اثنين من هواة صيد سمك بالقرير يصطادا تمساحا بالسنارة

وردتني للتو أخبار أن الشاب أمير عبد الله وداعة وأخاه معاوية بحلة الدونقساب بالقرير، من هواة صيد السمك، قد اصطادا تمساحا بالجبادة والسنارة كبيرة الحجم التي نسميها (الفدر).. وقد قاوم التمساح مقاومة شديدة ولكن تمت الاستعانة بالعم محمد صالح عبد الله (أبو صليح) الذي اطلق على التمساح 3 طلقات من بندقية خرطوش أردته قتيلا... تم توزيع لحم التمساح على الراغبين في تذوق لحمه الشهي..

سلامات يا مامان,,,

هييييييييييييييييييع

خيرات سد النهضة جات سريييييييييييييييع..

ابشروا ابشروا..

تحية لاهلنا في القرير
وتحية خاصة لهذا الشاب المغوار

والقدرك على تمساح الدميرة يقدر أهلنا على تماسيح القصر

لك التحية أخي مامان

ولدى سؤال لمن لهم دراية في الصيد في مياه النيل

هل تعجز التماسيح عن تشكيل خطورة على الصيادين وهم على ظهور المراكب
يقولون أن خطورة التمساح فقط حينما يكون على اليابسة ؟
ما مدى صحة هذا القول ؟

الأخ أيمن : سد النهضة حيجز التماسيح هناك يعني بعد دا الجوة جوة والبرة برة

الأخ البصير : تساؤلك قد تجد إجابته في تعليق للأخ عبد الله علي الحاج من منتدى البركل من أبناء الدقاويت بالقرب من نوري.. وهم أهل معرفة ودراية في التعامل مع التماسيح (جزائر مناطق الحامداب).. ويعتقد عبد الله أن الضحية هي انثى من شكلها وطلب أن يعمل الناس حسابهم لأن ذكور التمساح ستحاول الانتقام... اليكم ما كتبه عبد الله علي الحاج:

