Post: #1 Title: غرقنا: دعواتكم لأسر سودانية بالسلامة من الفيضان.. Author: Kabar Date: 06-21-2013, 08:14 AM
امطرت مدينة كالقري و ضواحيها في غرب كندا..و فاضت انهرها الصغيرة بغضب..و تم اجلاء مدن صغيرة عديدة حول كالقري ..و منها بلدة هاي ريفر..و التي تقيم فيها بعض الأسر السودانية.. منهم اسرة اخونا السوداني الخلوق دكتور خالد اصيل (عضو المنبر)..و السوداني النبيل على حسن غبوش..و تم اجلاء كثير من سكان المدينة..امنيات بسلامة الجميع هناك.. خاصة الأسر السودانية..
من النواحي المتاثرة في داخل كالقري.. الناحية الجنوبية و الجنوبية الغربية..و يقيم فيها اعضاء المنبر الأصدقاء منصور المفتاح..و امير مساعد..دعوات ليهم بالسلامة هم و اسرهم.. كبر
Post: #2 Title: Re: غرقنا: دعواتكم لأسر سودانية بالسلامة من الفيضان.. Author: MOHAMMED ELSHEIKH Date: 06-21-2013, 11:43 AM Parent: #1
دعواتنا بسلامة الجميع ان شاء الله وربنا يحفظهم اينما رحلو ووين ماحلوا
لكن هن الخواجات ديل وكت زينا بتجيهم فيضانات تغرقهم كافرين فوق كم؟
Post: #3 Title: Re: غرقنا: دعواتكم لأسر سودانية بالسلامة من الفيضان.. Author: Kabar Date: 06-22-2013, 10:26 AM Parent: #2
Quote: لكن هن الخواجات ديل وكت زينا بتجيهم فيضانات تغرقهم كافرين فوق كم؟
ول ابا محمد الشيخ.. حبابك يا صديق كتر خيرك على الفقد و المطايبة.. الكفر هين يا قريبي.. العالم دي عندها نهرين..واحد اسمو ألبو (غريب احد روافد السوباط في جنوب السودان بنفس الإسم)..و التاني اسمو بو (من غير اداة التعريف)..و النهرين منحدرات من جبال الروكي في غرب المدينة..و عارفين المناسيب..عشان كده دايما جاهزين لكل الإحتمالات..و المرة دي من قبل تلاتة ايام قاعهدين يحذروا الجماهير من الح يحصل بالضبط..و عارفين يفضوا ياتو حي...و يقطعوا الكهربا متين.. المدهش في الأمر عمدة المدينة و شيخ البوليس و شيخ المطافي لغاية الليلة ما ناموا.. يقولوا ليهم البحر كسر في الحتة الفلانية.. تلقاهم اول تلاتة انفار وصلوا محل الكسرة ( بالمناسبة عمدتنا مسلم يا محمد)..و قاعدين يحذروا الناس ما تجي هناك..يعني لو بقى في موت هم مستعدين يموتوا اول ناس.. تقول لي مسلمين..!!!!!
قاعدة تجينا كوارث اكتر يا محمد.. لكن هنا الناس بتتعامل معاها انو حاجة مفروض تحصل و التحدي كيف تواجهها.. و الغريبة مافي زول بيقول ليك امشي صلي ولا ارفع يديك بالدعاء..!!.. عرفوا انو في ناس جيعانين في الحتة الفلانية بيقول ليك شيل جزء من عشا وليداتك و امشي بيهو الحتة الفلانية.. ولا شيل ليك بطانية بطانيتين امشي بيهم الحتة الفلانية لأنو الناس هناك محتاجة..!!!
كبر
Post: #4 Title: Re: غرقنا: دعواتكم لأسر سودانية بالسلامة من الفيضان.. Author: Kabar Date: 06-22-2013, 10:42 AM Parent: #3
كتب يوسف البشاري من الفيس بووك..
Quote: ربنا ينجيهم .. ويامحمد الشيخ الخواجات ديل الفرق بين فيضانهم وفيضانا إنو الأسرة الأضررت بودوها الفندق وياكلوا ويشربوا على حساب الدولة حتى تجهيز بيتهم وتغطية الأضرار من التأمين وسلطات البلدية ويتم إخلاء الناس بواسطة الطائرات والزوارق ولإستنفار كل الأجهزة شرطة جيش إسعاف طوارئ ( بلدية ) مهندسين كبارى وعلى شرط المحافظ يطوف على السكان بدون حراسة ..!
