حكاوى بنات

اولا الشكرموصول للاخ يحيى قبانى على تذكيرى وايضا تشجيعى ببوسته الجميل الممتع عن الحكاوى

والبوست ده اخدنا الاذن قبل شهور لكتابته لكن الله ما رفع اليد على الكيبورد
ح انزل الحكاوى دون تدخل او اطلاق احكام

القصص الجاية تعكس مدى البعد "القيمي" البقى بينا بين اجيال التمنينات و التسعينات
ولمن يجو ناس الالفينات كان حضرناهم ونحن واعين لسه.. ح نطلق غصبا عننا
اعذرونى يا نادية وحنان قد اعقد بعض المقارنات بينا و بينكم وقد تكون فيها شبهة احكام
لكننا تعارفنا بما يكفى لينفى ذلك
وانا عارفة انتو ماضين شيك على بياض و اديتونى يدى مطلوقة الحرية

غايتو كمان البت دينا البقت تجى بالشبابيك دى حكايتها شنو ما عرفنا..
يا بت تعالى بالباب خلينى نقالدك

اعتذر لل 182 مشاهد انو دخلوا ممنين نفسهم بقصص واسرار بنات يا عملات سيدتى و زهرة الخليج
ما لقوا غير مقدمة
النصيحة ما حركة منى لكن كتبت المقدمة ورسلتها
بعد داك النت قال لى ياخى انتى !!!!
________________________________
قبل شهور عددا جانى خبر بكا حااار ... وانا فى قمة الكسل و الفتر و لكن مافى طريقة غير امشى ...ضربت لواحدة من الفرد ان اغيثينى و تعالى وصلينى قالت لى والله انتى محظوظه خلاس انا زاتى ماشة قريب من المكان ده .. بس على شرط اوصلك البكا و تمشى معاى مشوارى عشان انا برضو كسلانه امشى براى

يااااادى الشروط اصلوا الزول ما يعمل حاجة لوجه الكريم.. .. بعد استيضاحات و معرفة المشوار وين و لشنو .. والقصه ما بتاخد اكتر من 5 دقايق وافقت و حسيت انى دقستها كمان..

المهم سريع سريع لفحت توبى ومرقت.. مما قايلة الزمن بودينى و بسمع



خلصنا الفاتحة فى 10 دقايق و اتوجهنا لمشوارها ال 5دقايق بقن 4 ساعات بالتمام والكمال

بدأت ما معقول كده فى زمتكن كما دخلتن يا جماعة عيب السواد بس من خشم الباب ما ممكن

طيب تعالوا ادخلوا سلموا على امى ياها راقدة فى الحوش

طبعا فرترب نزلنا ده كلام بعده مافى رد..يعنى كنا ح نقول ابينا ما دايرين نسلم على امكم!!!



المهم دخلنا بعد شوية جا البارد والهواء ضربنا والونسه دورت

والفتر اتحلحل و اتجدعنا فى كراسى وهيطة و نسينا الزمن

ياخ ده انا سمعت قصص فى الدنيا دى عجيبة

بنات لذيذات بشكل ما عادى..

نكتة حاضرة.. حس فكاهى عالى.. ولا كمان كلام حبوبات عجيب و امثال شعبية لا ليها اول لا اخر

اول مرة اشوفهم عاملونى كانى اختهم وبعرفونى من سنين

كلام مباشر .. مافى غتغته و لا توجس



احتمال لانو فردتى شخصية معروفة باحترامها للاخرين و خيارتهم وبالتالى حسبونى معاها ولله الحمد



