Post: #1
Title: عندما كنت في التجاني الماحي
Author: سلمى تاور
Date: 06-16-2013, 04:45 PM
التجاني الماحي لمن لا يعرفها
هي مستشفى التجاني الماحي
للأمراض النفسية و العصبية
بأمدرمان
وهي الاقدم من نوعها في السودان
|
Post: #2
Title: Re: عندما كنت في التجاني الماحي
Author: سلمى تاور
Date: 06-16-2013, 05:10 PM
Parent: #1
منذ ان رضخت لرغبة أهلي في ان ادخل كلية الطب وإحساسي بأني لن انجح في هذه المهنة يزداد يوماً بعد يوم .
أشيائي التي كنت أحب ان اعيشها كانت تتلاشى الواحد تلو الآخر مع كل فصل دراسي جديد
تغربت لأجل الدراسة ففقدت أصدقائي اللذين أعشقهم ، ولم أتمكن من خلق صداقات جديدة
الكتابة كانت هوايتي الوحيدة ، ولكي تكتب يجب أن تقرأ . و أنا لم أعد اذكر اخر كتاب قرأته لا يتعلق بالطب .
حتى حلمي بالبيت الهادئ و الاسرة الصغيرة و الطفلين بدا مستحيلاً .
|
Post: #3
Title: Re: عندما كنت في التجاني الماحي
Author: سلمى تاور
Date: 06-16-2013, 05:23 PM
Parent: #2
كرهت كل ماهو طبي
كرهت المعطف الابيض و السماعة و جهاز قياس الضغط و مقياس الحرارة
رائحة المستشفى اصابتني بالغثيان ، أرعبني منظر الدم و صراخ المرضى و أنينهم
اصبحت أبالي للمرض و أشعر به و أخافه
و الموت كان في كل مكان
كان كثيراً
و قاسياً
|
Post: #4
Title: Re: عندما كنت في التجاني الماحي
Author: سلمى تاور
Date: 06-16-2013, 05:54 PM
Parent: #3
أن اترك الطب !!!
أن أبدأ من جديد تخصصاً آخر !!!
لم يكن ذلك سهلاً
قل كان مستحيلاً ، لأسباب يطول شرحها
لذا قررت أن اواصل كيفما أتفق
- خلصي قرايتك يابت و بعداك يحلها الحلال
و حل الحلال بالنسبة لي كان أن لا اعمل ، أتخرج و اعلق شهادتي في الحيطة و اقعد في البيت هو الشغل بالعافية !!!
|
Post: #5
Title: Re: عندما كنت في التجاني الماحي
Author: سلمى تاور
Date: 06-16-2013, 06:50 PM
Parent: #4
المهم واصلت في معاناتي بكل قوة التحمل التي لدي و أكثر
حتى بدأ يتردد السؤال الذي كنت أتجاهله بشدة
- إنتِ ناوية تتخصصي شنو ؟؟؟
سجمـــــــــــــــنا !!! جابت ليها تخصص كمان !!!
و الله انتو طموحين طموح
- و الله الحقيقة لسة ما فكرت
- طيب انت ما تنزلي تدريب في المستشفى و تحددي القسم البنفع معاك شنو
- ..........
- خير
و كان هذا من أسوأ كوابيسي ...
