Post: #1 Title: مسّاخِين الغُنا .. Author: Salah Abdulla Date: 06-26-2013, 08:21 PM Parent: #0
مسخّوا علينا الغُنا...
محمود عبدالعزيز – أبوبكر سيدأحمد.. أي غنية يغنوها، تمسخ ليك حتى عند سيدا زااااااتو.. حبيبنا المقيم في قلوبنا الراحل محمود عبدالعزيز، قنّن (مِسيّخو) للغنا ، ونزّل عدد كبير من الألبومات فيهو غنا كتير جداً أي غنية سمعتها عندو مِسخت لي عند غيرو.. أبوبكر سيدأحمد، يغني في اللقاءات والمناسبات العامة، برضو أي غنية يغنيها تمسخ ليك عند غيرو.. أجد متعة كبيرة جداً في السماع ليهم، ومعاهم الخالدي ، من يوتيوب لأخوه.. شخصياً عصام محمد نور بيهبشني في حتة، مختلفة ، وأستمتع بيهو أيما متعة .. أسرار بابكر، هباّاااااشة، صوتها جميل جميل جميل، يا ريت كانت تواصل، صوتها كان في طريقو للنضوج الكامل كانت ح تكون ( حاجة كده ) وتوقّف الفارات (مؤنثة) عند حدهن. ما صدّقنا صوت جميل جانا بعد إعتزال حنان النيل، ولكن ..... الحلو ما يكملش .. حنان النيل برضها ( مسّاخة ) .. أدمنتُ البوم الفرح المهاجر عندما نزل، وما زالت أزوره من حين لآخر، كلما عاودني الحنين الى أيام مضت .. أستمع الى يا رزينة ....وصِي عينيك الحنينة ....ترسم الفرح المهاجر .... في عيون كل المدينة.. يا سلام ياخ، موصلي أبدع.. ياخي الموسيقى دي علاج لحاجات كتيرة خلاص .. التسجيلات القديمة، واحة لمن أراد أن يُرتّب جواهو.. لمن أكون عايز أسمع الغنا القديم ، لابد أن أتبع الطقس المعتاد، أختار الغُنا الخرمان ليهو، وأختلي بنفسي، وأشغّل الغنية، وأستلقي على الكرسي بارتياح، وأغمض عيوني... ياخي دي متعة لا تدانيها متعة.. بالله جربّوها وشوفوا كمية السكون الداخلي والتغيير الممكن تحسّوا بيهو ، وأدوني رايكم.. شخصياً نتائج برنامج نجوم الغد ما تلزمنيش، ولا أعتد بها، أختار الفايز الأول براااااااي، واعتبرو الأول وأحسن واحد فيهم،وكتير ما أعلن ( لم ينجح أحد ).. الفنانين ( الشباب ) الهسي ديل ، أحسن واحد فيهم تصنيفو ( عادي ) .. زول ما يكون صوتو متميز، وما بيضيف جديد، فهو عادي ، وأحسن يشوف له شغلة تانية.. الحمد لله إنو ما في زول سألني عن رأيي في صوتو ، كنت ح أسملو الرد في أيدو ، بدون مجاملة وغتغتة.. هو ده كمان فيهو مجاملة؟؟؟ يا صوتك جميل ، يا مُنكر .. أتمنى من الناس المعتقدة أنو أصواتهم جميلة يراجعوا نفسهم، ويكون شجعان ويعترفوا بانهم لن يضيفوا شئ وأصواتهم عادية ، ويرحمونا .. أرحموناااااااااااا...
نسأل الله أن يكتّر من ( مسّاخِين الغنا) ويقلل من ( مَسِيخين الغنا )..
التعديل: سقطت ( سين ) فكتبناها..
Post: #2 Title: Re: مسّاخِين الغُنا .. Author: ناذر محمد الخليفة Date: 06-26-2013, 09:17 PM Parent: #1
سلام صلاح ..
