حـميـــد في الدوحة صور وذكريات...

الحديث عن الذكريات مع الكائن الشعرى محمد الحسن حسن سالم عمر(حميد)
متشعب وذوشجون ...
رايت حميد الاول مرة في حياتى بودسلفاب في العام 1996م حين غرثنا مصطفى سيد احمد
ثرى ودسلفاب
واستمرت العلاقة الى ان احضرنا حميد للدوحة وعشنا مع بعضنا لاكثر من عام وظل التواصل
الى ان رحل ...

هذه الرسالة وصلتنى من حميد بعد وعودتى للدوحة

حميد في الدوحة امام برتريه مصطفى نفذه الدكتور حسن بشير كان احد اطباء الاسنان
بمستفى دخان التابع لقطر للبترول وللبرتريه قصة بين حسن ومصطفى ...
والبرتريه كان وقتها بشقة الفردان كما يحلو للبعض تسميتها لانها كانت
بجوار مركز مجوهرات الفردان ضمت هذه الشقة بجانب شخصى صديق العمر عبدالمنعم الفكى
وابناعمتى محمد وصديق اولاد تناد ثم عادل سيد احمد وتيسير زيادة ومن ثم حميد وبكرى العاقب ومحمد السنى دفع الله ومصطفى
يوسف ودكتور وجدى كامل
وبالنسبة لمسعود محمد على كانت شقة الفردان في نهاية الاسبوع فرصته للانفراد بحميد واستراحته من
رهق التدريس الجامعى ومن طلبات زوجته (الام تريزا كما يحلو لى تسميتها) طاهرة حفيدة الخليفة عبدالله وعيالها وبالتحديد
الصغيران وقتها ريان ابنته الوحيدة ومصطفى الحتالى كما كان يكنيه حميد

الصورة ابان زيارة ياسر عرمان الاولى للدوحة لبرنامج الاتجاه المعاكس بقناة الجزيرة مع الراحل
الجنوبى ارب تون
الصورة بعدسة المخرج عبدالرحمن نجدى ومنزله وزوجته عواطف حسين
من اليمين:
موسسة مدرسة الغابة والصحراء الشاعر النور عثمان ابكر وبعده الكائن الشعرى حميد ومن ثم ضمير الحركة
التشكيلة ابراهيم الصلحى ثم شخصى ثم الاستاذ محمد سليمان عبدالرحيم ومن ثم عواطف حسين ثم الفنان محمد السنى
واخيرا على ابكر ولهذه اللمة حكاية لان من بعدها انتقلنا للغداء بمزل مسعود محمد على ..
وبمنزل مسعود رفض حميد برستيج طاهرة وتناول الطعام من خلال البوفيه المفتوح وكل زول يشيل صحنو
لكنه وجد بمنزل طاهرة ومسعود انسانة الخصال الانسانية آمنة الحمدان الكويتة لذا صب حميد جم سخريته
في مسعود وقال له : انت يامسعود لو دايرنا نشيل الاكل في صحينات وكل زول يقابل صحنو في شنو عازمنا
وحكى لمسعود العشاء الذى اقامه التجانى الطيب على شرف حميد بالقاهرة وكيف هو خرمج البوفيه المفتوح
بمنزل التجانى وقتها حميد زى داير تصريح من مسعود اي خرمج حتى لوبيناتنا كوتية...

نواصل الحكى والصور بمنزل طاهرة ومسعود

سفر حزين نبيل طرير ... فواصل التداعي يا أمير

دنيا ما فيك خير .
رحمة عليك يا حميد

حميد يا كمين بشر .. صحي الموت سلام ..ما يغشاك شر

رحمه الله رحمة واسعة

أول مرة أقابله بالشعبية وكانت ليلة سياسية أيام الإنتخابات

وكان المرشح هو كمال الجزولى والمتحدثة الرئيسية هى

الأستاذة فاطمة أحمد إبراهيم .. صعد قبلها المنبر وتلا قصيدة عصماء لا أذكرها ولكنها ألهبت

الجميع.. بعدها قابلته مرات عدىدة فى زرياراته المتكررة لأقربائه بالشعبية ناس محمد سليمان

له الرحمة والمغفرة وللصداح مصطفى سيد أحمد

Quote: سفر حزين نبيل طرير ... فواصل التداعي يا أمير

حيدر ياراسى يازين
انه الموت القديم المتجدد فينا
ارجو ان تسعفنى الذاكرة لسرد (تفاصيل ماحدث)

Quote: دنيا ما فيك خير . رحمة عليك يا حميد

ياعثمان
حميد قال كلمته ومضى

لا تتوقف ايها الامير

لو كان بشيل في الموت
ذرف دمعات أسى وحرقة وأسف
أو بالعلي الحال يعترف
كان عند رسول الله وقف !

كلم بنيات الجرف .. وكل المكاليم من طرف
هي الدنيا كلها كم حرف ؟
لامن يطول فيها الاسف !

من اليمين حمد عوطف حسين ياسر عرمان ومحمد سليمان

Quote: حميد يا كمين بشر .. صحي الموت سلام ..ما يغشاك شر

سيد احمد
ياصاحبى حميد وكماقال الفيتورى في رثاء عبدالخالق محجوب .. يرقد في كل شبر من الارض

Quote: بعدها قابلته مرات عدىدة فى زرياراته المتكررة لأقربائه بالشعبية ناس محمد سليمان

شمس الدين
كيف انك
محمد سليمان ابن خال حميد وهو من احب الناس لقلب حميد
وحين اعتقل محمد اثناء دراسته بمصر كتب حميد قصيدته
عن اذنك يامصر .....
وبعد وصول حميد للدوحة زارنا محمد وقضى معنا اجمل ايام
في الدوحة وسوف اعود لايام محمد سليمان في الدوحة والمناكفة
بينه وحميد

Quote: لو كان بشيل في الموت ذرف دمعات أسى وحرقة وأسف أو بالعلي الحال يعترف كان عند رسول الله وقف ! كلم بنيات الجرف .. وكل المكاليم من طرف هي الدنيا كلها كم حرف ؟ لامن يطول فيها الاسف !

احمد محمد عباس
هذا شعر كونى كمايقولون
تقديرى لمرورك

حميد كان من احب الناس لقلب مصطفى على المستوى الشخصى وعلى مستوى النظم
وهو اكتر شاعر غنى لها مصطفى 17 قصيدة بالاضافة لبعض الملاحم التى لم تخرج
في شكلها النهائى منها السرة بت عوض الكريم والضو وجهجهة التساب ومصطفي
قال ان حميد هو الشاعر الوحيد الذى لايحوجك لان تتدخل في اوزانه الشعرية .......
اي ان تغنى النص كما نظمه حميد واى محاولة منك للتعديل النص حا يكوع منك وهنا
ذكر مصطفى طرفة حصلت بينه وحميد ابان زيارة حميد لمصطفي بالقاهرة واثنا ء مناكفة
بينهما عن لمن القيادة .. للشاعر ام المغنى ... وحين زهج حميد من تنظير مصطفى قال له ياخى روح
انا في شعرى خليتك تنقرط للحمار ..... وفعلا مصطفى في عم عبدالرحيم ملحمة حميد الخالدة نقرط للحمار .....
فحميد اشار في النص لنقريط الحمار لكن مصطفى اكمل الصور وقام بلنقريط .........

الف رحمة ونور عليك ياحميد يا صوتنا الذى كان بقدر ما ابدعت وامتعت هذه الامة

Quote: الف رحمة ونور عليك ياحميد يا صوتنا الذى كان بقدر ما ابدعت وامتعت هذه الامة

وكما قال حميد وغنى مصطفى
ايه الدنيا غير لمة ناس في خير او ساعة حزن

مراحب ياعريس

متابعين معاك الحكى والزكريات

Quote: متابعين معاك الحكى

عصام على
لقد كنت انت احد اعمدة هذا الحكى
تتذكر لمن عواطف ونجدى دعونا للعشاء بمنزلهم على شرف وصول حميد الدوحة وسفرك انت لروسيا ..
وتحريض حميد لابوالجعافر على ان يقع الرقاق في التحلية وكان يقصد ام على التى اجتهدت عواطف في عدادها
وتتذكر ايضا لمن رفض حميد اكل التفاح الاخضر بعد الشعاء بمنزل على ابكر حاولت انت اقناعة بان هذا تفاح
حقيقى وقالك بدرو تاكلنى التفاح النى وسوينى مضحكة ثم افحمك بقوله ان فطين اخته لها اكثر من عشرة سنوات
في جدة لم تخبرهم بان هناك تفاح اخضر ....
عصام تعال ياخ وكمل ونسات ايام شقة الفردان وخترفات نجدى وقراصة حميد وملاح التقلية .....

