ليس لأمين حسن عمر اي علاقة بمدارس كبمردج!

هو فقط رئيس مجلس ادارتها.
ثم أن "الكثيرون" قد رأووه في مناسباتها.
و الذي يبعد الشبهة و يجعل من الشائعة التي يرددها المرجفون عن علاقته بها هشيما تذروه الرياح أن مالكها هو خاله صلاح عبد العزيز احمد.
ثم هو فقط طلب من الأخ السعيد عثمان محجوب او ايا كان اسمه أن يكون عضوا بمجلس ادارتها.
و قاصمة الظهر للشائعات هي أن الخال العزيز و الذي هو بالمناسبة كندي الجنسية قد منح الأخ أمين فيمن منح اسهما اسمية، اربعة اسهم فقط.
و الرجل قد قال صراحة أنه مستعد لتمليك من يرغب الوثائق و الاثباتات على صحة كلامه هذا!
السؤال الآن هو:
هسة وين العلاقة بين الأخ المجاهد و هذه المدارس يا متعلمين يا بتوع المدارس؟

يا دوك السماء تمطر اسهما في الخرطوم
وانا حزمت امري على اخذ نصيبي منها فقد ضاع عمرنا في الغربة
السعيد كان في الرياض وانا في الرياض
ناس جدة اقعو عبد الباسط حمزة فغادة ساتي كانت في جدة
ولا عزاء لبقية التشاشة من باقي مدن المملكة

بعدين لازم الناس تحدد بحسب توجيه الأخ المجاهد
هل هم ضد الحكومة و منسوبيها
ام هم ضد البيع الاستثماري للساحات
ام الاثنان معا
ام لا هذا و لا ذاك
و لو امكن توضيح الاجابة بالرسم يعني تكونوا ما قصرتوا و سيمنحكم سيادته الدرجة الكاملة.

سلامات يا هندسة
هسه ناس كندا و امريكا الشمالية ديل كان عملوا شركات و استثمروا في المدارس مش كان الاسهم اتوزعت عليكم زي المطر بدل التكاسي و اللف و الدوران البسوو فيهو ده.
الحقوا اخوانكم ناس جدة و الرياض يا كنديين ، و نبشركم الساحات راااقدة منتظراكم.

ممكن مثلا:
مدارس المهمشون العالمية لصاحبتها ام حازم.
مدارس وواسي العالمية لصاحبها معاوية المدير
مدارس اولاد ابا الكونية بادارة محمد النور كبر
و هكذا

" توضيح الحقائق لمن (يعبأ) بالحقيقة " يا د. سيف

سلامات يا ياسر
في البوست المعني غايتو ظهر واحد او اتنين "عباؤا" بالحقيقة
غايتو يا قول الشاعر-بتصرف-
مررت على الحقيقة و هي تبكي فقلت علام تنتحب الفتاة.
فقالت كيف لا ابكي و اهلي جميعا دون خلق الله ماتوا.

يا دكتره ... سلام

اهلنا قالوا كان دخلته الحمام ...
كان خريت خريت ... وكان ما خريت برضو خريت
والله صحي :)
..
..

من يضع نفسه في مواضع الشبهات عليه ان لا يأســى على ما يصيبه

والله يا سيف كلام يحير... بمنطق أمين دا الواحد ما عنده أي علاقة بأمه وأبوه وزوجته وأولاده.
قال ليس لي علاقة إلا إني رئيس مجلس الإدارة... طيب إنت رئيس مجلس الإدارة والمدرسة مدرسة خالك وعندك فيها أسهم تاني علاقة أكتر من كدا شنو؟

Quote: مدارس واوسي العالمية لصاحبها معاوية المدير

دكتور سيف سلامات ياخ ،
بالله يا دكتورسيف ،،،
معاوية المدير دا عندو علاقة ب واوسي ...
وانا اقول الزول دا دمو خفيف كدا ليه ؟ ياخ طلعنا دم ومدارس خاصة ،
وبما اني من واوسي ، ولي في اسمها التجاري نصيب ،
فساكتفي برئاسة مجلس ادارة مدارس واوسي العالمية لصاحبها معاوية المدير،
واكان كمان لقيت لي
اسهم اسمية كدا ما بطالة معاي ،

واحد من ابناء واوسي ، بس الشمال بحري ...

شكلك يا دكتور لا تعبأ بالحقيقة

سلام يا دكتور

الغريبة امين دا تحديداً كان سالق الشعب السوداني سلق بالمنتدي الفقهي بالساعات فى التلفزيون! فى مئات الساعات الفقهيه دي ما مرت عليهو قصة الرجل عامل الزكاة الذى جاء للرسول قائلا هذا لكم و هذا اهدئ لى؟ و رد الرسول عليه بـ: ما بال العامل نبعثه فيأتي و يقول هذا لكم و هذا اهدئ اليّ، الا جلس فى بيت امه و ابيه فينظر ان يهدئ له ام لا. و لا قصة عبد الله بن عمر و الابل المدوعله مقارنة بابل العامة العجفاء. طبعاً شيخ امين لو جلست فى بيت امه و ابيه ولا اشتغل اي شغل خاصة، لن يأتيه حتى ابوه ذاته ليجعله على راس مجلس اٍدراة شركة. الظريف فى الموضوع جايب معاهو الكاشف اخوه، مقابل اسهم مجانية. عشان تكتمل الزينة و الابهة السلطانية لشركة خاله. بالله شوف الشغل الرسالى دا مظبط كيف

>

لله درُك أيها المجاهد أمين حسن عمر

لقد أخرست الألسنه بردك الفحيم هذا

لا علاقة لك البتة ( بالله مش حلوه البتة دى ؟؟ ) بهذه المدراس

...

