مـرحـبـتـيـن حـبـاب وِلآد البـاوقـة فـي حـوش بـكـري ...

حبابكم واليوم السعيد الليلة جابكم.

ابقوا لا دآخل، وإتوهطوا تب.

حسن مختار الخليفة

ود مُختار.

لغاية هسي ما سوولنا زلط يا ود المدير؟

محمد حمزة الحسين

وددبايتور.

Quote: لغاية هسي ما سوولنا زلط يا ود المدير؟

سيف النصر،
سلآمات.

يا أخوي ولا تعشم.
غايتو ديل إتنين كرت كرتونة من وِلآد الباوقة، أسعلُن.
ود مُختار دا بيديك النجيضة، أما وددبايتور دا أُخد
آخرو، باقي أنا وهو مِتكاجنين...

أكان معاكم عقاب قُولولنا
عشان ما نتلوم.


ألف مرحب بوجودكم بيننا...

يا مدير والله حقو تقاضو ود الباوقة على الاسم ده !!
بالله بقيت مما أسمع كلمة الباوقة دي بطني تطم و ريحة خشمي تبقى كيزان كيزان !!

السلام والرحمة ود المدير
مشكور كتير ومااااااااقصرتا والله
حوش بكري دا لينا زمن واقفين قدام بابه لغاية مافتح لنا قريب
معانا محمد بابكر زول صور الباوقة اجيبو ليك بهنا
تحياتي

طبعا ياسيف النصر أول مرة أعرف انك من الباوقة
يلا بينا الى الأمام ..... ناس الشعبية احسن مننا بي شنو؟

يلا....
المسافر......عمر عبد القادر ود الباوقة.... محمد حسن العمدة....عبد الرازق الطيب.....عبد الغني كرم الله.... وليد شريف.... على الكرار هاشم و كل من لا أعرفه يلا رحبو بي ود مختار ود الدبايتور ...... مليون أهلا هنا ونورتو بل خدرتو البورد

قُلت كدي يا محمد الشيخ ؟؟؟
أها عاد أرموا لقدآم.

البوست دا مع الترحاب خلونا نجعل منه
مساحة للتوثيق...

Quote: يا مدير والله حقو تقاضو ود الباوقة على الاسم ده !! بالله بقيت مما أسمع كلمة الباوقة دي بطني تطم و ريحة خشمي تبقى كيزان كيزان !!

سلآمات يا أمين.

نسوي شنو عآد ؟؟؟، مِيانا مجبورين عليهو.

أنا بقترح عليهو يغير لإبن الإنقاذ، ويترك باوقتنا
وشأنها.
والله صحي...

ولنترحم من هنا على ابن الباوقة الكبرى وجزيرة ارتولي الأستاذ الشاعر تاج السر الحسن رحمه الله رحمة واسعة












عبر الدفيتة وعلى سطوح البرينسة

حباب ولاد جنة الفردوس
السكانها حور
كم هم مبدعون وعبر اخي معاوية
بودمختار القنديل سراج البيت
حمدلله السلامة الجيت التحية لكل الاهل في الباوقة
والي صديقي علي جار النبي

Quote: حباب ولاد جنة الفردوس السكانها حور كم هم مبدعون وعبر اخي معاوية بودمختار القنديل سراج البيت حمدلله السلامة الجيت التحية لكل الاهل في الباوقة والي صديقي علي جار النبي

اهلا ياباسط وحبابك الف


تعرف لمان قامت حكاية السد وما ادراك اهلنا في فتوار اتواضعوا شوية وقالوا ما عندنا بديل لي فتوار الا موقع مطار الخرطوم القديم.

اها عندنا جماعة من الحواشات قالوا ابدا قسما عظما بديلنا بس الجنة.

اوافق على اطلاق نسيبنا ود الباوقة الى ود الأنقاذ وما أظنو يأبى

حباب ناس البلد
عارف ياود الشيخ زمان افترعت لي عامود زي ما بقول اخونا عزام فرح الله يطراهو بالخير فى منبر الباوقه وسميته مدرسة بله
كنت امل ان يستمر ويكون ربط بين الباوقه وريغها حيث كانت حتى الداخليه فيها طلبه من الباوقه وارتولي العبيديه مبيريكه و بالغرب من كدباس حتى مناطق الردى والسليمانيه شرق وغرب
ايماني كل هذه المنطقه الروابط بينها اكبر من كل شى فبها وحدة بيئه و عادات قل ان تجدها في مساحه كهذه
المهم لم استمر في الموقع وانتقلت لمنتدي فتوار وراحت السكره
و لنا عوده

أول باب سلام يا أهلنا
وتاني الباب سلام يا لمنكم طولنا
وتالت باب سلام يالشتلة الضفيره متنى

Quote: ولنترحم من هنا على ابن الباوقة الكبرى وجزيرة ارتولي الأستاذ الشاعر تاج السر الحسن رحمه الله رحمة واسعة

نسأل الله له الرحمة والمغفرة.
إنا لله وإنا إليه رآجعون...

