Post: #1 Title: يا عمر الفاروق رأيك ضروري في أداء وصوت هذه المطربة Author: Dr. Moiz Bakhiet Date: 06-16-2013, 04:39 PM
Post: #2 Title: Re: يا عمر الفاروق رأيك ضروري في أداء وصوت هذه المطربة Author: Dr. Moiz Bakhiet Date: 06-16-2013, 04:42 PM Parent: #1
هبة حسبو
تعرفت بها من خلال شاشة النيل الأزرق عندما استمعت إليها وهي تؤدي من كلماتي وألحان د. الماحي سليمان (طلعني منك يا شجن)
والقصيدة اسمها في الأصل: حب مقيم
وهي واحدة من مجموعة قصائد اختارها الدكتور الرائع الماحي ليلحنها وقد منحته حق التصرف الكامل في من يختاره لأدائها
Post: #3 Title: Re: يا عمر الفاروق رأيك ضروري في أداء وصوت هذه المطربة Author: Dr. Moiz Bakhiet Date: 06-16-2013, 04:44 PM Parent: #2
طلعني منك يا شجن واحميني من وجعي العنيد وامسح دموع هطلت زمن واسجني في الفرح البعيد لو يبقى حضن الشوق وطن كل المسافات تبقى عيد *** بيك انفتح باب الهوى وزغرد حنين عشقي القديم مديت يمينك بالنوى وشديت وتر صبري الهميم غيم الدجى الصاحي انزوى وأعلنت دربك حب مقيم *** نامت دموع حزني المسالم واستكان نبض الجراح في سكتك هلت عوالم عابرة بيك كل البطاح غابت مدن تاهت معالم وانت جيت في لحظة صاح.
Post: #5 Title: Re: يا عمر الفاروق رأيك ضروري في أداء وصوت هذه المطربة Author: أيمن دياب Date: 06-16-2013, 04:55 PM Parent: #2
سلامات يا دكتور معز وليك وحشة.. واحترامنا وتقديرنا للكلمة واللحن.. لكن ياخوي.. من هو عمر الفاروق حتى يحكم على صوت هذي أو تلك؟ هل تخصص في الأصوات وتخرج من معهد الموسيقى والمسرح؟ أم هو مجرد مستمع عادي (زينا وكده).. ما يعجبني قد لا يعجب هذا العمر.. وما يعجبه قد لا أستسيغه..
Post: #7 Title: Re: يا عمر الفاروق رأيك ضروري في أداء وصوت هذه المطربة Author: Dr. Moiz Bakhiet Date: 06-16-2013, 05:09 PM Parent: #5
تحياتي الحارة يا أيمن دياب
ولك الود والشوق العظيم..
عمر الفاروق زيي وزيك كده (مستمعين) عاديييييين
لكنو صحبي في حتة الغنا دي زي ما هو صحبي في مانشستر يونايتد
وسؤالي ليهو مطروح لكل الناس لكني عنونتو باسمو عشان خلفيات سابقة
بعدين برضو بنعمل ليهو تمارين عشان يبقى ناقد فني محترف
Post: #12 Title: Re: يا عمر الفاروق رأيك ضروري في أداء وصوت هذه المطربة Author: أيمن دياب Date: 06-16-2013, 05:23 PM Parent: #7
ناقد فني.. وما تنسى ناقد رياضي.. الحمد لله الزول ده ما بعرف سياسة.. كان طفشنا خلينا ليهو الرياض دي بي حالا..
Post: #4 Title: Re: يا عمر الفاروق رأيك ضروري في أداء وصوت هذه المطربة Author: Tabaldina Date: 06-16-2013, 04:48 PM Parent: #1
.. . لانفتى ومالك فى المدينة .. لكن مالو ندخل ماعونا ..على بال ما الموسيقار عمر يصل .. الزوله دى صوتا واداءا وشكلا .. شروق ابوالناس ..
--------------
برضو تحت رعايتك ..على اساس ان الاغنية من كلماتك ...!!؟
Post: #6 Title: Re: يا عمر الفاروق رأيك ضروري في أداء وصوت هذه المطربة Author: Dr. Moiz Bakhiet Date: 06-16-2013, 05:02 PM Parent: #4
سلام تبلدينا
Quote: برضو تحت رعايتك ..على اساس ان الاغنية من كلماتك ...!!؟
شاهدتها فقط على قناة النيل الأزرق
لسبب ما كنت أعتقد أنك خبير في الموسيقى ويبدو أنني مزجت بينك وبين شخص آخر فمعذرة
يمكنك الإستماع للحوار الذي أجري معها هنا:
Post: #9 Title: Re: يا عمر الفاروق رأيك ضروري في أداء وصوت هذه المطربة Author: Dr.Elsadig Abdalla Date: 06-16-2013, 05:15 PM Parent: #6
تحياتي يا دكتور معز أنا من المستمعين فقط ..خليني أرد على ولدنا تبلدينا ده بالله .. ياخ بالغت ياتبلدينا ياخ..دى ماعندها أي علاقه بي شروق أبو الناس سوى انها أنثي وتغنى...غير كده البت دي فنانه بمعنى الكلمه من وجهة نظري الخاصه(ماضروري الناس تتفق معاي طبعا ) واكيد عندها مستقبل كبير في دنيا الغناء
Post: #13 Title: Re: يا عمر الفاروق رأيك ضروري في أداء وصوت هذه المطربة Author: Dr. Moiz Bakhiet Date: 06-16-2013, 05:25 PM Parent: #9
دكتورنا الغالي الصادق عبد الله،
Quote: واكيد عندها مستقبل كبير في دنيا الغناء
معاك 100%
Post: #8 Title: Re: يا عمر الفاروق رأيك ضروري في أداء وصوت هذه المطربة Author: عمر الفاروق Date: 06-16-2013, 05:12 PM Parent: #4
دكتورنا المعز.. تحياتنا يا حبوب.. وطبعاً الصدفة وحدا خلتني احضر البت دي كاااملة مكملة في لقاء النيل الأزرق ده وتقريباً كان في مشوار المسا قبل فترة ما قصيرة .. يعني اوفر كم شهر كده .. طبعاً بعد التحسس بتاع ناس من هو عمر الفاروق بقول ليك أعفي لي :) :) :) لكن تبلدينا أداك الخلاصة .. غايتو تقييمي ليها إنها شروق ابو الناس ربنا راضي عليها .. :).. خصوصا وإنها قدمت عمل تاني كان مزعج وصوتا فيهو كان مزعج لو ما خانتني الذاكرة .. غايتو يا بروف إختيارك لي الفنانات شكلو زييي الإستاندرد بتاع ناس قناى النيل الأزرق والجزيرة في اختيار المزيعات .. عندهم قالب كده واااحد .. أسة غايتو إنت لحدددي اسة عندك قااالب واحد حق فنانات ..صوتن وشكلن واااحد .. شوف يا بروف كلماتك في الشعر جمييلة وحبااابا ..ما تشوهة بي إنو لاازم تتحول لي قصائد مغناة .. حضرت ليك كم إلقاء شعري قدمت فيهو كم قصيدة جميلة .. لو تسمع نصيحتي كمتلقي عادي سيب موضوع اكتشاف المواهب الغنائية ده ..ما بقول ليك خليهو علينا نحن لكن في يوم ما اذا انت عايز فعلاً تقدم ليك عمل غنائي فانا ح ارشح ليك صوت نسائي أو حتى رجالي يقدمو ليك وبعد داك على ضمااانتي خش بيهو السوق
Post: #10 Title: Re: يا عمر الفاروق رأيك ضروري في أداء وصوت هذه المطربة Author: Tabaldina Date: 06-16-2013, 05:18 PM Parent: #8
.. .
