ما شفتو عمر سايق البوستات ومستشارو الطيب شيقوق ؟؟؟؟!!؟؟

الاعزاء الاخوات والاخوان الجُداد والقُدام تحية وإحترام اليوم جئت لكى أسأل عن شخصية حبتتنا فى الكتابة فى سودانيز أون لاين ذلك هو العم والخال وضابطى الاعلى سعادة المشير شرطة (كما يحلو لى أن أكتب ذلك ) سعادة المشير شرطة عمر على حسن ، صاحب القلم والسطر الانيق والذى تجعلك ردوده ومداخلته لاتمل أى بوست مشارك فيه ودونكم أشهر البوستات التى شارك فيها فى دفتر أحوال الضابط المناوب (عن التعلمجى الفذ تاج السر محمد حامد الباترا) وبعده بوست ليله القبض على الطيب شيقوق،
أفتقدنا البوستات الجديدة وكدنا أن نبقى (على الحديدة !!) فأين أنت سعاده المشير وبوستاتك الحارة والطاعمة كذا المديدة؟؟!! خاصه عندما يتداخل معك مستشارك الطيب شيقوق (شيقا ) وعبيد الطييب ذلك الشاعر الذى يأتيك بمسادير ولا أروع ، الاخ سعادة المشير عمر على حسن أتمنى من كل قلبى أن تكون على الصحة والعافية أنت وأفراد أسرتك الكريمة وأحفادك ، تجدنى فى غاية الحسرة وخبرك أن هاتفى (عديم الفايدة والغير محظوظ ) لم يتكرم بإستقبال مكالمتك فى تعزيتنا فى وفاة الوالد مبارك إدريس بابكر عليه الرحمة وأتمنى أن يعالج هاتفى هذا الخطأ مستقبلاً وعاجلاً !! واليوم إن شاء الله سوف أتركه ليقّدم الاعتزار بالاتصال عليك عصر اليوم أو المساء إن شاء الله ،الى ذلك الحين أستودعك الله الذى لا تضييع ودائعة مع العشم بمداخلات من الاخوان بسودانيز أون لاين يؤكدوا مكانتك الشاغرة وأننا أفتقدناك كما يفتقد البدر فى الليلة الظلماء فهل عاودت الانوار سعادة المشير ومعك المستشار (الطيب شيقوق ) ؟؟!! ولعله أيضاً على الصحة والعافية ختاماً تحياتى لجمييع الاخوان ومن بيرمنجهام سلام .

تحياتنا وتقديرنا ياكمندان
كلنا بخير انا وخالك شيقا والعبيد شاعر المهاجر والاوطان وكل من بالمنبر .. نقوم ونقع .. ونقع ونقوم .. زول جايب لينا خبر مافي ..
والطيب شاغلنا بالحبش والغنا البخلي الواحد يحت قبال ما يملص نعلاته .. خلينا الحضره والذكر وبقينا في الحت والرقيص ياولدي ..
مخير الله علينا

انت بس (شمشم) بي جاي وبي جاي .. اول ماتلقي ليك مزيكة حبش تلقي الطيب قاعد .. وكان مشي يقضي ليه غرض خالو طوالي
يعمل غفر سلااااااااااااح ويطوطح ليه البوست لامن يرجع

منتظرين تلفونك .. والله يجعل الوالد من اصحاب اليمين .. وبركة الجيت ..


عمر علي حسن

تحياتي وسلامات عزيزنا ود السقاى

في حكاياتنا مايو... جيل مايو... أو ( من زاوية أخرى )

هنا تجد سعادة اللواء عمر
يقدم شهادة ( أن ليس من رأى كمن سمع )
أو شهادة أن ليس من عايش الأحداث من مكان ( المشارك ) كمن قرأ كتاباً أو سمع ونسة أو قرأ قصاصات صحف
وهو إذ يقدمها فلا يرجو من ورائها إلا إحقاق حق كادت أن تندثر معالمه وراء غلواء ( الإبتزاز ) الفكري والسياسي

سلام كمندان السقاي

خالص تعازينا في وفاة والدكم - سائلين المولى العلي القدير أن يتغمد الفقيد بواسع رحمته ويسكنه فسيح جناته وان يلهمكم والأسرة الكريمة الصبر والسلوان.

(إنا لله وإنا إليه راجعون)

Quote: والطيب شاغلنا بالحبش والغنا البخلي الواحد يحت قبال ما يملص نعلاته .. خلينا الحضره والذكر وبقينا في الحت والرقيص ياولدي .. مخير الله علينا انت بس (شمشم) بي جاي وبي جاي .. اول ماتلقي ليك مزيكة حبش تلقي الطيب قاعد .. وكان مشي يقضي ليه غرض خالو طوالي يعمل غفر سلااااااااااااح ويطوطح ليه البوست لامن يرجع

هههها والله انت احلى خال في الدنيا اكان لقيت الناس في حلقة ذكر بتشيلك ام هلا هلا وتوش داخل فيها اعمى واطرش واكان كمان لقيت عولنا ناس سد النهضة عييييييييييييييك .

Quote: واكان كمان لقيت عولنا ناس سد النهضة عييييييييييييييك .

باقي ليك سد النهضه ده ما بنلقي لينا فيهو حمام كده ؟

عمر علي حسن

Quote: باقي ليك سد النهضه ده ما بنلقي لينا فيهو حمام كده ؟

خالي خالي امانة ما غطست حجرنا طاااااااب - قالوا ام امير وام عبد الله متابعات

ام عبد الله امرها ساهل - ات فاكر كيف؟

اقوم اجيب الموبايل واعبئ رصيد وهلووووووووووووووووووووووو طوالي يقومن البنيات يتشالقن للرد يقولن لي هلو بابا - خالك يقول ليهن معاى منو ؟ اي بابا معاك رجاء بتك - لالالالالالالالالالالا ادوني ام عبد الله اول حاجة اشبع منها وباقي الرصيد If any للعندها قسمة في بابا . وحياتك الكليمات دى تشحن ام عبد الله تاني اسبوع بطاريتا ما تنزل .

لقيت خالك كيف؟

أزعم أني قرات كل ما كتبه سعادة اللواء عمر علي حسن ، أو ( ألريس) كما يحلو لجيراننا الهلالاب مناداته.
كثيرا ما أتمنى الا يقاطعه احد ، لكن ذلك غير مجد لان طبيعة المنبر تتطلب ذلك ، أما إذا صادف ( حكي) سعادتو احد
اختصاصيي الدويتو ولعب آلون تو أنيييستا ميسي شافي، فهنا تمتع نفسك بالدهشة. لقد قيض المولى أن نمتع الأعين
بقراءة عمر علي حسن كشاهد عصر على الزمن السمح ،
التحية لاستاذنا عمر ولك والعربي شيقوق.

والتحية لكل الحاضرين والمتداخلين أصحاب العنوان سعادة المشير شرطة عمر على حسن والمستشار الطيب شيقوق ، سعدت أيما سعادة وأنا أعود من العمل وأدخل فى النوم أصحى القى المواعيد غير مناسبة للإتصال !!لكن بحاول برضو لكى أمنى نفسى بالسمع بعد أن متعنا المشير بالحروف التى لا يبور سوقها (مثل بنات الامهرا ) !! والله يا جماعة قبل ثلاثة سنوات فى فندق ميرتيم بون فى مؤتمر الامم المتحدة للمناخ كانت شغالة معانا بت أثيوبية (من الامهرا ) على النعمة قربت تجننا عدييييل !! والله الواحد بتيين يصحى من النوم عشان يمشى الشغل يشوف المخلوقه دى !!! والله يا جماعة الواحد لو ما تجاوز ال50 ما عارف كان يعمل شنو !!مرات والله (الكُبر والعمر حجاب !!) اللهم أحفظنا فى باقى عمرنا من الامهريات وسد النهضة !! إن شاء الله أهلنا البغادى لينا غير الموية القديمة ما يطوقو جُغمة !!!! ونواصل بدون فواصل .

