Post: #1
Title: أمِشْ أمِشْ ما عندك رَبِطْ
Author: عبدالله ود البوش
Date: 04-23-2013, 01:43 PM
موسى ود الحجير يعيش في فقر مدقع كما هو اغلب سكان حلتنا حينها
ولكنهم يزيلون عرق الفقر عن جبين قلوبهم بالطرفة والمفارقات
ويعيشون على امل قدوم السنبرية ام قدوم والعيش بكرة اقوم
والمطامير تندفس والدفيس املا الحيشان والرواكيب ومسلا مسلا شقلبي علي الصفح
شبير شد قام بجماعتو ورك برا
شيخ الحلة كلم موسى ود الحجير وهو الذي لايملك الجدادة ام حلقا مر
بان يكلم بتو العالية بت موسى كان تبقى داية
يا العالية ناس الحلة بدوروك داية بيها تعدلي حالك
ونحن كان جات منك لينا كَدَة كل سماية كتير الفشفاش علي ود الحجير
وكلمي جحفر ود اختي ما اعاكسك وهو اعاكس علي رماد خشمو وبكرة تمشي تسجلي
العالية سجلت اسما في مديرية النيل الازرق شان تبقى داية
وكلها امل في تلبية طموح ابوها الذي لايتجاوز الفشفاش وبالكتير راس كبش كل سماية
دخلت بيت ابوها وبشرتم ولكن التحذير واجب من الحمل اثناء التدريب لمدة سنة
وكررها ليها المسعول اكان حملتي يا العالية اثناء الحمل بنرفدك طوالي
وكلمت ابوها وقاليها خير يا العالية خير لكن كلمني زولك التكيسة دا
وزاد عليه حين قابله جنب الجزارة يا جحفر ود اختي سمعت الكلام سمح ؟ خليك فالح
ما بتتوصى ونهر حمارته الشائع بعدما كرر الوصية
عند المواعيد المضروبة مشت العالية للتدريب وبالفحص عليها وجدت انها حامل
ورجعت تجر خيبة الحمل والحلم اللطار وكيف تواجه ابوها ود الحجير
بعدما كاد ان يصبح حلمه واقعا
يابا لقوني حامل وشطبوني
تسود ختوتو سوادا في عمرو المسنوح
وواصلت العالية حتى بيتها حيث يقبع جحفر على جنبة مرق العنقريب
يشد في السوكري الذي اشتكى الهوان
مالك يا العالية جاية حانفة وشك زيا التكنك مقروصة بعقرب موية
لقوني حامل يا جحفر ورفودوني
لم يفرح جحفر بالحمل كما بقية البشر بقدر ما شال همو مع خالو موسى ود الحجير
جدع السوكري المهتري وهموا يطيب خاطر خالو ومشى ليهو
ود الحجير مدنقر يربط في حمارتو وقف في ضهرو وقال ليهو
خالي زيك
الخلا اللِبْلَعَك امش امش ما عندك ربط
ولم يعبأ بشئ اكثر مما يبصق فوق البَرَبندي بصقة زول دمو فائر
|
Post: #2
Title: Re: أمِشْ أمِشْ ما عندك رَبِطْ
Author: بله محمد الفاضل
Date: 04-23-2013, 01:59 PM
Parent: #1
ما ريحتني حكاية ربطك بين لحظة الاعتذار للخال
وما يفعله
وما قاله
ما ريحتني نهائيتن
قتلي سمو فائر ههههههههه
...
ينعل عفاريتك جت
|
Post: #3
Title: Re: أمِشْ أمِشْ ما عندك رَبِطْ
Author: السيد أحمد إبراهيم
Date: 04-23-2013, 02:04 PM
Parent: #2
والله كعب الزول الما عندو ربط
إتنين لا تمل حكاويهم
ود البوش
وعباس الدسيس
يديكم العافية
|
Post: #4
Title: Re: أمِشْ أمِشْ ما عندك رَبِطْ
Author: محمد المسلمي
Date: 04-23-2013, 02:19 PM
Parent: #3
عبدالله ودالبوش سلام
كتابة جميلة وتطلع الناس من فلان وعلان حرامي وقال وسوا
|
Post: #8
Title: Re: أمِشْ أمِشْ ما عندك رَبِطْ
Author: عبدالله ود البوش
Date: 04-23-2013, 02:37 PM
Parent: #4
محمد المسلمي
حبابك وحباب السلام
| Quote: كتابة جميلة وتطلع الناس من فلان وعلان حرامي وقال وسوا |
اشكرك
لكل كيبورد ولكل رسالة وعلى كل مسئولية فان خلصت النوايا صلحت الاعمال
.