Quote: مامان كيفنك يا فنان حتى في أخبارك حقيقة خبر .. لأن اصطياد التمساح بالسناره أمر اصبح نادر الحدوث لان الذين تخصصوا في ذلك توفاهم الله ولم يمارس هذه الحرفه من بعدهم نفر قط.. لا ادري ما هو الطعم الذي استخدمه حتى ابتلعه التمساح .. ثم ان اصطياد التمساح بالسناره لا يتم الا بطريقه البديقه والعوامه أي بعد ان يبتلع الطعم يكون عدوانيا ووحشيا لدرجة لاتتصوروها..لانه يبلع ولا يمضغ فتستقر السناره داخل الاحشاء (توكر في منطقه حساسة ..كان مصران كان حنجره المهم) لذا يجذب بحبل السناره ويجب ان يكون قويا وممكن جذبه وهو في المياه الغير ضحله ويسهل انقياده مع بعض المقاومه لكن ما ان يصل الى الضفه او يستند بارجله للطين فلن يستطيع احد تحريكه .. وفي هذه اللحظه يضرب بالبديقه في اماكن يسهل اختراقها مثل الابط او طرف البطن وبعدها سوف تثور ثورته ويحاول الرجوع للغريق وهنا يترك الصياد البدقيه والتي تربط في نهاية الحبل بعوامه وعادة ما تكون من القرع الكبير .. يتعذب التمساح الذي غادر بالسناره والبدقيه الى اعماق النهر لكن لا يتحمل الم الجرح وهو داخل المياه لا نها تؤذيه وتؤلمه فيحاول ان يخرج وهكذا يتابعه الصياد على ضفة النهر مستدلا بالعوامه التي تظهر مره وتختفي مره .. واخيرا لشدة الالم في المياه مع الجرح في داخل احشائه وخارجها يخرج التمساح وهو منهوك القوى وبالاستعانة بحبل الجباده والبدقيه المغروسه في جسمه يجذب رويدا رويدا ثم يستعان بالفاس والضرب على راسه حتى تهدأ انفاسه.. هذهي الطريقه القديمه .. لكن يا مامان يبدو من لون جلد التمساح انها انثى وبما ان الخزان قد حجز العديد منها في ترعته خلف السد فإن وجود التماسيح بعد السد اصبح قليلا ان لم يكن نادرا ..وبما انها انثى حسب اللون اذ درجت العاده ان يكون الذكر مايلا الى اللون الداكن قليلا ونتواءت جسمه(الكاروق) اعلى واقوي فاليحذر اهل الساقيه لان انتقام الذكر سيكون مرا ومؤلما اذا علم ان الانثى اصطيدت هناك او كان يراقب او كانت حبلى بالبيض او استدل باية طريقة انها فقدت هناك ولم يجدها.. لا نعتبر ان هذه التماسيح لا تفكر او لا تنتقم بل لديها قدرات لا يستهان بها في مثل هذه الحالات لدرجة جعلت اهلنا يحيلوا مكرها وقدرتها بانها (سحاحير) لها القدره الخارقه والتشكل باشكال عده.. لكن كل ذلك هراء .. خاصة يا مامان ان اعداد الاناث سيكون قليلا والمنافسة تشتد لدرجة قتل الآخر في مواسم التزواج ..فإن علم الذكر اصطيادها بتلك الساقيه فاليحذر اهل المنطقة.. عبد الله ود عبد العزيز منو القال ليك لحم التمساح حرام؟ كدي راجع القول كل صيد البحار والانهار حلال.. يمكن انا غلطان .. يازول والله حضرت اصطياده وسلخه وتقطيعه واكلت لحمه .. ايه رايك وشبعت فيه كمان.. الله يستر ما يكون اكلنا حرام.. في حاجتين الصياد ما يديهم الجنبو .. الجلد والمسك ويقولوا المسك تحت الاباطين ..لكن ياود عبد العزيز لو حضرت فتح بطنو .. تتعجب .. حجار وضلوف غنم وحبال وحجار لانه لا يمضغ بل يبلع وتتحلل الماكولات في المعده.. وفي بعض الاحيان تجد ختم واسوره اذا كان من التماسيح التي اكلت بشرا.. وهو نادرا ما يهاجم بشرا الا اذا جاع لدرجة او سعر بسبب اكل ###### سعران او انتقام لقتل محبوبته..

سلام
التمساح العاير ده ده ما سمع بالتمساح ابكبلو

يجيبوه بسنارة ؟؟

Quote: ... تم توزيع لحم التمساح على الراغبين في تذوق لحمه الشهي..

شكرا أخ عبد الرحمن والتحية لصيادي التمساح من أهلنا وندعو لهم بالنفع مما أصابوا من لحمه

لك التحية

أحمـد

سلامات عمنا مامان

نحرس ونرجي لليوم ما ظهرت

الايام دي معانا أصحابك السرير ود جباره

جات سيرتك بالخير طبعا والونسي كانت عن غناء الصف واغنيه ارجعي لي جناك

Quote: بحلة الدونقساب بالقرير

الحلي ما عرفتها وين بالظبط حي السوق ؟؟

الأخ العزيز مامان .... سلام من صبى بردى ارق ودمع لايكفكف يا دمشق

أخبارك وأخبار الأهل والأولاد في خرطوم أحمد نتمنى أن يكون الجميع بخير

وبالله يا عمي مامان تمساح يعني شنو؟ كان أنا ما حنكوشة من ناس الغرب موية ذاتو ما عندنا عشان نعرف التماسيح.. لكن بنعرف تماسيح الخرتوم البياكلوا حق المساكين.. كان أهلك ديل قدروا قبضوا لينا عليهم يكون كتر خيرهم الف.

لك التحايا والود ... وقول للشايقي شنو ضارب طناش كدا؟ ارسلت له إيميل وتداخل في البوست وبرضو همشنا.

كباشي الصافي


(العوج راي والعديل راي)

سلامات يا مامان .

لحم التمساح من أطيب اللحوم التي تذوقتها في حياتي وذلك في احد المطاعم في الخرطوم قبل عامين كانت احداها واجملها برفقة صديق عزيز من اعضاء المنبر وزوجته الاجنبية التي استمتعت بلحم التمساح ولكن كنت اتمنى ان استمتع به وسط جروفنا وسواقينا المخدرا ديما بالقش .