المهم نادية وحنان صاحبات و بنات حله وشغالين سوا يعنى تيمان برقو الما بتفرقوا

الونسه العامة مدورة بدان يتكاون قامت نادية قالت لى اسمعى بما انك اول مرة تجينى

احب اعرفك انو البت حنان دى بتاعة جكس

قلت ليها طيب مالو ,, الحب عيب؟؟

قالت لى حب شنو ياخ الزول اسأليها قولى ليها اقل مرة كيستى فيها كانوا كم

قبل ما استوعب السؤال ... باغتتنى ياخ دى مرة كان عندها 13 فى الخط

سجمى كيف يعنى ..قبلت على حنان استفسر منها لقيتها عااااادى كانو مافى شى

قالت لى دى كضابة لكن 7 ممكن

7 فى وقت واحد؟؟؟ قالت لى ايوه

قلت كيف يعنى

عاااااادى تقفلى التلفون من ده يضرب ليك ده

تشربى العصير مع ده تاكلى الساندويتش مع ده

وخلاس

وخلاس؟؟؟؟؟ كيف يعنى

يعنى كده هووووى ما تفهمينا غلط يمين علاقتنا ما بتتعدى الونسه و الشراب والاكل

وفى اثناء انا ما باخد وادى مع حنان ..نادية من هناك تفك فى التعليقات

شفتيها قليلة ادب كيف؟؟ شفتى شفتى؟؟ ما بتخجل دى.. دى بت عينها قوية

اتكلمى معاها و عيها واهديها

المهم قمت قبلت على نادية قلت ليها صاحبتك بتبالغ

وانتى وقت ما زيها..... قبل ما اتم جملتى

قالت لى برى يا يمة برى برى انا ابرى منها

زيها بى وين .. انا اصلووو اصلو ما بفوت التلاته




يتبع كان الله شاء

ازيك يابت المجمر

Quote: انا اصلووو اصلو ما بفوت التلاته

ههههههههههه تلاتة بس !!
والحالة بتقول ليك وعّيها واهدّيها
و المصيبة انو اي واحد من التلاتة او السبعة ديل كمان هو بي لستتو و القصة عييييييك
بركة غايتو الماحضرنا الزمن دا :)

Quote: هههههههههه تلاتة بس !! والحالة بتقول ليك وعّيها واهدّيها و المصيبة انو اي واحد من التلاتة او السبعة ديل كمان هو بي لستتو و القصة عييييييك بركة غايتو الماحضرنا الزمن دا :)

طبعا يا ود البشرى انا اصبت بهاء السكت ثم ضحكت حتى انكفيت و هى كمان

المهم النقاش مدور مع البنات ديل فى نصو قلت اتكلم عن تجربتى
قلت ليهم والله والله انا كيست فى حياتى دى زول واحد و اتزوجتوا
نطت حنان قالت لى وووب على ووووب على
سجم خشمك ما ضيعتى حياتك عديل
شفتى شنو للدنيا انتى

__________________________
يا جماعة انا قاصدة ما اضع اى علامات او وشوش

يا سهام ..يا مجمر..
أها السبعة الهي غاشاهم ديل بيكون اييي واحد منهم برررضو عندو سبعة زيييها..بيضرب ليها هي وبيشرب العصير مع ديك وبيضحك مع تالتة وو و و
بس عليييك الله طلب صغييير ممكن؟ مااا تقارني بين الأجيال وزمننا وزمنكم كده طوااالي ح تلقيني نااطي ليك في كيبوردك..انا جننني وجن الحنك العاضي بتاع زمنا وجيلنا وزمنكم وجيلكم ..بالججد عندي منو فوبيا

تحياتي وسلامات عزيزتنا سهام

Quote: تشربى العصير مع ده تاكلى الساندويتش مع ده وخلاس وخلاس؟؟؟؟؟ كيف يعنى يعنى كده هووووى ما تفهمينا غلط يمين علاقتنا ما بتتعدى الونسه و الشراب والاكل

هنا مربط الفرس
الضائقة الإقتصادية يا سهام الضائقة الإقتصادية
الناس بقت عملية جداً
زى ما ناس السياسة كانوا بيقولوا في العراق النفط مقابل الغذاء
هسع في السودان بقت التجكيس مقابل الغذاء

عشان كدا

صاحبتك القالت ( انا اصلووو اصلو ما بفوت التلاته ) ليها حق تنخلع عندما قارونها بالتانية فهى المسكينة قد إكتفت بـ ( الحد الأدنى الضروري للحياة )
إكتفت بالثلاث جكس ليتكفلوا بالوجبات الثلاثة أو وجبتين وعصير وشاى الصباح
أما أم سبعة فدي بتكون دخلت في الكريمات والكوفير وحق الزيارات و.........

أما أم ( 13 ) ديك فاحتمال تكون دخلت في بند الفسحات خارج السودان




_____________

كيتًا في عمر الفاروق

يا حليل زمنكن إنتن يا التقيلات وراسيات وعينيكن مليانة
الواحدة تكيس واحد وتخاصم كل زملائها

سهام المجمر
سلام وتحية
سبعة
في نفس الوقت
يعني الواحد كل شوية يركب وش جديد ونغمة جديدة واسلوب جديد ..
من كل بستان زهرة ..
والله جيل مبدع كل الحياة عندو ايزي وتيك اوي ..
كمان عشان تختار في النهاية على بينة وبعد المقارنة والمفاضلة ..
ناس الثمانينات ديل مصعبنها على نفسهم كانو ...

