Post: #1
Title: الامراض المنقولة جنسيا ,بين عقد المرضى وتعقيدات الاطباء
Author: وائل فاروق
Date: 04-26-2013, 09:35 PM
Parent: #0
بعد السلام .
موضوع شائك .
أمراض كثيرة , و ناس كثيرة ما عارفة عنها حاجة .
أغلب المرضى بيراجعو أخصائي الامراض الجلدية و التناسلية .
بعض النساء بيمشو لطبيب نساء و توليد .
التخصص فى حد ذاته شبه معدوم فى السودان (برغم وجود قلة من الاخصائين فى المجال خارج السودان)
العقدة ما عند العيانين بس , و لكن حتى عند بعض العاملين فى الحقل الصحى .
المحزن أن دفن الرؤوس ممكن يؤدى لمضاعفات بالرغم من أن أغلب الامراض يمكن علاجها أو السيطرة عليها لتخفيف الاضرار .
الغرض من البوست بسيط جدا :
التعريف ببعض و اهم الامراض المنقولة جنسيا , و طرق الوقاية و التشخيص.
حا أحاول أخلى الكلام بسيط و مفهوم و يا ريت لو الناس ساعدتنى بى أسائلة و لو أى زول عندو معلومة أو أى نوع من المفاهيم عند عامة الناس
ينورنا بيها .
_____________________________________________________
زمانك واحد صاحبنا من اولاد الحلة المفتحين , كان بقول لى ما بيلبس الكبوت لمن يمشى يكابس . لانو بيعرف البت العندها ايدز من ريحة ........
فسألتو قلت ليه و لو عندك نزلة .؟
الشاهد فى القصة أعلاه أن فى اعتقادات غلط وسط الشباب (و بالتأكيد مثلها عند الشابات) .
المريض بامراض منقولة جنسيا قد تكون لديه /ها أعراض او لا .
_____________________________________________________
الشغالنية فيها نفرين :
يعنى ما أى مرة ولا راجل عنده/ها مرض هو الغلطان . وحتى لو بى فهمنا غلطان الاحاسبو رب العالمين . نحن ننورو و نوريها العلاج .
فى ناس حتعارض و تقول خليهو دى ارادة ربنا : عشان نرتاح منه ما نديه حقنة بنسلين (و بالجد البنسلين علاج لكثير منها) :
نقول لى و مرتو "القانتة" الما مرقت من البيت الا لى الجامع زنبها شنو ؟
و ولدها الجوا بطن أمو ذنبو شنو يطلع أعمى ولا أطرش لو ممكن نساعدو بى حقنة بنسلين لى أمو وحبتين أزيثرو مايسين ؟
____________________________________________________
دى أمراض @ " حبش و خدم" (معليش الكلمتين ديل ثقيلات على لسانى و لولا الحوجة و انتشار المفهوم لما أستعملتهم)
الاحصائيات فى السودان برغم من قلتها تدعو للقلق . و بعدين (الكلام ده للشماليين النيليين تحديدا - لانهم أكثر الناس دفنا للرؤس).
أنتو زاتكم عندكم و اولادكم / بناتكم /نسوانكم / رجالكم عندهم زى العند الناس و الشغالنية دى ماشة فى زيادة ......
يعنى المرض ما بيفرز ده جعلى / شايقى / دنقلاوى ....... كلو عندو واحد .
__________________________________________________
الدخان بيزح الامراض المنقولة جنسيا : (لو مشيت بوست بتاع الجيران تلقا كلام زى ده)
كلام خارم بارم و لا صحة له أبدا !!
وائل ......
|
Post: #2
Title: Re: الامراض المنقولة جنسيا ,بين عقد المرضى وتعقيدات الاطباء
Author: وائل فاروق
Date: 04-26-2013, 10:05 PM
Parent: #1
مرض رقم واحد :
ال ايدز /عباس / أديس أبابا / أدريس .