|
Post: #7
Title: Re: عندما كنت في التجاني الماحي
Author: 7abib_alkul
Date: 06-16-2013, 08:58 PM
Parent: #5
| Quote: منذ ان رضخت لرغبة أهلي في ان ادخل كلية الطب |
الحمدلله يعني نفهم انك دخلتي التجاني الماحي دكتورة ما هناي ههههههههههه
مع فائق الاحترام
|
Post: #8
Title: Re: عندما كنت في التجاني الماحي
Author: 7abib_alkul
Date: 06-16-2013, 08:58 PM
Parent: #7
| Quote: منذ ان رضخت لرغبة أهلي في ان ادخل كلية الطب |
الحمدلله يعني نفهم انك دخلتي التجاني الماحي دكتورة ما هناي ههههههههههه
مع فائق الاحترام
|
Post: #9
Title: Re: عندما كنت في التجاني الماحي
Author: سلمى تاور
Date: 06-16-2013, 09:49 PM
Parent: #8
وقع (اختيارهم) على مستشفى امدرمان لأنها كانت الاقرب الى منزلنا
ذهبت في ذلك الصباح الخريفي وكلي رجاء بأن يقابل طلبي بالرفض
- لو سمحت ، مكتب المدير الطبي بي وين ؟؟؟
- العمارة القدامك دي تاني دور
- شكراً
دخلت ، قابلني الرجل بابتسامة عريضة لم ترحني على غير العادة
كنت اتمنى لو أنه (كشّر) في وجهي و اعتذر لي ببرود ، ولكن ما حدث كان العكس تماماً
- جداً يا دكتورة مافي أي مانع ، تحبي نختك في قسم الاطفال ؟؟؟
وقبل ان استوعب كلامه وجدته يتحدث عبر الهاتف مع أحدهم
- أيوة يا دكتور .... في بتنا دكتورة سلمى حابة تدرب معاكم في القسم هي معاي في المكتب و جاية عليك ما تقصروا معاها آآآآ
إتفضلي يا دكتورة منتظرنك
- ................
|
Post: #10
Title: Re: عندما كنت في التجاني الماحي
Author: سلمى تاور
Date: 06-16-2013, 10:54 PM
Parent: #9
صراخ طفل
و الرائحة التي لا أطيقها كانا في استقبالي و انا ادخل القسم الذي اختاره لي المدير الطبي ، مشكوراً
للمرض في جسد صغير شكلٌ آخر
شكلٌ قاس جداً ، و مخيف
كان المكان كئيباً
أطفال يصرخون ، و آخرون يلهون غير مبالين بأنابيب التنفس و الضمادات الطبية الملصقة بأجسادهم
و الغالبية هدهم المرض فاستلقوا في أسرتهم باستسلام ، لا يقون على هذا ولا ذاك
أمهات شاحبات ، أصبح التوتر و القلق جزء من ملامحهن
شاردات ، لا يعرن بالاً إلا لألم أطفالهن و حديث الطبيب
الهواء هنا ثقيل ، ضاق صدري و لم اقوى على التنفس
خرجت مسرعةً من المكان ، لم اكن افكر في شئ
ولم يكن في نيتي ان لا اعود
ولكنني لم اعد ...
|
Post: #11
Title: Re: عندما كنت في التجاني الماحي
Author: صديق الموج
Date: 06-17-2013, 02:53 AM
Parent: #10
يا دكتوره ..سلام
كلنا فاكرنك كنت هناك هنايه ما دكتورة ههههههه
بوست لا يتثءب وتجربة التخصص فى الامراض النفسيه والعصبيه حسب علمى الشوية غير مطروق
لمعشر النساء وهذا فى حد زاته يغرى بالمتابعه ، عموماً مع سردك الجميل بنخت طوبتنا
ونشوف اخرتا معاك..
قطعاً سنعود باذن الله،،،
|
Post: #12
Title: Re: عندما كنت في التجاني الماحي
Author: زياد جعفر عبدالله
Date: 06-17-2013, 03:12 AM
Parent: #11
زرت التجاني الماحي زمان لمن كنا طلبة في الجامعة..و عملنا طواف بمختلف الأقسام ليوم كامل
حاجة كانت تغم و تبعث على الأسى
أذكر واحد تألمت له جداً... شاب في غرفة أشبه بالزنزانة..عريان كما ولدته أمه وهو يصيح شاتماً بالفاظ نابية في رموز من نظام الأنقاذ!!!
|
Post: #13
Title: Re: عندما كنت في التجاني الماحي
Author: سلمى تاور
Date: 06-17-2013, 12:08 PM
Parent: #12
خرجت من المستشفى ، مشيت متجاهلةً اصوات ( الكماسرة ) التي كانت تناديني
و عندما أحسست بالهواء النظيف يدخل رئتيّ من جديد بدأت أفكر :
- حتعملي شنو يا فالحة ؟؟؟ ترجعي تقولي ليهم ما قبلوني
حيقولو ليك أمشي مستشفى تانية ، حتفضلي تكذبي كدة كتير ؟؟؟
خلاص أرجعي المستشفى و أمرك لله ... لا لا لا ما حأقدر
حيجيني إكتئاب بالشكل دة هو أنا ناقصة ... أها طيب و بعدين ...
