هاك يا دكتور معز الموهبة دي أرعاها زي ما وعدتك!!..

لو عايز تقييمي الجد يا دكتور معز ف أهو دي الأصوات المفروض تفتشوا ليها وتدوها غناكم كان انت كان الماحي سليمان كان الموصلي..
صوت رباااني يا قول حسن عطية لااا بودرة لااا احمر..
صوت طبيييعي خالي من المواد الحفظة ..
وحكمة الله الزول ده راااقد وغااازي كوعو.. غايتو لو لحق قام على حيلو ما عارف كان عمل شنو ..
ده صوت عجيييب وغرييييب ... غايتو لو في زول بيعرف دربو يدلنا عليهو ..




طبعا ناس الصاوي القالوا نحن ما علماء صوت فياخ نحن عنقالة سااااي .. فتعالوا انتو يا علماء الصوت ورونا صوت البت ديك مع صوت الناي ده .. هي قصدي مع صوت الزول ده ..

عارف ياعمر الفاروق المستمع العادي صاحب الذوق السليم هو البحدد الفنان لانو جمهور اي فنان هو المستمع العادي ... وفي اصوات جميلة كثيرة لمن ادخل فيها العلم واصحاب الاختصاص قاعدين اخربوها عديل ... يازول الموهبة الفطرية دي واضحة ولا عايزة ليها علم ولا يحزنون ...

لكن ياعمر الفاروق عليك الله اعطيني رايك في الصوت ده ...

يا سلام يا اسامة .. البت صوتا جميل لكن مشكلتو حاااد شديد ..صاح هو فيهو فكرة من اصوات فنانات زمان وتسجيلات الاذاعة والاغنية جميلة .. لكن الخطورة في النوع ده من الصوت والاداء بيكون فيهو طريقة الاداء واااحدة لي كل الأغنيات وإمكن دي المشكلة الوقعت فيها منار صديق بالرغم من انو صوتا جمييل لكن بتغني كللل الاغاني بي نفففس الطريقة ..

بالنسبة لي كلام العنقالة ده فياخ ده الكلام الصاااح القلتو انت ده..

ما ظاهر الفيديو عندنا يا معلّم, شكلها اعدادات الفيس بووك, كدي جيب رابط اليوتيوب

يا ود البشرى ياخ انا زاااتي فتشتو في اليوتيوب ما لقيتو .. جايبو من الفيس بوك من زول عزيز بيتكلم عن المواهب المدفونة في بلادي..
الغريبة انا اسة شغاال معاي يكون من شنو يا ربي ؟؟ غايتو ماااا خاتية علي فلانة لمن بتقول لي انت ميكانيكي ما بتاع كمبيوتر ..
غالبا التسجيل بيكون مر عليك بتاع الزول الراقد في عنقريب وبيغني للكاشف ..

هاك طيب يا ميكانيكي :)



بعيدا عن موضوع البوست, الكاشف لم ولن يتكرر

معقول يا أبو عمير زول راقد في العنقريب يغني لى زول بين طيات السحاب ؟؟
...................
جرجير اتا جائي مع منو والموضوع ذاتو شنو ؟

تعرف ياعمر مرات وانا ذاتي بتحصل لي الحكاية دي انك تغني اغنية وااااااااحدة ويكون صوتك فيها جميل
لكن تمرق منها شبر واحد بس تلقي صوتك وزمنك فارق اها مابعيد زولك ده يكون من ناس الاغنية الواااااااحدة ........

-------------------------------------------------------------------------------------
واحد منتشي (شارب شراب فرح) في حفلة مشي بشر للفنان يا استاذ بالله غني لينا اغنية (............)
الفنان : بكل ادب وتهذيب معليش يا استاذ دي انا غنيته قبيل قبل ما انت تجي !!!
المنتشي : طيب ما تغنيها تاااااااااااني انت عندك غيره

تعرف يا ود البشرى لمن انت جبت سيرة الغنا والفنانين ومدني انا سككت ليي؟؟ عشااان الكاشف ده ..
مع إنو بالمناسبة امدرمان في الغنا والفنانين ماا بتتلحق لكن الزول ده كفتو برااهو ومدرستو براااهو ..هو الأصل والباقي جا بي وراهو ..
الكاشف ده زول عجيييب .. عجييييييييب..