أحاجى الكذب البقارية: أنا قاعد فى قعر الحجر بشوف الضر فى راس الحجر ..!

البقارة أتفقوا أن أكذب إنسان يعطوه بقرة .. وما أدراك ما البقرة لدى البقارة! .. شيئ فوق الخيال، لو أعطيت البقارى بقرة كأنك أعطيته قصر منيف في المنشية ..

وهنا نماذج .. وعلى الذين يعرفون أحاجى الكذب على الطريقة البقارية رجاءً الأضافة ..

الكذاب الأول:
قال: "في ليلية* عقاب مطر .. وضلمه* أخر شهر .. أنا قاعد فى قعر الحجر* .. بشوف الضر* في رأس الحجر ماشى قطر قطر .. وأنا أفرز النيتايه* من الضكر.

المفردات:-
الليلية: مطر غزير يهضل ليلاً
عقاب مطر: أخر الخريف
ضلمة: ظلام دامس .. مثل ظلام أخر الشهر.
الحجر: الجبل
الضر: النمل الصغار
النيتاية: الأنثى

بريمة

الكذاب الثانى:
قال: "قاعد نكج* في شركى .. جداد دارنا نلزلزى* بكيعانى* ..
وقيل له: ما سبب الكج ما دام الجداد يأتى وحده لك .. هل لك أن تقبض قبض بدل الكج!

قال الكذاب: عشان الشرك يفرزى السمين من الباطل .. ويفرزى النيتاية من الضكر.

المفردات:-
نكج: أى نشرك بالشرك، ومنها الكجيج .. الكججان .. وهى كلها تعنى التشريك للطيور أو الحيوانات المفترسة.
الجداد: هنا المقصود به دجاج الوادى البرى.
نلزلزى: أن يبعده من الشرك بكوع يده حتى لا يقع في الشرك.
كيعانى: من الكوع ..
يفرزى: أى يفرز بين الذكر والأنثى .. ويفرز بين السمين والضعيف ..

بريمة

الكذاب الثالث:
قال" كِدِب* ما نعرفى حبل الله في رقبتى .. أنا مشيت زرعى وعلقت سعنى* .. الأرضة أكلت السعن خلت ألمى* واقف"

المفردات:-
كدب .. يعنى الكذب
سعنى: أى السعن الذى يحمل فيه الماء .. ودوماً يصنع من الجلد.
الأرضة: الأرضة معروفة طبعاً .. دابة الأرض التى أكلت منسأة سيدنا سليمان ..
ألمى: الماء


بريمة

انا راكب في جملى بت المرحاكه وقعت منى طعنتها بى كوكابى حطيتها جنبى
ود ابوك بريمه ارجوك تعامل مع المفردات الصعبه ربما هنالك اشقر دار قد يحتاج لتبسيط

ول أبا رحمة،
جيداً جيت ..

Quote: انا راكب في جملى بت المرحاكه وقعت منى طعنتها بى كوكابى حطيتها جنبى

جميلى جميل طوطاح لا بركب لا بلاح ..

بريمة

أربعة كبج كبج .. أتنين ترولى .. وواحد بت بت ..

بريمة

بما أننى لست بقارى كذاب لكن اليوم اشتريت هذا المنتج وصبغة شعرى طلع صلعة

جميل يابريمة
لما تغوص في سيرت اهلنا وعادتنا
جميل ياخ لما تتجول في الفرقان وقت الدمر
جميل لما تكتبعن ثقافة الدونكي
جميل لما تحكي لينا عن
طرائف الحمر والكبابيش
وعن سيرة الغفل حسناء من كردفان
جميل وانت تتداعي بصدق وعمق
اتمني ان تواصل
واتمني تبعد من سيرة دخلت نملة وشالت حبة
ومرقت نملة وشالت حبة صدقني اتابع كل ماتكتبه
هنا الكردفاني الاصيل لك كل تحياتي

سيكا،

Quote: بما أننى لست بقارى كذاب لكن اليوم اشتريت هذا المنتج وصبغة شعرى طلع صلعة

طيب نعيد صياغة الكذبة ..
الكذاب سيكا:
قال: "كذب ما نعرفى حبل الله في رقبتى .. أنا أشتريت صبغة لشعرى .. ومشيت صبغت شعرى .. صبغة دا طلع شعرى من قعوره وأدانى ليه في يدى .. خلى راسى أملس قلدنق* ما يلحقنى* "

المفردات:-
قلدنق: هو الصقر جقاوه .. صقر أصلع الرأس.
يلحقنى: أى الصقر قلندق لا يمكن يدانيه في الصلعة.