يوسف .. حبابك يا صديق كتر خيرك على المطايبة هنا.. و هذه و الله اشهد بها.. العمدة بتاع مدينتنا ( و هو مسلم)..و قائد الشرطة و قائد المطافي.. لغاية الليلة مافي واحد فيهم نام.. ياخي عمدة المدينة حالو تحنن لمن يتكلم في الميديا...شكلو تعبان بشكل..و لسع بيقول ليك كتر خير المواطنين لأنو عرفو واجبهم شنو..! و التلاتة.. كل ما تجيهم معلومة انو البحر كسر في الحتة الفلانية بتلقاهم اول ناس هناك..و بيحذروا المواطنين ما يقربوا من الحتة د لأنها خطرة.. يعني على استعداد لو في موت هم اول ناس تموت..!!! كل المناطق المواجهة بالخطر تم اخلائها تماما.. قلب المدينة ( الدوان تاون) اتأثر..و السلطات المحلية الزمت كل شركة ترسل رسالة صوتيه لموظفيها و عمالها بان لا يأتوا الى العمل..تلقيت سبعة رسالات حتى الآن..!! عمدة المدينة بيقول ليك لو قاعد في بيتك.. فهذا افضل مكان تتواجد فيهو الآن .. لأنو اسرتك هي اكثر من يحتاجك.. و الباقي نحن ح نتمو..!!! شغل بتاع درء كوارث يشهيك الكوارث.. شركات الأتصال.. اعلنت انها بتسمح بمكالمات مجانية محلية.. اقليمية أو دولية.. لكل مواطن أو مواطنة .. اعلنت السلطات المحلية اخلائه من سكنها لظروف الكارثة..!! الجهات الوحيدة الشغالة.. البوليس.. المطافي.. الكهرباء.. الغاز.. الكباري و الطرق..و الصحة.. ووزير الصحة الإقليمي ظهر بيتحدث و بناشد كل دكاترة و ممرضي و ممرضات الوزارة في المدنة انهم يمشوا العمل..و يبرزوا بطاقات اثبات الهوية..و اكتر من كده بيناشد كل زول أو زولة في اجازة انو يقطع الإجازة لأن البلد محتاجة لجهودو...!!!
كبر
Post: #6 Title: Re: غرقنا: دعواتكم لأسر سودانية بالسلامة من الفيضان.. Author: Kabar Date: 06-22-2013, 11:05 AM Parent: #4
غايتو يا ناس سودانيز اونلاين الفيكم انعرفت... المهم..
صديقنا النبيل على غبوش تلقي مكالمات من الهند..و بلاد اخرى..و الناس تسأل لتطمئن عن احواله.. لأنها قرات هذا البوست..!! و على غبوش .. تحدثت معه قبل سويعات.. كان يضحك و يسخر و يقول لي و الله طلعنا مشردين..!!!!..هو بخير و الآن في مدينة كالقري هو اسرته.. لأنو بيتهم غرق..
دمعت عيني ..و انا اشاهد نزول الجيش في بلدة كانمور.. و هي مساهمة الحكومة الفيدرالية.. سألتني ابنتي الكبيرة .. الآنسة شهد.. (13 سنة) .. لماذا ابكي...؟.. قلت لها منظر مؤثر يا عزيزتي..! قالت.. فعلا منظر مؤثر .. ناس في لمحة بصر تفقد بيوتها..! قلت ليها.. ابدا ، قصدي منظر الجيش..!!!
طلاطاشر سنة في كندا و لم ارى الجيش .. لم اري عسكري جيش يطوف في المدن أو الشوارع.. و اليوم جاء الجيش الى مدينة كانمور.. شايلين جرارات فيها اغاثة..و الباقي فنيين طرق و كباري.. منتظرين لو كبري انكسر.. يقوموا بالتصليح مباشرة..!!! قالت لي الآنسة شهد.. معاك حق.. لأنو لمن مشينا السودان.. كنا بنشوف الجيش في الشوارع و شايل سلاح حتى في العيد (طبعا من كضبنا الكتير .. افهمنا الأنسة شهد انو العيد مناسبة مقدسة و تعني السلام.. و هي لم تفهم كيف يعني في المناسبة المقدسة و الناس شايلة سلاح..!!)..!!!
