أســــوأ أداء لأغنيات الغير من قبل فنانين محترفين..

ممكن يكون في أسوأ من كده..

بس ديل الوقعوا في يدي..

.. samples

:)

عصام محمد نور يحتل المرتبة الأولى في السوء

لشدة الشلاقة في اختيار واحدة من أجمل الأغنيات السودانية

بالغتى ياخى عصام دا عجيب يا الهادى اسمع دى

بالغ عصام محمد نور ، الاغنية ما مناسبة ليهو من الاصل رغم انو امكانياتو الصوتية ممتازة .. لحقا الصح ..

تحيات

عبد العزيز المبارك..

Quote: والله كتل الاغنية وعسمها تعسم اداااء ركيك جدا بس نقول الله يرحمك ياابو الزيك

الملل والضجر وعدم التفاعل واضح جداً على الجمهور لسوء أداء عبد العزيز المبارك وتعسيم الأغنية كما قال أخونا الفوق ده..

عسمها شنو ده عمل ليها شلل رباعي عديل كده..

الناس قربت تنوم زاتو..

عصام يبدو متخصصاً في تفطيس الروائع..



وسعادة "العميد" عمر الشاعر يتدخل لإنقاذ رائعته ورد بعض الروح والألق إليها :)

فلولا تدخل عمر الشاعر والمجموعة للحقت رائعة زيدان أمات طه بفعل الأداء الباهت لعصام

غايتو يا امال النور

ربنا يديك العافية بس

لكن الاغنية دي بشتنتيها بشتنة السواد والرماد

Quote: بالغتى ياخى عصام دا عجيب يا الهادى اسمع دى

وضاحة.. إزيك.

أنا كنت أقصد الأغاني المسموعة للكل أو لغالبية السودانيين يا وضاحة والعليها إجماع أو ما يشبه الإجماع ، وليست الأغاني المسموعة على نطاق محدود أو لدي فئات معينة، والتي يمكن أن يؤديها أي شخص ما فارقة يعني :)

بالنسبة لعصام محمد نور، هو ما كعب لو اكتفى بترديد أغانيه الخاصة.. لكنو قاعد يجوط أغاني الناس التانيين..

سميرة دنيا...........

وهناك آخرين ادوا باجادة اغنيات الغير بل وبعضهم اعاد اليها القها عندما غني المرحوم زيدان يا خاين لابراهيم عوض والحالم سبانا للشفيع ويا اغلي من عيني للكابلي

وحمد الريح تخلي عن الصياح فكان اداؤه رائعا في مرت الايام

والله يا الهادي بوست في الصميم وفكرتو أكتر من رائعة ..!!


وفعلا النماذج الجبتها هنا موفقة جدا و معك كل الحق في نقدك لـ مُفطسي الروائع ..!


سمعت الكتير من الأغاني لمفطسي الروائع هؤلاء .. بس ما متأكد لو كانت في اليوتيوب موجودة ولا لا .. إنشاء الله ألقاها لمن اجيك بكرة وننزلا والناس تحكم بي نفسها..


تسلم ..

شكر الله......

شرحبيل أحمد..............

الهادي ونادر ..

البوست التحت دا فيهو اغنيتين بيغنيها شرحبيل واحدة لي عثمان حسين والتانية لي أحمد المصطفى .

نسمع رايكم بالله :

شرحبيل يغنى للفنان عثمان حسين...

تحياتي الهادي أخوي وضيوفه الكرام ....

التقليد هو أساساً مشكلة ... ولكن ...عندما يأتي فنان ويغني أحد روائع الآخرين لامانع من أن يغنيها بإحساسه الخاص ... يضع بصمته فيها وليس كجهاز التسجيل ، أما البشتنه والخروج عن اللحن الأساسي وبشتنة العمل فهذا مرفوض ومستهجن من الجميع .... وغالباً ما نجد ذلك في أغاني الحقيبة لخالدة .....


عصام محمد نور راجل ما ساهل فعلاً كما قالت أختنا وضاحه .... أبدع كثيراً في ترديد أغنيات الكاشف بالذات .... ولكن لكل جواد كبوه كما يقولون ... نحن قد نعذر عصام وتشفع له أغنياته الخاصة الجميلة وصوته ذو التطريب العال ...ولكن عندما يتصدى مدعي الفن - وهم كثر - كشكر الله عز الدين مثلاً لأغاني هرم الفن السوداني وردي ويبشتنها بشتنة السواد فإنني أرى أن تقام عليه دعوى قضائية ويحاكم .... الزول ده ما عندو حاجه يا ناس أصلاً هو حقو ما يغني أساساً ويمش يشوف ليهو كوره ولا سجم الرماد اليسجمو .....

