نشرب شاهينا ونعبد إلاهينا...

الشاهي أو الشاي كما ينطقها السوادين والمصاروة هو أصل الكيف. الجبنة بتجي ورا. وأعوذ بالله من التمباك والسجار. والآن ثبت علمياً ضررهما وما لهما من مساهمة كبيرة في الإصابة بمرض السرطان سواء سرطان الرئة أو سرطان الفم عموماً.
الشاهي عند البقارة شراب مقدّس مثله إلا اللبن الحليب. طبعاً سوادين الخليج يعرفون الفرق بين اللبن والحليب ما زي ناس الخرتوم. ويقول المثل البقاري: (في الشاهي اللحمر كبوا طمانية وتتين، أي ثمانية وإثنين، عشر كبابي. وفي شاهي اللبن دِرُّوا لي ساكت).
عمنا ياسين عاقير من كرماء قبيلتنا أولاد حميد ومن الأغنياء. عندما تزوره في خلوته – الخلوة هي محل الرجال- يجهز لك براد واحد بس من الشاي يحوي 8 كبابي. عندما تشرب 3 منها وتمتلئ بطنك وتقول ماداير. يقول لك: يا ولدي سمع ليك بزول كتلا الشاهي؟ أشرب ساكت الشاهي ما بضر. بتضر المريسة.
يقولون عن الشاهي: أبو شعيرة الهني الما شراب دني. والدني عند البقارة هو الزول البشرب المريسة. وعندهم البدور الشاهي ما بشرب المريسة والبشرب المريسة ما بدور الشاهي. وفي مشكارهم للشاهي في جلسات البرامكة يقولون:
الشاهي حلال على 3 وحرام على 3.
حلال على الجلابي الجاب شوالاتا.
وحلال علي أنا.
وحلال على الناظر مادبو ذاتا.
حرام على العتالي أب عنقرتا غبشة الدلاّ شوالاتا
وحرام على الكمكلي الما بعرف وزن وقّتا ( جمع وقية).
(والتالتة بتدخلنا في مشاكل خلوها مستورة)

وفي أخرى يقولون:
تية وبتان تية ... كِن طارت حمامة وكِن نزلت قمرية
دُلم دُلم عين السحلية.
البرمكي كعينا ميزان وإيدا وقية.
أنا مع الكمكلي إنلمينا أم صدورية..
وإضاربنا أم كفوفية
شلت الكمكلي بُبُ وقع فيا.
يا ج ع ب ا ت تور الدخولية
أم كف الكمكلي راحت هبوبية
وأم كفي أنا غرامها 100
========
الكمكلي هو الذي لا يحب شراب الشاهي.
الدخولية هي سوق المواشي
غرامها 100: غرامة 100 جنيه.
نواصل


كباشي الصافي


(العوج راي والعديل راي)

كباشي

سلامي وتحياتي ..

Quote: نشرب شاهينا ونعبد إلاهينا...

الصحيح والله اعلم هو
نشـــربوا شاهينا ونعبدوا إلهنا ..

الشاهي يا هندســـة كلاما قاســي ياخ
قالوا في واحد متقريف للشاي ليهو 3 يوم أيام ازمة السكر المتكرره في سودانا دا
المهم صاحبنا بعد ال 3 يوم لقى ليهو كباية شاي مدنكله وجوووووووووووت قام بيها

وفي نفس الوقت الشاهي قام بيهو فالتفت للجماعة وقال ليهم :

اتو يا جماعة ابونا ادم دا مرته واحــده بس
ولا عنده عوين تانيات

وطالما الشئ بالشئ يذكر يقال أنه في أحد مجالس بابو نمر
وفي حضرة الشاهي المدنكل طلب من جميع من في المجلس تشكير الشاهي

والكل أجاد وابدع في شكر الشاهي ..
ولما جاء الدور على أحد اخوتنا الجنوبيين قال:

أحمر بنق أرب (يقصد عرب) كان ما شربو بموت

سلام أخونا كباشي
يا أخي بوستك دا يقريف عديل (أنا من مدمني الشاي) يعني بقاري بالكيف...
صاحبنا البقاري أحمد عيسى كان يقول عندما نحضر الشاي:
2 ملحاس و2 كلحاس و2 يعدلن الراس و2 منهن وخلاس (والمجموع يساوي 8 حجم برراديكو)

تحياتي

Quote: وفي نفس الوقت الشاهي قام بيهو فالتفت للجماعة وقال ليهم : اتو يا جماعة ابونا ادم دا مرته واحــده بس ولا عنده عوين تانيات

الأخ الأمين البشاري سلامات

طبعاً دي الفونقا البقولوها... أول ما الزول يجقم جقمة من الشاي الباتيل بتجيهو خاطرة من خارج الشبكة.. أنا عندي مشكلة مع جماعة الفونقات خاصة في ديار الغربة.. تلقى الواحد أول ما جبد ليك جبدة شديدة من الشاي يقول ليك: هو عمر البشير مجنون ولا نصيح؟ صدقني لم تأت ذكرى الحكومة ولا كان الناس يتحدثون في السياسة. لكنه أبو شعيرة الهني الما شراب دني. وهنا لا أعرف أأضحك أم أسكت لكن بكتمها في حشاي وبضحك براي لمن ارجع بيتنا.

سنحكي عن بعض الفونقات في مرات قادمة إن شاء الله لو الجماعة الكمكلية يفهمونا

كباشي الصافي


(العوج راي والعديل راي)