ايــوا،،، كُنا قاعدين نبشّر بالمُنفاخ في حفلآت اللعراس. والله صحي...

شلة من العطبراويين كانوا بيساهروا مع بعض ويسنسِنو.
وآحد منهم قام إتزوّج وإعتزل الشِلة لمدة شهر. أها بعد
قضى من المرا وطرا راح راجع للشلة. ضرب السِنّة
وساهر مع الجماعة، وحوالي الساعة إتنين صباحاً رجع
البيت لقاليك المرا قاعدة في قلب السرير ومبحلقة.
قال لها، يا مرا مالِك، المصحيك لي هسّع شنو ؟؟؟
قالت ليهو، يا راجل راجياك، إنت إتأخرت وين ؟؟؟
قال ليها، يا ولية ما إتأخّر، كان إتأخرت، أنا مأجّر
مِنِّك عجلة !!!؟؟؟...

حكاية ناس عطبرة بيخُتوا رُقعة في الكشف دي ما حاصلة،
لكن حكاية البِشير بالمنفاخ دي صُح...

http://www.youtube.com/watch?v=A6ypQ_WySsM

الجماعة ديل أكان عندهم أخوهم إسموا دفع الله
غناي، وفرايحي جداً في الغُنا.
أها، وكت يغني المنافيخ دي تترفع في السماء...

العجب لآمِن الزكار يغني قطار الشوق، أو جعفر أحمد
يغني المرعى !!! المنافيخ دي ما تديك الدرِب، وكأنّ
مسار النقع فوق رؤسنا ليل تهاوى كواكبه...

ماشي

Quote: لكن حكاية البِشير بالمنفاخ دي صُح...

بِشيّر بس .. اها والمنفاخ كيف وقت يشيلو العريس في الكتف


ــــــــــــــــــــ..
بمناسبة السنسنة والمرا وكدة .. سمعت بقصة القاعد يسنسن مع نسابتو مِلح ..بعدين اتضايقو منو ودسو العرقي ..

ان ما سمعتها ولا بقدر بحكيها لا شئ

Quote: ــــــــــــــــــــ.. بمناسبة السنسنة والمرا وكدة .. سمعت بقصة القاعد يسنسن مع نسابتو مِلح ..بعدين اتضايقو منو ودسو العرقي .. ان ما سمعتها ولا بقدر بحكيها لا شئ

ما من نكتة كهذه إلا ولها حيدر الحنين،
يختها ليك ظط.
والله صحي...

Quote: بمناسبة السنسنة والمرا وكدة .. سمعت بقصة القاعد يسنسن مع نسابتو مِلح ..بعدين اتضايقو منو ودسو العرقي .. ان ما سمعتها ولا بقدر بحكيها لا شئ

كيفك يا ادارة
شفت ود اهلي ده بتاع مشاكل كيف؟
داير يغَتِّس ليك حجر البوست.
****************************************************************
واحد من ناس اتبرا قال والله انا مابيقيظني الا السجارة عند الكَنَّارة
قالوا ليهو كيف؟
قال: الواحد تلقاهو خالف كراعو فوق الـ حـ مار من فوق للبرسيم ويبخبخ.

Quote: حكاية ناس عطبرة بيخُتوا رُقعة في الكشف دي ما حاصلة،

والله يا ود المدير انت يوم بتكتل ليك زول في البورد دا

الله يجازي محنك :)


انت أسة بعد الحنك دا كلللللو عندك رالي ولا مدردق من العالي :)


كدا جاوب بعد داك نشوف البشير بالمنفاخ دا حنكو شنو

ودالمدير اضحك الله سنك ياخ.
والله متعة المتعة.
وعلى سيرة الحفلات والعجلات .
لى عودة وبجى بحكى ليك عن ودابوزهانه (الفنان العجلاتى )وطرائفة.

Quote: والله صحي...

اخونا منير نبَّه صاحب هذه اللازمة
وذكره ان هذا يعتبر قسم ـ ولما كان قسم بعظيم
نصحه ان لاييقسم به مزاحاً ـ قلت انقلها ليك هنا
وانا عارفك ود صالحين مابتردني.
المؤمن مرآة أخيه وانا اخوك موهييك؟

Quote: لكن حكاية البِشير بالمنفاخ دي صُح...

واحد جارنا كان شغال عسكري طشَا سنين .. أهلو فرشوا ... إفتكروه مات ،
يوم الناس قاعدة في صينية الغدا يسمعوا ليك صوت بوري بتاع لوري
مرقو لقوهو ليك المرحوم زااتو .. مالي اللوري عفش وكرور ماليهو اول ولا اخر
حلف ما يدَلى من اللوري لو الحلة كلها ما مرقت لاستقبالو ..
اتاريهو دقش ليبيا كداري من جيهة الغرب مع شلة عساكر .. جدعو الكاكي في الحدود
بعد ايام كان في عرس واحد من اولاد الحلة .. حفلة مجيَهة تب
اشوف ليك الشباب يبشَرو بالجواز اللخدر .. اسبوع والحلة عدمت الضكور

اختو بس حيدر الزين العوجه ما بتجيكم ..
و .. واصلو ياخ

Quote: واصلو ياخ

حرررم ياولدنا نطيَب خاطرك الغالي

قريبا لينا سمين ومدغلب حرد المدرسة من المتوسطة ..
اخوانو الكبار مغتربين ... قالوا دخلوه اي ورشة يتعلَم صنعة ولزَووه لينا
واحد من اولادنا المساخيت كلفوه بالشغلة دي
ساقو لصاحب محل تصليح عجلات .. ومرات عربات وسراير وكل شئ
زولنا مبسوط طالع نازل بالابرول... واتعلم كمان تدخين السجاير
مرة سمع طراطيف كلام انو المعلم بتاعو "عجلاتي بالجد جد"
بقى يلاوز منو شديد .. قولة ياولد دي ينقز متل العتوت رغم صحتو التريانة
يوم قاعدين شلة في ضل دكان في الحلة .... نشوف ليك صاحبنا شايل منفاخ وكوز موية فاضي ونازل من البص
- يازول نعل مافي عوجة
- عوجة ساكت ... ياخي المعلم قال لي جيب منفاخ وكوز موية ملان وتعال لي في اوضة كده في نهاية المحل فيها الكرور بتاع الشغل
- طيب مالو ياسجمان
- دي كمان عاوزة مالو .. انتو مجانين ، الشغلة واضحة ياخ ، عاوز يغسل العدة قبل ياكل... والمنفاخ ده تمويه ساكت
----
واحد من الاوغاد قال ليهو .. غايتو المخ ده لو كان في ال ج ع ب ا ت .. كان بقيت بروفسير

Quote: حرررم ياولدنا نطيَب خاطرك الغالي

يا حيدر حسن ود المدير ده عرفناهو لسانو فلقة انتا مالك يا زول ..
الواحد بقى يلاوز من بوستات ود المدير كمان جابت ليها منفاخ ونسابة يدسو السنة اماااااك ..
انتو يوم بتشرطو ليكم زول ..



البوست ده شوف عيني بيلحق البوست حق راني الشهير بتاع الرندوك ..
الخور .. الخور ..

حباب ود المدير ..
حباب العطبراوييين ..

هههههههه المنفاخ
سمعتوا بي الزول الردف الطالب في عجلة ستاتي .. ههههههه

طيب اسمعوا دي من عكاز اظرف ظرفاء عطبرة :

عكاز مشه دكان بالحي .. وقال ليهو ..
عندك صابون حمام ..
بتاع الدكان : قال ليهو ماعندي ..
عكاز : طيب صابون غسيل
بتعاع الدكان : قال ليهو والله برضوا ماعندي ..
عكاز : طيب عندك زيت
بتاع الدكان : قال ليه ماعندي والله
عكاز : طيب طحنيه
بتاع الدكان : قال ليه ماعندي والله
عكاز : طيب أدينـــــــــــــا بيت عنكـــــــــــــــــــــــــــــبوت بي ألف جنيه ( خخخخ هههه)

Quote: أنا مأجّر مِنِّك عجلة !!!؟؟؟...