Quote: مراحب ياعريس متابعين معاك الحكى والزكريات

منتظرين العزيز بدر الدين ينزل لينا صورك ونشوف الشعر


العريس أفتح السحارة وطلع لينا الحاجات الجميله يااخ

عصام على مع مصطفى والطفلة يمنى نجدى ويمنى الان بتدرس في احد الجامعات الانجليزية
شايف ياسيد احمد الشعر والوجاهة ..عصام على ادشدش وصلع بعد ماجاكم الامارات وبقى يبارى بدرالياس




من اليمين: مرتضى عوضة ــ الوجيه عصام على ــ مصطفى سيد احمد ــ انور أبكر ــ بدرالدين الامير

الأخ بدر الدين شكرا
بوستاتك مترعة بالعبق والجمال والإبداع
وبها تفاصيل صغيرة وجميلة وقيمة لا نجدها الا عند أمثالكم

بالجد أتابع بوستاتك بشوق متابعين وزيدنا شوي
رحم الله حميد ..هل هذا المقطع من أشعاره..........!
"هادي الحفرة......كانت بير
وكان منكابي فوقا حراز
وتحتو الصخرة كانت حوض
وكانت للقبيلة ملاذ
وكانت ملتقي العُربان
وكانت متكأ الحبان
مركز دورة الإنسان
منها هبّة الفرسان
وعندها ربّة العرسان"

لك المحبة

Quote: وبعد وصول حميد للدوحة زارنا محمد وقضى معنا اجمل ايام في الدوحة وسوف اعود لايام محمد سليمان في الدوحة والمناكفة بينه وحميد

بالله محمد جا الدوحة .. ياخ دا لى أكثر من عشرين سنة لم أقابله وأيضا صديقى أحمد شقيقه

فى إجازتى الأخيرة ذهبت لمكتب شقيقهم أسامة الرجل الفخيم البشوش وتذاكرنا ماضى البلد

أنا يابدر كنت جارهم الغربى فى منزل آمنة بنت وهب زوجة المرحوم الكدرو على ما أظن

وكان صديقى وشقيقهم عبد الله هو رفيقى .. والغريبة شقيقه الأكبر منه (أحمد) هو دفعتى فى الأميرية2

كانت أيام...

Quote: انا في شعرى خليتك تنقرط للحمار ..... وفعلا مصطفى في عم عبدالرحيم ملحمة حميد الخالدة نقرط للحمار ..... فحميد اشار في النص لنقريط الحمار لكن مصطفى اكمل الصور وقام بلنقريط .........

انها عبقرية الشعر و عبقرية الموسيقى ....

رحم الله المبدعين الخالدين ابدا فى ذاكرة الشعب السودانى ...
شكرا ود الامير ...

Quote: وبها تفاصيل صغيرة وجميلة وقيمة لا نجدها الا عند أمثالكم

عبيد
لك التقدير على الاطراء
ياسيدى الكتابة عن الذكريات مع حميد سهلة وصعبة زى حميد وشعره
قبل ان اعرج (لمسيد ) طاهرة عبدالحميد يحى الخليفة وزوجها الرزيقى
المتلاف كما كان يكنهى (خالد الكد) الاستاذ مسعود محمد على بالفعل كان
منزلهم يتحول يوم الخميس من كل اسبوع لمسيد منذ سنوات مصطفى بالدوحة
الى الرحيلة واستمر لقاء الخميس على الغداء بمنزلهم والذى كان يتحول
للقاء فكرى وثافى وفنى وسياسى ومن الصعب ان تفرز بين الحضور من هو الداعى
ومن هو المدعو الى حين هجرتهم الى امريكا وفى نص مرثية حميد لمصطفى افتكر
انه اشار لمسعود برمزية صوفية يعلمها كلاهما ....
الشاهد ياسيدى الشخص الوحيد الكان مفتاحنا لطباع حميد بعد وصوله وسكنته معنا
كان الصديق الوفى بل هو اوفى من يصادق على ابكر رئيس قسم السياسات والاجراءات
ببنك قطر الوطنى وقد كان من الاصدقاء المقربين لمصطفى وحميد منذ ايام دراستة بجامعة الفرع
واكتر زول بعرف مفاتيح التعامل مع حميد الانسان وحميد بعد وصوله للدوحة تعرف على احمد ابكر
الشقيق الاكبر لعلى واحمد من السودانين اللهم مكانة كبيرة في دولة قطر ومن الخبرات الاقتصادية الاستقدمتهم
دولة قطر في السبعينات واحمد زميل دراسة وصداقة عمر للخاتم عدلان ... كنا على الغداء بمنزل احمد ونحن نهم
بالخروج من منزله قام ناول حميد مظروف وقال دى هدتك بمناسبة وصولك الدوحة ....
المهم قام على اخدنى على الجمب وقال لى اوعك تقول لحميد هذا المبلغ الفى الظرف بعادل كم بالسودانى .....
لم اهتم بتحذير على وحين وصلنا المنزل سالنى حميد القروش ديل بتاسوى كم بالسودانى وكان المبلغ الف ريال
ووقتها كان احسن زول فينا بياخد في الشهر راتب الفين ريال قلت له بتساوى كدا .... هو بعداك في زول نام ...
حميد افتكر نفسو انه تحول لثرى ولازم يحلحل كل مشاكل كل الفقراء الذين يعرفهم .....
وايضا لحميد تعليق ساخر مع مسعود كل ماتذكره اضحك كثيرا .....
جاين شخصى ومسعود وحميد من سهرة كنت انا من يقود السيارة مسعود قال لى ياخى وقف لى اما م اول صراف
وقفنا امام الصراف آلى مسعود ادخل البطاقة سحب المبلغ الذى يريده وكان مشهد مثير بالنسبة لحميد ....
حميد ضحك ساخر وقال موجه الكلام لنسفة اي شتم روحو قال : المساكين هناك تغنى ليهم حيطة تتنطى وتفلع
في قفى الزول البناها الحيطة هنا بتدى قروش .....

Quote: بالله محمد جا الدوحة .. ياخ دا لى أكثر من عشرين سنة لم أقابله وأيضا صديقى أحمد شقيقه

محمد جا الدوحة وجاط لينا الاوراق اكتر مماهى جايطة
يعنى مثلا يتصل واحد من اولاد نورى بالدوحة زى عماد اللك
يسالك وينو حميد تقولو حميد طلع مع على ابكر طيب ادينى محمد سليمان
تقوليهو محمد سليمان طلع مع محمد سليمان ــ وعشان تقنعو ان محمد سليمان
عندو صاحب اسمو محمد سليمان جا ساقو ريقك بكون نشف وما بكون اقتنع
يقرب يقوليك المسالة دى وراها ملعوب .... والاد نورى كانو صارنها لى لحدى
ما قال لهم محمد سليمان ان عندو صديق مقرب اسمو محمد سليمان بجى يسوقنى....
فوتو ليهو الموضوع ومش مقتنعين ..... في النهاية اولادهم الاتنين بتاعين سياسة ودى
حركات ساكت .....

Quote: عصام على مع مصطفى والطفلة يمنى نجدى ويمنى الان بتدرس في احد الجامعات الانجليزية شايف ياسيد احمد الشعر والوجاهة ..عصام على ادشدش وصلع بعد ماجاكم الامارات وبقى يبارى بدرالياس

سيداحمد شامي اها شن قولك ؟

فعلا يابدر البباري بدري الياس دي نهايته

هههههههههه

.

بدر الدين الامير............

كم انت جميل يا رجل......

رحم الله حميد و مصطفانا............