Quote: أتمنى من الناس المعتقدة أنو أصواتهم جميلة يراجعوا نفسهم، ويكون شجعان ويعترفوا بانهم لن يضيفوا شئ وأصواتهم عادية ، ويرحمونا .. أرحموناااااااااااا...
وديل كتاااااااااار شغالين سمكرة صاح في أغاني الرواد والعمالقة ..!! بس أنا ما عارف وسائل الأعلام ديل بيحكموا كيف ؟! طواااااالي مستضيفنهم في البرامج ..!!
Post: #5 Title: Re: مسّاخِين الغُنا .. Author: Salah Abdulla Date: 06-26-2013, 10:24 PM Parent: #3
أشرقت الأنوار يا إشراقة..
شكراً على الهديتين، بس اللينكات ما فتحت معاي.. عموماً قصة السمع دي (أذواق) وما في زول بيقدر يتحكم في أمزجة الناس ويجبرهم على سماع معين.. لكن كمان مفروض يكون في حد أدني ياخ نتفق عليهو، وما نقبل بأقل منو.. واللا مش كده.. وإلا القصة ح تبوظ أكتر من كده..
بالجد كده، الأجهزة الرسمية والقنوات ديل ما عندهم ناس متخصصين يقيمّوا الناس البيأذونا بيهم ديل واللا القصة شنو؟؟
أجدعي لي اللينكات تاني بالله.. وشكراً على الزيارة الكريمة..
Post: #4 Title: Re: مسّاخِين الغُنا .. Author: Salah Abdulla Date: 06-26-2013, 10:16 PM Parent: #2
سلام يا أبوالنيز ...
والله ما خرب سمع الناس غير أجهزة الإعلام.. يجيبوا ليك ناس الواحد فيهم لا يصلح أن يكون منادي في موقف جاكسون، والمصيبة يغني غنا غيرو ويقول ليك عندي ( أعمال ) جديدة زي تمنين (عمل ) كده.. تعرف يا ناذر يمكن تلاتة أرباع الشعب السوداني بيعزفوا وبيتونسوا بالغنا يعني صعب جداً يتغشوا، وفي ناس والله أصواتهم جد جميلة، لكن عارفين حدودهم وإمكانياتهم ومحترمين نفسهم شديد.. ديل كان ممكن (يطرحوا) نفسهم فنانين وأحسن من الزبد الذي سيذهب ، كان الليلة كان بكرة.. وبعدين القوانين الجديدة، أدّت الفارات الصغار فرصة يلعبوا بغنا الكبار ( أدفع وغنّي ).. الله يسألني فوضى زي دي ما حصلت في التاريخ..
كان لمّيت ليك في واحد منهم حايم في اليوتيوب بنزّل ليك نماذج.. بس المشكلة حتى أسمائهم ما عارفا..
Post: #6 Title: Re: مسّاخِين الغُنا .. Author: عمر الفاروق Date: 06-27-2013, 01:26 AM Parent: #4
يا ابو صلاح..طبعا صعبتها علينا بي قصة وفي النهاية الغنا أمزجة ده.. لكن انا ما عارف في حاجات مرات بتكون واااضحة ما بيغالط فيها الا مكابر.. ومحمود عبد العزيز رحمة الله تغشاهو بتنطبق فيهو الحاجة دي.. ابوبكر سيد أحمد صاح ممكن تقول عليهو غناااي وقد يمسخ بعض الغنا وانا احبو جدا لكن بعتقد إنو عندو محدودية صوت أو نوعية صوت ما ممكن نقول عليها الصوت المميز المختلف..يعني صوتو بيشبه اصوات ناس كتيييرة بتغني .. لكن بالجد المعجزة الالهية في محمود ده ..صوتو غريييب كده .. ما صوت عااادي بتاع زول بيغني .. انا ما عارف اوصلها كيف ووالله يا صلاح ما بقول الكلام ده عشان بحب محمود لأ لأ..بالجججد الزول ده فيهو حاجة غريييبة مريييبة ..صوووت ماااا حق بشر عادي..مااا كضبو لمن سموهو الجان..لأنو محمود ده الله يرحمو كان ساكنو جااان بيكون .. الأصوات النسائيىة زي ما قلت حنااان النيييل دي مريييحة .. اتفقققنا في الفرح المهاجر والامتع كاسيت الخرطوم بدونك بالطمبور..وبالله يا مرسال شيل السلام ليييهو سافر مع الانسام ارجووك قوول ليهو ..