Quote: لسبب ما كنت أعتقد أنك خبير في الموسيقى ويبدو أنني مزجت بينك وبين شخص آخر فمعذرة
والله يا دكتور انا خبير فى تذوق الكلمات والاشعار .. لكن الحس الموسيقى والتوزيع ومخارج الاصوات ومداخلها دى ما بفهم فيها الا اداء مصطفى سيداحمد ومحمود عبدالعزيز .. لكن يبدو ان هذه المرة صدق حدسي .. وجاى دعم صديقنا الفاروق بالاتفاق على وجهه النظر ..
Post: #17 Title: Re: يا عمر الفاروق رأيك ضروري في أداء وصوت هذه المطربة Author: عزيز Date: 06-16-2013, 05:42 PM Parent: #10
يا بروف
سلام وأشواق يا صاحب
عمر الفاروق .. تااااني يا بروف!!
البنية يجي منها ولكنها محتاجة لشغل كتيييير..
وأتمنى ان يكون أستاذ الماحي وجهها لذلك.
حبيت أقول ليك وحشه والله
عبدالعزيز خطاب
Post: #28 Title: Re: يا عمر الفاروق رأيك ضروري في أداء وصوت هذه المطربة Author: Dr. Moiz Bakhiet Date: 06-16-2013, 09:23 PM Parent: #17
فنانا الجميل عبد العزيز خطاب
لك شوق عظيم والله
وأتمنى أن تكون بخير والأسرة الكريمة.
أنت متخصص ورأيك مهم للغاية..
وعلى حسب ما عرفت أنها تتلقى تدريب في الصوت بكلية الموسيقى وباتحاد المهن الموسيقية
على يد أساتذة كبار مثل الفنان عثمان مصطفى
Post: #11 Title: Re: يا عمر الفاروق رأيك ضروري في أداء وصوت هذه المطربة Author: Dr. Moiz Bakhiet Date: 06-16-2013, 05:22 PM Parent: #8
هلا والله بالغالي عمر الفاروق
Quote: الصدفة وحدا خلتني احضر البت دي كاااملة مكملة في لقاء النيل الأزرق ده وتقريباً كان في مشوار المسا قبل فترة ما قصيرة .. يعني اوفر كم شهر كده ..
ما هو انت اكتشفتها قبالي يا حبيب
Post: #14 Title: Re: يا عمر الفاروق رأيك ضروري في أداء وصوت هذه المطربة Author: عمر الفاروق Date: 06-16-2013, 05:27 PM Parent: #11
يبدو إنك يا دكتور وحسب ما إستشفيت وفهمت من مداخلاتك هنا إنو إنت ما على علم بي إنو في زولة أعجبت بي نص من نصوصك وغنتو .. فهمي كده صاح؟؟ لو صاح فوالله حاجة جميييلة إنك ما جيت طرحت نفسك بي حركات ناس المصنفات القايميين في من هذا الذي سمح لها وكيف تجرأت و و و البيضاييق فعلاً يا دكتورنا زي جنس المقدمة اللي عملتها المذيعة ضعيفة المعرفة الإسمها سهام دي .. البيسمع مقدمتها يقول الح تقدم الوصلات الغنائية هي ندييدة حنان النيل ..
Post: #21 Title: Re: يا عمر الفاروق رأيك ضروري في أداء وصوت هذه المطربة Author: صبري طه Date: 06-16-2013, 06:04 PM Parent: #14
Post: #29 Title: Re: يا عمر الفاروق رأيك ضروري في أداء وصوت هذه المطربة Author: Dr. Moiz Bakhiet Date: 06-16-2013, 09:25 PM Parent: #21
بصراحة يا صبري طه
انت زول فنان ونقي وجميل
Post: #15 Title: Re: يا عمر الفاروق رأيك ضروري في أداء وصوت هذه المطربة Author: Dr. Moiz Bakhiet Date: 06-16-2013, 05:31 PM Parent: #11
موضوع اكتشاف المواهب الغنائية ده ..ما بقول ليك خليهو علينا نحن لكن في يوم ما اذا انت عايز فعلاً تقدم ليك عمل غنائي فانا ح ارشح ليك صوت نسائي أو حتى رجالي يقدمو ليك وبعد داك على ضمااانتي خش بيهو السوق Deal
Post: #16 Title: Re: يا عمر الفاروق رأيك ضروري في أداء وصوت هذه المطربة Author: Dr. Moiz Bakhiet Date: 06-16-2013, 05:36 PM Parent: #15
Quote: يبدو إنك يا دكتور وحسب ما إستشفيت وفهمت من مداخلاتك هنا إنو إنت ما على علم بي إنو في زولة أعجبت بي نص من نصوصك وغنتو .. فهمي كده صاح؟؟
ده بالضبط الحصل
والنص قدمو ليها د. الماحي سليمان
Post: #18 Title: Re: يا عمر الفاروق رأيك ضروري في أداء وصوت هذه المطربة Author: خالد عبدالوهاب Date: 06-16-2013, 05:52 PM Parent: #16
سلامات يابروف
غايتو حسب اضاني الخاصة الزولة دي مابتعرف تغني .. بل انا بعرف اغني احسن منها .. كما انني ايضا اسمح منها ههههههههههههه
لا بالجد يابروف انتو منار صديق دي يعني ماشايفنها ولا شنو ؟؟ ياخوانا ادوها اغاني وادعموها الزولة المبدعة دي .. والله حرام عليكم :)
تحياتي
Post: #19 Title: Re: يا عمر الفاروق رأيك ضروري في أداء وصوت هذه المطربة Author: مبيوع Date: 06-16-2013, 06:04 PM Parent: #18
تحيه عطره لك اخى بروف معز ولصديقى عمر الفارق والساده المتداخلين... انا استقريت فى الخرطوم... على امل التواصل متى ماعدتم للوطن...
