جن كلكي #

# لما تبقي كل الحاجات بس حلم والواقع تعيس زي ونسة الكضدابين في ليل الملل الطويل داك وكل مشاريعك بقت بس زي الزراعة في الارض اليبابب أحسن تعمل فيها مجنون عديل تتكلم براك وما تحلق سنة لا دقن ولا شعر راس وديمة تحب تأكل الاكل البايت وفي الحلل والحمام من أسبوع لاسبوع وكان الموية قاطعة عندكم أحسن يكون كل شهر وتمشي الشغل بالمزاح يوم تمشي وخمسه يوم ما تمشي وتكون قاعد في البيت وكمان ساكن عديل في التكول الشاي مسيخ وتقيل بس شاي زول قصرتو عقرب والقهوة دي تكون كمان من المستحيل لانو البن بقي غالي جدا
تعرف لو سمعت فلان ولا فلانة مسافرة أول زول يمشي يودع لانو أمكن تموت ولا يموت وهو ولا هي مسافرة وتكون صريح معهم وتشرح ليه خيالاتك أنك سمعت من قرينك أنو تاني ماح يرجعوا ح تدفنوا في بلد طيرو عجمي ح يحزنوا وكما ن الجماعة ح يقولوا فال الله ولا فالك لكين دي الواقع يا وهم كلكم بتخافوا من الموت لكين كونوا تظلموا زول عادي زي أكل الزبادي بالله شوف نعمان القذر كان بتاع فحم الليلة قيادي والجلابيه كيف والكلام كبار كبار العفن أمس كان بيبع الفحم من أحط طبقة وكان بيقول عن نفسو أنو من الطبقة العاملة الليلة صاحب البرادو أخر موديل ياخي دا أتزوج من العاصمة وسكن في المعمورة لكين أمدرمان دي كانت أول حظو في العاصمة والعروس فنية معامل قالوا ومن ناس بحري وكان حلمو أنو يعرس من الخرطوم ويسكن في المعمورة وقروش تصل مليار ويكون رئيس لجنة شعبية لكين قفز للبرلمان دا السودان يا مجنون ما تزعل..!
المهم حالتي أتدهورت شديد بقت ما برد علي الموبيل وما عايز أسكر و لا أشوف الاصحاب وحتي البت الطويلة اللي كانت بتحبني برضو بقت ألعن خلق الله لنفسي ما عايز أشوف أي زول ومرقت من قروب الوتسب لانو كلام ملل وكمان مشيت للدكتور عشان التأهيل بعد الادمان بس قاعد في البيت خالتي مشت جابت واحد بعالج بالقرأن برضو ما في نتيجة ومشينا مع الاهل للسادة الادارسة وجامع الشيخ غريب الله وكمان الشيخ صايم ديمة عمل حجب قال عين وصابتو المهم وأخير كمان البت اللي بتغسل لينا الهدوم قالت في زول في مايو الخيام متخصص عين وجن عارض جابو الامجاد ومشيت لكين من ما شاف العبد لله قال لخالتي خلاص دا فارق الطيبين لا قرأن ولا محايات ولا جلد الزول بس خلوا قاعد في البيت لكين الكرامة لازم منها أمكن الدم يغيير الحاصل قالوا نجيب زول يقرأ القران في البيت وبعدها نسافر المناقل كان في المناقل ما في علاج نمشي الاردن والحال في حالو كمان جابت ليها سهر مستمر النوم دي بقي مستحيل رجعنا للدكتور قال دي الاعراض الانسحابية للزول اللي خلي الخمرة قاموا في الحلة عملوا زار لعزيزة بت نصر الدين دقة الزر أخوكم وسط السادة والاسياد وكوديات الزر وهاك يارقيص بس الرئيس في الفاشر زمان المهم خلاص قالو أتعرف المرض زر عديل لكين رجعت طفل بول في السرير وكمان شرب لبن ولعب بلي مع الشفع ومشيت المدرسة مع العيال عشان دورس التقوية في الامتحان للثانوية قام مدير المدرسة سألني أنت كنت وين يا خوي جاي حسي تمتحن للثانوي بكيت وصرخت عملت فضيحة للمدير وقعدوا المدرسين والاطفال تحنيس وعصير وبيبسي وكمان حلاوة ومشيت معهم محل البلاي أستيشن قلعدين للعشا ورجعت ابيت نمت طوالي لكين الصبح ما مشيت المدرسة جبت هدوم البيت والملايات وهاك يا غسيل لكين الغسيل كتير جعت مرقت الدكان لقيت واحد مصلح فول قعدت معهو زي بعرفو من سنين وبعده مشيت قبة الشيخ دفع الله الدروايش والمجانين هم مستعمرة عديل كد للمجانين لعبت معهم سيجه وصليت العصر وجا الشيخ طردني قال ليهم مجانين الشارع ساي ديل خطرين ما تلعبوا معهم
المهم حسي قاعد في البيت أمكن أمشي الاردن للعلاج الشهر الجاي لانو كل الحاجات مخستكه والشغل وفقت منو وبقيت ما بحب أمشي الخرتوم أبدا حتي سوق أمدرمان ما قدرت أمشي عليهو أظن ما عرفت الدرب بي وين
دعواتكم لي بالشفاء و أنشالله ما يكون جن كلكي بس .

