مبرووووك محمد عمر الفاروق النتيجة الباهرة ..

طبعاً نحن المغتربين ديل طواااالي أولادنا في حالة بيحرزوا نتائج باهرة .. وبما إنو محمد ولدي الله يديهو العافية من أولاد المغتربين فلم يشذ عن القاعدة وأحرز نتيجة باهرة مما حدا بي أخوه صلاح الله يديهو العافية برضو واللي لسة ما دخل أي مرحلة تعليمية إنو برضو يحرز نتيجة باهرة .. مع العلم إنو أولاد خالاتهم برضو مغتربين وأحرزوا نتائج باااهرة إضافة لي إنو كللل أصحابي قالوا أولادهم أحرزوا نتائج باااهرة علماً بي إنو في جنسيات تانية كتيييرة مغتربة معانا هنا لكن اصصصلو ما بيقدروا يحرزوا نتائج باهرة زيينا ..إنتو قايلين البوهورية دي حاجة هينة ولا هينة ؟؟؟
حقيقة أكثر ما أبهرني في هذه النتائج الباهرة حد الأبهار هو تلك البهارات التي يضفيها المغترب على أولاده لمن يجي السودان إجازة ويقول ليك ولدي هناك بيجي الأول طوااالي وأصصصلو ما فكّاها مننن ما دخل KG1 لحدددي سنة تانيةعالي ..لكن سبحان الله ما عارفو في سنة تالتة دي مالو جاب 42 % ؟؟ في استاذ مصري كان قاصدو تقريباً وهو ده الأثر على مستواهو ..
الإبهار الأعظم كان لحظة تسلمي لشهادة محمد من التيتشر الخواجية وهي بتقول لي :
كونقراديوليشن دكتور أوومر ..
فزاد إنبهارها لمن جاوبتها :
ام نوت أ دوكتر ..
فما كان منها إلا وضربت بيدها على صدرها وقالت لي فيما معناها :
سجججمي ؟؟!!!! يور نوت أ دوكتر ؟؟؟

شكراً إبني العزيز محمد عمر الذي قلدني وسام الدكترة الذي فشلت في الحصول عليه عندما إمتحنت الشهادة السودانية قسم الأحياء عندما كانت التيتشر تسأل الأطفال عن وظائف ابائهم فكان رد محمد إنو أبوهو دكتور ..
والشكر أجزله ل جانا عيد الطفلة ذات الثلاث سنوات والتي ألهمت محمد إبني أن يبوح لهم بوظيفة أبيه الخفية في علم الطب ..
حقّاً انا منبهر حد الإنبهار لهذه النتيجة المبهرة فهّلا إنبهرتم معي فنصبح جميعنا منبهرون من نتائج أولاد المغتربين؟

تخريمة :
ياخ مغتربين ليبيا ديل قاعدين يحننوني كيف..!! أصصصلو ما عندهم نتائج مبهرة ..

http://up.hawahome.com/nupload2/441540_1333740004.gif

الف مبروك لمحمد يا عمر ..

Quote: سجججمي ؟؟!!!! يور نوت أ دوكتر ؟؟؟

ههههههههههههه
ولدي قال لي انت يابابا انت كبير كده وبتقرا ليييه !!!!!
والله ياولدي بحاول اعمل لي (ماستر)
ياسلالالالالام يابابا يعني ح تبقي دكتور تعالج الناس
هسي خايف اكمل الماستر يقوم الولد يكلم اصحابه يقوم ابواتهم يجيبوهم لي
والف مبروووووك للولد الذي ابهرك وبالتوفيق والابهار دائماً

هاهاهاهاهاههااهاهاهااااااي

نو بودي شنو ديك هاهاهاهاها

صدق محمد الفاروق فأنت دكتور ونص وخمسه
مبروك النجاح الباهر في شنو ما عارفين لكن مبروك
ومحمد ح يشحد الشطارة فهو خالها وعمها . او هي
خالتو وعمتو الشطارة اكيد يا دكتور .







..............................................................حجر.

مزمل يا خيري..
بارك الله لكما وبارك فيكما ..ولا هو بيقولوا شنو ؟
أها إنت كيف بنتك الله يحفظها ما مبهرة ؟؟
الله يرحم محمود عبد العزيز والله كان قلت ليهو أعمل لينا شريط إسمو يا مبهرة ..


