Post: #1
Title: سعدية بت الرضي
Author: أيمن محمود
Date: 06-07-2013, 10:35 PM
= وحاااات النبي ... وحاااااات الرسول والله يقطعني حته حته ،،، ده السمعتو بي اضنيني ديل !
. هاااي يا فاطمة ... خشمك ده صُمي عليكي ... جنس كلامك ده ما بنقال ... يسألو الكلام ده قالو منو ! يقولو فاطمة ! ...
ترى اُمُور النسوان دي ما بتعرفيها !! – تذكري طلقة علوية التانية ؛ ما كانت بجنس كلام زي ده !
= هي علوية طلقوها تاني ؟! ... يطرشني ما سمعت بيهو ! ... هي النسوان ديل بقن بدسن مني والا مالن ؟! والا بقن فارزاتني !
. طلقوها تاني واللهي ... بس رجعوها فيي يوما ... اتدخلوا اخوانا ولمو الموضوع سريع سريع ... وبرضو زي ما قلت ليك في كلام زي الجبتيهو ده ،،، استغفر الله !
= مالها ... جابت شنو ؟! والكلام ده حصل متين ؟
. تذكري بُكى الشايب حمد الامين ... الله يرحمو
= الله يرحمو ويغفر ليه ... آي بتذكرو ... حتى اليوم داك كان بكايين في الفريق ... بكى الشايب حمد والبنية بت ناس موسى الضو ... ناس علوية ... الله يرحما ،،،
والله البت دي وجعتني وجع شديد خلاس ... ماتت في عز شبابا ... وموتا كان فجأة كده. الله يرحمم كلهم
بس أها ما قلتي لي؛ قالت شنو علوية لحدي ما طلقوها؟
. والله الكلام انا ما حضرتو اليوم داك ... بس النسوان حكن ... قالن كانت وسط النسوان وفاتحا حلقوما تتكلم في سعدية بت الرضي
و ما خابره انو في واحده من نسابتا كانت قاعده ... تسسسمع في الكلام ! وساكته ...
أها قالو: قالت انو سعدية بتدق بت راجلها ومورياها الويل ... وسعدية الفعلتي وسعدية التركتي ... ونسيبة سعدية تسسمع في الكلام وساكته !
الكلام ده كلو كانت بتقولو لى حواء بت اخت المرحومة مرت راجل سعديه الاولى ... وقومي للبنية انقلي الكلام لى امك وقومي يا الام كلمي اخوانك !
... وطبعا الاخوان زعلو زعل شديد على بت اختم المرحومة ... والتلاته امشو لى راجل سعدية وشاكلوهو في شان بتهم اليتيمة ...
= حي يا بت امي ... هسا البنية اليتيمة دي يدقوها والا يحنو عليها ...
. هاي اصبري ... النتم ليكي .... القصة طلعت ما كدي !
|
Post: #2
Title: Re: سعدية بت الرضي
Author: عبدالعزيز الفاضلابى
Date: 06-07-2013, 11:38 PM
Parent: #1
أها ـ ـ
غايتو يا أيمن الله يستر عليك من جندر المنبر
انت قايلن الشبك بتلفتن ليها ـ ـ جَزَمْ يتلمن فوقك
حدك الـ ICC
|
Post: #3
Title: Re: سعدية بت الرضي
Author: أيمن محمود
Date: 06-08-2013, 06:37 AM
Parent: #2
الاشخاص، الاماكن والاحداث فيما سبق وما سيأتي (متخيلة) من وحي خيال فقط !
وما يرد في البوست لا يعبر بالضرورة عن رأي الكاتب ولا يتحمل مسئوليته 
تحياتي يا فاضلابي
|
Post: #4
Title: Re: سعدية بت الرضي
Author: فتح العليم محمد أبوالقاسم
Date: 06-08-2013, 07:04 AM
Parent: #1
رائع يا ايمن
عدتا بنا زمنا جميل واحسبه لن يعود ، فجأة وجدت نفسى في قريتنا في الجزيرة وقاعد في الراكوبة مش الراكوبة الموقع ، ا لراكوبة (مكان للجلوس يشبه الديوان ) الشرح مش لك ياايمن وانما لبعض الذين قد لايعلمون تلك الثقافة المعمارية، وبسمع في نسوان حلتنا يحكنا تلك الحكاوي .
لك التحايا والاحترام
|
Post: #5
Title: Re: سعدية بت الرضي
Author: أيمن محمود
Date: 06-08-2013, 08:44 AM
Parent: #4
. أها قال ليكي الراجل سكت ساي وما رد ليهم .. قال يتأكد أول ...
خلاهم بعد غلطوا زييين وكملو الجواهم كلو حتن قال ليهم اصبرو الننادي سعدية وننادي البت ذاتها نسألها نتأكد من الكلام
،، وعلى الطلاق الكلام ده لو طلع صح المره دي كان تطلق بالتلات قدامكم هنا ...
حسن الاخو الكبير قال ليهو ما في داعي تنادي المرة دي ... نادي لينا البت النسألها الكلام ده صح والا مو صح !
أها قال ليكي عثمان راجل سعدية مشى نادى ليهم البنية حتى قال ليكي كانت عند الجيران بتذاكر مع بتهم .. رسلو ليها تجي ...
جابو البنيه وقعدوها مع خيلانها ... البنيه كانت مخلوعة ومنفزعة ...
اصلوا خيلانا ديل ما متعودين يجو تلاتتم مره واحدة كده وبدون ما هي تكون عارفة – حتى الجيران ذاتم استغربوا الحاصل شنو !
المهم البنية قعدوها – خالها الكبير قال ليها: يا بتي ترى احنا خيلانك واتي بتنا ومعزتنا ليك زي معزتنا لي بناتنا واحد
ووالله معزتي ليكي زي معزتي لى منى بتي، ولو ما كان ابوكي ابى كان جبناك تعيشي مع اخواتك بناتي الا ابوكي اولى ..
عشان كده كن في حاجة قوليها لينا .. في حاجة مضايقاكي في قعادك هنا دي والا في زول ما دايرك ؟
قومي يا البنية قنبي ابكي !
|
Post: #6
Title: Re: سعدية بت الرضي
Author: أيمن محمود
Date: 06-08-2013, 10:20 AM
Parent: #4
فتح العليم محمد أبوالقاسم
لك التحايا والاحترام ايضاً
|
Post: #7
Title: Re: سعدية بت الرضي
Author: أيمن محمود
Date: 06-08-2013, 08:45 PM
Parent: #6
.
|
|