سلام يا معاوية يا مدير
ومعك نرحب بأبناء الباوقة
أنا لست من أبناء الباوقة ولكن يشرفني ويسعدني جدا أن الباوقة وأهلها جزء من وطني الكبير
ربطتني بالباوقة علاقة إنسانية كبيرة، صداقة عمر
وما انقطعت رجلي من الباوقة إلا بسبب الغربة - الله يقطع طارئ الغربة -
في إجازتي الأخيرة في رمضان الماضي كان لازم أمشي الباوقة عشان واجب العزاء في وفاة العم عبد الباقي زين العابدين تغمده الله برحمته،
لكن تعرضت لحادث كسر ولم أتمكن من الذهاب..
وعبر هذه النافذة أعبر عن حبي واحترامي لكل الناس في الباوقة -
التكاوين - العمارة - الحواشات - الجرانيس - النمر- البدوة - وحي السوق
..
خالص الاحترام والتقدير
تصحيح كلمة تغمده

اللهم ارحم الشاعر تاج السر الحسن و احسن اليه
...
بأذن الله اجازتي الجاية السودان ..ناوي انزل البلد و اجيبلكم صور بالكوم
ود المدير و ضيوفو...ابشروا بالخير

ياودالمدير بوستك دا جاب ليهو حرويل كبير عبد الرازق الطيب الذي اختفى من هنا منذ مدة طويلة مرحب به
وفي انتظار عبد الغني ودكرم الله.

مرحب بمرورنا وماراتنا ابناء الباوقة الكرام

زياد جعفر عبد الله؟
هل هو زياد جعفر أحمد عبد الله ام اسم على اسم.

الى الأمام...............................

عوده
مدرسة بله سميت بهذا الاسم نسبة لمدير المدرسه آنذاك اااستاذ بله او محمد الخليفه سعيد وهو من ناس الجول وانا اعتبره من اميز معلمي اللغه الإنجليزيه
رغم حده تشويه في بعض الاحيان المدرسه عمارتها مختلفه عن ما هو سائد في المنطقه ومبنيه علي الطراز الانجليزي بنوعيه ممتازه من الطوب الاحمر وعلي حسب علمي هى من تنفيذ وزارة الاشغال التي كانت تنفذ المشاريع الحكوميه بجوده عاليه
ومهارات مكتسبه منذ العهد الانجليزي وهو اغلب ما تميزت به المباني الحكوميه القديمه
وهنا لابد من ذكر من بقي بالذاكره من ألاساتذه امثال الشيخ كرتات وقمر الدين صديق ولا اعلم ما ذا فعل بهم الدهر وهم من علموني ابجديات العلوم والانجليزي لهم التجله اينما كانو
بره الموضوع
حرويل مره واحده يا ود الشيخ
ولنا عوده

Quote: يلا رحبو بي ود مختار ود الدبايتور ...... مليون أهلا هنا ونورتو بل خدرتو البورد

السلام والرحمة محمد الشيخ
والبورد منور بوجودكم وان شاء الله نتواصل

Quote: ولنترحم من هنا على ابن الباوقة الكبرى وجزيرة ارتولي الأستاذ الشاعر تاج السر الحسن رحمه الله رحمة واسعة

ربنا يرحمه ويغفر له ويدخله مدخل الشهداء والصديقين
العزاء لكل الاهل بالمنطقة

طبعا مدرسة الباوقة الأميرية الوسطى انشئت حسب ذاكرتي في عام 1965م وفتحت في مدرسة الباوقة الجنوبية الأولية بالمخازن حيث تم استضافتها هناك
وتم تكملة البناء بالخشب . اولي وتانية في عهدنا كانوا من الطين وتالتة ورابعة خشب(اولى قصب, تانية خشب وتالتة ورابعة فضة ودهب)هههههه.

أول ما أذكره من المديرين أحمد عثمان بحيري الأستاذ الشهير من ابناء المتمة
عند دخولنا كانت المرسة الوسطى مكتملة حتى السنة الرابعة
ونذكر من المعلمين انذاك الأستاذ حمزة عبد الله البشير - محمد طاهر السراج- والصادق محمد عثمان و.... تموا الباقي
الداخليات كانت بيوت مؤجرة منها داخلية ابزيد , .... برضو نسيت
العمال ... اذكر الحكم المحلي عثمان عربي
من الطباخين ودالنور.... و صقير
رحم الله من فارق الدنيا وطول العمر للأحياء
ونواصل الأنتقال للمباني الجديدة في عام 1970 منقة العمارة

وين ود العمدة وحاتم الياس ؟؟؟

نحن هنا التحية لك ولكل الاهل بالباوقة

Quote: نحن هنا التحية لك ولك الاهل بالباوقة

مرحب حباب حسين الاخبار ان شاء الله تمام

كتب عثمان موسى من الفيس

Quote: البوستات كملن علا نتمها روب(أقصد فيسبوك)

السلام والرحمه عثمان الف تحية
يااخي رسل بكري عسي ولعل يقبلك تجينا فوق

Quote: زياد جعفر عبد الله؟ هل هو زياد جعفر أحمد عبد الله ام اسم على اسم.