يا عمر يا فاروق سلامات و تحايا

Quote: أها السبعة الهي غاشاهم ديل بيكون اييي واحد منهم برررضو عندو سبعة زيييها..بيضرب ليها هي وبيشرب العصير مع ديك وبيضحك مع تالتة وو و و بس عليييك الله طلب صغييير ممكن؟ مااا تقارني بين الأجيال وزمننا وزمنكم كده طوااالي ح تلقيني نااطي ليك في كيبوردك..انا جننني وجن الحنك العاضي بتاع زمنا وجيلنا وزمنكم وجيلكم ..بالججد عندي منو فوبيا

فوبوب فوبيتك ساى
ح نقارن ح نقارن :):):)

يعنى يا عمر معقوله انتو تجكسوا قدر ده و نحن ما نحقد عليكم :)

يا عمر يا فاروق سلامات و تحايا

Quote: أها السبعة الهي غاشاهم ديل بيكون اييي واحد منهم برررضو عندو سبعة زيييها..بيضرب ليها هي وبيشرب العصير مع ديك وبيضحك مع تالتة وو و و بس عليييك الله طلب صغييير ممكن؟ مااا تقارني بين الأجيال وزمننا وزمنكم كده طوااالي ح تلقيني نااطي ليك في كيبوردك..انا جننني وجن الحنك العاضي بتاع زمنا وجيلنا وزمنكم وجيلكم ..بالججد عندي منو فوبيا

فوبوب فوبيتك ساى
ح نقارن ح نقارن :):):)

يعنى يا عمر معقوله انتو تجكسوا قدر ده و نحن ما نحقد عليكم :)

سألت حنان قلت ليها طيب لو فى واحد زراك مرة مع التانى تعملى شنو؟؟
قالت لي ياخ انتى ... ما دى ما انا
كيف يعنى دى ما انتى قالت لى شوفى
"دى ما انا" شعار متعارف عليه
لو جاك مسكى من يدك و لفتك عليه و قال ليك سهام
تقولى سهام منو؟؟؟


وبالمناسبة دى خلينى احكى ليك قصة

والله جككستو لممممن عينكم طلعت ..ونون النحل راجعة لي جيلكم ..
بالمناسبة الجيل القبالكم بيشوف انكم برضو كنتن قليلات أدرب لأنو في زمنهم هم زاااتو جككس مااف حتتى لو واحد..
قصة بحبو يا أبوي دي كانت إنطلاقة بالنسبة للجيل القبالكم مش؟
أها إنتو جيلكم ده هو البدا الانحدار وتبوييظ القييم ..حليييل زمن البت بيدوها للراجل قبل ما تشوفو ..ود عمها ويعقدوا ليهم من صغااار بي الفاتحة ..
جا جيلكم وخرب القصة وجابت ليها حب ..
اها جيلنا ورثها من جيلكم بس مع زيادة العدد ,,ةالمتوالية شغالة ..
الجيل القبلكم ماف.. جيلكم بقا واحد..جيلنا تحب تلاتة..الجيل الاسة سبعة ..وين المشكلة ؟

سلامات يا عاطف عمر
والله انا ما بقدر اربط الكلام ده بالضائقة الا قتصادية
لانو البتنين ديل شغالات و وعندهم دخلهم و كلامهم ما عندو علاقة بالعضة
ياخ ديل مقرشات عديل .. وكريمات جدا.. اعزمت عندهم فى البيت مرتين
ما عرفت اكل شنو زاتو!!!!!!