_
العجلاتية عالم جميل

Quote: بِشيّر بس .. اها والمنفاخ كيف وقت يشيلو العريس في الكتف

بِشيّر دي زي إسم الرئيس عشان كدا دايرين نغيرا لي سكسكة.
بدل كُنا قاعدين نبشّر بالمنفاخ، دايرين نقلبا نسكسِك بالمُنفاخ.

يا اخي قلّة العريس فوق الكتف دي عندها ناس مخسسين،
يعني ما أيّ زول بيقدر عليها، والناس ديل بيكونوا مراقبين
العريس وفجأة كدي يختفوهو وطبعاً هو لآزم يسكسِك بالمنفاخ.

يعني لو أيّ زول لفح العريس ممكن بالرآحة يحصل فاول...

Quote: واحد من ناس اتبرا قال والله انا مابيقيظني الا السجارة عند الكَنَّارة قالوا ليهو كيف؟ قال: الواحد تلقاهو خالف كراعو فوق الـ حـ مار من فوق للبرسيم ويبخبخ.

هههههههههههههههههههههههههههه،

يا عبد العزيز خلي حيدر الزين يجي يحكيلك لمان الكنارة كانوا
لآعبين ضد ناس السيالة.
يا اخي ديل أبو نخلة قاعدين يخمسوها.

مرّة مشينا لعبنا مبارأة في كنور. بعد المبارأة عزمونا شاي بلبن
في النادي وقدموا لينا سجاير،،،،،،،، تصدق!!!

Quote: انت أسة بعد الحنك دا كلللللو عندك رالي ولا مدردق من العالي :) كدا جاوب بعد داك نشوف البشير بالمنفاخ دا حنكو شنو

يا انقابوا نحن كُنا لآمن الواحد ينجح بيشتروا ليهو عجلة.
بناءً عليه أخوك العجلة إشتراها من حق بيع التمر وشُغل
المُوّنة، ثمّ قِس علي ذلك حيدر حسن ميرغني...

Quote: ودالمدير اضحك الله سنك ياخ. والله متعة المتعة. وعلى سيرة الحفلات والعجلات . لى عودة وبجى بحكى ليك عن ودابوزهانه (الفنان العجلاتى )وطرائفة.

يا بدر الدين ما زلنا في إنتظارك يا اخ.

عوض تايوتا زمان سجلوهو ناس حي العرب بورت سودان،
وكان مدربهم في تلك الفترة سليمان فارس. حكى لي شريف المليك،
قال لي لمآن عوض يوسف ظهر في اوّل تمرين سليمان فارس قال
للعيبة كل وآحد يعمل حركة. أها قال عوض يوسف رقد علي ضهرو
وقعد يبدِل بكرعينوا في الهوا،، سليمان فارس عاين ليهو وهزّ راسو
بإستغراب وقال، ناس عطبرة!!!، عجلآت سااااااكت !!!...

ود المدير

والحيدرين

الضيوف والمارين

السلام عليكم

يجازي محنكم ...خترين

بس يا ود المدير المنافيخ دي كلها ما قلت لينا العجلات بتكلوهن وين ؟

البلد الوحيدة الشفت فيها ثيرمومتر الحراة معلق في المحلات ياهي بلدكم الحارة أم غبار دي

كنت أعمل في أجيب سودان مرة مشينا مامورية لاتبرة تحصيل مديونيات وكدة

المحصلة كانت أن كل التجار الذين قصدناهم كانوا قد اشتروا بصل وعجلات ( بمنافيخا طبعا) بالقروش المفروض يسددوها لشركتنا

احدهم قال صراحة لو ما الاسعار ارتفعت وبعنا مافي ليكم قروش.


لديحين لداحة

Quote: اختو بس حيدر الزين العوجه ما بتجيكم .. و .. واصلو ياخ

حباب ود المشرّف.

عليك الله أقرعوا لينا من الحتة دي.

تصدق العجلآت دي كان عندها باركِن جنب دار الرياضة.
يعني تجي تبركِن عجلتك وتدفع حق الباركِن، وتمشي تحضر
الكورة بمزاج، وبعد الكورة تستلم عجلتك بالتمام والكمال
وبمُنفاخا كمان !!!.
سياسة البِشيّر (السكسكة) بالمنافيخ دي اصِلاً ولدتها ظروف خاصة
بالعجلآت، وتحديداً سرقة المنافيخ من العجلآت. حفاظاً علي المُنفاخ
من السرقة صاحب المُنفاخ بيشيلوا معاهو دارة الحفلة، وتلقائياً مع
الطرب المُفعم بالسِنّة بيصبح المنفاخ اداة للتعبير عن الطرب الذي
تملّك صاحب المنفاخ.
لو شُفت ليك عريس بيبشر بالمُنفاج فالطرب الذي يعتري العريس
غير الطرب الذي ذكرت انِفاً وكذلك المُنفاخ...

Quote: بس يا ود المدير المنافيخ دي كلها ما قلت لينا العجلات بتكلوهن وين ؟

دي ما معروفة
بتكلوها على الضلمة بتاعتم
ياخ ديل قالوا في زمن الفيضان بيلوكو الموية .

قبل شهرين في بورسودان كنا واقفين في الشارع نستقبل الضيوف الجاييننا لي عرس ود اخونا وكدى من مختلف الولايات.
جا ء عمر ود أخونا ابزيد شايل ليهو شنطة "حقيبة " وهو معروف من سكان بورسودان.
نط محجوب ود زينبية سالو:
" ياجنا انت جاي من اتبرة"
فرد عليهو عمر:

"ليه؟ شايفني راكب لي عجلة؟ "

رحم الله حمزة العجلاتي وسوق النص وعمك المفتي احياء او امواتا


انها عطبرة وكفي مزيج من كل شئ

المنفاخ زي الكافينول، يساعد علي
ترويح وجع الحلق.

لآحظ العجلة خلف نافخ المنفاخ. يعني بتاع الكاميرا
دا لو مرق برا أكيد بشوف لي زول بعرفوا...

ود المدير كيف حالك

عندنا أهلنا في عطبره طوالي كنت بمشي ليهم في الاجازه ساكنين حي المطار اخر حاجه جنبهم ميدان كوره وبعدو ترعه او حفير

نفس الشارع نهايتوا سوق الشمالي او الحصااي علي ما اظن السوق داااك فيهو صف عجيب للعيش ( الاسماء صااح ولا الكبر حصل )

عطبره جميله يااخ

ود المدير زمن الجهل

Quote: يا حيدر حسن ود المدير ده عرفناهو لسانو فلقة انتا مالك يا زول .. الواحد بقى يلاوز من بوستات ود المدير كمان جابت ليها منفاخ ونسابة يدسو السنة اماااااك .. انتو يوم بتشرطو ليكم زول ..

معقولة يا هشام كمال !!!

يا اخي حيدر حنين دا أظرط الظارطين.
كدي اسعلوا قولوا، قاعد تتكل عجلتك وين لمان
تمشي تزور الجماعة الساكنين جنب السينما الجمهورية ؟؟؟

ههههههههه،
الذّ حاجة عامل فيها نديد حيدر الزين. قال آيه !!!
قال ود المدير عوّد، قال !!!

سلّم عليهو يا كمال...

والله فعلا الساب عطبرة دقس

ما عندى ما قعدت فى عطبرة غير اسبوع ن لكن كل ما اسمع قطار الشوق الدموع تكابس

Quote: طيب اسمعوا دي من عكاز اظرف ظرفاء عطبرة : عكاز مشه دكان بالحي .. وقال ليهو .. عندك صابون حمام .. بتاع الدكان : قال ليهو ماعندي .. عكاز : طيب صابون غسيل بتعاع الدكان : قال ليهو والله برضوا ماعندي .. عكاز : طيب عندك زيت بتاع الدكان : قال ليه ماعندي والله عكاز : طيب طحنيه بتاع الدكان : قال ليه ماعندي والله عكاز : طيب أدينـــــــــــــا بيت عنكـــــــــــــــــــــــــــــبوت بي ألف جنيه ( خخخخ هههه)

هههههههههههههههههه،

يا خالد سعيد، السر عكاز مرّة كان طاشم مع المغربية كدا.
أها، قام وقع في العراضة بتاعت ميدان الحِلة. جات مرا
ماشة شافت الحاجة المكومة في المرمى، وفجأة كدا عرفت
دا عكاز،بي خُلعة قالت، سجمي السر عُكاز !!!
السر عُكاز قال ليها، لا،،،، حامد بريمة...