حينها راودني خاطر قديم ، رغبة دفينة داخلي كنت قد صرحت بها ساعة مزاح عائلي و ضحك عليها الجميع
أنا نفسي ضحكت معهم ، يا للافكار الغريبة التي تخطر لنا أحياناً
- والله انتو عارفين حقو الواحد يبقى طبيب نفسي ، اصلو المجانين ديل الواحد ما بحس بالذنب تجاهم
إتعالجوا الحمدلله ما تعالجوا ياهم قاعدين مجانين في حتتهم . والله دة أحسن تخصص
- ههههههههههههههههههههه
- والله يطقك مجنون يجيب خبرك ، هههههههههههههههههههههههههههه
- .................
|
Post: #14
Title: Re: عندما كنت في التجاني الماحي
Author: امجد محمد الأمين
Date: 06-17-2013, 12:19 PM
Parent: #13
سرد مشوق ..
متابعين ..
|
Post: #15
Title: Re: عندما كنت في التجاني الماحي
Author: aosman
Date: 06-17-2013, 12:39 PM
Parent: #14
الطبيبة الأديبة واصلي الحكي, الحكي بلحيل حلو
|
Post: #16
Title: Re: عندما كنت في التجاني الماحي
Author: ياسر السر
Date: 06-17-2013, 02:42 PM
Parent: #15
الطبيبة الاديبة الاخت الدكتورة سلمى ياخ اولا حمد لله على سلامة العودة للوطن وان شاء الله يطيب ليك المقام .. وربنا يوفقك في حياتك العملية ..
سرد مشوق والله .
غايتو لو حا تتخصصي طب نفسي اكيد الواحد حا يجن ويزيد في الجن وحا يقولو عليهو شقي ومجنون هههههههههههههههه
يا زولة طب الباطنية ده مالو عيبي لي مالك ومال الجن والمجانين يا زولة .. يعني سفر وغربة ولاهور ووادي سوات وحلال وقرى ومدن وبايات وبعد ده تقولي لي طب نفسي ،، معقول ..
واصلي بدون فواصل في انتظار سردك الجميل للوقوف علي تجربتك الشخصية ..
تحياتي : ياسر العيلفون
|
Post: #17
Title: Re: عندما كنت في التجاني الماحي
Author: Nagat Sid Ahmed Elshiekh
Date: 06-17-2013, 04:37 PM
Parent: #16
متابعين يا دكتورة سرد جميل.
ما دكاترة بس شغلنا في مصحات للعلاج النفسي متابعين.
بوست ممتع والشغل في المستشفيات أو المصحات للعلاج النفسي أيضاً ممتع دي وجهة نظر خاصة.
|
Post: #18
Title: Re: عندما كنت في التجاني الماحي
Author: سلمى تاور
Date: 06-17-2013, 05:23 PM
Parent: #17
فتاة عشرينية ، ترتدي معطفاً أبيض و نظارات طبية
تجلس خلف الطاولة التي في غرفة الاستقبال و تكتب شيئاً في دفتر كبير امامها
- السلام عليكم
- إنتِ منو ؟؟؟
- أنا إسمي سلمى ، طبيبة و جاية اقابل المدير الطبي بخصوص موضوع تدريب
- دكتور عثمان ؟؟؟
- والله ما عارفة اسمو بس قالوا لي قابلي ال......
يقاطعني رجل يدخل علينا من مكان ما ، و ينتهر محدثتي
- حنان !!! إنت قاعدة هنا و امك قالبة المستشفى عليك ؟؟؟ الطلعك من العنبر شنو ؟؟؟
قومي يا بت بطلي شخبتة _ معليش يا استاذة _ قومي خلينا نشوف شغلنا .
- دي ما أستاذة ، انت عوير ساي ما بتعرف حاجة
- أيوة أنا عوير ، وحنان فااااالحة بتسمع الكلام و ما بتطلع برة العنبر
- .........