Post: #7 Title: Re: مسّاخِين الغُنا .. Author: أبو ساندرا Date: 06-27-2013, 06:23 AM Parent: #6
لو عاوز عثمان حسين ، وما أدراك ما عثمان حسين ، أسمعها في خاطرك الغالي والله العظيم مسختها لي عند أبوعفان والزاد متعتي اضعاف إنها عندما غنتها في أغاني السر قدور مجموعة المهرجين ناس فرفور وبتاع لزمو الصمت التام ثم أرخو السمع بإحترام كلما حن الفؤاد و غوى ، لجأت إلى خاطرك الغالي بصوتها حيث الغناء على أصوله حليات و آهات و أدغام بغنة كدي دخلها في برنامج خميسك
Post: #8 Title: Re: مسّاخِين الغُنا .. Author: عمر الفاروق Date: 06-27-2013, 08:03 AM Parent: #7
بالمناسبة برضو بختلف معاكم في قصة أسرار بابكر دي.. ما تضحكوا في الجملة لكن عندي ملاحظات على صوت أسرار.. واسرار من نوع الفنانات البتعرف تغني اغاني محددة ونوعية محددة عشان كده بيظهر للزول لمن تغني الاغاني دي انو صوتها جميييل واداء عااالي.. بس في الحقيقة صوت اسرار برضو محدووود وبتلعب في مساحات ضيييقة لو حاولت تطلع برة منها بتنكشف.. في حتة كده في حنجرتا ملااانة وفعلا بيطلع منها صوت فخيم لكن ده ما طوااالي حتت معيييينة..وهي مجججرمة عرفت كيف تظهر الحتة دي .. تظل حنان النيل ومن بعدها هاجر كباشي ثن البت الاسمها ملاك الأمين هي افضل صوت نسائي في نظري..
Post: #9 Title: Re: مسّاخِين الغُنا .. Author: Ishraga Mustafa Date: 06-27-2013, 09:03 AM Parent: #8
صباحات الغنا السمح ياصلاح
الاغنيتان واحدة منهن: كتير اتناسا إيديا .. اغنية قديمة الراحل خوجلى عثمان والتانية جماعية برضو فيها خوجلى عثمان وكل ما استمع ليه احس بحنجر بينحر فى قلب البلد مايعنى قلبى
عليك الله اسمعها
والتانية الجماعية هى: محجوب عثمان - ابن البادية - عثمان - خوجلي - مالو قلبي
لكن بالجنبة كدى اسمع للزول دة بيغنى بطريقة تانية... استمع لىهو:
مرسال أمير المؤمنين _ عمر علي عبد المجيد (الممكون)
ياخ انا كنت بحب الغنا ده حب .. انا بتذكر زمان لمن كنت بسمع هييييييييه زمن المهم ... محمدالامين لما يغنى انا بنجذب عديل ..يعنى حيلى بموت عثمان حسين فى شجن بقتلنى عديل كده ابوعركى لمن يقول و عن حبيبتى انا بقولكم يلا صفقوا كلكم ابوالورووووود ياخ لمن يقول ليك على نيل بلادى سلام و نخيل بلادى سلام والا ابراهيم عوض لما يقول ليك ليه بنهرب من مصيرنا وسيد خليفة لمن يقول ليك فى ربيع الحب كنا وخضر بشير لما يقول ليك الاوصفوك باالبدر او بالزهر هم ما انصفووك .. ولمن يقفلها بى " يا جميل" وصلاح بن البادية لمن يقول ولقينا فى دنيا العيون يا اغلى من النور غنا ..تتتاترررم والا لمن تتسلطن سميرة دنيا و تقول ليك يا قلبى لو كانت محبتو بالتمن والا البلابل لمن يصدحن يا الهيليت فرحت قلوبنا.. واخ من مصطفى لمن يقول ليك لأماني الفى سفر قبل الزمن .. كايسة المواني واااااااااااااااااااااااا كدى اشيل نفسى
هسه يا صلاح لما اسمع الغنا بالصدفة ساى بحس الذنب !!!!!!!!!!!!!!!