_
(العجلاتية عالم جميل )
ـــــــــــــــــــــــــــ
جداً.

مرّة غلبنا ناس فريق الجيل بتاع الدآخلة.
أها اليوم التاني مشيت ارقع عجلتي عند آدم العجلآتي في
سوق الدآخلة، لقيت ليك ناس الجيل متلمين عندو في الدكان.
اوآت ما شافني قالهم: ليلكم كوووولو تاكلوا في الباسطة
وتشربوا في الزبادي الصصصصصاقط
زي دا (مُشيراً ناحيتي) بيده، ياكلوا تمرتين
ويملأ بطنو موية عكرة ويجي يغلبكم !!!؟؟؟ يا ما فيكم فايدة...

ود المدير و الحضور

سلام

اديكم العافيه


الزبير

حيدر و ودالمدير ..

يا اخوانا ده ونس عطبراوى جميل جدا ..

كيفك ود المدير ..

يا خي أنا ما من عطبرة ولا حصل زرتها .. لكن بسال عن فنان جميل من عطيرة اسمو معاوية عبد العزيز ..!! وين الزول دا بالله ؟! والله الراجل دا ليو علي فضائل وجمائل عمري ما أنساها ليهو .. بس طولت ما قابلتو . ما بتعرف ليهو درب ؟!!

هو فنان قدير وملحن رائع وأظن والدو شاعر لأني بتذكر غنى كم غنية قال لي والدو واعتقد واحدة بتقول :

يا هو حال الدنيا بي جورا وصعابا
يوف تشرق يوم تغرب تدي للواقفين ببابا
دنيا لي ناس تبقى حلوة وتقسى للماشين غلابا ..

تقريبا الأبيات كانت كدة .!

وبرضو وعندو واحدة بيغنيها بتقول :

يا زمن ما تجور علي ولي عزابي أرحم شوية
جيتو شايل الريد غناوي لي قلوب صادقة وشجية

وكمان عندو تانية بتقول :

شارع بيتنا أنا بهواهو خطايا كتير بتمشيهو

وكمية من الأغاني .. معاوية دا أظنو من حي اسمو الداخلة لأني متذكر كان دايما بيدخل الاسم دا في أغانيهو ..!


بالله لتعرف الراجل دا أو عندك خبر منو ؟!

وهاك الهدية دي :

طبعا ياود المدير اتبرة دي لا تذكر والا واذكر البستي كولا الشربتها لاول مرة عند ناس يوسف بابكر

انا بطبعي ومنذ الصغر مربوط بالدامر حيث جدي لامي وحبوبتي من هناك
في احدى سفراتي واظن انا في اولى او تانية ابتدائي اخذتني خاتي المرحومة الأستاذة زبيدة محمد الشيخ الطاهر التي كانت تعمل مديرة لمدرسة بنات الدامر الاولية
لعطبرة لزيارة قريبنا يوسف بابكر. اها قمنا ركبنا تكسي المدريس الفولقا الماخمج(طبعا الواحد من الصغر كان متعود على الفولقات دي ) من اشعديناب مبااشرة لعطبرة .
وصلنا هناك يازول و قعدنا وجانا ليك الببسي الماخمج وانا سامع بانو صعب في النخرين.

يازول بعد مسافة ضقت ليك جغيمة صغيرة من القزازة جات مارقة بي نخرتي اليمين يعلم الله شفت ليك الناس ديل قدامي زي الراشينهم بي بمبان.
علىى العموم مافي زول لاحظ لي وختيت ليك القزازة فوق تربيزتها ورقدت في السري وعملت فيها عيان عندي وجع بطن حيث لايمكن لواحد عندو وجع بطن يشرب ببسي وقلت دي حيلة تفكني من
الشي دا .
يازول بعد شوية يجي المدريس ياخدنا للرجوع للبيت ومن هناك الخالة توجهو ليك على ميدان المولد لعيادة الدكتور فلبس مرقص محروس

يازول اخرتها انضربت حقنة في الج........ زي الورد واتنين دوا مر كان اخير لي منو الببسي

يالها من ذكريات

Quote: البلد الوحيدة الشفت فيها ثيرمومتر الحراة معلق في المحلات ياهي بلدكم الحارة أم غبار دي كنت أعمل في أجيب سودان مرة مشينا مامورية لاتبرة تحصيل مديونيات وكدة المحصلة كانت أن كل التجار الذين قصدناهم كانوا قد اشتروا بصل وعجلات ( بمنافيخا طبعا) بالقروش المفروض يسددوها لشركتنا احدهم قال صراحة لو ما الاسعار ارتفعت وبعنا مافي ليكم قروش. لديحين لداحة

بس طيبين وفرايحيين يا قرجة.
والله صحي.
أمشي ليهم لآبس افرول ورآكب عجلة وإنت تشوف، مُش تمشي
ليهم بتاع جبايات، الجماعة ديل ما فيهم حيّل.
حليل السكة حديد يا قرجة.
تعرف، وآحد من الرباطاب كنا نسميهو الصفق، وكان في عقله خلل.
أوّل مرّة يجي اتبرا صادف كان لآفي جنب وِرش السكة حديد وصادفت
الساعة تِسعة مواعيد طلوع العمال للفطور. أها، الراجل في غمرة دهشته
فجأة الصفارة ضربت وإنبهل العمال بعجلآتهم في الشارع، وصاحبنا
عضّ عراقيهو في خشمو ورقد وآطة ما وقف إلا قدآم أبونا الحاج حكيم
القرية، مسافة بتاعت حوالي 3 كيلو مترات، لقاهو بيضفر في الحُبال
قال ليهو: يا أبوي الحاج تضفر في حبالك والقيامة قامت في السوق الفوق ؟؟؟.

كانت كخلية النحل.
الله لا كسّب كل من شارك في إجهاضها...

Quote: ود المدير كيف حالك عندنا أهلنا في عطبره طوالي كنت بمشي ليهم في الاجازه ساكنين حي المطار اخر حاجه جنبهم ميدان كوره وبعدو ترعه او حفير نفس الشارع نهايتوا سوق الشمالي او الحصااي علي ما اظن السوق داااك فيهو صف عجيب للعيش ( الاسماء صااح ولا الكبر حصل ) عطبره جميله يااخ

أريت حالك زين يا سيد أحمد.
فعلاً جميلة عطبرة، وسوق الشمالي دا فيهو أحلى باسطة.
الحصاية يا سيد أحمد وهي من أحياء عطبرة العريقة.

السرعكاز ظريف عطبرة رجل سريع البديهة وبيقتبس كتير جداً من القرآن
رغم الطشمي. مرّة كان بتفرج في تمرين وتاكل عجلتو جنب العرآضة، مهاجم
شوآت جداً كبس الكورة في القون، جلّت من المرمى ووقعت في عجلة السر
عُكاز فتلتا، السر عُكاز عاين للعجلة وبسرعة شديدة قال: بِأيّ ذنبٍ قُتلت ؟؟؟...

Quote: رحم الله حمزة العجلاتي وسوق النص وعمك المفتي احياء او امواتا انها عطبرة وكفي مزيج من كل شئ

وليد يا عطبرة.

مرّة السر عُكاز جوهو ضيوف بالليل وكانت حالت البيت شلش.
مرتو قالت ليهو: سجمي يا السر، ديّل بيبيتو ؟؟؟
قال ليها: لا، روماريو ...

يا حيدر تديني إذن الصورة دي اعني الفيديو دا أوديهو محطة تلفزيونية هنا حتجيب استرليني عديل

كباشي الصافي


(العوج راي والعديل راي)

Quote: شكرا ليك يا مدير ع البوست الظريف

والله مشتاقين يا سلمى.

عبود عبد النبي برضو أحد ظرفاء عطبرة من
حي الدآخلة.

مرّة عبود لقى مرا مشترية خروف من وآحد، وضاربة
حِجة معاهو، قالت لآزم يديها مع الخروف قش، قام
عبود طوالي قال ليها: يا حاجة إنت مشترية خروف
واللآ مكيّف ؟؟؟.