طبعا عيال الزمن ديل في عالم تاني خالص..و قالت لي الآنسة شهد.. بدل تقعد تحزن كده.. مفروض نعمل حاجة..!! التلفزيون قاعد ينقل الأخبار أول بأول..و بيوضح للناس اماكن تجميع الدعم..و بيحدد شنو المطلوب.. ياخي لغاية الملابس الداخلية و معجون الأسنان..!! تنقش تنقش.. لحقنا اخر السوق ...و اشترينا لينا مجموعة من قناني المياه...زي مية و عشرين..و فوووو لمركز تجميع الدعم..!!! بالنسبة لي ما شاعر بي حاجة مختلفة.. بالنسبة للآنسات شهد و شروق.. (كلنا مشينا مع بعض).. انهن عملن حاجة من اجل مدينتهن و مواطنها.. و عندهن يقين غريب انو ح يجي يوم و يكونن محتاجات للبشر ديل..!! بالنسبة لي.. ياخي حتى الشك ساكت ما حصل.. و ما فكرت انو ممكن واحد يشيل الموية دي و يتاجر بيها...!!!!!!!
الكارثة هنا بتواجه بي حاجتين اتنين: معلومة دقيقة.. اتصال مستمر...
المعلومة قالوا مناسيب البحر زادت.ز يقموموا يفضوا المناطق المتأثرة من المواطنين عشان الحيكومة تشوف شغلها... الإتصال.. من موقع الحدث.. قطعوا الكهربا في قلب المدينة.. يشرحوا للناس.. المحولات ممكن تشتغل.. لكن بعد ساعات ح تضرب.. و لو ضربت تصليحها ح يحتاج شهرين أو تلاثة اشهر.. عشان كده قفلناها و قطعنا الكهربا.. يعني ممكن تقطع لي يوم يومين و بعد داك ترجع عادي...!!!! الأسواق.. و لو اول مرة و منذي ان جئت كندا في 1999.. اول مرة اشوف الرفوف فاضية.. لأنو الناس مخلوعة تشتري و تخزن..!!!
اللحظة المطرة وقفت.. و الناس مترقبة انخفاض مناسيب المياه..!! تجربة عجيبة... و الأعجب قدرة الناس على التعامل مع الكوارث... و كنت اتمنى أنو أي منظراتي في السودان مالينا فقر بفقه درء الكوارث.. يحضر اللحظة دي...!!!!
كبر
Post: #5 Title: Re: غرقنا: دعواتكم لأسر سودانية بالسلامة من الفيضان.. Author: محمد على طه الملك Date: 06-22-2013, 10:45 AM Parent: #3
أتمناهم بخير وربنا يحفظكم جميعا .. ما عندكم ناس من توتي يقلعو البدل والقمصان ؟
Post: #7 Title: Re: غرقنا: دعواتكم لأسر سودانية بالسلامة من الفيضان.. Author: Kabar Date: 06-22-2013, 11:10 AM Parent: #5
Quote: أتمناهم بخير وربنا يحفظكم جميعا .. ما عندكم ناس من توتي يقلعو البدل والقمصان ؟
صديقي و استاذي محمد علي طه.. حبابك كتر خيرك على المطايبة..
بالحيل يا استاذي...عندنا البيقلع البيدل و القمصان.. لكن الحيكومة بتحلف بالطلاق و بتقول ليك مافي داعي .. نحن ح نسدها و لو احتجنا ح نقول ليك عووووك...!!!
ياخي السستم ده مرات عندو جنس محن..!!!
كتر خيرك على المرور..
كبر
Post: #8 Title: Re: غرقنا: دعواتكم لأسر سودانية بالسلامة من الفيضان.. Author: ود الباوقة Date: 06-22-2013, 11:12 AM Parent: #7
كبر
طالما الاستغاثة تاتي من كندا معناه نحن مية مية
قلوبنا معكم
حاول اتعلم السباحة
احتياطي وكدا
شكرا كبر
Post: #9 Title: Re: غرقنا: دعواتكم لأسر سودانية بالسلامة من الفيضان.. Author: نادر Date: 06-22-2013, 11:15 AM Parent: #7
الأخ الأستاذ كبر دعواتنا بالسلامة للجميع إيه أخبار أخونا النصري، الغائب منذ فترة عن المنبر؟ آمل أن يكون وأسرته في مأمن من الفيضانات. تحياتي
Post: #10 Title: Re: غرقنا: دعواتكم لأسر سودانية بالسلامة من الفيضان.. Author: Kabar Date: 06-22-2013, 11:16 AM Parent: #7
مدينة كالقري.. قلب المدينة.. الداون تاون..