أخونا محمد الشيخ
زياد جعفر عبدالله إبراهيم محمد حمزة إبراهيم الكاسر...
إنقريابي عبداللابي همزيابي..
حفيد العمدة عبدالله ود إبراهيم و إبن أخ المرحوم مختار عبدالله إبراهيم..
تعريف كيف..مكتمل وللا لا
تحياتي ليك يا ملك

Quote: حباب ولاد جنة الفردوس السكانها حور كم هم مبدعون وعبر اخي معاوية بودمختار القنديل سراج البيت حمدلله السلامة الجيت التحية لكل الاهل في الباوقة والي صديقي علي جار النبي

الف مرحب بيك اخونا باسط المكي
ومرحب بالمتداخلين سلمي علي
امين حمد سليمان
الاخ طه ابراهيم ..انت زول بلد تب معناتا بتعرف على عبد الله واولاده
اخونا زياد رسالتك وصلت وين بلدك
عبد الرازق ابو احمد اخبارك لابد في الغربية اخبارك ولاهل ان شاء الله بخير
الاساتذة الشيخ وقمر موجودين لكن مااعرف لا زالوا في التعليم ام المعاش
اما اعمامك ود النور واحمد عثمان (صقير) ربنا يرحمهم ويدخلهم فسبح جناته

Quote: السلام والرحمة ود المدير مشكور كتير ومااااااااقصرتا والله حوش بكري دا لينا زمن واقفين قدام بابه لغاية مافتح لنا قريب معانا محمد بابكر زول صور الباوقة اجيبو ليك بهنا تحياتي

الغروب في باوقة حمد واللمين.

ألف مرحب بالرائع صاحب العدسة البارعة
محمد بابكر المبدع في فن التصوير...

صورة نادرة للزول السمح والعديل
حسن مختار الذي شرفنا في حوش
بكري...

الأخ الحبيب محمد حمزة الحسين
وددبايتور.

سعيدين بوجودك بيننا يا وددبايتور...

Quote: حباب ولاد جنة الفردوس السكانها حور كم هم مبدعون وعبر اخي معاوية بودمختار القنديل سراج البيت حمدلله السلامة الجيت التحية لكل الاهل في الباوقة والي صديقي علي جار النبي

الحبيب باسط المكي،
حياك الغمام.

أبداً لم ينتابني شعور يوماً أنّك بعيد
مِننا. يا باسط يا أخي إنت زولاً لينا
تب.
إتوهّط.


هذا هو صديقك علي جار النبي الرجل الخلوق
الشاعر الأديب الحبيب.
له ولك عاطر التحايا، وتقبل سلآم
جميع الأهل بأُم زهور...

Quote: حباب ناس البلد

السلآم يغشاك يا عبد الرازق،
والوِليدآت.

الشوق ليك، وعليك الله تواصل
يا زول يا سمح.


مودتي...

الـسـلـيـمـانـيّـة...

الـجـوّل...

فِـتـوّآر ...

الـبـاوّقـة ...

Quote: أخونا محمد الشيخ زياد جعفر عبدالله إبراهيم محمد حمزة إبراهيم الكاسر... إنقريابي عبداللابي همزيابي.. حفيد العمدة عبدالله ود إبراهيم و إبن أخ المرحوم مختار عبدالله إبراهيم.. تعريف كيف..مكتمل وللا لا تحياتي ليك يا ملك

مرحب حبابك حفيد العمدة ابراهيم ود الكاسر
وكدا كفيت وأوفيت
تحياتي عبرك لكل اسرة المرحوم الباشمهندس عمنا مختار عبد الله
ناس على وعبد الله وطبعا حسن ود عمكم




كنا مشغولين مع الأخ دقرشاوي ابوشورة من ابناء فتوار الذي اجريت له بنجاح عملية نقل كلية ومن ابناء الجول الأخ بدر الدين على المبارك الذي اجريت له ايضا بنجحة عملية غضروف حرجة بمدينة خميس مشيط
نسأل الله لهما تمام العافية
وجاييكم

سلام لقريبى معاوية المدير وكل ناس البوست ومرحب بمقدم ودبايتور وود جار النبى ...

فى صحفى صديق يبدو أنو ود الباوقة مكرهو الدنيا كل مره يسألنى (أنت ود الباوقة قريبك) أقول ليهو أيوا قريبى دم ولحم ...من طريقة سؤالوا حسيت أنو دايرنى أنكروا قرض,

---
التحية للجميع ورحم الله تاج السر الحسن والعوض السنوسى

Quote:

Quote: الأخ الحبيب محمد حمزة الحسين وددبايتور. سعيدين بوجودك بيننا يا وددبايتور...