Post: #47 Title: Re: يا عمر الفاروق رأيك ضروري في أداء وصوت هذه المطربة Author: Dr. Moiz Bakhiet Date: 06-19-2013, 06:37 PM Parent: #19
حبيبنا الغالي وفنانا العالي ياسر مبيوع
ألف حمد الله على السلامة
وشوق ممتد بطول النيل
ومين بس زيك يا موعود بالنيل والضل مين بتحدى جوارك ويصبح في بستانك شتلة فل
Post: #20 Title: Re: يا عمر الفاروق رأيك ضروري في أداء وصوت هذه المطربة Author: Osama Mohammed Date: 06-16-2013, 06:04 PM Parent: #18
رغم عدم اقتناعي بعمر الفاروق كناقد او حتى مقييم لاداء احد الموهوبين الا انني اتفق معه في كل ما كتبه . تحياتنا د. معز
ابو سولارا
Post: #22 Title: Re: يا عمر الفاروق رأيك ضروري في أداء وصوت هذه المطربة Author: حيدر حسن ميرغني Date: 06-16-2013, 06:44 PM Parent: #20
ياما في نقاد موسيقى مادرسوا سطر في المعهد ويعتبروا احسن من الدارسين ودونكم اساطين النقد في الوطن العربي وبالتحديد مصر وهذا ليس تقليل من شأن الدارسين الذائقة لما تكون نظيفة تكفي لتقييم اي عمل موسيقي وعندي عمر الفاروق اضانو انظف من بعض المختصين و ربما صراحتو لا تعجب البعض شكرا د معز
Post: #23 Title: Re: يا عمر الفاروق رأيك ضروري في أداء وصوت هذه المطربة Author: امير الامين حسن Date: 06-16-2013, 06:54 PM Parent: #22
Quote: شروق ابوالناس ..
دا مربط الفرس ذاتو !!
Post: #24 Title: Re: يا عمر الفاروق رأيك ضروري في أداء وصوت هذه المطربة Author: سفيان بشير نابرى Date: 06-16-2013, 07:48 PM Parent: #23
Quote: لكن تبلدينا أداك الخلاصة .. غايتو تقييمي ليها إنها شروق ابو الناس ربنا راضي عليها .. :).. خصوصا وإنها قدمت عمل تاني كان مزعج وصوتا فيهو كان مزعج لو ما خانتني الذاكرة .. غايتو يا بروف إختيارك لي الفنانات شكلو زييي الإستاندرد بتاع ناس قناى النيل الأزرق والجزيرة في اختيار المزيعات .. عندهم قالب كده واااحد .. أسة غايتو إنت لحدددي اسة عندك قااالب واحد حق فنانات ..صوتن وشكلن واااحد ..
سلام يا بروف و صراحة عمر الفاروق اداك النجيضة حسب سمعو و شوفو و انا بتفق معاهو في كل كلامو الفوق دا و بقول لعمر كلامك صاح الزولة دي فعلاً الأغنية التانية القدمته كانت مزعجة خالص خالص . و عايز اقول لصديقي العزيز عبد العزيز خطاب (بعد التحية) يا خطاب كان ممكن اتفق معاك انو الزولة دي محتاجة شغل كتير في التمارين و التكنيك بتاع الآداء بس صدقني يا خطاب الكلام دا بعد كدا مابنفع و السبب نفسو هو أنو زول زي أستاذنا الماحي (و أساتذه كبار ملحنين و شعراء) بيدوا الفنانين المبتدئين الأعمال الملحنة و يقولوا ليهم (انطلقوا) بدون ما (يحرصو) في البداية على أن يجبروهم على ضرورة التجويد و التمرن ... عشان كدا اول ما الفنان/ه يظهر في التلفزيون أو يتسمع في الإذاعة و يقبض عداد الحفلات تاني مافي حاجة (بتقرعو) كلو كلو و تاني ما ممكن يقتنع بأنو لسه قدامو كتيييييير .... و وجع القلب بيجينا نحن ديل و لو عايز امثلة ممكن اديك 10 الف مثال لناس زي ديل شكر الله لن يكون اولهم و هبة حسبو لن تكون اخرهم .
سلام و محبة .
Post: #25 Title: Re: يا عمر الفاروق رأيك ضروري في أداء وصوت هذه المطربة Author: عزيز Date: 06-16-2013, 08:55 PM Parent: #24
والله يا أحباب صراحتكم ناشفة
أنا فقط سمعت كوبليه واحد من الأغنية المرفوعة.
ودكتور الماحي أستاذي وهو من منحها العمل .
والموسيقيين يعلمون ماذا تعني كلمة الزول ده داير شغل كتيييير !!
وكلمتين يجي منها .. اقصد مقومات قبول الفنانة في السودان الشقيق!!
أنا لا اسمع بأذني وأمامي قواعد صارمة تقيم الصوت. فهو تخصصي الوحيد في هذه الفانية.
سفيان يا صديق منتظرك
Post: #26 Title: Re: يا عمر الفاروق رأيك ضروري في أداء وصوت هذه المطربة Author: Tabaldina Date: 06-16-2013, 09:02 PM Parent: #25
.. . الواحد يجيب الديب من ديلو .. فينسب لشجاعة عمر .. فتامل ..!
