يا ربْ تجيب لينا البَرِد نصرةً مِنْك للبروف صاحبى...!

نادانى أهلى: اسرع يا مكى, محمد احمد صاحبك بى يتكلم فى التلفزيون...!
ومحمد احمد صباح الخير..أو البروف –كما يحلو لأصدقائه تسميته- هو مواطن من طراز فريد ونادر..!
وكثيراً ما حاولتُ شحذ هِمَم قلمى للكتابه عن البروف...فيرتدُ القلم خاسئاً ...يكبّله الخوف من ألا يُوفِى الرجل مقدارهُ..!
ومحمد احمد صباح الخير-هذا- هو سليل أسره معَمِّره-ما شاء الله- تنحدرُ إصولها من منطقة الجزيره أبا...هاجرت بكامل إمتدادتها الى العاصمه...تُمارس الحياه بنفس سهولتها القديمه...
وقد دَرَس الرجل بجامعة الخرطوم-قسم الفيزياء- فى الفتره الممتده من منتصف الثمانينات الى بدايات التسعينات...وقد عاصره الكثير من كهول البورد من أمثال الأخ عصام جبر الله...وعادل كديس...والدكتور طارق مختار...وآل الكارب..وآل الصاوى وآل المجمر...والأخ بكرى أبوبكر...وآخرين كُثر...!
والذين عرِفوا البروف عن قُرب لابد انهم قد إندهشوا من عصامية الرجل...وأدبه الجَمْ...واريحيته الشديده...
وفى زماننا كان الطعام فى الداخليات مجاناً(!!)...لكن إذا لم يتمكن البروف من اللحاق بوجبةٍ ما...ضغَطَ على مصارين بطنه حتى الوجبه التاليه...دون أن يشعر بذلك أحد...
وهو على إستعداد تام لضرب "الكُدُر" مهما تطول المسافه دون أن يطلب مليماً من أحد...
والرجل ذو أدبٍ جم...ومعرفه عميقه بالتراث...تزخر ذاكرته بالكثير من الأمثال الشعبيه...لا يجد أدنى عناء فى إسترجاعها مُضيفاً الى مُحدثيه أبعاداً جماليه فخيمه...
بعد أن تخرج البروف التحق بهيئة الإرصاد الجويه وما زال يعمل بها حتى الآن ضمن كوكبه رائعه من خريجى الفيزياء جامعة الخرطوم من أمثال المحترمات أمانى سنهورى...ومها الوداعه وإبتسام سلمان...والمحترم بدر الدين مامون..وهذا الأخير هو من ابناء الفتيحاب...
وكثيراً ما كنتُ أزور البروف فى مكان عمله لألاحظ امكانات القوم الماديه المتواضعه بالرغم من توفر الكفاءات البشريه..ويكفى ان تعلموا انه مؤخراً-فقط- قد ادخلت اليهم خدمة الإنترنت...!
شاءت ظروف الأسر الممتده ومسئوليات البروف الجَمّه أن يمكث الرجل حتى الآن بدون زواج...ولولا أننى أعرف أن الرجل عُصامى للحَد البعيد لطالبت بقيام نفره كُبرى نساعد صديقنا الخلوق فى إكمال نصف دينه...!
يعنى النَفْرَات بس إلا فى (البلاوى)...!
خلونا نعمل نَفْرَات فَرَح برْضَك...!
أسرعتُ مهرول الخُطا نحو التلفاز لأجد صديقنا البروف يتوعدنا بموجة برد شديده آتيه لا رَيْب...وعندما سَألَتهُ المذيعه عن مواعيد الموجه المُرتقبه...أجابها بعفويته التى نعرفها: "فِى اليومين ديل"...!
وبعد أن طالت المده على "وعيد" صديقى وقَرُبَت من الإسبوعين...وبالرغم من أننى أنحدرُ من أسره أشتهرت بخوفها الشديد من البرد أباً عن جَد....إلا أننى لم أجدُ بُداً من رَفع الأكُف بالدعاء:" يا ربى تجيب لينا موجة البَرد عشان تنصُر البروف صاحبى"...!

Quote: ...أجابها بعفويته التى نعرفها: "فِى اليومين ديل"...!

سلام يا مكى

هذه لن يلتقطها الا من يعرف البروف

اعود لاحقا للانسان العجيب البروف

شكرا لك على المتعة

Quote: أجابها بعفويته التى نعرفها: "فِى اليومين ديل"...!

_____
اللهم انصر البروف؛ مكي
و الكهول بموجة البرد.

"بروفسر" مكى
فتحت ليك كم موضوع في الكم سطر دى!!!!!

Quote: محمد احمد صاحبك بى يتكلم فى التلفزيون...!

هل ده مؤشر لانو معايير الظهور في تلفزيون السودان اختلفت و لا البروف كان استثناء؟ فضل يجيبو عثمان حامد كمان؟

Quote: ولولا أننى أعرف أن الرجل عُصامى للحَد البعيد لطالبت بقيام نفره كُبرى نساعد صديقنا الخلوق فى إكمال نصف دينه...!

يا زول النفرات زى دى ما بستاذنو فيها، دى بعملوها بس، لكن هل البروف ناوى؟ هل في خطط ؟ انت بس ادينا الاكيده والنفير امرق منو.. ادينى الخبر في الايميل ..

