مناى فى الدنيا ستره وبيت واصل البيت حنان وامان وموده وريد
محال البيت بيكون بس طين وزنك وحيط ولا ممكن يكون سكر وصلصله وزيت
كلام البيت كلام تانى كلام احساس مقدس وشرع ربانى
وريد انسان عزم واختار فتح باب قلبه لمانى وبنى العش الصغير طمنى اوانى
بيوت الدنيا مختلفات ما كل البيوت واحد فى بيت دافى وبيت بارد وبيت عمران هوا وتحنان وبيت جامد
بيوت مليانه فرحه وحب وخير وامان بيوت عدمانه من الود زمن مسكونه بالاحزان
بيوت زاهيه وبيوت واهيه بيوت تديك سلام وامان عشان فيها النفوس صافيه وفيها التقوى والايمان
بيوت مليانه مال واثاث وخاليه من الامل والناس وبيوت لا لمه لا بوتوجاز وناسها لطااااااااف حنان ولذاذ
فى بيت عالى وسيده وزير وخيره وفير وله غفير وحوشه كبير وبيت من طين وفى راكوبته بس زير ورغم الساكنه زول مسكين بس حقانى عندو ضمير
بيوت البهجه عنوانها وطول اليوم ضحك وهزار وبيوت طوالى حرقانه ومولعه زى تقول من نار
بيوت بتراعى حق الجار وفيها من الخيار اخيار بيوت لا بتعرف الجيران ولا بتستطلع الاخبار
بيوت تمليك بيوت ايجار وما بتلقاها بالهين ولازم تكرم السمسار
شوف فى سكتك كم بيت وفى كل البيوت اسرار فى بيت مليان وبيت فاضى
وبيت جاحد وبيت راضى وبيت مشكلته معروفه ووصلت محكمه وقاضى عشان عشرة سنين هانت وكل واحد بقى فى وادى
فى بيت حدادى مدادى ما ساكنينه غير اتنين وبيت مليان تقول نادى
فى بيت سُكانه متألفين على الحلوه والمره وبيت سُكانه مختلفين وما بيتفقه بالمره
بيت سته مرة ضيفان مرة ستره لا بتستاهل الهجران ولا بتستاهل الضره وبيت سته دوام بتبارى فى النسوان تحوم من حله لحله لا بتعرف تكرم الضيف ولا تورق الخضره
فى بيت محروم من الاطفال ومن ضحكت عيون حلوين وكل يوم ناسه عند دكتور كبير اتعابه مليونين وبيت اطفاله زيه عشرين ومحتاجين وحق كراسه ما لاقيين وبس عايشين على الله وما عارفين يسدوا الدين
وياما ياما وياما ياما تلقى بيوت بيوت صاخبه بيوت لا ليها حس لا صوت وكل ناس البيوت بتموت ويبقى البيت شبر واحد وبكره تكون بيوتنا قبور لا هم مويه لا هم نور ويبقى منانا فى الجنه وننسى حكايه الستره وحكايه الريد كاننا لحظه ما كنا ولا فتشنا يوم عن بيت حليل البيت و هم البيت وسيد البيت وناس البيت حليل الدنيا بالفيها كل الفيه لا مليها لا مكفيها
Post: #2 Title: Re: أبكتنى حد النزززززززززززززيف Author: محمد مختار جعفر Date: 04-30-2013, 05:34 PM Parent: #1
رسم رائع بالكلمات ..للشاعرة ، داليا الياس
وأقول ، ترجمت كلمات هذه القصيدة واقع النفس المطمئنة المتصالحة مع حقيقة الحياة .. تلك الفانية التي لايعي حقيقتها إلا من إرتضى بالمقسوم وحظه منها إن الحياة دروب وخطى كتبت على من مشاها فإن إرتضاها وقنع بها كان له من راحة النفس وطيب العيش والخاطر ... ومن تزمر وندب حظه عاش كدر الحياة ومشقتها ، ولم يذق طعماً للقناعة والسكون ... نعم .. .. فعلاً أنها قصيدة تجلي حقيقة الحياة وواقعها لمن آمن بذلك واقتنع بنهايتها ..
شكراً ولك تحيتي ..... محمد مختار جعفر
Post: #3 Title: Re: أبكتنى حد النزززززززززززززيف Author: Salah Habib Date: 04-30-2013, 06:00 PM Parent: #2
تحية قصيدة مؤثرة فعلا تحكى واقعنا الاليم بكل صدق !!
Post: #5 Title: Re: أبكتنى حد النزززززززززززززيف Author: رانيه محمد الشيخ Date: 05-01-2013, 09:11 AM Parent: #3
اخى صلاح دى ما حكيت وبس دى فتحت الجرح عديل ونبشته للعظم عشان احتمال نفوق ونشوف بيوتنا العايشين فيها ياتو بيوت والبيوت البنتمناها ياتو بيوت والاخره النسينها بيتها كيف حيكون
Post: #4 Title: Re: أبكتنى حد النزززززززززززززيف Author: رانيه محمد الشيخ Date: 05-01-2013, 08:57 AM Parent: #2
اخى محمد الاحزنى انى فعلا وانا بسمع فى القصيده شوفت بيوت بعرفها بالاوصاف دى وخوفته يكون بيتنا ياتو بيت فيهم حسيت ان البيوت الجميله بديت تنقرض البيوت العمرانه بالكبار وبالعزوه وبالفرح النفوس بقيت مكسوره والامانى بقيت مستحيله والبساطه بقيت معدومه مسخنا حياتنا على بعض ببعض :(((((((((
Post: #6 Title: Re: أبكتنى حد النزززززززززززززيف Author: رانيه محمد الشيخ Date: 05-06-2013, 10:16 AM Parent: #4