صعب يا عاطف نتكلم عن اسباب من غير دراسة حقيقية

ممكن يكون فى بنات بيعملوا كده لحوجة اقتصادية
وبرضو العلاقة ما تتعدى حدود الونسه والوجبة فقط
لانو لو حاولنا ادخال المجموعة البتتعدى كده
بكون طلعت من مجموعتى محل الحكاوى ده

انا من عرفتى للبنات ديل بديت افتح عينى اكتر على مجتمع البنات
وبديت اسأل بنات صاحباتى وبنات اسرتنا ..عن البشوفوها و بيسمعوها و بيعيشوها
ممكن اكون غير دقيقة فى تقييمى لانى برضو ما عندى احصائيات
لكن من "الملاحظة" القصة بتاعت الجكيس البلا عدد ده منتشرة
لحد انا ممكن اقول انها ظاهرة تستوجب البحث والدراسة
مش المحاكمة الاخلاقية و القيمية

يا عمر يا فاروق
انا لا احاكم احد وارجع لمقدمتى و ردى لعاطف عمر

Quote: صعب يا عاطف نتكلم عن اسباب من غير دراسة حقيقية

ليس حكماً يا سهام
فالحكم يتطلب إبتداء معرفة أطراف الموضوع....
وأنا لا معرفة لى بهذه الأطراف

فقط ظننت أنه عندما يكون الحديث في ظواهر تحدث في ( مسرح االلامعقول ) ظننت أن تطبيق المعايير القيمية يكون أيضاً لا معقول

لقد نظرت إليها من ذات منصة المسرح .... مسرح اللامعقول
ربما ساعدني أو أوحى إلى بذلك روح البوست الذي يستغرب ما نراه


هذا كل مافي الأمر

Quote: ركمان عشان تختار في النهاية على بينة وبعد المقارنة والمفاضلة .. ناس الثمانينات ديل مصعبنها على نفسهم كانو ...

سلام يا ود الفكى
البنات ديل قالوا علاقتهم بالزول تستمر لغاية ما يجيب سيرة العرس
او ما يقول خلاص انا داير لى اهلك
طوالى تانى التلفون ما بيرفعوا للرد عليه
يعنى بيقطعوا علاقتهم بيهو تماما

مادايرين عرس و رجال واسرة وازعاج

يا عاطف يا عمر كدى جر بنبرك و اسمع دى

صاحبتهم سعاد مخطوبة رسمى
وعندها ناس الونسة
فى يوم اخدت و نستها مع واحد من ناس الونسة
وخلاص مقدمها تركب المواصلات من الشهداء
وفى الشهداء شافت خطيبها واتلاقت نظراتهم
واتحرك جاى عليها .. فى لحظة جات مارة ركشة قدامها من غير كلمة
نططت فى الركشة وقالت ليها بس ارمرقنى من هنا
طلعت على لى برة شوية
طوالى وقفت امجاد و قالت ليهو بس طير ودينى .....
وصلت البيت من خشم الباب بدأت تقلع فى هدومها
ونكشت شعرها
وجرت لبست ليها جلابية ما بتلبسها الا للخدمة
وعلى الحمام طلعت سبت الغسيل و وجابت ليها طشتين ختتخم فى نص الحوش
شالت كمية من الهدوم من غير تغسلهم بالصابون بلتهم بالموية و شرتهم طوالى وملت الحبلين
بعدين جرت البنبر وختت ليها بافى هدوم تغسل فيهم براحة
وما نست رشرشت الحوش رشريش العدو

المهم مع اكتمال المشهد
خطيبها دق الباب وبما انها فى الحوش و بتغسل فتحت ليهو
الولد قالت فتح خشمو وبعاين ليها وما قادر اتلكم
بسم الله مالك
بعد مساااافة قدر يقفل خشمة عشان يفتحوا تانى قال ليها
انتى الليلة ما طلعتى من البيت؟؟
بكل سخط الدنيا ردت عليهو بى وين
ودى حالة يطلعوا بيها
الولد مسك ليك يا سبحان الله يا سبحان الله

Quote: الولد مسك ليك يا سبحان الله يا سبحان الله

لا...لا.... لا
نحنا زاااااااتو
لا نملك إلا أن نقول

يا سبحان الله يا سبحان الله
ولا دائم إلا وجه الله




______________

كامل إعتذاري لمسرح اللامعقول

Quote: مادايرين عرس و رجال واسرة وازعاج

سهام

يعني ممكن يجي يوم يتلاشى فيه الحب ويختفي

و يكون الحب من التأريخ و مجرد ذكريات بشرية

يوم الناس تكتب وتحكي وتقول انه كان في قديم الزمان قبل عشرات السنين

كان هناك عاطفة انسانية اسمها الحب وكانت تسبب المعاناة اللذيذة والسهر الجميل

وكان القدماء يخلصون لها ويتعذبون عذاب ممتع في سبيله ؟

ومع تطور الحياة البشرية اختفى .. ؟ ؟

رغم انو البوست قلتي للحكي

لكن حقيقة ظاهرة تستحق الوقوف عندها ومعرفة كنهها ودوافعة واسبابه

وبجي راجع ان شاء الله

سهام يا مجمر..تحيات كتارات..
غايتو لو قصة الغسيل دي للونسة ساي فمااالو نتونس..لكن لو عايزة تتعاملي معاها على اساس انها حصلت حقيقة فدي فيها مليون حاجة ما منطقية اهمها انو زول تقع عينو في عين خطيبتو وما يفرزها انها خطيبتو ولا and#65271; ده زااااتو ما بيحتاجو يتعبو ليهو قدر ده ..يرمو ليهو الدبلة فييي وشو..