هذا الحدث النادر كان يجب أن يجد حظه من النشر في وسائل الاعلام العالمية وتتسابق الفضائيات لبثه وكان على أسوأ الفروض تصويره بالفيديو ورفعه على اليوتيوب وكان سيحقق نسبة مشاهدة عالية وسيعرف العالم عن عاداتنا وتقاليدنا القديمة التي لم تندثر .

تحياتي

الأخ ناصر حسين: تحية : تقع الأقدار فتعمى الأبصار والتمساح يومو تم
الأخ أحمد الشايقي: غايتو منظر اللحم بتاع التمساح يفتح الشهية رغم إني ما جربت أكل لحمه
الإبن سيد أحمد : ساقية الدونقساب تتبع للقلعة في القرير وهي سايقية ناس محمد سعيد دفع الله.. تحدثت مع السر ومحمد جبارة امس وسلمت عليهم
الأخ كانتونا1( الرجل الهارب).. يا خي غيابك طال وأخبارك اتقطعت تماما... وين كنت غاطس؟.. إلا نشرك لك بالتمساح حتى تقبض؟
الأخ معتصم: ما ذكرته صحيحا ودا خبر كان محتاج لتصوير فيديو لكن الجماعة فرطو غايتو وفاتت عليهم

بخصوص موضوع التمساح الذي تم اصطياده بسنارة و لا ن الكلام يجر بعضه البعض

اذكر حكى لي احد ابناء النيل الابيض انه اذا نجأ احدهم من موت محقق بسبب مهاجمة
تمساح له فانه تظهر لها علامة صفراء في ظهره
السوال لاهل الاختصاص هل هذه مجرد خرافة ام هي حقيقة و ياريت من عنده علم
يقول لينا
و الحكاية انه بالفعل نجأ احد الطلاب و كان يسكن في داخلية البركس العام 1995 وفي فترة الفيضانات
قد هاجمه تمساح وذلك قبالة سينماء النيل الازرق التي كانت مقابلة تماماً لجروف النيل الازرق
وبعض ان نجأ صاحبنا من الموت المحقق و كان حضوراً ذلك الشخص الذي ذكر المعلومة اعلاه
و فعلا عند ما تم كشف الاخ الذي نجا من الحادث فقد وجدت في ظهره علامة صفراء تاكيد اً لخبر بن النيل الابيض
اها منتظرين الرأي و التاكيد او النفي لهذا المعلومة
تحياتي

Quote: على الراغبين في تذوق لحمه الشهي..

منان
مع انى من اربجى التى تقع على منحنى النيل الازرق بس اول مرة اعرف ان لحم التمساح بياكلو

سلامات مامان

أمضيت عامين وسبعة شهور في جنوب كردفان بحثاً عن الرزق .. لكن بجي الخرتوم وبلاقي أهلك في وزارة التجارة وبسألهم عن صحة أولادك. ولكن في السودان مافي حاجة إسمها نت وكلام فارغ زي.. الوقت للعمل فقط. وكمان الحروبات ما خلتنا بنوم عين مغمدة وعين مفتحة

أرجو إرسال تلفونك في الماسنجر عشان أتصل بك. أنا اليومين دول في لندن.

كباشي الصافي


(العوج راي والعديل راي)

سلام وتحية الاستاذ مامان..

والتمساح بالتمساح يذكر .. احببت ان اضيــف صورة " صياد تماسيــح آخر " وجدتها عبر صفحته بالفيس بوك...






الصديق وعضو المنبر خضر حسين خليل ومعاهو تمساح .. شايفيــن كيف ..