Quote: " يا ربى تجيب لينا موجة البَرد عشان تنصُر البروف صاحبى"...!

بالغت واتلومت، ياخى في داعى تحرج صديقنا و تحرجنا مع جمهور النشرة الجوية؟ كان تتكلم من بدرى ... على الحرام نلز ليك شوالين جليد و كم كيس جبهة هوائية باردة توقف السودان كنيشة ... باقي هنا التلج فضلة خيرك مجدع في الشارع شفت الافتراء ده كيف.

كلم البروف المرة الجاية لما يكون ناوى يرصع الناس بي موجة برد يدينا خبر قبل مده كافية و يراعى ظروف الترحيل والمواصلات ... هسة المشكلة في البروف القال الكلام ده ولا الفايقين البقعدو يحضرو النشرة الجوية في تلفزيون جمهورية حار جاف مترامى الاطراف؟؟؟

Quote: كهول

المرة الجاية راعى ملافظك ... باقي الحاقدين والاعداء كتار ، واهو شايف براك ما صدقو..

المحترم ود ملاسى...لك خالص الود وانت تشارك فى بوستاتنا بعد طويل إنقطاع....ذكرتنا والله الأيام الحلوه...ايام (ود أب موس)...!





هاى راغب علامي؟!
*****
المحترم ود جبرالله

Quote: يا زول النفرات زى دى ما بستاذنو فيها، دى بعملوها بس، لكن هل البروف ناوى؟ هل في خطط ؟ انت بس ادينا الاكيده والنفير امرق منو.. ادينى الخبر في الايميل ..

يا هو دا الفخ الختيتو ليكم...
الموضوع جادى جداً
إنت بس حرك الجماعه...
باقى الزمن ده الواحد بقى قصيِّر...
وإنت عارف كلام القصيِّر...
همتك يا الطويل...
....

Quote: باقي الحاقدين والاعداء كتار ، واهو شايف براك ما صدقو..

عاد يا خوى إيش نسوى...
وين حا نهرب من مصيرنا؟

وينك يا ود جبر الله؟
ووينك يا سيد الحوش؟

الحبيب/ مكي وعبرك سلام للرائع جدا البروف
سبق وأن إقترحت على البروف أن نزوجه فأجابني "خلاص إنت حليت كل المشاكل وفضل ليك عرسي بس". نحن جاهزين وهو عليه أن يعلن جاهزيته! هذه البداية بغرض "القشمرة" كما يقول أهل الخليج!
أما بروف الرجل العصامي الصامد، فالحديث عنه يطول وبعضه يصعب بثه في الأسافير!وأخشى أن تكون البدلة الخضراء التاريخية التي هدد نجيلة بإلقائها في المذبلة مازالت في معيته! فالبروف نساها أو تناساها بغرفتنا بعطبرة "أ"، وحينما أدلى نجيلة بتصريحه، إتهمنا بالحسادة لأننا لانمتلك بدلة مثلها!
"أوعه يكون ظهر بيها في التلفزيون يامكي".
بالتأكيد سوف أواصل لاحقا ماهو جاد ومفيد عن البروف وهذه المداخلة بغرض التسخين فقط.
الود موصول لصديقي عصام وللصديق بكري ولبقية الأصدقاء نقول "هيا لنوف البروف بعضا من حقه علينا"
وتسلم يامكي

الترحيب الشدييد بالمحامى الخلوق...فخر الإنتاج السودانى...الدكتور احمد عثمان عمر...
فعلا ايها المحامى النجيب البروف هو من طينة نبيله قلما يجود الزمان بمثلها...
لكن الذى يشد من أزرنا ويجعلنا نجابه مصاعب الحياه الجمه...هو أمثال هؤلاء الشرفاء...
والشئ الذى يملأ انفسنا بالأمل أن بلادنا ما زالت تحتوى على الرائعين...عفيفى اليدِ واللسان...
تتذكر يا - عزيزى احمد -الفتى النحيف...كادر الخطابه...من منطقة شندى...ذلك البار بأهله.. الذى كان يزاملكم فى قانون؟!
فهو ايضاً يستحق الكتابه عنه....
وفى إنتظار قريحتنا فى أن تسطر له شيئاً ما....
فى يومٍ ما...
نجيله الذى ذكرته...أظنه ما زال يدافر معنا فى كرش الفيل...آملاً فى ايجاد نفقٍ للخروج...
إنشاء الله من (خرطوم) الفيل...!

Quote: هيا لنوف البروف بعضا من حقه علينا

على بركة الله يا اخى..!

Quote: أسرعتُ مهرول الخُطا نحو التلفاز لأجد صديقنا البروف يتوعدنا بموجة برد شديده آتيه لا رَيْب...وعندما سَألَتهُ المذيعه عن مواعيد الموجه المُرتقبه...أجابها بعفويته التى نعرفها: "فِى اليومين ديل"...!

أن تأتي الموجة متأخرة 45 يوم خير من أن لا تأتي

Quote: أن تأتي الموجة متأخرة 45 يوم خير من أن لا تأتي

دى تكون من نفحات واصل اليد عصام جبرالله