______________________________________________
الاحصاء : (unicef)
1.1% من المواطنين عندهم ايدز . يعنى 1 فى كل مية مواطن . يعنى لو عندك متين صاحب فى الفيس بوك 2 منهم أحتمال يكون عندهم ايدز !
عدد المواطنين الاحتمال يكون عندهم ايدز سنة 2009 : 260000 .
الارقام أعلاه ارقام محافظة جدا حيث أن بعض البحوث التى اجريت على عينات من الدم لدى الاطفال ما بين أعمار سنة و نصف الى 14 سنة
كانت النسبة 5.7% !!!!!!
http://www.ncbi.nlm.nih.gov/pubmed/19857992
_______________________________________________
ما حاتكلم كتير عن الايدز (الا لو فى سؤال محدد) .
1.يمكن الوقاية باستعمال الواقى الذكرى (الكبوت) .
2. يمكن حماية الاطفال فى حالة اصابة الام باجراء عملية قيصرية عند الولادة .
3. علاج الايدز: الادوية الموجودة حاليا تعيد للشخص المصاب احتمالية مواصلة الحياة كانما لم يكن عنده المرض و يمكنه العيش لفترة مشابهة لغير المصابين !
4. العلاج يوفر فى السودان مجانا بدعم من الامم المتحدة .
5. الفحص مجانا برعاية البرنامج القومى لمكافحة الايدز .
6. المريض العندو فيروز نقص المناعة ما بيكون عندو أى أعراض فى الفترة الاولى من المرض (و لكن يمر بمرض خفيف مثل الحمى أو النزلة و احيانا التهاب فى الجلد - طفح (rash) ) و
تختفى الاعراض تلقائيا .
7. المرض ينتقل جنسيا او عن طريق دم ملوث و فى السودان أغلب حالات النقل جنسية .
وائل .......
|
Post: #3
Title: Re: الامراض المنقولة جنسيا ,بين عقد المرضى وتعقيدات الاطباء
Author: الشاذلى خيرى عبد الله
Date: 04-26-2013, 10:09 PM
Parent: #1
سلامات يا دكتور ..
البوست فكرتو جميلة ومفخخة 
الله يسلم ما يلحقو ليك امات طه ..
فكرة انو زول يخاف عليك ويوصيك وانت تعصى فى الخفاء باصرار يجب ان لا تقراء كحض على المعصية ..
| Quote: فسألتو قلت ليه و لو عندك نزلة .؟ |
ذكرتنى مرة عربيتى عطلانة واقف فى المنطقة .. شكلو فى واحد ميكانيكى كل يوم بعد الشغل بيرجع بى واحدة من البنات الاياهم .. وهو مفتخر بى الشغلة دى والكلام على مسمعى .. فقلت ليه ياخ الشغلة دى خطيرة وممكن تجيب ليك مشاكل صحية وممكن القصة تجر لى ايدز .. فقال والعهدة - عليه - انو شاور شيخ فى الحلة قال ليو القشة ما بتجيك بس قبل ال penetration قول بسسسسسسسسسسسسسسم الله ..
مودتى.
|
Post: #4
Title: Re: الامراض المنقولة جنسيا ,بين عقد المرضى وتعقيدات الاطباء
Author: mohamed osman bakry
Date: 04-27-2013, 04:00 AM
Parent: #3
| Quote: شاور شيخ فى الحلة قال ليو القشة ما بتجيك بس قبل ال penetration قول بسسسسسسسسسسسسسسم الله .. |
ده عايز يدخل شنو? كراعو اليمين!
|
Post: #5
Title: Re: الامراض المنقولة جنسيا ,بين عقد المرضى وتعقيدات الاطباء
Author: وائل فاروق
Date: 04-27-2013, 02:50 PM
Parent: #4
الاعزاء الشاذلى و محمد عثمان , بعد التحايا و السلام :
تعرف الاعتقادات دى رائجة جدا فى السودان .
مثلا بعض الصنايعية بيستعلمو زيت الفرامل لعلاج "كل حاجة" بما فيها التهابات الاعضاء التناسلية ! ما عندى فكرة لكن متخيل يكون فى
حجبات ضد الايدز !
