الشايب الماهو عايب..... قليلون امثالك يا ميرغني

الشايب الماهو عايب
قليلون امثالك يا ميرغني

- صباح الخير يا ميرغني…..
- صباح النور يا كارب – كيفك وكيف ناهد والأولاد. ؟
- كلو تمام يا صديقي.. الصحة والأحوال.. مشغول شوية؟؟؟
- أبداً go ahead يا كارب
- بسرعة يا أستاذ .. لأنو أنا ضارب ليك وإنت في المكتب .. ولأنو كمان حا نتلاقي بعدين.. في بيتكم طبعاً .. أنا جهّزت الدواء بتاع أختنا.. قدرت ألقى منو جرعتين حا أجيبو معاي بعدين .. الساعة 7 كيف؟؟
- يا سلام يا كارب – فرّحتني والله – لكن خلينا نتلاقى الساعة 8 لأنو 6 أنا طالع استراحة الشروق في شرق الرياض .. ياخي أنا ما كلّمتك؟؟ أخونا دينق – دينق لوال – أيوا .. دينق الشغال في الكهرباء .. ياخي كان معانا لما عزمنا عبدالعزيز بركة في البيت أيام مهرجان الجنادرية – أيوا – هو طلع قبل ما تجي إنت بشوية .. أخونا دينق عندو العزاء بتاع أخوهو في استراحة الشروق .. اخوهو اتوفى في السودان قبال يومين وأنا ذاتي بعرف أخوهو ده .. كان معانا في أولى قانون .. وبعد داك ساب الكلية ومشى يدرس طيران .. خليني أمر عليك في البيت الساعة خمسة ونص ونطلع العزاء مع بعض وبعدين نرجع على بيتنا.. بالمناسبة يا كارب حا يكون معاي د. عبدالماجد.. زميلكم ياخي شغال في مستشفى قوى الأمن وهو كمان ما قصّر أبداً .. جاب لي أمبارح جرعة من الدواء لأختنا ذاتا وبكرة إن شاء الله حا أسلّم الـ package كلها لمحمد عبدالجليل – أيوا محمد مسافر السودان بعد بكرة وحا أمر علي في البيت المساء.. وبمناسبة محمد عبدالجليل يا كارب أنا ختيت لك في الكشف العملوا محمد وناس الجمعية لأختنا ديك .. أيوا ..... يا ها ذاتا يا كارب – أيوا الكانت في غبيراء – ياخي الزولة دي بقت ظروفها صعبة شديد – تصور زوجها لسة حقوقو ما طلعت بعد وفاتو في الحادث الرهيب داك وإيجار الشقة إتراكم عليها وكمان طلع ليها سكري.. أيوا .. تتذكر أيام وفاة زوجها طبعاً الناس كلها ساهمت – ناس د. محجوب ونجم الدين والطيب الشيخ .. لكن أسع دي كمان لازم نعمل كشف تاني …محمد وناس الجمعية already شغالين في الحكاية دي .. بالله يا كارب شوف معاك د. عثمان العبيد وباقي الشباب في العسكري وأنا معاي ناس الخير ود. أمين .. وأهلنا ناس الأبيض .. دايرين نكبّر الدعم المرة دي شوية..
دقيقة يا كارب معاي تلفون في الخط التاني .. أيوا – أيوا – نصار الحاج إزيك .. كيفك وكيف المدام والأولاد.. قلت شنو يا نصار؟؟ ..
لا ياخي ..
متين الكلام دا ..
ادم سبيل.… ؟
لا حول الله..
وأخبارو أسع شنو؟ ..
مرقّد وين؟؟ ..
