التمييز ضد الذين يستخدمون يدهم اليسرى

اغلب الاشياء صنعت للاكثرية التى تستخدم يدها اليمنى....

انظر هنا مجموعة من الاشياء التى يصعب على الاعسر"البستخدم يدو الشمال" استخدامها

http://lefthanded.cdf-design.com/against_us/




اكثر شئ يفقع مرارتي بالجامعه .. الكراسي اللي طاولاتها يمين

طيب أنا اعسر ، ولا ولد البطة السوداء ؟
___
من احد مغردي تويتر


يموت تقريباً 2500 شخص اعسر سنويا بسبب الات صنعت للذين يستخدمون اليد اليمنى
___
عن تويتر ايضا

الاخ احمد السلام عليكمو رحمة الله وبركاته

بالمناسبة هناك اشياء غريبة فى المجتمع خاصة المجتمعات الاسلامية بحرم عليك الاكل باليد اليسري والشراب كمان متناسين بان الله سبحان وتعالى هو الذى خلق ناس الشمال ديل والمسألة مرتبطة بالدماغ والانسان الايسر ليس له خيار وزمان فى المدرسة الواحد بياخد علقة لو استخدم اليد الشمال وكمان فى البيت غايتو جنس عذاب وترهيب
اما موضوع الاداوت والاشياء المستخدمة لقد وجد لها الحلول لكن مكلف جدا مثل الكي بورت والماوس والطاولة وممكن تدخل فى بوابة lefthanaded الالكترونية تجد العجب والعجائب وكلها اصبحت محلول لكن بالشئ الفلاني

واحد من اخواني Ambidextrous و التاني اشول

نقل بتصرف من LEFT HANDED DAY

Quote: Being Left-Handed Brain organisation No-one has come up with a definitive reason for WHY some people are left-handed, but about 13% of the population around the world are, and it is thought to be genetic - it definitely runs in families. Researchers have recently located a gene they believe "makes it possible to have a left-handed child " so if you have that gene, one or more of your children may be left-handed, whereas without it, you will only have right-handers - sorry! The good news is, that if you are left-handed yourself, you have that gene and will pass it on through the generations!. The way the brain works is incredibly complex, but this simplified explanation will give you some understanding of where our left-hand dominance comes from. The brain is "cross-wired" so that the left hemisphere controls the right handed side of the body and vice-versa and hand dominance is connected with brain dominance on the opposite side - which is why we say that only left-handers are in their right minds!. .

السلام عليكم اخونا الصادق ةشكرا للاضافة الثرة

انا ما اشول بس من زمان عندي ملاحظة انو ناااااااااادر ما يكون الاشول ما حريف في الكورة

يعني دايما وبالفطرة بجي بعرف يلعب كورة بطريقة مهارية شديد

وعندنا زمان دحدوح وقلة في المريخ كانو مرعبين عديل والاتنين بستخدمو رجلهم الشمال

امس يدوب بالصدفة عرفت معاناة الناس البستخدمو الشمال ...لقيت في تويتر الزول البتكلم عن ادراج الامتحانات

الموضوع دا خلاني ابحث حول الاشول اكتر ولقيت الموضوع الانجليزي في صدر البوست

بالنسبة للمقتطف بتاعك الــ بالانجليزي مختصر ومفيد شديد

اختنا دانية الكلمة دي معناها انو بارع في استخدام كلتا يديه اخوك يعني موش؟
هل بقدر يكتب بالاتنين بنفس المستوى ويفعل كل الحاجات بطريقة واحدة سواء باليمين او الشمال؟
وربنا يحفظهم ليك

سلامات لصديقنا صاحب البوست
سلاما واحتراما

انا غايتو جيت شمال
..
...
من المشاهير الذين كانوا يستخدمون الشمال، او كانوا (شُوٌل):
سيدنا عمر بن الخطاب الخليفة الثاني .
..
..
...
..
...
...
الفنان ليوناردو دافنشي

وهناك كثر..
ادونا أسماء
عن اذنك ياصاحب البوست

Quote: ادونا أسماء عن اذنك ياصاحب البوست

التوام :رنا و روان و(والدتهم)

أنا بكيفوني الناس الشول جدا... اخوي الاصغر مني اشول... ومحمود ولدي اشول... الاتنين ما شاء الله مخهم نظيف.. من الحاجات البقولها اخوي انها صعبة استخدام المقص... محمود ولدي ما ليه في الكورة، لكن عنده سيرف بي مضرب التنس، ما شاء الله... محمود بعاني جدا من موضوع الاكل ده، لكن بستخدم الشوكة والملعقة كتير عشان القصة دي.... من بدري نبّهته استاذته انها ما تحاول تجبره انه يستخدم يده اليمين في الكتابة ... لانه الاجبار ده ربطوه في بعض الابحاث بي ال dyslexia (تعسّر القراءة)... مازن اخوي متخصص في علم الاعصاب ورافض نظرية انه الاشول دايما ذكي.. لكن الشاهد انه زملاؤه السبعة في برنامج الPhD في ال neurosciences في الBritish Columbia كلهم شول!! وبرضه بقول لي ما دليل.... طالباتي في الجامعة الشول كلهم مبرّزين... وحتى المستهترات وما مهتمات بكونو مبرزين في الشي المركزين فيه!


