Post: #1 Title: هل من طريقة لفتح الفيس بوك في الصين ؟ Author: معتصم محمد صالح Date: 06-25-2013, 05:47 PM
ارجو من الاخوة مساعدتي للدخول الى الفيس بوك وهو محظور في الصين .. علما بانني استخدم جهاز ايباد 2 او على موبايل سامسونج جلاكسي ..
لكم تحياتي
Post: #2 Title: Re: هل من طريقة لفتح الفيس بوك في الصين ؟ Author: حيدر حسن ميرغني Date: 06-25-2013, 05:52 PM Parent: #1
مجظور وعاوز تعافرو كمان
Post: #3 Title: Re: هل من طريقة لفتح الفيس بوك في الصين ؟ Author: معتصم محمد صالح Date: 06-25-2013, 06:01 PM Parent: #2
سلامات يا حنين
قالو بتعافر ..
غايتو بعد حظر سودانيز اونلاين داك اقتنعت انو اي حاجة في الانترنت عندها علاج .. نيهاو
Post: #4 Title: Re: هل من طريقة لفتح الفيس بوك في الصين ؟ Author: معتصم محمد صالح Date: 06-25-2013, 06:01 PM Parent: #2
سلامات يا حنين
قالو بتعافر ..
غايتو بعد حظر سودانيز اونلاين داك اقتنعت انو اي حاجة في الانترنت عندها علاج .. نيهاو
Post: #5 Title: Re: هل من طريقة لفتح الفيس بوك في الصين ؟ Author: حيدر حسن ميرغني Date: 06-25-2013, 06:07 PM Parent: #4
هناك فرق ياحبيب دي الصين واحد ماخد جائزة نوبل مردوم في السجن
Post: #8 Title: Re: هل من طريقة لفتح الفيس بوك في الصين ؟ Author: معتصم محمد صالح Date: 06-25-2013, 06:13 PM Parent: #5
والله يا حيدر بلد عجيبة خلاص وشعب اعجب بس قصة الاتصالات والانترنت عندهم مصعبنها شديد لو عايز تشتري شريحة تحقيق لو عايز تضيف ليها رصيد تحقيقين واتصال دولي مافي الا بتحقيق تالت ..اتخيل انا بدخل الانترنت من الفندق واي فاي برقم الغرفة كيوذر نيم ورقم الجواز كباسويرد . عندنا من اقرب ركن تشتري شريحة اي شركة وتتصل باي حتة وتعمل العايزو ..
Post: #6 Title: Re: هل من طريقة لفتح الفيس بوك في الصين ؟ Author: عماد الشبلي Date: 06-25-2013, 06:08 PM Parent: #4
Quote: ارجو من الاخوة مساعدتي للدخول الى الفيس بوك وهو محظور في الصين ..
حاول
بس
اعمل حسابك
ماينكسر
سلام معتصم
Post: #7 Title: Re: هل من طريقة لفتح الفيس بوك في الصين ؟ Author: سيف اليزل سعد عمر Date: 06-25-2013, 06:11 PM Parent: #6
كويس انو سودانيز أونلاين ما محظورة فى الصين، باقى الكيزان والشيوعيين ديل ما مضمونين
Post: #9 Title: Re: هل من طريقة لفتح الفيس بوك في الصين ؟ Author: معتصم محمد صالح Date: 06-25-2013, 06:19 PM Parent: #7
تحياتي استاذ عماد ..
والله ياسيف اي واحد فيهم كارثة اكبر من التاني
Post: #10 Title: Re: هل من طريقة لفتح الفيس بوك في الصين ؟ Author: عبدالوهاب علي الحاج Date: 06-25-2013, 06:56 PM Parent: #9
يا كفيل مالك مساهر لهسي ؟ يا زول مالك ومال فيسبوك لو استخدمت بروكسي ممكن تعرض نفسك لمشكلة الناس ديل بخافوا من الافارقة شديد ...