كبر
Post: #11 Title: Re: غرقنا: دعواتكم لأسر سودانية بالسلامة من الفيضان.. Author: Kabar Date: 06-22-2013, 11:22 AM Parent: #10
بلدة هاي ريفر...( High River)... التي يسكن فيها صديقنا على حسن غبوش و صديقنا دكتور خال اصيل (عضو المنبر)...
كبر
Post: #12 Title: Re: غرقنا: دعواتكم لأسر سودانية بالسلامة من الفيضان.. Author: Kabar Date: 06-22-2013, 11:26 AM Parent: #11
Quote: حاول اتعلم السباحة
ود الباوقة.. حبابك يا صديق كتر خيرك على المطايبة.. سباحة شنو يا معلم.. نحن شغالين بالمثل بتاع.. الخلا و لا الرفيق الفسل... قادين في ضهر المدينة العالي... فضاءات و سهول ساكت ياعم...
كبر
Post: #13 Title: Re: غرقنا: دعواتكم لأسر سودانية بالسلامة من الفيضان.. Author: Yasir Elsharif Date: 06-22-2013, 11:30 AM Parent: #12
سلامات يا عزيزي كبر وجميع الكالقرياب
شاهدنا الخبر في التلفزيون..
نسأل الله أن يسلِّم الجميع خاصة أخواننا السودانيين..
ياسر
Post: #15 Title: Re: غرقنا: دعواتكم لأسر سودانية بالسلامة من الفيضان.. Author: Kabar Date: 06-22-2013, 11:33 AM Parent: #12
Quote: الأخ الأستاذ كبر دعواتنا بالسلامة للجميع إيه أخبار أخونا النصري، الغائب منذ فترة عن المنبر؟ آمل أن يكون وأسرته في مأمن من الفيضانات. تحياتي
نادر ..حبابك يا صديق كتر خيرك على المطايبة.. اخونا النصر بخير و عافية هو اسرته الكريمة..و بعيدين من محل الفيضان.. شخصي... النصري... حامد الصاوي.. ابراهيم ناصر... من اعضاء المنبر .. نسكن في شرق المدينة و بعدين من انهر المدينة.. لأن الفيضان اثر كثيرا على وسط المدينة... و الأجزاء الجنوبية.. الأصدقاء امير مساعد (عضو المنبر).. و منصور المفتاح (عضو المنبر).. اقرب للمناطق المتأثرة.. اخونا حامد الصاوي اتصل على صديقنا امير قبل ساعات.. و امير ذكر انهم بخير هو اسرته..و لم يتأثروا بعد.. صديقنا منصور المفتاح.. قاطع اخبار تماما.. تلفونه بيديك مشغول و لم اتمكن من التحدث اليه حتى اللحظة..و كذا بعض الصديقات و الأصدقاء من مدينة تورنتو في شرق كندا..!!
غالبية الأسر في مدينة كالقري تسكن في الأجزاء الجنوبية الشرقية و الشمالية الشرقية.. و هذه مناطق لم تتأثر لأنها بعيدة عن ضفاف البحر..!!! اما اكثر الأسر تضررا هي الأسر السودانية في بلدة ها ي ريفر .. لأنو دي تم اجلاء جميع مواطنيها.. حتى المستشفى غرقت.. و حتى الآن الأسر السودانية بخير و رحلت الى مدينة كالقري..
كبر
Post: #14 Title: Re: غرقنا: دعواتكم لأسر سودانية بالسلامة من الفيضان.. Author: قاسم المهداوى Date: 06-22-2013, 11:33 AM Parent: #1
سلاام يا كبر
Quote: امنيات بسلامة الجميع هناك.. خاصة الأسر السودانية..
معك نردد تمنياتى بسلامة الجمبع
قاسم المهداوى
Post: #16 Title: Re: غرقنا: دعواتكم لأسر سودانية بالسلامة من الفيضان.. Author: Kabar Date: 06-22-2013, 11:46 AM Parent: #14
بلدة كانمور ..ضواحي كالقري..