لقطات من الغداء بمنزل طاهرة ومسعود وحايظهر الناس الماحضور الفطور بمنزل عواطف ونجدى

طاهرة عبدالحميد وابنها مصطفى مع ياسر عرمان

من اليمين مسعود محمد على وعبدالرحمن يحى الخليفة مع ياسر عرمام

من اليمين القانونى عصام حسين حسن وعبدالمنعم الفكى مع ياسر

النور عثمان ابكر حضر الغداء وفي الباب صرخ بصوته الجهور مفاريك الاميرة طاهرة لايمكن تفويتها ....

وفى هذا الغداء حصلت جنس زرزرات ومحاكمات ... ماضى وحاضر ومستقبل
حميد وياسر من جهة بكرى العاقب وياسر من جهة النورعثمان وعبدالرحمن يحى من جهة والاخير كان حديث عهد بالدوحة
وهو عم طاهرة وتمت الناقصة ووصل اسماعيل الفحيل برفقة الكويتية آمنة الحمدان ومعهم المهندس عصام ابراهيم ...
والمسيد في ذلك الغداء بقى اكتر من مسيد ....

لصادق سيكا
شكرا على المرور والمتابعة

Quote: انها عبقرية الشعر و عبقرية الموسيقى .... رحم الله المبدعين الخالدين ابدا فى ذاكرة الشعب السودانى ... شكرا ود الامير ...

محمد الحسن
وكلاهما ورغم المحن لم يتقوفا عن الابداع الى ان توقفت انفاسهما

Quote: كم انت جميل يا رجل...... رحم الله حميد و مصطفانا............

نادر ابوكدوك
ياخى وحات شيخى خليل مشتاقين مامعقول من الليلة ديك وعيك
ياخى تعال وانا بتعهد ان لاندعو كيكى اب راسا خفيف

نفس هذه اللمة بمنزل طاهرة ومسعود تكررت حين زيارة الخاتم عدلان الاولى للدوحة
وايضا كانت على الغداء والتقى الخاتم بحميد والنور رحمة (النورماو) والنور منذ ايام
الدراسة بجامعة الخرطوم قال للخاتم انت حايجى يوم وتخلى الحزب الشيوعى ....
ونبوة النور مردها في تقديرى الى ان المفكرين مهما طال بهم السفر في غياهب الايدلوجيا لابد لهم من
المغادرة ...
والخاتم والنور لم يلتقيا بعد مقولة النور تلك
شخصى ومسعود كنا نراقب وقع هذا اللقاء راينا الخاتم وهو يحتضن النور ضاحكا ويقول له ماكنت قايلها
بعد تلاتين سنة و تلك التلاتين هى سنوات الخاتم في الحزب الشيوعى .... بس برضو في هذا الغداء هناك
من وقف الف احمر فكر وتفاكر للخاتم والنور بل وضيق عليهم الخناق ...
ودا منعرج تانى ..... داير ملف تانى

أستاذي بدر الدين


شكر لك هذا التوثيق الفاره لشخصيات إلتمعت كالنجوم في سماء حياتنا ...
منهم من غادر كما الشهب في عنفوان تألقها ...وسنى ضيائه لما يزل يشق عنان الذاكرة...لهم من الله رحمة ومغفرة
ومنهم من ما زال يلمع بالبريق ...متعهم الله بالعافية وطول العمر ...

ويا لها من دوحة ...تستظل بها الأنجم ...

أتابع سردك الجميل بصمت وإعجاب .

Quote: شكر لك هذا التوثيق الفاره لشخصيات إلتمعت كالنجوم في سماء حياتنا ... منهم من غادر كما الشهب في عنفوان تألقها ...وسنى ضيائه لما يزل يشق عنان الذاكرة...لهم من الله رحمة ومغفرة ومنهم من ما زال يلمع بالبريق ...متعهم الله بالعافية وطول العمر ... ويا لها من دوحة ...تستظل بها الأنجم ... أتابع سردك الجميل بصمت وإعجاب .

ابراهيم
ياخى كتر خيرك وفضلت خيرك ....
ورعى الرب الكويتية آمنة الحمدان والسودانية طاهرة عبدالحميد
فقد كن الرجال النساء والنساء الرجال ....

Quote: .احمد الرفاعىعليهم الرحمه حميد ياكمين بشر مصطفى ورجع المغنى حزين رد · أعجبني· ‏الأربعاء‏، الساعة ‏01:45 صباحاً‏ اضافة رد... .. نشوة ريد · ‏566‏ من المشتركين http://www.youtube.com/watch?v=ifQC2SzA-64 رد · 1 · أعجبني· ‏14 أبريل‏، الساعة ‏06:50 مساءً‏ اضافة رد... .. نشوة ريد · ‏566‏ من المشتركين رحمه الله بقدر ما ابدع و اعطى هذه الامة رد · 1 · أعجبني· ‏14 أبريل‏، الساعة ‏06:51 مساءً‏ اضافة رد... .. Alwia Saeed · الأكثر تعليقا Rbna yr7mo w y7sn ilyhy رد · أعجبني· ‏15 أبريل‏، الساعة ‏04:36 صباحاً‏ Tagwa Badwi · جامعه العلوم الطبيه والتكنولوجيا كان زمان رد · 1 · أعجبني· ‏15 أبريل‏، الساعة ‏01:00 مساءً‏. اضافة رد... .. Mamoud Elsadig · يعمل لدى ‏‎Almeaa trading company‎‏ شكرا بدر الدين الامير بوست متعة مع سرد رائع واصل ونحن متابعين رد · أعجبني· أمس في الساعة ‏08:41 مساءً‏ اضافة رد... ..

ود الامير
يا زول يا نيل
الصور الاخيرة ما ظاهره معاي ما عارف المشكله مني ولا

Quote: الصور الاخيرة ما ظاهره معاي ما عارف المشكله مني ولا

ههههههههه
سيد احمد
ياخى طريتنى موقف سخر فيه حميد مني
وطبعا حميد ملك السخرية وبعبارات قليلة
الشاهد ياسيدى حميد و بعد صوله للدوحة كان متدرب طباعة على الكمبيوتر بمكتب المحامى المعروف حسن ساتى
وكنا نتناوب على الذاهب والمجىء به حسب ظروف المتواجد في البيت ومن معه سيارة في ذلك اليوم مفروض احضر حميد
وانا في الشقة شغلت نفسى بقراية كتاب النخبة وادمان الفشل لدكتور منصور لحين موعد احضار حميد ولكنى سرحت ...
وموعد احضار حميد فات وفجأة انتبهت ان سماعة تلفون الشقة ليست في محلها ارجعتها وبعدها بثوانى اتصل حميد هايج
وكورك فينى شاغل التلفون ساعتين تحب وتغازل ونا ملطوع (طبعا كلام دا قبل عصر الجوال) رديت على حميد غضبا
ياخى لقيت تلفون البيت مشغول اعملى بلب والبلب اي البيجر هو جهاز الاتصال الرقمى كان احدث واسائل الاتصال وقتها
حميد رد بقوله :أنا ماحافظ قرم بلبك يابدرالدين قمت رديت بانفعال شديد ياحميد انت ماحافظ رقم بلبى رد على ببورد ايوة
رقم بليبك انا ماحافظو هو رقم بليبك بقى الحمدو .....

Quote: ياخى طريتنى موقف سخر فيه حميد مني وطبعا حميد ملك السخرية وبعبارات قليلة الشاهد ياسيدى حميد و بعد صوله للدوحة كان متدرب طباعة على الكمبيوتر بمكتب المحامى المعروف حسن ساتى وكنا نتناوب على الذاهب والمجىء به حسب ظروف المتواجد في البيت ومن معه سيارة في ذلك اليوم مفروض احضر حميد وانا في الشقة شغلت نفسى بقراية كتاب النخبة وادمان الفشل لدكتور منصور لحين موعد احضار حميد ولكنى سرحت ... وموعد احضار حميد فات وفجأة انتبهت ان سماعة تلفون الشقة ليست في محلها ارجعتها وبعدها بثوانى اتصل حميد هايج وكورك فينى شاغل التلفون ساعتين تحب وتغازل ونا ملطوع (طبعا كلام دا قبل عصر الجوال) رديت على حميد غضبا ياخى لقيت تلفون البيت مشغول اعملى بلب والبلب اي البيجر هو جهاز الاتصال الرقمى كان احدث واسائل الاتصال وقتها حميد رد بقوله :أنا ماحافظ قرم بلبك يابدرالدين قمت رديت بانفعال شديد ياحميد انت ماحافظ رقم بلبى رد على ببورد ايوة رقم بليبك انا ماحافظو هو رقم بليبك بقى الحمدو .....

