ما في بيع إلا بالدين

ما في بيع إلا بالدين
حاج فضل صاحب "كنتين" صغير في قرية جميع أهلها فقراء،وكان حريصا جدا لا يبيع بضاعته إلا "بالكاش" ولا يقبل البيع "بالدين" بتاتا. ذات يوم جاءته امرأة معدمة وطلبته أن يبيعها " وقية" بن و "ربع" رطل سكر . وزن حاج فضل البن والسكر ولم يوف الميزان حقه . ناول المرأة البضاعة وسألها ثمنها. إعتذرت المرأة وقالت: " ما عندي قروش والجبنة رامياني وعاملة لي وجع راس شديد ومن "القريفة" ما قادرة أشوف، باكر كان الله رزقني ورحمة الله جاتني بديك قروشك" ، لم يدع حاج فضل المرأة تكمل كلامها، وبسرعة خطف " شوية" البن والسكر من يدها وقال بلؤم: " أنا ما فاتح دكاني جمعية تعاونية". لم ترد المرأة بكلمة واكتفت بالنظر إلىه طويلا و سالت دمعة من عينيها وانصرفت. لم يهتم حاج فضل بأمرها وقال محدثا نفسه " ناس ما بتختشي التقول البضاعة دي بنشتريها ببلاش ".
لم يمض يومان ، فاضطر حاج فضل للسفر لأداء واجب العزاء في وفاة قريب له في البلد. ومن ثم جاء دون إستحياء وسلم مفتاح متجره للمرأة التي أساء معاملتها ولم يبعها بالدين وقال محذرا: " اسمعيني كويس أنا مسافر البلد عشان عندي قريبي مات، وما برجع إلا بعد إسبوع، أوعى تفتحي الدكان وتاخدي ليك منه حاجة، بضاعتي أنا عارفها كويس وحاسبها بالحبة، حتى السكر والدقيق عارف وزنهما ، المهم أنا وريتك وكان جيت ولقيت حاجة ناقصة ما تلومي إلا نفسك" . رمى لها المفتاح وانصرف. أخذت المرأة المفتاح وقالت: " الله يهديك يا حاج فضل".
في نفس اليوم ليلا جاءتها جارتها المسكينة وقالت: " أولادي ما قادرين ينوموا من الجوع وبيتنا ما فيهو غير موية "كراد" في قعر الزير ، دحين يا اختي ما عندك لي أي حاجة أسكت بيها أولادي؟ تأثرت المرأة لكلامها وبحثت في بيتها لعلها تجد قطعة "كسرة" ناشفة أو عقاب " روب" إلا أنها لم تجد شيئا . تذكرت المرأة مفتاح الدكان فأخذته بدون خوف أو تردد ولم تأبه لتحذير حاج فضل . فتحت الدكان وأتت بثلاثة أكياس شعيرية وقليل من السكر والزيت واعطتهم لجارتها. وقالت : أمشي عشي أولادك . ولما وضعت رأسها لتنام جاءها طيف حاج حمد غاضبا يتوعد. فنهضت من فراشها وطار النوم من عينيها وكاد الخوف أن يعصف بها . أخذت تسبح وتدعو الله أن يكفيها شره.
عاد حاج فضل من سفره وكان الوقت ليلا متأخرا والناس نيام، فذهب مباشرة إلى منزل المرأة وأيقظها من النوم وأخذ المفتاح وذهب. قبل شروق الشمس من صباح الغد ،جاءها حاج فضل هادئا مبتسما وسألها بنبرة هادئة: " الفتح دكاني منو؟" خافت المرأة وقالت بصوت متقطع : ما في زول فتحو! ضحك حاج فضل وقال :كيفن ما في زول فتحو والرفوف كلها مرصوصة شعيرية وشوالات السكر وصفائح الزيت منقطرة من الأرض للسقف ، اطمأنت المرأة "وجرت" نفسها وقالت بثقة: أنا الفتحت الدكان وقصت عليه قصة جارتها المسكينة، فأخذ يبكي بأعلى صوته وسلم عليها في رأسها وسألها العفو والسماح فسامحته. تفاجأ أهل القرية في صباح اليوم التالي وهم يقرأون ما خطه حاج فضل على "لافتة " كبيرة علقها على باب دكانه مكتوب عليها "من اليوم ورايح ما في بيع إلا بالدين".

