Post: #1
Title: يا البتشوفوهو!!
Author: فتح الرحمن حمودي
Date: 06-20-2013, 11:05 PM
معطوتنا عديل كدي!!
|
Post: #2
Title: Re: يا البتشوفوهو!!
Author: فتح الرحمن حمودي
Date: 06-20-2013, 11:13 PM
Parent: #1
نواحي العام 1418 لهجرة المصطفى صلى الله عليه وسلم، كنت حاجي مع امي آمنة بت السيمت -والتسمية لانو عندي امين فضلة خيركم- المهم يا جوك؛ كانت حجة مشهودة ..
اولاد حجتنا كتااااار، من يهمنا هنا فيهم الصديق ورفيق الدروب الوعرة والمسافات العصية وشيال الاسية استاذ/ الطيب عبد الله، واستاذ دي حق ما منّة من عندي .. هو فعلاً درّس زميلنا -انا وهو- في بزنس، د. عبد الهادي خوجلي (حالياً) في المتوسطة في نواحي المناقل ..
المهم يا سيد الامانتي ليك الاستاذية ما هي اهم صفاتو .. خصوصاً المطاردا انا هنا في خيطنا هذا .. ولا الغناء زول غنااااي لمن غلط .. خصوصاً لسميه!!
يتبع
|
Post: #4
Title: Re: يا البتشوفوهو!!
Author: فتح الرحمن حمودي
Date: 06-20-2013, 11:26 PM
Parent: #2
التصوف الطرائقي (ان جازت التسمية) .. الزول حوار ممتاز لشيخ الجيلي الشيخ عبد المحمود الحفيان راجل طابت (الشيخ المثقف وخريج الجامعات)
وشاءت الصدف انو الجميل نبيل مبارك -ود بت الشيخ- برضو دفعتنا وزميلنا وحبيبنا ..
المهم
كلنا اخدنا الطريق .. المافي شنو (لا بغلط عليك .. لا بوسّ-خ يديك .. مجرد عهد وبيعة بالطاعة، ما اطاع الله .. والحكم لك)
ؤ
سمانية الدهر دهرنا .. نقيم الليل نشرب في بحرنا
وهكذا
حيران .. ؤ مهيوبة .. وتقابة قرآن .. ومحبة واااافرة
|
Post: #3
Title: Re: يا البتشوفوهو!!
Author: سفيان بشير نابرى
Date: 06-20-2013, 11:17 PM
Parent: #1
إي و الله معط الجِن و الجمبو
و كل مرة تلقى البتاع مرفوع فوق تقول
خلاااااس المرة بشوفه و برضووووو الحال في حالو !!!
كلم الزول دا يرجع لينا قروشنا
|
Post: #5
Title: Re: يا البتشوفوهو!!
Author: فتح الرحمن حمودي
Date: 06-20-2013, 11:36 PM
Parent: #3
Quote:
كلم الزول دا يرجع لينا قروشنا
|
دا هدف البوست بالمناسبة
انت قايلني قريت اكتر من عناوين البوستات هنا .. وفي الفيسبوك؟ (السبابي نموذجن:))
تابع وفالك طيب ...
قروشك بترجع ليك بإذن الله .. بس ساعدا بي جكة ؤ كدا
-------
اصحبنا المذكورين اعلاه، امتحانئذٍ واحد من الدراويش عزم ليهم في اقلام .. قرضوا على كدا مااااا ساعدوها بي جكة لي المكتبة ..
جبارتم بقت بي الصب سااااي .. خلوا الاقلام في محلها .. مشوا اشتروا ليهم عدد اتنين قلم (بك) صناعة فرنسا الكافرة!!
والله صحي
|
Post: #6
Title: Re: يا البتشوفوهو!!
Author: فتح الرحمن حمودي
Date: 06-21-2013, 00:05 AM
Parent: #5
نرجع للثيمة ..