في الشميسي؟؟
في وحدة الغسيل؟؟
فشل كلوي؟؟
فشل كلوي حاد؟؟
ومعاهو منو؟؟
وبتين الكلام دا؟؟
من يومين؟؟
وليه ما قلت لي ؟؟ ..
وأولادو كيف؟
الفاتورة؟؟ .. طلعت كم؟؟
12500 ريال؟؟ .. والتأمين بتاع الشركة ؟ ما بغطي؟
وأخوهو داك وين؟؟
سافر السودان؟؟
والأولاد وين؟؟
في الامتحانات؟؟
والسكن كيف؟؟
طيب لازم نتصرّف بسرعة.. أول حاجة الأولاد ديل .. والملف بتاع المستشفى.. أيوا ممكن في الحرس الوطني.. أنا حا أتكلم مع د. محجوب.. وكمان نحاول العسكري.
دقيقة خلّيني أشوف كارب ..معاي في التلفون التاني..
يا كارب .. أظنك سمعت الحكاية دي..
أيوا يا ميرغني وأثناء ما إنت بتتكلم مع نصار أنا اتصلت بدكتور ردن – أيوا اللواء ردن المطيري .. صديقي من أيام ما كنت شغال في القرية العليا قبل سنين طويلة .. أيوا هو ذاتو الكان مدير المستشفى العسكري والراجل أداني ميعاد معاهو الساعة 12 ونص.
تعرف يا ميرغني لحسن الحظ أنا ما شغال الليلة وإن شاء الله موضوع الملف بتاع أخونا ادم سبيل اتعمل الليلة…بالمناسبة يا ميرغني الفشل الكلوي الحاد دا رغم خطورته لكن ممكن إتلحق إذا اتعالج صاح وبسرعة .. خليني أمشي البيت أسع د ي عشان أقابل د. ردن في الموعد .. أيوا أنا لسة في الشغل بعد دوام الليل ولسة ما وصلت البيت ..
لا يا ميرغني ما تشيل هم وحا أتصل بالشباب في الشميسي عشان نعالج حكاية الفاتورة دي .. أيوا .. أيوا .. مفروض إتعمل ليهو ملف طواريء لإنو دا فعلاً وضع طاريء بحق وحقيقة….ياخي عليك الله شفت ليك وضع ما طاريء من 89 لحدي الليلة؟
لا إن شاء الله مافي عوجة.. وموعدنا قائم
يا سلام عليك يا كارب أنا في انتظارك وانتظار الأخبار
يا سلام عليك إنت يا أستاذنا
بالله يا كارب خليني updated
بالتأكيد يا ميرغني
طيب سلام يا كارب .. وتحياتي لناهد والأولاد.
إديك العافية يا ميرغني
إلى اللقاء يا كارب
إلى اللقاء يا صديقي
إلى اللقاء
إلى………. اللقاااء
إلى .. ماااذا .. !!! يا ميرغني!!!
إلى ماذا يا أخي وصديقي وحبيبي!!!
إلى .. لا لقاء..!!!
لا .. ليس هذا بمقدوري يا ميرغني الشايب
سأقول الآن .. لا .. ولا أذكر إنني قلتها لك في أي مرة قبل اليوم الحادي عشر من هذا الشهر الثالث في العام الثالث عشرة بعد الألفين.
فقلبي مثل قلبك يا شايب .. ليس قادراً على شدايد مثل هذه..
هل تريد أن تقول أن حواراً مثل هذا سوف لن يدور مجدداً بيني وبينك يا ميرغني؟؟
وهل تريد أن تقول أنني سوف لن أطرق مجدداً باباً ظل مفتوحاً على مصراعيه لكل طارق ادلهمت في وجهه ليلات الغربة وأنشبت نهاراتها المحرقة في روحه الألم؟؟؟؟