حاولت نقل أغنية ما شفت عوض سايق النجمات راح عدى وفات يا سارى الليل ولم أوفق !!من منكم يقوم بذلك وله الشكر الجزيل .

Quote: كثيرا ما أتمنى الا يقاطعه احد

خالك - يا خالي أمحمد المرتضى - زى صحن المشاوي وسط الصينية ، شطتو الخدرا ود السقاي وعتّيو العبيد ود ابوى الطيب وليمونو خالك شيقا وتحليتو منى بت الخليفة .

قال لينا ما يقاطعو أحد

Quote: شغالة معانا بت أثيوبية (من الامهرا ) على النعمة قربت تجننا عدييييل !! والله الواحد بتيين يصحى من النوم عشان يمشى الشغل يشوف المخلوقه دى !!! والله يا جماعة الواحد لو ما تجاوز ال50 ما عارف كان يعمل شنو !!مرات والله (الكُبر والعمر حجاب !!) اللهم أحفظنا فى باقى عمرنا من الامهريات وسد النهضة !! إن شاء الله أهلنا البغادى لينا غير الموية القديمة ما يطوقو جُغمة !!!! ونواصل بدون فواصل .

سلاااااااام ومعزة ليك الكُمندان السّمح ود السقّاي ومعزة قدرها لسماحة اللواء عمر وابوي الطيب والسّمح بلحيل ود المرتضي
الشّايل إسمو ولعاطف عُمر ولي المنسي الما بنسي ورويحة دعاش باردة لي الجميل ود المكي
ونوار سعات مصرور في طريف هديم لي أم عروض بت خوجلي ولي كل سمحين النّافلة
اها بت اللّمهرا مخلوقة مولانا الوقّفت ريشات قلبك قبالك الغناي قال في واحدة تنيدتها

"جيت باري البيت نامن مليت شوفي
وجرَّت مُقنع الحشمة الحرق جوفي
البنوت بلاك يا مُنضرة شوفي
عملن لي طمام فيهن كِتر عوفي

اها إن شاء الله مليت شوفك أبوي الطيب قال شحن بطاريتو بي التلفون.......


محبتي والسماحة فالكم جميعا

الاخ الرائع عبيد الطيب تحياتى سعدنا بأن أرض التمام كادت على الاكتمال وفى إنتظار حضور كم غايب لرفع التمام لسعادة المشير !! الاخ عبيد (اللُمباشى ) رتبة تخص مادون الضُباط من الرتب الاخرى أو من أفراد الشرطة من رتبة شرطى حتى مساعد !!ولكن مقبوله ما بنباها طالما جات منّك !!! مدير المدرسة الاولية فى الزمن السالف كان كثير (الشراب ) فكثرت شكاوى المعلمين وأولياء الامور الى وزارة التربية فتم تخفيضة الى وكيل بدلاً من مدير فقال لهم المرتب موجود معالكم حتى درجة (فراش ) !! فأنا أقول لك أخى عبيد الطيب إنت والمشير والمستشار موجودين أنا معاكم لى نفر شرطى !!!.
معانا أخ مصرى فى الشغل بدأ معاى من لواء وكل إسبوع ينزلنى رتبة حتى وصل الاسبوع الماضى الى (عقيد ) فقلت له يا خالد أنا معاك حتى رتبة الصول فضحك حتى البكاء !!!!! وقال لى والله عجبتنى عقيد وما بنزل منها !!وأنت نزلت رائد وأنا أديتك رتبتين !! فقلت له بارك الله فيك رغم أننى لم أجدها من رئاسة الشرطة السودانية ولم يجدها الخال والعم المشير عمر على حسن !!ونعشم أن يتكرم عليه رئيس الجمهورية برتبة الفريق شرطة ويترك لنا المشير فى المنتديات الاسفيرية .

* سعادة المشير يبدو أن (إتصالاتى وضربى كلو فى الجبل ) مثل ضرب أخونا وزميلنا بالدفعة عثمان أبوالهول فى ضربنار الكلية كل ذخيرتو يكبها فى الجبل !!! شرفنى بعد أن نزل برتبة اللواء بالحضور فى السقاى للعزاء فى وفاة الوالد مبارك إدريس عليه الرحمة وكانت أخر مشاهدة بيننا فى العام 1983م حيث عملنا سوياً فى مطار الخرطوم وتم نقله الى كسلا ولم أشاهده منذ 30 سنة !!.
أتصلت بالامس قرابة الواحدة صباحاً بتوقيت الامارات تقريباً واليوم التاسعة صباحاً ولم أجد ولا عمورى ذاتو للرد !! لعلكم بخير وسوف أحاول .
نريد تعليق خاص على (اللمباشى ) من سعادة المشير شرطة عمر على حسن ومن بيرمنجهام سلام .

مقبوله لو أُمباشى أو قول صوووول
بس ادينا من حرفك لذيد معسووووول
ادينا كم مسدار جديد مشتوووووووول
زى ديييك الامهرية اللاقصر لا طووووول

:
:
يـوم السَّـدْ يَتِـمْ، يا شـيقا نِحْـنَ وإتُّـو
صَفْقَه ولوك لُبان، والبشرى ينسى سِبِحتو
يا الكايسَ الغَـنَج، عاد (أبرهيت) ما سِتُّو
جنـابو عمـر يَهِـز، بنات الأرومـو يَحِـتّو

Quote: :جنـابو عمـر يَهِـز، والأرومـو يَحِـتّو

ود المكي الجَنَب
امانه ما احتهم ليك حت .....
الان فهمت قول الفيتوري .. (حدقت بلا وجه .. ورقصت بلا ساق) ..

ابشر بالخير ..
عمر علي حسن

Quote: مقبوله لو أُمباشى أو قول صوووول بس ادينا من حرفك لذيد معسووووول ادينا كم مسدار جديد مشتوووووووول زى ديييك الامهرية اللاقصر لا طووووول

شكرا الحبيب الكمندان الرائع ود السقّاي
قلتها ليك وفي خاطري الزعيم الراحل ناظر الكواهلة محمد فضل اللّعيسر "الهرديمي"
كان في مقابلة مع الرئيس الراحل النميري وكانت توجد كتيبة بالمنطقة الغربية أيّام إنقلاب الراحل محمد نور سعد
فسأل الرئيس الناظر الهرديمي قائلا" هل قابلت قائد الجيش بمنطقتكم..
ليرد الناظر قائلا يا الرئيس أني اللّمباشة البعرفو وبقضي الغرض وبسند الرّازة وااااااااااحد وغيرو مافي
ليسأله الرئيس منو دي اللّمباشي دي المالي عين الناظر.
ليجيبة الناظر : بلا أبو القاسم تاني منو.......
فنأسف إذا شاترت وأخذتني معزتكم بعيدة فيشهد الله كم احببتكم قبل المشاهدة وهذا يجعلنا وإيّاكم من أهل العرفان......أحببتكم لخلقكم وجمال روحكم ويشهد الله من معزتنا لكم كتبت المداخلة وانا مريض راقد "أم داكووووووووووم"
وهذا إعتذار علي عجل وبجيكم صاد......
" عينة النترة يا السّقّاي وماك بطين
وإنت بترفع الرّازة وتكيل العين
إنت جميل دواخل وفي المحاسة الشَّين
وأنت الدُّخري لي ناس أم سماح وفطين

Quote: قالوا ام امير وام عبد الله متابعات

الناس ديل ياخال كلمناهم وجبنا ليهم كتاب مصلحة السجون ... التأبيده 25 سنه .. وسنة الحكومه 9 شهور .. تكون الحسبه 20 سنه ..
هاودناهم 10 فوق البيعه .. تاني عندهم شنو عندنا ..