شيخ العرب معاوية ود المدير
ياااخى الله يجبر بى خاطرك ايااااها المحريه فيك
واياااكا زول واجبااات عليّا الايمان زى الضبح لنا تور
اهاااا ترانى هااادى تفينه فى البوست دا نوثق معاااك وشوفنى كان انفزر
:
:
:
:
بث ياخى مكاجنتا ديييك خليها بى غااادى ...... والله كان تعرف المحبه الفى قلبى عليك يقوم لك شعر فى صلعتك دى

شباب بدون ذكر اسماء اتشرفنا بيكم ججججججت
:
:
:
:
والله رقبتنا طالت بوجودنا وسطكم
تحياتى ..وددبايتور

مرحبتين حبابكم محل ما بتقتو
باقي العشم فيكم اتلميتو كان اتفرتقتو
يازين الرفاقة اللماكم عزيزة رفقتو
والمابيكم زي بحر الجزيرة فرقتو

حبابك المسافر يا خى شيخ العرب دا كان خلى محنو دى
كالغــــيث اين ما وقع نفع
:
:
:
:
ودى الصورة مساهمة منى نرفع البوست الى ان نرفدكم بكم هايل من صور ام نخيل جنة الفردوس السكانا حور
هذه الحواشات كيلو( 7 )
ود الجِــدِيييييييد أحمد ود مجدى ودأحمد نور الجليل



وتحياتى





التعديل لتصغير حجم الصورة التى فتلت البوست

اها نواصل في مدرسة بلة:

" في عام 1971 م على ما أذكر انتقلت المدرسة الى العمارة حيث تم افتتاح مستشفى الباوقة ومازال مديرها بحيري (ابنالمتمة) الذي لم يمكث بعدها كثيرا حيث خلفه المدير عبد الحليم اسماعيل
الذي اتى من العاصمة وهو يمتطي عربة بيجو بيضاء . وقد زانه مديرا للمستشفى الدكتورمجذوب أحمد قادم منابناء كردفان والذي طاب له المقام وناسب اهل الباوقة ونتذكر العم محمد معروف محضر العملية من ابناء بربر ووالد صديقنا ودفعتنا كمال محمد معروف وبدات المنطقة في النمو "بخجل" وكلنا نذكر مطعم الدبان داخل المستشفى ومطعم البرعي الذي كنا نضرب فيهو الفول في الساعة الرابعة عصر.
كانت الداخليات خرج المدرسة : شرق المستشفى على مسافة نصف كيلو تم ايجار منزل الحاج ابوزيد (داخلية ابزيد) و شرقها على مسافة قريبة وبالقرب من دكان" شقيق الأستاذ الصادق محمد عثمان" داخلية اخرى اسمها داخلية"..................".
من هنا اترحم على روح العم جعفر ارباب والعم عمر وكل الذين مروا من هنا وراحو للدار الآخرة.

قبل الولوج لعهد بلة الخليفة"استاذنا محمد الخليفة سعيد" أمد الله في أيامه لابد من تعريججة على غارات "البرتكان

ود الشيخ ليك تحية ،،
يسعدني أند دخلت في هذا الموضوع بمدخل كبير وهو المخضرم بلة الأستاذ الذي طبع الذاكرة بأقوى المعاني لدى الطلبة وأولياء أمورهم وعلى المكان والزمان هناك ، فهذا المدخل حقيقة رائع ونتمنى أن يستمر منبع الذكريات لديك لكي يشمل الزملاء النوابغ الذين جاءت بهم الأيام فجعلوا صباحاتها منارة يسطع ضوءها اشراقا يعم تلك المساحات ...
نحن دفعة السلم التعليمي الذي أدخل المدرسة الشعبية ضمن المساق الحكومي وجعلها تحظى بقدوم الطلاب الذين كانت تستحوذ عليهم مدرسة بلة لسبب وجود الداخلية ، لذلك أصبحت الداخلية مشتركة بين المدرستين وكثير من الصفات مشتركة حين تم توزيع المعلمين كذلك بالتساوي وفي الوقت الذي كان أستاذنا القدير بلة في المدرسة الأميرية طل علينا في المدرسة الشعبية قمر من أقمار الزمان قل ظهوره في سماوات القرى ، ألا هو المرحوم " أحمد بشير الأحمدي " فهو علم على رأسه نار وخبير حوت خبرته عصارة التجارب الإنسانية وصاحبه في تلك الأوقات المرحوم الخال "الجعلي ود الدوم" والخال " زيد عبد الجبار " وأستاذي الفنان والأديب الشاعر " قمر الدين عبد الله الصديق " والأستاذ " محمد عبد المنعم " والأستاذ " عباس الخضر " والأستاذ مرسال ...
في السنة الأخيرة شاورنا أستاذنا أحمد بشير الأحمدي بأن الأستاذ بلة أقترح عليه في الأيام الأخيرة دمج الفصلين من المدرستين ووضع برنامج موحد للاستعداد لامتحان الثانوية ، وطلب رأينا ، وصمت الطلبة ، وذكر الاستاذ أنه لن يتخذ قرار من غير يعرف رأينا ، وعندما رأيته ينظر إلي ، وهي عادته عندما يخصص السؤال لطالب ما ، قلت له أقتراح الأستاذ في ذاته شهادة لنا ونحن يشرفنا ويسعدنا كثيرا أن نشترك في برنامج موحد ، لكن أعتقد أن لهذه المدرسة حق علينا ، نحن دفعة هذه المدرسة ، ولأول مرة يمكن أن يتغير الاعتقاد بأن مدرسة بلة هي الأولى وأن المدرسة الشعبية هي الثانية ، نحن قادرين على قلب المعادلة، كان رد الأستاذ هو كذلك...
وقد كان ...
نجح جميع طلاب الفصل ...
70% من الطلاب دخلوا الثانوية العليا ... وكانوا أكثر من الطلاب الذين دخلوا من المدرسة الأخرى
حقق طلاب الفصل أعلى الدرجات ومنهم الأخ عثمان محمد علي الشيخ حقق 202 من 220
وكان مثل هذا النجاح بعزيمة مثل هؤلاء الرجال الذين يستحقون التكريم ...