___________________________________________
|
Post: #6
Title: Re: الامراض المنقولة جنسيا ,بين عقد المرضى وتعقيدات الاطباء
Author: وائل فاروق
Date: 04-27-2013, 03:10 PM
Parent: #5
herpes : حَلأ الصَّدَفِيَّةُ
________________________________________________
عدوى فيروسية , منتشرة و أكثر انتشارا من الايدز .
فى نوعين من الفيروس . نوع ينتقل جنسيا و نوع يصيب الجميع .
الفيروس "ود عم" ل الفيروس المسبب للبرجم .
أعراض المرض حبوب زى حبوب البرجم فى الاعضاء التناسلية للذكور و الاناث . و فى العادة تكون مؤلمة جدا .
المرض يمكن تخفيف أعراضه باستعمال مضادات للفيروس متواجدة فى السودان
المرض خطير جدا على الاطفال لمن يتولدو و المرأة تكون عندها اعراض للمرض حيث أن المولود الجديد
يصاب بسحائ .
___________________________________________________
برضو يمكن الوقاية باستعمال الواقى الذكرى .............
وائل ......
|
Post: #7
Title: Re: الامراض المنقولة جنسيا ,بين عقد المرضى وتعقيدات الاطباء
Author: smart_ana2001
Date: 04-27-2013, 04:40 PM
Parent: #6
سلامات د. وائل فاروق.
البوست مفيد جدا. شكرًا.
قبل فترة كان في بوست هنا عملوه. أماني الأمين و د. امبدة. كان بيتكلم عن الكانسر. و جات سيرة سرطان عنق الرحم و ان سببه فايرس معين. و ان الفايرس من الفيروسات اللي بتنتقل جنسيا. و أتذكر انه الزمن داك ان ذُكر في البوست ان الفايرس ينتقل جنسيا. اللي ما خلص نقاشه في البوست هو هي الفايرس هو اللسبب و الوحيد للنوع ده من الكانسر.
|
Post: #8
Title: Re: الامراض المنقولة جنسيا ,بين عقد المرضى وتعقيدات الاطباء
Author: جدو
Date: 04-27-2013, 05:19 PM
Parent: #7
| Quote: اللي ما خلص نقاشه في البوست هو هي الفايرس هو اللسبب و الوحيد للنوع ده من الكانسر |
| Quote: With rare exceptions, cervical cancer results from genital infection with HPV*, which is a known human carcinogen |
الأخت سمارت سلام
دا كلام ناس MEDSCAPE
تحياتي أخ وائل وشكراً على البوست المفيد جداً
........................................
* Human Papilloma Virus
|
Post: #9
Title: Re: الامراض المنقولة جنسيا ,بين عقد المرضى وتعقيدات الاطباء
Author: وائل فاروق
Date: 04-27-2013, 10:07 PM
Parent: #8
العزيزة سمارت أنا و العزيز جدو :
بعد السلام ,
نعم , كما أوضح جدو الفيروس المقصود هو فيروز ال هيومان بابلاوما (human papilloma virus) .
أنواع الفيروس كثيرة : النوعان البسببو سرطان عنق الرحم هما 16 , و 18 .
و حاليا فى الغرب بيطعمو البنات فى سن 12 عام فى انجلترا . فى أمريكا بطعمو البنات و الاولاد ( و سمحة المقدرة فى امريكا بطعموهم بى
نوعين زيادة عشان يمنعو أنواع تانية من الامراض الجلدية - أعراضها زى عين السمكة و تكون حوالين الاعضاء التناسلية )
الفيروس ده برضو سبب رئيسى لسرطان الحلق و اللثة فى بعض الاحيان . يفترض أن الزيادة فى سرطان الحلق الملاحظة حاليا سببها انتقال
الفيروس من الاعضاء التناسلية للحلق بسبب ممارسة الجنس عن طريق الفم .