ألف سـلامة يا أبو الزهراء
ربنا يديكـ الصحة والعافية يا حبيب


أي مساعدة كل البورداب أخوانكـ
أعصر عليهم .. بتلاقيهم في الحارة

أخي الحبيب ود الصايم الاصلي
لك كل التحيا
والله يا ملك ما في شدة يقولوا بس شوية عليها قلق لكن عايشين
شكرا لك وعلي مشاعرك الطيبة

ألف سلامة ليك يا زهير.. ربنا يكمل الشفاء وترجع لينا سالم وغانم من الأردن .. بس محتاج تغيير جو وكله بيزول بإذن الله

يا ابو الزهراء كفارة ياخ كتب الله لك الاجر و العافية و طهور انشاء الله

الاخت رشا
تحياتي
ولك كل الشكر ومتعك ربي بالعافية

]أخي فيصل
لك سلامي
والله يا فنان وجع الروح قوي ممكن يودي الاخرة لكين الصبر بس
شكرا علي المشاعر الجميلة والمرور

الف سلامة ليك يا زهير

ماتشوف شر يارب

الاخ خالد
تحياتي وأنشالله ما تشوف شر يا صديقي لك
كل الود

يازهير،يا واصل الناس بالصدق
ان شاء الله مايغشاك شر
الناس جميع مجرحة
احساسه بالغبن الكتر
احساسه بضياع البلد
وانو السنين مليانه شر
فاقده الولف والقرقراب
فاقده الصدق كايسه الستر
وانا من حروفك بعرفك
مليان حنان انسان بشر
طبعك رقيق وزوقك لطيف
وقلبك نضيف جواك اسر
انفض اساك يا زهير اخوي
لملم جراحك ود ابوي
بارياك خواطر الخير معاك
شايلاك اماني الطيبين
باندهلك الفقرا الصحاح
ابروك بي الحصن الحصين
ات ماك سقيم
بس قلبك الطيب رحيم
وروحك المجروحة بي هم الغلابة المتعبين
انفض يااخوي عنت السنين
نلقاك حين ضي الصباح
مليان غنا سكت النواح
القاك يازهير ذي زهر
فواحة بالخير للبشر
ويمين بريت
شايفك معطر بالسماح
وشايفك بتشرق ذي صباح
يازهير اخوي.

أخي عبد العزيز
تحياتي
عند ما قرأت تعقيبك أنهمر الدمع مني وأحسست أني لدي قبيلتي في المنبر بحق قيمة أنسانية

لك كل الاجلال والتقدير أيها الانسان الراقي
ومتعك ربي بكل خير الدنيا وفي دار القرار تكون من أهل الجنان

أبو الزوز يا حبيبنا
يا زول الدنيا دي ما بتستاهـل
وما تعصر علي نفسك شـديد
وكل ما تضيق لي فرج ويسر بإذن الله
أسأل ربنا يفرج ضـيقك ويعدل طريقك
معاك بي دعواتنا وأطـيب أمنياتنا ...

عزرا تعديل مداخلة خاطئة