Post: #1
Title: ما بينى والواثق.. وتلك الشاعره المجهوله...
Author: مبيوع
Date: 06-02-2013, 03:42 PM
التقينا وعلى مدى سنوات... ووقتها كانت الهموم تنحصر فى (شيك التحويل.. ووجبتين... وقشرتين... والقرايه الما دايره تخلص)...
وفى خضم النشاط الثقافى فى مجتمع يتكون من جيلين( قدام.. وبرالمه) تبلور الوعى وبرزت المواهب مع توفر الامكانيات الفنيه ...
افترقنا بعدها لسنوات حتى اتاحت لنا التكنلوجيا ان نلتقى مجددا ولم يتبدل فى الهم غير اننا خرجنا من الجامعه الى مدرسة الحياة... واصبحنا بفضل الغربة اكثر شفافيه
صديقى الواثق عبد الرحمن يكتب الشعر وانا الحنه... وهنا نماذج مما اخترت من كتابات سترى النور قريبا كاغانى ...
فتشت فى زهو الكلام....
ألق الحروف
رهق المعاند... والولوف
سدرة براحات الزمن...
تغريدة المطر العطوف
...وكتبت ليك انك قمر..
يغشى البيوتات الضحى
يمرق على الغيمات يطوف
...انك ملاذ...ونسة ورزاز..
تنهيدة القلب اللهوف
اندسى سرك في السنين...اتضارى في صمتك عزوف...
ومرقتي جاي..مرقت معاك فكرة سمر
...ضحكة قمر...غمزة جروف...
منسابه مد...انسانة جد...رويانة ند...
مزيكة الوجد الشغوف...
يا بت اتاري البهجة جات...اشعار انيسة...واغنيات...
زهو العنادل... والدفوف...
كان قايلة لى غيرك غناى..انا اصلي غيرك ما بحب...
انا اصلي غيرك..ما بشوف
|
Post: #2
Title: Re: ما بينى والواثق.. وتلك الشاعره المجهوله...
Author: مبيوع
Date: 06-02-2013, 03:50 PM
Parent: #1
ساعدونى فى العثور على كاتبة هذه الكلمات التى سحرتنى فاصبحت اغنية اتوقع لها نجاح كبير...
أنا عازماك شاي
انا عازماك شاي
في النيل الفاتح في خاطري
وداخل جواي
تشرب جبنه ؟
ومزاجك كيف ؟
عازماك مزاج
يا زول يا كيف
عازماك مشوار
من هذه اللحظة وللآخر
أنا عندي تذاكر
لأول مشهد من باكر
و ح نمشي برانا
بس الاتنين
وح نتأخر
زى ميه عام وتلاتة سنين
لا تتعب فيها ولا ح تخاف
عازماك زفاف
لمه وزغرودة فال
وناس مبسوطة
عازماك جوطة
بدله وطرحة
عازماك فرحة
وعازماك اولاد
وبتين حلوات
بشبهوا امي
بس ما بعرف اختار اسماء
انت تسمي
انا عازماك بيت
أدخل بيمينك وسمي
عازماك (نحن)
أنت وأفراحي
عازماك ريده وضحك صباحي
ما رديت لي ؟
شاييك ساده ؟
|
Post: #3
Title: Re: ما بينى والواثق.. وتلك الشاعره المجهوله...
Author: ibrahim fadlalla
Date: 06-02-2013, 07:04 PM
Parent: #2
أخي مبيوع ، تحية وتقدير
أهنئك على الإختيارات الشعرية الراقية ..وأتمنى لك التوفيق في إخراجها لحناً لا يقل رقياً وفرادة ...
قصيدة عازماك شاي ...مالية النت ، لاكين أقدم تاريخ نشر قابلني في 23 فبراير 2013 ، في منتدى خريجي وطلاب كلية التربية - جامعة الخرطوم
واسم كاتبة النص : سلمى عبد الله .....غايتو لو عايز الأكيدة يمكنك مراسلتها عبر ذلك المنتدى .. ويمكنك دخول الخيط عبر اللنك المرفق ...وبالتوفيق .
http://www.sag-ed-u-k.com/vb/showthread.php?t=430
|
Post: #4
Title: Re: ما بينى والواثق.. وتلك الشاعره المجهوله...
Author: mustafa mudathir
Date: 06-02-2013, 10:21 PM
Parent: #3
الزولة الكتبت عازماك دي موهوبة كلو كلو!
شكراً مبيوع وسلام شاعرنا ابراهيم فضل الله.
.
|
Post: #5
Title: Re: ما بينى والواثق.. وتلك الشاعره المجهوله...
Author: mustafa mudathir
Date: 06-02-2013, 10:27 PM
Parent: #4
و الواثق برضو
جِدة التناول يحتاج منك وبالتأكيد إختراق أنماط التلحين
السائدة!
ههههههه!
خوّفتك، موش؟
لن نبرح مكاننا إن لم نخف!
|
Post: #6
Title: Re: ما بينى والواثق.. وتلك الشاعره المجهوله...
Author: حجة امنة
Date: 06-03-2013, 00:24 AM
Parent: #3
انت وأفراحي..