هههههههههههههههههههههههههههه

الله يرحم أبونا حميد

الحمد لله الصور ظاهره من جهاز المكتب

الأمير بدر

من أجمل أوقات التي كان يقضيها "حميد" في "نوري" حين يعبر "شارع البنطون" في إتجاه "جريف نوري" والوقت وقت العصر ....تراه يسلك مسلك "الدرب التحتاني" مع الجروف..في هذه اللحظات وأنت معه في المسير تتجاذب معه أطراف الحديث...ولكن حين يسكت هو فإن عليك الصمت...لأنه بعد برهه سيتحدث إلى نفسه .وما عليك سوى الصمت والتأمل لما يخرج منه من عذب الكلام ورقته.

الأمير بدر...لقد كنت معايشآ للفتره التي سبقت وأعقبت فيضان 88 الذي أطاح بمنطقة "نوري" ...كنا مرابطين على السدود رغم صغر أعمارنا...الكل كان في إجتهاد وتفاني في الزود عن "نوري" الجميله..."حميد" كان حاضرآ يسجل في غياهب ذاكرته المواقف والإنفعالات وكل الاشياء ..لم يترك شارده ولا وارده ...كل ذلك تبين في "الضو وجهجهة التساب" والتساب للذين لايعرفونه هو الفيضان. لقد رأيت بأم عيني من وصفهم ب"القاشرين....لافين عليهم زي غفر ...قاشرين يجوهو طمام طمام" هؤلاء فقط حضروا للضو في أحلامه بهذه الصوره السيئه بينما الآخرون أتوه منام منام..قدرة "حميد" على الوصف قدره فيها عبقريه وتعمل ذاكرته التصويريه على طرح ما شاهده دونما تجاوز لأي حدث.

الله يرحمك يا "حميد" ...ربنا يوسع قبرك ...ربنا ينزلك منزل الصديقين والشهداء.

تحياتي أيها الأمير بدر.

Quote: اللحظات وأنت معه في المسير تتجاذب معه أطراف الحديث...ولكن حين يسكت هو فإن عليك الصمت...لأنه بعد برهه سيتحدث إلى نفسه .وما عليك سوى الصمت والتأمل لما يخرج منه من عذب الكلام ورقته.

الشيخ سيد احمد
آه ثم آهات ....
كم وكم كنت اشفق على حميد حين يخلو لنفسه حين يغلق باب غرفته عليه ليوم او يومين و لا يكلم احد
ويخرج فقط لقضاء الحاجة اوتناول الطعام ... ونظل مكهربين الى ان يعود لنا حميد
الساخر الضحوك الخرخار في الكتشينة ......

Quote: كرويات الصبر البيضاء كرويات الصبر البيضاء انهزمت ووجمت وخر جوادك ... قبل يقرب حميات القلب انلمت وضمت وبرت اجسادك ... وبت تهضرب من هضريبك ومر تعذيبك ... بين النخلة ومجرى النسمة انساقط طاير فتفت حتحت ريشو قصادك ... وكان ده حبيبك ... وقمت تجقلب بين القفة وباب النهر دبيب الريح من دبش القهر اتلوى اتلبد ولدغ الشيمة الشيمة انكفت البحر انخج الزبد انعج ... الطين انحترت ومرقت عقرب ورفعت شارة ... اندفعت فارة تجاه المركب ووقعت سارية علي صنقور رواسي قريبك وقام منوهدب وكابسو الجندب وكان دي امجادك بين الميضنة والارصاد انجرحت غيمة ... الغيمة الطيبة وحاملة حلال من ألق البسمة الفي الاطفال من عرق النسمة الفي العمال والناس الفال انسرحت فيها شظايا آذان الوقت الواقع بين تقريبك وسرقة زادك مدت ايدك تالا القبلة رشاشها يصيبك تسبي نديهتك تفقد جيهتك تنزف تنسف دانات دعت الهوس الديني الطيني تجيني قوافل اورادك تقضف ... تركض تالا جنازك ونعشك اولادك باري نحيبك ... ترجف تتعب ... تغضب تهتف تلقى قصادك سد ومرابي ارزقي رباطة وكور همباتة لحي ونخاسة .. وكل الساسة الباعو نصيبك باستشهادك عاد ان شاء الله تكون الجنة الماهلة ميعادك الا الحاصل ديل حسادك بعض يقول الله لا عادك وبعض ان لاقي طريقة يعيدك تاني عشان الموت يصطادك يا مجلوب في سوق الآخرة ... ويا متقلب تحت جهادك خر جوادك ... مات الطاير ... لدغت شيمة كرش الغيمة انبعجت دمت عينك طمت وغم قليبك ... وكان دي بلادك وين مستغرب .. تقدر تكسر حمرة عينك ... تنكر سيفك تابى جفيرك دابك تقوى يا بني آدم ... تفقد مرة مريرة ... ضميرك تكسب ثروة وتلقى العالم تحت سريرك تشبع تروى ترضع ذاتك .. من لذاتك ... وحلو الحلوى من ما تبلع يوت تتبرع .. وكلك نخوة صدقة لعمرك وباقي حياتك ونصر الدعوة حبة جوامع ...وقبة صوامع .. وكوتة وكوتة تفوت الفوتة باسرع صهوة عمرة وحجة وتسأل ربك يقبل توتبتك يغفر ذنبك يمسح سفك ... خيرات شعبك .. اصلها كانت عترة في دربك لما تعبت وفاتك حزبك لما ضهبت وخانك قلبك كانت هفوة في لحظة سهوة عن الانسان والحال الأسواء ودابك فقت .. وجاتك صحوة وجيت تكفر .. يا رب تغفر .. أغفر .. اغفر عبدك خاسر شيء ما بيسوي أنت القادر .. انت الاقوى يا البتخادع حتى الله .. وين الشهرة المال والجاه وين السطوة ... الجشع ... القسوة اركز .. اركز لا تجيب رخوة يا متلبك في الادران .. الحجر الأسود ما هو البروة وما ها مكاوي الكعبة تجيها .. حين ينكرفس توب التقوى وما في خرط للجنة تودي .. لا في خطط لدراسة جدوى كل من قال يا رب من قلبو ...رد الخالق دائماً ايوة أركز ... اركز .. لا تجيب رخوة اركض .. اركض .. تالا اشجار العملة واقصف .. اقصف من اوراقها يمكن تستر عورة شينك وما سواهو زمانك جملة اركز ... اقوى .. ولف بشكيرك فوق الراس النشف غيرك لا تستهون .. قضي منافعك وتم العمرة وفور موية زمزم قهوة أركز ... أركز .. لا تجيب رخوة ماك غلطان غلطان الشعب الجز جراد الغفلة كفاحو الجنى ارباحو .. ضياع ارواحو وجيد للحاصل وبخت الحاسد ماك غلطان غلطان الشهداء الراحو ... الواحد .. واحد ماك غلطان غلطان الحزب الجم سلاحو وخيلو تناهد ماك غلطان غلطان زمنك واصلا وطنك ياها جراحو وعندك شاهد رفضك ... سجنك .. شان الكادح والمتكادح يلقى صراحو ويبرا الساعد تهتف لامن تقصف دم .. وشارع هازيء ... يهز اصفاحو ... وبرضو تجاهد لامن صقر سن منقارك ... لامن طيرك قصو جناحو ... وخر يكابد ما حسابك الا عذابك وليلا دائما كاتو صباحو .. ونجمك ساهد لما بديت تفرز لي عيشتك .. لاكو عويشتك .. واجمعو جملة بانك تالف وانو سقطت مع انك واقف فوق اسمنت وتحتك عملة هم ساقطين في البرد البرد الناشف .. وجتهم زاحف قوز الرملة الإملاق العيش الشاظف وفي ظلمات الزمن العاصف ... قاسي عبور اليم يا نملة وهسة غلابة الدنيا الكنت بتتعب غنية عشان يرتاحو المنك راحو ... الكجنو حنك وعنك اشاحو ضراعم غادي عليك يتجارو ... بدون ما تنادي وصارو نفيرك وقت حصادك ... ورابي نصيبك هرب ... هرب ... خير بلادك برة وسيبك يا أوعية البلد القطت ... ما بسقيك الدم الفاسد يا اودية الولد الشطت .. ما بشفيك اليم الراكد الا الدم البدا يلقط .. واحد .. واحد الا اليم أب غيما نقط ... وجايبك قاصد يا محبوبة في وضع خريف .. شالع دجلو ... وكضبا راعد بيت راكوبة .. وحوشو صريف ... سوس مرقو .. وسقفو يناهد احسن تحت المطرة نقيف .. بي كفيك .. كفي والساعد وراسنا نضاري الطفل الواعد لا من يبقى سمانا نضيف .. من تخويف .. تسويف .. من زيف ونلقى الوطن الحن .. مو الطارد واللا الموت الدغري الواحد