Quote: قصة الاتصالات والانترنت عندهم مصعبنها شديد لو عايز تشتري شريحة تحقيق لو عايز تضيف ليها رصيد تحقيقين واتصال دولي مافي الا بتحقيق تالت
الانترنت في كل الصين ما مسموح للاجانب بالتعامل معه الا وفق ضوابط مشددة ، انا مرة كنت مغروض في الايميل بتاعي مشيت كافيه ما خلوني اخش الا بعدما مسكوا جوازي وبعد سلام راس ... لكن غريبة حكاية الشرائح دي انا تقريبا زرت اكثر من 5 محافظات مختلفة ما فيها التشدد دا غايتو ناس شنغهاي مزودنها حبتين ...
________________ اها بتاكل شنو وقاعد تلف ولا نايم في الفندق ؟ :)
Post: #11 Title: Re: هل من طريقة لفتح الفيس بوك في الصين ؟ Author: Ridhaa Date: 06-25-2013, 07:26 PM Parent: #10
Quote: غايتو بعد حظر سودانيز اونلاين داك اقتنعت انو اي حاجة في الانترنت عندها علاج ..
سلام ياحاج معتصم
كلامك صحيح .....الانترنت في السهلة .....وفي عدة طرق ممكن تدخل بيها كدي حاول أدخل بي بروكسي بس حاول أن تعدل في I.P.ADDRESS اختار آيبي سوداني .................... في عدة طرق ممكن تكسر بيها المنع . بس أعمل حسابك ماتخلي الصينيين يشوفوك ...................... . . تحياتي
Post: #12 Title: Re: هل من طريقة لفتح الفيس بوك في الصين ؟ Author: محمد البشرى الخضر Date: 06-25-2013, 07:31 PM Parent: #11
Post: #13 Title: Re: هل من طريقة لفتح الفيس بوك في الصين ؟ Author: عزالدين عبدالرحمن Date: 06-25-2013, 08:01 PM Parent: #12
الاخ معتصم وضيوفه سلام
مرحب بيك فى الصين
هنالك عدة برامج لفتح الفيس بوك وكل المواقع الاخرى فى الصين ومرفق احدى البرامج الرجاء تحميل البرنامج اولا وثم تشغيل البرنامج وخليه شغال اسفل الشاشة اثناء التصفح
يمكن البحث فى القوقل او نسخ الرابط وتحميل البرنامج
مع الشكر عزالدين عبدالرحمن من الصين by the way الاتصالات والشرائح فى الصين سهلة وما للدرجة دى ولى عودة
Post: #14 Title: Re: هل من طريقة لفتح الفيس بوك في الصين ؟ Author: Abureesh Date: 06-25-2013, 08:23 PM Parent: #13
Quote: والله يا حيدر بلد عجيبة خلاص وشعب اعجب بس قصة الاتصالات والانترنت عندهم مصعبنها شديد لو عايز تشتري شريحة تحقيق لو عايز تضيف ليها رصيد تحقيقين واتصال دولي مافي الا بتحقيق تالت
يا عصام سلام..
ياخوى ات قاعـد وين فى الصين؟ الشرائح دى تتباع فى الشارع زى التسالى وانا عندى 10 شريحـة وما مسجل إلا واحدة فقط، وبإرادتى لأن الرقم مميز ويمكن تفقده لو ما سجلته بإسمك. أمس إتصلت بصديق وخت فيه قروش عشان ما يوقفوه. بالنسبـة للإنترنت ما عندى أى مشكلة وفى أى قهـوة إستاربك الواى فاى مجانا بس تشترى قهوتك وتمشى تقعد تفتح الإنترنت.. معظم المطاعم فيها واى فاى مجانا.. الفنادق فيها الواى فاى برضو مجانى وبرضو يدوك سلك لو ما عندك لابتوب بواى فاى... وبالنسبـة للفيس بوك محظور، وكذلك يوتيوب وتويتر.. لكن شوف اصدقاءك الصينيين بيوروك اماكن شعبية يبيعوا فيها جهاز صغير(يو اس بى) تفتح بيه اى موقع.. الجهاز بحوالى 110 يوان (حوالى 20 دولار).