خلي السد يتم .. والله اقلبها ليكم (سدانيز) اونلاين .. وخلي اليتابع يتابع .. وكان سكوني اجري عكسي .. عشان ما يقبضونا الاتنين

عمر علي حسن

Quote: التحية لاستاذنا عمر ولك والعربي شيقوق.

المرتضي الفاهم الاصول
يعلم الله انا كنت عارف ريحه (السلات) بتجيبك ... طيب يا شيخنا نحن العلمنا سكة اهل ساره القيافه دي منو ؟ .. كان انا كان
خالي من ديك وعييييييييك .. الرمي حجابه والبلع حرّاساته .. لامن بقينا دعاة وحده (اندماجيه) ..

يسألك الله كان تقيف تتكرف بلوشي كده .. ادينا انشا الله صورة واحده .. يرضي عليك ربنا

عمر علي حسن

Quote: (عدل بواسطة عبيد الطيب on 13-06-2013, 05:55 AM) (عدل بواسطة عبيد الطيب on 13-06-2013, 05:57 AM) (عدل بواسطة عبيد الطيب on 13-06-2013, 08:34 AM

شيخي العبيد
نان لامن تعدل ما تعدل الا اللمباشي الخلت الصول الباتره يتقلّي وينضم بره من راسو ويرميها فوقنا .. قال للعربي نلقّط فيها فتله فتله من
مستجد لغاية صول .. تجي تخفضنا اربعه رتب ..... شايفين العملتوه فينا يا طلبه !!!

كنا في التدريب العملي نقوم باعمال كل رتبة بزي الرتبه .. ولبسنا 3 شرايط لنتدرب علي مهام الشاويشيه .. واحد معتاد اجرام عامل شوشره
في القسم ومافي زول قادر يدخله الحراسه .. جينا انا وعباس مدني وحسين خير الله شلناه طب العصب وك ل بشناه ودخلناه الحراسة .. قعد يكورك
ياولاد ال ...... صغار وحلوين كده يرقوكم شاويشيه ؟ .. انا عارف الضباط ديل بيعملوا ليكم شنو ؟؟

ما ترفع من الكمندان وما تديه فرصه .. اذنك معاك .. اوعي تعدل

عمر علي حسن

Quote: أتصلت بالامس قرابة الواحدة صباحاً بتوقيت الامارات تقريباً واليوم التاسعة صباحاً ولم أجد ولا عمورى ذاتو للرد !! لعلكم بخير وسوف أحاول . نريد تعليق خاص على (اللمباشى ) من سعادة المشير شرطة عمر على حسن ومن بيرمنجهام سلام .

يا كمندان
الساعه واحده ؟ .. انت قايلني شاويش نبطشي ؟
تلفونك ده فتشوا ضرب وين .. وعموري ذاتو نايم جنبي .. كان سمعو كان ابتهج .. وديك يالسهرة ..
بركة الما رد عليك هندي وشتمك بالبنغالي في الليل داك

اما اللمباشي فكيفتني جبنه .. وبركه الراجل خلي ليك فتله .. ما سولبك تب ..
مره حلفت لواحد صاحبي شاويش اعزله .. قال لي كلهن ؟ قلت ليه كلهن .. قال لي طيب خلي واحد نتذكرك بيهو لما ينقلوك ......

تحياتي
عمر علي حسن

Quote: ليجيبة الناظر : بلا أبو القاسم تاني منو.......

لحّقوا ليك الباتره يا العبيد .. عافي منو الفهمو ما خلاه يقلب ليك نميري نفر ..

عمر علي حسن

Quote: الناس ديل ياخال كلمناهم وجبنا ليهم كتاب مصلحة السجون ... التأبيده 25 سنه .. وسنة الحكومه 9 شهور .. تكون الحسبه 20 سنه .. هاودناهم 10 فوق البيعه .. تاني عندهم شنو عندنا ..

طيب ارخي اضانك قريب لخالك يسعلك السعال دا - وطيب - يا خال - هسي السمك الفي المخازن دا نسويهو فحم؟

Quote: هسي السمك الفي المخازن دا نسويهو فحم؟

انت ما تخليهو في مخزنو .. في زول بسألك ؟
قالو البباري الجحّار بيقرص .. .. شيل مفتاح المخزن وما عيك منهم

عمر علي حسن

آها يا سعاده المشير أسع قبل دقائق جربت النمرتين الاولى والتانية و15 جرس مافى زول قال لى آلو !!! قلت ألحق سمك ود شيقوق الجاى من سد النهضة ده بى طينو !!!!أما الثابت فإقول يالله حافز من5 الف درهم ولى فوق لى أم عمورى طوالى ترجع الثابت وتخلينا كدى مصاقرنكم فى التلفون تانى ناس شيقوق ديل إلا يدفعوا !!!!.

أنا و الله سعدت أيما سعادة بمتابعة كتابات سعادة الفريق علي بوست الهضبة .. و كذلك الجميل شيقوق


عبدالناصر الخطيب إستكمل اللوحة بمداخلاته الجميلة و العميقة .. لذلك أضيفه هنا كضلع ثالث لهذا الجمال ..

Quote: أسع قبل دقائق جربت النمرتين الاولى والتانية و15 جرس مافى زول قال لى آلو !!

مصيبه يا كمندان
التلفونات علاقتي بيها تبدا بعد منتصف النهار .. ما لقيتها في محلها قلت لعموري امشي شوفهم محل كنت قاعد امس في الصالون .. جاني
حانف وجيهو قال ما لقاهم .. لا ابو 68 ولا ابو 86

يظهر اني نسيتهم في حته مشيت ليها مع جماعه بالليل .. يكونوا ما عرفوا يضربوا لي عشان اجي اخدهم .. حيضربوا لي وين ؟ الا امشي
بعدين اقص اتري ... اجيبهم من محل نسيتهم ..

ما تخاف زول بسرقهم مافي .. مال حلال .. انا عارفهم

عمر علي حسن

الى أن تعود التلفونات (التلاتة ) يا سيد الحيشان التلاتة عايزين سعادتك فى بحث عن سد النهضة تجاوب فيه عن أسئلتنا وهى تبدأ :

لماذا أختار الاحباش هذا التوقييت بالذات ؟؟
لماذا كان رآى حكومة السودان غير منسجم مع الرآى المصرى ؟؟ ولصالح قيام السد دون أدنى إعتراض ؟؟؟
هل هو بداية حرب المياة ؟؟
وهل حقيقة أن السد تتحكم فيه إسرائيل ؟؟ وهل الموضوع (بييع كهرباء وفلوس واليهود معروفيين بحبهم للربح والفلوس)؟؟؟!!!
وهل تتوقع أن تقوم حكومة جنوب السودان بسد مماثل فى ظل (قفل الانبوب منهم !!!) ؟؟؟ .

طالما وجدناك متمهل وبى عافيتك والحمد لله ما ك راقد زى أخونا عبيد الطيب نسأل الله له عاجل الشفاء ،نريد أن يكون البوست كوكتيل وسوف نعرج كمان على الهلال والتسجيلات الاخيرة فما رأى سعادتك ؟؟؟

ولعبيد الطيب ندعو بهذا المسدار :

سلامة ويشفيك الكريم من سقم وراقد
وتبقى نصيح يزورنّك وداد ...وسُعاد
وتشرب صافى تاكل منو أطعم زاد
ونفتش ليك نلقاك فى كم ميعاد



ولكل المتداخلين نقول البوست مفتوح والعتب مرفوع والمواضيع على الشيوع ومن بيرمنجهام سلام وإجازتى من الشغل (أخذتها كسر رقبة الخميس والجمعة رغم إعتراض رئيس الوردية الكردى !!لكن العراقى الاعلى منو رئيس العاملين كلهم قبل طلبى بأننى بعد هذا العمر لا أرغب فى أن تفوتنى جمعة واحدة فوافق مشكوراً ) لذلك قلت الخميس ده يكون صفقة ورقيص مع أخوانى الكرام فى هذا المنتدى وكل المنتديات وكمان بقييت يا سعادتك (بتاع فيس وبوك كمان!!!!) .