Quote: لكن يا مامان يبدو من لون جلد التمساح انها انثى

استاذ مامان .. بوست مدهش جدا .. وفيه معلومات جميلة خاصة من قبل عبد الله علي الحاج الذي اقتبست منو الكلام اعلاه ..
وهي معلومة مؤكدة وهو رجل عارف .. لان ما حكاه عن صيد التمساح بهذه الطريقة التقليدية سمعته بلسان والدي الراحل اكثر من مرة .. وهو لديه خبرة عالية في صيد التماسيح سوا ان كان (بالبدينقه) أو (بالجبخانة) وتوجد في اغراضه الخاصة بصيد السمك العديد من الجبادات التي لها علاقة بصيد التماسيح ..
نعم اللون الاصفر هو دلالة على انها انثى ويطلق عليها اسم (الصفيراية) وهي اشد شراسـة في الصيد من الذكر .. كالبؤوة تماما انثى الاسد .. وهي لا تخطى فريستها ابدا .. صوى كان من البشر او البهايم ..
بعد فترة فيضان العام 88 م انتشر على ضفاف النيل العديد من التماسيح وخاصة في منطقة خور توتي وهناك توجد جزيرة صغيرة يفصل بينها خور صغير وتوتي ..
هذه المنطقة للذين يعرفون لفترة ضجت بالتماسيح وكانت تتحرك التماسيح منها في ساعات محددة بعد ان يسكن الليل تتحرك تجاه الحجارة التي في امام الاذاعة السودانية حيث يوجد بالقرب من المنطقة تحت نادي الفنانين مباشرة حجر جبلي مشهور يسمى حجر ابو دبر كنا نصطاد فيه في الليالي حالكة السواد التي لايظهر فيها القمر كنا نصطاد الكدن والدبس ..
..
المعلومة المهمة ايضا .. انه في حال وجود انثى التمساح للصيد وهي جعانة .. تفوح رائحة المسك في المنطقة بكاملها وهذه هي الطريقة التي كنا نعرف بها وجود انثى التمساح على ضفاف النيل منطقة الجزيرة المعنية .. وكنا نترك المنطقة في الحال وباسرع فرصة .. يا اما نقوم بكامل الاستعدادات المتعلقة بالصيد ..
حضرت عملية صيد لاحدى التماسيح من المزارعين الذين يقطنون الجزيرة تم اصطياد التمساح بعد ان تمت دردقته بواسطة حمل تم ربطـة على بعد خطوات من القيفه .. والشرك كان تقليدي استخدمت فيه الحبال والكجامة .. تمم الاجهاز على التمساح وكان بحجم صغير لا يتعدى التلاتة امتار وهو طبعا من الاحجام التي لم تقم بدور (الشيل) أو مهاجمة بنو البشر بل تأكل اللحوم والاسماك بانواعها حال ان توفرت لها..

Quote: اذكر حكى لي احد ابناء النيل الابيض انه اذا نجأ احدهم من موت محقق بسبب مهاجمة تمساح له فانه تظهر لها علامة صفراء في ظهره

الأخ أحمد عمر : تحية. والله دا كلام عجيب ، حكاية العلامة الصفراء دي!!

الأخ بدر الدين : تحية. أسأل عمك عبد الرحمن مدني خلي يحكيلك عن التمساح العشاري الذي أشرف والده المرحوم مدني حسن على صيده عندما كان ضابطا للشرطة في مروي في خمسينات القرن الماضي،، ومازال رأس التمساح الضخم معلقا على رأس بوابة بيتهم في القرير ( بالمناسبة أنا ابن عمة عبد الرحمن مدني لزم).

الأخ حيدر الزين: تحية. والله صورتك مدهشة خاصة لإنها للبوردابي زميلنا خضر خليل.. بس ما عرفنا قصتها شنو؟