هذه القصيدة القاها حميد بمنزل الشاعر الراحل على عبدالقيوم وكان الاخير محتفى بقدوم حميد للدوحة
بجانب الضيوف كان هناك شعراء منهم الشاعر الكبير الراحل النور عثمان ابكر والشاعر وجدى كامل وبعد
ان انهى حميد القاء هذه القصيدة رفض الشعراء ان يلقو اشعارهم في حضرة هذا الشعر ...

في هذه القصيدة حميد يرثى الشهيد الدكتور على فضل ويقرع الحزب الشيوعى وينادى بالثار للشهداء

Quote: زي دم البُشرى الوديع أحمد القرشي وصحابو هاشم الواضح حبابو .. وابتسامات الربيع زي دم المحجوب وجوزيف .. طيب العشرة الشفيع سيدي المحمود مشاعر .. أمنا الطفلة .. وجميع ما انكنس بالروح ترابو .. رشّا بي دمو ودموعو دفّا بي ضمة ضلوعو .. حين سقط بالنار صريع فيهو ما استكتر شبابو .. لا تعذر بي عَقابو ولا حسب للموت حسابو .. لاقاهو في غبطة وشجيع دمو كان عربون لدمك .. ودمِّ جايي .. همو عاش انساني همك للنهاية يا زبون الشارع الما بيرضى ظلمك .. وعزمو عزمك .. يا هوايا خوفي يا منبث في حلمك .. فينا من ينبتّ نجمك .. خوفي في كل الربيع ما نلقى نسمك .. وننسى رسمك .. حتى اسمك .. يا بديع يا كوان أهلو الفقارى .. ونارها في البرد الصقيع يا ملاذهم .. يا وجيع راحة المشتاق لضمّك .. وانت زولك مستطيع خوفي يا علي يا ابن أمك .. خوفي دمك من يضيع أيوة يا أطهر عريس .. يا وريث كل الشرائع والشعائر والطقوس وانت سعداً .. لام مواكب المناكب في المناكب القطارات ... المطارات .. البحارات .. المراكب والصحارى .. كرنفالات المدارات .. مهرجانات الكواكب والفقارى بالفرح .. زي السكارى .. العصي الصقرية والسوط والمواويل والزغاريد .. البلاليل المناديل التأشِّر خوفي من مرضى النفوس الأباليس النجوس الجواسيس اللصوص يشغلوك بالقرمصيص .. ولما تبرى الداره بابشر .. هُمّ يختطفوا العروس ___________ لافراحك يزفِّر .. نورك المشرق بصيص من سمح محياك ينفِّر .. حافي جايع .. ودون قميص في زحام سوقات تدفِّر .. من بعد سيرة ورقيص أو تكاد تشبه غناي .. البائس الرث .. الرخيص البالي والمهزوم معاي .. لما انت تروح فطيس العديل والزين مقطّم .. بي ضريرتو الحُق محطّم والوتر خانس تعيس الطيور شُدرن يبيس كل فرع ساوالا ميتم .. وانت زولك مستطيع خوفي يا علي يا ابن امك .. خوفي دمك من يضيع خوفي من غفلتنا اكتر .. ونحنا عزّل .. محض محضر بعض منشور .. عرض بوستر أو قصائد جوة دفتر الوتر بينن مدردر ميكرفونات .. صوت مودّر في زمن لاهوت وعسكر وانت زولك مستطيع خوفي يا على يا ابن امك .. خوفي دمك .. من يضيع وخوفي من عزلتنا عنو شعبنا الإنساني ظنو والتعالي الماهو منو خوفي اكتر .. من تواصل خطوة يفتر خوفي عذراً يا حبيبنا .. من ديالكتيك مدجّل سيل ضجيج الأيدولوجيا اللاّقِّي والليل المهرجل نهج عجّل ... بالتسامح والتصالح والتصافح ... والصراع زي المؤجل يا حمام الوعي أكبر .. بي اللي خنجر واللي منجل يا جواد الشارع الدم المبجل .. كالحمى بدأ الوقت المكرس للنماء انتهى الموت الإضافي كما آن للفارس فيك أن يترجل كالدمى آن للراجل فيك أن يتفرس في السماء والتراب الما اترمى والسحاب الما هما أو يحمّر بالغبينة .. في الشعارات المهينة العمائم والتمائم .. وينو دينا ؟؟؟ ده البيصطاد الحمائم من عوينا البيقتاد النسائم والغمائم من جبينا ونحنا نعتاد السمائم والهزائم والسكينة والسكاتات الحزينة على العمايل والمهازل والتفاهات المشينة وننتظر حسم المسائل من كتر كضب .. وما بيجينا سُبّة في أُولي الأمر فينا في مقاطيع المدينة سُبّة في بعض القبائل .. سُبّة في كل القطيع لما يا ود أمي تارك من اصابعينا ويضيع سُبّة في البفرش عليك .. يرضى بالوضع ال######## والبيقبل فدية فيك .. بيت إيجارك يبقى دارك من قصر سلطان مريع آه يا علي يا ابن امك ... خوفي دمك من يضيع يا حُلانا ومُشتهانا .. المر فراقك .. مر مريع كل حاجة ولا الحقارة وفيك يا واحد جميع المغابين والفقارى .. يلقوا ايه ساعة تضيع يبقوا زي طير الصحارى ينسوا صيادهم سريع وانت زولك مستطيع . خوفي يا علي يا ابن امك .. خوفي دمك من يضيع آه دمك لو يضيع ياما تتسع الحياة .. لما خلق الناس تضيق وتنفجر في القال حياة .. والجاء للتاريخ يعيق من وليدات حلتك لي بنيات الفريق تدخل البسمة اللّتك ... تمرق الحزن الغريق يا شمس هبدت بكانا .. شان توقينا الحريق أو أريج البرتكانة .. فاح يشهينا الرحيق خطوتك سبقت خطانا .. دار تورينا الطريق ويبقى في الآخر لقانا .. والوطن فوق يا رفيق .. لا يحيق المكر السيء إلا .... الزمان العفو عنهم فات .. ولّى والزمان الثأر ..رد الصاع .. حلّ فالذي لم يعرف الإنسان .. لن يعرف الله أيها المبعوث فينا .. بالتجلة سلم الدرب عليك .. الشعب صلى خُذهُمُ بين يديك .. يا إلهي ما أُحيلى شهداء الوطن الآتين .. يللا يللا غنو ... ولا تضنوا .. غنو للباسق كأنو .. شيل تميراتاً تكنو رغم إنو .. المطور ما ترّو عنو والرياح ما ريحنو الحجار الفي قلوبن .. تندهش للحتحتنو وحين تصنقع للمعلق ده اللوامين وهطنو فوق جريداً مو مفرق .. لمة الزافين يهنو شوكن السهم المطرق .. والصبيط نشاب حننو التقول لا طير جاء حلق .. لا إيديات لقطنو من نجاضو تقول محرق .. وماهو شيل مرسوم تظنو في امو خلقة رب معتق .. خمر باخوس محننو ساقن الفي الطين مغرق .. ثابت اكتر صبّحنو سبّح التربال ورقرق .. من كَتر ما فرّحنو غنا صفق يللا غنو .. يللا غنو في السنين في اياماً اصدق ..... بالتعب ظلمك محنو بالعرق يللا غنو غنو عقبالكم جميع غنو فالكم ما بيضيع

