سلام الغرة يا اهل الديار البره بيضا الرملة منشره وداك الصيد فى بطن الوادى انزره
************************************
دائما، وليه ما عارف، بتخيل لى إنه الشى الوحيد البخلى الملائكة والجن،اللتنين مع بعض، بخليهم يبطلو شغلهم ويقعدو يتفرجو ويستمتعو ويصفقو كمان بحصل لما يكون فى مردوم شغال وصفين من الشباب والشابات برقصو، والعجب كمان كان الدنيا بقت خريف، الواطا فارشه ليهم سباتات خدرا ونديانه مضفورة بى قش وشوقاره ونجيله، والسحاب واقف بعيد فوق ليهم طربان
والحالة التانية برضو لما شلة اندلسيين يكونو قاعدين تحت ضوء قمر صبى وتريان، والبنات لابسات الفساتين الزى الورود ديك، واحد أحمر وواحد اصفر وواحد ازرق، ويكون فى واحد شكله غجرى غجرى بصدح ويغنى، ويدقو فى الصفيحة البكون قاعد فوق ليها العازف ديك، والصفقة تصحى الطير النام من بدرى، بصحى زهجان فى الأول، لكين تانى بنسى النوم ويقعد يلولح فى روسيهو ويتمايل من الطرب الغريبة بعض من غناهم لامن تسمعه يتوارى ليك زى الزول القاعد يدوبى فى ضل فى سوق تمبول فى البطانة، ولامن تسأل ليك واحد من اهالى الأندلسيه عن الايقاع والرقيص والغناء ده، بقول ليك انه اصلا جاهم من باقى الحاجات الفاتوها ليهم الرومان من ايام يوليوس قيصر لامن كان قائد الرومان فى الجنوب الاسبانى، وبعد داك دخلت فيه شويه بهارات عربية وامازيغية نتيجة قعاد الجماعة ديل سبعة ولا تمانية قرون عددا، وفى الآخر مرقو ساى، اباطن والنجم، دى الحاجة التانية
التالتة كمان دبكة الشوام كان فى لبنان ولا سوريا ولا فى فلسطين حاجة فيها سحر ما عادى ابدا والله، والغريبة برضها بتتعمل تقريبا بى نفس الطريقة مع اختلاف بسيط فى الحركات صفين من الشباب من الجنسين واغنيات شجية جدا وايقاع جميل، وغالبا تكون شى أصيل من ثقافة وتراث وحياة المنطقة كلها، بما فيها الأثر التركمانى والكردى وبقية الشعوب والإثنيات القاعدة فى المنطقة، ويمكن كمان تكون الجذور ابعد من كده كتير لى ورا وتصل لأقوام وشعوب السريانيين والفينيقيين والكنعانيين
وعندى احساس انه العوالم التلاتة الساحرة دى، وعلى الرغم من بعد كل واحد فيها عن التانى، جغرافيا أو مكانيا، إنه فى رابط بينها
يمكن الفلامنكو فى اسبانيا وفى الاندلس تحديدا يكون نتاج تحوير لى ايقاع واداء حركى راقص أو كيورغرافى جاهم من ايام جية العرب هناك او من الرومان زى ما هم بقولو، خصوصا انه جزء كبير جدا من العرب المشو مع ناس طارق وموسى كانو من الشام اصلا بعدها بكون الفن ده تطور واخد اشكال وابعاد جديدة لكين بنفس الروح الأصيلة
لكين شنو البلم المردوم مع الفلامنكو والدبكة؟
يمكن يكون توارد وجدان، على وزن توارد خواطر وليه ما يكون فيهو مكون اصيل برضه وتأثير قوى من الفلامنكو، بحكم انه معظم العرب الهاجرو للسودان جو من شمال وشمال غرب افريقيا ومعظمهم لو ما كانو كلهم، كانو من المجموعات الرجعت افريقيا بعد سقوط الأندلس زى المجموعات العربية الجات واستقرت مثلا فى وسط السودان وفى سهول وبوادى ووديان كردفان
لازم يكون فى رابط انا متأكد حتى لو كان فى الحد الأدنى، وهو الرابط الوجدانى الجمالى الإنسانى الخلاهم كلهم يكونو ناس جميلين ومبدعين وسمحين
Post: #2 Title: Re: المردوم - الفلامنكو - الدبكة Author: فيصل محمد خليل Date: 05-04-2013, 07:51 AM Parent: #1
صديقي ابوذر..حبابك كتر خيرك ياااخ.. سئمنا .. حتى كادت ان تسحقنا نوافذ الحزن المجانية.. هي ضلمة يا صديقي الله لا وراك ليها...!!