ماعندكم شوية أسهم زايده ؟؟؟؟

Quote: ماعندكم شوية أسهم زايده ؟؟؟؟

يا جماعة بالراحة بالراحة، و الله تكتلوا ليك زول بالضحك.


أسهم زايدة يا معاوية، و الله ياهو الفضل.

Quote: ماعندكم شوية أسهم زايده ؟؟؟؟

في العرس الجماعي في حلتنا ، العروسات كلهن لابسات تياب خدر ، والعرسان لابسين الجلاليب ،
العروسات جايات من بيت ، والعرسان من بيت اخر ...
وفكوهن في حوش كبير ، وكل زول يبحث عن ليلاهو ، وحصلت لخبطة كأن يمسك احدهم يد عروسة غير عروسته ،
المهم واحد صاحبي قال لي : يا زول في الجوطة دي ارح امكن نلقا لينا عروس زايدة

Quote: من يضع نفسه في مواضع الشبهات عليه ان لا يأســى على ما يصيبه

كلام مليان حكمة
لكن مسعول من الخير يا الامين يا اخوي حمام شنو مع لفظك الاخر داك..يا زول قول ادبخانة ساي ههههههه

Quote: قال ليس لي علاقة إلا إني رئيس مجلس الإدارة... طيب إنت رئيس مجلس الإدارة والمدرسة مدرسة خالك وعندك فيها أسهم تاني علاقة أكتر من كدا شنو؟

اووو ناس كندا
درب الشركات ده لسه ما عرفتوه يا العوض ؟

Quote: معاوية المدير دا عندو علاقة ب واوسي ... وانا اقول الزول دا دمو خفيف كدا ليه ؟ ياخ طلعنا دم ومدارس خاصة ، وبما اني من واوسي ، ولي في اسمها التجاري نصيب ، فساكتفي برئاسة مجلس ادارة مدارس واوسي العالمية لصاحبها معاوية المدير،

يا عبد المنعم واوسي المقصودة حلة جنب الباوقة بلد ود المدير بس احتمال عندها علاقة بي واوسي اللتكم.
اها المدير اسمه ما بيديهو طريقة غير يبقى المدير عشان كدي مبروك عليك رئاسة مجلس الادارة من هسي لكن اللسهم ما بضمنها ليك.

Quote: شكلك يا دكتور لا تعبأ بالحقيقة

سر الختم و الله في كيزانستان دي يبدو انو الحقيقة ذاتها بقت لا تعبأ بنا..فترت لرقبتها من تلاعب الجماعة ديل بيها.

Quote: جايب معاهو الكاشف اخوه، مقابل اسهم مجانية. عشان تكتمل الزينة و الابهة السلطانية لشركة خاله. بالله شوف الشغل الرسالى دا مظبط كيف

يا بكور
هسه باقيلك المجاهد و اخوه الكاشف الدخلو معاهو داك الحكاية ده لاقيين منها شي و للا هي لله و صلة الرحم ساكت؟
تذكر الكيزان زمان كان عندهم غنية بقول فيها انني شاب رسالي بمشي طوالي و لا ابالي او حاجة قريبة من كده؟ هههههه

يا دكتور سيف
انا نفسى اعرف العلاقة بين قيادات الانقاذ و رئاسة مجالس الادارات

العمدة هباني شكرا على المرور و شكرا على متابعة بلاوي الجماعة .

Quote: ماعندكم شوية أسهم زايده ؟؟؟؟

و انت يا جنابو قايل الناس ديل شردوكم ليه؟
ما ياهو عشان الاسهم ما بتكفي يا دوب صاحب الشركة يدي ود اختو و واحد او اتنين من اصحابو.

وليس لشقيقته علاقة بمدارس المواهب او ايا كان اسمها
الا تعبأون للحقيقة :)

يا النبي هوووود
انا كنت قايل القصة خااال وبس
تقوم تظهر لينا مدارس المواهب في نواحي بحررررررري...
امين حسن عمر يبدو ان امبراطور المدارس... مافيش حد احسن من حد طاالما كرتي او اي كان اسمه هو امبراطور الاسمنت
ومامون حميدة امبراطور الصحة ...وهكذا دلالايك ودواليك...


ياااخ المجد والخلود (لحتمية الاشياء والتحية للنهايات التي تفرض نفسها بامرة التراكم النضالي )


وسنتابع

يا جماعة لا تتوانوا في فضح أي مفسد في الحكومة

بالذات الكباااااار منهم!

لم يتبق لنا وسيلة أخري لمحاربة الفساد

لا أمل من النيابة ولا من الإعلام في السودان

فكلها للأسف تحت الإبتذاذ والترهيب

نتمني من الوطنيين المخلصين في السودان أن يمدوا سودانيز ويكليكس بالوثائق

عن كل المفسدين, فلا تتستروا علي آكلي أموال الشعب وتجار الدين!

حنطلع صورة أمين حسن عمر من دبيب الفساد ، ما دام طلع بري

أنا طلعت بي حقيقة واااحدة:-

((كلكم لا تعبأون))

Quote: أنا طلعت بي حقيقة واااحدة:- ((كلكم لا تعبأون))

يعنى يا أبو الريش عايزنا نحن نعبأ .. وهم شغالين تعبئه ؟؟؟؟؟؟