متابع الكلام الجميل دا ..... اظنكم ماكم بعاد منى فى العمر......عمى الطيب غير محسوب

Quote: لماذا أختار الاحباش هذا التوقييت بالذات ؟؟

علي كيفهم يا كمندان ..
الناس دي قاعده تكورك من زمن الامبراطور انه مواردهم ما بتساعد شعبهم علي التطور الا عن طريق استغلال مواردهم المائيه

وموضوع بيع الكهرباء ده احد احلامهم التي اخضعت للدراسة وتاكدت جدواها ..

Quote: لماذا كان رآى حكمومة السودان غير منسجم مع الرآى المصرى ؟؟ ولصالح قيام السد دون أدنى إعتراض ؟؟؟

المصريين عندهم حصة محدده في مياه النيل .. وقد اعتادوا ان يسفسفوا فائض الدول الاخري ومنها السودان .. عدم اعتراض السودان
علي قيام السد له الف مبرر اذا لعبها الجماعه صاح .. لكن شكل المسأله فيها إنّ

Quote: هل هو بداية حرب المياة ؟؟

وينك يا كمندان .. حرب المياه دي شغاله ليها زمن طويل ..
النميري فهمها بدري وحاول قناة جونقلي لفائدة السودان ومصر ..

Quote: وهل حقيقة أن السد تتحكم فيه إسرائيل ؟؟ وهل الموضوع (بييع كهرباء وفلوس واليهود معروفيين بحبهم للربح والفلوس)؟؟؟!!!

كل شيء جائز ..لكن البحث في علاقات اسرائيل بالحبشه يقول بغير ذلك

Quote: وهل تتوقع أن تقوم حكومة جنوب السودان بسد مماثل فى ظل (قفل الانبوب منهم !!!) ؟؟؟ .

تفتكر بيقدروا ؟؟

مش تخلينا في (الانفتاح) اللي حيسببه السد .. ونمشي نستحمي ونقدل بي غادي .. يمكن تلقي البنية بتاعة المؤتمر بي غادي .. وانا القي الدايرو .. وخالي ذاتو
كان مايكون حسه حسه غاطس ليه في طمله جنب السد ماتديني ايدك ... وأقول ليك شيء .. عبيد كان اتقدر وصل بي هناك شفاه مضمون ..

عمر علي حسن

:
:
حباب ود المحرب


مرحبتين حباب، شيخ العرب كيف حالك
راكبين فِدْ سَـرِج، شيل العُمُـر من بالَك
مجلسنا عامِر و تـام، بالكِـرام أمثالك
دوبيت ونم وقصيد، بالمـرَّه شيل شبّالك

ولعل أصعب الكتابات هي التي نكتبها عن الأفاضل من الزملاء والزميلات..
واصعب منها في رأيي الكتابة عن سعادة اللواء..
ليه بقي؟؟
لأنه يجمع بين أشياء وصفات كثيرة طيبة ونبيلةوكمان دمها خفيف..
يعني سعادة اللواء بجانب جديته وأنضباطه فهو أيضا يحب الدعابة والضحك..
وهذا أكثر ما يعجبني فيه فالحياة اساسا جافة..
وطبيعة المنبر لا تتحمل في رأيي الكتابات الجامدة ولا تلك التي تخلو من الذكريات والتجارب..
من منا لا يحب أن يسمع حكاوي وذكريات لها معني؟؟
أو مواقف مضحكة؟؟
أنا واثقة ان سعادة اللواء لسه عنده كتير جدا لسه ما قالو..

...............
...............

بس بصراحة في مشكلة!
لو سألتني يا ود السقاي المشكلة شنو بجي أوريك ليها..كويس؟؟

مع التحيات لك ولكل من مر من هنا..

كدى قبال ما تورينا المشكلة كدى النقول ليك سعدنا بحضورك الزاهى والذى أضفى على البوست حلاوة وزاده حضوراً وغلاوه فواصلى فى الزيارات والردود الاخت منى خوجلى وتحياتى .

سلام صاحب البوست وشكرا ليك كتير

منذ زمن ونسيت حاجة جميلة اسمها سودانيز اونلاين ليس لشئون سوي الانشغال

الأحباء الريس والزعيم كيفكم
أنا شايف في احدي مداخلات الزعيم الخال جاب سيرة سمك
الزعيم تخصص سمك والشاهد عند زيارتي الأخيرة سلطنة عمان
عزيمة سمك ولا اروع وان شاء الله ناوي اكررها

الريس صدق صاحب البوست فالجميع في انتظار ما تبدع به أصابعكم علي الكي بورد
دمتم جميعا

سيد بشري تحياتى ليك ولى ضيوفك الكرام

بوست جميل والله وجماله ياتى من اختياركم ان يكون موضوعه سيد عمر وسيد شيقوق فهما كلغيث اينما حل نفع


اسال الله لكم جميعا دوام الصحه والعافيه

Quote: and#211;يعني سعادة اللواء بجانب جديته وأنضباطه فهو أيضا يحب الدعابة والضحكand#199;and#225;and#218;and#199;

العُمَر عُمَرين ، لي حَـقّو تَب وفّـيتي
لخصالو الحميده، وحُسن الطّبِع كَفّيتي
حباب بِت الخليفه، المِن منابعو رِويتي
المنـابر نوَّرت، بي طَلَّـتِك يوم جيتي

يا اخونا والله مزحوم ومحاصر

جيت ابارك ليكم اللمة الجابت الجنرالات اصحاب السعادة كووووووولهم هنا ربنا يمد في اعمارهم واعمارنا

وكمان الخال حسن طه والاميرة بت الخليفة

جاييكم وما تخلوا الجنرالات الوردوا البوست - ود المكي وود سر الختم - ما تخلوهم يفلتوا منكم يا الخال الريس وود السقاي

ا ساري الليل

من يوم البحر الجانا وتسب وقام
يوم دخل الحلة وهدم بيوتنا ترا وهدام
صبحنا ضيوف ما خلاّ وراهو صلة أرحام
يوم داكا عوض خلاها مرق سفره طويل مع الأيام
ثم يسترسل في أوصاف عوض
درويشاً صغير عشرة أعوام
الزول زول الله من الصلاح الرفعت عنهم الأقلام
من غرث الرسل الدارو الآخرة أم خيرن دام
التركو نعيم الدنيا الزايل للعبدوها وللحكام
ثم يبدا في وصف ملابس عوض وما كان زاده يوم خروجه
متجلبب بي تيبان الرحمة غتا وهندام
متنعلت بي أرض الله الواسعة خطى الأقدام
متزود شايل خير الزاد تقى وإلهام
يا ساري الليل ما شفت جناح جبريل
غتاهو بقالو مظلة جلوس وقيام
يا ساري الليل أين ذهب عوض هل غرق في جوف الليل
أم رحل في رحلة تصوف
يبقالي نجع متوجه قاصد أرض الشام
ما شفتو هناك مع الحجاج لابس الإحرام
بين يثرب ومكة وفي بيت الله المكسي رخام
يبقالي هناك يكون مندسي مع الخدام
يا ساري أبل جهدك نحنا فتشنا في كل محل ما خلينا بكان
فتشنا سما أرض ما شفنا منام
في التمر الشايل تكا سبيطو مدلول خام
في الجرف الأخضر في لوبيهو وفي النجام
في جدول جاري تسرسر مويتو نعيماً دام
ومع ذلك لم نجده وقد طال الغياب
ولن نيأس فالحلة في الانتظار فاينما وجدته بلغه السلام
يا ساري الليل أنا داير أوصيك وأديك كلام
الروح إين صعدت لي باريها وفي جنات الخلد مقام
لو لاقيتو في إي مكان في إي زحام
روح كلمو قولو الحلة بكت من شوقا إليك تغريك سلام.