منتظرنك...

Quote: في احدى سفراتي واظن انا في اولى او تانية ابتدائي اخذتني خاتي المرحومة الأستاذة زبيدة محمد الشيخ الطاهر التي كانت تعمل مديرة لمدرسة بنات الدامر الاولية لعطبرة لزيارة قريبنا يوسف بابكر. اها قمنا ركبنا تكسي المدريس الفولقا الماخمج(طبعا الواحد من الصغر كان متعود على الفولقات دي ) من اشعديناب مبااشرة لعطبرة . وصلنا هناك يازول و قعدنا وجانا ليك الببسي الماخمج وانا سامع بانو صعب في النخرين. يازول بعد مسافة ضقت ليك جغيمة صغيرة من القزازة جات مارقة بي نخرتي اليمين يعلم الله شفت ليك الناس ديل قدامي زي الراشينهم بي بمبان. علىى العموم مافي زول لاحظ لي وختيت ليك القزازة فوق تربيزتها ورقدت في السري وعملت فيها عيان عندي وجع بطن حيث لايمكن لواحد عندو وجع بطن يشرب ببسي وقلت دي حيلة تفكني من الشي دا . يازول بعد شوية يجي المدريس ياخدنا للرجوع للبيت ومن هناك الخالة توجهو ليك على ميدان المولد لعيادة الدكتور فلبس مرقص محروس يازول اخرتها انضربت حقنة في الج........ زي الورد واتنين دوا مر كان اخير لي منو الببسي

ونحن نضحك في ود السيالة بتاع الـ"دفيــق " دا.. انت اتاريــك هامش الهامش ومهمش السنين يا ود الشيخ..
بالله اول مرة تضوق البيبسي في تانيــة ابتدائي .. يا ااا حليللك تلقاك لي هسع ما اكلت سيرلاك ههههههه

انا من ضمن الحاجات الحصلت لي في صغري مرة عندنا قرابتنا كدة مرطبيييين ودفيانييين يا قول الجماعة ..
يعني رغم انه عم فاروق الله يرحمه عم الوالد وقريبنا لكنه كان غنيان وموظف كبير وساكن السودنة في بيوت كبار الموظفين جنب مشرع البانطون " ودي عملها كيف ماعارف انه خرج من الدائــرة الشريرة للفقر المتوارث والسكنى كنور والعكد وهلمجرا
المهم زوجته كانت " متقندفة " كدة وعندها عجايب.. مرة عيان الوالد ساقني مستوصف السكة حديد بعد العلاجات غشاني اخد لي مدة هناك تحت ضل المروحة لمن تدق صفارة الفطور ويجي يركبني بكاسي كنور..
المهم قعدت شوية وعشان عيان شفطت كباية عصير الجوافة وشغلوا لي المروحة ورقدت شوية والا عمتي قادريـة الله يرحمها تجي شايلة ليها صينية تختها قدامي فيها صحن فيهو عسل .. وصحن فيهو سمسم
وفي الصينية برضو فصوص الات قصب سكر ..
قدر ما اتلفت في الصينية للعيـش ما لقيتو .. وخجلت اسالها اقولها الرغيــف وينو .. عملت فيها نايم لمن ابوي جاء ردفني في العجلة وداني الموقف.. علا المتأكد منها اني حشيت جيوبي تب بفصوص قصب السكر..
واتعقدت اصلا ما اسال لي زول من قصد ها ربنا يرحمها ويحسن اليها الا بعد كبرت حتي عرفت المقصد من الشغلة دي..

Quote: عبود عبد النبي برضو أحد ظرفاء عطبرة من حي الدآخلة.

ياود المدير ان شاء الله وليــد التلب يسخى ليك ويحكي ليك بعض طرائف عبود... لعمنو عارف ليهو كمية من المواقف..

بس يا وليد التلب ان شاء اله تحكي لينا قصتو وقت قبضو غفيــر جنينة الحكومـة بيلطش في المنقة والبرتكان . :)

Quote: ونحن نضحك في ود السيالة بتاع الـ"دفيــق " دا.. انت اتاريــك هامش الهامش ومهمش السنين يا ود الشيخ.. بالله اول مرة تضوق البيبسي في تانيــة ابتدائي .. يا ااا حليللك تلقاك لي هسع ما اكلت سيرلاك ههههههه

و الله ياود الزين بتبالغ
ياخي انا منتظرك تقول لي ياود الشيخ انت اتاريك مرطب وبتشرب البباسي من تانية ابتدائي وتركب الفولقات من الزمان داك
تجي تف........لي في نخرتي.
على العموم اديكم من حاجات قريبنا سواق القطر:

الراجل بين الكربة وندي دهس ليهو قطيع غنيمات
اها سيد البهايم راح اتبرة اشتكى وقاموا الجماعة عملو ليهو مجلس محاسبة
وكان اول سؤال رئيس اللجنة:

"ممكن تورينا انت دهست البهايم ديل كيف؟"
وكانت الأجابة:

"و الله جيت سايق قطري دا , لمان جيت قصاد الزريبة بتاعتن كسرت عليهن وكتلتهن"

على ذكر الباسطة
كان لفريق الامل الحالى حارس مرمى (بكارى) له كلـــ.......ــب. مربيه ومهتم بيه
مشهور بحركة بعد (السنه)ى يمشى يشترى سمك ويجى شايله ويمشى عم ابراهيم الله يرحمة (بتاع بوفية نادى الامل) يشترى باسطة

يجلس فى كبرى مع خور خلف النادى
ياكل السمك
ويغتح الباسطة كلــ...به ليتعشى ايضا

احد سائقى القطارات (سعد البععو)كان مستعجلين له ان يقود قطارة ويسافر
المهم تعطل القطار وعفرتوه جاى جاى اب القطر يتحرك
قالوا خلاص مكنة القطر تكون اتقدت

قام السائق الهه يرحمة عمل تلغراف
( من كترت شفقتكم اتدقت مكنتكم
سعد البعو بطرفكم)

صاحب البوست


والضيوف

سلام

طبعا من اجمل قصص عطبرة المفروض تحكوها

قصة ( بلا عطبرة بلا مسخرة .. قلتو وأنا ستو)

سمعتها بأكثر من رواية


يا ريت تدونا النجيضة فيها

برضو من حكاوي ناس الكورة كان " قُرضم " مشهور جداً كلاعب في الوادي ... وماشغال تاني

يُحكي انه اتمسك في قضية " شكلة على ما اظن " وقفوهو قدام القاضي ..
بيسال فيهو القاضي اسمك منو؟
اسمي قرضم ..؟
قرضم دا شنو كمان وشغال وين؟
قال ليهو : انا شغال " بـاك في نادي الوادي "



ـــــــــــــــــ
تغيــر الموجة عشان ناس حيدر المشرف وعادل الباهي ومن لف لفهم ما يشيلو حالنا علا ان جاء التلب وحكي قصة عبود الا بكري يعلن الارشفة

هناك كلمات وعبارات كانت متداولة فى الماضى للمشاغلة وكدة
اخر ما اعلمة

بالسمنة وكدة


قبلها بزمن


قرع قرع

خبرزتو لا راجين صوانيكم


بابكم ناصية وصقاطتكم عاصية

...........................
وهناك الكثير

هجيجتم اشواقنا لارض الطفولة والصبا
الله يقلع الغربة ويجازى الكان السبب

أصل التسمية ومعناه[عدل]

