النباتيون يعيشون أطول من آكلي اللحم

يا خالد ... صلي على النبي !
خالد - عليه الصلاة والسلام ...
يا أخي بطل حركات ومد يدك على الشية دي ! ... عليك الله دي شية بتعززو فيها ؟!
خالد - شكرااان ، لكن والله انا ما باكل لحمة
يا اخي ده كلام شنو ده ! ... كيف يعني ما بتاكل لحمة ؟!! في زول ما بياكل لحمة ؟!!!!
خالد - والله زي ما بقول ليكم كده انا من صغير ما باكل لحمة ،،، مش اللحمة وبس !
البيض، السمك وكده يعني !
يا عمر ياخ ما تكلم صاحبك ده !
عمر - والله خالد ده زي ما قال كده عمرنا ما شفناه اكل لحوم !
يعني هسا انت ما بتاكل جقاجق، ام فتفت ، والضلع ؟؟!!! .... والضلع ده خصوصا عليك الله قول لي بتاكلو !!
خالد - ابدا والله ما باكلو!
يا اخي حيرتنا ذاتو ! ... طيب اها انت عايش على شنو ؟! اوعى تقول لي فول وطعمية وطحنية و خدارات ؟!!
خالد - بالظبط كده ... المنتجات النباتية بس !
يا اخي والله انت نص عمرك ضايع !!!
يعني هسا ان عمرك ما اندحت ليك في شية جمر !

يا عمي فضُل عليك الله كلم لينا الزول ده
عم فضل - والله يا خالد ولدي امرك عجيب ، بس عليك ان تعرف انو ربنا سبحانه وتعالى احل لينا أكل اللحوم جميعها ؛ ما عدا الميتة والدم ولحم الخنزير وما أهل لغير الله به
والمنخنقة والموقوذة والمتردية والنطيحة وما أكل السبع إلا ما ذكيتم وما ذبح على النصب، والكلام ده انت عارفو طبعاً ! ده غير فوائدها الغذائية من بروتينات وخلافو !
خالد - والله فعلاً الكلام ده انا عارفو ،،، بس نقول شنو ؟!!! اللحوم دي ابدا ما بقدر آكلها !

فتحي - يا جماعة الزول ده أكيد عاملين ليهو عمل !

Quote: واشنطن - ي ب أ وجد باحثون أميركيون أن النباتيين قد يعيشون لفترة أطول من آكلي اللحوم. وقال موقع "هيلث داي نيوز" الأميركي إن دراسة أعدّها علماء من كاليفورنيا وشملت 73 ألفاً و300 شخص أظهرت أن النباتيين أقل عرضة، من آكلي اللحوم، للموت لأي سبب محدّد وواضح، في ما عدا السرطان. وقال المعد الرئيسي للدراسة الدكتور مايكل أورليش، من جامعة "لوما ليندا" إن بعض الأنظمة الغذائية التي يتبعها النباتيون مرتبطة بتراجع الوفيات لأسباب محددة مثل مرض القلب والكلى والغدد كالسكري وغيرها. وأضاف أورليش أن التقليل من تناول اللحوم قد يكون أحد الاسباب في ذلك، لكن قد يكون السبب أيضاً زيادة كميات النباتات التي يتم تناولها. يشار إلى أنه خلال فترة الدراسة التي استمرت 5 سنوات توفي 2570 شخصاً لكن النباتيين كانوا 12 بالمئة أقل عرضة من آكلي اللحوم للموت لأي سبب محدد. وأظهرت الدراسة أن فوائد اتباع نظام طعام نباتي أفضل للرجال منه للنساء.

http://www.alriyadh.com/2013/06/05/article841157.html

Quote: وشملت 73 ألفاً و300 شخص أظهرت أن النباتيين أقل عرضة، من آكلي اللحوم، للموت لأي سبب محدّد وواضح، في ما عدا السرطان.

عزيزنا أيمن ،
سلامات،

حتى سرطان القولون يقال أن اللحوم الحمراء عامل مساعد في تسبيبه وقرأت سابقا أن
ذلك النوع من السرطانات يصيب الأمريكيين أكثر من غيرهم بسبب تناولهم اللحوم الحمرا
بكميات تجاريه ويقل عند اليابانيين بسبب ميلهم للحوم البيضاء وتحديدا الأسماك.

بالنسبه لحكاية صاحبك الذي لايهوى شية الجمر أو الضلع أو عمليات قندهار فأمثاله
كثر ، ثمة عضو في هذا المنبر نباتي ولايأكل أي طعام يحتوي على منتج حيواني..

أخيرا : الصحن الجايبو في الصوره دا لو لقيتو ثلاثه وجبات لن ألتفت لغيره.

موده معطونه في عسل..

متذكر كان في عزومة في الموناليزا ، الهبرات كلها موجودة في واحد زي صحبك دا مشى جاب سندوش طعمية وقعد ياكل فيه
قلنا ليه يا زووووووووول تخلي الحاجات دي كلها وتاكل الطعمية ، قال لينا أييي انا كده مرتاح ، ههههه اشفقت لحاله والله،
لكن في نباتيين نص نص يعني بياكلوا اللحوم المصنعة لكن البتكون مضبوحة ودمعة وشية وحاجات زي دي ما بياكلوها.
عالم عجيبة

ازيّك يا ايمن

Quote: أن النباتيين قد يعيشون لفترة أطول من آكلي اللحوم.

اطول بكم يعني؟ سنة اتنين تلاتة!!
الأعمار بيد الله دا أولا
ثانيا علي اليمين السنكيت و الأقاشي و الكوارع و شية الجمر المتعة البوفّرها اكلهن كان قسناها بالسنوات بالميّت كدا بتجيب ليها من خمسة لـ عشرة سنة :)

محمد المرتضى حامد ،،، سلامات
اعتقد انك تتفق معي انه من الانصاف ان نتفهم نباتية النباتيين، رغم ان الكثيرين لايتفهمون ذلك للأسف
واذكر الآن ان احدى قريباتي تم فسخ خطوبتها بسبب اكتشاف الخطيب انها نباتيه ! بحجة ان هذه فلهمة !!!
ومن الغرائب ان احد اصدقائي نباتي ولا يأكل حتى الفاكهة ! وبنت عمي غير نباتية ولكن لا تشرب اللبن (الحليب) ابداً !