-------------
حسي يرجى منها .. ولا سوف يأفل نجمها قبل ان تبدأ ..يا عمر .. :)
Post: #27 Title: Re: يا عمر الفاروق رأيك ضروري في أداء وصوت هذه المطربة Author: نافع الكوماوي Date: 06-16-2013, 09:09 PM Parent: #24
سلام د.معز وضيوفه الأكارم
أنا شايف الزولة دي بتغني بكل أحاسيسها وعايشة مع الأغنية مية المية رغم الكلام دا وجمال اللحن والكلمة إلا إنو الأداء بتاعها تعبان وصوتها عادي شخصياً لا أتنبأ لها بمستقبل في الوسط الفني مع تقديري للجميع
Post: #30 Title: Re: يا عمر الفاروق رأيك ضروري في أداء وصوت هذه المطربة Author: عمر الفاروق Date: 06-16-2013, 10:06 PM Parent: #27
يا تبلدينا ياخ ما تزعل خلاص انا سكتت :)
Post: #31 Title: Re: يا عمر الفاروق رأيك ضروري في أداء وصوت هذه المطربة Author: Tabaldina Date: 06-16-2013, 10:25 PM Parent: #30
.. . معقولة بس ,, يا عمر .. يكفينى اتفاقنا ان نتفق فى ان هذه صورة بالكربون من تلك .. ويزيدنى عجباً وتسائلا احيله لك عبر هذه الجملة ..
Quote: إستمعت لهبة حسبو قبل ثلاث سنوات فيها شئ من فيروز
لا اود ان اكون " عكليتا " ولكن لا ادرى اين هذا الشئ هل هو الصوت ام الاداء بلاشك استبعد الصورة .. -------
حقيقة مع احترامى لوجهه نظر منتصر زكى ولكننى بهذه الصورة سوف اقلع عن الاستماع لفيروز وام كلثوم .. ونانسى عجرم كذلكـ :)
Post: #32 Title: Re: يا عمر الفاروق رأيك ضروري في أداء وصوت هذه المطربة Author: humida Date: 06-16-2013, 10:32 PM Parent: #31
عاين يا بروف .. ان كان و لابد .. ادي قصايدك دي للسارة .. ايوه و الله .. لانها بتغني للناس عندهم اهتمامات آخري غير جودة الصوت .. بهتموا بتقديم ثقافة تانية .. بس ..
Post: #33 Title: Re: يا عمر الفاروق رأيك ضروري في أداء وصوت هذه المطربة Author: عمر الفاروق Date: 06-16-2013, 10:32 PM Parent: #31
نانسي عجرم تقلع عن مشاهدتها ما الإستماع إليها .. :) :) :)
Post: #34 Title: Re: يا عمر الفاروق رأيك ضروري في أداء وصوت هذه المطربة Author: عمر الفاروق Date: 06-16-2013, 10:43 PM Parent: #33
زمااان يا دكتور معز لمن انت واستاذ الموصلي كنتو مركزين مع شروق شدييد ومصرين إنو دي النقلة النوعية في الغناء السوداني و و و انا قمت لفتكم لي صوت وقتها كان قدّم ليهو تسجيل في تلفزيون السودان وقلت ليكم أمشو فتشو البت دي وقدمو ليها الأعمال لأنها ممكن تظهر ليكم مشروعكم الغنائي ده .. الزولة دي كانت بت الفنان ابراهيم خوجلي ..ووقتها انا كنت بالصدفة حضرت تسجيل لي حلقة مع المتفوقات أوائل الشهادة وتقريباً كانوا من مدرسة إدريس ( وهو عازف أورغن كفيف ).. طبعاً انا متأكد البت دي بتكون ما شغالة بي الغنا الشغلة ومركزة مع قرايتا فقط .. ورغماً عن كده الفطرة والموهبة في صوتها واااضحة .. دي يا خطّاب يا عزيز اللي بيقولوا لو لقت زول يشتغل معاها حبببة ممكن يجي منها ..لكن طبعاً اللي زيها بتكون إهتمامتها أكبر من إنها تظهر في النيل الأزرق عبر برنامج نجوم (القد) أو عبر مساء جديد أو أو ..
Post: #35 Title: Re: يا عمر الفاروق رأيك ضروري في أداء وصوت هذه المطربة Author: صبري طه Date: 06-17-2013, 07:37 PM Parent: #34
تسلم يا بروف يا حبيب ...
Quote: بصراحة يا صبري طه
انت زول فنان ونقي وجميل
وأدّيك ظاهرة لاحظتها بشكل واضح في سودانيز أونلاين دوت كوم دي
لكي تأتي الكثير من التعليقات سلبية يكفي أن يكون رأي أوّل مُتداخل أو أوائل المُتداخلين سلبي خاصة وإن كانوا ممّن لهم شعبية كبيرة ...
لذا أنصح بالرد على أيّ موضوع إذا تضمّن استطلاع رأي عام قبل قراءة ردود الآخرين .. ودا عشان الناس لو كانت معانا ما تغيّر رأيها وتبقى مع غانا .. ولو كانت غانا بقيادة عبيدي بيليه ذاتو ...
ــــــــــ في أحد المنتديات كُنت أحجب نتيجة الاستطلاع قبل الاختيار .. حتى لا تؤثر في رأي المُستطلعين
Post: #36 Title: Re: يا عمر الفاروق رأيك ضروري في أداء وصوت هذه المطربة Author: سفيان بشير نابرى Date: 06-17-2013, 11:26 PM Parent: #35
Quote: وأدّيك ظاهرة لاحظتها بشكل واضح في سودانيز أونلاين دوت كوم دي
أنا يا بروف اديك ظاهرة اظهر من حقت صبري دي ؟ اول مرة صبري يكتب بدون ما يختم بسؤال .
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــ صبري دا ماسورة شجع البارشه برشه اعمل حسابك منو
Post: #37 Title: Re: يا عمر الفاروق رأيك ضروري في أداء وصوت هذه المطربة Author: Tabaldina Date: 06-17-2013, 11:44 PM Parent: #36
.. .
Quote: وأدّيك ظاهرة لاحظتها بشكل واضح في سودانيز أونلاين دوت كوم دي
لكي تأتي الكثير من التعليقات سلبية يكفي أن يكون رأي أوّل مُتداخل أو أوائل المُتداخلين سلبي خاصة وإن كانوا ممّن لهم شعبية كبيرة ...