قرأت على ورقة كرتون معلقة على خلفية صاحب مغلق بمنطقة كوبر مكتوب عليها انا حمار
وعندما استفسرته قال لى انا حمار حتى تدفع لى ثمن الفاتورة غير منقوص وبالتالى ينتفى الشرط باستلام كل مبيعاته نقداً
فضحكت
وقد انتشرت عبارة التاجر الحنين ,وسار بها الركبان
(الديون حرمتنا من رؤية الكثيرون فلا تحرمونا من رؤيتكم )
الزمن دا كان عايز تفقد زول ديّــنوا يالحبيب
:
:
:
:
:
:
:
:
مع التحيات لله الزاكيات

الأخ محمد
سلام
حبابك عشرة بلا كشرة وأنت تمر من هنا
قصص الدين كثيرة وطريفة على أمل أن يأتينا الأخوان والأخوات بالطرائف مثل صاحبك "سيد" المغلق
سمعت خالي عبد الله رحمه الله يقول: ثلاثة في وثلاثة ما في:
1. البدينو في والبحلو ما في
2. النصيحة في والبمرقه ما في
3. نسيتها

شكرا أخي محمد على المرور والمشاركة الظريفة.

صحيح البدينو في والبحلو ما في على قول خالي عبد الله

سلام يابلة
أولاً ياخي كلمة (كُرَّادة) دي نكتها من وين ؟ ياخ إنت زول أصلي.
تاني حاجة: قصتك القصيرة هذه ـ فيها عبر كثيرة . والسرد سلس وسهل وجميل.

تالت حاجة: دي مساهمتي.

قالوا : (يكفينا شر قالوا)
جعلي عنده كنتين زي بتاع زولك ده.
جماعة من الناصير نزلوا في حِلة الجعلي ده.
شغلتهم بناء البيوت بالجالوص.
أول حاجة بعملوها بفتشوا ليهم حوش غير مسكون ويتخذوهو ميز ليهم.
وبعد داك بِفرُّوا في البلد يكوسوا رزقهم.
أها الجعلي أول ماشافهم نزلوا في البلد ـ جاب ليهو كرتونة وكتب يافطة: (ممنوع الدين ولو بعدين) ـ طبعاَ لانه عارف المناصير لسه ماعندهم شغل وبجوهو يشترو ميزهم منه بالجرورة.
كل يوم المناصير يجوهو يطلبوا البيع بالدين ـ زولك ولابكلف نفسه يرد عليهم ـ طوالي يأشر ليهم علي اليافطة ـ جماعتك يمشوا.
المناصير لقوا ليهم شغل (بنيان) قريب من دكان الجعلي.
يوم ومع صلاة الفجر المناصير مشوا ينقلوا موية من البير القريبة من دكان الجعلي عشان يعجنوا الطين بتاع البناء.
لما وقفوا فوق البير ـ سمعوا ليهم جلبَغة في البير.
المناصير: يازول إنت إنس ولا جنس (جن)
الجعلي: إنس
إنت منو؟
أنا فلان. ـ زولهم زاتو بتاع الدكان.
المناصير نزلوا السلب ورفعوا الجعلي لامن وصلوه نص البئر.
أها يالجعلي تاني بتبيع لينا بالدين ولاّ لا؟
الجعلي: إنتوا منو؟
نحن المناصير.
الجعلي: حَرَّم بالحاضر ما أبيع ليكن ـ رجِّعُوني.

والله يا ود بلة حكاي جنس حكي - فعلا قصة فيها الكثير من العبر