والشوق والريد
وضحك صباحي..
ما رديت لي ؟
شاييك سادة؟..
عازمك حنين فوق العاده..
أنا ما بشبه في الريد الناس
انا زايد الشوق عندي زيادة...
كيفك يا د. ياسر
زي ما قال إبراهيم النص مالي النت و أقدم تاريخ نشر في منتدى ناس تربية، اما في الفيس بوك كالعادة مسروق
بدون مبالغة دي أجمل حاجة قريتا في التلاته سنين الفاتو دي :)
يلا .... على بركة الله
|
Post: #7
Title: Re: ما بينى والواثق.. وتلك الشاعره المجهوله...
Author: مبيوع
Date: 06-03-2013, 01:49 AM
Parent: #3
لك اطيب التحايا استاذ ابراهيم...
وشكرا لثنائك على الاختيار... وايضا على المعلومه القيمه... قمت فعلا بالتسجيل فى المنتدى الذى ذكرت
ودعواتك ....
|
Post: #8
Title: Re: ما بينى والواثق.. وتلك الشاعره المجهوله...
Author: مبيوع
Date: 06-03-2013, 02:12 AM
Parent: #7
[Bاستاذنا الجليل مصطفى مدثر
تحيه قلبيه...
القلق هو مايلازمنى حتى افرغ من وضع اللحن... لكن الخوف ده لما يبدأ العرض...
هسه خلينى مع القلق هههههه.... سلامى لك وودى
|
Post: #9
Title: Re: ما بينى والواثق.. وتلك الشاعره المجهوله...
Author: مبيوع
Date: 06-03-2013, 02:18 AM
Parent: #8
اختى العزيزه حجه امنه
سلام وتحيه... اخيرا سعدنا بالطله.. شكرا على اكمال القصيده..
الى لقاء قريب
|
Post: #10
Title: Re: ما بينى والواثق.. وتلك الشاعره المجهوله...
Author: Sudany Agouz
Date: 06-03-2013, 03:09 AM
Parent: #9
الاخ الحبيب مبيوع ..
حقيقة الأخ الحبيب الواثق أخو أخوان ..
أخو أخوان بمعنى الكلمة ..
وهذا هو الدليل ..
العم العزيز ارنست لقد طال غيابك
الرب يبارك حياتكما أنتما الإثنين ..
أما بخصوص الشاعرة .. فلا أعلم ... الله أعلم ..
أخوكم وعمكم العجوز ..
ارنست
+++
|
Post: #11
Title: Re: ما بينى والواثق.. وتلك الشاعره المجهوله...
Author: محمد فضل الله المكى
Date: 06-03-2013, 05:17 AM
Parent: #10
:
:
االعزيز دكتور ياسر
أكيد قصيدة الواثق دمها خفيف ،وأكتر من رائعة
أما بتنا سلمى دي ، فبالغت عديل كده
مفردات بسيطة وحلوة، ومعاني أحلى ، وبعدين كلام
جديد ما قالوه قبال كده.
نسعد دائماً باختياراتك
افتقدناك طويلاً !
|
Post: #13
Title: Re: ما بينى والواثق.. وتلك الشاعره المجهوله...
Author: مبيوع
Date: 06-03-2013, 03:04 PM
Parent: #11
الرجل الجميل والاصيل صديقى الجنرال ود المكى
سلامى واشواقى....
نتتيبع ونرصد الجمال اينما كان ... وشهادتك تجعلى اكثر اطمئنانا على الاختيار
يبدو ان القصيده لكاتبة مختلفه كما ذكر احد الاخوه فى تعليق اسفل الصفحه
لها ولسلمى التحيه..
تحياتى للاسره الكريمه وللاحباب بطرفكم
|
Post: #12
Title: Re: ما بينى والواثق.. وتلك الشاعره المجهوله...
Author: مبيوع
Date: 06-03-2013, 02:50 PM
Parent: #10
الاخ والعم ارنست
لك اطيب التحايا والتمنيات.... نورتنا الليله
|
Post: #14
Title: Re: ما بينى والواثق.. وتلك الشاعره المجهوله...
Author: ibrahim fadlalla
Date: 06-04-2013, 02:46 PM
Parent: #12
Quote: يبدو ان القصيده لكاتبة مختلفه كما ذكر احد الاخوه فى تعليق اسفل الصفحه
لها ولسلمى التحيه.. |
الأخ العزيز ياسر ...ألفت إنتباهك إلى أن المتداخل عبر الفيسبوك ربما يريد الممازحة ... ولكن الدرويشة
بت ضياء هو اسم مستعار لأحد المتداخلين مع المنبر عبر الفيسبوك ...وقد ثارت حول هذه الشخصية
ضجة كثيرة ...ولا تزال البوستات المعنية باستكشاف مستخدم الحساب ..جارية في أكثر من خيط في واجهة المنبر ..
الخلاصة أنه لا يوجد شخص باسم الدرويشة بت ضياء ....إنما هو اسم مستعار ...تم استخدامه في مماحكات المنبر الما بتنتهي ...
تسلم ...
|
|