الأخ تمبس : طلعت حواتي ووارثا عديل كمان... طيب رايك شنو في الكلام القالو اخونا أحمد عمر بتاع العلامة الصفراء للزول البينجو من شيلة التمساح..
طبعا عندنا نحن في الشمالية بيربطو التماسيح بموضوع السحاحير وإنو السحاحير بتتشكل كتماسيح ، واليك هذه القصة الظريفة التي حكاها لي صديق قال إنه سمعه من أحد الحكواتية :
حدثني صديقي محمد عوض الحاج أنه قابل في سوق تنقاسي شخصا من مناطق الحامداب وهو من النوع الذي يسرد الحكايات بصورة تجذبك اليه تماما ويحشر في حديثه جملة اعتاد تكرارها ، فيقول (وإنت ماك طالبني حليفي) ولعله يقرأ في عيون سامعيه عدم تصديقهم لما يقول.كان حديثه عن قصة حدثت لعمه كما يقول ، الذي كان يمتلك مركبا صغيرا (فلوكة) يعدي بها الناس بين ضفتي النهر وبين الجزائز الكثيرة الموجودة في منطقة الحامداب. قال الرجل: ( كان عمي في مركبه ومر بجزيرة صخرية صغيرة فرأى تمساحا ممدا فاقترب منه فلم يتحرك لأنه كان مستغرقا في النوم.وكان الرجل يحمل معه (بدينقة) وهي آلة شبيهة بالفأس وبها نتوءات إذا ضرب بها راس التمساح تنغرس فيه وتتسبب في قتله. ضرب الرجل التمساح ، فصرخ صرخة غريبة وغطس في الماء والبدينقة مغروسة في رأسه وغاب تحت الماء. ولم يعثر له على أثر.)

مرت الأيام والسنون ، وكان الرجل قد ترك عمل المراكب واشتغل في بناء الجالوص فرمت به الأقدار في مناطق دنقلا ومر ببلدة ناوا وكان يأمل أن يتجاوزها قبل حلول الظلام ، لما سمعه عن قصص السحاحير ولكنه لم يستطع. فاقترب من بيت معين وفتحت البنت الباب، فأخبرها بأنه ضيف من بلاد المناصير ويريد أن يقضي ليلته ضيفا عليهم ويواصل رحلته صباحا. أدخلته البنت وقالت له أن والدها يرقد في السرير لأنه مشلول وطلبت منه أن يسلم عليه. وعندما دخل عليه في غرفته وسلم عليه، قال له الرجل: (إنت أظنك ما عرفتني؟) فقال له: (أبدا) فأشار الرجل الى حائط الغرفة وطلب منه أن ينظر، فكاد عقله يطير، فقد رأى (البدينقة) التي ضرب بها التمساح مثبتة في الحائط. وأخبره الرجل أنه هو ذلك التمساح وأن الضربة سببت له الشلل. ولكنه طمأنه على أنه ضيفه ولن يأتيه منه سوء، ولكنه قال له أنه لا يستطيع حمايته من بقية السحاحير إذا عرفوا أنه هو الذي اقترف جريمة ضرب قريبهم بالبدينقة. وقال له الرجل أن المكان الوحيد الآمن والذي لا تستطيع السحاحير دخوله في الليل هو المسجد، وكان المسجد قريبا ، فقفز الرجل حائط البيت وجرى جريا حتى دخل المسجد واحتمى به. ويقول محدث القصة ( وإنتو ما طالبنو حليفة) أن السحاحير كان تزمجر طول الليل حول المسجد. وفي الصباح حقب المنصوري بقجته لا يلوي عن شىء حتى تجاوز بلدة ناوا.

Quote: طلعت حواتي ووارثا عديل كمان..

