الوليد "خليل" وأيمن محمود..استشارة سريعة بالله (صورة)

بالنسبة لقطعة أرض 300 متر في حي النصر مربع 26 شرق النيل

ينفع ننفذ فيها بناء لود بيرنج مؤسس لطابقين بالخريطة الملفوحة من مكتبة خليل دي؟




وبالله بالمرة كدا عشان الأبعاد ما واضحة في الخريطة دي.. يا ريت تكتبوها لينا بخط كُبار شوية

ويا حبذا لو باصرتوا لينا تسعيرات شِشنة كدا..معليش كترناها موش؟؟

..

.

التعديل في العنوان لإضافة كلمة (صورة) وكدا

السرعة عندكم لكن يا هندسة..

..

.

معليش يا محمود - يا دوب دخلت سودانيزاونلاين
الخريطة (الملفوحة) مصممة على اساس أعمدة - عشان تنفذها على اساس حوائط حاملة بتحتاج تزيد سمك الحوائط الرئيسية بمقدار 10 سم - يعني الحيطة حا تكون 30 سم ، وده على حساب مساحات الغرف وخلافو !
بالاضافة الى ذلك المبنى تهويتو تعبانة - غالبا من اتجاه واحد وعشان يحصل سريان للهواء - لازم تكون في شبابيك او على الاقل شباك من اتجاه مقابل للشبابيك الاخرى
- الابعاد واضحة لو ركزت شويه !
بالنسبة للاسعار ما عندي فكرة والله مع اسعار المواد المتذبذة في السودان

باشمهندس أيمن..

حبابك يا هندسة ..

Quote: معليش يا محمود - يا دوب دخلت سودانيزاونلاين الخريطة (الملفوحة) مصممة على اساس أعمدة - عشان تنفذها على اساس حوائط حاملة بتحتاج تزيد سمك الحوائط الرئيسية بمقدار 10 سم - يعني الحيطة حا تكون 30 سم ، وده على حساب مساحات الغرف وخلافو ! بالاضافة الى ذلك المبنى تهويتو تعبانة - غالبا من اتجاه واحد وعشان يحصل سريان للهواء - لازم تكون في شبابيك او على الاقل شباك من اتجاه مقابل للشبابيك الاخرى - الابعاد واضحة لو ركزت شويه ! بالنسبة للاسعار ما عندي فكرة والله مع اسعار المواد المتذبذة في السودان

ما قصرت والله..

لكن طبعاً - كالعادة - ما فهمت من كلامك أي حاجة...

والله كان الأبعاد واضحة ما عارف....

أركز؟؟؟ أركز في شنو ولا شنو ولا شنو أنا. ؟؟؟.

أنا تطير عيشتي..

على العموم..

في واحد قريبنا رسل لينا خرطة فيها مطبخ من برة...

المدام والعيال داقين شمطة للسماء.. مطبخ براني أصلو ما عايزين قالوا..

أها الراي شنو؟

أدينا خريطة من طرف الدرج كدا..



..

.

السلام عليكم محمود

حسب علمي وارجو من الباشمهندس ايمن الافادة في ذلك ان اللود بيرنج لتنفيذة لازم تكون التربة صخرية وثابتة ومربعكم النصر 26 دا التربة بتاعتة
طينية وانا بعرفها كويس لاني في 2007 كنت مهندس مقيم لتنفيذ شبكة كهرباء مربعكم دا ومن ملاحظتي للمنازل المشيدة بة كلها باعمدة

يا جماعة كدي خليكم معاي انا لانو قطعتي مساحتها 600 متر وما لاقي ليها خريطة مناسبة حتى الآن اعينونا يعينكم الله .. والكلام ده لي كل الاخوة المهندسين الفي المنبر ده افيدونا يفيدكم الله ,,
قطعتي في العيلفون 600 متر وواقعة على شارعين وناصية وباقي الاتجاهات جيران ممكن تشوفو لينا خرطة مناسبة ليها على اساس طابقين يكون فيها 3 غرف نوم وصالة وحمامين داخلين ومطبخ وصالون للرجال ,, وهل ممكن الطابقين يكونو بدون اعمدة ؟

في انتظار تجاوبكم ..
مع الاعتذار لصاحب البوست .. معليش علشان تعم الفائدة ..

تحياتي : ياسر العيلفون

الأخ ياسر السر..

حبابك يا فنان..

Quote: في انتظار تجاوبكم .. مع الاعتذار لصاحب البوست .. معليش علشان تعم الفائدة ..

العفو ياخ..

طبعاً عشان تعم الفائدة أكيد..

وإلا كان ممكن جداً أقع ليك الماسنجر أو الإيميل أو الفيسبوك وأشحد الإستشارة كتامي خالص..

يا زول ربك جعل في السودانيين ديل خير كتير خالص والله يكفي العالم كله..

وحبابك تاني..

..

.

حبيبنا المهندس أيمن محمود..

شاكر اهتمامك وتجاوبك..

والخريطة بتاعتك على اليمين جميلة مرة واحدة..

الباقي لينا بس ننتهي من ملاحظةالمهندس محمد وطوالي

على بركة الله على قول ود البشرى..

..

.

مجدداً لك عاطر التحية والتقدير..

..

عزيزنا محمد شيخ الدين..

حبابك..

Quote: حسب علمي وارجو من الباشمهندس ايمن الافادة في ذلك ان اللود بيرنج لتنفيذة لازم تكون التربة صخرية وثابتة ومربعكم النصر 26 دا التربة بتاعتة طينية وانا بعرفها كويس لاني في 2007 كنت مهندس مقيم لتنفيذ شبكة كهرباء مربعكم دا ومن ملاحظتي للمنازل المشيدة بة كلها باعمدة

غايتو واحد من اتنين..

يا نقبلها منك بشارة..

يا نصيحة بمغادرة المربع دا وتغيير الخطة..

لكن أصلو ما حا نعتبرها نظام "خلعة" وقطع قلب كدا..

العفو يااااخ..

وحبابك فعلاً..وشكراً على ملاحظاتك القيمة..

..

.

أها يا جماعة...

نتوكل ولا كيف؟؟

..

.

اتوكل وابني يا محمود ،،، مسألة الارض طينية ما بتمنع انشاء مباني حوائط حاملة - يجب اخذ طبيعتها في الاعتبار عند التأسيس

Quote: توكل وابني يا محمود ،،، مسألة الارض طينية ما بتمنع انشاء مباني حوائط حاملة - يجب اخذ طبيعتها في الاعتبار عند التأسيس

توكلنا على الحي الذي لا يموت..

شكراً باشمهندس أيمن..

ياها المحرية والله..

..

..

.

بالتوفيق يا حودة


ياخي بعد صيانة المنبر فشلت للدخول لسودانيز


زي ما قال اخونا ايمن توكل علي الله

البيت احسن من البكالاريوس