كان يطلق على عَطْبَرَة اسم أتْبَرَا (قبل استبدال حرف التاء بطاء). وأتبرا لفظ مشتق من الكلمة العربية تتبير، كما يذهب البعض، وهو لغةً يعني التدمير أو التحطيم أو الهلاك. يقول عزّ وجلّ:and#64831;وكلا ضربنا له الامثال وكلاً تبرنا تتبيراًand#64830; (الفرقان:39). وسُميت عطبرة بهذا الاسم لهيجان نهر عطبرة عند فيضانه ودخوله إليها في الاتجاه الشمالي الغربي وانحداره بسرعة كبيرة في سهولها المنبسطة حيث يحطم ويجرف كل ما يقع في مجراه أو على حوافي ضفافه من شجر ودواب وعمران وبشر.
وهناك رواية أخرى وردت في كتاب الدكتور عون الشريف قاسم (قاموس اللهجة العامية في السودان) جاء فيها ان أصل الاسم (اتبرا) لفظ يوناني وهو إيس تبوراس Essetaboras(باليونانية and#963;and#964;and#945;and#946;and#959;and#961;and#945;and#963;) ويستدل بأول الكلمة إيس Esse إذ قيل انها من اللغة النوبية وتعني المساء، أما آخر الكلمة taboras فيعني العابدون شفاهة.
كذلك يقّر الدكتور عون الشريف قاسم، في مصدر آخر نقلا عن الدكتور عبد المجيد عابدين، بالأصل اليوناني للكلمة والمأخوذ من احدى اللغات النوبية القديمة وكان ينطق عَطْبَرا.
وثمة رواية ثالثة مصدرها الدكتور جعفر ميرغني تفيد بأن الكلمة تتركب من مقطعين هما «إد» و«وبارا»، حيث يرادف المقطع الأول «إد» لفظ البحر بلغة العنج، وأما المقطع الآخر «وبارا» فهو اسم مرويّ باللغة المَرويّة القديمة، وبذلك يصبح معنى المقطعين مجتمعين بحر مَرَوِي.
أما الرواية الرابعة فتنسب إلى الإعلامي التوثيقي الطيب محمد الطيب، وذكر فيها ان الكلمة نوبية الأصل ومركبة من لفظين هما «إد» ويعني أرض و«بارا» وهو الساحل، فيصبح معنى الكلمة أرض الساحل.


منقول

التاريخ[عدل]



الأمير محمود ود أحمد أسيراً
قامت عطبرة في قرية الداخلة التي إختارها الإنجليز لتصبح موقعاً حربياً لقواتهم بعد استعادة مدينتي أبو حمد و بربر في سنة 1898م، لموقعها الذي يحيط به نهري النيل وعطبرة من جهة الجنوب والغرب.
ويرتبط تاريخ عطبرة الحديث ارتباطاً وثيقا بتاريخ السكك الحديدية في السودان وتاريخ الحركة النقابية السودانية، حيث بدأت مرحلة نشوئها وتطورها كمدينة مع بداية تشييد خط السكك الحديدية من قبل القوات البريطانية المصرية عند غزوها للسودان لأستخدامه في نقل المؤن والعتاد الحربي من مصر وذلك في إطار استعداداتها للزحف نحو أم درمان عاصمة الدولة المهدية واسترداد السودان. وكان بناء الخط قد بدأ في منتصف تسعينيات القرن التاسع عشر عبر الصحراء حتى أبو حمد ومنها إلى عطبرة. وفي ابريل / نيسان 1898 انتصرت القوات الغازية بقيادة كتشنر على قوات المهدي التي كان يقودها الأمير محمود ود أحمد في معركة نخيلة شمال عطبرة واستمر بناء الخط حتى وصل عطبرة في 3 يوليو / تموز 1898 م وتم في تلك الفترة نقل 3 بواخر مدفعية إلى عطبرة والتي كان لها دوراً حاسماً في الانتصار على قوات المهدية.[1] وفي عام 1906م تم توصيل خط من عطبرة إلى ميناء بورتسودان لنقل قطن الجزيرة إلى مصانع لانكشير في بريطانيا، وبذلك أصبحت عطبرة حلقة وصل مهمة بين شمال السودان والعاصمة الخرطوم من ناحية، وبينها وبين ميناء بورتسودان في الشرق من ناحية أخرى.
وفي عام 1939 اختيرت عطبرة مركزاً رئيسياً لإدارة السكك الحديدية وورشها ومخازنها اللوجستية، والتي أصبحت أكبر صاحب أعمال بالمدينة يوظف في خدمته معظم سكانها حتى بلغ عددهم 120 الف عامل تقريباً. ونتيجة لسياسة التمييز ضد السكان الوطنيين وعدم مساواتهم بالبريطانيين قرر عمال السكك الحديدية تأسيس نقابة عمالية خاصة بهم كانت أول نقابة عمالية في السودان. وفي عام 1947 نظمت النقابة أضراباً عاماً تضامناً مع نقابات عمالية مصرية.
نمت نقابة العمال السودانية حتى صارت واحدة من أقوى وأكبر الحركات العمالية المناوئة للاستعمار في إفريقيا وأصبحت على علاقة قوية مع الحزب الشيوعي السوداني الذي كان يتبنى قضايا ما كان يصفها بالبروليتاريا السودانية.
في عام 1954 م، تمت سودنة السكك الحديدية وتم تعيين محمد الفضلي أول سوداني في منصب مدير سكك حديد السودان.
وبعد فشل الانقلاب العسكري الذي قاده ضباط موالون للحزب الشيوعي ضد الرئيس جعفر نميري في سبعينيات القرن الماضي، وقيام نميري بحلّ الحزب الشيوعي وتفكيك منظماته والتضييق على مناصريه تقلصت قوة اتحاد النقابات. وفي عام 1981 م وجه نميري ضربة قاضية للإتحاد بحلّه نهائياً وفصل آلاف العمال من الخدمة وإجلائهم من المنازل الحكومية التي كانوا يقيمون فيها مع الإبقاء على الورش الكبيرة للقيام بأعمال الصيانة فقط.[2] وبالتوسع في شبكة الطرق البرية تراجع دور السكك الحديدية وتقلصت أهمية عطبرة كحلقة وصل، لكن مشاريع تأهيل خطوط السكك الحديدية مؤخراً وتقاطع شبكات الطرق البرية الجديدة في عطبرة فضلا عن المشاريع الزراعية في المنطقة، ساعدت المدينة على استرداد أهميتها ودورها التاريخي كحلقة وصل للنقل والمواصلات ومركز تجاري وصناعي.

من أهم الشخصيات العطبراوية[عدل]

المطرب السوداني الشهير حسن خليفة العطبراوى.
قاسم أمين.
المدرب القومى عبد القيوم حسن طه.
د.جمال الدين الفندي، من رواد علم الفلك.
المصور السينمائي الرشيد المهدي، مصور فيلم آمال وأحلام، السوداني، 1968م.
المؤرخ السوداني الطيب محمد الطيب.
الشفيع احمد الشيخ، نقابي سوداني درس في عطبرة.
إسماعيل الأزهري، أول رئيس وزراء سوداني، عمل معلماً لمادة الرياضيات بالمدرسة الأميرية الوسطى في عطبرة.
محمود محمد طه، زعيم الأخوان الجمهوريين عمل في عطبرة.
الشاعر المهندس علي محجوب فتح الرحمن سعد

هناك أحبــــــــــة لنا يستوطنون جنبات أرواحنا...
يملؤون دنياناحبورا وفرحا..
ويمطرون على قلوبنا السعادة..
وإن فرقتنا عنهم الدروب
فإنهم هنا
في بقعة من الروح
لايطؤها
النسيان؟

Quote: الذّ حاجة عامل فيها نديد حيدر الزين. قال آيه !!!

بالله شوف اب رويس ده
هسع الناس البتحكي عنهم ديل ماسمعت بيهم إلا هنا
اها انا والكلس ود الزين قرينا في روضة واااحدة

نديكم من قريبنا سواق القطر:

كان بيمشي يوم الخميس يسنسن في بار (اسم مشهور في عطبرة طبعن)
يوم كدى مشى وطلب ليهو نص شري مع واحد كبدة

بعد جاهو الطلب وهو في تأملاته جاتو ليك كديسة طايرة نطت في التربيزة رمت ليك القزازة وكسرتها حتة حتة
زولنا طلب نص تاني طبعن
عند الحساب وقف في الكاشير فنه عليه الجرسون بنصين شري وواحد كبدة
الرجل احتج انو شرب نص واحد بس فقطن.
الجرسون قال ليهو: امال الكسرتو الكديسة داك طافور؟
فلد عليهو صاحبنا:
" طيب انا لمان جيت داخل هنا جيتكم طابق لي كديسة في اباطي؟"

Quote: ما عندى ما قعدت فى عطبرة غير اسبوع ن لكن كل ما اسمع قطار الشوق الدموع تكابس

محمد الأمين،
سلآمات.