الأصدقاء.ز ياسر الشريف... قامس المهداوي..
حبابكم...و كتر خيركم على المطايبة... حتى الآن الأسر السودانية بخير... و مدينة كالقري .. معلن انها سوف تتوقف عن العمل الى غاية يوم الثلاثاء القادم... لسع ما وصلنا انذار غلي موية الشراب...!!! (طبعا غلي الموية بيكون لمن السلطات المحلية تتأكد انو نظام المجاري انفجر)...!!!!
كبر
Post: #17 Title: Re: غرقنا: دعواتكم لأسر سودانية بالسلامة من الفيضان.. Author: حامد الغبشاوي Date: 06-22-2013, 11:50 AM Parent: #1
ول أبا كبر لك التحية نسأل الله السلامة واللطف بهم وان يخرجهم سالمين غانمين
.................... اللهم أخفظ عبادك السودانيين في كل مكان
شكرا الصديق كبر وقلوبنا مع كل المتضررين من احياء واشياء،لأننا فى بلدان السعة الأنسانية حيث الأنسان هو أنسان فى المقام الأول بلا لون أو جنس أو ديانة المهم سلامته،وكما للحيوانات فى السلامة والاهتمام نفس نصيب الأنسان اذ تم حمل الحيوانات للملاجئ لحمايتها حتى تستقر أسرها، ومؤكد للبيئة نصيب بعد انحسار مد الفيضان. تأتى الكوارث فى هذه البلدان فتوحد الحس الوجدانى ويصير الكل واحد ويتحقق الحديث النبوى عند امم هى ليست بأمة (محمد) عليه افضل الصلاة واتم التسليم (ليس منا من بات شبعان وجاره جائع). كنت البارحه فى موعد بالدكتور،ظلينا فى العيادة ثلاثة ساعات ،لأن الدكتور يبحث عن طريق للوصول للعيادة!خلال هذه الثلاث ساعات كان بيتم لينا اعتذار كل ربع ساعة عن تاخير الطبيب بصورة تجعلك (تتهمهم) انهم وراء الفيضان دا! وخيرونا بان نذهب ويتم تحديد مواعيد اخرى او الانتظار..الغريبة اختار الجميع الانتظار أحتراما لجهد الطبيب فى محاولة الوصول (وعجبى). ثم دخل الطبيب علينا معتذرا ومصرا على ان ينجز العمل بصوره سريعة تعوض الجميع شئ من زمن مفقود..وهيهات يابلادى.. كتب الله سلامتنا و سلامة جميع الاسر السودانية بمدينتنا تخصيصا للرحم السودانى بثينة تروس
Post: #21 Title: Re: غرقنا: دعواتكم لأسر سودانية بالسلامة من الفيضان.. Author: Suleiman Todi Date: 06-22-2013, 05:01 PM Parent: #20
الاخ كبر:
تحياتي لك ولكل الاسر السودانية في كالقري وانشاء الله تسلموا وشكرا عاي بوست الاستغاثي وتفقد الاسر
علي العموم االمناطق الجنوبية احسن حالا من الغربية والشمالية الا في بعض المناطق الصغيرة الواقعة في اقصي الجنوب المدينة.
بالمناسة:
انا امس الجمعة عندي ساعة لافي بالسيارة لزوم زيارة لمناطقكم الشرقية لكن رجعت بخفي حنين
كل اغلب المداخل لشرق المدينة مقفولة وخاصة مداخل لشارع ( ديرفوت) مغفولة تقريبا .
حتي الان في نداء لترشيد استهلاك المياة
الوضع يبدوا تحت السيطرة مالم يستجد طارئ وماشي لتقرج.. حسب كلام المسؤلين .
ول أبا كبر .. سلامتكم من الغرق وعلى قولك درء كوارث يشهي الزول في الكوارث. زي واحد شاف المقابر في لندن قال والله مقابر تشهي الموت بعيد عنك. تضامننا ودعوات لمنصور المفتاح وكل الشباب في المنطقة. نقدم لهم العذر البقولوا المسؤولين السودانيين: الناس بنت بيوتها في مجاري المياه والخيران وكأن الناس بنت بدون علم الحكومة.