.
تحياتي
|
Post: #6
Title: Re: أمِشْ أمِشْ ما عندك رَبِطْ
Author: عبدالله ود البوش
Date: 04-23-2013, 02:27 PM
Parent: #3
Quote: والله كعب الزول الما عندو ربط
|
وخاصة اذا كان الربط بالحبل السري
.
.
شكرا ابو السيد
تحياتي يا ملك
|
Post: #5
Title: Re: أمِشْ أمِشْ ما عندك رَبِطْ
Author: عبدالله ود البوش
Date: 04-23-2013, 02:21 PM
Parent: #2
Quote: ما ريحتني حكاية ربطك بين لحظة الاعتذار للخال
|
حجر طاحونة حكينا في الهمبريب عيارو فاكي فيدرشو درااااش
فانتم الادباء دققوا دقااااااااااق
ورصوا في شوالات الكتب ونشتري منكم اعادة تدوير زي زي السلام عليكم
.
.
بله مرورك اسعدني جدا شكرا ياخي
|
Post: #7
Title: Re: أمِشْ أمِشْ ما عندك رَبِطْ
Author: ismeil abbas
Date: 04-23-2013, 02:30 PM
Parent: #5
دراما واقعية يا ودالبوش...كثير من المواقف الحياتية عند أهلنا الغبش ممكن تتتصور وتنتج.
طبعاً أنا محظوظ دائماً باخد الزبدة...وبتناول القصة مجسدة من صوتك...حكاويك حلوة وجميلة..
تسلم ياراقى......الله يديك العافية.
|
Post: #9
Title: Re: أمِشْ أمِشْ ما عندك رَبِطْ
Author: عبدالله ود البوش
Date: 04-23-2013, 02:44 PM
Parent: #7
صرت مُلهِم حكاوينا يا اسماعيل
الحديث معك يلهب الذاكرة باجترار الحكاوي الجميلة
ومن تلفونك للكيبورد مباشرة دون تنقيح او ربط كما يرغب الاديب بله اعلاه
من الطش للقدح دردقا زقلا او كما قال حسين ود الطرشا
.
.
شكرا اسماعيل
الزول الوسيم في طبعو دائما هادي
تحياتي
|
Post: #10
Title: Re: أمِشْ أمِشْ ما عندك رَبِطْ
Author: عبدالله ود البوش
Date: 04-23-2013, 03:23 PM
Parent: #9
يا بله
ويا حبيب نورة
اديتكم سن الحمار ادوني سن الغزال
ومنكم ومِن الفيش وتكس ارجع
خيتوها وفصلوها جلابية عيد
|
Post: #11
Title: Re: أمِشْ أمِشْ ما عندك رَبِطْ
Author: Abdullah Idrees
Date: 04-23-2013, 05:59 PM
Parent: #10
عبدالله ود البوش ماك طيب .. او نعلك طيب لانو الاولى حمالة اوجه في القراءة ..
ياخي حكاويك اللذيذة دي صعبة علينا .. بتذكرنا الحلة بتاعة زماااان ..
| Quote: ونهر حمارته الشائع |
الاخيرة دي ذكرتني حوار مشهور لواحد قريبنا مع ولدو صغير ماشي يعوم في البحر قال ليهو : أها امش اغرق وتعال حانف ويشيك (وشك) .. ما بعرف بعد ما يغرق يجيهو حافن ويشيهو كيفن!!
والعبارتين موغلتين في المحلية ولعل الكثيرين لم يفهموهما ..
تعابير ما سمعت بيها من سنوات عديدة ..
عارف يا عبدالله القرية السودانية دي مميزة جدا تكاد الحياة فيها تكون متطابقة ، نفس الحاجات البتحكيها دي ونفس التعابير تلقاها موجودة في كل قرى السودان ..
انا من قرية نيلية بعيدة منكم لكني كثيرا ما احسبك تحكي عن قريتي .. نفس الشخوص ، نفس اللغة .. نفس التفكير ..