دا بابكر الزكار صاحب أُغنية قطار
الشوق الأصلي.
الغريب في ناس عطبرة يا محمد إنهم كانوا بيطلبوا
من الزكار يغني قطار الشوق أكتر من ثلاث مرآت،
وما حصل حضرت حفلة للزكار إلا وغنى قطار
الشوق أكثر من ثلاث مرآت، وطبعاً الجماعة
يبشروا بالمنافيخ والزكار كان زول غناي بالحيل
يخليك تبشر بلآ منفاخ وإنت في عطبرة...

Quote: ود المدير و الحضور سلام اديكم العافيه الزبير

الله يعافيك يا الزبير.

عبد الحفيض الله يرحمو، كان شغال موظف في السكة حديد
وكان مستعجل وبه روش.
مرّة بيحكي للجماعة، قال لهم: صحيت من النوم مِتأخِّر، وقوآم،
قوآم كابست شربت العجلة وركبت الشاي، وقُمت طاير طيرآن،
والورشة ضربت لي في الصُفارة...

Re: دعوة لتأسيس رآبطة أبناء عطبرة العالميّة ...

الموضوع دا ما نسناهو،
ما تعملوا فيها ميتين. إن شاء الله
ستتم عتالته عبر الأرباع...

Quote: حيدر و ودالمدير .. يا اخوانا ده ونس عطبراوى جميل جدا ..

حباب ود المشرّف.


دا الزول الوحيد الما دقس.
سألته بت المغربي، لماذا لم تترك عطبرة وترحل للخرطوم ؟؟؟،
فأجاب، أنا زي السمكة لو طلعوها من البحر بتموّت، وأنا لو
طلعت من عطبرة بموت. ثمّ أكتفى بهذه الإجابة الشافية، وعاش
في عطبرة حتي إلتحق بالرفيق الأعلى.
حسن خليفة العطبراوي، الرجل الذي زلزل عرش أضخم إمبراطورية
من فوق ظهر عجلة رالي ظلّ يمتطيها طوال حياته، وليس من فوق
ظهر دبابة. نسأل الله له الرحمة والمغفرة.

تصدق يا ود المشرّف في حفلآت اللعراس ناس عطبرة كانوا
بيطلبوا من العطبراوي يغني الأناشيد الوطنية، وكان لمان
يغنيها ينفعلوا معاها غاية الإنفعال وترتفع المنافيخ في عنان
دارة العرس، وتلقى الجميع مبتهجين حتي العروسين.
ناس اتبرا كانوا ببشرو بالمنافيخ. والله صحي.



كيف أخبار الوالد، إن شاء الله
يكون بلغ تمام الصحة والعافية ؟؟؟...

Quote: يعني رغم انه عم فاروق الله يرحمه عم الوالد وقريبنا لكنه كان غنيان وموظف كبير وساكن السودنة في بيوت كبار الموظفين جنب مشرع البانطون " ودي عملها كيف ماعارف انه خرج من الدائــرة الشريرة للفقر المتوارث والسكنى كنور والعكد وهلمجرا

Quote: معاوية دا أظنو من حي اسمو الداخلة لأني متذكر كان دايما بيدخل الاسم دا في أغانيهو ..! بالله لتعرف الراجل دا أو عندك خبر منو ؟!

سلآمات يا ناذر،
ومشكور علي الهدية.
يا أخي تصدق أنا من ديّك وعِيّك، تاني ما توفقت في الرجوع للبلد.
عارفك دعوآتك ما فايتاتنك، لكن باصر لينا معاك وآحدة.
يمكن تلفق.

في فترة يا ناذر أنا كنت بعرف 70% من سكان عطبرة، اليوم سبعة
ما بعرِفُن. أنا غادرت عطبرة في التمانينات ومعاوية دا قطع شك من
جيل ما ليهو علآقة بجيلنا، لكن إحتمال كبير البوست دا يلِمّك فيهو.
أذكُر مرّة كُنا أنا وود عمي ماشين فوق رصيف محطة عطبرة، وكان
في قطر مزحوم جداً في المحطة، تصدق يا ناذر كان كل تلآتة أربعة
ختوات جماعة ينادوني أقيف معاهم شويّة، ود عمي قال لي يا زول
إنت السيّد علي الميرغني !!!؟؟؟.

السر عكاز زولنا دا يا ناذر إتزوج في نفس الأيام الماتت فيها زعيمة
الهند انديرا غاندي. أها، كُلُ مرّة تجيهو مرا تقولوا، يا السر عايزين
زيادة صندل وريحة، تاني تجيهو وآحدة تقولوا، يا عريس الصندل
ما بيكفي عايزين زيادة.،،،،،،، السر عكاز قال ليهن: يا اخ إنتن
أصلوا عايزات تحرقن انديرا غاندي ؟؟؟

أحمد عمر الرباطابي المذيعة قالت ليهو، يا أُستاذ إنت ليه ما بتدي
الفنانين الناشئين قصايد عشان يغنوهن ؟؟؟
قال لها: اوّل أنا قصايدي ديل قالولك فايتاتني !!!؟؟؟...

الزول الرائع معاوية المدير
السرد جميل ..
وكم حلال سردك يبدو أنك كنت متواصل مع مجتمع عطبرة .
لم أزرها في حياتي إلا انني كنت أمر بها بالقطار من الخرطوم الى كريمة ومن كريمة الى دنقلا بالبواخر ( والله زمان )
معليش معاوية الحبيب دعنى اخرجك قليلاً من هذا السرد الرائع ..
بس أريد احابة على سؤالي ونرجع مرة ثانية الى هذا السرد الاجتماعي الرائع ..
ما هو السبب في انهيار السكة حديد في عطبرة ؟؟
يبدو انك تعرف الخبايا والحقائق وبدون اي تسييس ؟؟
لك التحية اخي الجميل
وآسف على تحويل هذا البوست مؤقتاً ... وأكرر .. مؤقتاً ..

Quote: صاحب البوست والضيوف سلام طبعا من اجمل قصص عطبرة المفروض تحكوها قصة ( بلا عطبرة بلا مسخرة .. قلتو وأنا ستو) سمعتها بأكثر من رواية يا ريت تدونا النجيضة فيها

سلآمات يا جمال.

مرّة في طريقي للبلد غشيت صديق في دبي. أها قمنا مشينا نزور جماعة
أصحابوا، في بيت الجماعة قال لوآحد، أها بختك، معاوية دا من عطبرة.
تعال شوّف، الزول طوالي قعد جنبي وشبكني ليك ونسة عن عطبرة أحياءها،
شوارعها، أسواقها، ناسها، دار الرياضة، السينما...إلخ، ما اداني فُرصة
إتكلّم. أها لقيت لي فرقة قمت سألتوا، إنت من وين في عطبرة ؟؟؟،
وكانت المفاجاءة أن أجابني، أنا ما من عطبرة لكن كنت بقضي فيها الإجزآت !!!.
طوالي إتذكرت المرحوم أحمد الجابري، وقلت دا يكون الزول زااااتو.

الحقيقة الطرفة أنا سمعتها عن طريق وآحد،
وهو إنوا الفنان أحمد الجابري كان عندو شلة من الناس اصفياء بيقعد معاهم، ويمتعهم بفنه
مع حوار هادئي من الجمع الراقي. يوم واحد جاب صاحبو معاهو القعدة، والراجل
كان من عطبرة، أها زولنا بتاع عطبرة دا قدُر ما وآحد يتكلم ينطلوا في حلقو، والله نحن
عندنا في عطبرة كدا، وكدا. وآحد تاني يحكي قصة، زولنا ينطلوا، والله القصة دي زي
قصة حصلت في عطبرة، وآحد يتكلم في الفن صاحبنا يرشليهو الفنانين بتاعين عطبرة
كوووولهم، الكورة، ينط نحن كورتنا في عطبرة،،،،،، إلخ. راح مقاطع وآحد في
الكلآم، نحن في عطبرة ... طوالي الجابري قاطعه قائلاً: يا أخي بلآ عطبرة بلآ مسخرة،
خلي الناس تسكر سكرا .

يا جمال نحن ناس عطبرة بصرآحة لمان نفتح حديث
عن عطبرة ما بنقدر نمسك خشُمنا علينا.