من الناس المشهورين وشول...

اوباما
بل كلينتون
شافيز الله يرحمه
جوليا روبرتس
بروس ويليس
اجلينا جولي
اوبرا
ليوناردو دافينشي
فان جوخ
بيل جايتس


المصدر:
http://lefthand.wikia.com/wiki/Famous_left_handers



interesting facts
http://facts.randomhistory.com/facts-about-left-handedness.html

Quote: Tests conducted by St. Lawrence University in New York found that there were more left-handed people with IQs over 140 than right-handed people. Famous left-handed intellectuals include Albert Einstein, Isaac Newton, Charles Darwin, and Benjamin Franklin

Quote: Studies have suggested that left-handers are more talented in spatial awareness, math, and architecture. Right-handers tend to be more talented verbally

Quote: Connections between the right and left sides of the brain are faster in left-handed people. This means information is transferred faster, making left-handers more efficient in dealing with multiple stimuli and using both sides of the brain more easily

Quote: Juniata College in Huntington, Pennsylvania awards up to $1,500 in academic scholarships to students who have top academic records and who are left-handed

Quote: Studies have shown that if a left-hander injures his dominant hand, he has an easier time learning to use the other hand than his right-handed counterparts

Quote: Some scientists have suggested that left-handers were originally in the womb with a twin that did not survive, or a “Vanishing Twin.”

Quote: الاخ احمد السلام عليكمو رحمة الله وبركاته بالمناسبة هناك اشياء غريبة فى المجتمع خاصة المجتمعات الاسلامية بحرم عليك الاكل باليد اليسري والشراب كمان متناسين بان الله سبحان وتعالى هو الذى خلق ناس الشمال ديل والمسألة مرتبطة بالدماغ والانسان الايسر ليس له خيار وزمان فى المدرسة الواحد بياخد علقة لو استخدم اليد الشمال وكمان فى البيت غايتو جنس عذاب وترهيب اما موضوع الاداوت والاشياء المستخدمة لقد وجد لها الحلول لكن مكلف جدا مثل الكي بورت والماوس والطاولة وممكن تدخل فى بوابة lefthanaded الالكترونية تجد العجب والعجائب وكلها اصبحت محلول لكن بالشئ الفلاني

لك التحية ولصاحب الطرح كمان
ولا اخفيك بانني من المتضررين من هذا السلوك تجاه من يستخدمون اليسرى
وفي هذه المجتمعات بالتحديد تصل درجة الاستهزاء والاستفزازات والتدخل حتى في تفاصيل كيفية شرابك
كأن يشاهدك احدهم وانت تشرب
فينظر اليك نظرة وكأنما راى شي مخيف
وبدون حتى السلام عليكم
(( اشرب بيمينك يا شيخ واستعيذ بالله من الشيطان الرجيم ))
وبعضهم يذهب ابعد من ذلك (( اشرب بيمينك فان الشيطان ياكل بشماله ويشرب بشماله ))
يعني ولا حتى كلام باحترام وادب وذوق
حتى لو طرت للواحد في حلقه ورديت ليه
يزيد في غيظك (( ربنا يهديك يا شيخ ))
اما في المجتمع السوداني على ما اعتقد هناك المجتمع اكثر قبولاً لمن يستخدمون اليد اليسرى
صحيح تبدأ بعض مضايقات في البداية من الاسرة ولكن سرعان ما تتقبل الوضع
وفي تجربتي مع مدرس العربي في المرحلة الابتدائية كان مشرف الصف الاول حاول معي كثيراً
ونلت منه من الكفوف والضرب والاساءة
فتركت المدرسة اياماً فما كان من والدي الا وان ذهب معي للمدرسة واخبره بانهم حاول معي كثيراً منذ
طفولتي الاولى فعجزوا عن ذلك وطلب منه ان يتخلى عن ملاحقاته في استخدام اليد اليسرى
فاستجاب
نقطة سطر جديد
نوعية اخرى
الواحد تتكرم وتعمل فيه ذوق وواجب تمد ليه حاجة
يقول ليك بكل وقاحة ليه تمد لي باليد الشمال شايفني صغير في نظرك
ولا تاني لما تجي تمد لزول حاجة استخدم يدك اليمين ؟؟؟
التمييز كثير والمضايقات متعددة وهنا صرخة نطلقها يا ناس والله انحنا ما شياطين
هههههههههههه
مع التحييييييييييييييييييييييييييييييية

Quote: انا ما اشول

ههههههههههه سلامات ابوحميد
تصوّر من المداخلة الأولى وفي بالي اسألك انت اشول ؟
لأنك عوّدتنا بتكتب عن حاجات انت يا ما عندك قضية بيها او لسّة ما عشتها :)

احمد سيداحمد

ايوه بيستعمل اليدين الاتنين بنفس البراعه في كل شئ ماشاء الله عليه.