بريمة

ول أبا باسط المكى،
سلامات ..

Quote: جميل يابريمة لما تغوص في سيرت اهلنا وعادتنا جميل ياخ لما تتجول في الفرقان وقت الدمر جميل لما تكتبعن ثقافة الدونكي جميل لما تحكي لينا عن طرائف الحمر والكبابيش وعن سيرة الغفل حسناء من كردفان جميل وانت تتداعي بصدق وعمق اتمني ان تواصل واتمني تبعد من سيرة دخلت نملة وشالت حبة ومرقت نملة وشالت حبة صدقني اتابع كل ماتكتبه هنا الكردفاني الاصيل لك كل تحياتي

ألف شكر .. وأبقى معنا في أحاجى الكذب البقارية ..

بريمة

الكذاب الرابع .. في الحقيقة الكذاب الخامس .. سيكا هو الرابع
الكذاب الرابع طفل بقارى .. جاءته لجنة أختيار أكذب الأكذبين .. تسأل اللجنة عن والده الذى أشتهر بالكذب ..
اللجنة: يا ولد وين أبوك ..
الولد: أبوى مشى يخيط الشقوق*.

ثم ذهب الطفل وظل يطارد في ديك أبيض ..
اللجنة: ماذا تريد أن تفعل بالديك
الولد: عشان نعمل ليكم نسية*

المفردات:
الشقوق: هى أن أراضى السافنا في الصيف تشقق شقوق كثيره وعلى أمتداد البصر نسبة لعامل الجفاف.
النسية: وهى اللبن الحامض مخلوط بالماء .. بما أن الديك أبيض اللون مثل اللبن إذن يمكن أن يعمل به نسية على حسب زعم الطفل الكذاب.

بريمة

الكذاب السادس:
قال: " كذب ما نعرفى حبل الله في رقبتى .. بعوض* دارنا كلجويه* بس .. أتنين يرفعوا البطانية والتالت تعطى .. تسحبى دمك سوووت حتة ما تخلى"

المفردات:-
بعوض دارنا: أى باعوض منطقتهم
كلجويه: وهى طائر البجع .. ويسمى أيضاً الكنجيه .. الباعوضة قدر طائر البجع.

بريمة

Quote: تسحبى دمك سوووت حتة ما تخلى"

حتة

كلمة ( حتة) غير موجودة بلهجة البقارة وبدلا عنها بقولوا ( حاجة) وليس لدي اي مانع في ان نحتكم الي اي كردفاني اصلي مش تايواني ولا صيني زيك

Quote: ألف شكر .. وأبقى معنا في أحاجى الكذب البقارية ..

شكرا بريمة
ماعارف اتذكرت حكاوي الوالد وابوزبد
وام جمعة وولدها كباشي
اطيب من مشي علي وجه الارض ام جمعة
الخريف والمطر كتير
التردة وطير الريهو ريهو
يعلم الله بكيت يابريمة
ماعايز افتلك البوست لكن هبشتني
شديدياولدي ابزبد سمحة شديد والخير راقد
كل شي رخيص البقارة طيبن شديدومرهم هين
لايعرفون الكزب ولا النفاق ويابلدنا شن سلبك وقلبك
التحية لك

Quote: للجنة: يا ولد وين أبوك .. الولد: أبوى مشى يخيط الشقوق*. ثم ذهب الطفل وظل يطارد في ديك أبيض .. اللجنة: ماذا تريد أن تفعل بالديك الولد: عشان نعمل ليكم نسية*

اشك انه الطفل ده بريمه زاتو في طفولته

Quote: كلمة ( حتة) غير موجودة بلهجة البقارة وبدلا عنها بقولوا ( حاجة) و

ع العزيز نهار
حتى كلمة (حاجة ) عندهم خرطومية و غير اصيلة بدلا عنها بقولو (شُغل او شغيل )...عموما بريمة استخدم في الحكايات -وما اظن تسمى احاجي - من لهجات كردفان و دارفور
بشكل عام .

مشكور ..بوست مميز يا بريمة وخليك كدة ..




.

تحية للجميع ..

عبد العزيز نهار،
سلامات ..