حا اعود لحين التقيت حميد لاول مرة بودسلفاب ولمن حكيت له تفاصيل رسالته الاخيرة لمصطفى سيد احمد وكيف تازم مصطفى من تفاصيل مايجرى لحميد في سجون الانقاذ
وبقى همه كيف يخرج حميد من السودان وبدينا الترتيبات الاهم بالنسبة لمصطفى ان يغادر حميد السودان باسرع فرصة وكانت الوسيلة الانجع ان يصل حميد الدوحة بتاشيرة
زيارة وبدينا البحث عن حميد وصور من جواز سفره ... وبعد اسبوعين رحل مصطفى والتقيت بحميد بودسلفاب ثم انتقلنا الى اربجى بحضور الشعراء ازهرى محمد على معتصم الطاهر
طلال دفع الله وعفيف اسماعيل وكان معنا احد اقرباء حميد ... كان الشهر رمضان تناولنا الافطار بمنزلى باربجى ثم اكملنا الحوار وتفاصيل ماحدث بالدوحة بمنزل ازهرى محمد على بالحصاحيصا

Quote: انها عبقرية الشعر و عبقرية الموسيقى .... رحم الله المبدعين الخالدين ابدا فى ذاكرة الشعب السودانى ... شكرا ود الامير ...

انه محمد الحسن يامحمد الحسن

العزيز / بدر الدين الامير
لك التحية والي كل زوار البوست
حميد مدرسة متفردة

من تصاميمي

صياعة مع الغفارى وأهل الله فى زمن غلط

محمد الحسن حسن سالم (حميد)

تستغرب يارسول الله
يا أول وتانى الخلفاء
تستغرب يا أب ذر لوجيت فى هذا الزمن الجهجاه
لو فيكم حد يا حنفاء
إتجاسر وقال ما معناه :
(في الدين الطيب لا إكراه)
وبني آدم أدرى بدنياه
أو أن العالم شركاء
في الكلاء النار وفي الماء
أو حاول ينصح وينطاول
لي حاكم ظالم وقال لا
يا لاقى جهنم مأواه
فتحولو ترابيس شالا
يا راجع نفسو أقلاه
السيف فوق راسو مخاواه
بالذات الزيك يا أب ذر
بالذات الزيك لو جاء
راكب دغريتو العرجاء
دايماً غلباوي وغالاط
لخباط للعيشة الخمجاء
بالذات الزيك لو جاء
في زمن الزيف المنشر
والتشريعات العوجاء
يا إنباع يا يرجى الراجا
يا واقف في عمق الدين
يا شايف لآخر دنياه
يا طيب يا ابن الغبراء
الشركة يسارك يا أب ذر
البنك يمين الفيحاء
اللاندكروزر يا اب ذر
من إسمك ولا من الذر
الكسحت ديكا كريسيدا
داك سيدا اب دقناً شمطاء
وجيب إيدك يلا النيلين
لو درت تشوف العنقاء
يا صاحب النفس الأمارة
بالوعي الديني المحتارة
ده الدين .. المقلعة دي الدين
والمزرعة من فضل الله
سال سيفك داقس شقيش ؟
قدامك عاين كم ديش
الزمن إندقش دقيش
الأمن .. محاكم التفتيش
في كل المدن العربية
حا تلاقي شدرتك مسبية
يا انتحرت بي بترودين

صياعة مع الغفارى وأهل الله فى زمن غلط (2)

محمد الحسن حسن سالم (حميد)


وعصفورك منزوع الريش
أجلاف كنزوها بلايين
والناس بي الله ويا أمين
بتحلحل دين الكنتين
تنلفت كايس لي مين
الأمن محاكم التفتيش
وأصحابك جوة الزنازين
واسيافن صقّر ومافيش
ما انبعنا وباعتنا قريش
لأمريكا وبي حبة عيش
والحاكم قبض البقشيش
سال سيفك داقس شقيش ؟
الأمن محاكم التفتيش
جنسيتك .. بظبورتك .. الفيش
في كل المدن العربية
حا تلاقي النفس العربية
في مصحة أمراض عصبية
بين الحجبات والأرتيل
تنململ شاحبة وصفراء
وقافلاها متاريس الديش
الكضبة عمايل الأمراء
سال سيفك داقس شقيش ؟
إتراجع يا ابن الغبراء
يا صاحب النفس الأمارة
بالثورة القادرة الجبارة
إتراجع وانسى الفقراء
أمثال العسكر غدارة
زراعك تنفد تتنفض
عمالك منك تتجارى
وكل الكادحين الشرفاء
وراح تفضل وحدك في الدارة
راح تفضل وحدك في البر
لا زوجة لا قطة ولا غطاء
لا تكتل نفسك يا أب ذر
سيب خونة مكة وتجارا
إتراجع يا ابن الغبراء
في لجة انكسرت بي السارة
زلقتني عجالة الشعراء
فلقتني من الربذة حجارة
شرقتني بدمي الصحراء
واب ذر .. لا سمعني ولا تبعني
طبطب على همي بيسراه
وكان دمي إنمازج بدماه
بي دم الغبش الشهداء
من أول وتاني الخلفاء
وإنجمع في رسول الله
زي نهر بيحفر مجراه
مصلوب فوق عتب الفيحاء
مجلوب في السوق السوداء
ما صرخت بنت أبي بكر
واسلاماه .. إسلاماه
كانت هي الأخرى ورا القصر
تنململ بين الدهماء
تجار الدين الساقطين
الجنرالات الجبناء
مكتوفة الأرجل والأيدي
مكفوفة الأعين بكماء

حامد الغبشاوى
لك التقدير على هذا الاثراء
وحميد الفنان والانسان كان امة

Quote: عصام على ادشدش وصلع بعد ماجاكم الامارات وبقى يبارى بدرالياس

الزول لا ايدو لا كراعو يلقى حالو مشيول...

بيلاقيكم يا بدر إنت واب صلعة الشايفو عجبو كلامك وقعد يقرقر ده..
،
سلام على حميد في العالمين..
،
،