Post: #15 Title: Re: هل من طريقة لفتح الفيس بوك في الصين ؟ Author: Ridhaa Date: 06-25-2013, 09:06 PM Parent: #14
>
Post: #16 Title: Re: هل من طريقة لفتح الفيس بوك في الصين ؟ Author: عزالدين عبدالرحمن Date: 06-25-2013, 09:35 PM Parent: #15
معزرة اخ معتصم البرنامج اسمه Free gate
Post: #17 Title: Re: هل من طريقة لفتح الفيس بوك في الصين ؟ Author: Luai Salah Date: 06-25-2013, 09:44 PM Parent: #1
عندى تجربة مشابهة فى الصين استخدم البروكسى hotspot shield على الرابط www.hotspotshield.com
Post: #18 Title: Re: هل من طريقة لفتح الفيس بوك في الصين ؟ Author: Hani Arabi Mohamed Date: 06-25-2013, 09:50 PM Parent: #17
بسبب هذا البوست سيتم حظر سودانيز في الصين :) :) :) :-P
Post: #19 Title: Re: هل من طريقة لفتح الفيس بوك في الصين ؟ Author: Ridhaa Date: 06-25-2013, 11:19 PM Parent: #18
Post: #20 Title: Re: هل من طريقة لفتح الفيس بوك في الصين ؟ Author: Ridhaa Date: 06-25-2013, 11:25 PM Parent: #19
Post: #21 Title: Re: هل من طريقة لفتح الفيس بوك في الصين ؟ Author: تبارك شيخ الدين جبريل Date: 06-26-2013, 01:15 AM Parent: #20
تمشي الميدان الأحمر تعمل مظاهرة
... المهم ....
Post: #22 Title: Re: هل من طريقة لفتح الفيس بوك في الصين ؟ Author: معتصم محمد صالح Date: 06-26-2013, 03:03 AM Parent: #21
وهبة يا عسل ..
كلو تمام الحمد لله وشنغهاي مدينة جميلة حد المبالغة.. -------
شكرا رضا على النساعدات ----- ود البشرى لك تحياتي انشاء الله يرشوكم ناس الاهلي ان قايل هنا مافي كااااك
----
الاخ عز الدين لك شكري وتحياتي واحتاج لشورتك في بعض الامور 13052050070 ده تلفوني
--- الاخ ابو الريش لا مشكلة مع الانترنت فه متوفر في الفندق بكل الطرق التي ذكرتها فقط اعاني كثيرا عند اعادة شحن الرصيد .. بمناسبة رقمك المميز هسي رقمي ده مش مميز ..
--- شكرا لؤي
----
تحياتي هاني
---- الميدان الاحمر ده وين يا عمك
Post: #23 Title: Re: هل من طريقة لفتح الفيس بوك في الصين ؟ Author: Abureesh Date: 06-26-2013, 03:48 AM Parent: #22
Quote: بمناسبة رقمك المميز هسي رقمي ده مش مميز ..
الرقم الميز هو الفيه تمانيات كتيرة، لأنهم يتفاءلون بالرقم تمانية.. بعدين شركتك شنو بالمناسبـة.. china mobile or china unicom?1 المهم لو لقيت صعوبة أدينى خبر نشحنها ليك. لو فى شنغهاى ممكن تمشى شوجاهواى Xujiahui ,عمارة القبـة (على يسار الصورة) .. فى الطابق التانى فى قهوة إستاربك فيها أجانب كتيرين أمريكان واروربيين وافارقة وربما سودانيين.. وهم منفتحين وممكن تجد عندهم معلومات كويسـة عن البلاد..