غايتو دي البعرفا أنا، أبو جهينة
كان جا بجاي بيديك النجيضة...

ود المدير وباقى الشباب

السلام عليكم وتحياتى ليكم .. أها ياود المدير انا ساكيك ساكبك .. قلت الباوقة وطلعت ليك من العبيدية ... عطبرة وسكنت فيها وكنت في الامتداد الشمالي ... وفعلا فيها احلا باسطة ...في سوق الامتداد الشمالى اها بمناسبة العجلات والعجلاتية كان فيها حسن حسين العجلاتى مشهور جدا لانو محلو ده زى النادي بالنسبة للشباب للجلسات النهارية .. عطبرة جميلة ياخى .
الثانوى كنا بنقراء في الاهلية المصرية .. دفعتى طبعا طارق السياجى لاعب الامل عطبرة ... وعبدالعظيم النخة .. الشبلي .... طبعا المدرسة جنبها ميدان والزمن داك عوض يوسف ده لمن يكون في التمرين بتلقى الميدان ده كأنه فيهو كورة مهمة جمهور كده كمية وكلهم جايين عشان مهارات عوض ( تكتك ) .
طبعا من شباب الشمالى المشهورين ... جبروو العسكري . السر القاضي .. اها بقوم راجع ليكم تانى ونواصل

Quote: هناك أحبــــــــــة لنا يستوطنون جنبات أرواحنا... يملؤون دنياناحبورا وفرحا.. ويمطرون على قلوبنا السعادة.. وإن فرقتنا عنهم الدروب فإنهم هنا في بقعة من الروح لايطؤها النسيان؟

سلآمات يا صلآح الدين،
ومشكور علي دعم البوست.

ستظل عطبرة في وجداننا مهما تباعدت بنا الخُطى عنها.
سيظل عبير الوِرش عابق في أنفاسنا، حركاتنا تدور مع
بدلآت العجلآت، وتعج ذاكرتنا بأذيذ القاطرات، نلتفح
سماء الغربة ونفترش أرضها وتظل عطبرة هي الحُلُم
الذي يؤرق مضاجعنا يملؤنا الأمل ويحدونا التفاؤل بالعودة
إلي داراتها نغني قطار الشوق ونبشر بالمنافيخ...

Quote: بلآ عطبرة بلآ مسخرة،

زميلنا م . ن من اولاد الجزيرة تزاملنا في مصر سنوات الدراسة
في واحدة من سفراتو لمصر جيرانو ادوهو جواب عشان يوصلو لاقاربهم في الموردة بعطبرة
اول ما القطر وصل المحطة دقش ناحية الموردة ويسأل في الناس ياجماعة بيت ناس فلان وين
لقى ليهو 3 قاعدين تحت عمود سالهم قالوا ليهو وصلت تب .. ادخل بالزقاق ده وامشي طوووالي
مشى لحدي الزقاق انتهى ولقى الطريق مقفول في النهاية
حاول يرجع يسالهم تاني شافهم ليك ماشين عليه .. قلبو اكلو .. ما كضب رقد صوف وتلب في بيت في اخر الزقاق
برررردلب وقع ليهم في نص الحوش والجماعة كانوا بشاهدو في مسلسل .. الصراريخ عكلت وووب الحرامي ..
صاحبنا رقد خل .. وقال ليهم انا في عرضكم .. ضيف من الجزيرة .. وحكى ليهم باقي القصة .. طلب منهم بس يرجعوهو المحطة
لا جواب لا يحزنون .. ان شاء الله مايصل
وصل المحطة وقعد يرتب في حشوة قميصو الاتلخبتت فوق تحت ونفض التراب من بنطلنو .. وقال كده مشى لادبخانات المحطة
وهو واقف بيعمل "بولندا" ومسترخي للطيش شعر بواحد خلفه اتلصق فيه تماما .. دفروا وجرى لي برة يربط في حزامو .. لقاهو واحد مختل عقليا
ركب القطر وجانا في مصر .. الليلة بس لموني في ولاد عطبرة ديل ..
ياجنى مالك
- عليكم الله انتو نصاح .. عايشين كيف في بلدكم دي .. غايتو انا شاكي فيكم كلكم ... يا كده ياكده
- كدي قول خير واحكي لينا الحصل ليك شنو بالضبط
- غايتو يالحنين بحكيها ليك براك عشان مايطلعوا فيني اشاعة كمان جماعتكم ديل ..
حكى القصة دي وكتلني بالضحك
- والله يامان لو بقوني محافظ بلدكم دي ما اقعد فيها ، دي ضيافتكم .. عليك امان الله كان ماجريت كان الليلة ألوك في لبانة وعافص طرف جلابيتي في اباطي ولافي .. هييييي
بعد اسبوع مشينا حفل تخريج في مكان بعيد من سكنا .. ونزلت مطرة شديدة .. قلت ليهو يامحمد تعال ننوم مع اولاد عطبرة ديل والصباح نكسح للكلية طوالي
- ياجنى انت ماك نصيح ... نوم عديل في شقة فوووق كمان .. شارع قدر الضربة بقى لي قد ابرة عدييل ... ولى يوم الليلة الهجمة مافكتني .. ان شاء الله مطرة تبلَلني ولا يهضرب بي عجلاتي

Quote: أها ياود المدير انا ساكيك ساكبك ..عطبرة جميلة ياخى . الثانوى كنا بنقراء في الاهلية المصرية ..

نان هو سككان نصاح يا معتصم !!!؟؟؟.

الأهلية المصرية هي المدرسة التي قضيت فيها فترة
الثانوي العالي. والله صحي.
قبضونا أيام المظاهرات في آخر أيام عهد النميري.
أها، كشونا ليك أنا وصاحبي حسن ودخلونا للضابط،
الضابط طلع ود الكنزي. ود الكنزي رغم قرب بيتهم
من حِلتنا لكن هو ما بعرفني، بس كان قاعد معاهو
المرحوم محمد إسماعيل وهبي مدير تلفزيون عطبرة
في تلك الفترة. أها، أنا لآمِن شفت محمد إسماعيل
قلبي رقد. ود الكنزي طوالي سألنا، عاملين مظاهرات
مالكُم ؟؟؟
طوالي أنا قلت ليهو، يا سعادتك مظاهرات شنو؟؟؟
نحن ولآد الأهلية المصرية ما عندنا شغلة بالمظاهرات.
قال لي، طيّب جابوكم هنا ليّه ؟؟؟
قلت ليهو، أسأل العسكري.
طبعاً أنا بتكلم بقلب جامد عارف محمد إسماعيل حا ينقذنا.
ود الكنزي إحتدّ في الكلآم، وطوالي محمد إسماعيل تدخل،
قال ليهو ديل ولآدنا، وِلآد فلآن، وفلآن. طبعاً ود الكنزي
لقانا قريبين ليهو في عضمو، قال لينا أمشوا لكن تاني
ما يجيبوكم لي هنا.
قلت ليهو، العسكري دا جابنا ليك بالغلت. مظاهرات شنو
البيسوها ناس الأهلية المصرية، هُم فاضيين من الجكس.
قال لي، أمرق من هنا يا كـلـب، وإنفجر محمد إسماعيل
بالضحك.

أذكر في الأهلية الأستاذ علي عويس،
مرّة طيرت ليك معاهو شكلة كانت السبب
في بناء المسرح بتاع المدرسة والمزيرة
الفي الدور التاني. طبعاً بسبب الشكلة دي
رفتوني ورجعوني بي ضمانة...