.. والله يا مامان حواتي بالجينات الوراثية .. لكن عندنا كلام كدا ما بنقولو إلا للحواته وناس البحر بس .. يا وبست سمح زي دا يهيج لينا اشجاننا ..
كلام أحمد عمر دا طبعا اول مرة اسمح بيهو .. عندنا يا مامان جدودنا واعمامنا كانو بيتصارعو مع التمساح والعضة بالعضة خليك من هجوم بس .. وفي واحدين كدا التمساح من ما يشم ريحتم بيخلي ليهم الموية وبي وشـو ..
عندنا عمنا بله دا يا ما مان .. زول مصيبة اكان سمعته بي حاجة اسمه (النسناس) ودي من الهوام حق البحر .. عمنا بله دا كان ما بخاف من اي حاجة ليها علاقة بالجن والشواطين والبحر .. اقوليك حاجة .. ما بخاف من اي حاجة في الدنيا دي .. ولما يجي مارق بشيل كفنو معاهو .. الزول دا مرات مرات الله ما بخافو ..
عمنا بله دا كان عندو (نسناس) بسوق ليهو المركب من شدة ما هو معروف لي الانس والجن ..اها عمي بله دا قعدته معاهو كتير وراني .. في جسمو .. حفر سيطان بطان .. بعج سكاكين .. صلاخيات بدينقات .. وإلخ إلخ من الحاجات دي .. لكن اصلا ما جاب لي سيرة العلامـة الصفراء دي .. واظنها من ضمن الاساطير ..
..
زي الاسطورة الفوقانية حقت التمساح السحار دا .. دي قصة اسطورية يا مامان متداولة وانا سمعتها من الوالد عليه رحمة الله وتحكى عن منطقة في الصعيد .. وعن قبايل بي عينة في الصعيد .. ويظهر من الحكي انها اسطورة شعبية متداولة بشكل دائري كل مرة تضاف ليها العديد من الاثارة والحبك الدرامي للحكي في البعد الشعبي ..
حكاوي البحر يا مامان كتيرة جدا .. ومتداولة ومتشابهة يقوم فيها الراوي بتغيير المناطق والشخصيات ... واحيانا تنسب لاشخاص بي اساميهم .. كما جاء في قصة (جلوك) وقصيدة التمساح الشهيرة لاولاد حاجة الماحي .. وهناك قصة مشهورة كان سمعتها في رواية للاستاذ ابوجهينة..
في بحرنا حق الموردة دا يا مامان حكيت لنا اساطير وقصص .. لاماكن نعرفها جيدا بعلاماتها المميزة .. ووجود نفس الاشخاص الذين نسبت لهم الحاوي لكن لتاريخ اللحظة ما تأكدت هذه القصص .. الاسطورية واظنها فقط من ضرب الخيال

بالمناسبة يا مامان النسناس دا جاء في تعريفه ..
انه من سكان البحـر .. او من مخلوقات العالم السفلي ,,, اشبه بالبني آدم لكنه اقرب للقرد في شكله وعندو ضنب .. وملمسه ناعم وبه صوف ويمشي على رجلين ..
والعديد من الناس الليها علاقة بالبحر وحكاوي البحر تعرف هذا المخلوق او تم تداوله كثيرا في الاساطير الشعبية

بالمناسبة يا ما مان ..
عندي قصة شهيرة مع زولة لقيته جمب البحر في وقت متاخر جدا .. وما سالتها .. طلعته المركب عشان اجيب بعض الحاجات النسيته في المركب .. بعد شوية لقيته جمبي في المركب بدون ما اعرف طلعت كيفن .. وبعد شوية حركت لي المركب وساقته لي مسافة كانها راكبه ليها تكسي طلب .. وصلتني لحدت الحتة التحت مسجد النيلين .. وكان اتحركت بي من تجاه الاذاعــة .. وفجأة اختفت داخل المويـة بدون ما يحصل بيناتنا اي كلام ..
الجدير بالذكر انو الزولة دي زولة زينا وجميلة جدا بس بتفرق في انو ريحته كانت سمك .. سمك ..
اها المسالة دي كانت عادية للناس البتمشي البحر بالليل واكتر من عادية ..
اكان لقينا المجال الواسع بحكي ليك عنها بي التفاصيل الدقيقة ..

مادام السيره جات في البوست

قصة تمساح ألحامداب واولاد حاج الماحي

وتاني قصة أبنعوف والتماسيح حقيقه ولا خرافات


يا رجاله نورى اتلموا خلو الغفله جميعكم هموا
محمد صالح قام بى عمو لطم الدود بالسر فوق فمو
يابا حمدتو اب نايبا شوكه صاحب سر وايدك مبروكه
يا اب نيران الحقنا بابوكا هم يا شيخ الناس زموكا

________________

الدود - مقصود بيهو التمساح

السلام عليكم مامان وضيوفة

تمبس طلع حوتي كبير وخضر طلع صايد تماسيح

بصراحة سمعت حكي كتييير عن سحاحير البحر

عندنا جارناعم خوجلي عليه رحمة الله كان حواتي وبحكي عن السحاحير

والمواقف المرت بيه هو واصحابة .... وعلى ذكر ناوا هل ما يحكى عن

الجزيرة ده صحيح ولا حكاوي والسلام ....

