البنات احلي شي في الدنيا

رغم احتفاء ( الكثيرين ) بالمولود الذكر بصورة اكبر من الاحتفاء بالانثي

شكرا للريس عمر علي حسن علي عنوان البوست

هذا البوست احتفاء بامي التي كانت في الاصل بنت ابويها ربنا يطول في عمرك يا امي
وزوجتي التي كانت بنت صغيرة والديها
وشقيقاتي
وابنتي
وكل نساء الارض
شكرا لله ان جعل في الارض بنات

والبنات الليلة بيشيلوا الهم مع اسرهم ..
الهم الاجتماعي والاقتصادي..
ومابينسوا هم البلد..
والبنات حنينات علي اسرهم وخاصة الوالد والوالده..
حتي لو اتزوجوا وسافروا منهم بعيد تلقاهم خالقين صلة مستمرة وبيتحكموا في ظروفهم علشان يقوموا بواجبهم..
البنات رحمة والله يا ود فقيري..
زمان والدي يقول لينا يا ريت لو جبتكم اكتر ..علما بإننا أربعة بنات..
انا دعيت ربنا يديني طفلة والحمدلله ربنا استجاب وأداني آية..
وهي كمان اهدتني أحفاد إتنين ويارب تجيب بت كمان علشان البت مازي الولد في قربها من اهلها..

ربنا يديك البنات لانك هاتكون احسن اب لأنك بتقدرهم قبل حتي ما يجوا..

.......
........

مودتي..

Quote: Author: Muna Khugali والبنات الليلة بيشيلوا الهم مع اسرهم .. الهم الاجتماعي والاقتصادي.. ومابينسوا هم البلد.. والبنات حنينات علي اسرهم وخاصة الوالد والوالده.. حتي لو اتزوجوا وسافروا منهم بعيد تلقاهم خالقين صلة مستمرة وبيتحكموا في ظروفهم علشان يقوموا بواجبهم.. البنات رحمة والله يا ود فقيري.. زمان والدي يقول لينا يا ريت لو جبتكم اكتر ..علما بإننا أربعة بنات.. انا دعيت ربنا يديني طفلة والحمدلله ربنا استجاب وأداني آية.. وهي كمان اهدتني أحفاد إتنين ويارب تجيب بت كمان علشان البت مازي الولد في قربها من اهلها.. ربنا يديك البنات لانك هاتكون احسن اب لأنك بتقدرهم قبل حتي ما يجوا.. ....... ........ مودتي..

ياسلاااااام يامني
ياسلام علي البنات
اي والله صدقتي يامني البنات رحمة
ربما يخلي لي اية ويفرحك بيها دايما
تعرفي يامني الواحد فينا لحد ما اتزوج كان راكباهو فكرة انو العزوة في الدنيا ياها انو ربنا يرزقك بالصبيان
تصدقي يامني بعد الموجودة في الصورة دي واتنين من اخوانها الصبيان
عرفت انو الربنا مارزقو بي بنت محروم من نعمة كبيرة خلاص
البت غيييييييير يامني
غير في لطفها
غير في رقته
غير في حنيته علي ابوها بالذات
الواحد يامني عرف قيمة اخواتو بعد دروب الحياة اخدتو بعيد منهم
شكر لله ان جعل في حياتي ثلة من البنات
عميق مودتي

ود فقير

أو كما قال كمال سالم (أكد)

كيف حالك

طبعاً البنات حنينات بصورة غير عادية

الحمدلله أنا عندي شقيقات وعددهم 6 والله لغاية اليوم لو تأخرت عليهم في الإتصال يبادرون بالسؤال عني (من السودان أو التي خارج السودان)

أما شقيقي (الوحيد) فحدث ولا حرج (إلا في المناسبات)

الحمدالله ربي رزقني بثلاث بنات ( حتى اللبس يعلقون عليه) يابابا القميص ده حلو أو مكرفس ، أو...أو ....إلخ

بس مرات أمهم ذاتها بتغير منهم (بابا ماشي وين أو جاي من وين) لأنو ده المفروض يكون سؤال أمهم (الحكومة)

ولكم التحية

اكد

انت بوستك دا عامل ليهو شنو ...حاولت انزل ليك اجمل طفلة
فى العالم واللهى سارا عبدالقيوم وفشلت ...من يومك
ماعندك حظ ......

شكرا ياوضاحة علي الفديو
شكرا يابنية

فقير .. سلامات ..

