قدم من السودان قبل حوالي عام وكفيله يطالبه بدفع 8 آلاف لنقل الكفالة!

نعم، إخوتي
هذه هي المشكلة التي يعانيها أخ عزيز!
فكيف يمكن مساعدته؟
هل يذهب إلى مكتب العمل؟
علماً بأن كفيلو أخضر النطاق!

العزيز صلاح فقير

الله يعينو

ما ليها حل غير انو يدفع

هذا يذكرني بالمكاتبه..

يعني العبد إذا أراد ان يعتقه مالكه يكاتبه، بأن يلتزم له بسداد مبلغ معين.. يعني يشتري نفسه

للأسف السودانيين كالمستجير من الرمضاء بالنار! يهرب من رمضاء السودان ليكتوي بنار الكفيل!

ليكثر من الدعاء لعل الله يلين قلب هذا العتل..

حيا الله عزيزي عمر!
... ويا له من عُتلّ!
بس حيروح من ربنا فين؟
هذا عزاؤنا يوم تجتمع الخصوم!


هو في الحقيقة الأخ مرتبو متواضع بالمقارنة مع هذه الثمانية،
عشان كدة حاولنا نستجيش آراء الأخوة فيما لو كانت هناك
حلول أخرى ممكنة!

فهل هناك حلول أخرى ممكنة؟

عالياً!

تمانية ليه
خليهو يلولحو ويحنكو
السعوديين بيقبلوا الواسطة واللولحه
لو شال ليهو تلاتة كاش ومشي عليهو وساق معاهو زول حنكو سنين
بيشيل تنازلو في يدو وبجي بيهو

الله يهد الكفيل ويهد كبارو الراضين عن هذا العمل الرخيص
قالوا دولة شريعة كمان
تفوو عليهم

كيفك يا صلاح

Quote: لو شال ليهو تلاتة كاش ومشي عليهو وساق معاهو زول حنكو سنين بيشيل تنازلو في يدو

في الغالب ده البيحصل مع الكفيل يا سرالختم عباس،
ربنا يسهًل طريقه

سر الختم،
حيدر،
محمد هاشم

حياكم الله

لكم جزيل الشكر والتقدير،
وبلا شك أديتو بصيص أمل!

طيب،
هل ممكن الكفيل يمنع زول من نقل الكفالة!؟
قصدي:
إذا ما كان ممكن،
طيب ليه الزول ده ما يجرب يروح لمكتب العمل،
إما لقى مساعدة أو لو ما لقى خلاص يبقى على خيار الدفع!

اخونا العزيز صلاح عباس فقير

كلام وزير العمل واضح جدا فى هذا الخصوص فى لقاءه التلفزيونى وهو

تصحيحا لاوضاع المقيميين سوف ينقل كفالة اى شخص حتى دون رضاء

كفيله اذا لم يوجد له عمل عنده والقرار الصادر ليث بخصوص طرد الوافدين

بل تصحيح اوضاع كفالتهم وممارسه عملهم .

دفع اموال لشراء الفيز ونقل الكفاله وكل ما يقوم به الكفلاء ممنوع بالقانون

اذا كانوا اخضر او بلمسجى .

يمكن لصديقك التواصل مع السفاره لحل مشكلته بالطرق القانونيه اذا استدعى

الامر .

تحياتى

سيد سيدنا

شكراً، شكراً جزيلاً لك أخي سيد!
المشكلة إنو على أرض الواقع تلقى الخيارات تكاد تكون منعدمة،
غير إنو الأخ ده ينصاع، ويتشلهت من أجل تدبير المبلغ!
حقيقة مفروض السفارة تقوم بالتدخل في هذا الموضوع!

والكفيل طبعاً ممكن يقول ليك: أنا عاوزك تشتغل معاي!
ويخضعك لظروف عمل سيئة جداً،
علماً بأنو في الأصل كان يتاجر في العمالة!

أخ / صلاح فقير --- أولاً ---ربنا يفرج همه إنشاء الله
ثانياً : إنشاء الله قريبك دا ما يكون موقع للكفيل على أي أوراق أنه مستلم كل رواتبه وحقوقه ( لو كان وقع في الشرك دا ) ما ليهو إلا يتفاوض معاهو ويدخل الأجاويد ويدفع ليهو البانصيب البقدر يدفعوا بعد المجابده
ثالثاً : إذا لم يوقع للكفيل على أي أوراق تثبت أنو ماخد رواتب السنة الماضية ومستحقاته ( في الحاله دي يمشي يشتكي لمحكمة المنازعات العمالية التابعة لمكتب العمل ). والكفيل في الحاله التالته ما يقدر يعمل ليهو خروج نهائي بل يلزم لدفع رواتبه طوال السنة الماضية --- وبالتالي ( الكفيل سيحاول بشتى السبل الوصول لتسوية معه مقابل سحب الشكوى ويديهو نقل الكفالة ) وللضمان كده خليهو يشوف أحد الأخوه السودانيين العاملين في مكاتب المحاماه ( بساعدوه كتير في البند الثالث ).

