في بيتنا خرافة بوست للقزقزه

بعيدا عن السياسة ولولوتنا
وبعيدا عن نيران ابو كرشولا
نكتب بوست مختلف عما تناوله البعض
بوست يوثق لبعض الخرافات السودانية في كل منطقة
مقولات وافعال صارت الزامية في كل وقتها
والبعض الى الان مستمر
كل منطقة وبيئة سودانية لها خرافاتها وعاداتها
متمنيا من الاخوه الاكارم مدنا بما ألفوه وهم صغارا ممن يكبرونهم سنا وتجربة

ما بين سن الغزال و
سن الحمار
حينما كنا صغارا ونمر بمرحلة تغيير السنون
وحينما تتساقط منا سنا نقوم بحشوها داخل (بعرة) حمار وانتظار ان تأتي ( حدية) انثى الصقر ورميها عاليا في اتجاه الحدية مع مقولة
هوي يا الحدية هاك سن الحمار واديني سن الغزال ومن لم يفعل ذلك لا تقوم له سن جديده
بل سن حمار فقط
الجميل في الموضوع ان السن ببعرتا بتقع جنبك وانت بتعمل ما شايف حاجة
( الدفاع بالنظر ضعيف شوية )

الخرافه هذه متأكد بنسبة مية بالمية ان الغالبية العظمى من قرأ واقلام البورد مقتنعون بيها
وهي حينما تكون المراة في بدايات حملها حينما تكثر من مشاهدة شخص بعينه يأتي الجنين شبيها بهذا الشخص
لا ادري اي منطق اختاروه هنا فالشبه والصفات جينات وراثيه يحملها راس الحيوان المنوي وهو محتفظ بها من الاجداد فقد ياتي المولود بجد له توفى قبل ميلاد ابوه بعشرات السنين
مضافا اليها جينات الام التي تحملها البويضة المخصبة

وايضا بقايا الحبل السري يتم دفنها دائما في المدارس والمساجد لكي يكون المولود معلقا قلبه في هذه المواقع

يكون الجماعه اياهم دافنين سرتم في القصر الرئاسي

أنا القدامك دا قالوا لي انقلبت كديس

زمان كانو بجيبو كيس النايلون ويولعوهو في النار وتنقط نقطة في يدك ويسموها (شطارة) .

دي شطارة امك عاشة بت قمر
تعرف يا مصعب عاشة بت قمر ست الاسم هي والدة فنانا الرائع كمبال ترباس
ربنا يديهم الصحة والعافية

يا زول انت كان ستحمى باللبن بس عشان تبقى قرد بالمره وكل مره تتحول لشخصية جديده
ههههه

Quote: هوي يا الحدية هاك سن الحمار واديني سن الغزال ومن لم يفعل ذلك لا تقوم له سن جديده

والله انت يا ود شم قديم (قدمه)

هههه انت يا مصعب الحاجات دي بتفوت عليك
قبل كم سنة ومغربا بدري لقيت الوالده ربنا يديها الصحة والعافيه منداحة في فاطنه والقصب الاحمر رفقة اولاد اخواني
قلت ليها يا حاجة عليك الله ما تملي جماجم الشفع ديل بالحاجات دي
والغول والكلام الفارغ دا
خليهم يشوفوا اسبيس تون وين وكوكب زمرده والحاجات دي كان واحد تقع فوقو منقة يلحقا تفاحة نيوتن
ما تنسى كمان القصص والحجوات الا بالليل بالنهار نهي زندهي

وكان في السحاري البعيش في البحر ( النيل )
ويا ولاد ما تمرقوا كان لاقاكم يديكم عِرق وتبقوا زيوو سحاحير
ويا خدكم معاهو ، ومن صفات السحار انه لا يشرب اللبن ( زول لحوم ساي ) وريحتو سمك سمك وبياكل الناس
وأحسن تشيلوا معاكم ملح عشان كان لاقاكم تدوه الملح ( لأنو بحب الملح ويقرشو قرش )

اضافه اكثر من رائعه

تعرف يا حسن ناسنا ديل الفراغ الحاصل خلا الخيال خصب عندهم
يعني كل شئ وعندو تفسير وفق قدراتهم العقلية ومعلوماتهم

ذكرتني بالتفسير الطبي حقهم للمرض الجلدي الذي يصيب الراس ويعرف عند العامه بالكوك وهو عبارة عن نتؤات مقرحه تصيب فروة الراس لا اعرف اسمةالمرض العلمي ولكن اعرف تفسير اهلنا الطيبين اذ يفسر عندهم بانه نتيجة للاصابة ببعرة الابل فأذا رماك احدهم بها فانك تصاب به
وكذلك الورم الذي يصيب بطن الرجل وهو يفسر نتيجة وطء بول الحمار
اكثر ما لفت نظري ان تفسيراتهم كلها بالحيوانات المفترى عليها

اصحاب الثروة الحيوانية والرواعية وبقايا الترابله مثلما يقول ابنعوف
هؤلاء يعرفون خرافة رمي ما يسمى بالسلا على اعالي الاشجار
وللذين لا يعرفوه هو بقايا الحبل السري للشاة حينما تضع مولودها
والخرافه تقول ان من لا يفعل ذلك لا تلد له الشاه مره اخرى
وكذلك ظاهرة التلاعب بعود النار راسيا وافقيا يؤدي الى اجهاض الشاة تطرح بالبلدي
الم نقل ان اهلنا حكاياتهم وخرافاتهم بطلها الحمار والتيس
ولتيس ام بلينه حكاية قادمة