زلـــــــــط الديــــوم

والله يا زلط الديوم
متلك مساهر ما بنوم
زيّك مغبرن وحال حال
رغم العلي عارف العليك
حزنان على مديدك الما برضا ليك
مرات تنحنح دار تقوم
مرات تغمت ماش تنوم
إتهددّحيلك ويا حليلك
والله يا زلط الديوم
***
والله يا زلط الديوم
حالتك تحنن كل يوم
شايف الحُفر والاتربة المردومة كوم
نيمك يحت صفقو المصفّر بالسموم
وعجاج يعج رجاج يرج من غير لزوم
وما شفت يا زلط الديوم
فى الدنيا ليل من غير نجوم
***
والله يا زلط الديوم
ما بنسى ايامك قبيل زمن الصِبا
ايام تلتوارك جديد وإنت بتشع بالكهرباء
كان كل شي يعجبنا فيك
وانحنا اخر هندمة
كان النسيم يشجينا بى موال قديم
والنيم يعجبو الهبهبة
ريحة الدعاش ساعة الرشاش
للزول تجيبلو الكبكبة
وحال المحبين الما بيروق ليهم
إلا فيك الحبحبة
يا سلام وكتين تقول للناس سلام
ويقولو ليك اهلاً حبابك مرحبا
رقش النجوم وشكل الغيوم
الله يالخرطوم عموم
وحشتنى اصوات البلوم
وحال الغُبش وعطر الغباشة
السال ونقّط فى الهدوم
***
الله يا زلط الديوم
ما كنت كان وما كنا كان
يا حليلا عاد ايام زمان
من المغيرب كان تلجلج وكان تهجج
وكنت بتجنن كمان
وكنت زي اوضة العريس
كلك عطور ريحتك بخور
حنة وطلح وشيتاً سمح
وتقول علي ما عدت زي اول صبيْ
راحت عليك وخلاص فتر
وعجزت زي عُجزى اللى جانى بلا خبر
واااا حسرة يا زلط الديوم
***
والله يا زلط الديوم
ما تقول براك
انا برضو مالاك اصلى شوم
وعلى العلي تلقانى اتفاءل واحام كل يوم
اما إنت لا إتحرمت ولا إنظلمت
ولا حصل فى يوم عدمت
ولا الواسعة ضاقت بيك يوم
وكتوفى ديل الشايفن
شايلاتلهن كترة هموم
ومع كدى انا حقى هيّن
والليلك إنت براهو كوم
والله يا زلط الديوم ......
يوسف الحداد الخرطوم1993

يوسف الحداد
تحياتي لك

والله يا زلط الديوم
قصيدة السهل الممتنع ..معبرة ورائعة

يا سلام يا استاذ يوسف والله هيجت فينا ذكريات ايام قد خلت واكل عليها الدهر وشرب ،،، الديوم وما ادراك ما الديوم تلك افترة الجميلة التي عشناها جيئة وذهابا ما بين القوز والحلة الجديده وابو حمامهوشارع النص بالديم يا لها من ايام لن تنسى مهما تراكمت علينا الهموم وطال بها الامد ..
قصيده حلوة ومعبرة لمست فيني شجون جميلة وذكريات ايام جميلة ,,
شكرا لهذا النظم الجميل ..


تحياتي : ياسر العيلفون

Quote: وكنت زي اوضة العريس كلك عطور ريحتك بخور حنة وطلح وشيتاً سمح

حتى ديومنا فى بحرى اكانت نفس اللون والرائحة ...


مشكور على الجمال ويسلم بنانك ...

العزيزعبداللطيفشريف
لك الامنيات الطيبة وتعظيم سلام
اشكرمرورك واعجابك بفنى
دمت اخى..

الحبيب ياسر السر
لك التحية واشكر مرورك وتزوقك لفنى
وجميل انى رعتك الى عهدك الزاهر
لك الامنيات قوافل وتعظيم سلام

الحبيب اسامة العوض
لك التحية ونهارك سعيد
شكراً لمرورك وتذوقك لفنى تحياتى

تذكرت بص الريكو ... ومحطة التعاون وباشدار وسلطان جامبو ...

تحياتي لك

شاعرنا الحداد ..
الشعر من السهل الممتنع بسيط ونابع من الدواخل بدون اي ريوش
ولكن بالنسبة للمكان ليس لي فيه خبرة .. نحن يا يوسف من ضواحي الدنيا لمطار الملك عبدالعزيز الدولي
التحية لك

لك التحية على
مرورك ليهو طعم تسلم كتير

تحية....


(كان النسيم يشجينا من موال قديم)


وكان الزمان مترعا بالق الرجاءات الحميدة والرؤي الجديدة المتجددة...والصدر مملؤء باكسجين وعد البراحات التي يتكئ تحت ظل توقها (محمد احمد) ...ينتظر معافاة الوطن وهو فاعل في الحراك لا ساكنا تحت ظله...ولكن دعنا نقول ...يبقي ظلط الديوم مسارا لطريق منتظر...

(يوسف الحداد ) لك الصباحات الندية حين ينزاح الغبار من علي وجه وطن تنتاشه ا ل ك ل ا ب الضالة...

الحبيب محمد الكامل يا بهجة إنت
اشكر مرورك وهذا الكلام الدافىء
وتعظيم سلام يا حبيّب .

لك الف تحية ومودتى

لك الامنيات قوافل

تسلمو

شكرا لك

اب

مشكوريابيك