وضاحة خيتي :
اللينك حقك ده فيهو إنبهار ولا دي صورة مبهرة ؟

يا جنابو ..
ربنا يخليك ليك أولادك الحلوين ديل..
أها هم مبهرين ولا عاديين ؟؟
غايتو طالما إنهم مريخاب ما أتوقع يبهروك فالإنبهار ماركة هلالية بحتة .. :)
عليك الله شد حيلك في الماستر ده عشان تحرز ليك نتيجة باهرة كده تبهر بيها ناس البورد ديل ..
ولمن تخلص خلينا نجي نعمل لينا مجمع طبي .. :)

الرفاعي يا حجر ..
إنبهرت جداً لمن عرفت إنك في السودان .. وزاد إنبهاري لمن ما لاقيتك ..
بالله كيييف بتنا المبهرة المهندسة الدكتورة ؟؟
غايتو الجبلابية دييك عجبنكية فقصة الإبهار دي غايتو إلا تجيها قضاء وقدر .. :)

تخريمة :
يا نابري ياخ إسمك ده بيديني إحساس رمضان رمضان كده يكون من شنو ؟ :)
قلت لي نو بودي نو كراي ؟ :)

يا عمر المنتدى دا مالوا اليوم بختفى عندى المشكلة دى عندك برضوا

الف مبروك ورينا يحفظ

الف مليار مبروك ياعمر الفاروق نجاح الابن محمد
وعقبال ما يتقلد أرفع المناصب بأعلي الدرجات العلمية

ودالفاروق والله إننا فى غاية الانبهار لهذا الابن المبهر.
إن شا ءالله دائماً منبهرين.

مليار مبرووووووك محمد عمر الفاروق والاسرة
وعقبال النتائج الكبيرة

الف مبروك لمحمد النجاح الباهر

واكيد مع الابهار ده بشجع برشلونة

بهرتني بهرتك ببهرت المبهورة بانبهارك من الدكترة
حفظ الله الباهرين و المبهورين و البيبهرو
رمضان كريم و كل عام و انتم بخير بمناسبة الاسراء و المعراج

احكي ليك البهرة دي وقتي كده
خشيت اقطع لي تذكرة سفر اون لاين لقيتها بعشرة الف ريال عملت الحجز و قلت امشي ادفع في الكاونتر كاش
التذكرة ( الرياض - كوالالمبور - الرياض )
مشيت كاونتر بالغلط و لقيت واحدة من اهل الشام حليوونة كدي
اديتها الورق و قلت ليها داير ادفع التذكرة دي
قالت لي ما عندنا لكن ممكن اقطع ليك نفس التذكرة بي سبعة الف ريال
انبهرت ووافقت طوالي طبعاً
وقد كان و شلت التذكرة و مشيت العربية و قلبي ماكلني و في نفس الوقت منبهر و مبهور بالانجاز
راجعت التذكرة لقيتها ( كوالالمبور - الرياض - كوالالمبور )
رجعت لمكتب الحجز لقيتها شالت شنطتها و فتحت
ضربت ليها تلفون قالت لي ماشة اجيب ولدي من الحضانة ( خير شو في )
قلت ليها التذكرة فيها غلط
قالت لي ما صار شيء هلا برجع و بعدلها بس مسافة الطريق
هسي انا منبهر و قاعد في العربية منتظر اخر الانبهارة دي لقيت انبهارتك اقوي من انبهارتي

حموووودي حبيبي حصنتك من المسلط و من العين الشافتك ما صلت واولهم ابوك المسلط
ومبروووووووووك يا عزنا
عاد شن جاب لي جاب ؟
قايلو جابها منك ؟
الإنبهارة أم بهارة دي ورثتها ليهو عمتو سوما ,, والله صحي
اما إنت قوم لف

قبال تلف وصل سلامي لكل الشبيبة خاصة امو الحنينة ، تلقاها تشيل وتحفظ وتساهر وتذاكر
وإنت مباري لي النت زي الجداد الإلكتروني

صراااااحة كده ابهرتوني ..

