ومن هنا تبدو نهاية الخرطوم جلية

واهم من يعتقد بان قفل انبوب النفط سيفيد السودان ويقلل من مخاطر التمرد..
قرار قفل انبوب النفط انتحار سياسى واقتصادى ترتكبه الخرطوم فى حق نفسها..
وصلنا مرحلة علّى وعلى اعدائ يا لبؤس تفكيرنا..
ستنهال الضغوط الخارجية على السودان هذه المرة ليس لارغامه لفتح الانبوب او الجلوس لطاولة المفاوضات, انما لشئ فى نفس يعقوب جاءها على طبق من ذهب..
اذا استمر الحال هكذا شدا وجذبا سوف يكون السيناريو المحتمل على النحو التالى
1* ستذهب ابيى جنوبا فى اكتوبر القادم بامر مجلس الامن
2* ستشتد الضربات من الجبهة الثورية وتقاتل قتال اكون او لا اكون
3* لن تجد الخرطوم الدعم والتعاطف من الشعب وربما يحدث العكس
4*سوف ينحسر نفوذ الحكومة فى نطاق ضيق جدا يكون مداه ظلال كرسى السلطة فقط
5* وبالتالى راجين شنو غير الانهيار والسقوط الحتمى
ثم ماذا بعد السقوط؟؟؟؟

وهذه قصيدة تتحدث بلسان الشعب الموجوع .


بلد مفروشة بالبكيات
فلاان عيَّان.. فلااان داك مات
فلااان سجنوهو في شيكات
فلااان داك ساب عيالو.. وفات
صبر .. كم جابه السنوات
ضرائب.. وكهربا.. وحاجات
جمارك.. و جوطة إجراءات
عوائد.. و جوقة إيصالات
وزولك أصلو غلبو ثبات
شرد.. و همَّل ورواهو بنات
بلد حاكماها شلليَّات
ومسئول بس بتاع ناسات
عماراتو البقن ناطحات
وعرباتو الهناك سمحات
وأموالو البقـت شيكات
رواية.. وناسا ضمَّـــة ثقات
في ناس بين يوم وليلة ذوات
وناس دايشة.. وبقت أمــوات
أسر خامَّاها بالميَّات
وأسر عايشاها بس ركشات
دوام غرقـانة سلفيَّات
صِبح شعـب البلد طبقات
ناس ما ناس.. وناس راحات
ناس بالخاص.. وناس باصات
وناس لابتوووب.. وناس آآليات
وناس هاجمين.. وناس باكات
وناس يتعشُّـوا حلويَّات
وناس طوَّالي بس فتـَّات
ورغم تراكم العـبرات
وصوتنا البحَّة في النبرات
وآهاتنا البقـت صيحات
بتسرحوا انتو في الفارغات
وتدفعــوا انتو مليارات
تحنِّسـوا بيها في الحركات
وتشتروا بيها في السَّادات
وراكبين ديمــة طيَّارات
بدل سفـريَّة دولارات
فنادق راقـية.. نثريَّات
وفود راحت.. وفود ما جات
وناس شبعانة سفـريَّات
هدوم.. وجضوم.. وكنجالات
ونقــَّــة مـع الفضائيَّات
وشعب أسير صبح يقتات
علي المغصة الابت تنفات
وعاشت بينا بالسـَّنوات
بلـــد مليانة بالآآهـات
نفاق.. وشقاق.. وارهاصات
وخوف استوطن الحارات
ومسئولين ضميرهم مات
يتمو الصفقـة كومِّشنات
ويعملوا فيها ناس صلوات
حكومة خوف.. وإعدامات
سجون.. ودموع.. ودفعيَّات
حكم زندية رشاشات
وباقي الشلة غوَّاصـات
أقول ليكم كلا م بالجد
خلا ص والله.. وصلنا الحد
متين يد الغبش تتمـد
وجدران الخداع تنهــد
ويتقدَّم عشا البايتات
تفاوضوهم علي الثروة
تسيبوا المـنِّ والسلوى
وتمشو تكوسوا للحلوى
بلد معطونة في البلوى
وضاربين انتو كنداشات
تشيلو قروشنا للخارجين
وتقعدوا انتو شبعـانين
وشعبنا كلو محـرومين
يعيش بالا ستلا ف والدين
طعامو قليل.. وكلو فتات
نفوس شقيانة.. محرومـة
ورؤوس طوالي مهمومــة
وعروش بالبطش موسومة
وكروش.. وقروش.. ومايقوما
عروض مفروشة في الساحات
بنات ضارباهـن البورة
وولا د بس شرشحة وكورة
حكاية شعب مشهورة
ركب في حكمو ماسورة
ووجع آلا مو كميَّات
بيوت عشعش عليها الهم
حكاويكم تجيب الغم
تمرُّد وناسو سافكين دم
يفاوضـوكم.. بتدفعو كم؟؟
وجاهزين انتو بالكاشات
معارضة بس لعب أطفال
مكاجرة بس عشان المال
كترة أحزاب.. وسوء أحوال
بلد جد حالو بقى بطَّال
محال تحميهو بس كلمات
حليل وطني.. وحليل ناسو
سقانا المُرَّة بي كاسو
وضرب طايوقنا بي فاسو
أكيد حنكاتل أنجاسو
ونصبح برضو ناس حركات
يكون داك يوم عظيم فنان
وترجع لمَّـة الحبَّان
علي البلد الصبح مزدان
ويبقى حقيقة هو السُّودان
بلد متوشح البركات