حاضرين ..

انا حاجز المقعد البين ود الشرى وعمر الفاروق
وقصاد عاطف عر ..



هي حكاوي بنات جد جد يا سهام ؟

الأخت سهام سلامات
وسلام لضيوفك الكرام
طيب ديل عاوزين شنو ؟؟؟؟

Quote: البنات ديل قالوا علاقتهم بالزول تستمر لغاية ما يجيب سيرة العرس او ما يقول خلاص انا داير لى اهلك طوالى تانى التلفون ما بيرفعوا للرد عليه يعنى بيقطعوا علاقتهم بيهو تماما مادايرين عرس و رجال واسرة وازعاج

Quote: اولا الشكرموصول للاخ يحيى قبانى على تذكيرى وايضا تشجيعى ببوسته الجميل الممتع عن الحكاوى

سلام يا بت المجمر ...

ياخي كتر الف خيرك ... ضيعتي وقت مع تخاريفي دي ...

بالله ما تتوقفي ...

وحكاية الردود بتمرقك من الخط ...

ناس عاطف ديل ( دقة ) قديمة ما تشتغلي بيهم ...

يا ود الفكى الدنيا ما معروفة .هههه
لكن الحب ده من القيم الما ممكن تنتهى ...

الاخ عمر مرحب بمرورك انا سألتهم نفس السؤال طيب انتو دايرين شنو؟؟
قالوا لى دايرين نقضى وقت لذيذ و ونتونس
قمت اتذكر موقف حصل لى مع بت شابة بعرفها و بعرفها اهلها مليون المية (الغريب انو نسيتو تماما ما اتذكرتوا الا مع البنات ديل)
المهم جاتنى زيارة الوقت كله قضتو فى الموبايل ..قلت ليها فى ذمتك التلفونات الكتيرة دى انا ما بتفترى منها
قالت لى مالك على يا اختى ناس و بيضربوا لى بيونسونى و بيرفعوا معنوياتى
قلت ليها والله فلان اخوك البعرف الواطة دى كلها يوم القاك مع واحد الا يكسر ليك راسك ده (مع اعتراضى على الفكرة لكن كنت خايفة عليها)
سجمى ومنو القال ليك انا قاعدة اطلع مع اى واحد ..
قالت لى شهد الله انا هسه بيحبوا فينى 23 وكلهم بيضربوا يونسونى وزول فيهم نافع للعرس مافى
قلت ليها طيب ليه؟؟
قالت يعنى ما املا بطاريتى ؟؟؟!!!
انا بخت تلفونى ده جنبى واسمع كلام حلو لما اما اعرفنى انا منو
واقفلوا وانوم..الصباح ما بكون متذكرة زاتو اخر زول اتكلمت معاهو منو

مرحب بيك يا انقابو خليك لسه القصص ما انتهت

يا عمر الفاروق كتبت ليك مداخلة بس ماعارفة مشت وين
النجيضة انى بقول يا عمر اى زول يدخل البوست ده يكتب العاوزو
يعنى لو عاوز تناقش الموضوع والله الف مرحب والله اى نقاش مفيد
بس اتمنى ان تتفهم موقفى انى مجرد راوى للقصص دى
باعتبارها قد تكون ظاهرة ..يعنى زمان يا عمر كان فى بعض البنات
ممكن يكيسوا زول و يكونوا عارفين انهم ممكن يعرسوا غيروا
لانو عندهم شروط او قول طموحات معينة فى العريس
اغلبها بتكون مادية (جاهزية العريس)
بس يكيسوا اكتر من واحد فى وقت واحد
دى انا غايتو ما مريت بيها وسط معارفى الفى عمرى
بالنسبة لى الجكيس الب الجملة ده جديد