يعنى طلعت كل المعلقين ديل اذيال وإمعات .. وما عندهم راى كماان ..
-------------
اها اوريك ظاهرة جديدة اول زول يشدها ليك الباقين كلهم بشدوها ليك خصوصا لو كان من القدامى .. :)
Post: #39 Title: Re: يا عمر الفاروق رأيك ضروري في أداء وصوت هذه المطربة Author: صبري طه Date: 06-18-2013, 06:55 PM Parent: #37
Quote: اها اوريك ظاهرة جديدة اول زول يشدها ليك الباقين كلهم بشدوها ليك خصوصا لو كان من القدامى .. :)
وأورّيك ظاهرة تانية وهي .. بعد دا موضوع البوست حأبقى أنا والناس حتنسى موضوع البوست ذاتو كان شنو !!
ــــ نرجع لي موضوع البوست .. هبة حسبو صوتها فيهو تطريب بخلّي عمّك حسبو يشتّت قصبو إنت أوّل حاجة لو ما بتسجر سجائر أحمر أو أصفر أشرب ليك سيجارة من قصب عمّك حسبو واستمع ليها احتمال تغيّر رأيك ...
Post: #45 Title: Re: يا عمر الفاروق رأيك ضروري في أداء وصوت هذه المطربة Author: Tabaldina Date: 06-18-2013, 09:29 PM Parent: #39
.. .
Quote: وأورّيك ظاهرة تانية وهي .. بعد دا موضوع البوست حأبقى أنا
يبقى بوست ما عنده .. موضوع .. قرقر قرقر قرقر
-------------
80% من المتداخلين لهم راى عكس رأيك .. انت مصر تخلق من الفسيخ شربات .. عموما انا ما بشرب ممكن تلف لى واحدة عشان راسى يلف زيك واقدر استوعبها معاكـ ..
Post: #38 Title: Re: يا عمر الفاروق رأيك ضروري في أداء وصوت هذه المطربة Author: صبري طه Date: 06-18-2013, 06:48 PM Parent: #36
Quote: اول مرة صبري يكتب بدون ما يختم بسؤال .
هو لا يُسأل .. وهُم يُسألون
Post: #40 Title: Re: يا عمر الفاروق رأيك ضروري في أداء وصوت هذه المطربة Author: صبري طه Date: 06-18-2013, 07:13 PM Parent: #38
أولاً يا عُمر الفاروق .. نعم شهرياز غنّت هذه الأغنية بتطريب جميل .. وقد كُنت أنا من أوائل الذين جلبوا اليوتيوب الذي أرفقته أنت في مُداخلتك ...
Quote: عُمر الفاروق كتب: طبعاً انا متأكد البت دي بتكون ما شغالة بي الغنا الشغلة ومركزة مع قرايتا فقط .. ورغماً عن كده الفطرة والموهبة في صوتها واااضحة .. دي يا خطّاب يا عزيز اللي بيقولوا لو لقت زول يشتغل معاها حبببة ممكن يجي منها ..لكن طبعاً اللي زيها بتكون إهتمامتها أكبر من إنها تظهر في النيل الأزرق عبر برنامج نجوم (القد) أو عبر مساء جديد أو أو ..
ورغم ذلك هل ستتفق معي في أنّها لو شاركت في جميع المُسابقات السابقة من برنامج نجوم الغد لما أحرزت المركز الأول ؟
إذا شاركت في مُسابقة هذا العام لما تفوقت على رامي عمر أو العمرابي إذا شاركت في مُسابقة العام الماضي لما تفوقت على شذى عبدالله ومحمد خير إذا شاركت في الدفعة التي فازت بها فهيمة عبدالله لما تفوقت على فهيمة أو حتى شموس إبراهيم إذا شاركت في الدفعة التي فاز بها أحمد المأمون جفون لما تفوقت عليه إذا شاركت في الدفعة التي كانت بها عافية حسن لما تفوقت على عافية حسن
لو عايز تتأكد من سمعي أسمعها في الفيديوهين أدناه:-
Post: #41 Title: Re: يا عمر الفاروق رأيك ضروري في أداء وصوت هذه المطربة Author: عمر الفاروق Date: 06-18-2013, 07:17 PM Parent: #40
يا صبري يا اخوي اسمعا مني ..نجوم (القد) ده من بعد عافية ما ضاق العافية وما جاب ليهو صوت ساحر ومميز ومختلف .. اللستة الجبتها لي دي ومع احترامي لي كل الاراء ..ده تلتخ بيهو ده ..
Post: #42 Title: Re: يا عمر الفاروق رأيك ضروري في أداء وصوت هذه المطربة Author: سفيان بشير نابرى Date: 06-18-2013, 07:20 PM Parent: #41
Quote: ورغم ذلك هل ستتفق معي في أنّها لو شاركت في جميع المُسابقات السابقة من برنامج نجوم الغد لما أحرزت المركز الأول ؟
Post: #44 Title: Re: يا عمر الفاروق رأيك ضروري في أداء وصوت هذه المطربة Author: Kostawi Date: 06-18-2013, 07:46 PM Parent: #42
يا دكتور سلام و ليك وحشة
البت دي عندها ملكات صوتية ما بطالة هي عملت العليها في الغنية هي مقيدة بلحن الغنية
المقدرات الصوتية بتطلع في أغاني معينة يعني مثلا رائعة وردي "بناديها" و هي من الأغاني الممكن يمتحنوا بيها الأبعاد و الإمكانيات الصوتية يعني في فرق بين الشارع الناعم الخشونة و الشارع الوعر أو خشن الخشونة البت وظفت حبال صوتها الرهيف خير توظيف و لكن لحن الغنية لم يمتحن حبال صوتها الغليظ و المرتفع و عليه أنا ممكن أعطيها 80% في الصوت المنساب الرهيف ذو الخشونة الناعمة و ما بقدر أن أعطيها درجة في الصوت الوعر ذو الخشونة الخشنة لأني ما سمعتو! و لم تمتحن فيه في تلك الغنية
Post: #43 Title: Re: يا عمر الفاروق رأيك ضروري في أداء وصوت هذه المطربة Author: صبري طه Date: 06-18-2013, 07:28 PM Parent: #41
Quote: يا صبري يا اخوي اسمعا مني ..نجوم (القد) ده من بعد عافية ما ضاق العافية وما جاب ليهو صوت ساحر ومميز ومختلف .. اللستة الجبتها لي دي ومع احترامي لي كل الاراء ..ده تلتخ بيهو ده ..