Post: #11 Title: Re: مسّاخِين الغُنا .. Author: محمد حسن عبد القيوم Date: 06-27-2013, 09:08 AM Parent: #7
بوست في التنك
اجمل ما دفعني يوما ان استمع لمحمود عبد العزيز اغنية نور العيون مودتي يا صاح
Post: #12 Title: Re: مسّاخِين الغُنا .. Author: ياسر منصور عثمان Date: 06-27-2013, 09:20 AM
عارف يا ابو صلاح .. الأغنية التحت دي وتحديييداً أقصد الاداء الصوتي مفروووض تكون محاضرة في كلية الموسيقى والدراما علم الأصوات ويقعدوا يشرحوها حتة حتة .. ياخ الأداء الصوتي بتاع محمود رحمة الله تغشاااها في كل مخرج حرف انا بشوف انو مدرسة قائمة بي ذاتها.. عليكم الله ركزوا شديييد في ظالمني شوف من كم سنة رقم اربعة من بداية الاغنية ومحمود بيقول شووووف من كم سنة !! وانا بديكم بعد داك مطططلق الحرية توروني في اللحظة ديك محمود بيكون كان عامل كيف وتفتكروا انو الصوت ده بيكون طلعوا من وين !!!! ثم حاولوا كده بينكم وبين نفسكم تعملوا نفس الحركة محمود دي وتقولوها بي نفس طريقتو ..إتفقنا؟؟ بعد تنتهوا من التجربة دي اسألوا نفسكم سؤال : هل لو جابوا 47 فنان من فنانين أسة ديل ورصصوووهم ورا بعض وقالوا ليهم أي زول يقول حتتتة بس من شوووف دي ..بتفتكروا بيجيبوها؟؟
تخريمة : ده كلللو كوووم ..وانا ياااا هوووى البيقولا محمود لمن يقول ودرتو فيك أملي الكبير ورميتني لي جور النوى ..انا ياااا هووووووى دي كوم تاااني.. بحس إنو محمود ده بيكون ودددا المايك ده بعييييد ورجع لي ورا كداااااا واداها نزلة لي تحت كدااا ثم اطلللق العنان لي صوتو .. ياخ والله يا حمد قاعد تزعلني كيف كلما أتذكر البوست بتاعك دااااك!!!!
Quote: أبوبكر سيدأحمد، يغني في اللقاءات والمناسبات العامة، برضو أي غنية يغنيها تمسخ ليك عند غيرو..