الوقاية خير من العلاج عشان كده طعمو بناتكم و أولادكم ,
ملحوظة:
الواقى الذكرى قد يقلل من العدوى و لكن لان المرض ينتقل عن طريق الملامسة و "عين السمك" عادة بيكون فى الجلد حوالين الاعضاء التناسلية و ما داخلها ,
ممكن برضو ينتقل بملامسة المنطقة .
وائل ......
|
Post: #10
Title: Re: الامراض المنقولة جنسيا ,بين عقد المرضى وتعقيدات الاطباء
Author: عبداللطيف شريف على
Date: 04-27-2013, 10:59 PM
Parent: #9
العزيز د \وائل
تحياتى وتقديرى ...
ارجو منك التكرم بالقاء الضو على الالتهابات (الفطرية) ...
والتى تسبب الام فى الجانبين والظهر مع وجود رائحة (شبيهة برائحة المشروم ) ..
واخضرار فى (البول) مع عدم الصبر على القليل منه حتى (امتلاء المثانة بقليله)...
وهل يتوجب تزامن العلاج للزوجين والامتناع عن المعاشرة لحين اكمال العلاج ..؟
ما رايك فى العقار المسمى ب (Canestene) وما هى افضل اشكال استخدامه (للرجل ) اقصد حبوب ام حقن ...!!
ولك منى فائق الشكر والتقدير ...
|
Post: #11
Title: Re: الامراض المنقولة جنسيا ,بين عقد المرضى وتعقيدات الاطباء
Author: وائل فاروق
Date: 04-28-2013, 10:28 AM
Parent: #10
العزيز عبداللطيف ,
بعد السلام و التحية :
الالتهابات الفطرية :
أهم فطر مسبب لالتهابات حول الاعضاء التناسلية و فى بعض الاحيان التهابات فى جهاز البول هو فطر الكانديدا .
بس قبال ما أبدا فى الكلام عنو ممكن نوضح حاجة :
بالنسبة للنساء الحالب يخرج قريب من فتحة المهبل , يعنى هن معرضات أكثر من الرجال لالتهابات البول نسبة للقرب .
بعض السودانيات كمان مشكلتم أكبر عشان الطهور . لانو ده بيزيد من أحتمالية الالتهابات نسبة لعدم "التصريف" الجيد
لمخرجات الدورة الشهرية و الدم يعتبر "سماد" جيد للبكتريا و الفطريات للنمو .
طيب الخلانى أقول الكلام ده كلو شنو ؟
1. انت زكرت البول و وجع الجمبات : أها دى أعراض الجهاز البولى و ليس الجهاز التناسلى . لانك زكرت وجع جمبات ,
الجمبات فىها الكلاوى . التهابا\ الجهاز البولى ممكن تصعد من الحالب للمثانة , للكلاوى , و تسبب التهابات فى الكلية .
2. تغير لون البول : (تحديدا اللون الاخضر): فى هذه الحالات يجب التأكد تماما عدم وجود يرقان , حيث ان تغيير لون البول
عرض مهم جدا من أعراض اليرقان و مسبباته كثيرة .
3. لو لم يكان هناك يرقان الفطريات لا تغير لون البول و لكن أحتمال وجود باكتريا اسما pseudomonas aeruginosa .
4. التهاب الفطريات فى العادة يصيب النساء نسبة لتغير المناخ داخل المهبل و الرطوبة حوالين المنطقة .
5. التهابات الفطريات فى العادة لا رائحة لها . (فهم خاطئ حتى عند الأطباء!)
6. عدم الصبر على البول برضو من أعراض الجهاز البولى : يعنى أحتمال التهاب فى المثانة .
الالتهابات الفطرية أضرارها أخف من أغلب الامراض الاخرى . و فى العادة لا توئدى لمضاعافات مزمنة .
الالتهابات الفطرية عندها علاقة مع مرض السكرى : بمعنى أنو الناس العندهم سكرى أحتمالية يكون عندهم
فطريات أكبر .