على العموم إنت وسمعك ...
عزيزي القارئ .. أخونا عُمر الفاروق بقول الفي اليوتيوب الفوق دا يلتخوا بيهو دا ...
ويُمكنكم مُتابعة أحمد المأمون جفون في برنامج أغاني وأغاني لهذا العام ...
Post: #63 Title: Re: يا عمر الفاروق رأيك ضروري في أداء وصوت هذه المطربة Author: Dr. Moiz Bakhiet Date: 06-21-2013, 09:05 AM Parent: #22
الحبيب حيدر حسن ميرغني،
تحياتي وعميق مودتي لك يا حيدر
ومنور والله
Post: #53 Title: Re: يا عمر الفاروق رأيك ضروري في أداء وصوت هذه المطربة Author: Dr. Moiz Bakhiet Date: 06-20-2013, 01:50 PM Parent: #20
مشتاقين يا أبو سولارا والله
وين الغيبة الطويلة؟
تحياتي الحارة لك..
Post: #46 Title: Re: يا عمر الفاروق رأيك ضروري في أداء وصوت هذه المطربة Author: Dr. Moiz Bakhiet Date: 06-19-2013, 02:57 PM Parent: #18
تحياتي الحارة يا خالد عبد الوهاب
Quote: بل انا بعرف اغني احسن منها .. كما انني ايضا اسمح منها ههههههههههههه
والله كان كده انت زول غناي تب
ومكمل السماحة بالتأكيد.. (وجه مبتسم) ههههه
ومنار صديق برضو غناية
يديك العافية يا حبيب
Post: #48 Title: Re: يا عمر الفاروق رأيك ضروري في أداء وصوت هذه المطربة Author: usama Babiker Date: 06-19-2013, 06:56 PM Parent: #46
ده اجمل صوت مرة على نجوم الغد من بداياته وللاسف انظلمت .. وهي بحق صوته اجمل من فهيمة بمراحل رغما عن ذلك اخدت فهيمة المركز الاول وبذلك فرطنا في هذه الموهبة الفذة ..
Post: #49 Title: Re: يا عمر الفاروق رأيك ضروري في أداء وصوت هذه المطربة Author: محمد حيدر المشرف Date: 06-19-2013, 07:54 PM Parent: #48
أغنية جميلة لحنا وأداء ..
اقول قولي هذا مع تحفظي الشديد علي فكرة البوست .. وأثبت احترامي لرأى الأساتذة هنا .. وأتمني لهذه المطربة الاستمرار في تقديم أعمال جيدة كهذه .. كما كنت أتمني للصديقة العزيزة شروق ابوالناس " مادام جات السيره " أن تستمر بعد البوم عافية المطر وأغنياته الجميلة .. كان ذلك ليضيف للمكتبة الغنائية البوم او إثنين أو أكثر .. ربما ؟!!
Post: #50 Title: Re: يا عمر الفاروق رأيك ضروري في أداء وصوت هذه المطربة Author: SAWO Date: 06-20-2013, 05:31 AM Parent: #49
.
Post: #51 Title: Re: يا عمر الفاروق رأيك ضروري في أداء وصوت هذه المطربة Author: وليد محمد المبارك Date: 06-20-2013, 07:51 AM Parent: #50
Quote: عمر الفاروق بلدي ربطوه و أشحنوه في قطر النقل و أجدعوه في ديار بحر أبيض و بعد داك عالجوه بضرب القرع في الطشت الملان موية
ما تنسوا "السيقار" و فنجان "الويسكي" و "لولية"
Post: #52 Title: Re: يا عمر الفاروق رأيك ضروري في أداء وصوت هذه المطربة Author: Sayed Bekab Date: 06-20-2013, 10:45 AM Parent: #51
يا بروف بعد السلام و التحية ..... لها التحية لكن الصوت ما قدر كده .
Post: #54 Title: Re: يا عمر الفاروق رأيك ضروري في أداء وصوت هذه المطربة Author: مزمل خيرى Date: 06-20-2013, 03:03 PM Parent: #50
يا SAWO الكلام القلتو دة راي المنظمة ولا رأيك الشخصى ؟ والله ياعمر المنظمات بقت ترش فيك ... التحية للزوار وليك يادكتور ...
Post: #55 Title: Re: يا عمر الفاروق رأيك ضروري في أداء وصوت هذه المطربة Author: elsawi Date: 06-20-2013, 05:19 PM Parent: #54
سلام دكتور معز وسلامات لضيوفك تعرف انا شفت البوست ده قبال كم يوم و لم ادخله و قلت لنفسي البروف داير رأي عمر الفاروق "نحن ما خصانا" الليلة جيت لقيت البوست عمل صفحتين، وقلت معقول الصفحتين ديل كلهم رأي عمر الفاروق فقمت اتوكلت على الحي الدائم و دخلت و لقيت كل الشباب ما شاء الله يفتوا ساي و (الغريبة كمان) لقيت عمك كوستاوي متجدع و بقى يفتي في طبقات الصوت و الأبعاد الصوتية (سبحان الله) و الله بالطريقة دي يا دكتور كوستاوي بكرة حا يجي يفتي ليك في طبك ده ذاتو، اسمع نصيحتي النوع ده ما تديهو فرصة.
بالنسبة للأغنية فهي جميلة للغاية الكلمات رائعة و بسيطة و شجية تنقلك برفق من ضفة البعد و الولع و الدموع لتعبر بك بسلام لضفة الأمل و اللقيا و تدلف بك عبر باب الفرح و الهوى و الأمل في اللحظة صاح.
اما اللحن ما اظن في اجمل من كدة، اللحن هادئ وبه لمسة من حزن لا تخطئها اذن و جعل الكلمات تنساب بسلاسة تزفها موسيقى تبحر بك في عوالم العشق و الوجد و الهوى، و فعلاً كان اللحن مناسباً جداً مع كلمات الأغنية و معبراً عنها.