انصفتهما والله ياصلاح اضافة مايتميز به ابوبكر سيد احمد عن الفنانين اللذين ظهروا في الثلاث عقود السابقة هي دينامكيته في الاداء وهذا قمة التعبير في الموسيقي في العالم كله ديناميكية لمن لا يعرف هي "التفاوت في الاداء مابين الشدة واللين" وهذه تركها مصطفي ثم لحق به وردي وتبقى صلاح ابن البادية وفوق ذلك فهو ملحن بارع لايشق له غبار قف هنا شكرا
هنا قمة ادائية تغني للقمة الكاملة
عصافير
برغم سوء التسجيل الصوتي الا ان التمييز والاستقلالية واضحة ووردي لمن يتهبش بخش عشان يقول نحن هنا تحياتي مرة ثانية
استاذنا الموصلي.. القلتو عن ابوبكر ده بالضبببط الانا عايز اقولوا لكن ما بعرفو بي كلامكم حق العلم ده وما قدرت اوصلو ..فشكرا للتوضيح.. مثالك اللي جبتو ده تحديييدا هو اللي خلا الناس تبدا إعادة إكتشاف ابوبكر سيد احم ..عصافير الخريف غناها بي طريقة شفففقت وردي زاااتو وزي ما قلت وردي بيقرررب يقول ليهو انت كمان ما تعملا شييينة .. :)
لكن يا موصلي قادر تفهمني في انو ابوبكر ما صوت مميز ؟؟ انا مااا قادر اقولا كيف ..هو صوتو جميييل صاح لكن ما صووت ملفت .. فاهمني؟
عمر ازييك 1. محمود صوته رمز الحداثة في لون وطعم الصوت وهو هنا يتميز به عن أبوبكر ومجايليه 2. أبوبكر رمز الحداثة في داينميكية الأداء وهو هنا يتميز به عن محمود ومجايليه وكلاهما ذو طعم جميل أحبهما جدا تحياتي
رغم ان ابوداؤود من الاوائل عندى و عموما ما بحب اسمع لاغنياته الا من خشم عامرية عبدالعزيز داؤود (وان شئت ماجده) ولسنوات قليلة من خشم مصطفى السنى طرب جد... يالله ياخ انا عاوزة ارجع اسمع كل يوم زى زمان و امشى احضر جلسات مصطفى السنى الغنائية يا ربى ممكن !!!!
شكرا محمد مكى فعلا هذا بوست يذكر فيه من هم مثل مصطفى السنى
سهام المجمر.. ما تشوفيني كاواااي كده ..لكن والله بعرف اسمع غنا ..ومسكييين خلاس الغنماية تاكلني مش تاكل عشاي.. نادراً ما أهدي بي مسميات وأخصص لي زول وبخليها عموم .. لكن ياخ خليني أهدي ليك الاغنية دي عشان ترجعي تسمعي غنا ..لي كم يوم قااايم عليها الاغنية دي ..
تخريمة : هوووي انا ما مضمون بلقاك في ملف تاني بشاكلك عاااادي سمح؟ :)
غايتو يا حمد عشان ما نخرب البوست ده فكدي بلاقيك في ملف تاني عشان اطلعك من الحتة دي بي امثلة .. البت دي صوتا مرييح بالمناسبة لانها من مدرسة هاجر كباشي بس مسكت في درب الغنا الكبار.. صوتا تريان البت وواثقة من روحا..
لكن بالنسبة لي عمر جعفر فغايتو الزول ده لو رجع مية سنة لي ورا او مشى مية سنة لي قدام فمااا اظن يقدر يعمل زي الحلقة العملا في النيل الازرق وسجلا بي مزاااج عااالي وواضح انو كان ببرف ليها كويس ومستعد نفسيا وذهنيا وصحيا .. بعدها الود ده ما شاف عافية ما عارفو مال..ويعاب عليهو انو من الاصوات الما حا تعمر كتيير وح يشييخ بي سرعة لو ما واصل تمارين لانو بيرهق حنجرتو .. عموما انا ما شوفت عمر جعفر في تطريب قدر الاغنية دي وما اظن تاني يغنيها بي الطريقة دي ..
شنو يا ابوصلاح السنة اغاني واغاني بي جاي !! حقو الواحد يسد نفسك بي محمد منير ههههههه
Post: #26 Title: Re: مسّاخِين الغُنا .. Author: Salah Abdulla Date: 06-27-2013, 06:40 PM Parent: #25
يا سلام ، الذِوّيقة المهابيش كلهم إتلموا هنا..