الاطفال عموما احلى شىء ..

ويا ربى لا تحرم بيت من الأطفال ..

بعدين ان شاء الله يكون المهندس بشير فقير أخوك فقدت تواصل معاه من زمن ..

لك مودتى وتحياتى ..

Quote: بشير دفع الله فقير .. سلامات .. الاطفال عموما احلى شىء .. ويا ربى لا تحرم بيت من الأطفال .. بعدين ان شاء الله يكون المهندس بشير فقير أخوك فقدت تواصل معاه من زمن .. لك مودتى وتحياتى ..

سلامات يابشير
ربنا يحفظ كل الاطفال يارب
بشير فقير اسم علي اسم
الحقيقة فقير اسم جد الوالد وان شاء الله المعني يكون من رواد البوست ويتواصل معاك
تحياتي

Quote: محمد عبدالرحمن اكد انت بوستك دا عامل ليهو شنو ...حاولت انزل ليك اجمل طفلة فى العالم واللهى سارا عبدالقيوم وفشلت ...من يومك ماعندك حظ ......

الانصاري المختفي في جخانين الدوحة
الصورة وحظي هينات انت وين يازول
شوف ليك عذر تاني غير ماعفيناك من موضوع الصورة
رن علي ضيعت تلفونك

Quote: فتحي عباس نقد ود فقير أو كما قال كمال سالم (أكد) كيف حالك طبعاً البنات حنينات بصورة غير عادية الحمدلله أنا عندي شقيقات وعددهم 6 والله لغاية اليوم لو تأخرت عليهم في الإتصال يبادرون بالسؤال عني (من السودان أو التي خارج السودان) أما شقيقي (الوحيد) فحدث ولا حرج (إلا في المناسبات) الحمدالله ربي رزقني بثلاث بنات ( حتى اللبس يعلقون عليه) يابابا القميص ده حلو أو مكرفس ، أو...أو ....إلخ بس مرات أمهم ذاتها بتغير منهم (بابا ماشي وين أو جاي من وين) لأنو ده المفروض يكون سؤال أمهم (الحكومة) ولكم التحية

حبيبنا فتحي سلامات
كومبومي
فعلا يافتحي البنات مختلفات في حنيتم
تصدق الصغيرة الفي الصورة دي مع انو لم تتجاوز الاربعة سنوات
الا انو طوالي محسساني بي الحنية
تعرف لما اكون قاعد معاهم ودايرم يسكتو اعمل فيها نايم طوالي تسوق اخوها الاصغر منها تقول ليهو يلا نلعب برة عشان بابا تعبان عايز ينوم شوية
وطبعا ابو االشباب ماعندو جاز مع الحتة دى لازم تقضي ليهو حاجاتو ان شاء الله ما تنوم سنة مافارقة معاهو
والاخوات يافتحي قصة تانية براها
عميق مودتي

يا استاذ عبد الله فقير يا أخى دي (نقطة ضوء)....
تدري يا عبد الله ان امنيتى بنت قبل الولد !! فقط دعواتك

قالو ايضا بت
قلت مالو ولو
بختي بختي .. انت بتي ..
امي اختي.. همي شيلي ..
شيلي ..شيلي
شيلي مني.. مني ختي

بشوفها عز التبتبة
بتي البريدة مرتبة
دولابا داك والمرتبا
جات من قبيل من مكتبا
ادت ابوها مرتبا
سددنا دين دكان حسين ...كستني توب
نجدنا كم.. كم مرتبه
جيهت بيتنا القديم
السقف داك والمسطبة
**2**
قيرا قيرا يا مهيرة
ياشتلاية جاتا مطيرة
تكبري انت تشيلي حملنا
وتزيدينا ترانا كملنا
نسمع عنك ما يفرحنا
الاستاذة دي كتر خيرا
يوم تلقانا هي...بتوصلنا
وتحصلنا ...تفك الحيرة
ما بتتسلط وما بتتعنت
ما بتتعنت وما بتتسلط
ما بتاوق في حق غيرا
..........................................

ودى ياصديق..

سلامات يا استاذ عبد الله ..