ما شفتوا عوض؟؟

شكرا ودفضل الله وكل زوار الخيط الاكارم
مستمتع جدا والله
كل مره اجى اقرأ الكلام السمح المرتب
وفيه نكهه وبخلى الزول ينقر عصاتو ويجيكم لحد عندكم
ود السقاى بوستك سمح وكلامك اسمح

:
:
حرَّم منصور المفتاح ان حضر...... ناقصة وتمَّت.

يااااااااااااا شيقا .... دا كلام شِنو دا؟

سعادة اللوا عمـر
الماجدة/ منى بت الخليفة
البشرى ود السقاي
الحسن ود طه
علي ود سر الختم
شيخ العرب ود المحرب
العبيد ود الطيب

اتوكلنا ابتدينا، يا شيقا عاقْلَ الجافله
جملك ان شرد، خلًّو، و ألفى الحافله
المجلِس عَمَر، والسايقه لا بُدْ واصله
ان فاتك فرِض، ما ظِن تَجُبْرو النافله

بس بصراحة في مشكلة!
لو سألتني يا ود السقاي المشكلة شنو بجي أوريك ليها..كويس؟؟

مع التحيات لك ولكل من مر من هنا..

_____________________________________

المشكلة يا ود السقاي إنه بيغيب كتير..


أها وريتك المشكلة ..رأيك فيها شنو؟؟

شكرا علي إستقبالك اللطيف..

العزيرة منى خوجلى تحياتى ، بخصوص المشكلة ولو المشكلة غيابى أعتبرى المشكلة محلوله ،والسبب أننى بررت غيابى وقلت لكم كانت لدى مشكلة فى الكميوتر وقد تم تغيرة وكانت المشكلة قبل وفاة الوالد عليه رحمة الله وأيام الوفاة والسفر للسودان والعودة كانت مشاركتى كلها متعلقة بالعزاء والرثاء للوالد مبارك إدريس ، لى أكثر من شهر تقريباً أنا نشطت فى المنتدى بصورة واضحة وردوى ومواضيعى فى اليوم لاتقل عن 5 مداخلات .
فتحت بوست ما شفتو عمر سايق البوستات والذى بحمد الله نجح ولمّ الناس وهآنذا أكتب فيه الرد العاشر تقريباً ، على العموم أعتبرى أعتبرى المشكلة أنحلت وحضورى سوف يشرّفكم إن شاء الله نسأل الله أن يديم علينا نعمه الصحة والعافية والحضور فى البكور ومن بيرمنجهام سلام .

يا سعادة المشير شرطة عمر على حسن والناس المهتمين بأمر تصفيات أفريقيا المؤهلة لكأس العالم والمشجعين أهلنا (الحبوش ) غداً تلعب أثيوبيا ضد جنوب أفريقيا فى أديس ونريد أن نعرف من تشجعوا ؟؟؟؟
* ما رأى سعادة المشير شرطة عمر عبى حسن فى فوز بايرين ميونيخ ببطولة الاندية الاوربية أبطال الدورى والفوز التأريخى على برشلونة (7 مقابل صفر ) بواقع أربعة فى ميونيخ و3 فى برشلونة !!!.
نعرج على الهلال لو كنت رئيس النادى الان ماذا أنت فاعل لكى تكسب الدورى وتتخطى المريخ المتقّدم على الهلال فى الدورة الاولى ب5 نقاط؟؟؟؟.
* فى عهدكم واللاعب المحلى والان مع اللاعب المحترف عجز الهلال فى الوصول الى كأس أفريقى ما هى الاسباب ؟؟؟
* هل خروج الهلال أمام (سيوى الايفوارى ) كان حظ أم مستحق !!!.
* وماذا عن تكريم جمال الوالى الاخير بحضور الاهلى المصرى فريق القرن ؟؟.؟؟.
*هل أزمة الكرة السودانية يمكن أن نجد لها حل وما هو ؟؟؟؟.
* تسجيل هيثم مصطفى هل كان السبب فى خروج الهلال من دورى الابطال الافريقى وتقدم المريخ ب5 نقاط على الهلال ؟؟؟؟؟.

Quote: المشكلة يا ود السقاي إنه بيغيب كتير..

قاصداني انا ياو لد .. وبي تحت تحت كده معاي خالي ..
وهي اصلا ما مكتوبه في دفتر الغياب

يا خالتو .. والله المعايش جبارة والمرض والضيوف ويلا ساقيه مدوره .. وخالي داك النقنطره ليكم .. ماعندو دي (اصبعين في سني الفوق) ..
اوعي تسيبوهو

في اضانك كده .. انتي مالك غايبه

عمر علي حسن

Quote: سيد بشري تحياتى ليك ولى ضيوفك الكرام بوست جميل والله وجماله ياتى من اختياركم ان يكون موضوعه سيد عمر وسيد شيقوق فهما كلغيث اينما حل نفع اسال الله لكم جميعا دوام الصحه والعافيه والابتعاد عن الكورة وخاصة السودانية ؟؟؟

شكراً الدفعة على جويلى على التوقيع فى دفتر الحضور وعقبال مزيداً من السطور وبارك الله فيك ، وأظنك شغال بالمثل البقول (بارك الله فى من زار وخفّ) ، تحياتى ولكل الاخوان بالدفتر بى غادى .

Quote: شكراً الدفعة على جويلى على التوقيع فى دفتر الحضور وعقبال مزيداً من السطور وبارك الله فيك

ياسيد بشرى عشان دفعتك بتشكرو غلى الحضور يعنى انا حضورى ما بسوي شى ولا كيف

؟؟؟؟ وبعدين هو جاب مداخلتى بى ضبانتها ياخى..


لكن الفيك انعرفت تب

Quote: وخالي داك النقنطره ليكم .. ماعندو دي (اصبعين في سني الفوق) .. اوعي تسيبوهو

هييييييييييييع خالك بالحيل كلس بنقي العنكوليب وبيأكل براهو وكمان بدور بدوّر شمامة

انت فاكرو ..........د أمونة؟
بجيكم بعد افضى من الزحمة

أكرموا ام عروض وبقية الجنرالات .

سبحان الله يا على سرالختم كنت متوقع قبل أن أشاهد وأطالع حضورك وردك كنت متوقع حضورك بنسبة كبيرة جداً لذلك فاتنى حتى أن أشكرك فالعتب علينا خاصه أننى شكرت الدفعة الاخ على جويلى والذى نقل (مشاركتك بى ضُبانته !!) وقد لاحظت ذلك !!ولكن قلت دايماً الضباط الكبار بعملو كده لثقتهم فى ضباطهم الاصغر رتبة والاكبر عقلاً وفكراً ومشاركة .

ما بتقّصر وحاتك وإنت فاتح البوست
ولميت الكجر كتبو الحروف بالنوت
ما كان قصدى اتجاهلك وما بفوتك فوت
يا أسد الخُشش الما بهاب بهاب الموت

آها أديتك مسدار عديييل ودفعتى ذاتو ما لقاهو !!!آها قصرت معاك !!ولومك ما مرق ساكت ومن بيرمنجهام سلام .