الاتبراوي .. كان بينو وبين بيتنا سهلة فاضية تب
لما ندور نعرف الدميرة جات كنا بنطلع رأس البيت ونعاين
يوم مشينا شلة - في اجازة المدرسة - بعد الفطور - ونزلنا كلنا البحر
قام واحد من الشلة غرق .. قعدنا نجقلب .. البوليس حايجي يسألنا .. اخير نكلَم اهلو بدري .. ما اتفقنا على شئ
عرَدنا كلنا وكل واحد دخل بيتو وهو يتمتم من الخوف
جابو الغدأ ماقدرت أبلع لقمة واحدة ..
المهم الخبر وصل اهل الولد والتبراوي في ثانية إتملأ بالناس لحدي ما طلَعوا الجنازة
مشينا بعد فترة نعزي قبل الجنازة تطلع للمقابر القدام بيوتنا ..
اول ما شافتنا ام المرحوم شالت التراب وكالتو في وشنا
وهاك يا دعاء الجاهلية .. ان شاء الله تغرقوا لكلم في فرد يوم .. كتلتو ولدي وجايين تشيلوا فيهو الفاتحة ياصعاليق .. الليلة ووب علي انا
بالليل رسلوني اجيب الفول اول ما فتحت الباب جاني طيف صديقنا وانا اطالع اتجاه البحر .. ضلام مخيف وصوت الدميرة يهدر في اضاني
رميت البستلة وحلفت ما اطلع في الليل داك ..
الله يرحموا ويغفر لينا جُبنَا
البحر سيرتو كلها عجب
.. اواصل ..

Quote: الزول الرائع معاوية المدير السرد جميل .. وكم حلال سردك يبدو أنك كنت متواصل مع مجتمع عطبرة . لم أزرها في حياتي إلا انني كنت أمر بها بالقطار من الخرطوم الى كريمة ومن كريمة الى دنقلا بالبواخر ( والله زمان ) معليش معاوية الحبيب دعنى اخرجك قليلاً من هذا السرد الرائع .. بس أريد احابة على سؤالي ونرجع مرة ثانية الى هذا السرد الاجتماعي الرائع .. ما هو السبب في انهيار السكة حديد في عطبرة ؟؟ يبدو انك تعرف الخبايا والحقائق وبدون اي تسييس ؟؟ لك التحية اخي الجميل وآسف على تحويل هذا البوست مؤقتاً ... وأكرر .. مؤقتاً ..

أُستاذي علي عبد الوهاب،
لك التحايا النواضر.

بصراحة لا يمكن الحديث عن إنهيار السكة الحديد دون التطرُق للسياسة،
فالسياسة لعبت دور كبير جداً في دمار هذا الصرح الشامخ. لكن هذا
لا يمنع من أنّ هنالك بعض العوامل الأُخرى أعملت مِعولها في هذا الهدم
سأُحاول ذكرها لك.
أضخم دول العالم ظلّت متمسكة بالسكة الحديد كوسيلة نقل مضمونة
وقليلة التكاليف، وعملت علي تطويرها حتي إنبثغت عنها مؤسسات
يشار إليها بالبنان، وهذا ما حدث لسكك حديد السودان في عهدها الأوّل،
فقد كانت ماركة مسجلة (S R ) لو قُدِر لها أن تسير علي نهجها الأوّل
للعبت دور كبير في رِفعة شأن البلد.
الـ (S R ) كانت تطبع حتي علي زراير أفرولآت عمال السكة الحديد،
وكانت السكة الحديد تلعب دور حتي في السياحة والفندقة، وعلآمتها
كانت تُطبع حتي علي زجاج منتجاتها من المياه الغازيّة إضافة إلي
فندقها الشهير إن صحّ التعبير في عطبرة (الرست هاوس) الذي كان
بمثابة منتجع لرواده ومصدر إنجمامة للعرسان في شهر العسل.
كان هنالك نظام محكوم برقابة والناس كلهم يدورون في فلك هذا النظام
الذي أرسى قواعده الإنجليز وتركوه لمن اتي خلفاً لهم من أبناء البلد
ليسيروا عليه ردحاً من الزمان، إلي أن بدأت الرقابة تتفلت شيئاً فشيا
لتبدأ أيدي الخراب النهش في جسد النظام الشئ الذي لعب دور في
مساعدة حكومات السوء للقضاء علي هذا الصرح العملآق، السكة
حديد. بعد فُقدان الرقابة إستشرى الفساد في بوليس السكة الحديد، وصارت
هنالك علآقات قائمة علي السرقة والنهب بين البوليس والكماسرة والمفتشين
في داخل القطارات، وبين أجهزة الرقابة والعمال والموظفين في داخل هذا
الصرح العظيم ليصبح لقمة سائغة لضباع السُلطة والتسلُط، فإنهارت سكك
حديد السودان التي كانت يُشار إليها بالبنان. لكنها خلقت لنا عطبرة، مدينة
نُسجت بجميع ألوان الطيف السوداني إنصهر أهلها في بوتقة السكة حديد
حيث تجمعهم كلهم في وِرشها منذ الصباح الباكر ليتوجهوا بعد إنقضاء
ساعات العمل للسوق لقضاء حاجياتهم، وفي العصريات تجمعهم دار الرياضة
وميادين الكورة، ويقضون أُمسياتهم في السينما ومقاهي السوق. هذا
التداخُل خلق مُجتمع مترابط جداً أضفى علي عطبرة نكهة خاصة قد
لا تجدها في مُدن العالم. من هنا اتى تعلُق الناس بهذه المدينة التي تنضح
حنية وتضج كبرياء.

أُستاذي علي،
أرجو أن أكون قد أجبت ولو بجزء
بسيط علي سؤالك بهذه المدآخلة.
لك مودتي...

Quote: الأهلية المصرية هي المدرسة التي قضيت فيها فترة الثانوي العالي.

لا حولا ولا قوة الا بالله .. حسبنا الله ونعم الوكيــل .. والله صحي
وناس السيالة كانوا عارفيــن انك بتمشي المصريـة ؟
وبي شنو بتمشي اوع تقول ليك كان بتلبس البلال .. غايتو بتكون حرجتنا مع الجكس تلقي القميص الابيض كلو مبرقع بُني من مويـة الدفيّق..
تلقي الصلعة دي سببها الاصلى تكون باريــت حناكيش المصرية وسويت لك " جلي وكريمات ومسوح " في تفتك وقام الصوف اتحتّ باقي انتو الواحد فيكم اصلاً من يمرقوهو من الشمس ويدخلوهو الضل بيمرض..

قال المصرية قال..
كان كدي ياني من الليلة صاحب للملك الحنين حيدر .. طلع زول اتبراوي وعوم .. مالي بجنيات الاهليــة الحايمين مع الجكس والفتوات شوف عيني كانوا بيقروا مع الفتوات في فرد كنبة ..

Quote: جلي وكريمات ومسوح

Quote: وقام الصوف اتحتّ

ياحبيب انا خايف تكون بقت عليهو قصة صاحبنا كوكا الاروش
أبوه جاء من مكان إغترابو وصادفت جيتو حفلة في الحلة
الشليق قبل ابوه مايفرز الفي بطن الشنط دخَل إيدو وشال ليك فتيل ريحة وكريمات وحاجة تانية ما عرفها لكن افتكرها كريم شعر
إتجلَط كووويس لامن بقى يرقش زي اللوري السفري بعد يجيهوهو لسفرة ..
الحفلة بدت ... والدارة اتملت تب من الجنسين .. صاحبنا شغال حتَ شئ بالرقبة وشئ هـزَ حاجات ورا
مع الزحمة والعجاج العالك في السما ما حسا بالحاصل ليهو
- يامان انت شعرك ده بقى يحت معاك ولا شنو
- ليه الحاصل شنو
- كدي المس راسك ده بررراحة كده
حرك اصابعينو الخمسة كأنه بينفض في الغبار .... جاب شعرو كلو في ا ل و ا ط ة .. إتحتا حتة حتة .. رقد صوف وسط المهيَصين
رجع البيت .. شال البخاخ وقعد يقرأ في طريقة الاستعمال
طلع مزيل شعر ... شهر ماطلع الشارع

Quote: وناس السيالة كانوا عارفيــن انك بتمشي المصريـة ؟

عارفين،،،،أها.
حتي ناس الضهاري كانوا معانا،،،، تصدق !!!.
أذكر أخونا ابراهيم عبد الله الفكي محمود. كان صاحبنا شديد.
والله يا حيدر ما لاقاني إنسان مهذّب زي الزول دا. إنسان نضيف
أبيض، ناصع البياض وخلوق. ابراهيم كان رمز للتهذيب في فترة
الشباب والطيش لذلك تهذيبه كان فطرة.
الزول دا وين يا حيدر، ورايكم فيهو شنو لمان كان بيقرأ معانا ؟؟؟
أيوا معانا، شُفت كيف !!!...