علاج الفطريات بسيط جدا و لكن يجب التشخيص الصحيح فى الاول .
(Canestene(fluconazole 150 mg حبة واحدة عن طريق الفم أو كلوترومازول لبوس للنساء .
لا وجوب لعلاج الزوج الما عندوو أعراض للمرض .
___________________________________________________________________
جواب محدد للاعراض الذكرتها (تلخيص الكلام الكثير الفوق ده)
الشى الوصفتو ده ما التهاب فطريات بسيط و يجب مراجعة طبيب و يجب على الطبيب أخذ عينة من البول و تزريعها للباكتريا و الفطريات .
و يستوجب عمل فحص للدم للتأكد من عدم وجود يرقان .
و يفضل عمل موجات صوتية للكلى للتأكد من عدم التهاب فى الكلى .
وائل .....
|
Post: #12
Title: Re: الامراض المنقولة جنسيا ,بين عقد المرضى وتعقيدات الاطباء
Author: شهاب الفاتح عثمان
Date: 04-28-2013, 01:21 PM
Parent: #11
العلم نور
والمعلومة المبسطة المفهومة منحة الهيه وموهبة
واصل واثق الخطوات .. وبالتوفيق
______________________________________________________
ليتهم يعلمون ان عمر اللحظـه في بعـدك يا خـرطـوم سنين طـوال
د شهـاب الفاتح ـ كوالالمبـور
|
Post: #13
Title: Re: الامراض المنقولة جنسيا ,بين عقد المرضى وتعقيدات الاطباء
Author: وائل فاروق
Date: 04-28-2013, 08:42 PM
Parent: #12
العزيز شهاب الفاتح :
شكرا على المرور .
وائل .....
كسرة :
أخبار المريخ شنو ؟
|
Post: #14
Title: Re: الامراض المنقولة جنسيا ,بين عقد المرضى وتعقيدات الاطباء
Author: شهاب الفاتح عثمان
Date: 04-29-2013, 03:55 PM
Quote: كسرة :
أخبار المريخ شنو ؟ |
للاسف ياغالي المريخ مصاب بمرض منقول جيبيا ,,
______________________________________________________
ليتهم يعلمون ان عمر اللحظـه في بعـدك يا خـرطـوم سنين طـوال
د شهـاب الفاتح ـ كوالالمبـور
|
Post: #15
Title: Re: الامراض المنقولة جنسيا ,بين عقد المرضى وتعقيدات الاطباء
Author: وائل فاروق
Date: 05-07-2013, 06:58 PM
Parent: #14
السيلان (gonorrhea) :
الاسم بتاع المرض بيدل على أهم أعراضو , و هى افرازات تقيلة جدا . مرات المريض يكون خاتى دلقان و لا قطن
عشان الافرازات ما ت###### الملابس الداخلية .
المرض بتسببو بكتيريا اسمها نايسريا قونوريا (بت عم الباكتريا البتسبب السحائى )
ممكن المرض يتسبب فى قفل قناة فالوب (يعنى مافى حمل) .
يتم التشخيص بالكشف على الافرازات فى المعمل .
ممكن العلاج فى حالة التعرف على المرض من الاعراض .
العلاج يكون بى حقنة واحدة كيفترايكسون (ceftrioxone) .
فى العادة يتم علاج مرض اخر معاه ايضا ينقل جنسيا و هو الكلاميديا . , و هو ايضا بتسببه بكتيريا . (بعكس السيلان
الكلاميديا ما عندها أعراض و التأكد من وجود الباكتريا شوية صعب فى عدم وجود معمل مجهز )
العلاج حبة واحدة ازيثرو مايسين .
الكلاميديا و السيلان لو كانو موجودين فى فترة الولادة ممكن يتسببو بالعمى للطفل الموجود .
الشافع لمن اتولد بيكون عندو افرازات و التهابات فى العين عقب الولادة مباشرة . و العلاج أيضا بالكفترايكسون و الأزيسروماسين ..
وائل ..........
|
|