Post: #1
Title: وراي شن في؟؟انجدني ياشيخي
Author: مها عبدالمنعم
Date: 05-10-2013, 06:17 AM
Parent: #0
انا والبنوت قلنا النمرق نفزع العصر مكسرين غابة علي حلة ورا .أها العصر بدري مرقت شِلتَ قٌفتي ، ناغمت علي ستّنا. قالو مرقت .. ناغمت كوثر، لقيتهاحتي هي مرقت .
قلت " البنوت جنن! مالن فاتني؟ النجري ألحقن، المحل قريب مو بعيد ...
ولكعت لمّن وصلت الغابة . البنوت مافي أتر لكرعيهن! علا ما خفت. قلت "بكونن جن بى ورا.
دخلت الغابةبسراع بسراع قعدت ألقط في الواقود . وزي كاني من بعييييييد بسمع ضحك. قلت "اليصبرن قبال كدي ماعملنها، ومرقن بلاي.. عِلاّ شن في ؟"
وشويه شويه المحل صنصن صنه شديده، غير حِس الشجروالزرازير ماتسمع شي ومرّة مرّة كدي يجيك صوت البومة الله يخربو.
قبال أملا قفتي سمح قلبي تاورني، كدي قمت لفحت القفة بشوية حطب، وخليت الباقي في مكانو ومرقت.
وأناماشه وراي اتر كرعين ، اها قلبي وصل حلقي من الخوف. اقيف الحس يقيف .. امش الشي يمشي وراي.. وبس قلت " هوي يا الهديه ابقي راجل الليله واركزي تب . شن جاييك؟ "
خففت مشي ، حتي الوراي خفف مشيهو .
ومن دخلت طرف الحله اطلقت كرعي للريح . وفد جريه .. الشي ساكيني .. آي وحات الله نامن ضربت الباب كروو وراي ، اخواني جو مارقين، مالقو فيني غير الكرعين ماشات وراي
الشي جاء شيخ احمد عزم لي ماعرفت شي بس الخلق تروح من قدامي الحس يبين ومافي زول بسمعو الا انا واوصف بلا فايده
مافي زول ماقال اتمسيت غايتو بعد كم ليله كدي الشي ختر ومامرق علي السهله ابد
بس سمعت كوراك ناس التومه اكان ماتت حبوبته اكان زول اخر جريت من سمعت حس الكوراك وختت كراعي فوق عتبة دارنا اسمع اتر الكرعين لاكعات وراي اتلفت مالقيت شي وصلت بكيت وبكيت وبكيت نامن قلبنا دا وجعنا درت الصده علي الدار علا خفت الحس يلقاني براي الرجال في الدافنه ماجو
رجيت نامن الرجال عادو من الدافنه وعدت بيتي يمين بالله من ديك مامرقت لفد جهة اخواني خافو الشي يقوم يكتلني وجتتي ماتنخبر
بنوت الفريق كلهن خبرن خبر منعي من المرقه علي السهلا ماهن مقصرات يفزعن ويجدعن لي عود والا عودين علا وحات نضري روحي كاتمه علي كتيم شديد بدور امرق افزع مع البنوت
بدور امرق اجيب دلو الما علا شن اسوي وهادين اخواني قاعدين غفر حراسه اقوم من تصبح اقش واعوس والم هديمات العوان اغسلن واصم خشمي اقعد اتبطح من عنقريب للاخر الضهر بلا الجبنه وسيرة الناس مافي قلت للبنوت يابنوت هوي دحين انا الهديه الواااحده دي تخاف لها من حس مي خابره شن نفرو؟
الكلام اعوج اخير النمرق اشوف شن في يمكن هاالحس قرص والا لدغ مات اقعد لا متين في بكاني حتي هاداك الجنا المبدول الكان بحنس في اشان ارضاه راجل بشوفو بلا المطوحه علي دارنا ماعنده ويوم يوم يقعد غفير حراسه بكان اخواني اها اليوم البكون عليه دور الحراسه قلت للبنوت النكلمو كان خلانا مرقنا حتي هو بمرق معانا فيشان الخوف الفي قلوبن من ناحي الحس دا
اها كلمناه ولينت كلامي نامن لان قلبه ورضي يمرق في اترنا مشينا علي عادة البنوت الحطب الغابه ملانه هادي المره لافيها مناقره ولا ضحك كل واحده خابره شن المرقنا وعامله رويحته مي خابره ومعانا ابن عمي مانو بعيد ...ووحات نضري البنوت خايفات نامن مريم بت علويه ترجف الشوكه دخلت في كراعه ماحست الا ناغمتها هوي يابت الشي البت قمزت من مكانها لامن ضحكت نهرتني مالك ؟
لالا عاني كراعك شن فيها حتي قالت ووب علي الشوكه اذتني هوي انكربن عوداكن اهلنا صادين
جينا ماشين في امان الله لا حس ورانا ولا في شي نامن قربنا الحله بدا اتر الكرعين متل الراجل ماشي علي مهلته في الاوال وعاينت لمريم وجدتها منططه عويناتها وستنا حرنت في مكانها وحات عمري بالت في هديماته خبرت الشي جميعا سامعات حسه ..