ا
المطاردو هنا التصوف الشكلاني/ المظهري (كان داير تبدل التصوف بالتدين يا زول ما بنختلف ... بدل ساي الله لا قلّاها ... المافي شنو؟)
المهم الطيب صاحبي كان شايل ليهو لالوبة كااااربة .. في الحقيقة انا الكنت اشيلا عصرئذٍ، لكن هي حقتو هو
لاقانا ليك درويش بائنة دروشته وكف نف غافلني ليك ببوسة في يدي وهو يردد:
اوووو يا البتشوفوهو!!
(والتعجبات حقتي انا .. كل واحدة تمثل حاجب ... واقف قنقبة)
نشوف شنو يا زول!؟
انقر (الدرويش البرا ضياء او ايباد منير دا) ارعوى يا عزيزي القارئ؟
|
Post: #7
Title: Re: يا البتشوفوهو!!
Author: فتح الرحمن حمودي
Date: 06-21-2013, 00:12 AM
Parent: #6
Quote:
انقر (الدرويش البرا ضياء او ايباد منير دا) ارعوى يا عزيزي القارئ؟
|
ترعوي دينا خالد ... ويضحك السمك ذاتو!!
بل زاد في جنو -المقدس (اقرأ حالة جذبو)- وغباو .. وكف نف جاااهز (ما بعرفنا كوووويس هو):
عارفكم ماااا بخلوكم تتكلموا!!
|
Post: #8
Title: Re: يا البتشوفوهو!!
Author: فتح الرحمن حمودي
Date: 06-21-2013, 00:16 AM
Parent: #7
صدق او لا تصدق يا صديقي القارئ انا لحدي الوكت داك ما فاهم بالضبط!
شاكي لكن مااا متأكد ..
|
Post: #9
Title: Re: يا البتشوفوهو!!
Author: فتح الرحمن حمودي
Date: 06-21-2013, 00:19 AM
Parent: #8
لمن اتولى صديقي الطيب شرح الحاصل والمتحصل
ؤ بخبرتي - كأخصائي مخ واعصاب المورجغين- شخصت حالة الزول دا بي (فالج) لا يرجي علاجه
فداويته بالتي كانت هي الداء ..
المرة دي مافي اي مغافلة .. مدت ليو يدي براي
المافي شنو .. خلوا الزول يتبرك!!
|
Post: #10
Title: Re: يا البتشوفوهو!!
Author: فتح الرحمن حمودي
Date: 06-21-2013, 10:28 AM
Parent: #9
Quote:
عارفكم ماااا بخلوكم تتكلموا!!
|
لو صدق، لكنتم جميعاً من الكاذبين
----------
رجعوا لناس سفيان قروشم يا رسماليين .. وبطلوا الاستغلال دا!!
وانا بنحت راسي، وافتش جراب الحيل ..
ؤ بلقى لي طريقة ارجع لحواري داك بوستو
يا ما في الجراب يا قيقاحاوي
|
Post: #11
Title: Re: يا البتشوفوهو!!
Author: سفيان بشير نابرى
Date: 06-21-2013, 04:04 PM
Parent: #10
المصيبة هو ما عايز يبطل الدروشه عشان برااااهو يشوفه
يفعد يطارد و يحاحي و الشوف يقوت عليهو و يكوسو
عند الناس و يقابض من طرف كف كرف .
جراب الحيل دا بيجيب ليك كل الكاذبين
|
Post: #12
Title: Re: يا البتشوفوهو!!
Author: نصرالدين صلاح
Date: 06-21-2013, 05:02 PM
Parent: #11
ههههههه
يا قيقا
هسه الزول الصادق دة داير تتطلعو طالب الناس قروش
و لا انتو تجار دين متنكرين بي لالوبة :)
-------------------------------
و الله كان بتشوفوا ما عارف ههههههه
|
Post: #13
Title: Re: يا البتشوفوهو!!
Author: كمال علي الزين
Date: 06-21-2013, 05:48 PM
Parent: #12
(*)
يالشهوة الكتابة ..
|
Post: #14
Title: Re: يا البتشوفوهو!!
