مابين الغيم الربط فينا ودفق وشَّالو والزول المخنجكنُو أهلُو

سأل الدليل ود علي صديقي المحامي المقيم بسلطنة عمَّان صالح محمد صالح ايّام دراسته بجامعة الخرطوم
يا صالح ولدي إنتو في البقعة يوم يجيكم الخريف بسوّوا شنو؟!
إنحنا يابا المطر عيل نلقاهو مع الصباح ونشوف الظلط سايل
الشي دي شنو لا بشوفو البرق ولا بتسمعو رعده ولا حتي بتتاوقوا بي الطاقة وتشلعوها
لا لا إنحنا ما عندنا طاقة ولا بتير ساكنين في بيوت مقفلة ومسدّدة
دي عيشة شنو يا ولدي، اني كان ما هِدْمي بلَّتُو المطرة وشريتو وملصت نعالي مشيت حفيان خطيت با طية الملح لي ألبل
وكان ما شميت الدِّعاش وكرفت الرَّيم بقول دي خرييييييييييف..........!

اها دي الحال مع غيوم السماء الملبدة بالسُّحب والمطر الذي هطل وسالت وديان الأسفلت والأسمنت
بمدن المملكة وإنسكب الضحوي العوير وخرجت مهرولا ووقفت أتشرف ، ولكنني لم أري الأشابيب التي حين تلوح بعرض الأُفق
تشبه مشاط العذاري ولم اشتم ريحة الدِّعاش ولم أسمع هدير الكاكليت وأصبحت اردّد مع الدكتور ودنمر الهواري حين كان
بمدينة الضباب "لندن"
الغيم الرَّبط فينا ودفق وشَّالو
مسَّ حسسنا ما خلي القليب فوق حالو
قنديف كورس الصّيد الصّيادي حبالو
ياهو الغرَّز النوم من عيوني وشالو
أهلو مخنجِّكنُّو خلاس ؤ قارو جمالو
هافو رقيق وعنقو طويل ؤماح شُبَّالو
خزنة الفي المطار لافح حقيبتو وشالُو
يا الدعجة ام كفل قلبم مجوزر مالُو......!
مابين "ودنمر الهواري وودالمُر"

محبتي

بريق يا روضة العشاق سحابك هجعة
لعلع وإنتحب صبّح بلابلك سجعة
جسوما لدنة كانت في رباك مُضجعة
هسه مقيمة ولا هدوجها نجعت نجعة

اها مطرنا هنا لابرقا شلع ولا سحابا كرّ ودودة
ولا هوادجا راحلة

"عربان عبلة نزلوا الدو جمالهن دلَّت
ونيران عبلة فوق قلب المتيّم تلَّت
قصة ريدنا قولو إتعقدت ما إنحلَّت
وآخر طلقة من هدف البريريب جلَّت

محبتي

(ود آمنة) الذي يعد أحد أهم شعراء البطانة يصف مطرها ويقول:

العـَجَـمِيــة مِــنْ بَــحْــر الــمُحِــيطْ إنْــجَرَّتْ
ودَورَيــنْ السِيــولْ مَانْــعَه النِـعَمْ مَـا فـَرَّتْ
بُطَانة أبْ سِنْ طَوَتْ تَوب الحُزُنْ وانْسَرَّتْ
والـبِـلْ حَـاشَـنْ الـكِـتـْرَه وعُـجـُوفِـنْ دَرَّتْ

ومن أشهر وأجمل ما قيل في وصف مطر البطانة وما يخلفه من خير هو ما جادت به قريحة عبقري الدوبيت السوداني ورائده الحاردلو في مربعه الشهير القائل:

الـخَـبــَرْ الـلكـِيـدْ قَـالـُو الـبـُطانَه انـْرَشَّتْ
سَــارِيــةً تـَبـَقْـبـِقْ لا الـصَباحْ مَا انْفَشَّتْ
هَـاجْ فـَحَـلْ أُمْ صـِرَيصِرْ والمَنَايِحْ بَشَّتْ
وبِتْ أُمْ سَاقْ عَليْ حَدَبْ الفَرِيقْ إتْعَشَّتْ

Quote: (ود آمنة) الذي يعد أحد أهم شعراء البطانة يصف مطرها ويقول: العـَجَـمِيــة مِــنْ بَــحْــر الــمُحِــيطْ إنْــجَرَّتْ ودَورَيــنْ السِيــولْ مَانْــعَه النِـعَمْ مَـا فـَرَّتْ بُطَانة أبْ سِنْ طَوَتْ تَوب الحُزُنْ وانْسَرَّتْ والـبِـلْ حَـاشَـنْ الـكِـتـْرَه وعُـجـُوفِـنْ دَرَّتْ ومن أشهر وأجمل ما قيل في وصف مطر البطانة وما يخلفه من خير هو ما جادت به قريحة عبقري الدوبيت السوداني ورائده الحاردلو في مربعه الشهير القائل: الـخَـبــَرْ الـلكـِيـدْ قَـالـُو الـبـُطانَه انـْرَشَّتْ سَــارِيــةً تـَبـَقْـبـِقْ لا الـصَباحْ مَا انْفَشَّتْ هَـاجْ فـَحَـلْ أُمْ صـِرَيصِرْ والمَنَايِحْ بَشَّتْ وبِتْ أُمْ سَاقْ عَليْ حَدَبْ الفَرِيقْ إتْعَشَّتْ

الرائع إسلام شكرا لمسيالك المُترع بالخير
وأظن ما إفتقدته من مطر امس وجدته في مسيالك الجميل
الإبل التي حاشت الهشاب والكتر وكبروسك وعمرتك المترعة بحليب الغبوق
مو ابو كليبا نبّح
علي جارو ما إتقبَّح
حلب في فواقها إتصبَّح
وصاد في عكصة إتربّح"

"عكصة هي بقر الوحش وقد كانت تختلط مع الإبل في مراعي الجزو
وهذا قبل مجئ الإنقاذ وقبل لجوء الحركات المسلحة للصحراء

"نار وجهِك خلاس وأصبح عريسك باش
وسيلِك بالمعالي وبالمراتِع كاش
نفسِك من سماحتو تحلى جابلو دعاش
وعربِك لي جفافُن جبدو البرّاش "
لا أدري هل لود الشلهمة ام غيره ولكن الذي اعلمه أمس لا شمينا دعاش ولا جبدنا
البيوت الممتدة طنائبها................!


محبتي