لاعتبارات علاقتى بالبنات ديل و معرفتى الشخصية بيهم ما دايرة اخوض فى تقييم اخلاقى ليس اكثر و لا اقل
وده موقف تحكمه مبادىء حقتى انا و اتفاق مع البنات ديل
القصص دى يا عمر حتى ولو بدأت غير معقولة الا اننى و من غير حليفة سمعتها منهن
كقصص حقيقية

مرحب بيك مشارك و مناقش فى البوست ده
واتمنى ان يدخل معك اخرين يديروا نقاش و تحليل كمحاولة عاطف اخوى


______________________________________
ناس الفيس بوك شكرا للمتابعة والمشاركة
وبالجد القصص دى حقيقية
تابعونا لو الله مد فى الاجال

يا بت المجمر
عموووماً كده كل الأطراف دي بتغش في بعض .. يعني هناك بيكون في واحد إسمو ود المجمر بيكون عندو أصحابو بيحكو ليهو نفففس المشاهد دي وبيقولوا ليهو تعرف انا مجككس لي سبعة بنات في وقت واااحد .. وهو برضو بيفترض نفس فهم زولتك بتاعت وانا خسارة شنو زول بيقول لي كلام حلو يرفع معنوياتي هو كمان بيكون بيقول وانا خسرااان شنو لاقي لي بت عـــويرة وهبلة بتصدق كلامي ده.. وبرضو زولك الخاطب البت ده ممكن عااادي يكون حكى لي ود المجمر إنو في زولة لاعب بيها وهي عاملة شفتة وقايلاهو ما عرفها لمن شافا مع زول تاني في السوق لكن هو عااارفا بس مستمتع بي القييم وقصة الدخلة والمرقة ..
الخلاصة إنو المنفعة مشتركة من الطرفين والبتسويهو كريت بتلقاهو في جلدا..
هي فعلاً ظاهرة لكن ظاهرة أسبابها معروفة لا تحتاج لي كبير عناء ..ما ضائقة مالية أبداً بل هو الفراااغ وحركة الدنيا وإيقاعها السريع مع إنتشار الميديا ..

نادية ذات نفسها عشان تثبت لى انو مافى مشكلة لو الزول اتقبض حكت لى قصة حصلت معاها شخصيا
قالت مرة قاعدة مجكسة فى امانة الله و عصيرها و ساندوتشها قدامها والونسة ماشة
شافت من بعيد واحد من جما عتها جاى عليهم
قالت للزول المعاها اسمع الزول الجاى ده قريب مرة خالى
وهى مرشحانى ليهو للزواج وانا طبعا ما عندى ليهو شى
عليك الله اتعامل معاهو كويس عشان العلاقة حساسة
المهم الزول وصل سلم عليهم
لقتو بعاين باستغراب طبعا و تساؤل
قامت قالت للزول المعاها عليك الله ممكن تجيب بارد
لما قام ..قامت قالت للزول الجديد الزول ده قريب مرة خالى
وهى مرشحانى ليهو للزواج وانا طبعا ما عندى ليهو شى
عليك الله اتعامل معاهو كويس عشان العلاقة حساسة
وانا هسه عاوزة احسم معاهو الموقف بالراحة

حنان مره قاعده مصنصنة هادية ورايقة ومجدوعة فى سريرها فى الحوش
جاها تلفون غلط ..من لغة واختيار للكلمات من المتصل عرفت انه زول ممكن يكون انصار سنة
المهم قررت تمسك بيهو زمن.. طوالى قلبت لغة وتعبيرات وايات قرانية
بارك الله فيك يا اخى لا حرج عليك ده حال الشبكة
جزاك الله خير مافى عوجة وهداك الله وايانا
المهم الزول قال ليها ياخ باين عليك زولة دين
ممكن اعرفك اكثر
قالت ليهو لامانع لدى والله طالما لا يوجد ما يثير الشبهة
المهم اتعارفوا هو بحقيقته وهى بشخصيتها الجديدة

حنان يا سيداتى وسادتى بت عادية بتلبس عادى مع الموضة وما عندها شغلة غير بطرحة الحكومة

المهم يوم الولد قال ليها ياخ انا عاوز اقابلك عسى الله ان يجعل فى لقاءنا خير
قالت ان شاءالله فليس فى ذلك حرج ان كانت النية خير
مشت الجيران جابت ليها نقاب ولبست عبايتها ومرقت عليهو

وقصة اخرى ...