ومرت الأيام وترك أخي الدراسة بدو أسباب وذهبت لمقابلة أستاذنا بلة للمساعدة لإعادته للمدرسة
كانت دهشتي كبيرة لمقابلته لنا بترحاب كبير مقدراً حضورنا ولكن يعتقد أنه ليس له داعي لأنه يعتقد أنه أحق بأن يقوم بأي تصرف جئنا نحن من أجله ، بل أنه هو بنفسه سوف يقوم بعمل المستحيل لو ظهر له أن أخي هذا لديه أقل ميول لكي يكون طالب علم أو يرغب في تحقيق أي هدف من خلال الدراسة وأنه في مكان الوالد يشعر بمدى الأسى لفقدان الفرص لكن هناك أمل ويمكن يكون فيه العزاء وهو أن النجاح في الحياة أحياناً لا يمر عبر مقاعد الدراسة ، أتركو لهذا الشاب يختار طريقه ، وأنت يا أستاذ لما كنت طالب في الشعبية كنت بعرفك ، أنت كنت طالب ، وهو ليس بطالب ...
لم تكن لدي أية مبادرة للإضافة لمثل هذا الكلام، شكرناه وغادرنا وبدأ أخي مشواره ... فهو الآن في مقدمتنا.. بل طوق النجاة..

Quote: ألف مرحب بالرائع صاحب العدسة البارعة محمد بابكر المبدع في فن التصوير...

حباب الزول الرائع دوماً ود المدير ، ومرحب بكل أبناء المنطقة فى حوش بكرى

حبابك وحبابك ضيوفك







البوست كان زايغ منى بس الليله حلفت عليهو ساكيهو لم جابنى الصفحه الخامسة
تحاياتى

حبابك محمد بابكر ياخى نتلاقى فى الاسافير دى ولم يكتب لنا ان نعيش اللقيا عياناً بياناً
بعديييييين ياخى منبر بكرى دا زى الشيمه أووووب جب
وقت جات سيرة الشمه والدلات يا ود المدير دى صورة من العدلن بى تحت وقت التساااب


:
:
:
:
مع التحيات لله الزاكيات

سلام يا اهلنا
فقدنا قبل الامس خالي زروق الياس ود احمد صالح و ياله من فقد. لحق بجدي الياس و حبوبتي مدينة بت زروق و اخويه بشير و عثمان الياس و اخته اسما.
كملنا تب و لا حول و لا قوة الا بالله.

ياسين العزاء لأهلنا الزرايق والطيباب فى فقدهم الكبير فقبل فترة ليست بالطويلة فقدنا الرجل الشجاع العظيم العوض ود السنوسى والمرحوم قاسم.....ياسيف هل لديكم تواصل مع أبناء المرحوم بشير الياس

حباب أهل الباوقة وحبابك يا ود المدير .

Quote: سلام يا اهلنا فقدنا قبل الامس خالي زروق الياس ود احمد صالح و ياله من فقد. لحق بجدي الياس و حبوبتي مدينة بت زروق و اخويه بشير و عثمان الياس و اخته اسما. كملنا تب و لا حول و لا قوة الا بالله.

نسأل الله له الرحمة والمغفرة.
إنا لله وإنا إليه رآجعون.

البركة فيكم أخي السيف.

http://www.albawga.com/forums/showthread.php?t=13161

اخونا معاوية

كيفك ياخى ... اخوك من العبيدية النفافير ... والباوقة دى لينا فيها احلا زكريات وياما حضرنا فيها من افراح .. يا سلاااااااااام ياخى على الباوقة وأهلها الطيبين .
بجيك راجع تانى ونكب السكناب .
اغانى ود الحوري رجعت بى لاحلا زمن وذكرتنى بأعز اصحاب لى ... اخوك بعزف طنبور زى الورد .

تحياتى لجميع اهلنا ... بوست موفق جدا عشان الناس تتلم وتتعارف ليها ولى الزمان

مرحب بي ناس الباوقة وعبركم أحي صديقي عبادة عبد الرحمن

معتصم محمد عبد الرحمن
واللمين مدينى نرحب بيكم ابقوا لا جوووهـ لامن يجيكم شيخ العرب
اللمين انتا عندك علاقه بالسليمانيه او ناس اولاد مدينى

:
:
:
:
مع التحيات لله الزاكيات

محمد حمزة
لا حولاااااااا
والله لو ما ود المدير جاب صورتك..قايلو إسم على إسم
حبابك في حوش بكري يا محمد...أنا والله مشغووووول و ما بدخل كتير..
إحتمال أنزل السودان السنة دي..بديك خبر أكيد

Quote: Yousif Bashari · كرهنا الباوقة .. مش كفاية علينا ( ودالباوقة ) وشغل النسوان البسوى فيهو دا .. سيدى الرئيس وسيدى شنو ماعارف .. والله لو أنا من الباوقة أصلى مابقول من الباوقة وأخاف يكون كمان جعلى ..!