بيتك يا ميرغني .. ذلك الذي تفوح منه ليلاً أو نهاراً رائحة الضيوف والطعام ..
يا للفجيعة يا صديقي .. يا للألم..
هل تريد أن تقول أنني لن أسمع مجدداً صوتك يا شايب..
صوتك يا ميرغني
ذلك الحميم
ذلك المحتشد بالقرب
والحب
والتبني
والتمني
والتغني
والسلام
ذلك الندي
والشجي
والسخي
والفهيم
والرحيم
صوتك يا ميرغني
ذلك الذي جوهر صدر المحافل
وأسكت صوت المرجفين
صوتك يا ميرغني
ذلك الحامل عذابات المحتاجين
حاجباً أسماءهم
جالباً أفراحهم
مرافعاً عن حالهم
ورافعاً أثقالهم
مواصلاً لهم
مناضلاً من أجلهم
مقاتلاً وباسلاً
صوتك يا ميرغني
ذلك الساطع النبرات
عندما ينادي الحق
ويرتفع الثمن
ذلك الصاعد الدرجات قفزاً
حينما – الداعي – الوطن
ذلك الذي تخنقه العبرات في ساعة الحزن
وتغسله ضحكات طهر طفلة
والليالي العامرات
تهدي...
إلفةٍ لوحشة…
نظرة لفكرة
وأغنية لخاطرة
وساعة لذكرى
وقصة لأخرى
وزماناً لزمن
صوتك يا ميرغني
عندما يدعونا
ان اتحدوا ..
لا تبتعدوا
فالنيل ينادي .. والغابة والصحراء ..
في بيتي لا غربة تبقى
لا هم يبيت
الباب بلا مفتاح
وغرفة مازن في الأعلى
للمتعب منكم
أو من يحتاج مبيت
اجتمعوا عندي
تلتمع الفكرة
تطلع من بين أكمام الغربة
خاطرة تكبر
تنبت شجرة أحلام وردية
نسقيها
يزدهر البستان
نهديها للوطن النابض فينا أغنية
أمنية حُبلى بالأحلام
تخفق رايات المستقبل أعلام
تروي جذر الحرية
ما أنبل دعواتك يا شايب
ما أروعها
ما أسماها
ما أغلاها يا شايب
في زمن.. من رث الأيام
زمنٍ مختال بالزيف
زمن تلدغ عقربه كل شريف
زمن ضليل .. ضال .. ظليم ومخيف
زمن غيهبه .. توهان في الغربة
أو في الوطن نزيف..
صوتك يا شايب
صوت الحلم الغائب عنا
صوتك حس أمانينا
صوتك همس قصائدنا الطفلة داخلنا
صوتك موسيقى وردية يا شايب
صوتك يهدر حتى في صمتك
صوتك في العينين دمعتان تلتمعان
وفي الشفتين مولد ابتسامة
وصوتك البدء عند كل لقاء
والمتن منه…. والختاما
نم هانئاً يا صديقي الجميل
ويا أخي الذي ولدته كل أمهاتي
من مهيرة بت عبود
إلى ستنا محمد سليمان
فأنت لن ترحل – وليس مثلك من يمضي بلا أثر
بل أنت تركت وراءك كل المآثر
وإذا كنت من بلادي
قد أهدتك لنا عروس رمالنا الجميلة
فها أنت اليوم:
عريس الرمال كلها والجبال
والنيل والغابة والصحراء
دامت فينا ذكراك العطرة يا ميرغني
ودام الوطن الذي ينجب رجالاً
مثلك يا شايب