نبا.رك لجيراننا الاحباش الفوز على جنوب أفريقيا والتأهل للمرحلة قبل النهائية لتصفيات كأس العالم ضمن العشر منتخبات الافريقية التى سوف تقابل بعضها ليتأهل منها خمسة الى النهائى إن شاء الله , نبارك لساحل العاج ولتونس ولمصر وباقى الفرق 6 المتأهلة سوف تظهر نتائجها فى المباريات النهائية المباراة رقم 6 لكل منتخب وسوف تكون يوم 16 سبتمبر فى يوم واحد وتقريباً ساعة واحدة لكل مجموعة بالتوفيق الجزائر ليبيا يوغندة وباقى الفرق ونتمنى أن نشهد منافسات قوية من جانب الفرق الافريقية .

أشير الى أن السودان أهدى بتعادلة بهدف مع زامبيا فى زامبيا أهدى التعادل لغانا التى تقدت بعد فوزها على ليسوتو فى عقر دارها بهدفين تقدت على زامبيا وسوف تكون المباراة النهائية فى غانا وتحتاج غانا لنقطة والتعادل أو الفوز وعلى زامبيا الفوز للتأهل وكل شىء وارد فى كرة القدم .

حتى يتواصل العطاء الدافق بالمسادير والمعلومات والذكريات والتعبيرات من الحضور الثابتين والزائرين رأيت أن أتحفكم بهذا المسدار عله يحرك كوامن الشجن فى أخونا عبيد الطيب والاخوان الاخرين أهل المسادير الرائعة ونقول عاجل الشفاء وناجع الدواء للأخ عبيد الطيب من الوعكة التى ألمت به وحرمتنا وحرمته من التواصل والذى يكون فى أحيان كثيرة مثل الدواء فهو شفاء عندما نلاقى الاحبة المشير وصحبه وإليكم المسدار :


مع النجمات والبوستات نعّم الطلّه والمحفل
عجبنى حضوركم الراقى بيهو عيونا تتكحّل
إنتو الخُضرة فى الوديان وإنتو نضارة المشتل
إنتو عُصارة الافكار منّكم الجموع الجموع تنّهل
عليكم الله عليكم الله مافى غياب تعال لو ماشى تتمهّل

يا سيد بشري سلامات

كنت فى كندا والله عشان كده اتاخرت فى الرد عليك
اولا اشكرك على المسدار الكارب جزيل الشكر وبعدين بخصوص مداخلتى ديك والله بهظّر معاك ياخى عشان كده لو لاحظت ختيت فيها الوجوه البتضحك ديك

مكانكم حدقات العيون ياسيد بشرى ياخى والعين عمرها ما بتعلى على الحاجب ياصديقى


ولى عوده ان شاء الله





على سرالختم

نشكر الاخ على سرالختم على الحضور والاعتزار بالسفر والمشغوليات !! لكن صاحبك الكرور (قنطرك !!!) بس قول ليهو دى شوفه لى زول ما (فاتح بوست دفتر أحوال الضابط المناوب ) والذى لو توقف أخونا على سرالختم عليه لكفاهو وبارك الله فيك وفى الانتظار رغم الامطار فى بيرمنجهام ومن بيرمنجهام سلام .

انا جيت يا ود السقاي

خالي وين ؟ اوع بس في حد غلّط عليهو؟

الاخ الطيب شيقوق بركة الجيييت والخال كمان منو البغلط عليهو فى بيتو ؟؟؟ كدى قول لينا سطرين تلاتة فى أهلك الحبوش وتأهلهم المستحق على حساب جنوب أفريقيا وهداف الحبوش ولدنا كبيدة من شندى !! التحية لشيقا وفى إنتظار يقية العقد الفريد والركب المجيد ومن بيرمنجهام سلام ، أنا باقى بحمس فى طار البوست بتاعى حتى لا يلحق آمات طه !!!

Quote: لكن صاحبك الكرور (قنطرك !!!)

الكرور ده رانكر ياسيد بشرى ماعنندو ظبط وربط ..عميد بيتكلم مع لواء هو البدخلو فى نص كلام الكمندانات شنو؟؟

قبل أكثر من ثلاثة شهور لزم قريبنا الدكتور محمد عبدالله الريح (حساس محمد حساس ) سرير مستشفى القلب المفتوح لإجراء عملية قلب مفتوح تكللت بالنجاح وقد كتب الدكتور أكثر من موضوع فى عمودة فى الانتباهة يشكر طاقم الاطباء والبروفسرات السودانيين الذين قاموا بإجراء هذه العملية وعمليات أخرى لزملاء وأخوان له ، فقط طالعت مواضيع دكتورنا وعالمنا كلها وكتبت له هذه القصيدة فى وقتها ولكن كان (كمبيوترى) معصلج فى ذلك الوقت وبعدها أنشغلت بالسفر الى السودان فى منصف أبريل للعزاء فى وفاة والدى مبارك إدريس بابكر عليه رحمة وعدت ولم أجد القصيدة إلا اليوم بين طيات أوراق كثيرة وقصاصات فرأيت أن أقدمها لكم وله متمنياً له الشفاء التام والصحة والعافية فإلى القصيدة :





ود الريح ود الريح القلبك ملان حنّية

ما بنقص حنانو لو هبشوهو فوق الميّة

نتابع ما انّكتب الجاوز الجاوز الالفية

ويا حساس يا حساس سلام من الاهل (عامريّة) *

***************************

أبشر بالسلامة وللمولى خليك حامد

ولى كل الطواقم ما شفنا فيهم غامد

إبداع فى العلم يا ربى ليهم ساعد

بالتوفيق نجاح لى كل ليهم قاصد

****************************

يدييك الكريم طول العمر والعافية

يدييك السعادة والسكنة فيها الصافية

نتابع كل بريدك زى اللقمة دييك الدافية

ونشرب من حروفك والشربة دايماً صافية

*****************************





* العامرية هى الاسم الحديث لقرية الباعوضة جوار السروراب وهى قرى أهلنا الجموعية وأهل الاستاذ محمد عبدالله الريح بالريف الشمالى أمدرمان وبعد وصول الزلط الى المنطقة الغربية بالريف الشمالى عمرت العامرية وأصبحت مع الزلط بها نشاط وحركة وطلمبات (والسرى مول ) ولم أعرف أنها الباعوضة الزمان إلا بعد أن أشار لى الاخوان أننا قد وصلنا وذلك فى إجازتى الاخيرة .

سعادة المشير عمر على حسن تحياتى (الليلة الصباح الساعة حداشر ونصف عندكم ما جاتك عشراقة شديدة !!!) كنا بتكلم عنك (بالخير طبعاً وروائعك العملية والهندامية ) مع الفريق شرطة بروف عباس أبوشامة وزير الداخلية الاسبق والمتواجد الان فى الرياض مساعد المدير جامعة نايف العربية للعلوم الامنية ، وقد أخذ (هواتفك الاتنين ) إن شاء الله تكون لميت فيها !! وحريص بشده على الاتصال عليك وكلامة هو وكلام الدكتور محمود محمد صالح عنك هو الذى جعلنا نعرف عنك الكثير رغم أننا لم نعاصرك وأنت تزين الزى الشرطى بقامتك الفارعة ولبسك الانيق ونياشينك التى فاقت نياشين مارشال المديرية (حسب ماذكر لك الرئيس الاسبق جعفر نميرى عليه رحمة الله ) على العموم خليك مترقب مكالمة سعادة الوزير ومن بيرمنجهام سلام .

Quote: الاخ الطيب شيقوق بركة الجيييت والخال كمان منو البغلط عليهو فى بيتو ؟؟؟ كدى قول لينا سطرين تلاتة فى أهلك الحبوش وتأهلهم المستحق على حساب جنوب أفريقيا وهداف الحبوش ولدنا كبيدة من شندى !! التحية لشيقا وفى إنتظار يقية العقد الفريد والركب المجيد ومن بيرمنجهام سلام ، أنا باقى بحمس فى طار البوست بتاعى حتى لا يلحق آمات طه !!!