كيف دخلنا بيت ناس ستنا مابخبر بس وكت ضربت
مريم الكوراك اخواني اوال من وصل وسعال شن حصل
والبنوت كل واحده تحكي كيف سمعت الحس البتقول الشي متل مشية الراجل الكبير التخين والتقول لا متل مشية الجاهل الصغير والتقول مشية بختره والبتقول مشية زول مسرع
الشي الحس جميع النسوان بقن يسمعن مشيه محل ماني ماشيه بقن النسوان يتجنبني والشيطان بدور الهديه براها
قلت هوي يانسوان ها الشي حس بسراع سويتنه جن!
علا سمح وزين من داري تاني ماني مارقه اليرتاح في مكانه
الشي الصلاة وبصلي شن بدور باريني علا اشوف اخره سمعت في الخلا الفوق بشيخا ايده وااااصله بس قلت الا نقوم عليه
والشي المشي بكرعينا اتقودنا انا والبنوت بالدس خفنا يحمونا ويربطوني بالحبال مشينا في القلع دا لامن نعلاتنا ديل اتخرمن وماوصلنا والغريب اتعودنا سماع الحس ماخفنا لا سعلنا لاهبشنا في مشيهو ونحن في مشينا علا البت بت علويه قابضه في طرف هدمي لامن من هنااااك شفنا القوم حتي فكت هدمي قايله الحمد لله يابت يالهديه ابقي خابره هادي اااااااخر مره ببراك دون شور اخوانك
الرجال عوان صغار وفيهن من شايل لو زمباره والشي شدة ماصوته حنين نامن قعدنا نبكي والعشا دخل ماحسينا فرد مره الصبي الشايل الزماره جا ناغمنه انتن بدورن منو
فكي حمد
شن عندكن
لالا بنقولو ليه براه
سمح قايلات امركن سر ماجايات تشكن الحس؟
ايه شن خبرك
مي انت ياك البسموها الهديه ؟
بت علويه وحات عيني ترجف متل البردانه لامن سنونه يطاقشن وانا خايفه بس بناضم في العوان ايه علا شن خبرك بخبرنا
عودن علي بيوتكن الواطه امست دحين بوريكن كيف علمت بعد تصلن اهلكن
مشي معانا ومعاه تلاته صبيان ماسعالونا تب يتضاحكو في مضحكتن ويقصو في قصصن نامن دخلنا الحله قام قال هوي يالهديه الحس اكان بدور المضره كان ضراك دحين الوصلك لخشم دارك ياهو الحس البتدوري تشكي !!!
|
Post: #2
Title: Re: وراي شن في؟؟انجدني ياشيخي
Author: ABUHUSSEIN
Date: 05-10-2013, 10:53 AM
Parent: #1
تحياتي و إحترامي
|
Post: #3
Title: Re: وراي شن في؟؟انجدني ياشيخي
Author: مها عبدالمنعم
Date: 05-13-2013, 07:41 AM
شكرا كتير
وتحياتي واحترامي
|
Post: #4
Title: Re: وراي شن في؟؟انجدني ياشيخي
Author: ALWALEED ALSHEIKH
Date: 05-13-2013, 07:57 AM
Parent: #3
الأخت الفاضلة مها
كتابتاتك لها مذاق خاص و ننتظرها طويلاً
ولكن ماذا نقول غير يا الرحت طولت الغياب و نترك لك اكمال الباقي
|
Post: #6
Title: Re: وراي شن في؟؟انجدني ياشيخي
Author: مها عبدالمنعم
Date: 05-13-2013, 09:54 AM
Parent: #4
ALWALEED ALSHEIKH
سلامات وشكرا كتير
طولت الغياب بس في البال والخاطر
بس كمان بكون شيطان الكتابه طار شويه
|
Post: #5
Title: Re: وراي شن في؟؟انجدني ياشيخي
Author: محمد عبد الماجد الصايم
Date: 05-13-2013, 08:01 AM
Parent: #3
ههههههههههههههههههههه
غايتو يا مها .. الواحد عفص ليهو كم شوكة
لحدي ما فهم القصة دي كووولها!!