سلآمات أخونا يوسف بشاري.
يا يوسف إن كنت تنتسب فعلاً إلي قبيلة أهلنا البشاريين، فود الباوقة
تب مُو فايتك، نسبةً لأنّ الإنقرياب ليهم نسب عريق مع البشاريين.
أما إن لم تكن من قبيلة البشاريين، فألف مرحب حبابك وسطنا،
وما تسوي فوقنا قول الشاعر:
جرمٍ جرّه سفهاء قومٍ وحلّ بغير جارمه العقاب.

يا يوسف أخوي الله يرضى عليك لا تاخُدنا بجريرة غيرنا.

لك عاطر مودتي...

i ·
ي...

Quote: كرهنا الباوقة .. مش كفاية علينا ( ودالباوقة ) وشغل النسوان البسوى فيهو دا .. سيدى الرئيس وسيدى شنو ماعارف .. والله لو أنا من الباوقة أصلى مابقول من الباوقة وأخاف يكون كمان جعلى ..! سلآمات أخونا يوسف بشاري. يا يوسف إن كنت تنتسب فعلاً إلي قبيلة أهلنا البشاريين، فود الباوقة تب مُو فايتك، نسبةً لأنّ الإنقرياب ليهم نسب عريق مع البشاريين. أما إن لم تكن من قبيلة البشاريين، فألف مرحب حبابك وسطنا، وما تسوي فوقنا قول الشاعر: جرمٍ جرّه سفهاء قومٍ وحلّ بغير جارمه العقاب. يا يوسف أخوي الله يرضى عليك لا تاخُدنا بجريرة غيرنا. لك عاطر مودتي...

هسي ياجنا المدير الزول دا كتب كلامو وين؟ قدر مافتشت مالقيت لو محل
اها ياود البشاري ود الباوقة دا عاد نسوي عليهو كيفن؟ عنك لينا اقتراح كبو هنا( ياقول ناس سودانيز اون لاين)
ان قلت اضبحوه نضبحو ليك وانا متأكد ان بقينا على الضبح اول واحد يرقد لنا هو.

علي العموم
ماتزعل ياخي مننا والله الباوقة دي جابت احد شهداء اكتوبر: الشهيد محمد الخليفة والذي استشهد ببورتسودان وأكبر حديقة في الثغر مسماه باسمه
الباوقة جابت الفنان صديق ود كحلاوي عليه الرحمة
الباوقة جابت الجماعة الهجمو على الوالي

اها باقيلك دي بلدا بتتكجن؟؟

الصورة ياود المدير كانت ايام عيد الاضحي 2009 كان عيد ليهو طعم خاص لم الناس كلهم من الشرقيه
والغربيه
من النوادر الحصلت حقت حسين ابكر (ديقول) لمان اتملأ في الشربوت هههه
مرحب حباب سيف الدوله واهلا وسهلا بيك ومرحب حباب ود النفافير يازول العبيدية والباوقة الا البحر البينهم دا
استاذنا محمد الخليفة (بلة) ربنا يديهو الصحه والعافية
ود الشيخ بعد السرد الجميل يازول منتظرين
!!!

Quote: قبل الولوج لعهد بلة الخليفة"استاذنا محمد الخليفة سعيد" أمد الله في أيامه لابد من تعريججة على غارات "البرتكان

تحياتى

مرحب حبابك الامين مدنى عباده اخ وصديق عزيز وتحياتك تصله تب ان شاء الله

Quote: مرحب بي ناس الباوقة وعبركم أحي صديقي عبادة عبد الرحمن

آآآآآسف على التأخير
وترحيب كتير بود مختار ود دبايتور وود بابكر

Quote: حبابك محمد بابكر ياخى نتلاقى فى الاسافير دى ولم يكتب لنا ان نعيش اللقيا عياناً بياناً بعديييييين ياخى منبر بكرى دا زى الشيمه أووووب جب

حباب شيخ العرب ، وان شاء الله كان حيين بنتلاقى

سلام ياود المدير وكل ألأخوة بهذا البوست..

البشاريين ياود المدير بحهة أمبريكا والعبيدية (ابومريخ) على ماأظن..كن أود ان اسال هل (الهامك) بشاريين ..صلة المنطقة والتداخل موجود مع أهلنا البشاريين ولكن تاريخياً التسيق تم مع العبابدة فى قصىة تهريب سلاطين باشا الشهيرة..أعتقد أن صلتنا أى صلة القرابة مع أهلنا (العتمن) بشرق السودان وليس مع البشاريين..والله أعلم الخبر اليقين عند (المسافر فى هذا الأمر)

من الباوقة د. الكنين عضو اللجنة المركزية للحزب الشيوعى الأستاذ يحى الحسين المخامى والقيادى بحزب البعث ساطع الحاج ارئيس الحزب الديمقراطى الناصرى..فينا الأتحاديين والشيوعيين وحزب الأمة وجميع اصناف الأنتماءات السياسية والأخ ود الباوقة مننا وفينا لكن ذاع خبره هنا فى هذا المنبر كمؤتمر وطنى مدافع عن البشير وحزبه..



