كم إيجار الشقة المفروشة في كسلا..؟

غرفتين وصالة مثلاً.. لمدة أسبوعين.. في شهر يونيو..

وكيف هي الأجواء في هذا الوقت.. ؟


وقفة الملاح.. ما هو وضعها..؟

.. زول كسلاوي.. وللا راح كسلا قريب ما في..!!!


إلا نمشي نسأل صلاح غريبة في الفيس..!

Quote: يا عوض سلام بس ما وضحت انت ماش عريس ولا عذابي ولا بي اسرة وضح وضعك ؟

مع الأسرة.. عشان كده أنا قلت غرفتين.. وصالة..

العريس يسوي بالغرفتين شنو يا سيد!!؟؟

الشقة المفروشة في كسلا ( التوتيل) بـ 400 جنيه سوداني .. وطبعا دي شقة لوكس وفي الحي الراقي..
لكن ناس كسلا الطيبين ممكن يدوك الشقة مجان اذا انت ما عندك البكفيك ثمن ايجار الشقة.
وما تنسى تزور جبال توتيل والعنب الرامي قوف الجبل
والله يديك العافية

Quote: الشقة المفروشة في كسلا ( التوتيل) بـ 400 جنيه سوداني

في اليوم يعني يا اميرة ول في الشهر ولا في الاسبوع... يلا قولي عشان نحب عشانك كسلا

ابوعيش سلام

Quote: لشقة المفروشة في كسلا ( التوتيل) بـ 400 جنيه سوداني .. وطبعا دي شقة لوكس وفي الحي الراقي.. لكن ناس كسلا الطيبين ممكن يدوك الشقة مجان اذا انت ما عندك البكفيك ثمن ايجار الشقة. وما تنسى تزور جبال توتيل والعنب الرامي قوف الجبل والله يديك العافية

المبلغ أعلاه لو كان شهري.. يكون حرام علينا زاتو.. لي ما زرنا كسلا من زمان..

المبلغ زهيد جداً.. وإن شاء الله نجي نشوف كسلا.. وجبال توتيل..

ولو الله أراد لينا.. تاني كل إجازة في مدينة سودانية .. من بلدي الحبيب..


وشكراً.. اميرة.. وناس كسلا الطيبين..

Quote: في اليوم يعني يا اميرة ول في الشهر ولا في الاسبوع... يلا قولي عشان نحب عشانك كسلا ابوعيش سلام

ونحن ننتظر معك.. تفاصيل التفاصيل.. وتشجيعاً للسياحة الداخلية..


والله يا مازن الواحد عندو نية يلف المدن الجميلة في بلادي مدينة مدينة.. خوفاً من يجي يوم وتلزم إنك تمشي ليها بتأشيرة..


كفايا جوبا راحت علينا ساي قبل ما نشوفها.. والله يكضب الشينة..


شكراً.. مازن

سلامات ابو عيش..

ايجار شقة مفروشة باليوم بتحصل ما بين 80 الي 120 جنيه في الميرغنية او حي الكارا غرفتين وصالة وحمامين وطبعا مطبخ مكتمل..
اما بخصوص قفة الملاح
فدا على حسب وضعك لكن عموماً المعيشة بكسلا ارخص من كثير من الاماكن - عطبرة مثالاً -..
لكن العجيبة انك لسع ما زرت كسلا حتى الان ؟؟؟
ار يو كيديننج اصصص!!! الحق نص عمرك قبل ما يضيع ههههههه

تحياتي

Quote: الحق نص عمرك قبل ما يضيع ههههههه

وما تضيع كمان.. كسلا.. !!

معليش.. بقت عندنا حساسية من الإنفصال.. والتهديد بالانفصال.. والضاق قرصة الدبيب.....



والله جبت النجيضة يا حيدر -كالعادة-

وفعلاً.. والله الواحد من 2000 ميلادي ما طلع بره البيت ..وده بسبب الإجازات القصيرة..


ربنا يعينا ونزورها هذا الصيف .. ونأخذ منها أجمل الذكريات إن شاء الله...

Quote: [تاني كل إجازة في مدينة سودانية ..

يا أبو عيش تعال القضارف
نوريك العيش الما بتعرفو داك!

كامِل الوُد

آخر عهدي بها كان في 1987
في عيد الفطر إن شاء الله عندي كم يوم بقضيهن
جوار سيدي الحسن
وبالطبع لنا أحباب هناك ...

*صوت السواقي الحاني ذكرني ماضي بعيد
وعلى الرمــــــــــال آثارك طرتني ليلة عــيد
شكرا علي فتح النفاج يا أبو الصحب
فقد هيجت ذكريات حبيبة الي النفس

_____
الحليلة

Quote: يا أبو عيش تعال القضارف نوريك العيش الما بتعرفو داك! كامِل الوُد

إن مد الله في الآجال.. وادانا وأداك الصحة والعافية..


سأكون ضيفكم في يوم من الأيام..


ولي الشرف.. شكراً أخي/ محمد فضل




= = =
عندنا بلدات.. تزرع مطرية.. مسمية بـ القضارف.. لوفرة إنتاجها..
يعني عيشكم شفناه في أراضينا..

Quote: بعدين يا اخينا كسلا في شهر سته لو ماجاء خريف مبكر والله العظيم فيها سخانه تلحم تسيح الاسفلت وحجاره الجبل بتكون مولعه نار

Quote: امسك في اسعار حيدر الزين جيدا .. و لكن لو الفترة اسبوعين يمكن تنزل الي 50 جنية في اليوم .. و عليك بمنطقة الميرغنة و الكارة .. لأنك لن تحتاج الي مواصلات الي قلب السوق .. و تابع النشرة الجوية قبل ما تمشي اذا ما فيش امطار و القاش ما جاء اصرف النظر

شكراً الأحباب.. مالديني.. وعبد الرحمن

اخترت الخريف .. قلت أشوف المناظر الزي دي..

وإن شاء الله خريف خير وبركة..