شكراً جزيلاً لك أخي أحمدونا،
للأسف موقع وباصم على أنه استلم مرتباته!

لكن حسب علمي الكفيل لا يستطيع يعمل خروج نهائي زي زمان،
إلا في حالة أنو الجواز والإقامة يكونوا في يدو!

ما عدا ذلك ما أظنه يستطيع!!
وأنا عندي تجربة في الموضوع ده!
وأيضاً مرة أحد المحامين السودانيين أكد لي هذه المعلومة!

شكراً جزيلاً لك،
وبرضو يا ريت لو نشوف رأي الإخوة المحامين في هذه الحالة!

الله يهون

يا سيف لا يخلو مجتمع من الظلم،
والمملكة تُتمتع بميزة لا تتوفر في معظم بلدان العالم،
ألا وهي الأمن!
كما أنها تتمتع بقيادة رشيدة مهمومة بقضايا شعبها،
وهي تبذل جهداً كبيراً للتواؤم مع قوانين العمل الدولية!
مع تحياتي!

،،،،،

اخى كلام الوزير كان فى التلفزيووووون كما قال عادل امام

وبعدين الشغل الصعب شنو ما عندو مهنه قدم بها ومفترض

الكفيل يضعه فى نفس المهنه ومعروف عمل اى مهنه واذا

خالف الكفيل المهنه معهناها ما كان فى حوجه له غير المكايده

وذى ما قال متداخل المحكمه العماليه مفتوحه والخيارات كثيره

اما السفاره تتدخل فى حالة الاخلال بالعمل المتعاقد عليه .

تحياتى

سيد سيدنا

السعودي لو خت مبلغ في راسو ما بيغيروا بسهولة.. بيكون عايزو لغرض معين ..

زولك دا غير يدفع ... ما عندو أي حل ...

وأخير ليهو يكسب زمنو .... القانون ليس في صفه بتاتاً... ومن حق الكفيل التبليغ عن صاحبك كهارب

أو فسخ العقد ( الوهمي )...

فنصيحة أخوية ... عليه بتدبير المبلغ .... والتخلص من وهم الكفالة الجائرة دا

وكان الله في عونه ... وعون المسلمين

الاخ عبد العزيز

لو انت متابع هذه الايام ناس الجوازات ومكتب العمل

وصلوا لحل لغز الهروب والغى بدون اعلان .

كدى لو عندك معقب سودانى شاطر من الذين يوجهون

الكفلاء لعمل الهروب وتحريشهم على الاجانب فى سبيل

يأخذوا حق نصيحتهم ( يكون الكفيل فى الظل ) والنيابه عنه

فى تقديم المطالب للمغلوب على امرهم ممكن يديك الطريق للحل

ويخلص موضوع اخينا .

تحياتى

سيد سيدنا

Quote: اخى كلام الوزير كان فى التلفزيووووون كما قال عادل امام

ههههه
ما هي دي المشكلة يا سيدنا إنو الكلام ده في التلفزيوووون!
لكن في الواقع!
هسي الزول ده مشى للكفيل هذا الصباح،
على أساس أنو خلاص حيدفع، بس تنقصها شوية، أو تعملها لي بالتقسيط!
زولك رفض رفضاً باتاً، مصداقاً لكلام الأخ عبد العزيز!
قام الزول ده فكر في الاتجاه نحو مكتب العمل!
فقلت ليه: طبعاً الكفيل حينكر تماماً!
وحيقول الزول ده أنا أصلاً عاوزو يشتغل معاي،
وممكن كمان تبقى بلاغ هروب!
هو أصر، قلت ليهو على الأقل تريث شوية!

Quote: شكراً جزيلاً لك أخي أحمدونا، للأسف موقع وباصم على أنه استلم مرتباته!

أخ / صلاح فقير --- في الحاله دي --- يشوف إسم الكفيل وعائلته ومن أي منطقة في السعودية --- وأسألوا الناس الحولكم --- بتلقوا واحد يا قريبه أو من منطقة ودعوه يتدخل --- الناس ديل مسالة الجودية دي ليها إعتبار لديهم ( ويستحي ساكت --- لأن يخاف أن زوله دا ممكن يشيل حالو لدى العشيرة والأهل ) .

موش المثل يقول أبو القدح يعرف محل يعضي أخوه!!!!!

Quote: والكفيل طبعاً ممكن يقول ليك: أنا عاوزك تشتغل معاي! ويخضعك لظروف عمل سيئة جداً، علماً بأنو في الأصل كان يتاجر في العمالة!