Post: #24 Title: Re: هل من طريقة لفتح الفيس بوك في الصين ؟ Author: Osman Musa Date: 06-26-2013, 01:35 PM Parent: #23
عزيزنا المعتصم سلامات في ديك البلاد تبعد بعيد عن المحظور ومن لحمة البتاعات . الفيس لا لا يا المعتصم . في القصص الممنوعة دي الجماعة ديل ماعندهم رحمة . وبعدين ياخ أنت عندك الكتير الداير تعملوا . أتفسح وشوف الجديد في سوق الكواشف والجديد في صناعة السلاسل المبرومة . دي أيامات معارض مخارط الجولاري والفضة في شنغهاي وبكين مالك ومال التلتلة ؟ . أتفسح يازول واستفيد من البلد دي قدر ما تقدر وادينا أخبار تفتح النفس عشان الزول يرجع السودان تحياتي
Post: #25 Title: Re: هل من طريقة لفتح الفيس بوك في الصين ؟ Author: معتصم محمد صالح Date: 06-26-2013, 06:15 PM Parent: #24
الاخ ابو الريش
لك تقديري الحمد لله عرفت طريقة الشحن وموبايلي تابع لونيكوم وبقيت امشي البقالة اشحن عادي لكن الاتصالات غالية جدا واود ان اسال لماذا لا استطيع الاتصال دوليا من رقمي ..
شوارعهم العجيبة دي ما بعرفا لكن مئيت مرتين لشارع نانجن وهو شارع يعج بالسياح وبه محلات كبيرة وماركات شركات عالمية ..
من المقرر ان اغادر غدا الى محافظة هينان ,
لك شكري العميق
الاخ عثمان موسى اول شي لحمة البتاعات دي شنو ?
اما بخصوص المعارض فقد صادف وجودي معرض شنغهاي الدولي للاليات والمعدا الثقيلة ومن اقسامه معدا التعدين وهو الغرض الذي اتي ت من اجله والبرنامج بالنهار زحمة شديدة وكل يوم امشي شركة اقضي معاهم كل اليوم في نقاشات وتفاصيل والحمد لله توصلت الى نتائج مفيدة ومهمة في مجال عملي.
لك الود وعاطر التحايا
Post: #26 Title: Re: هل من طريقة لفتح الفيس بوك في الصين ؟ Author: Luai Salah Date: 06-26-2013, 10:55 PM Parent: #25
الاخ معتصم تتخيل انو الاتصال من مدينة الى مدينة تكلفته تقارب تكلفة الاتصال العالمى
Post: #27 Title: Re: هل من طريقة لفتح الفيس بوك في الصين ؟ Author: Abureesh Date: 06-26-2013, 11:25 PM Parent: #26
Quote: تتخيل انو الاتصال من مدينة الى مدينة تكلفته تقارب تكلفة الاتصال العالمى
الدقيقة من مدينة الى أخرى حوالى 12 مياوتشان فقط (تعتمد على الشركة) الدولار فيه 6 يوان، واليوان فيه 100 مياوتشان.. خلى الباقى لناس الرياضيات يحسبوها. ولو اشتريت الأبى كارد كمان ارخص.
Post: #28 Title: Re: هل من طريقة لفتح الفيس بوك في الصين ؟ Author: Osman Musa Date: 06-27-2013, 01:30 AM Parent: #27
عزيزنا المعتصم سلامات لحمة البتاعات هي لحمة الDOG و ال CATS لو كتبتها ليك في منبر بكري بالعربي الكتابة بتروح ولو جبتها ليك فيديو الفيديو في الصين ممنوع . الحل شنو ؟ بس الحمد لله المطاعم العربية في الصين أصبحت في أي ناصية . ومتابعين معاك الرحلة
Post: #29 Title: Re: هل من طريقة لفتح الفيس بوك في الصين ؟ Author: محمد حامد Date: 06-27-2013, 06:59 AM Parent: #28
Quote: واود ان اسال لماذا لا استطيع الاتصال دوليا من رقمي ..
سلامات معتصم بعد تفتح المكالمات الدولية من الشركة في كود تقريبا 1256 (ممكن تتاكد من زول تاني) تكتبو قدام اي رقم داير تتصل بيهو مثلا 1256002499123000000 غيتو انا اشتغلت بيهو لكن ما عارفو لفتح المكالمات الدولية ولا تخفيض