شكر الله .... (قدر الله) في مسامحك يا حبيبي ....قدر ما فتشت ما لقيت تسجيل لأدائه لبعض أغنيات وردي :




مع خالص شكري وتقديري ؛؛؛؛؛

Quote: البوست التحت دا فيهو اغنيتين بيغنيها شرحبيل واحدة لي عثمان حسين والتانية لي أحمد المصطفى . نسمع رايكم بالله :

اخونا ناذر ازيك يا حبيب.......

و الله شرحبيل ابدع عديل كده.......ياخي ظلموني الاحبة دي غناها بصورة رائعة كروعته.......

لكن اغنية الراحل زيدان اللي انا جبتها فوق عناها بصورة مبشتنة...و ما غمل ليها اي بروفة والشاهد انو كان بقرا من ورقة.........

شكر الله..............

شكر الله......تاني.......

الله يسامحك ياخي.......

الهادي وضيوفه
تحياتي


أعتقد انو النماذج اعلاه موفقة جدا ..
ما عارف الفنانيين ليه بضرسونا دايماً
المفروض الواحد لما يغني لغيرو يعمل مليون حساب
مثلاً عصام محمد نور لما غنى ما ممكن تسافر
ما كان موفق أبداً .. ما بقدر اتخيل اني ح اسمعا لفير محمد الامين
في أغاني مفصلة على اصحابا .. ذي النموذج دا
ونموذج الحزن النبيل للراحل مصطفى سيد أحمد
مستحيل الاغنيتين ديل يجي زول يقدر يأديهن بنفس الأداء
عند محمد الامين وأبو السيد ربنا يوسع مرقده "يا رب"


المفروض الفنان لما يجي يختار أغنية مسموعة يعمل ألف حساب
أولا الطبقات الصوتية لازم تكون متقاربة .. والتنفيذ الموسيقي
لازم يكون متسق مع التنفيذ الاصلي للعمل .. وحتى لو في تطوير
لو الاغنية قديمة يكون ايجابي ويتم عرضه على مختصين
وعمل بروفات متكررة .. قبل تقديمه للمستمع ..
لكن من يسمع !!!!!!!
الناس دي كلها عايزة تحصل السوق .. بدون مراعاة لحقوقنا كمستمعين
رفقا بآذاننا .. وأغنياتنا الخالدة .. العايز يغني الليسوي حقو :)))






_______________
أستثني بعض أعمال نانسي عجاج
ومحمود عبدالعزيز مما قلت اعلاه

تحاياي للجميع

سلام يا شباب ومرحب بيكم

أخونا عبد الله ، كيف أحوالك ؟؟

عصام يبدو أنه ترك أغنياته الخاصة وتفرغ في الأونة الأخيرة لتشويه أغنيات الغير، " قلنا ما ممكن تسافر" كتيرة وكبيرة عليه وعلى تجربته الفنية

آخر مرة حضرت ليهو حفلة كانت في أوهايو من دخلت لمن طلعت ما فهمتا الزول ده بغني في شنو، جوطة وكواريك ما تفهم منها أي حاجة واستغربت انو الزول يجي قاطع المسافة دي كلها عشان يقدم للناس هردبيس زي ده..

أخونا ود الباوقة والأخ عمر ونادر مرحب بيكم والبوست بوستكم..

وبالجد أمال النور انتهت من الحزن القديم، ولو كانت تغنى بطريقة أمال النور هذه كان زمان اتمسحت من ذاكرة الناس ..


ناذر ـ سلام يا حبوب.. شرحبيل قامة كبيرة ما في كلام وأتفق مع نادر في أن الأستاذ شرحبيل أحمد أجاد وأبدع في ظلموني الأحبة للأستاذ عثمان حسين..

كدي يا ناذر ومعجبي وردي أسمعوا نانسي عجاج في رائعة الأستاذ محمد وردي واللي تعتبر واحدة من أجمل الأغاني السودانية ، وأدونا رأيكم..

الاخ الهادي والضيوف الكرام،
السلام عليكم،

مع إحترامي لكم جميعاً و لآرائكم وأذواقكم، لكن هنالك نقطة مهمة أريد ان ألفت نظركم إليها وهي ان لا أحد منكم حتى الآن أتى بمعايير فنية واضحة ليدلل بها على سوء أداء هذا الفنان او ذاك.