الكلام دا حاصل مية في الـ 100 ... احد معارفي جاء من السودان في وقت وزير الصحة يلغلغ مافي كوادر مافي كوادر حيث كان يعمل كفني مختبرات
ويعمل حاليا في مرفق طبي بالشرقية، وطلب منه ولتصحيح وضعه احضار التنازل من كفيله ليعمل بصورة طبيعية
فذهب الى الكفيل العجيب الذي طلب منه دفع عشرة آلاف للتنازل عنه والا فعليه ان يعمل لديه بمبلغ 1500 ريال... شفتوا كيف المحن

Quote: «العمل» تطالب العمالة بعدم الخضوع لابتزاز «الكفلاء الجشعين» صالح الزهراني (جدة) طالبت وزارة العمل المقيمين الراغبين في تصحيح أوضاعهم بعدم دفع مبالغ مالية، لما وصفتهم بالكفلاء الجشعين، مؤكدة أنه سيتم نقل الكفالة رغما عنهم، فى حال كانوا في النطاقات غير الآمنة، خاصة عندما يكون هناك كفيل جديد في النطاقين الأخضر أو الممتاز. أكد ذلك لـ «عكاظ» مصدر مطلع في وزارة العمل، وقال «إن التسهيلات المقبلة تسمح بنقل الكفالة مع تغيير المهنة على أن يلي ذلك إصدار رخصة العمل، وتجديد الإقامة». وأشارت إلى إمكانية تجديد الإقامة قبل انتهائها بثلاثة أشهر، كما يمكن استخراج تأشيرة خروج نهائي والإقامة منتهية، فضلا عن إمكانية نقل الكفالة دون طلب جواز السفر. وكشف المصدر عن آلية تصحيح أوضاع العمالة المبلغ عنها بالهروب، مشيرا إلى أن الآلية الجديدة تتم عبر خيارين: الأول العودة إلى الكفيل، أو إحضار كفيل جديد في النطاق الأخصر أو الممتاز، وفي الحالتين سيتم إلغاء بلاغ الهروب. وأشار المصدر إلى أن مشكلة كفالة المعلمات في المدارس الأهلية لاتزال قيد الدراسة. وكانت قد برزت شكاوى متكررة في الآونة الآخيرة للعمالة الوافدة، نتيجة مطالبة بعض الكفلاء بمبالغ مالية حتى يتم نقل كفالتهم أثناء مهلة تصحيح أوضاع المخالفين. المصدر جريدة عكاظ[/ ياصلاح المقتبس اعلاة من جريدة عكاظ عدد اليوم وعلية قول لصحبك دا مايدفع ولا هللة للكفيل

---

Post: #23 Title: Re: قدم من السودان قبل حوالي عام وكفيله يطالبه بدفع 8 آلاف لنقل الكفال Author: صلاح عباس فقير Date: 04-30-2013, 07:06 PM Parent: #22 زمراوي: Quote: الكلام دا حاصل مية في الـ 100 ... احد معارفي جاء من السودان في وقت وزير الصحة يلغلغ مافي كوادر مافي كوادر حيث كان يعمل كفني مختبرات ويعمل حاليا في مرفق طبي بالشرقية، وطلب منه ولتصحيح وضعه احضار التنازل من كفيله ليعمل بصورة طبيعية فذهب الى الكفيل العجيب الذي طلب منه دفع عشرة آلاف للتنازل عنه والا فعليه ان يعمل لديه بمبلغ 1500 ريال... شفتوا كيف المحن والله الواحد بستغرب الناس دي كيف تستسيغ مال الحرام وعرق الناس! شكراً لك أخي زمراوي لمشاركتنا هذا الهم الصغير!

---

Post: #24 Title: Re: قدم من السودان قبل حوالي عام وكفيله يطالبه بدفع 8 آلاف لنقل الكفال Author: صلاح عباس فقير Date: 04-30-2013, 07:13 PM Parent: #23 Quote: ياصلاح المقتبس اعلاة من جريدة عكاظ عدد اليوم وعلية قول لصحبك دا مايدفع ولا هللة للكفيل شكراً جزيلاً ليك أخي محمد شيخ الدين! وأطمئنك الحصل كالآتي: زولي ده استسلم وقرر خلاص يدفع، بس مشى طلب منو تقسيط المبلغ، فرفض الكفيل رفضاً باتّا، لازم كل المبلغ كاش، قال لي: ما عندي، قال لي: روح اشتغل! قام طوالي توجه نحو الإمارة وعمل شكوى، استلموها وسجلوها وقالوا ليه اتصل بكرة بعد بكرة، وإلى الآن ما فيش نتيجة! لكن أنا متفائل إن شاء الله تكون النتيجة بإذن الله إيجابية! ودعواتكم خالص الشكر!

---

Post: #25 Title: Re: قدم من السودان قبل حوالي عام وكفيله يطالبه بدفع 8 آلاف لنقل الكفال Author: الامين موسى البشاري Date: 04-30-2013, 07:13 PM Parent: #23 سلام ..ربنا يفرج كربته ويفك عنه يا صلاح .. مع الأسف ماف طريقة عن الدفع والتفاهم مع الكفيل.. حاولوا تقليل المبلغ المفاوضات قدر الامكان .. يعني لو دفع ليهو 3 كاش يمكن يقبل .. هؤلاء يقتاتون من عرق الضعفاء .. لعنهم الله