Quote: حتة كلمة ( حتة) غير موجودة بلهجة البقارة وبدلا عنها بقولوا ( حاجة) وليس لدي اي مانع في ان نحتكم الي اي كردفاني اصلي مش تايواني ولا صيني زيك

بالجد عينك "طرينه" .. أولاً الكذابين ليس هم بقارة أصلاً .. الأحاجى هى البقارية .. أما الكذب على لسان قوم أخرين .. ليس كلمة حته فقط .. بل كلمات: كِدِب .. نلزلزِى .. ما نعرفِى .. نفرزِى .. يعنى كل الكلمات التى أضفت لها حرف مكسور قبل الأخير ليست بقارية (للعلم الأحاجى البقارية لم تورد هوية أو أصل وفصل القوم الذين ينقلون عنهم الكذب)

هل أستغربت أكتر !! .. لكن الحكاوى موجوده على الأقل لدينا نحن الحوازمة.

بريمة

عبد العزيز..حبابك يا صديق
كلام صاح .. (حتة) دي ما عندنا كلوكلو..
اتفق مع اخونا حسن حماد..عندنا (شــُغل) ، و (شغيل).. متذكرين لاعب المريخ (كمال شغيل)؟!!

كبر

احاجي ول ابا بريمة.
و هي تعادل الفزورات في ادب الأطفال في البندر:

اربعة كبج كبج.. اتنين طـُرلي .. واحد بت بت..
و تعني الحمــــار: اربعة كرعين.. اتين اضان..و ضنب..

جميلي جميل طوطاح لا بنركب ولا بنلاح...
و تعني الدخان..

كبر

اها يا بريمة..


صنقعتين..و دنقرتين..و فدعة رقبة..و كجة عين..

بتي من زومها و من رومها..الصبيان ما بيقدروا يلمسوا قــدومها..

كبيشي كبيش ياسين.. بيشيل مية و خمسين..

بتي بت السلطان مغمغمة بالخــُلقان..


تحل ولا نقوم نــّركـــبــّك..؟..الموضوع بقى فيهو انتنوف عدييل يا عمك..!


كبر

ول ابا باسط،

Quote: شكرا بريمة ماعارف اتذكرت حكاوي الوالد وابوزبد وام جمعة وولدها كباشي اطيب من مشي علي وجه الارض ام جمعة الخريف والمطر كتير التردة وطير الريهو ريهو يعلم الله بكيت يابريمة ماعايز افتلك البوست لكن هبشتني شديدياولدي ابزبد سمحة شديد والخير راقد كل شي رخيص البقارة طيبن شديدومرهم هين لايعرفون الكزب ولا النفاق ويابلدنا شن سلبك وقلبك التحية لك

تخيل لبرهة من الزمن أنا أنظر للصورة المرفقة وظننت أنها للرهد .. غريب تشابه قرانا في مناطق كردفان ..
يا باسط نحن البقارة والرعاة عموماً شعوب لها المقدرة على البقاء .. مهما تكالبت علينا المحن تجدنا نواجها بتحدي أكبر وفى النهاية نتجاوز المحن. والرقص والغناء والحكاوى جزء من تراثنا في تجاوز المفازات.

أنا اليومين ديل قدر ما أقول أكتب سطر عن الأبالة أرى شخص ول أبا البحيراوى أمامى .. عليه ألف رحمة.

بريمة

ول أبا حسن وول أبا كبر،

جيداً جيتو ..

كبر، عرفت بعضهم والبعض غلبنى .. خلى ناس المنبر يحاولوا في البداية قبل ما نأتى بالحل.

سوف نعود بعد الدوام.
بريمة

Quote: أنا اليومين ديل قدر ما أقول أكتب سطر عن الأبالة أرى شخص ول أبا البحيراوى أمامى .. عليه ألف رحمة.

ياحيليل الكان بهدي الغير
يا حليل الكبير في كل شئ
واتخيل الزول دة بطلع من كل حرف موجود هنا
ويتامل لاحولا ولاقوة الا بالله
قال لي
طال ماغزالتك من الخوي
انا راجيك في الدرب وكل يوم
نقيل في بكان جمال البلد لايوصف
الرحمة عليه
مسخ علينا المنبر وطعم الكاتبةوالقراية

ول أبا كبر،
سلام ..

Quote: بتي من زومها و من رومها..الصبيان ما بيقدروا يلمسوا قــدومها.. كبيشي كبيش ياسين.. بيشيل مية و خمسين.. بتي بت السلطان مغمغمة بالخــُلقان..