محمد خليل الكارب

اللهم أرحمه وأغفر له وانزله منزلة الصديقين والشهداء وحسن اولئك رفيقا ويلهم أهله الصبر .

ربنا يصبركم أستاذ محمد خليل الكارب

أحسنت يا دكتور محمد الكارب في البكاء عبر شعرية بائنة على فقيدنا وفقيد الوطن ميرغني عبدالله مالك.نعم صوته الممدود هو الذي يكشف عن تضامنه اللا محدود مع كل من تلم به ضائقةومع الإنسان السوداني حيث حل.كان يخفي آلامه الشخصية ويتحسس أوجاع الآخرين.ليتني كنت قربه في أيامه الاخيرة. ليتني شهدت وداعكم له.أعزيكم وأعزي أهله - وأبناء دفعتنادفعته في اولى آداب قبل ان ينتقل هو لدراسة القانون- وأنظم القول في فقده لو تنفع الكلمات.

آآآآآه
سكت الكلام

تسلم يا محمد الكارب

والسلام على روح أخينا ميرغني، وحسن العزاء لكل من فقده..

اللهم ارحم الاخ والوالد والصديق الودود الاستاذ ميرغني الشايب ، اللهم اجعل قبره روضة من رياض الجنة كما جعل داره روضة من رياض الكرم والجود والأريحية والترحاب .. آمين

لك التحية اخي محمد الكارب على هذه اللفته البارعة في رجل قل ان يجود بمثله الزمان مرة اخرى رجل ترتاح لرؤيته ولقاءه من اول وهلة تراه فيها ،، رجل كريم ونبيل وشفاف وصاحب افضال على عدد وافر من ابناء وطنه في شتى بقاع العالم وله من المكانه الثابته في قلوب الناس قدر وافر من المحبة والالفه والذكريات الجميلة والكلمات الطيبة الندية ، رجل لو وضعته على الجرح لطاب من طيبته ونبله وصدقه وشفافيته ،، الحديث عنه يطول ويطول اخي محمد ويا ليتنا نوفيه حقه ,, عرفته منذ اكثر من عشرة سنوات فلم تغيره الظروف ولم تغيره الايام هو كما هو منذ ان عرفته شجاعا مقداما لا يهاب في الحق لومة لائم مثقف من طراز فريد كريما شهما سخيانبيلا عطوفا يرق قبله للصغير والكبير للغني والفقير لا يفرق في تعامله بين الناس فهكذا عرفته إلى ان وافاه الأجل المحتوم ,, فذكراه لم ولن تزول من قلوبنا وأفئدتنا ما حيينا ،،
الدموع ملأت عيني وانا اكتب هذه الاسطر القليلة في حق اخونا ميرغني ولا اقوى على متابعة الكتابة فمعذرة لأن الحزن عميق على روحه الطاهرة ,, وكم من مرة حاولت ان اكتب عنه ولكن اجد نفسي لا اقوى على ذلك فجزاك الله الله عنا الف خير اخي محمد فقد حركت فينا مكامن الكتابة عن هذا الرجل العلم الذي نفتقده وسنفتقده ما حيينا وسيفتقده كثير من الاعمال الخيرية التي كان يقوم بها في الخفاء وفي العلن .. رحمك الله ابا معتصم ..

هناك تأبين سيكون في مطلع الشهر القادم للاستاذ المرحوم ميرغني جاري العمل علي ترتيبه اتمنى ان تنضم إلينا اخي محمد لكي نحاول كلنا رد الجميل لهذا الرجل الجليل ..

تحياتي : ياسر العيلفون

Quote: صوتك يا شايب صوت الحلم الغائب عنا صوتك حس أمانينا صوتك همس قصائدنا الطفلة داخلنا صوتك موسيقى وردية يا شايب صوتك يهدر حتى في صمتك صوتك في العينين دمعتان تلتمعان وفي الشفتين مولد ابتسامة وصوتك البدء عند كل لقاء والمتن منه…. والختاما نم هانئاً يا صديقي الجميل ويا أخي الذي ولدته كل أمهاتي من مهيرة بت عبود إلى ستنا محمد سليمان فأنت لن ترحل – وليس مثلك من يمضي بلا أثر بل أنت تركت وراءك كل المآثر وإذا كنت من بلادي قد أهدتك لنا عروس رمالنا الجميلة فها أنت اليوم: عريس الرمال كلها والجبال والنيل والغابة والصحراء دامت فينا ذكراك العطرة يا ميرغني ودام الوطن الذي ينجب رجالاً مثلك يا شايب

شكرا لك محمد الكارب..
أ و لا أفخر أني وميرغني من مدينة واحدة وفصل واحد وحيين متجاورين ..
..
نم هانئا يا صديقنا الجميل..
في متقلب رب غفور رحيم..

كل الشكر للاعزاء د بشرى الفاضل و ياسر وياسر واسرة العزيز الراحل ميرغنى واصدقائه الغزيري العدد والاحزان

كل الشكر للاعزاء د بشرى الفاضل و ياسر وياسر واسرة العزيز الراحل ميرغنى واصدقائه الغزيري العدد والاحزان

شكراً لك ياكارب لإخراج بديع لسيناريو نحفظه عن ظهر قلب
تكرر تكرر تكرر
وكان البطل واحد!!

ياللفقد العظيم
رحمة الله وغفرانه عليك ياميرغني
ولكم جميعاً الصبر وحُسن العزاء.

د عائشة موسى البركة في الجميع يا غالية