الروابط كتيرة بين المردوم و الفلامنكو و الدبكة.. الحرية ..و التلاثة .. على طبيعتها بتكون في فضاءات مفتوحة..و التعبير عن الذات فيها بيكون تلقائي و من غير شروط و حدود.. الجماعية..و هي جماعية لاتمييز فيها.. رجال و نساء..و بيشاركوا بكل حرية ..في الرقص.ز الغناء.. حفظ نسق الريتم.. و كل زول/ة بيؤدي دورو بمنتهى الإتقان..! و بعد اذنك نضيف ليك نموذجين من المردوم..و كن لقينا فرقة بنجيب ليك باقي الحاجات .. عشان تسهل المقارنة و تحديد الروابط..
المردوم في ذات نفسو طرأت عليهو عوامل التطور..و لكن جوهره هو الجماعية..والإيقاع يضبط أو يخلق من ريتم الصفقة+ النغم (الفوكال) + رزم الأرجل التي تضرب الأرض.. هنا نموذج قريب من المردوم التقليدي..و الفوكال فيهو نسائي وواضح للغاية.. و هو من منطقة اهلك المسيرية (الحتة ضرورية لتمييز الفروقات)..
معليش الكوالتي بتاعة الفيديو تعبانة.. لكن المادة اصلية و هي توضح الفكرة على تلقائيتها.. و بتلاحظ الجماعية واضحة.. الغناء جماعي..الرقص جماعي.. في حتة صغنونة لو قدرت تلاطظ ليها..و هي طريقة الزغرودة التي تظهر على الخلف..و هي اشبه بطريقة الزغرودة في صعيد مصر و بلاد الشام !! الريتم هنا اقرب لريتم عجلات القطر..و لو ركبت ليك قطر لمدة عشرة دقايق و اغمضت عيونك.. ح تحس بالحكاية دي.. و السبب لأن الناس ديل في ضواحي مدينة ابوزبد..و السكة حديد قريبة منهم ..عشان كده اتأثروا بالحكاية دي و ظهرت في طريقة الرقص (تحديد الريتم بتاع الأولاد الصبيان)..هي فروقات صغيرة لكنها مهمة..!!!
و ده مردوم اهلنا الحوازمة..ويعتبر الفيديو اخر فيرشن للمردوم..و من نفس المنطقة المصور فيها الشريط خرج اخونا و استاذنا عبد القادر سالم.. الفيرشن ده.. اشبه بالفري استايل..Free Style..و فيهو بيختفي الفوكال (الصوت النسائي و الغناء)..و بيتم استبدالو بكرير الشباب + الصفافير.. الجماعية محمفوظة.. و هنا يلاحظ أن المرأة عندها مطلق الحرية و هي تتقدم الصفوف في الرقص.. يعني لو لاحظت شوية ح تلقى في كم زولة بتكون قدام صف الأولاد..و قريب من نهاية الشريط بتلاحظ حركة الأولاد في شكل صف منتظم و يسير ببطء بطريقة اشبه بسير القطار..!! مردوم المسيرية ( في النموذج الأول) خفيف و سريع الريتم.. بينما مردوم الحوازمة (في النموذج الثاني) بطئ الريتم..و الدايرة بتاخد زمن عشان تكتمل.. و رقصة المردوم شاقة للغاية..و هي تعادل مبارتين أو ثلاثة من مباريات كرة السلة .. هذا من ناحية الجهد المبذول..!! الريتم بيحفظ بصفقة البنات ..و رزم ارجل الأولاد.. الصفقة.. الصفارة.. نفس الحاجات بتلقاها في الدبكة (فقط الموسيقى بتكون ظاهرة).. و في الفلامنكو.. بيكون الجيتار و الفيدل..!!
