مطرة لله يا محسنين ....... أدوات جديدة يامعلمين ....!

تناولت صحيفة خرطومية ألقاها حظها العاثر أو حظي العاثر لست أدري أمامي مباشرةً ..... تناولتها في البدء للأمانة لإستظل بها هرباً من أشعة شمسنا الخرطومية بالغة السعرات الحرارية . قبل أن أتناول ما جاء فيها من آلام وآمال خرطومية . الخرطوم ها الأيام سحابة تعقبها سحابة سحب تتجمع ثم تتجمع ثم حتي إذ ظنناها وضعت مولودتها (المطرة) هربت وإستعصمت (بالبعد عنا) . تاركةً إيانا للشموس الخرطومية بالغة السعرات الحرارية .

أكثر من أشهر طوالٍ وأنا أترقب الخريف بما حمل ... أترقبه شنو أتوسل حضوره لأجني وأبناء شعبي أرزاقاً تسوقه السماء إلينا لا إيدنا لا كراعنا . وأنا في إستظلالي الذي صنعته من الصحيفة الخرطومية وجدت نفسي أكثر حرصاُ علي قراءة ما إستظل به ـ تبقي كارثة كمان لو الواحد متخذ من (الانتباهة) ظلاً له .

لم تكن الإنتباهة كانت صحيفة أخري ..... غير أنها لم تكن لتقل قيد سوء عن الإنتباهة بحرف ـ ذات المانشيتات الهزائم ـ ذات الوعود ـ ذات الاستخفاف بوعي شعبي ـ ذات أيتها حاجة ياخوانا . الخرطوم مدينة عجيبة لا تفهمها ولا تفهمك يازول ـ وكل يجري نحو مستقرٍ له ـ الكيزان يجرون ـ والمعارضة تجري ـ والناس جارية ـ والحصين في سباق الخيل جوار السوق الشعبي للدهشة تجري .

أنبت نفسي بنفسي فكيف للإنسان أن يستظل بالجهل ـ ده شنو ده زاتو ـ أماني ياحكومة ما سرك باتع . الخرطوم التي أراها ليست الخرطوم التي عشت في أزقتها ـ هذه خرطوم فاقدة للمنطق يا حسن الجزولي يا صحبي ـ فاقدة لكل ذي شئ ـ خرطوم تلهث وراء حاجاتها تاركةً حاجاتها الأساسية ـ خرطوم لو جلس أي كائن حر ينظر في أحاوليها لفقد المنطق .

أدوات جديدة يا معلمين
أدوات جديدة ياخوانا

عزيزنا خضر

ياخ و الله بقيتو زي الخواجات جهجهتو السماء عدييييل كدة!
انتو عايزين مطر و للا ما عايزين مطر ياخ؟ ارسو ليكم على بر
قبل كم يوم اتضامنا معاك و مرتبتك من الشكشاكة هسع تقول لينا عايزين مطر؟

المشكلة ما هنا يا خضر المشكلة السماء بتسمع كلامكم و تحرد و توقف المطر, لكنها ما بتزعل من الخواجات!
ياخي من جيت بلدهم دي ما لقيت زول قال الحمدلله المطرة صبت!
حتى ناس نشرة الطقس, اول حاجة بعتذروا للناس لو متوقع بكرة تكون هناك مطرة, و اي زول يقول ليك "انا بكره المطر" مع دا مرات الشكشاكة بتستمر ايام و ليال
يفرحوا جدا لما تكون الشمس ساطعة, و دي طبعا لاني ضقت مرتها في السودان بتحيرني, فاقوم ازعل من الخواجة لما يقول "وات ا بيوتيفول دي" فاقول ليهو "ان بحب لما الواطة مغيمة" فيعيانوا لي و يتعوذوا في سرهم ههههههههه
ياخ ما نحلم بجو يذكرنا الفول؟
يا حليل الفول, صدق انا مشتاق لصحن فول ان شاء الله يكون بلا جبنة و لا زيت ذاتو!

ابو فاطنة بالله ادي السودان مطر!