صاحبي عمر، كبير الممسوسين، موصلي فِهمك فِهمك، ياخ أنا ده فهمتك لكن برضو خانّي التعبير (العلمي) أظن والله أعلم إنك قاصد إنو أبوبكر رغم قوة وجمال صوتو لكن مساحتو محدودة، وكذلك أسرار، ولكن هذا لا ينفي جمال صوتهم الاتنين.. وبعدين يا عمر ياخ ما كل فنان عارف سلالموا وبيغني فيهم لو طلع فوق بيتشنق، ولو نزل تحت بيتخنق.. كلموا عمر جعفر ده يقلل من اللعب بي صوتو... ما عارف ليه ما مقتنع بيهو (ومجموعتو) بما فيهم ( البنا ) !! غايتو حب الناس مذاهب..
يا أبوساندرا ( صيّاد اللآلي ) ياخ برنامج خميس شنو، ديل في برنامجي اليومي.. كدي أغطس كده وأهجمنا بي حاجة لينا زي ربع قرن كده ما سمعناها..
يا حمد شذا عبدالله خامة صوتها جميلة ، لكن ما عارفا ليهو دايرا البيقودا ، وناس الموصلي موجودين..
هسي سهام المجمّر دي يعملوا معاها شنو؟؟ تشيل وترص لي في (فنانيني المفضلين) ، ثم إنو يا سهام الغنا ما بيسمعوه صدفة ياخ!! تسمعيه وإنتي قاصداهو عديل كده،، يعني هسي بعد الدفعات المعنوية المتفائلة الشربتينا ليه ديك كللللللللها تجي تقولي إحساس بالذنب.. الله يدينا قدر فهمك وقوتك دي يا بت المجمر، شوفي نعمل شنو.. سهام يا أختي، أسمعي غنا، وأمشي جلسات.. إن في ذلك شفاء...
محمد حسن عبدالقيوم ،، إستمتع بالجان يا قريبي .. يا خي أنا أي زول بيسمع محمود ده بحترمو ليك إحترامي الأكيد يا راجل يا سِمّيع..
ياسر عثمان محمود، كشفت سر (الأسرار ) يلا دلّع نفسك بالصوت الملائكي ده... ياخ البت دي الغنا بيخاف منها عديل ، أنا شخصياً بتهدئ أعصابي والله..
الموصلي ، سيد الشئ زااااااااتو !! هلا وغلا .. أها جيّاتكم دايماً مفيدة،، هسي ديناميكية دي أنا وصاحبي الكاشف داك نقعد قدر ما نقعد ما كنا عرفناها .. تصدق وتؤمن بالله يا يوسف عثمان بلال ، أنا لمن كتبت البوست ده كنت خلصت من ( الصورة ) بالعود من أبوبكر ده وخشيت في عصافير الخريف.. أكتر حاجة شاداني في (الصورة) إنو باين في وش وردي الإعجاب الشديد بأبي بكر ده ، بالله شوف أبوالورود لما يتهبش في ( الصورة ) زي ما قلت يا موصلي .. شهادة والله في حق أبوبكر ، فنان أثبت إنو حوا السودان واااااالدة.. ثم شكراً على الفرح المتجدد في الفرح المهاجر، وتاني بقول ليك ( الله يريّحك دنيا وآخرة يا موصلي) وده كان بوست كتبتو قبل سنوات لمن نزل شريط الفرح المهاجر..
سيدأحمد يا شامي ، طالكا بتبدأ يومك بأبوداؤود، صدقني ما بتجيك عوجة تب.. أبوداؤود يا شامي أوتي مزماراً من مزامير سيدنا داؤود عليه السلام.. لو ما عملت حسابك، وإنتبهت ممكن تقول في نهاية الأغنية ( آمنت بالله ) حقت عمك عوض عمر (الله يرحمو) .. غايتو نقول استغفر الله العظيم..