عمار محمد آدم
وجع أحشايا يومي يزيد
وناراً في حشايا تقيد
دموعنا الكابي ما بتفيد
أماني الزول دا ما هو فريد
بلبل دوح كيف غريد
***
آه يا دنيا وجعي شديد
آسى العمال دموع الغيد
تباكي الميناء سكة حديد
قاسم أمين نغني نشيد
تبكي بحار وتفجع بيد
***
محصن بالمبادئ عنيد
متقل قلبوا بالتوحيد
يغني للعيون والجيد
حليل الكان رسول الريد
هو لحناً جملو الترديد
***
حليل حميد .. وآ شري يا حميد..
درت الموت بخيت وسعيد
أصلوا الأمر ما بالإيد
عمرك بالتركنومديد
بشوفها النخلي حاتي جريد
***
أجيب لي سيرتو تاني وأعيد
بعد لمتنا أبقى وحيد
نصابح وشوا يوم العيد
بعد قربت تبقى بعيد
حليل حميدنا يا أبو السيد...
***
وقال في الدنيا ما في جديد
ضيوف في الدنيا نحنا عبيد
كل ما تملي بيها بليد
شيخ حميدنا ناقصوا مسيد
وباقي الشوق قطعلو وريد
***
أشوفو يخب شاقي السوق
أشوف كرعي الملاني شقوق
كايس لي إويضتو عروق
قالي الروح دي دايري مروق
غريب وعجيب جنس مخلوق
***
حزين وحشايا كيف محروق
وأصلو الأمر ما مطلوق
جاء البنداري من لافوق
قدر حميد يموت مريوق
مرة يغيب ومرة يفوق
***
في حميد دعابه وذوق
ضميرو الصاحي ما بيروق
في ناساً عاملة دايره حقوق
دخل الفرد ما بيحوق
هتافاً داوي شق حلوق
***
كلو ضميرو ما كان بوق
لا بنساق ولا بيسوق
إجور عمال مال ممحوق
شعب جيعان شباب مسحوق
روح ونضال براهو الشوق
***
شوق حميدنا للواسوق
ريحة الطين مع الماروق
يعاين في قمح مدقوق
يتبن في ملاحو يضوق
ويسمع من قماري القوق
***
ومنو الليلي ما بنشبخ
فراقو يبكي للشفع
غصنو رطيب ودابو أينع
أقول إندله تاني أرجع
هو شكن في قليبي وجع
***
مجلبط في الوغش يقرع
أغبش وبي تحت يزرع
ضمير عمالنا في المصنع
قلبو يحن وطرفو دمع
وفيهو أصالة المنبع
***
شيد عرشو وإتربع
بين الشعراء هو الأروع
حلاتو إتجلى في المجمع
كل الأمة ليها جمع
دا أجمل قيمة لينا وضع
***
لا بيصد ولا بيمنع
وكل ما سوا ليهو شفع
يعين اليتم الرضع
ليها الدنيا تب ودع
حزين يا يمه طرفي دمع
***
حاجتو قليلي ما بيطمع
فقيراً من لبن كركع
هو برقاً في الدياجي لمع
كلو بصيرة شوف وسمع
يمين حميد دفسني وجع
***
وكان قدامي زولنا جدع
أماني الليلة ما بدع
وفي كل الفنون برع
متين ما صب مطرو نفع
وكم غصصاً كتيري بلع
***
آه الموت ملاني غُلب
جوه مشاعري شايلي سُحب
أريتها دموعي مطرة تصب
في وجداني روحو تدب
متيم زولنا كتلو الحب
***
جميل الروح وصافي اللب
من كلماتو أسكت كب
وبينا وبينو ما في حجب
جمال من نوري منو يعب
وفي أعماقنا شادلو نصب
***
في حميد نسوي كتب
جاتو الدنيا قالها ثُب
البنداري ريحو تهب
نحوه الموت يشد ويخب
وناراً فيني تاني تشب
***
حلات حميدنا في الونسة
شيوعي قضيتو في عبس
أنا البطراه ما بنسى
أجيب من نوره قبسا
وفينا معانياً غرسا
***
فيها الفراغي ما جلسا
وعنها مبادئو ما إنتكسا
دا كان للصبر ملتمسا
وفيها قضيتو منغمسا
تهابوا الزعما والرؤسا
***
مركب عمرو دابو رسى
موتو صباح ودفنو مساء
حزني عميق وكلي آسى
كل أفكاري ملتبسا
فهل أنسى لعل وعسى
***
ثياباً ضيقة ما لبسا
ولي عريانا ديما كسا
قلبوا يلين أريتو قسى
حقوق الخلق ما لمسا
وعند الكعبة شوفو جثى
***
في حميد بيكمن سر
تبدأ برودي تاني تحر
قالي الليلي يومي ودر
وعن إحساسي قوم عبر
وقشقش لي دموع السر
***
تكركر روحو منو تفر
أقولو خلاص أشوفو مصر
ويبقى البيت سقوفو تخر
وليها الكلمة سووا سعر
حتى الشعر ما هو شعر
***
بيجهد في فعايل البر
يبقى الزول نبينا خضر
سلو فاطني اللبوها نمر
بعد كبرتو تاني كبر
كل الناس مصيرها شبر
***
وكت مستني لي جيتو
بياض العمي زي نيتو
قتلو تمام وقال غايتو
شيوعي وما هزم رايتو
يناضل وهمتو قرايتو
***
يبكي يعزي لي أخيتو
بادي الحزن في مشيتو
هموم الشعب في بيتو
يجاملوا يعزوا في ميتو
نقول يا ليتو يا ليتو
***
أ
سي حميدنا سي فوقو
ليها الجني وآ شوقو
يحن ويلاقي معشوقو
طير الجنة بي فوقو
مدد يدينا من ذوقو
***
ورباً حب مخلوقو
مغيباً لامسو شروقو
قضيتو الجاري في عروقو
يسوقو حمامو بي طوقو
وكأس الذلة ما يضوقو
***
عمار محمد ادم

اعاين فى الشرق حميد
واعاين فى الغرب حميد
اقولك يا اخى جيدا جيت
اقولك يابا شن سويت
اشوفك بى تحت مريت
انا ديك يا اخى كيف امسيت
وتمرق بى ضراه البيت
تقولى انشاء الله جيت مبيت
ترانى فى الدجى اتواريت
وجانى الشعر دابى بديت
اقولو تعال يقولى ابيت

تقول عنى مشيول حال
وعندى الليلى ليك سؤال
دا موعدنا ذى الحجة
وليه اخرتو لى شوال
دا اصلو معاى ما بطال
وعرسك من زمن راجينو ياحميد
نضبح فى الصباح عتان
ونضبح فى الضهر حملين
تغنى الشول عديلة وزين
بقيت غريس لحقت الزين

وقالت عاشى ما بترجى
بخيت وسعيد بختك جاء
عقب انسد باب الريد
الكان متاقة زمان
وكنت الشاعر المسئول
يمين حاشاك ما عربيد
لاك درويش ولاكا بليد
وقال قبلى كم عدو
فضل انا الويحيد
وقتلو اطرانى يا حميد
دحين اطرانا يوم عرسك
وجيب سيرتى فى نفسك
يبقى اكون معاك عريس
انطط زى دحيشا قى الزرع مطلوق
يمين ممكون برانى الشوق
تقول مجنون واصلى عشوق
حمى الريدى فى احشاى
واصلو الريد سكن جواى
اكيد معيون ومانى براى

حليلك انت يا حميد
مجلبط فى الوغش بالطين
وباقى اليوم هموم وحنين
جعيص حميد وما مسكين
شيوعى كمان وحبة دين
يغنى العوده والفوده
ويمدح فيهو سيدى على
وقال لى تعال
امانى الليلى ما وقعت قبض شركها
تعاند الدنيا تتملص وطب حميدسريع مسكها
خطة قوييى السر حبكها
وضاع العمر فى العيشة
فى الفى وما فيشها
جدادى خلاص نتف ريشها
امانى الدنيا ما خاينى
يعجبك فينابرطيشها

وبعد الليلى منو البيعزى فى البكيات
ومنو البيوارى للاموات
ومنو البيكفكف الدمعات
وسف سعوطو واندله
تطوف اقدامو فى الحله
ويعاين فى خلايق الله
وبعد ما شاب واصبح جد
ولدلو ولد
جلدو تخين
سمى وليدو قاسم امين
قبض حميد
يمين قبض حميد
الا المتلو ما بيقبض
يبقى الشى..
حقوق الثورى فى التركة
نصيب الختمى فى البركه
حزب شيوعى والحركه
مسك ايديهو تب فركها