جاييك يا سعادتك زحمة شوية بس

يا شيقا الحكاية شنو شوقتنا زى قصتك بتاعة المدرب العالمى !! بالمناسبة شايفك ما جبت سيرة دفعتنا (سبب الكارثة ) أحمد إبراهيم عبدالله الجراى ولم تستعين به بعد إعلان الصحف بأن المدرب العالمى طلع المحتال العالمى !!!!
يا شيقا إنت جاى بى شارع الستين والله شنو ؟؟؟ ليك كم يوم تقول أنا جاى ؟؟؟!!!

Quote: يا شيقا إنت جاى بى شارع الستين والله شنو ؟؟؟ ليك كم يوم تقول أنا جاى ؟؟؟!!!

يا كمندان
خالي ده ما تفتش عليه في الويكند .. ما بتلقاهو .. لكن لو فتشت عليهو باقي ايام الله .. برضو يمكن ما تلقاهو ..
شفت ود المويه ؟ ... أنا شفته ..

اما انا .. اذا سألتم عني .. فقاعد محير مع اسئلتكم الموجهه لي وما عارف اجيكم بي وين .. وما عايز ابقي
ود مويه .. ولو ما جيتكم افقدوني .. بتلقوني .. رغم البلاوي الكتيره المطربقه علي راسنا

اوعي تقول لي الجنا خال

تحياتي
عمر علي حسن

حاشاك البلاوى ويا رب تسهل إمورك
وتتهون عليك تتكافى كل شرورك
الناس مغروده فيك والخلوق بتدورك
طل كل حيين علينا بس ماتنسى تاكلو فطورك

Quote: خالي ده ما تفتش عليه في الويكند .. ما بتلقاهو .. لكن لو فتشت عليهو باقي ايام الله .. برضو يمكن ما تلقاهو .. شفت ود المويه ؟ ... أنا شفته ..

هههههههههههها خالي السكر نقا انت وين طولت كدا خالك وخالتك كلنا في انتظارك

اما الجماعة اياهم فباقي لي غياب خالي بالنسبة ليهم زي الزول المودر جمل !! نسيبتو اكان لقاهو بغني واكان كمان ما لقاهو بغني

ما تسرح ركز مع خالك - خالك ما بجدع العلامات والاشارات الا في المليان

Quote: العُمَر عُمَرين ، لي حَـقّو تَب وفّـيتي لخصالو الحميده، وحُسن الطّبِع كَفّيتي حباب بِت الخليفه، المِن منابعو رِويتي المنـابر نوَّرت، بي طَلَّـتِك يوم جيتي

محمد فضل المكي صديقي العزيز..

شكرا علي الترحيب الحلو..

Quote: هههههههههههها خالي السكر نقا انت وين طولت كدا خالك وخالتك كلنا في انتظارك

خالك معلق في زانه لا عارف يتلب .. لاعارف ينط لي فوق ..
اسمع .. كلم الظباط ديل .. رتب هنا مافي .. الجويلي وعلي دايرين يدقوا الكمندان قوة عين كدي .. قايلين ماعنده ضهر ..والله
السقاي دي كان فيها معسكر بيودو ليه العتاوله .. والزول ده كان مشي جاب اهله .. كلنا بكشونا ليك ..

العيون ياخال محمرات زي الدم .. وخلك يقطر ساي شي موية شاي وشي اوترفين .. قالو من الكمبيوتر المصاقره الليل
والنهار ده .. يعني المعني ياخال دايرين يحجروا علينا القرايه والكتابه كمان ... قايلنها بترول سلفاكير ..

اجيييييييييييييي يا يابا يحلنا الحلا بله ..

عمر علي حسن

Quote: خالك معلق في زانه لا عارف يتلب .. لاعارف ينط لي فوق ..

خليك معلق بين مدني والخرطوم زى ما قال خالك ابو الزهور

اركز وركّز وما تسرح في المسيد ود عيسى

Quote: اركز وركّز وما تسرح في المسيد ود عيسى

مسيد ود عيسي ده مش كان بالشرق ؟

عمر علي حسن

Quote: مسيد ود عيسي ده مش كان بالشرق ؟

يطول عمرك

معنون الى كل الشعراء وأهل المسادير فى هذا البوست ، كما يوجد طلب خاص منى للأخوان عبيد الطيب وسعادة المشير عمر على حسن بأن يدونا مسدار فى الزميل اللواء شرطة معاش طه جلال الدين على .




اللواء شرطة معاش طه جلال الدين على تزاملنا ومعنا الاخ اللواء شرطة ناصر محمد يوسف الكباشى فى الكباشى المتوسطة ذهبنا أنا والاخ ناصر محمد يوسف الكباشى للجيلى الثانوية وكان الاخ طه طريقة بحرى الحكومية مع خلف الله سليمان من السقاى ومحمد أبراهيم أبوحليمة والاخ أبوالقاسم حمد أبراهيم من السقاى البتلاب ففى السنة التى تقدموا فيها لكلية الشرطة (الدفعة 45 ) أخترت أنا فى ذلك العام التقديم لمعهد البصريات العالى ودخلته لمده شهرين وتركته لكثرة المشاكل والاضرابات !! فقدمت فى العام التالى لكلية الشرطة وكنت ضمن الدفعة 46 ، واصلت مع طه وناصر فى كلية الشرطة لمده عام وتخرجوا هم وكان الاخ طه جلال الدين على بعد التخرج قد عمل فى دارفور وناصر فى الدمازين ، وبعد ذلك شاهدته فى الشئون الاجتماعية وسبحان الله كانوا يتبادلونها هو والاخ ناصر (بين الخليلة والكباشى ) فالتحية والتمنيات الطيبة للأخ طه جلال الدين على بالتوفيق فى حياته بعيداً عن الشرطة ، الجانب الاخر لطه كان الجانب الرياضى فكان رئيس نادى قريته (الخليلة والدبة ) الاجتماعى الثقافى الرياضى وكان النادى بالدرجة الثالثة بحرى فصعد به الى الثانية ودخل السنترليق للمنافسة على دورى الاولى العاصمى فى أكثر من مناسبة وكنت أتصل عليه بعد كل مباراة لكى أهنئة بالفوز ولم ينسى عندما أستضافتة الاذاعة الرياضية F.M 104 أن يشكرنى بالاسم والمكان (أشكر الاخ بشرى مبارك إدريس من المانيا والذى يتابع الفريق ويكتب فى المنتديات عن الانتصارات ) فحقق الاخ طه جلال الدين الانتصارات فى كل إتجاه وفى كل موقع فله مكانة طيبة فى نفوس الاخوان بالشرطة والمعاشيين والمرافييد !!!أما بين أهله فى الخليلة والدبة فهو عمدة بحق وحقيقة !! أذكر أنه جاء مرة فى يوم جمعة حسب ما ذكر لى أخى صالح مبارك (يقود حافلة الاسرة فى خط الجيلى ) جاء الاخ طه جلال الدين على فوجد حملة شرطة المرور فى منطقة الفكى هاشم وشغالين فى الحافلات والعربات غرامات تقيلة فمنعهم وأصدر أوامر بعدم إصدار أى إيصال لحافلة قادمة الى المنطقة فكان للقرار الاثر الطيب فى نفوس أصحاب الحافلات والسائقين وحتى المواطنيين ولأن الغرامات (كانت جبايات ليس إلا وما زالت !!!) والله (جبايات المرور تخجّل الواحد أنو كان منتمى لجهاز الشرطة يوما ما ) . وقبل أن أختم مقالى هذا والذى كتبة بسبب سطور دفعته الرصينة الاخ الفاتح المقبول فالتحية للفاتح المقبول والذى يرفد هذا البوست بمواضيع تجعلنا (نتسابق تاره عليه وتاره أخرى على اللواء شرطة معاش عمر على حسن ) فنحّى الشرطة التى أنجبت هؤلاء رغم عدم الوفاء من أهل الجفاء !!( فى الحقيقة الناس الشغلة ما حقتم مسلبطين فيها ساكت قال هاشم عثمان الفنى المدير العام للشرطة !! والله هانت الشرطة حتى أصبح مديرها هاشم عثمان والحمد لله البقينا ما حاضرين كان الواحد قتلتو المغصه !!!!) والان أختم بهذا المسدار للأخ طه جلال الدين على والذى يستحق فى نظرى أكثر من ذلك .