حسناُ ، اصدقكم القول ، لم اسمع بقية الحوار الدائر امامي
و للحظة احسست انني اتفرج على ممثلان يؤديان مشهد في مسرحية هزلية
و ودت لو اصرخ بهم : توقفا ، ليس مضحكاً ما تقومان به .
صوت غريب أخرجني من شرودي ، حينها كانت حنان قد نهضت عن الكرسي ومشت نحو الباب المؤدي الى المستشفى بخطوات غريبة
خطوات جعلتني انظر الى قدميها بتلقائية ، لحظتها عرفت مصدر الصوت الذي قطع علي شرودي و سبب مشية حنان غير الطبيعية
لقد كان ذلك الجنزير الحديد الكبير الذي قيّدت به هو السبب .
عندها ، جمد الدم في عروقي ...
|
Post: #19
Title: Re: عندما كنت في التجاني الماحي
Author: سلمى تاور
Date: 06-17-2013, 05:39 PM
Parent: #18
- معليش يا استاذة على الحصل دة ، نعم اتفضلي قولي عايزة شنو ؟؟؟
- ...........
- يا استاذة !!!!!!!!
- اممممممم ؟؟؟
- اتفضلي سامعك قولي عايزة شنو ؟؟؟
- آآآآآآ ... د. عثمان .... آآآآآلــ.... الـ .... المدير طبي !!!!!
- معليش ... بس انتِ عايزة د. عثمان ولّا المدير الطبي
- المدير الطبي .... عايزة المدير الطبي
- طيب ، خشي بي هنا شمالك بلاقيك ممر المكتب في نهايتو
- شكراً
- العفو ...
|
Post: #20
Title: Re: عندما كنت في التجاني الماحي
Author: سلمى تاور
Date: 06-18-2013, 02:50 PM
Parent: #19
حبيب الكل
ود الموج
زياد جعفر
امجد محمد الامين
aosman
ياسر السر
نجاة سيداحمد
شكراً على متابعتكم
و خليكم قريب
حنواصل ...
|
Post: #21
Title: Re: عندما كنت في التجاني الماحي
Author: ombadda
Date: 06-18-2013, 03:03 PM
Parent: #20
نتابع.
واصلى د. سلمى
|
Post: #22
Title: Re: عندما كنت في التجاني الماحي
Author: Mohammed Haroun
Date: 06-18-2013, 03:33 PM
Parent: #21
Quote: لقد كان ذلك الجنزير الحديد الكبير الذي قيّدت به هو السبب .
عندها ، جمد الدم في عروقي ... |
دا ايييييييه دا!! مستشفى ولا سجن!! ..
واصلي الحكي ... متابعين
تحياتي
|
Post: #23
Title: Re: عندما كنت في التجاني الماحي
Author: Tabaldina
Date: 06-18-2013, 08:03 PM
Parent: #22
..
.
اقول ليك بصراحة اول مرة من جيتى المنبر اتابعك بتركيز ..
-------------
ما عارف السبب الفضول للتغول فى عالم مجنون ..
ام جمال السرد .. ام مآسي هذا البلد المنكوب
ام لاننى درست تخصصى مثلك ضد ارادتى ..!!؟
|
Post: #24
Title: Re: عندما كنت في التجاني الماحي
Author: الطيب شيقوق
Date: 06-18-2013, 08:10 PM
Parent: #23
لغتك العربية جميلة يا سلمى
|
Post: #25
Title: Re: عندما كنت في التجاني الماحي
Author: محمد فضل الله المكى
Date: 06-19-2013, 08:42 AM
Parent: #24
| Quote: [Bعندما كنت في التجاني الماحي |
أنا ذاتي كنت هناك!
ليه؟
بجاوب بعد ما تنتهي يا دكتورة سلمي.