هنالك معايير للتقييم منها على سبيل المثال:
1- مخارج الحروف والحفظ الصحيح لكلمات الأغنية.
2- الأداء الصوتي السليم للنغمات، أي عدم التنشيز.
3- عدم الشطح والتحوير المخل بالَّحن الأصلي لللأغنية.
4- تناسب السلم الموسيقي مع طبقات صوت المؤدي.

إذا طبَّقنا تلك المعايير على المثال الاول ( المبدع عصام محمد نور) نجد انه استوفاها كلها مع إضافة تطريب من إحساسه الخاص. إذا أخذنا مثال الفنانة سميره دنيا، واضح تماماً ان السلم الذي إختارته لأداء اغنية كنوز محبة لا يناسب طبقات صوتها ولذلك اتشنقت. هذه فقط أمثلة. في أنتظار آرآئكم

لكم كل ودي واحترامي
عثمان دُنقس

سلامات حبينا ادريس..

أصدقك القول..

ما عندي أعصاب ولا حيل أسمع بيهو شكر الله ومنو ديل..

حدي محمود عبد العزيز من الفنانين الشباب، و معتز صباحي في بعض الأحيان

وفي واحد اسمو سامي المغربي.. لا حولااااااااااااا .. ياخ الزول ده مرض عديل ..


مشكور على المرور والمداخلة يا حبيب..

مرحبتين حافظ..

Quote: المفروض الواحد لما يغني لغيرو يعمل مليون حساب مثلاً عصام محمد نور لما غنى ما ممكن تسافر ما كان موفق أبداً .. ما بقدر اتخيل اني ح اسمعا لفير محمد الامين في أغاني مفصلة على اصحابا .. ذي النموذج دا ونموذج الحزن النبيل للراحل مصطفى سيد أحمد مستحيل الاغنيتين ديل يجي زول يقدر يأديهن بنفس الأداء عند محمد الامين وأبو السيد ربنا يوسع مرقده "يا رب" المفروض الفنان لما يجي يختار أغنية مسموعة يعمل ألف حساب أولا الطبقات الصوتية لازم تكون متقاربة .. والتنفيذ الموسيقي لازم يكون متسق مع التنفيذ الاصلي للعمل .. وحتى لو في تطوير لو الاغنية قديمة يكون ايجابي ويتم عرضه على مختصين وعمل بروفات متكررة .. قبل تقديمه للمستمع .. لكن من يسمع !!!!!!! الناس دي كلها عايزة تحصل السوق .. بدون مراعاة لحقوقنا كمستمعين رفقا بآذاننا .. وأغنياتنا الخالدة .. العايز يغني الليسوي حقو :)))

معظم أعمال الأستاذ الموسيقار محمد الأمين اجتهد فيها ايما اجتهاد سواء بالنسبة للتلحين أو الأداء أو بالنسبة للتوزيع أو الأداء الموسيقي ككل..
لذلك كان من الطبيعي أن يصبح الأستاذ محمد الأمين مدرسة متفردة لحالها وأن يعتلي صدارة الغناء السوداني بلا منازع ولا منافس، وأن تصبح أعماله كذلك عصية على الاستنساخ والتقليد..



شكراً يا حبيب..

اعجبتنى اغنية ما ممكن تسافر اعلاه لصاحبها الاصلى جدا.

حقيقة ان تغنى غناك وتصبر عليهو وتلوليهو فى عصرنا هذا صعب جدا جدا. المستمع مشتت شوية واجهزة اعلامنا لاتريد الجديد بل شوية ونسة وشوية دخل مادى من بعض اعلانات مثال لذلك اغانى واغانى.

شكرا صاحب البوست

Quote: هنالك معايير للتقييم منها على سبيل المثال: 1- مخارج الحروف والحفظ الصحيح لكلمات الأغنية. 2- الأداء الصوتي السليم للنغمات، أي عدم التنشيز. 3- عدم الشطح والتحوير المخل بالَّحن الأصلي لللأغنية. 4- تناسب السلم الموسيقي مع طبقات صوت المؤدي.

هذه المعايير طبقها فيصل عبد اللطيف (فيصل الصحافة) في أدائه لأغاني الفنان الطيب عبد الله فأبدع فيها ..
فليت المقلدون يتقيدون بهذه المعايير .. فالشاب شكر الله غنى للطيب عبد الله (يا غاليه يا نبع الحنان) فجعل منها مسخاً لا يمكنك متابعة الاستماع إليها ..