أيضاً لا أنسى السطور الجميلة التى سطرها الاخ النور يوسف والذى عمل مع أخيه ودفعته طه جلال الدين بدارفور وهم ضباط متخرجين زغب الحواصل .

ما بتشقى,,, وإت يا طه مقنع للبجن كاشفات
أخو أخوان وأخو أخوات منو السمح سامعات
سيد الشكره مطر النتره معروف أصلو زوول سابقات
ود مقبول كتب فى حقك المامول وشوف كيف السطور دافقات
والنور برضو ما قصّر وقام فسر ونقرأ نقرأ والعيون دامعات

الدبلوماسية أحىّ فيها شاعرها وأحىّ كل من تبناها
من نظّم الشعر فى الناها ومكناس وأروانا وأرواها
ما ضار الجنوب لو سعى فصلاً ونحن نسعى للقياها
نحن العروبة والافريقية أجتمعت ما ضرنا لو أحيينا ذكراها
*****************************************
كل ما رأيت القوم أتجهوا كان الطريق نحو مرماها
منهم من تكسر فى التوب ومنهم من من قص ممشاها
روعتها فى مشى خطوتها ليتنى سمعت من قال ناداها
وليتنى سرقت السمع أو بصر لعشت باقى العمر أطراها
******************************************


نقلاً من بوست الناها بت مكناس بمنتدى ودبهاى وكانت فيه أيضاً مسادير غاية فى الروعة رايت ان انقل لكم جزء منها لمزيداً من التعليق .

الاخوان الكرام سلام وتحياتى ولعلكم على الصحة والعافية ، والله الايام دى تسوى ليك بوست ما تشد حيلك زول يرفعو ليك مافى !!!!!على العموم نرفع (الكورنر ) أقصد البوست ده لعلى أجد من يحرز هدفاً !!!وتحياتى .

الرباطابى ببيع فى ساعات مهربة جاتو الكشة لمّ الساعات وقام جارى لاقاهو صاحبو قال ليهو آفو يا الرباطابى جارى من الكشة ؟؟!! قال ليهو لا لا جبت لى قون !!!!.

صباح الخير جنابو السقاي

قلت لي قال جابلو قون؟ ههههههههههههها

لكن بتاعت ادروب لما سمع الفنان بغنى نحن فى الدمعات غرقنا ديك قووووووووويه شديد والله ههههههههههههههه











على سرالختم

نحن فى الدمعات غرقنا ديك
دي ما سمعناها يا شيخ علي

عمر علي حسن

ادروب سمع الفنان بيغني : نحن في الدمعات غرقنا .. قال : والله راهاااات .. نحنا فتة ما لاقين!!!!!
والله يا الخرين سرقتك (عسللللللللل) عديل كده وهذه أضحكتنى حد البكاء !! أفرحك الله وأضحكك وبرضو من بيرمنجهام سلام .


يا على سرالختم سعادة المشير يطلب منك النكته كاملة وأنت قاعد تتلفت نامن أنقلها أنا !!!!( والله الفيك أتفرفت !!!) نعتل معاك فى بوستك دفتر أحوال الضابط المناوب وتجى هنا بس تدخل وتعلق وتضحك وتمرق !! حق التذاكر ما تدفعو !! لومتنا مع سعادة المشير !!! لكن قالوا اللوم بجى بالغفلات !! على العموم يا سعادتك نحنا جاهزين حتى لو نسرق زى (الخزين ود نصر فى منتدى البركل !!!).

فاتنى ان اشير ان نكته ادروب نقلا عن سيد بشرى من دفتر الاحوال وسبب العجله والنسيان ان رغبه القائد تعليمات


ومعليش ياسيد بشري ياخى وهاك دى نعمل ليك بيها تعويضات بيت المال وكده

قال ليك فى واحد مغترب ليهو 25 سنه برّه السودان زى حالتنا كده رجع السودان وقااااال كده رسل ولدو يجيب ليهو جبنه بى عشره جنيه من الدكان ..صاحب الدكان واحد من اهلنا الرباطاب شال العشره جنيه وقال لى الولد امشى نادى ابوك خلّى يجى يلحس السكّينه دى









على سرالختم

تخريمه
السكّينه بتشديد الكاف البقطعوا بيها الجبنه مافى واحد يجى يقول لى يلحس سكينه كيف ونبقى فى حاو وتر

Quote: يا ريّس ادروب سمع الفنان بيغني : نحن في الدمعات غرقنا .. قال : والله راهاااات .. نحنا فتة ما لاقين!!!!!

اوسكار ياعلي .... حاضحك فيها لغاية الربع الجايي ..

ادروب (مسفّراتي) .. ركبوه ناس بله عمر حامد مع عربيتي يحرسها من بورسودان للخرطوم .. بخمستاشر جنيه .. لما القطر دخل الخرطوم ادروب
قاعد قدام العربيه في الشمس ... قلت ليهو مالك ما راكب جوه العربيه من الشمس دي .. المفتاح ما معاك والله شنو ؟ طلع المفتاح من (حزته) وضحك
وقال لي والله هكايه .. نركب جوه ؟؟ والله يسرقوني انا والعربيه ؟ المفتاه ما تلقاه .

Quote: حق التذاكر ما تدفعو !!

يا بشري ..
قالوا ليك علي ده ما عندو كارنيه ؟ .... والله زمان في ناس كانوا بيركبو بيه التاكسي ...

عمر علي حسن

تم ارسال هذه المداخله بواسطة (المسفراتي) .. لتواجدي بعيدا عن الكمبيوتر ..

مسطول سالوهو العلاقة بين القطر والمنقة شنو ؟؟؟
قال الاتنين بصفرو !!!.



طبعاً النكات يتصدرها (نسابتنا الرباطاب ) أهل المدام وأنا كثيراً ما أرد على المدام رد من (النوع الرباطابى !!) تقول لى عليك الله الرباطابى إنت أم أنا ؟؟ والله إنت الحوار الغلب شيخو ذاتو !!!!.

بعد الرباطاب يأـى فى المرتبة دور (المساطيل !!) ما يجى واحد يقول لى المساطيل برضو نسابتكم !! أما المساطيل نسأل الله لهم الهداية من السيجارة ومشاكلها لا يخلو فريق إلا وفيهو مسطول سواءً بتاع نكات أو غير ذلك .

المسطول راقد تحت الكبرى فى شمبات والسطلة ضربت راسو شايف النيل ماشى فى الاتجاة العكسى من الشمال للجنوب والدنيا (دميرة شديدة !!) قال والله لو أتكلمنا يقولو مسطوووول ولو سكتنا مدنى تغرق !!!!!.

مرحباً بكم فى الربع الثالث ونسأل الله أن يجعله لكم جميعاً ربعاً ربيعاً ونحن نستقبل شهر رمضان الكريم ، التحايا لكل الاخوان المداومين على الردود حتى لو بالمسفراتى ونتوقع كمان (بالمسحراتى ) طالما الهمّه قمّه واللبسه أفرنجى وعمّه ما شاء الله تبارك الله !! ود أختك ومستشارك الطيب شيقوق جاب ليهو قون وعمل زايغ !!! التقول قون تعادل !!!! سلام للجميييع ومن بيرمنجهام سلام .