Post: #1
Title: الجاتك في طَلْحَكْ سامحتك....!
Author: mekki
Date: 07-16-2015, 08:52 AM
07:52 AM Jul, 16 2015
سودانيز اون لاين
mekki-omdurman/al thoura
مكتبتى فى سودانيزاونلاين
قضيتُ العام الإغترابي الفائت في شئ من الجفاف الإنساني (البائن)،، والسبب هو مُصادرة كوتة الطلح السنوية بواسطة ضابطات مطار الخرطوم...!
أسألكم، بالله عليكم، كيف نجت كوتة الطلح من كل أجهزة "الأكس راي" التي يراقبها الرجال ولم يتم إكتشافها إلا في آخر مُنبت ، تشرف علي تشغيله الضابطات من النساء؟؟!!
هل لديكم تفسيرٌ آخر غير الحسد والترصد؟!
نعم،أن، الخطأ المبدئي كان من الكونسلتو الذي أشرف علي مسألة تستيف الشنط؛؛؛ وعندي قناعة قديمة،منذ أمد بعيد،،أنه ما إتفق القوم علي رأي إلا وقد كان الصواب علي الجانب الآخر...!
حدثوني بالله عليكم ،بأي حق من حقوق الجحيم، أن تقرر أحدهم بوضع الكوتة السنوية في شنطة صحبة الراكب؟؟!!
الم يذكركم هذا الفعل بكورة "منقستو" التي أرجعها (مقصرة)، عام 85 ، فخطفها "الدحيش" ليحرز منها (هدفا) في شباك "(عبدالمعطي)"،، ؟؟!!!
كما أنني لا أصنف نفسي من (المقصرين) حتي تكون كوتتي ،فقط،علي قدر (صحبة) الراكب...!
والشئ الذي أغاظني وحرك مصراني العصبي، أن عملية المصادرة تمت بقدر معتبر من التبسم والتِضِحِك،،،
- يا جماعة البتاع ده محتاج نار تقيلة عشان يشتعل،،وداير،كمان، هِبهِيب ،وده ما بي يحصل إلا الطيارة تحترق كلها ،،
وكأنني أؤذن في وادي (أم سدر)...!
- خلاص ،،بي نديكم فرصة ترجعوا تشحنوهوا وتجوا تاني..!
- والهل فرصتكم دي أخير منها فرصة نزار حامد الضيع القون في مازيمبي،،يعني كيف افوت الطيارة عشان شوية طلح (مقصر)،،المسألة بي تتباصر لمن نصل،،
- أوعي تمشي هناك تفضحنا وتشحد،، عارفاك أصلك زول فضيحة،، لو فضيت الطلح تتحمل النتيجة براك...!
واصدقكم القول أن وقت السفر هو الوحيد الذي أستطيع فيه تنفيذ قرارتي،، فقد إستطاعت (الجبهة الثورية) إحتلال كل مساحات (كاودا)...!
اخذت الحقيبة علي جنب ، فأخليتها علي دائر خشبة،، وهمهمت متظارفاً: لو عندكن زولة عايزاهو التشيلو...!
والسنة من حسع،،وقبل شهر من السفر،،عملت التستيفات اللازمة،،
ولا اراكم اله مكروهاً في طلحاً لديكم...!
|
Post: #2
Title: Re: الجاتك في طَلْحَكْ سامحتك....!
Author: محمد البشرى الخضر
Date: 07-16-2015, 10:58 AM
Parent: #1
ههههههههههه كل عام وانتم بخير يا مكي
ذكرتني نكتة واحد في المطار زهجان من انتظار سودانير المتأخرة كالعادة وجمبو شفع مغتربين عاملين زيطة وازعاج شديد قاليهم انتو يشيلوكم طلح يجيبوكم السنة البعدها شفع :)
|
Post: #3
Title: Re: الجاتك في طَلْحَكْ سامحتك....!
Author: mekki
Date: 07-18-2015, 03:13 PM
Parent: #2
وانت بالف خير يا محمد البشري
|
Post: #4
Title: Re: الجاتك في طَلْحَكْ سامحتك....!
Author: سامى عبد المطلب
Date: 07-18-2015, 04:10 PM
Parent: #3
يجازي محنك يا مكى والجاتك في طلحك سامحتك
|
Post: #5
Title: Re: الجاتك في طَلْحَكْ سامحتك....!
Author: mekki
Date: 07-23-2015, 03:42 PM
Parent: #4
| Quote: يجازي محنك يا مكى والجاتك في طلحك سامحتك |
شكرا سامي علي المرور
|
Post: #6
Title: Re: الجاتك في طَلْحَكْ سامحتك....!
Author: عبدالعزيز الفاضلابى
Date: 07-23-2015, 05:49 PM
Parent: #5
| Quote: وكأنني أؤذن في وادي (أم سدر)...! |
ههههههه
وادى ام سدر دى وين ,,, اوعا تكون جنب الجداد غَمَّدْ؟
كويس انك سودنت المثل ـ انا بعجبنى الزول الـ بحب السودان
|
Post: #7
Title: Re: الجاتك في طَلْحَكْ سامحتك....!
Author: سيف اليزل سعد عمر
Date: 07-23-2015, 11:31 PM
Parent: #6
قطعة جميلة..
|
Post: #8
Title: Re: الجاتك في طَلْحَكْ سامحتك....!
Author: محمد الطيب محمد
Date: 07-24-2015, 03:18 AM
Parent: #7
| Quote: ذكرتني نكتة واحد في المطار زهجان من انتظار سودانير المتأخرة كالعادة وجمبو شفع مغتربين عاملين زيطة وازعاج شديد قاليهم انتو يشيلوكم طلح يجيبوكم السنة البعدها شفع : |
نكتة ظريفة ضحكتني بالجد
وربنا يعوضك في طلحك
وكل عام وانت بالف خير
|
|