وقت براى فى نفسى
وقع حميد ماسم لعن ابليس
اصلو زولا حى وماهو فطيس
بقالنا عريس
خلاص حميد صبح مشغول
يكابس فى قديرة الفول
وقبل روحى ماتنسل
طلعت بطل
وانسرينا يا حميد
يبارك ليك ربى يزيد
يكسر فى الوغش واقود
يدندن بى غنى المولود
عمار محمد ادم قصيدة عرس حميد كتبتها قبل وفاته
711أعجبني · · المشاركة
Amar Adam
13 أبريل
عمار محمد آدم
وجع أحشايا يومي يزيد
وناراً في حشايا تقيد
دموعنا الكابي ما بتفيد
أماني الزول دا ما هو فريد
بلبل دوح كيف غريد
***
آه يا دنيا وجعي شديد
آسى العمال دموع الغيد
تباكي الميناء سكة حديد
قاسم أمين نغني نشيد
تبكي بحار وتفجع بيد
***
محصن بالمبادئ عنيد
متقل قلبوا بالتوحيد
يغني للعيون والجيد
حليل الكان رسول الريد
هو لحناً جملو الترديد
***
حليل حميد .. وآ شري يا حميد..
درت الموت بخيت وسعيد
أصلوا الأمر ما بالإيد
عمرك بالتركنومديد
بشوفها النخلي حاتي جريد
***
أجيب لي سيرتو تاني وأعيد
بعد لمتنا أبقى وحيد
نصابح وشوا يوم العيد
بعد قربت تبقى بعيد
حليل حميدنا يا أبو السيد...
***
وقال في الدنيا ما في جديد
ضيوف في الدنيا نحنا عبيد
كل ما تملي بيها بليد
شيخ حميدنا ناقصوا مسيد
وباقي الشوق قطعلو وريد
***
أشوفو يخب شاقي السوق
أشوف كرعي الملاني شقوق
كايس لي إويضتو عروق
قالي الروح دي دايري مروق
غريب وعجيب جنس مخلوق
***
حزين وحشايا كيف محروق
وأصلو الأمر ما مطلوق
جاء البنداري من لافوق
قدر حميد يموت مريوق
مرة يغيب ومرة يفوق
***
في حميد دعابه وذوق
ضميرو الصاحي ما بيروق
في ناساً عاملة دايره حقوق
دخل الفرد ما بيحوق
هتافاً داوي شق حلوق
***
كلو ضميرو ما كان بوق
لا بنساق ولا بيسوق
إجور عمال مال ممحوق
شعب جيعان شباب مسحوق
روح ونضال براهو الشوق
***
شوق حميدنا للواسوق
ريحة الطين مع الماروق
يعاين في قمح مدقوق
يتبن في ملاحو يضوق
ويسمع من قماري القوق
***
ومنو الليلي ما بنشبخ
فراقو يبكي للشفع
غصنو رطيب ودابو أينع
أقول إندله تاني أرجع
هو شكن في قليبي وجع
***
مجلبط في الوغش يقرع
أغبش وبي تحت يزرع
ضمير عمالنا في المصنع
قلبو يحن وطرفو دمع
وفيهو أصالة المنبع
***
شيد عرشو وإتربع
بين الشعراء هو الأروع
حلاتو إتجلى في المجمع
كل الأمة ليها جمع
دا أجمل قيمة لينا وضع
***
لا بيصد ولا بيمنع
وكل ما سوا ليهو شفع
يعين اليتم الرضع
ليها الدنيا تب ودع
حزين يا يمه طرفي دمع
***
حاجتو قليلي ما بيطمع
فقيراً من لبن كركع
هو برقاً في الدياجي لمع
كلو بصيرة شوف وسمع
يمين حميد دفسني وجع
***
وكان قدامي زولنا جدع
أماني الليلة ما بدع
وفي كل الفنون برع
متين ما صب مطرو نفع
وكم غصصاً كتيري بلع
***
آه الموت ملاني غُلب
جوه مشاعري شايلي سُحب
أريتها دموعي مطرة تصب
في وجداني روحو تدب
متيم زولنا كتلو الحب
***
جميل الروح وصافي اللب
من كلماتو أسكت كب
وبينا وبينو ما في حجب
جمال من نوري منو يعب
وفي أعماقنا شادلو نصب
***
في حميد نسوي كتب
جاتو الدنيا قالها ثُب
البنداري ريحو تهب
نحوه الموت يشد ويخب
وناراً فيني تاني تشب
***
حلات حميدنا في الونسة
شيوعي قضيتو في عبس
أنا البطراه ما بنسى
أجيب من نوره قبسا
وفينا معانياً غرسا
***
فيها الفراغي ما جلسا
وعنها مبادئو ما إنتكسا
دا كان للصبر ملتمسا
وفيها قضيتو منغمسا
تهابوا الزعما والرؤسا
***
مركب عمرو دابو رسى
موتو صباح ودفنو مساء
حزني عميق وكلي آسى
كل أفكاري ملتبسا
فهل أنسى لعل وعسى
***
ثياباً ضيقة ما لبسا
ولي عريانا ديما كسا
قلبوا يلين أريتو قسى
حقوق الخلق ما لمسا
وعند الكعبة شوفو جثى
***
في حميد بيكمن سر
تبدأ برودي تاني تحر
قالي الليلي يومي ودر
وعن إحساسي قوم عبر
وقشقش لي دموع السر
***
تكركر روحو منو تفر
أقولو خلاص أشوفو مصر
ويبقى البيت سقوفو تخر
وليها الكلمة سووا سعر
حتى الشعر ما هو شعر
***
بيجهد في فعايل البر
يبقى الزول نبينا خضر
سلو فاطني اللبوها نمر
بعد كبرتو تاني كبر
كل الناس مصيرها شبر
***
وكت مستني لي جيتو
بياض العمي زي نيتو
قتلو تمام وقال غايتو
شيوعي وما هزم رايتو
يناضل وهمتو قرايتو
***
يبكي يعزي لي أخيتو
بادي الحزن في مشيتو
هموم الشعب في بيتو
يجاملوا يعزوا في ميتو
نقول يا ليتو يا ليتو
***
أ
سي حميدنا سي فوقو
ليها الجني وآ شوقو
يحن ويلاقي معشوقو
طير الجنة بي فوقو
مدد يدينا من ذوقو
***
ورباً حب مخلوقو
مغيباً لامسو شروقو
قضيتو الجاري في عروقو
يسوقو حمامو بي طوقو
وكأس الذلة ما يضوقو
***
عمار محمد ادم
43أعجبني · · المشاركة
Amar Adam
‏31 مارس‏ بالقرب من ‏Khartoum‏
حليل حميد
32أعجبني · · المشاركة
Amar Adam
23 مارس
امى
31أعجبني · · المشاركة
Amar Adam كان برفقة ‏هيثم مبارك عثمان‏.
23 مارس
صورة
842أعجبني · · المشاركة
Mohammed Farouk Salman
منذ ‏23 مارس‏ عبر ‏‎Causes‎‏
Join my cause: Sudanese political prisoner Abdel Aziz Khalid
from Mohammed Farouk Salman
This is a cause I really believe in. Join me in supporting it.
أعجبني · · Accept · المشاركة
Amar Adam
5 مارس
صورة
صورة
صورة
145أعجبني · · المشاركة
Amar Adam
5 مارس
صورة
صورة
23أعجبني · · المشاركة
Amar Adam
26 يناير
حلات عثمان

القرير .. قوز قرافي
طريت عثمان سرح قلبي وقبيل طشه
تث###### آمنة في البركل تقالد التومة بت عشه
قطرنا الدابو صفر وجاء تعطل جوه في الورشه
دفنا الزول ترك أحزان جوه الناس بقت غبشه
دحين معقول دفنا الريد رجعنا بلاه
نشوف الدنيا صي وخلا
وأشوفها مهيرة في الباكيات
...مشاهدة المزيد
81أعجبني · · المشاركة
Amar Adam
26 يناير
اعاين فى الشرق حميد
واعاين فى الغرب حميد
اقولك يا اخى جيدا جيت
اقولك يابا شن سويت
اشوفك بى تحت مريت
انا ديك يا اخى كيف امسيت
وتمرق بى ضراه البيت
تقولى انشاء الله جيت مبيت
ترانى فى الدجى اتواريت
وجانى الشعر دابى بديت

Quote: تبكي بحار وتفجع بيد *** محصن بالمبادئ عنيد متقل قلبوا بالتوحيد يغني للعيون والجيد حليل الكان رسول الريد

عمار
شكرا على هذه البكائية
حميد كان امة

اتمنى من الاخ الصديق بكرى العاقب الذى يزور الدوحة هذه الايام بعد غيابه عنها لعشرة سنوت
ان يكتب لنا عن ايام حميد في الدوحة وذكريات شقة الفردان

رمضان كريم للجميع تصومو وتفطرو على خير

Quote: الزول لا ايدو لا كراعو يلقى حالو مشيول... بيلاقيكم يا بدر إنت واب صلعة الشايفو عجبو كلامك وقعد يقرقر ده.. ، سلام على حميد في العالمين.. ،

بدر الياس
كل الاعوام وانت بخيرين وزيادة
عليك الله خلى صاحبنا الصلعت بيهو عصام على يحكى عن العشاء الاخير له مع حميد في الدوحة
بمنزل عواطف حسين وعبدالرحمن نجدى ووقتها كان عصام حزم حقايبو في طريقو لموسكو وحميد
حديث عهد بالدوحة في ذالك الحفل وصفت حميد بالقادم المقيم وعصام بالراحل المقيم ثم عددت مناقب
وحسن خصال وصفات عصام على قام الروائى الحسن البكرى علق بقوله ياود الامير انت مالك على
عصام على هسى دا شكر ولا مرثية ......