Quote: تمبس طلع حوتي كبير وخضر طلع صايد تماسيح

الشيخ سلامات
البورد دا طبعا او السايبر الناس فيهو بتتعامل بي اتجاه واحد .. هناك العديد مما هو متعلق بحاتنا الاخرى خارج هذا المكان لا يعرفها البعض ..
البحر دا يا الشيخ وحياة البحر دي جزء كبير من حياتي وشكل شخصيتي واضاف لي الكتير جدا من الحكم ومن التعامل مع الحياة .. اتعلمت وانا بصحبة الوالد عليه ررحمة الله في البحر العديد من الاشياء يصعب تعلمها في اي مكان غير البحــر ..
ولو كان خيروني بحياة أخرى غير تلك التي اعيشها الآن .. فهي ..
يا قارب صيد داخل البحـر ..
او قطية حنينة جدا علي قيفه في خشم النيل في اي مكان داخل السودان .. ولا انترنت ولا سامسون جلاكسي تاب .. ولا بكري ابوبكري ..

سلامات علاء

ياخي ناس الموردة ديل كان ما طلعو علاقتهم متينة مع البحر

مفروض يرحلوهم من هناك ... يكفي البحر انه بيعلم الصبر

وده في ظني انه حاجة عظيمة شديد ... رحم الله الوالد وجعل الجنة له سكنا ومقراً

طبعا اخوك علاقته بالبحر شبه يعني بتبدأ بعد السمك يتنظف ههههههه.

لكن زي ما اسلفت سمعت حكاوي من العم خوجلي عليه الرحمة والوقت داك انا كنت صغير

يعني كنت بخاف من الحكاوي اكتر من التركيز فيها... لكن في خيالي الان البحر ده مكان مخيف شديد

بالذات في الليل ... على فكرة امكن حكاوي عم خوجلي الله يرحمه دي كانت سد بيني والبحر

بالرغم من انه انا اهلي في منطقة السروراب ومولود وساكن في امدرمان ... شفت عمك ده الله يرحمه

جهجهني كيف ....

وياخ عليك الله متعنا بالقصص اللطيفة ده امكن العقدة تتفك...

Quote: وياخ عليك الله متعنا بالقصص اللطيفة ده امكن العقدة تتفك...

والله يا الشيخ اكان حكيت ليك .. يادوبك ما اتورطته ..
عارف من شدة ما حكاوي البحر دي مخيفه وبتحس بيها عجيبة جدا .. لحدت ما بعدما تسمعه بينتابك احساس انو بعد كدا اي حاجة تانية صعبة في الدنيا مافيش . وماف حاجة ممكن تخاف منها ...
بالمناسبة من ضمن الحكاوي الكانو بيحكوها لينا عن شخوص محددين بنعرفم كويس ، حفزو افكار كتيرة جواي اني اكون محل الحاجات دي ..
صدقني احيانا كنت بمشي البحر من العصرية مرات مع الوالد ربنا يرحمو وبنجي طالعين ساعات متأخرة من الليل .. مرات بمشي براااي الساعة اطناشر بالليل كلها عمليات استكشاف اكتر مما انها عمليات صيد .. والبحر بالليل مكان عجيب جدا مخيف .. وآمن في نفس الوقت ..
في حتات محددة زي ما قلت على النيل فيها حكاوي كتيرة جدا .. مناطق السروراب والمناطق العلي النيل بالذات فيها حكاوي وحكاوي عجيبة جدا تشيب الراس ..
بالمناسبة:
عندنا زول مشهور جدا في الحلة توفي .. وكان بيشتغل في البحر ووقتو كلو مقضيهو في البحر .. الزول دا شعرو ابيض بي صورة عجيبة .. بيحكى عنو قصة برضو عجيبة .. لكن للاسف .. عمك دا شطح .. وما قدرته اطلع منو بي اي حاجة مفيدة إلى ان توفى .. عليه رحمة الله .

Quote: طبعا اخوك علاقته بالبحر شبه يعني بتبدأ بعد السمك يتنظف ههههههه.

ههههههه .. يا زول احسن ليك مالك ومال القراية ام دق ..
بالمناسبة البحر ما بيعلم الصبر بس .. بيعلمك حاجات كتيرة وبيقرب في العلاقة بينك وبين الخالق عز وجل من حتات كتيرة جدا ..