Author: فتح الرحمن حمودي
Date: 06-21-2013, 06:59 PM
Parent: #12
Quote:
و الله كان بتشوفوا ما عارف ههههههه
|
واللهي صراحة يا نصر لقيت اني اقنع نفسي باني من البشوفوهو اسهل لي من اقناع الدرويش دا اني ما منهم ..
وانا زول ساهلة ...
فدفنت دقن .. ومثلت غمران
المافي شنو؟
|
Post: #15
Title: Re: يا البتشوفوهو!!
Author: فتح الرحمن حمودي
Date: 06-21-2013, 08:50 PM
Parent: #14
بل هي شهوة القداسة .. وغوايتها
شهوة ان تكون مقدساً ؤ كدا
--------
هو برا [الخمج الديني] دا يا عملات روزمين الساوينا في جنس الطقس التطهري الاسا فيو دا شنو!؟
|
Post: #16
Title: Re: يا البتشوفوهو!!
Author: بدر الدين احمد موسى
Date: 06-21-2013, 08:55 PM
Parent: #15
فتح الرحمن يا قيقراوينا
هههههههه انا خايف الزول دا يكون "سدركم" في صمة خشمكم ههههههههه
الزول دا يكون في باله اسم الحي المشهور في مدينة ملكال!
وعليه هههههههه
--
التسدير:حركة ما لذيذة يقوم بها صغار السفهاء
في ملكال هناك حي يسمى "دنقر شوفو"!
|
Post: #17
Title: Re: يا البتشوفوهو!!
Author: سفيان بشير نابرى
Date: 06-21-2013, 09:18 PM
Parent: #16
هسي لو حددناها معاهم يطلعو و لا بشوفوها ذاتو
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
تحكي الرؤاية أنه في احدى قرى الجزيرة التي تشتهر بالفقراء و المشايخ و المسايد كان يوجد مسجد يسمى بالمسجد العتيق
يومه كل اهل القرية في كل الصلوات رجال و نساء صغارهم و كبارهم .
كان شيخ المسجد هو حفيد الخليفة الكبير للقرية و كان هذا الحفيد يُعمر حلقة دراسية يومية عقب صلاة المغرب و كان
كل الاسبوع مخصص للرجال و يوم الثلاثاء فقط الدرس للنساء و بطبيعة الحال بعد الفراغ من الدرس يصلي الجميع
العشاء و ينصرفون إلي منازلهم . صادف في احد أيام الدروس اشتكي بعض الرجال الذين يقفون لآداء الصلاة في
الصف الخلفي( الذي يسبق صف النساء) اشتكوا بأن هناك فتاة (سموها بإسمها) تشغلهم عن الصلاة لانها تكبر تكبيرة
الاحرام اكثر من ست مرات الشي الذي يلخبتهم و يظنون أن الإمام ركع .
سمع الشيخ الشكوة و وعدهم خيراً و ما كان منه إلا في يوم درس النساء سأل الفتاة :-
الشيخ :- يا بت الشيخ تكبيرة الأحرام واحدة بتدخلك الصلاة أنتي ليه بتكبريهم ست مرات؟
الفتاة :- يا ابوي الشيخ أنتو عشان الله فاتح بصيرتكم بتشوفو الكعبة من اول تكبيرة أنا ما بشوفه إلا لما اصل سته .
|
Post: #18
Title: Re: يا البتشوفوهو!!
Author: فتح الرحمن حمودي
Date: 06-21-2013, 10:15 PM
Parent: #16
Quote:
هههههههه انا خايف الزول دا يكون "سدركم" في صمة خشمكم ههههههههه
|
قيقا لا يسقط اي احتمال ..
لكن الاحتمال دا بالذات كان حظو اقل من الصفر!!
كل الشواهد .. والمشاهد بتقول كدا
---------
يا عمك الاجواء الروحانية السامية في الحج دا بترهف اي روح مهما كانت كثافة مادتها وغلظتها
ولا وذلك لاصبح الحج مجرد طقوس وثنية .. لشدة ما تاسرني مقولة سيدنا عمر عن الحجر الاسود/الاسعد ..