اها نجي لي المطربة هبة حسبو، واضح جداً انه عندها امكانيات صوتية جيدة و يجي منها، اعجبني اندماجها مع الكلمات و اللحن اثناء الأداء لكن ممكن اقول انه الكلمات فرضت نفسها على اللحن و اللحن و الكلمات فرضوا نفسهم على الأداء فطغى طابع الحزن و الهدوء على الأغنية، عموماً انا لم احضر الحلقة و لم اسمع من هبة حسبو سوى هذه الأغنية و بالتالي يكون من الصعب الحكم عليها من خلال اغنية واحدة بلحن قيد ادائها لحد كبير، لكن النجيضة انه هبة عندها امكانيات صوتية جيدة و لو وجدت من يهتم بها من الموسيقيين لشقت طريقها في عالم الفن و الغناء.
Post: #56 Title: Re: يا عمر الفاروق رأيك ضروري في أداء وصوت هذه المطربة Author: سفيان بشير نابرى Date: 06-20-2013, 05:28 PM Parent: #55
Quote: سلام دكتور معز وسلامات لضيوفك تعرف انا شفت البوست ده قبال كم يوم و لم ادخله و قلت لنفسي البروف داير رأي عمر الفاروق "نحن ما خصانا" الليلة جيت لقيت البوست عمل صفحتين، وقلت معقول الصفحتين ديل كلهم رأي عمر الفاروق فقمت اتوكلت على الحي الدائم و دخلت و لقيت كل الشباب ما شاء الله يفتوا ساي و (الغريبة كمان) لقيت عمك كوستاوي متجدع و بقى يفتي في طبقات الصوت و الأبعاد الصوتية (سبحان الله) و الله بالطريقة دي يا دكتور كوستاوي بكرة حا يجي يفتي ليك في طبك ده ذاتو، اسمع نصيحتي النوع ده ما تديهو فرصة.
بالنسبة للأغنية فهي جميلة للغاية الكلمات رائعة و بسيطة و شجية تنقلك برفق من ضفة البعد و الولع و الدموع لتعبر بك بسلام لضفة الأمل و اللقيا و تدلف بك عبر باب الفرح و الهوى و الأمل في اللحظة صاح.
اما اللحن ما اظن في اجمل من كدة، اللحن هادئ وبه لمسة من حزن لا تخطئها اذن و جعل الكلمات تنساب بسلاسة تزفها موسيقى تبحر بك في عوالم العشق و الوجد و الهوى، و فعلاً كان اللحن مناسباً جداً مع كلمات الأغنية و معبراً عنها.
اها نجي لي المطربة هبة حسبو، واضح جداً انه عندها امكانيات صوتية جيدة و يجي منها، اعجبني اندماجها مع الكلمات و اللحن اثناء الأداء لكن ممكن اقول انه الكلمات فرضت نفسها على اللحن و اللحن و الكلمات فرضوا نفسهم على الأداء فطغى طابع الحزن و الهدوء على الأغنية، عموماً انا لم احضر الحلقة و لم اسمع من هبة حسبو سوى هذه الأغنية و بالتالي يكون من الصعب الحكم عليها من خلال اغنية واحدة بلحن قيد ادائها لحد كبير، لكن النجيضة انه هبة عندها امكانيات صوتية جيدة و لو وجدت من يهتم بها من الموسيقيين لشقت طريقها في عالم الفن و الغناء.
يا جماعة سررررريع واحد يفتي لينا في كلام صابي الصاوي دا ههههههه اسرعو ياخ لانو الفتوة بتاعي في طرف اصبعي دا .
يا صاوي و الله مشتاقين ياخ
Post: #57 Title: Re: يا عمر الفاروق رأيك ضروري في أداء وصوت هذه المطربة Author: Kostawi Date: 06-20-2013, 05:39 PM Parent: #56
هي يا ناس الكلام دا كتبتو أنا
أنا و SAWO بنستعمل نفس الكمبيوتر و ما كنت ملاحظ إنو دخلت بالحساب داك فيا وليد و المعاه دا شفوا ليكم شغلة تانية
الأولاد خطرين جدا و قبضوا ليهم غنيمة _____________________________________________ الصاوي: رش الجماعة ديل بلا فاروق بلا لمة
Post: #58 Title: Re: يا عمر الفاروق رأيك ضروري في أداء وصوت هذه المطربة Author: سفيان بشير نابرى Date: 06-20-2013, 05:43 PM Parent: #57
Quote: الصاوي: رش الجماعة ديل بلا فاروق بلا لمة
هوووووي يا خردة هووووي الصاوي دا رشك انت اول شئ شنووووو هو شوف ما بتشوف !!! ههههههههههههههه الصاوي عليك الله الكرمبا دا اعفيهو ياخ هههههههههه كاااااااااااااااااااااك
Post: #59 Title: Re: يا عمر الفاروق رأيك ضروري في أداء وصوت هذه المطربة Author: elsawi Date: 06-20-2013, 05:52 PM Parent: #58
Quote: هوووووي يا خردة هووووي الصاوي دا رشك انت اول شئ شنووووو هو شوف ما بتشوف !!!
