..
(وش ضاحك)

العزيزة داليا.. انا لاقية حالي يكون محصل حالك؟!!
والله مشتاااقين كتير وشديد جدا..
اجمل مافي الموضوع انك بقيتي تلبسي نضارة علي الاقل بتكوني بقيتي تشوفي الامور بوضوح شديد
(وش ضاحك ما زي وشك)

سلام كتير ...

لحدى هنا ده كلو عادى ..

واهو شايفه معظمهم فى ها المستوى ..

لكن برضو مستنينك ومتابعين اعلان اسرار ما بعد التلاتينات .ز

وتسلمى .. وتتذكرى ..

الاخت صباح

تحياتى وتقديرى لك وللمارين ..

بوست جميل ونساى والمتداخلين جميعهم تعدوا الثلاثين ..

والله ضحكت على حالى الذى قرأته هنا ..

وتذكرت حكاية الموبايل وبتكلم منه وفى نفس الوقت بفنش عليه ..

ومفاةيح الضيف الى ضاعت واضطرينا ان نوصله لداره , وبعد ثلاثة ايام وجدناها فى الثلاجة لانو ابنه كان يلعب بها ..

ولى صديق اذا جلس و وجد اى مفايح امامه يحملها الى جيبه لانه يعتقدها له ,وعيييك فى بيته اشكال والوان من المفايح ومتاكد انا مفانيحكم الضائعة تكون هناك ..

يازوله شكرا ليك على البوست الصريح وثقى بان الحال يعم وخاصة فى ظل هذة الاحوال .....

Quote: او زوجي .....

وطِّي صوتك يا صبااااااااااااااااح!

مســـــاء الخيرات يا شباب..
نسيت البوست تماما ونسيتكم..
اكيد حتعزروني
______
(وش ضاحك)

بعتذر للاخوان(الحضروا) للبوست و(لم يجدوني).
وبشكرهم على المرور والتعليقات اللطيفة
فائز احمد
و
بشير دفع الله
و
وعبد اللطيف شريف
وكمـــان
محمد فضل الله

الليلة من الصباح مشينا بيتنا الكبير وقيلنا هناك واستمتعنا بالونسة مع حبوبة والجدو_امي وابوي_ ولاقيت اخواتي واولادهم ولينا فترة ما اتقابلنا وعلي شرف الحضور دة امي عاست لينا كسرة وسوت لينا ملاح بامية مفروكة مخصوص لاننا كلنا بنحبها..
المهم..لينا كم يوم واعدين احمد ولدي نوديه الحلاق عشان نحلق ليه شعره نظام الولد في الروضة وكدة (نيولوك) جديد علي قولة الجماعة.. لكن ما وديناه ..اها بعد الغداء قلت طالما جينا بيت ناس حبوبة كدي النودي حمودي صالون الحلاقة القريب من ناس حبوبة دة..وفعلا طلعنا من البيت وفي الطريق القي ليك روحي شابكة حمودي بكرة باذن الله نمشي السوق اشتري ليك الزمزمية والشنطة والجزمة واوديك الحلاق..لاحظوا قلت ليه اوديك الحلاق وانا في نفس الوقت ماشة صالون الحلاقة..!!
طوالي حمودي رد علي :(يعني تااااني احلق شعري ياماما)؟!!
طبعا مالقيت رد علي كلامه غير اني اضحك لكن في نفس الوقت خفت لاني شعرت بانو حالتي بقت مستعصية ..

وقبل ما نطلع قلت للهادي زوجي حاشيل معاي المفتاح لانو ما معروف الظروف يمكن اجي القاك مافيش ..
اها لما جينا راجعين المساء ضربت الجرس ..وانتظرنا مسااافة لحدي ما الهادي جاء وفتح لينا الباب قلت ليه مالك اتاخرت كدة؟!!
قال لي انتي مش معاك المفتاح؟!!
اتخيلوا نسيت انومفتاح الباب في شنطتي..!!!

يا ربي دي ريحة شنو؟!!

سجمي... عندي لبن في النار...

طبعا ما حاوريكم الحصل شنو..
استنتجوا الحصل براكم.. الحكاية ما صعبة..
يلا ...تصبحوا علي الف خير