كتر خيرك يا صديقي..و نأسف على الزحمة..و لو لقينا فرقة و مزاج تاني.. نقوم نجيب نماذج من الدبكة و الفلامنكو..!!
كبر
Post: #6 Title: Re: المردوم - الفلامنكو - الدبكة Author: Ishraga Mustafa Date: 05-04-2013, 10:43 AM Parent: #5
Quote: الروابط كتيرة بين المردوم و الفلامنكو و الدبكة.. الحرية ..و التلاثة .. على طبيعتها بتكون في فضاءات مفتوحة..و التعبير عن الذات فيها بيكون تلقائي و من غير شروط و حدود.
سلام يا مطر ولكبر مثله
شكرا لهذا الفضاء الفلامنكو فضاءاته للخلف والإمام فضاءاته في التردد والتدبر خطوة لقدام وخطوة لوراء اتصورها دائما تعقل نحو القلب وعقل يهف نحو قلب فضاءاته الفلامنكو حالات تأملي هذه الايام
اما المردوم فهو حمحمة الروح في ليالي الشجن اللانهائي
Post: #7 Title: Re: المردوم - الفلامنكو - الدبكة Author: Faris Mohamed Date: 05-04-2013, 11:13 AM Parent: #6
المردوم المردوم او ( المردوع ) هي رقصة شعبية من الرقصات الجميلة التي يؤديها بعض قبائل البقارة في ربوع منطقة كرفان التي تقع في غرب السودان .وقد اتت الكلمة من كون أن الرقصة تعتمد على ضرب الأرض بالأرجل فتصبح مردومة. أيضا" بعض القبائل في دارفور أقصى غرب السودان مثل الهبانية والرزيقات وبني هلبة ترقص المردوم مع إختلاف طفيف في الإيقاعات .. تؤدى هذه الرقصة في في مناسبات الزواج والمناسبات الرسمية والمهرجانات الشعبية ومؤخرا" ظهرت بعض الفرق تؤدي هذه الرقصة في عروض للفولكلور السوداني بالعاصمة الخرطوم وخارج السودان .. الزي : يتميز مؤدوا الرقصة بإكسسوارات مميزة عبارة عن ( الكشكوش ) وهو مصنوع من الزعف وبداخله بذرة السوريب(*) ويربط في الأرجل لإحداث أصوات رنانة مع هز القدم ,, وبعض ريش النعام ويوضع في الرأس وبعض الخرز الملون ( السكسك ) والمناديل المزخرفة ويضع الشاب سكينا" مزينة بالسكسك علي عضلات ذراعه ويمسك بعصا جميلة مع صفارة لضبط الإيقاع ,, توجد الفتيات في صف عرضي ويلبسن أزياء جميلة غنية بالألوان ويتزينن بالسلاسل ويلبسن الخرز والسكسك في أيديهن ورقابهن ويضعن التربال (**) على شعرهن .. ويغنين أغاني جميلة مع تصفيق الايادي مثل أم الوالدين بلقى السلام إجى (***) الغزلان حرمني المنام الزول الرايق قالو أصبح سار وأيضا" الدانا بكي غربي والدوشكا واقف حربي الروح ما بتفارقي الصبر ضل النبي وفي هذه الأثناء يصدر الشباب صوتا" يسمى بالكرير وهو أخراج الصوت من الحلق مع قفل الشفاه فينسجم الصوت مع الغناء وضرب الأرجل فيشكل هارمونيكا المردوم ... ثم يبدأ الشباب بالحركة تجاه الفتيات يتقدمهم من يسمى ب قائد الروق وبقية الشباب من خلفه في صف ليشكلودائرة ويضربون على الأرض بأرجلهم بإيقاع جميل ومنتظم ثم تعلو صوت الصفافير التي يحملونها ,, وترش عليهم بعض النسوة بعض العطر الجميل ... (*) نبات ينمو في المراعي الخليفية (**) من أدوات الزينة للشعر (***) بعنى جاء أو أتى ...