Quote: والله يا الشيخ اكان حكيت ليك .. يادوبك ما اتورطته .. عارف من شدة ما حكاوي البحر دي مخيفه وبتحس بيها عجيبة جدا .. لحدت ما بعدما تسمعه بينتابك احساس انو بعد كدا اي حاجة تانية صعبة في الدنيا مافيش . وماف حاجة ممكن تخاف منها ...

لا لا كده طمنتي خالص يا تمبس ... ياخ اقول ليك هل من عودة هل تطفر بي كده ههههه

Quote: في حتات محددة زي ما قلت على النيل فيها حكاوي كتيرة جدا .. مناطق السروراب والمناطق العلي النيل بالذات فيها حكاوي وحكاوي عجيبة جدا تشيب الراس

ده بقى دايرة اخونا ود المفتاح وحبيب نورة .... حبيب نورة ده اكيد قابل ليه مصيبة في البحر ده سوت ليه الجن الفي راسه ده اصلو حلتا (البحيراب) من البحر اقرب من جدعة الحجر.....

Quote: حلتا (البحيراب) من البحر اقرب من جدعة الحجر.....

بالضبط ..
الناس القاعدين جمب البحر بكونو (عميقييييييين) جدا .. في واحدين بمشو (يتعمقو) هناك الصباح بدري .. يا بالليل
اها النوعية دي بتطلع منها بي حاجات عجيبة ..
..
يا كمان تكون لاقتك حاجة .. اعمق من العمق زاتو ..

بوست جميل وموفق .. التحية لصائدي التمساح رغم اني من أهل الرفق بالحيوان ..

الشاعر بدوي عكود جادت قريحته بقصيدة لحكاية التمساح الذي تم اصطياده بالسنارة:

خبرك عم من(ود جارة) لى (ودارة)
أرخس بى مقامك بالع السنارة
يالفكك سنونو دواهس العصارة
كيفن تقبضك سلكاية بى مسمارا
ـــــــــ
جيت تتبن القيف يالمجرق مالك
وإنت الكير محلك والمطايب فالك
(أمير) حالف يمين الليلى مايرتالك
صيح بالبلد لى عندى شايل حالك
ــــــــ
كت مضرب مثل فى القوة يالتمساح
وكم خارت بدينقة وكم أكلت سلاح
قولى ياتعيس شن جابك الرحراح
تكوس صارقيل جبابيد ناس ابوه صلاح
ـــــــــ
جابوك فى الفريق واتلمو ناس الحى
وسوولك رقيص جابودى والحمبى
سووك مضحكة شاوين كبدتك شى
وضقت اصناف عذابن لى مراود الكى
ـــــــــ
بعد روحك خلاص بالطلقة راحت ضمة
وكورك (اب صليح) خليتو ليكن رمة
جوك ناس شاذلى وعبادى ملص العمة
طريت (ود ابنعوف) البدرى إيدو مدمة.
ـــــــــ
قسموا للحم كيمان بلا ميزان
وكل زول شالو كوم يكفيه والجيران
وفى العير صاح منادى( حللو) يا اخوان
دا أقيم قيمة من سوار أنوشروان
ـــــــــ
وكتموا السر جماعتك ومافى زولا ردا
والزول شالو روح اسألو (السر مده)
ادونا اللحم كدى النقوم نتغدى
وبعدين النقوم نفزع نعد العدا
ــــــــ
الصاجات ملت لى كل شوارع القلعة
وقعدوا للخلوق تايات تشيل السبعة
الناس اتملت شبعت سماحة شبعة
والقوطة التخنق الزول دواه اللبعة
ــــــــــ
وخلاص لمن شبعنا وقمنا إتمغينا
واحد قال اقعدوا منو اليقوم يفتينا
التمساح حلال؟ والله الحكاية غبينا
قسمنا اللحم كيمان وإتفشينا ؟؟؟

يامامان بالله احكي عن الراحل ابنعوف وولده شيوخ البحر في اصطياد التماسيح
الطيب محمد الطيب رحمه الله سرد عنهم قصص عجيبة