الف الف مبرووووووووك وعقبال الشهادات الكبيرة وربنا يحفظهم ليك

الف الف مبرووووووووك وعقبال الشهادات الكبيرة وربنا يحفظهم ليك

اها النبهرك انا الانبهارة الما خمج في قصة التذاكر دي..
اتشوبرت وقطعت من ابو رخيص رياض خرطوم رياض للمبهرين و امهم..قوومي يا امهم يتم تاجيل سفرك..وقووومييا التذاكر اطلعي النوع المااا بتترجعي..انقر ما اخدت اذن من ناس الشغل قلت ليهم بس ماشي اوصل اولادي السودان قريييب هنا وبرجع.. وقد كان قطعت تذكرة ابو سريع وصلت الشفع المبهرين اخر محطة وجيت راجع..
طبعا خزلني سواق الطيارة قال ماراجع فورطني في قصة المغتربين والضرايب واصطريت خشيت البلد جووة..
مش مبهر عليك الله؟

اخوك واقف لي هسي منبهر بالسعر و بالتذكرة لمن مفكر اقطع لي خط واحد اضافي بالفرق عشان الانبهارة ما تروح

الف مبروك لمحمد عمر

وعقبال الدكتوراة


والعرس

ألف مبهور أقصد مبروك لى ولدك يا أبو عمير
أنا جد مبهور بى طريقة إنبهالك بى ولدك الماعايز تبهلا زيك وزي المنبهلين أقصد المنبهرين الآخرين بى أولادم وأولاد أولاد أولادم والتابعين.. مع انو ما فرقت صدق؟
غايتو ذكرتني الأستاذة دينا خالد عندما قالت (أهل العوض ما بشتروا للناس الجايين من هناك فرش معجون) .

الف مبرووك محمد

وربنا يحفظك

الف مبرووك يا عمر

الف مبرووك ام محمد

غايتو ياعمر محمد ده مفروض يكون بقى بروفسير من شدة انبهارك بيهو كل سنة

غايتو نقول مبروك ونشوف السنة الجاية


-
ربنا يعلي مقامو ياخ

أستاذنا الموصلي ..
شكراً للإنبهارة ياخ ..


عادل يا باهي الطلة ..
كرفتتك مبهرة ياخ ..

بدر الدين الطائف ..مسعول من الخير إنت أخو فوال الطائف ولا تشابه أسماء ؟؟


علي دفع الله :
أكبر من كده ؟؟

طبعاً يا عصام محمد ده مبهر لكن عندي الأصغر منو صلاح داك مبهر جداً خالص..أها صلاح داك النوع البيقول ليك بابا انا ما بحب المدريد بحب برشلونة ..حكمة الله يقول ليك برشلونة دي عديييل لا شق لا طق لكن يغلبو يقول ريــال مدريد مسميهو المدريد .. وانا لأني زول ديموقراطي في الكورة العالمية فمااا مركز معاهو في قصة برشلونة دي ..
المبهر أكتر إنو شااايف ابوهو بيحضر الدوري الإنجليزي فمرة فاجئني بي إنو بيحب شستر وحمداً لله إنو طلع متفق معاي في إنو شستر يونايتد مااا طلع شستر سيتي ..

أسمووز يا جنيد :
الزولة المبهرة ياااخ ..طلتك بهرتني حد الإنبهار كأنك محمد ولدي والله .. :)

أحمد حمودي ..
ح اكون مبهووور جداً لو طلع جدك إسمو حماده ..
شكراً يا راقي..

عباس عباس ..
يديك العافية يا مبهر..

طلحة يا ليبهر ..أقصد يا مبهر ..

أحيطك علماً بأن صديقي الأصغر محمد لم يتجاوز الرابعة FM ولحدي أسة ما بيعرف IS من Does غير أنه رغماً عن ذلك مبهر ..فهو تربية مغتربين .. كما ولا يفوتني أن أحيطك علما وإبهاراً بأننا ذات مساء جبنا شنطتو عشان نشوفو لو أكل باقي الساندويتش ولا لأ عشان ما يبووظ الشنطة فإذا بنا وجدنا ورقة مبهورة بتوقيع المديرة أقصد ممهورة بتوقيع المديرة وفيها جدول الإمتحانات فإكتشفنا أن المبهر محمد شغال إمتحانات ليهو أربعة يوم حيث أن ناس ال KG ما زي باقي الناس بيمتحنوا قبل إسبوعين ..
محمد مغترب فمن الطبيعي أن يكون مبهر فالإبهار لا يكلف سوى إنترنت بسرعة مناسبة مع أكاونت في سودانيز مع قليل من اللاب توب ..
ولا شنو يا ليبهر ؟

عمر الفاروق ،

مبروك ياخي لإبننا العزيز محمد

ومزيد من النجاح



مامون

حيييدرا ..
ياخ شيييل ليك كيس موووز ..
إجااابة صحيييحة والله ..
كده يادوووب إقتنعت بيك معجب ..هي قصدي مبهر ..