سلامات يا سفيان و مشتافين ياخ عمك ده معذور يا كافي البلا لا عيون لا اضنين بالمناسبة الكرمبا ده لو دكتور معز اداهو فرصه بكرة بجينا لابس سماعة وعامل فيها اخصائي جراحة مخ و اعصاب
Post: #60 Title: Re: يا عمر الفاروق رأيك ضروري في أداء وصوت هذه المطربة Author: Kostawi Date: 06-20-2013, 06:51 PM Parent: #59
Quote: هوووووي يا خردة هووووي الصاوي دا رشك انت اول شئ شنووووو هو شوف ما بتشوف !!! ههههههههههههههه الصاوي عليك الله الكرمبا دا اعفيهو ياخ هههههههههه كاااااااااااااااااااااك
العريس القديم...كيف حالك يا أخوي الصاوي أنت ما بتعرفو دا رش ليك ود الفاروق لغاية ما جاب الدم
و أكد كلامي القلتو بس هو دخل فيه لحن بالكمنجة
رشهم يا الصاوي الناس دي ما عندها عضنين
بت حسبو دي أنا عايزها تغني لي "بناديها" عشان تطلعو كلو
Post: #61 Title: Re: يا عمر الفاروق رأيك ضروري في أداء وصوت هذه المطربة Author: عمر الفاروق Date: 06-20-2013, 07:18 PM Parent: #60
كدي يا كوستاوي ورينا غير Sow مشاركك منو تاني في الكمبيوتر ده يا اخوي ؟؟؟ عشان الواحد تاني يفرز يرد على منو وكيف.. اسة بكرة اقوم اشاكل وضاحة تقوم تجي تعتذر انت ..الظروف ما معروووفة والله والطب إتطوووور
Post: #62 Title: Re: يا عمر الفاروق رأيك ضروري في أداء وصوت هذه المطربة Author: سفيان بشير نابرى Date: 06-20-2013, 07:48 PM Parent: #60
Quote: يا أخوي الصاوي أنت ما بتعرفو
يا الكرمبا عرفتي بالصاوي خلها ههههههه اهو دا كلامو :-
Quote: سلامات يا سفيان و مشتافين ياخ عمك ده معذور يا كافي البلا لا عيون لا اضنين بالمناسبة الكرمبا ده لو دكتور معز اداهو فرصه بكرة بجينا لابس سماعة وعامل فيها اخصائي جراحة مخ و اعصاب
اها السماعات جاهزة ولا الا تشوف النضارة كااااااااااك
ــــــــــــــــــــــــــــــــــــــــــــــــــــــــــــــــــــــــــــــــــــــــــــــ و حشة شديدة يا صاوي ياخ
Post: #64 Title: Re: يا عمر الفاروق رأيك ضروري في أداء وصوت هذه المطربة Author: Kostawi Date: 06-21-2013, 07:16 PM Parent: #62
Quote: كدي يا كوستاوي ورينا غير Sow مشاركك منو تاني
معانا بس دينا خالد
يعني Kostawi Sow دينا خالد
أها أنت معاك منو?
Post: #65 Title: Re: يا عمر الفاروق رأيك ضروري في أداء وصوت هذه المطربة Author: بابكر قدور Date: 06-22-2013, 08:38 PM Parent: #64
أخي البروف معز لك الود والتحايا الطيبات ماشاء الله على البنية واعدة ويرجى منها ولكنها تحتاج إلى مزيد من الرعاية والتوجيه .... راجعت النص بعد السماع الأول لصوتها .. بغرض مقارنة البلاغة الصوتية في كلماته (موسيقى الحروف الموجودة في كلمات القصيدة) مع التطريب المنساب من صوتها .. فوجدت النص كالعادة غني جداً بالموسيقى المختلفة فيه لدرجة أنه يسمح لكثير من أنواع الأصوات أن تغنيه .. باستقراء كلمات البيت الأول من القصيدة "طلعني منك ياشجن" لوجدنا أن حرف النون في كل كلمة فيه وفيه الألف اللينة في كلمة "طلعني" ولوجدنا نون عليها تشديد في كلمة "منك" ثم ألف مد في الكلمة الأخيرة مع حرف نون ساكن .. وكل هذه الحروف تشكل مراكز يقف عندها صوت الفنان لتتدفق إمكانياته الصوتيه من خلالها .. فلو سمعنا أداء البنت لهذا البيت لوجدنا أنها كررت هذا البيت مرتين .. إستفاد صوتها من بعض هذه الحروف بإمكانيات تختلف في كل مرة .. ففي المرة الأولى توقف صوتها بطرب ملحوظ في النون المشددة في كلمة "منَّك" ثم توقف في ألف المد في كلمة ياشجن مخرجاً جزءاً آخر من التطريب ثم توقف في النون الأخيرة لنفس الكلمة .. وفي تكرار البيت للمرة الثانية إزداد التطريب بدرجة مدهشة خاصة عندما تردد صوتها في ألف المد المرافق للياء في كلمة "ياشجن" .. هنا أستطيع أن أقول أن هبة تمتلك قدرات صوتية عالية مليئة بالتطريب .. وهذا الصوت يشكل صوت مميز لها .. ثم يجئ أدائها الصوتي للمقطع "واحميني من وجعي العنيد" بتطريب كأنه تكملة للتطريب العالي في الجزء الأول .. ثم تنتقل للمقطع "وامسح دموع هطلت زمن .... واسجني في الفرح البعيد" ليسكب صوتها تطريباً رائعاً في الواو الممدود في كلمة "دموع" ثم في كل حروف كلمة "زمن" واستغل صوتها جمال حرف الزاى برنته المعهودة فيه واستغل الغنة الموجودة في حرف الميم وحرف النون مما استدعى التطريب تكرار هذه الكلمة بكل جمالياتها .. كما نلاحظ أن هذا المقطع يحتوي على كلمة صعبة الأداء وهي كلمة "هطلت" وقد أدتها الفنانة بطريقة غاية في الروعة تجعل كل من يركز في صوتها يتوصل من أدائها لهذه الكلمة أنها تمتلك بجانب جمال الصوت موهبة حسن مخرج الحروف لديها .. وهكذا لو تتبعنا هذا الصوت الرائع في كل كلمات القصيدة لحكمنا بأنها تملك صوتاً جميلاً متفرداً يؤهلها للزحف نحو عرش الفن .. بقي أن نشير إلى خطأ واحد صاحب الأداء ولا أدري كيف فات هذا الخطأ على دكتور الماحي وهو إخراج كلمة "وتر" في المقطع "وشديت وتر صبري الهميم" رغم وجود مد في الكلمة التي سبقته ووجود تشديد ووجود ألف لينة في الكلمة التي بعده .. بالإضافة لوجود حرف الراء في الكلمة نفسها وهو حرف بطبعه مكرر في نطقه ويمكن للصوت أن يقف عنده مسافة يخرج فيها التطريب ولكن بدلاً من الوقوف في أحد هذه الحروف نجدها قد توقفت في حرف الواو وحرف التاء معاً وخلقت مداً في حركة الفتح المصاحبة لكل حرف مما أوقعها في خطأ أدائي فادح .. وهذا ماجعلني أقول في مقدمة ردي هذا أن البنت تحتاج إلى رعاية وتوجيه .. فهي أحوج ماتكون إلى ترديد وحفظ أعاني الفنانين الكبار الراسخة حتى تتفادى مثل هذا الخطأ .. وفي الختام البنت تمتلك صوت رائع طروب لو سسار في الطريق السليم فستشكل رقماً في الفن السوداني .. تحياتي وودي وتقديري ومحبتي بروف معز ....