ود البشرى ياخي أنا أخوك، تزجرني عشان محمد منير الحرامي.. هسي عليك الله يا محمد أسأل لي محمد منير ده قول ليهو أغنية الشعب حبيبي وشرياني دي من ألحان منو !!!!! تغنوا سااااااي وما عارفين الميت منو ... يا محمد يا أخوي ، عمري ما حجرت على أضان زول،ولن يحدث، لكن ياخ أنا زول ( بيحقر بي ) لا يستحق مني مجرد سمع، هؤلاء الفارات ما بيعرفو عن فننا شئ ، سلمنا الخماسي ده عبارة عن ( مضحكة ) عندهم هؤلاء الأغبياء بس أبشّرك، يا دوب بدو يفهموا الشغل الخماسي كيف ، وفرقة ميامي الكويتية أجبرتهم على السمع .. مصطفى قمر بتاعهم بيغني الليلة دوب وةلازم نرضى بالمكتوب ، بتاعتنا ، تخيل الفارات يقبلوها عند ولدهم وينكروها إذا ما غني بها أحدنا.. هي الحقرة دي كيفنها.. القصة عندي مربوطة مع بعضها ، ولو كان فنانهم ده لا قبلو لا بعدو .. أقول ليك حاجة، أنا عشان أغترب وأطلع من السودان، قربت أزور أي فنان في بيتو وأستأذنوا عشان أقدر أسافر!! كلام مجانين مش.. غايتو أنا أي فنان ما سوداني ما مقتنع بيهو كان رضى الموصلي واللا رضى تاني..
Quote: صاحبي عمر، كبير الممسوسين، موصلي فِهمك فِهمك، ياخ أنا ده فهمتك لكن برضو خانّي التعبير (العلمي) أظن والله أعلم إنك قاصد إنو أبوبكر رغم قوة وجمال صوتو لكن مساحتو محدودة، وكذلك أسرار، ولكن هذا لا ينفي جمال صوتهم الاتنين.. وبعدين يا عمر ياخ ما كل فنان عارف سلالموا وبيغني فيهم لو طلع فوق بيتشنق، ولو نزل تحت بيتخنق..
ابوصلاح الفنان الذواق ما أظنك صاح في محدودية صوت أبوبكر فأبوبكر مساحة صوتو واسعة جدا خصوصا في منطقة القرار الصوت الغليظ والغايظني هو ما قاعد يمشي يتفسح هناك كتير.
الزول ده خلو بالكم منو كويس يخيل لي انو ما عارف انو مهول قدر كيف بعدين بجيك تاني للكلام داك
Post: #29 Title: Re: مسّاخِين الغُنا .. Author: Salah Abdulla Date: 06-27-2013, 09:51 PM Parent: #28
Quote: فأبوبكر مساحة صوتو واسعة جدا خصوصا في منطقة القرار الصوت الغليظ والغايظني هو ما قاعد يمشي يتفسح هناك كتير.
عاد يا الموصلي أخوي نحن شن خبّرنا.. نحن محل ما يفسحونا بنمشي ونقول الزول ده وصلّنا الحد ده بس ووقف.. يعني أخونا أبوبكر وصلّنا لحد معين في صوتو وما زاد !!! أتمنى إنو أخونا أبوبكر يكون متابع الكلام العلمي المهم ده ويعمل بيهو..
Quote: عاد يا الموصلي أخوي نحن شن خبّرنا.. نحن محل ما يفسحونا بنمشي ونقول الزول ده وصلّنا الحد ده بس ووقف.. يعني أخونا أبوبكر وصلّنا لحد معين في صوتو وما زاد !!! أتمنى إنو أخونا أبوبكر يكون متابع الكلام العلمي المهم ده ويعمل بيهو..
انا بطلب من المبدع الجميل ابوبكر سيد احمد يسجل لينا آغنية حكمه للراحل المقيم الجابري حيث آظهر الجابري فيها قدرته علي الابحار من محيط القرار "الغليظ" الى محيط الجواب " الحاد" واعتقد دي احسن آغنية سودانيه يمكن آن تمتحن فيها المساحة الصوتية لمغني ومتآكد بان كثيرون سيسقطون في امتحانها ولكن ابوبكر سيجتازه بنجاح ويكون آول الدفعه فابوبكر ليس محدودا في مساحة صوته ولا في داينميكية ذلك الصوت الا انه "بخيل" كل الود