نفسنا زاتو قام!!
|
Post: #7
Title: Re: وراي شن في؟؟انجدني ياشيخي
Author: مها عبدالمنعم
Date: 05-13-2013, 09:59 AM
Parent: #5
محمد عبد الماجد الصايم
سلامات
سلامتك من الشوك
نفسك قام
خفت؟؟
|
Post: #8
Title: Re: وراي شن في؟؟انجدني ياشيخي
Author: محمد عبد الماجد الصايم
Date: 05-13-2013, 10:20 AM
Parent: #7
سمعت الصوت الوراكـ!!
|
Post: #9
Title: Re: وراي شن في؟؟انجدني ياشيخي
Author: garjah
Date: 05-13-2013, 10:43 AM
Parent: #8
انتي عارفة يا مها
هناك اشياء ولوحات كتيرة في الحلة وفي الحياة اليومية
ممكن تكون مادة للحكي الجميل
أرجو أن تفصلّي شوية في المواقف وتعطي القارئ صورة لمسرح الاحداث
وسنراك قريبا متدرجة من القصة القصيرة للرواية
والمافي شنو ؟
|
Post: #12
Title: Re: وراي شن في؟؟انجدني ياشيخي
Author: مها عبدالمنعم
Date: 05-14-2013, 06:31 AM
Parent: #9
garjah
سلامات ...كل شي في الحياة السودانيه بصراحه ماده جميييييله للحكي
واكيد طبعا الحله ليها نكهة خاصه
ان شاءالله في اقرب شغل بكتبه بعمل بنصيحتك عن مسرح الاحداث فشكرا كتير
كلو في
|
Post: #11
Title: Re: وراي شن في؟؟انجدني ياشيخي
Author: مها عبدالمنعم
Date: 05-13-2013, 03:49 PM
Parent: #8
ههههههههههههههه
شكرا شكرا ياخ
تعرف دخولك هنا ليه نكهه
|
Post: #10
Title: Re: وراي شن في؟؟انجدني ياشيخي
Author: الأمين كامل الأمين
Date: 05-13-2013, 10:59 AM
Parent: #7
والله إنتى مُبدعه شديد
روعه موغله فى الاصاله بحق
يسلم اليراع وتسلم البطن الجابتك
|
Post: #13
Title: Re: وراي شن في؟؟انجدني ياشيخي
Author: علي محمد الفكي
Date: 05-14-2013, 11:55 AM
Parent: #10
مها عبد المنعم
تحياتي
في معرض الرياض للكتاب لفت نظر احد رواياتك المنشورة بواسطة دار عزة
وضحكت كثيراً على نفسي لاني كنت قبلها احاول ان اوجه في بعض كتاباتك على المنبر ..
هذه القصه فلكلور سوداني ومن الواقع السوداني .. قد يكون واقع ما زال في بعض المناطق ..
وماضي في مناطق اخرى ..
وحقيقة قرانا فيها مادة قصصية وروائية ثرة وجاهزة تحتاج ان يعمل فيها القاص ادواته ..
شكراً لك على الابداع
وما تغيبي كثير
|
Post: #15
Title: Re: وراي شن في؟؟انجدني ياشيخي
Author: مها عبدالمنعم
Date: 05-15-2013, 12:30 PM
Parent: #13
علي محمد الفكي
سلامات وعاطر التحايا بالعكس فخوره انا بكل كلمه تتقال عشان خاطر تجويد مااكتب
مازلت طفلة في مجال الكتابه تتعلم التبتبه من الاخرين
شكرا كتير ولا تقصر نظر ساي والله
|
Post: #14
Title: Re: وراي شن في؟؟انجدني ياشيخي
Author: مها عبدالمنعم
Date: 05-15-2013, 12:11 PM
Parent: #10
الأمين كامل الأمين
سلامات وشكرا كتير
وجدا اسفه علي التاخير بس للظروف احكام
|
|