كامِل الوُّد
التعديل لتصحيح (دقسه)
|
Post: #26
Title: Re: عندما كنت في التجاني الماحي
Author: سلمى تاور
Date: 06-19-2013, 02:07 PM
Parent: #25
في البيت :
- سلوووم ، أها بشّري أخدوك ؟؟؟
انظر الى امي نظرة خبيثة و ابتسم :
- ايوة اخدوني
- لا تمااااام والله ، أها وين في ياتو قسم ؟؟؟
- في التجاني الماحي
- وين ؟؟؟؟؟؟؟؟؟؟؟؟؟؟؟؟؟؟!!!!!!!!!!!!!!!!!!!!!!!!!!
- التجـــــــــــــــــاااااااني المــــــــــــــــــــــــــــااااااااحي ...
- ..................................................................................
..............................................
|
Post: #27
Title: Re: عندما كنت في التجاني الماحي
Author: سلمى تاور
Date: 06-19-2013, 03:01 PM
Parent: #26
اليوم الأول كان حافلاً
فمن ( غرابة ) حظي _ غرابة من غريب _ أنا مؤمنة تماماً انا حظي ليس سيئاً ولا جيداً و لكنه غريب
من غرابته ، ان الوحدة التي وُزعتُ فيها كانت ( شغالة حوادث ) في أول يوم لي بالمستشفى
و الحوادث هنا مقصود بيها العيادة الخارجية ، يعني المرضى الجايين أول مرة
وهؤلاء في العادة يأتي بهم أهلهم بعد ان ظهرت عليهم أعراض يصعب تفسيرها عضوياً
فينصحهم الناصحون بأن :
- الزول دة يمكن عندو نفسيات ، كدي ودوهو التجاني الماحي
أو يكون لهم تاريخ مع المرض النفسي ، منهم من بدأ علاجا مع الاطباء و توقف
و منهم من لجأ للعلاج الشعبي ( ودوهو الفكي ) ولم يتعافى أو ساءت حالته
الفقير و الغني ، الطفل و الشاب و الكهل ، الرجال و النساء
أهل الريف و اهل الحضر ، اصحاب الشهادات و من لا يكتبون أسمائهم
أصحاب السُلطة و المسحوقون ، بإختصار
السودان كله مر من أمامي يومها ...
|
Post: #28
Title: Re: عندما كنت في التجاني الماحي
Author: Mortada Adam
Date: 06-19-2013, 04:11 PM
Parent: #27
حضور و متابعة
واصلي بدون فواصل الهم اشفي كل مريض
|
Post: #29
Title: Re: عندما كنت في التجاني الماحي
Author: سلمى تاور
Date: 06-19-2013, 05:27 PM
Parent: #28
غرفة صغيرة ، بها طاولتان و بضع كراسي
- تعالي يا دكتورة اتفضلي هنا
أشار لي الطبيب الذي انتبه الى قدومي ان اجلس الى جواره ، الآخر كان مشغولاً مع مرضاه
سحبت كرسياً و جلست حيث أّشير لي .
- أيوة يا محمد واصل قلت لي الحالة دي جاتها من متين ؟؟
- معليش يا دكتور ، بس دي منو ؟؟؟
- دي د. سلمى دكتورة جديدة معانا هنا في المستشفى الليلة اول يوم ليها
- أيوااا ، معليش يا دكاترة بس انتو عارفين الحاجات دي حساسة ما بتتحكي قدام أي زول
- مافي مشكلة أكيد طبعا من حقك تعرف ، أها كنا بنقول شنو أختك جاتا الحالة دي من متين ؟؟؟
إذاً فتلك الفتاة الشاردة ذات اال17 عاماً الممسكة بيد محمد هي أخته
- و الله يا دكتور ليها شهرين بالحالة دي ، في البداية خلت الاكل بعداك بقت تسرح كتير و ما بتتكلم
لفيت بيها الدكاترة كلهم وما خليت فحص ما عملتو ليها ، كلهم قالوا ما عندها حاجة و في الاخر قالوا لي اجيبا ليكم هنا
وطبعا ناس البيت في الاول رفضوا ، براك عارف التجاني الماحي عند الناس يعني شنو ، لكن حالتها اتدهورت شديد
موجهاً لي الكلام و بنبرة صوت اخفض :
- والله يا دكتورة لدرجة بقت إلا أخواتها يحمموها ، أها لمن لقيت الحالة كدة قمت جبتها هنا
نظرت إليها ، الفتاة شاردة تماما و كأنها ليست معنية بما يقال و كأنها لا تسمعنا
بدت و كأنها تحمل حزناً كبير لا يقوى عليه جسدها الهزيل .