أخيرا دعونا نترحم على روح الفقيد محمد خير ابراهيم الخليفة

Quote: أعتقد أن صلتنا أى صلة القرابة مع أهلنا (العتمن) بشرق السودان وليس مع البشاريين.

سلام ود الياس
الف رحمة ونور على العم محمد الخير ابراهيم والبركة في ابنائه واخوانه
حسب معلوماتي ان علاقتنا هي بالعتمن الذين امهم بشارية
وكدي الننتظر المسافر ليوكد لنا المعلومة .

Quote: الف رحمة ونور على العم محمد الخير ابراهيم والبركة في ابنائه واخوانه حسب معلوماتي ان علاقتنا هي بالعتمن الذين امهم بشارية وكدي الننتظر المسافر ليوكد لنا المعلومة .

اخوتى بهذه الوثيقة استطيع ان اؤكد لنا صلة رحماً ونسباً بالعتامنه بشرق السودان وهم عبدلاب اقحاح
ولكن بالرغم من انهم زعماء مهمين فى الشرق لكن تجدهم منسجمين مع امارة الآمرأر وهم اخوالهم واذكر مرة قام وفد منهم بزيارة
ككر القبيلة بدار المرحوم عثمان اونسة بالحلفايا وهى دار نجتمع فيها كل يوم 14 من الشهر بطريقة منتظمه ولدينا مناديب دائمين (نحن الانقرياب )
بقيادة عمنا صلاح ابراهيم سر الختم وبابكر حاج الحسن من ارتولى وعبد المنعم محمد عبد الرحمن
وهم الاعضاء الدائمين بالككر للاطلاع ومناقشة القضايا التى تهم القبيلة بقيادة المانجل اونسة عثمان اونسة والذى تولى خلافة الككر بعد وفاة اخيه
الاكبر الخاتم عثمان اونسة وفى ذلك اليوم تعرفنا عليهم عن قرب (أى وفد العتمن والامرأر ) وضربنا لهم النحاس واستمعنا لمشاكلهم ووالتى كانت
عبارة عن تظلم من قيادة الولاية فى جعُــل التنمية وقد تحرك معهم نفر كريم لحل المشكله بتوجيهات من المركز
اخوتى انا لست عضواً بهذا الككر ولكن حريص على حضور فعالياته التى تستدعى حضورنا فى الملمات والمناسبات الرسمية
حيث يتم دعوتنا عبر الرسائل للمناسبات والتجمعات السنوية والهامه الرحمة والغفران لجدنا عثمان اونسة صاحب الدار وابنه الخاتم رحمة واسعة
والصحه والعافيه لقائد القبيله من بعدهم اونسه عثمان اونسة عميد الدار وكبير القبيلة
اللهم ارحم عبدك محمد الخير ابراهيم الخليفة وتقبله عندك وآنس وحشته برحمتك يا الله
وبرضو منتظرين المسافر لما له من باع فى أمر النسب وقد تناقشت معه كثيراً فى ذلك
واعلم عمق معرفته
:
:
:
:
:
:
:
مع التحيات لله الزاكيات
دائماً حجم الصورة المناسبه فى منبر بكرى ما يضطرنى للتعديل
اسف جداً جداً

Quote: مـرحـبـتـيـن حـبـاب وِلآد البـاوقـة فـي حـوش بـكـري ...

يعني دينق وسيف مساعد وجادات يخلوا المنبر ده؟
ودباوقة فرد واحد مجهجه باكاتن. نامن تجيبلهن ولاد باوقة
********************************************************
ياخ مرحب بيكن وكان ماشالكن حوش بكري تشيلكن سواقي الفاضلاب.
المشرقي ياود المدير خلا ريقي يجري.

Quote: من النوادر الحصلت حقت حسين ابكر (ديقول) لمان اتملأ في الشربوت هههه

هو اكِنوا ديقول دا حسين ابكر يا ود مختار ؟!؟!؟!.
نان ما قلنالكم أكان معاكم زول من ناس الباوقة حدثونا، واللآ
حسين ابكر دا ماكُم عادنوا من ناس الباوقة ؟؟؟.

قسماً عظماً يا ود مختار، حسين ابكر دا أكان وقف في بوآبة
الباوقة وقالنا ما بتدخلوا، نرجع.

مرحبتين حبابك يا حسين ابكر في بلدك ووسط أهلك...

Quote: أول باب سلام يا أهلنا وتاني الباب سلام يا لمنكم طولنا وتالت باب سلام يالشتلة الضفيره متنى

أُخُتنا سلمى علي محجوب،
ألف سلآم وتحايا لك ولأُسرتك الكريمة.

يا سلمى رغم مُشاركاتك القليلة في حوش بكري،
إلا أننا نطالبك بالتواجد في هذا البوست لمزيد
من التواصل والتعارف.
ألف مرحب بيكِ يا سلمى، ولا نقبل أعذار...

Quote: ياخ مرحب بيكن وكان ماشالكن حوش بكري تشيلكن سواقي الفاضلاب.