مالك علينا ياخ وانحنا بعااااااااااااد منهم كدا ..
من تجى داخل البيت الولد يشبكك .. اها الليلة جبت لى شنو وطبعا" وهو مدخل راسو فى الاكياس وبفرفر فيها .. وينو الشبس وينا الشكولاتة انا ما قلت ليك العصير ده تانى ما تجيبو !!!!!
البت من تسمع صوتك بتجدع الفى ايها وتجى جارية باباااااااااااااااااااااااااااااا ..
والله العظيم مرات بتكون نايمة فجأة تحس بيك جيت تقوم جارية بابااااااااااااااااااااااااااااااااااااااااااا وتترمى فيك ..
تقول ليها شفتى جيبت ليك شنوووووووووووو .. وهى فقط مكنكشة فى رقبتك .. لا تريد غيرها بينما صاحبنا بكون شال غنيمتو ورجع لى اسبيس تونو تانى
بقيت اجى داخل بتسحب عشان ماتضرب روحها وهى جارية ...

الله يدي أية زول بت ..
ليه واحدة اتنين ان شاء الله ..
يااااااااااااارب ..

من أسع مفطما ليك .. انتى حبيبة منو .. باااااابا .. اها صاحبة منو بااااا با .. اها وبتعرسى منو باااااااااااااااا بااااااااااااا .. بس قرضى على كدا .. اوعة تنطى




كل سنة وانتى طيبة يا ميار .. وكل بناتكم والبنات

Quote: مالك علينا ياخ وانحنا بعااااااااااااد منهم كدا .. من تجى داخل البيت الولد يشبكك .. اها الليلة جبت لى شنو وطبعا" وهو مدخل راسو فى الاكياس وبفرفر فيها .. وينو الشبس وينا الشكولاتة انا ما قلت ليك العصير ده تانى ما تجيبو !!!!! البت من تسمع صوتك بتجدع الفى ايها وتجى جارية باباااااااااااااااااااااااااااااا .. والله العظيم مرات بتكون نايمة فجأة تحس بيك جيت تقوم جارية بابااااااااااااااااااااااااااااااااااااااااااا وتترمى فيك .. تقول ليها شفتى جيبت ليك شنوووووووووووو .. وهى فقط مكنكشة فى رقبتك .. لا تريد غيرها بينما صاحبنا بكون شال غنيمتو ورجع لى اسبيس تونو تانى بقيت اجى داخل بتسحب عشان ماتضرب روحها وهى جارية ... الله يدي أية زول بت .. ليه واحدة اتنين ان شاء الله .. يااااااااااااارب .. من أسع مفطما ليك .. انتى حبيبة منو .. باااااابا .. اها صاحبة منو بااااا با .. اها وبتعرسى منو باااااااااااااااا بااااااااااااا .. بس قرضى على كدا .. اوعة تنطى

الشاذلي سلامات
تعرف يا الشاذلي والله ولدي نسخة بالكربون من ولدبتاع الاكياس ده ههههههه
ماعندو وكت لاي حاجة ولا لاي زول غير حاجاتو ونفسو وبعدين ماعندو استعداد يقبل أي عذر مهما كانت ظروفك تعمل يعني تعمل
تمشي يعني تمشي عكس البنية تماما بمجرد ماتظهر ليها انك متضايق من حاجة طوالي تقولي بابا انت تعبان نخلي بعدين ؟
امين ياشاذلي الله يضوق أي زول ماعندو اطفال حلاوة الاطفال وفي الاطفال البنات
تحياتي لميار واخوتها
عمر مديد ان شاء الله

فعلاً يا فقير لا يعرف حلاوه البنات الا من تذوقها .... ربى ما يحرم بيت من البنات
انا الولد الوحيد وسط خمسه بنات وبحمد الله الواحد بكر بميناس
التحيه لكل الامهات ولكل الاخوات ولكل الزوجات ربنا يقدرنا على جزاكن

ربنا يخلي ليكم بناتكم وأولادكم ويحفظهم
لسة علينا البنات ، لكن الزول الفي الصورة
دا (ربنا يحفظو ) يا دوبك سنة وسبعة وشايفو
بدا يفرض حاجاتو وشخصيتو ... قالو البنات
هينات ولينات ربنا يكرمنا بيهن ..
ولمن حـُرم نعمة البنين ندعـو :
ربي ما تحـرم بيـت مـن الأطفـال .

Quote: ابراهيم الفاضل يا استاذ عبد الله فقير يا أخى دي (نقطة ضوء).... تدري يا عبد الله ان امنيتى بنت قبل الولد !! فقط دعواتك

ابو خليل سلامات
ان شاء الله ربنا يبكر ليك بي بنية
مشكور علي قصيدة محجوب شريف الرائعة
مودتي وامتناني