"اعرف انك مجرد حجر لا تضر ولا تنفع .. ولولا اني رأيت رسول الله يقبلك، لما فعلت“ او نحو ذلك
دا مما يقودني للمتصوحفة الاجرت اللقاء مع الخطيب ..خصوصا في حتة الحجاب، ولبس النساء في الحج
فهي تهرف بما لا تعرف ..
لحدي ما اجيكم بهناك هل تعلم انو قبل الاسلام النسوان على الرجال كانوا بحجوا طرزانات!؟
وبعد الاسلام احرام المرأة ممنوع فيو النقاب .. والمسجد الحرام، بل مناسك الحج كلها مناسك مختلطة!
|
Post: #19
Title: Re: يا البتشوفوهو!!
Author: Imad Khalifa
Date: 06-21-2013, 11:57 PM
Parent: #18
ودي بتعادل سنة كم بتوقيتنا العلماني؟
الحجة مباركة ان شاء الله لأمنا الحاجة بت السيمت.
-----------------
غايتو الفقير دا (قطع شك ظني) في أنك زولا ملان بركة لمن متدفقة دروشة وطلاسم وشفرات.
|
Post: #20
Title: Re: يا البتشوفوهو!!
Author: فتح الرحمن حمودي
Date: 06-22-2013, 00:16 AM
Parent: #19
عمدتنا
Quote:
الحجة مباركة ان شاء الله لأمنا الحاجة بت السيمت
|
دي التانية .. الاولى مع الحاج همسلف .. لكن برضو بتتأرخ بي انا
انت قايل (فتح الرحمن) وفال عمك خلف الله دي توهم من البطل ساي اول؟
البطل دا اثبت انو من اهل الكشف عديل كدا
مدد
----------
غايتو لا بتخافو لا بتعافو .. اسي جنس كلامك دا كان صدقتو، بترحلوا من الكوكب دا لي وين؟
اخخخخخ .. اربعين قصرت الخطى ساي .. ما جاتنا رسالة
لو استلمت SMS ساي كان تعبتوا معاي!
الكلام دا يعادل 1998م مما تعدون
|
Post: #21
Title: Re: يا البتشوفوهو!!
Author: Imad Khalifa
Date: 06-23-2013, 06:31 AM
Parent: #20
| Quote: اسي جنس كلامك دا كان صدقتو، بترحلوا من الكوكب دا لي وين؟ |
يازول الحبة ما بتجينا وما بنروح لكونا تاني، بس المهم تصدقوا اتا!!!!!
وبعدين شوف البوست دا غير الدراويش والمجاذيب الدخلو منو؟
دي ذاتا ما اشارة كبيرة بالحيل و(المافي شنو؟)
|
Post: #22
Title: Re: يا البتشوفوهو!!
Author: فتح الرحمن حمودي
Date: 06-24-2013, 00:46 AM
Parent: #21
عمدة يا عمدة
كلامك دا بتاباهو بعدينك
يا زول زي ناس كيمو ديل نوع الكان قرأ الحمدو ساي يجي يشيل بها الناس القفة انو صلى تروايح عديل مااا مضمونين!! :)
مشيت (الملاذ الآمن) كما تسميه كاتبتي المفضلة .. كأكتب من مشى على كعب عالي .. لقيت العجاجة قاجة ..لم يعد آمناً بما يكفي
كلو بسبب (اظهار الرقم)* من جنس [الخمج الديني] البنسو فيو دا .. كتبت ليهم:
تواتر في احاديث بني كجة؛
[البسوم امو في سوق الاسافير العايرة، بتمنوها ليو السبابية وشماشة الاسافير]
لفقه قيقاراوي واضاف:
[العقائد مقدسة، ومسألة شخصية جدا، غير خاضعة لقواعد الديموقراطية وقبول الآخر اطلاقاً .. ولا تصلح للتداول والحوار والنشر العام .. لا أحد يضمن العواقب حينها!]
----
* قيل ثم ماذا يا حسن موسى .. ماهي ثالثة الاسافي؟
قال : [سروالك]
|
|