الفاضلابي سلام مابتققصر ومشكور . اكيد بتعرف جماعتنا في ام الطيور

Quote: هو اكِنوا ديقول دا حسين ابكر يا ود مختار ؟!؟!؟!. نان ما قلنالكم أكان معاكم زول من ناس الباوقة حدثونا، واللآ حسين ابكر دا ماكُم عادنوا من ناس الباوقة ؟؟؟. قسماً عظماً يا ود مختار، حسين ابكر دا أكان وقف في بوآبة الباوقة وقالنا ما بتدخلوا، نرجع. مرحبتين حبابك يا حسين ابكر في بلدك ووسط أهلك...

من غير قسم يا ود المدير الزول سيد بلد تب .. ومثال للنشاط والحيوية

Quote: هو اكِنوا ديقول دا حسين ابكر يا ود مختار ؟!؟!؟!. نان ما قلنالكم أكان معاكم زول من ناس الباوقة حدثونا، واللآ حسين ابكر دا ماكُم عادنوا من ناس الباوقة ؟؟؟. قسماً عظماً يا ود مختار، حسين ابكر دا أكان وقف في بوآبة الباوقة وقالنا ما بتدخلوا، نرجع. مرحبتين حبابك يا حسين ابكر في بلدك ووسط أهلك...

Quote: من غير قسم يا ود المدير الزول سيد بلد تب .. ومثال للنشاط والحيوية

حياكم الله ود المدير وحسن

تسلموا وتكرموا

Quote: مـرحـبـتـيـن حـبـاب وِلآد البـاوقـة فـي حـوش بـكـري ...

لقد ضيقت واسعا يا ود المدير يااااااااااااااخ...
يعنى هسع أنا فركة كعب منكم ... كلها 4 كيلو بس.. بيناتنا السلم والحاجاب وأبو كبيدة
( من ود الفكي علي / وحلة يونس ) ... تقوم ترحب بناسكم براكم
غايتو أنا برحب بنفسي ..

إلا الفيكم إتعرفت





الشغيل

Quote: آآآآآسف على التأخير

طبعاً الكلام دا يقبلو ليك عمده البوست دا ، او مايقبلو دى حاجة راجعة ليهو

Quote: وترحيب كتير بود مختار ود دبايتور وود بابكر

مرحب حبابك دا طبعاً بالنيابة عن زملائى

ـــــــــــــــــــــــــــــــ

Quote: إلا الفيكم إتعرفت

اكيد تقصد الفيهو إتعرفت
غايتو للضمان كدا حبابك الف يا عبدالعزيز وكان ما شالك حوش بكرى نسوى ليك حوش برانا

مشكور ياود المدير علي الصور الجميلة دي
لو عندك منها نزل لينا .. وعشان حقوقك او حقوق غيرك ياريت يكون عليها توقيع
الصور انا عايز اعمل منهم فيديو مع اغاني الراحل الحوري ..والفنان ود مدينى
رايك شنو ؟
بعدين ود بابكر عنده صور كتيره ياريت يلحقنا بيها

استراحة مه الفنان عبد الواحد ودمديني ..
http://www.youtube.com/watch?feature=player_d...ilpageandv=fb4PHyI-URY

Quote: بعدين ود بابكر عنده صور كتيره ياريت يلحقنا بيها

قريب ان شاء الله

Quote: آآآآآسف على التأخير وترحيب كتير بود مختار ود دبايتور وود بابكر

شكراً ليك وليامسون او كما يحلوا لنا
ترحيبك متأخر لكن موزون
وسعدنا بمعرفتك عبد العزيز والحبيب حسين ابكر ديقول
وقنبوا عافية
:
:
:
:
:
مع التحيات لله الزاكيات

(اللهم ارحم عبدك محمد الخير ابراهيم الخليفة وتقبله عندك وآنس وحشته برحمتك يا الله )
اللهُمّ آمين...

أولا الرحمة تغشي محمد الخير ابراهيم الخليفة
وحشره الله مع الصديقين
نأسف للتأخير بسبب الجري ورا المعايش المابتكمل
وجايينكم
وتسلموا كلكم ويسلموا ضيوفكم الأعزاء

ود الشيخ

الهامق هم عرب مثلنا من عرب جهينة
وليس لديهم علاقة بالبجة
ولكن وجودهم بين البشاريين والهدندوة جعل الناس تعتقد أنهم بشاريين

وعلاقتهم بالإنقرياب علاقة ودية وليست كعلاقة العتمن الذين هم أولاد عثمان ود عجيب

في الحقيقة لا توجد علاقة فعلية بين أولاد عجيب والإنقرياب

والعتمن رغم معرفتهم بعلاقتهم بعجيب لكن أحتموا بأهلهم البني عامر لكي ينجو بحياتهم من التقتيل والتشريد الذي ناله أبناء العبدلاب

شكراً يا شيخ العرب على نقل هذا الخيط المهم للربع الجديد
ليس فى ترحابه بشخوصنا ولكن بما تناوله من اسفار وتوثيق مهم
:
:
:
:
:
مع التحيات لله الزاكيات