Post: #8 Title: Re: المردوم - الفلامنكو - الدبكة Author: حسن محمود Date: 05-04-2013, 11:39 AM Parent: #7
ابو ذر بابكر .. خالص التحايا والود .. فعلا هناك علاقة وتشابة بين الايقاعات وطريقة الرقص بين المردوم والفلامنجو والدبكة .. سمعت مرة الفنان عبد القادر سالم -‘ملك المردوم كما يطلق عليه في اوربا- انه لبى الكثير من الدعوات من جهات باسبانيا للمشاركة في مهرجانات غنائية هناك وذلك بسبب هذه العلاقة بين الفلامنجو والمردوم .. اما عن سؤالك شنو البلم المردوم مع الفلامنجو والدبكة ؟ لا تنسى ان التاريخ يذكر ان غالب قبائل البقارة صاحبة ايقاع المردوم هاجرت الى السودان من بلاد المغرب العربي والاندلس (بعد سقوطها ) حيث نجد ايقاع الفلامنجو .. ولابد من انه حدثت عملية تأثير وتبادل ثقافي وايقاعي بين الاطراف نتج عنه هذا التشابه والعلاقة بين الفلامنجو والمردوم .. اما علاقة المردوم مع الدبكة الشامية.. معروف علاقة اهل المردوم مع بلاد الشوام في الكثير من العادات العربية حتي في اللهجة وطريقة الامالة في الكلام .
اما الكلمات الرائعة التي افتتحت بها خيطك فهي للفنان حامدين بقادي . صاحب االصوت الجميل والنغم الحنين . من اغنية او الرمية المشهور بـ جرداق الليل صباح الغرة يا اهل الديار البرة بيضة الرملة منشرة.. وداك الصيد في لُب الوادي انزرة غزال شاردة وفحل جاموس رقد قره نمر كاتل ضنيبه حارس ام غرة اسد رقد قاطع الطريق ..الشافه داير يبراه ابو جقم سيد الرجالة الداير الدواس الـ ينفرز برة داك التيتل ابو قرنين قصع جُره ريحة المرفعين الكوك، خمش تره ترك حملا صريع سيده انقلب صره
عشان قدرت القى حامدين بقادى واسمعه بكامل حضوره وجماله
الزول ده يا حسن عنده صوت ما عادى صوت ما بشبه أى صوت الزول سمعه قبل كده ما عارف كيف اقدر اوصفه والله كل الكلام ما بقدر يوصف صوت حامدين ده ولا طريقة الأداء عنده
وبرضو الكلام كله ما بقدر يوفيك ويديك حقك يا حسن
وتقبل يا حسن الإمتنان والود والمحبة
منى أنا
المهجور وزادى فى قربة الضهبان وسعن الذكرى فوق ضهرى وعلى الروغان
جيتك والله زى الخريف بالضبط تجى وشايل معاك الخدار والنضار وبشارات الخير كلها
كان ما صبيت مطره، بتفك لينا الدعاش والهمبريب
ما تسأم ياخ ودائما اتوهط واطاة الأمل وخت رحمن الفرح جواك يمين الروح وشمال القلب والجايات أكيد احسن وكل أول ليه آخر
المردوم ده يا محمد عالم محتشد بالدهشة والفرح وفيه معانى كامنه من الحياة الحياة فى اساميها وهيئتها الحقيقية تهبش كل حتة فيه طوالى تكتشف شى جديد وشوف ناسنا ديل كيف بالله، يعملو الحاجات دى كلها دون سابق نية مربوطة لى انهم يخلقو الجمال والمعنى ده كله بس كيف التانين يعرفو المعنى ده ويقدرو يصلو ليهو ويمسكوهو بى اصابع روحهم
أول معنى زى ما انت قلت، الحرية براح شاسع والله من ممارسة الحياة فى اقصى تجلياتها ارتباط الأرض والناس وتمازج مع الشى الحواليهم كله وتماهى مع الدواخل لحد ما الحاجات البره تاخد شكل الجنة
من زمان قاعد تلفت نظرى الزغاريد وتجى بتجى مارقه ساعة النشوة تملا المكان الجوانى وتكبر، تجى مارقه لى بره عشان تكتب اسامى الفرح فى الهواء ويطير ويسير مع النسمات يكلم باقى الخلوق