احك يا يارجل سلمت يداك
|
Post: #12
Title: Re: أمِشْ أمِشْ ما عندك رَبِطْ
Author: عبدالله ود البوش
Date: 04-24-2013, 06:04 AM
Parent: #11
الحبيب عبدالله ادريس
عوافي يا زول عوافي
ياخي بجيك بمهلة لكلامك السمح دا
تحياتي
تعديل حرف
|
Post: #13
Title: Re: أمِشْ أمِشْ ما عندك رَبِطْ
Author: عبدالله ود البوش
Date: 04-24-2013, 06:09 AM
Parent: #12
الاخ شمس خليفة
تحياتي
واشكرك اخي على كلامك الطيب
|
Post: #14
Title: Re: أمِشْ أمِشْ ما عندك رَبِطْ
Author: عبدالله ود البوش
Date: 04-24-2013, 10:40 AM
Parent: #11
Quote: عارف يا عبدالله القرية السودانية دي مميزة جدا تكاد الحياة فيها تكون متطابقة ،
نفس الحاجات البتحكيها دي ونفس التعابير تلقاها موجودة في كل قرى السودان ..
انا من قرية نيلية بعيدة منكم لكني كثيرا ما احسبك تحكي عن قريتي ..
نفس الشخوص ، نفس اللغة .. نفس التفكير .. |
.
.
يا سلام يا عبدالله ادريس ياخي
لحدي قريب جدا انا كنت قايل جنس كلامي دا ما بفهمو زول غير ناس حلولنا بس
ولكن اتضح لي جليا من كلامك دا وقبله عدد من الاخوة والاخوات فهمت منهم انه نفس هذه الحكاوي
تكاد تكون فعلا متطابقة كما ذكرت
والكلام دا يحتاج لباحثين مختصين فرغم بعد المساحات الشاسعة في السودان تجد نفس الحكاوي
.
.
شكرا جزيلا اخي عبدالله ادريس
وتحياتي
|
Post: #15
Title: Re: أمِشْ أمِشْ ما عندك رَبِطْ
Author: عبيد الطيب
Date: 04-25-2013, 04:42 AM
Parent: #14
Quote: ويعيشون على امل قدوم السنبرية ام قدوم والعيش بكرة اقوم
والمطامير تندفس والدفيس املا الحيشان والرواكيب ومسلا مسلا شقلبي علي الصفح |
الأخ عبد الله لك التحية
كأنك بتحكي بلساننا
حكاوي دايما طاعمة لأنها بتنقل الواقع بي "ضبانتو"
والبزيدها روعة وحلا زخيرتك الكبيرة من المفردات الدارجية
شوف هنا قلبت الهوبا" المطامير تندفس والدفيس يملأ الحيشان
يشهد الله يا عبدالله حكايتك دي بكاملها شفتها حصلت علي أرض الواقع
وحتي موضوع الداية اي والله.........
شكرا ليك كتير واصل
|
Post: #16
Title: Re: أمِشْ أمِشْ ما عندك رَبِطْ
Author: عبدالله ود البوش
Date: 04-25-2013, 01:33 PM
Parent: #15
Quote: يشهد الله يا عبدالله حكايتك دي بكاملها شفتها حصلت علي أرض الواقع
وحتي موضوع الداية اي والله.........
|
الحياة في معظم قرى السودان تتشابه
ولذلك الحكاوي تتطابق تماما
.
.
شكرا أخي عبيد الطيب ومرورك اسعدني جدا
تحياتي
|
Post: #17
Title: Re: أمِشْ أمِشْ ما عندك رَبِطْ
Author: عبدالمنعم الطيب حسن
Date: 04-25-2013, 01:50 PM
Parent: #16
Quote: لحدي قريب جدا انا كنت قايل جنس كلامي دا ما بفهمو زول غير ناس حلولنا بس
|
كلامك صاح ، لانو كل السودان حلولك ،
ود البوش شكرا ، لحكاويك التي ترجعنا الي اهلنا البسطاء الطيبين ،
وتنسينا زيف هذه الغربة وزمهريرها ،
احكي يارجل فانت الطف من كتب ،
اكتب فمثل هذا النوع من الكتابة نادر ،
فلا تحرمنا من النوادر ...
|
Post: #18
Title: Re: أمِشْ أمِشْ ما عندك رَبِطْ
Author: علي محمد الفكي
Date: 04-26-2013, 02:28 PM
Parent: #17
ود البوش الجميل
سلام بي ريحة الدعاش
هي مطر الرياض دي فيها ريحة دعاش ولا بتخيل لي ساي
حكاوي حلالنا جميلة وطاعمة زي ابطاله
الما اتلوثوا بي مبيدات الدنيا وكيماويته من حقد وحسد وكره ولهاث وراء الفانية
حد الواحد فيهم يملاء مطمورتو عيش يضمن مونتو وتاني يزمبر محدر طاقيتو على كيفو
حكاوي جميلة لي ناس جميلين عاشوا في زمن جميل
يديك العافية يا عبدالله ويعدله عليك شقيش ما تقبل
لانك بترجعنا لي عالم جميل
|
|