جزء برضه من المعاناه عايشته وانا صغير، وربما تريقة لأستخدام نفس اليد في استخدام آخر.
بالنسبة لأستخدام اليد اليمين ماف مشكلة إلا عمل دقيق لازم ارجع لي يدي الشمال ، وامكن ماف مشكلة في الأكل وخلافه لكن متذكر مرة استخدمت السكين بي يدي الشمال والزملاء مستغربين من المنظر.

مساء النور أ. احمد

انا اشووول وياما لما كنت صغير اتدقيت في الحاجة دى لانو كنت شليق والا اكل بالشمال (ده قبل اكمل عشرة سنة ) وكنت ما شا الله مجنون كورة بطلع للتمرين بتاع العصرية من 2ونص ضهر بعد برنامج عاااااالم الرياضة
مريخابي على السكين وكان عندي فنيلة حمراء برسم فيها نجمة لانو ما عندى فنيلة المريخ ..اها كنت في الكورة جراى جدا وبشوت على الماشي بالشمال مع مقدرتى على الشوت باليمين برضو
بطلت الكورة من العام 2003 وانا في الجامعة واسي لو جريت تلاتة امتار اشوفها تعادل كيلو متر :(

بجيد استخدام اى اداة وما بحس انها مصنوعة لاصحاب اليد اليمنى

شكرا للبوست المميز

ودى واحترامي .......

السلام عليكم الاخوة والاخوات الكرام

والله استمتعت جدا بمداخلاتكم الثرة واستفدت كتير منها شكرا ليكم كتير فردا فردا

ويا ود البشرى كان ما ملاوز في حاجات قويه خلاس من النوع الماجربتو نهاااااااائي ولا عشتو ههههههههه بس قوي جدا

كدي اديها صنة كدا ونحاول ننزلو وسجن سجن غرامة غرامة

البوست حقكم يا جماعة انداحوا زي ما عايزين وانا متابع

سلامات سيد احمد

شكرا علي البوست وجد الموضوع مهم خصوصا للناس المتضررين من التمييز ده وانا واحد منهم ... طبعا للاسف التمييز ده في كل الديانات بدون استثناء ايضا الثقافات والكلام ده ما اتهام او تجني علي اي دين او ثقافة محددة .. حيث ارتبط الايسر او الاشول او الاعسر !!! او ال Left Handed بالشر او الشيطان ...... وهناك امثلة كما ذكرها المتداخلون لكن ايضا اخري كتيرة ...

حتي في اللغة الانجليزية التمييز اصبح جزء من اللغة منها كلمة ِALL RIGHT او Right تم استخدامها بمعني الحق او الصحيح وهناك امثلة كتيرة غيرها وفي اللغات الاوربية الاخري والعربية والصينية والروسية وهي كلها تمجد ان الايمن هي الافضل والحق والخير وعكسها الايسر في كل شيئ حتي ان بعض المجتمعات لا تسمح للايسر للقيام بكثير من المهام والوظايف بمبرر التشاؤم او اللعنة التي قد تصاحب الايسر ???!!!!
لوقت قريب يجبر الاطفال الذين يولدون في مجتمعات كثيرة في اسيا علي استخدام يدهم اليمني بدلا عن اليسري التي يسهل عليهم التحكم بيها لدواعي ثقافية او اجتماعية وينتج عن هذا مشاكل تتعلق باكتساب المهارات وحتي وظايف التفكير ...
اما في عصرنا فان التمييز تحول كما زكرت الي مستوي المنتوجات ابتداءا بماوس الكمبيوتر والكيبورد وملحقاتها ومرورا بمعدات الورش والادوات المنزلية والالات الموسيقية والسيارات والقائمة تطول رغم انو بعض الشركات تصنع مرات معدات تناسب ايضا اصحاب اليسار لكن في منتجات بسيطة جدا وده ما اعتراف بحقوقهم بقدر ما هي زيادة عدد المستهلكين ...
ياخي المقص ده مرات يغلب الواحد لانو مصمم على اليد اليمني .....
عموما الموضوع زي ما قلت مهم وما عاوز اطول

ولك الود
محمد

الواحد تتكرم وتعمل فيه ذوق وواجب تمد ليه حاجة
يقول ليك بكل وقاحة ليه تمد لي باليد الشمال شايفني صغير في نظرك
ولا تاني لما تجي تمد لزول حاجة استخدم يدك اليمين ؟؟؟



سلامات فرح
طبعا دي كيفتني شديد وذكرتني بمواقف كتيرة حصلت لي ....ياخي الشحاد في السودان تمد ليهو قريشات بالشمال ياخدها وهو مادي بوزو ... وحكاية طوالي انت محتاج تشرح انك انت ايسر ولا يدي شمال دي بايخة غير يلم فيك واحد ويديك درس في الدين والاخلاق

Quote: Ambidextrous

I'm an amidextrous, too, Dania.

*