الحجوة الأولى: الثعبان .. وجاءت على صيغة الأثنى لأن البقارة يقول له الدبيبه على صغية الأثنى.
كبيشى كبيش ياسين .. هو القندول
وبت السلطان مغمغمة بالخلقان .. هو قندول عيش الريف.

صنقيعتين ودينقيرتين .. غلبتنى دت !

بريمة

ول أبا باسط،

Quote: انا راجيك في الدرب وكل يوم نقيل في بكان جمال البلد لايوصف

كردفان فقدت أبن بار .. اللهم رحماك.

بريمة

من هنا .. سوف أئتى لكم ببعض أحاجى الكذب التى هى من تأليف شخصى .. وسوف أضيفها للكذابين الفوق ..

ول أبا كبر،
هناك فرق بين الفوازير وأحاجى الكذب .. أحاجى الفوازير هى تعجيزية .. بينما أحاجى الكذب هى فكاهية ..

وأحاجى الكذب .. تعتمد على صغية المبالغة: مثل الكذاب الأول هول الموقف لدرجة لا يمكن أن يشوف يده .. مع ذلك قال أنه يستطيع أن يميز بين الذكر والأنثى من النمل .. وكذا في الأرضة التى أكلت جلد السعن ومازال الماء موجود لم يدفق.

والله أعلم

بريمة

الكذاب السابع:
قال: "كضب ما نعرفى حبل الله في رقبتى .. نحن في فريق البقر والصباح أصبح كر وشمس فوق طلع تشوفِى .. الوادى جنب الفريق ليله يداااااب دخل*، وصار ظلام دامس أيدك ما تنظرِي .. نسوان قاعدين في طرف الوادي في ا لنهار وأنا قاعد في طرف الضلام في الوادى نلوضى*، ونسوان بعيونهن تب ما يشوفنى .. من الضلام نمدِى إيدى في النهار وفستان المره نجرى"

المفردات:-
ليله يداب داخل: أليل ليله ..
نلوضى: نتوضأ

بريمة

الكذاب الثامن:
قال: "كضب ما نعرفِى حبل الله في رقبتى .. أنا نايم في زريبة بقرى .. صحيت من نومى لقيت سحاباية كبيرة أنقطعت من السماء وبب وقعت قريب منى .. أنا شوف عينى البراق في الوطاه يوجوج* والطرنقاعة كاخ تضرب جنبى".


المفردات:-
البراق يوجوج: أى يبرق برق متواصل ..
الطرنقاعة: هى الصاعقة .. أو الصاقعة بالسودانى.

بريمة

الكذاب التاسع:
قال: "كضب ما نعرفِى حبل الله في رقبتى .. أنا راكب في حمارى سحاب أضلم شال ومطر غزير نزل فوقى .. سمكاية كبيرة من السماء بططت* وقعت جنبى".

المفردات:-
بططت: هو صوت حركة السمكة حينما يمسكها الأنسان في الماء .. تبط بط.

بريمة

الكذاب العاشر:
قال: " كضب ما نعرفى حبل الله في رقبتى .. نخيل دارنا طوال طوال فروعا ما تشوفى .. أنا طلعت قلت نلقحِى .. البيرق* فوق في طرابلس من السودان بعيوني نشوفِى".

المفردات:
البيرق: العلم أو الراية.

بريمة

الكذاب الحادى عشر
قال: "كضب ما نعرفِى حبل الله في رقبتى .. عربية* دارنا لما تدور فور فررر برميل بنزين كامل تشفطِى .. لكن كن جرى طياره ما تلحقِى".

المفردات:-
عربية: سيارة.

بريمة

ول ابا.. حبابك..
يازول خل عنك الكضب و الكضابين ( و الكضابات كما قال)..!!
حلك صحيح...وواحدة غلبك حلها.. و كده ح نــّركــّبك..
ركبتك ما ركبتك ، ركبتك في انتنوف.. كدار بقلب الأنتنوف على الأنتنوف.. لقيتك واقع في جراب خوف..!!!

الحجوة الما قدرت عليها يا ولد ابوك.. معناها الصمغ.. اي و الله الصمغ الواحد ده..و الباقيين ممكن يتفرجوا و يشرحوا و يحللو ا معنى الثروة.. يعني حتى الثروة برضك عندها حظ في احاجي اهلك..ولا انا غلطان؟!!!


كبر