- يا محمد ، أختك دي واضح أنو عندها إكتئاب و عشان نقدر نعالجها لازم نعرف سببو شنو عشان كدة انت لازم تحكي لينا الحاصل
- مافي حاجة احكيها ليك يا دكتور و طالما عرفتو المرض شنو أدينا علاجنا خلينا تخارج
- طيب انا حأديك العلاج و اختك حتبقى كويسة لكن كان ما عالجتو سبب المشكلة الزولة دي حتمرض تاني و تبقى اكعب من الاول و امكن نتطر نرقدا معانا هنا
- لا إن شاء الله ما حتحصل حاجة
- خير ، تدوها الدواء دة مرتين في اليوم و تجونا بعد اسبوع في العيادة المحوّلة
- .................
|
Post: #30
Title: Re: عندما كنت في التجاني الماحي
Author: ASHRAF MUSTAFA
Date: 06-19-2013, 06:01 PM
Parent: #29
متابعة
|
Post: #31
Title: Re: عندما كنت في التجاني الماحي
Author: شذى اسماعيل عباس
Date: 06-19-2013, 07:49 PM
Parent: #30
هههههه ماهو باييين من العنوان..
الطب النفسي والعصبي من اصعب المجالات ...وياما فيها قصص
|
Post: #32
Title: Re: عندما كنت في التجاني الماحي
Author: سلمى تاور
Date: 06-20-2013, 07:28 PM
Parent: #31
أمبدة
محمد هارون
تبلدينا
الطيب شيقوق
محمد فضل الله
مرتضى ادم
أشرف مصطفى
شكراً للمتابعة
و حنواصل إن شاء الله بس نفضى شوية من مشاغل الدنيا
شذى إسماعيل عباس
اهلا بيك
بس شنو هو البايييين من العنوان ؟!!!
|
Post: #33
Title: Re: عندما كنت في التجاني الماحي
Author: HAIDER ALZAIN
Date: 07-21-2013, 08:25 AM
Parent: #32
رمضان كريـم...
|
Post: #34
Title: Re: عندما كنت في التجاني الماحي
Author: احمد سيد احمد
Date: 09-22-2013, 12:44 PM
Parent: #33
سلامات يا دكتورة سلمى
تعالي كملي البوست دا
او انقليهو للربع الجاي
لانو خلاص الربع فضل كم يوم ويتقفل
ارجو المواصلة في هذا البوست الممتع
|
Post: #35
Title: Re: عندما كنت في التجاني الماحي
Author: ياسر منصور عثمان
Date: 09-22-2013, 12:58 PM
Parent: #34
تحول لدكتور مجدي اسحق
..يا سلام عليك يا دكتورة ...سرد جميل ورائع..
|
Post: #36
Title: Re: عندما كنت في التجاني الماحي
Author: Hafiz Bashir
Date: 09-22-2013, 04:31 PM
Parent: #35
مبروك التخرج يا دكتورة
و ميروك العودة من باكستان للسودان
سرد جميل جداً و يتناول موضوع غاية في الأهمية
مشكلتي إني ما بقدر افط سطر
| Quote: - جداً يا دكتورة مافي أي مانع ، تحبي نختك في قسم الاطفال ؟؟؟ |
السطر دا قدر ما حاولت افطو ما قدرت
|
Post: #37
Title: Re: عندما كنت في التجاني الماحي
Author: Hafiz Bashir
Date: 09-22-2013, 04:31 PM
Parent: #35
مبروك التخرج يا دكتورة
و ميروك العودة من باكستان للسودان
سرد جميل جداً و يتناول موضوع غاية في الأهمية
مشكلتي إني ما بقدر افط سطر
| Quote: - جداً يا دكتورة مافي أي مانع ، تحبي نختك في قسم الاطفال ؟؟؟ |
السطر دا قدر ما حاولت افطو ما قدرت
|
|