Post: #1
Title: يا ناس الفيس بوك والله انا ما عارف نفسي مولود متين فما تتعبوا ساكت
Author: عبدالله ود البوش
Date: 04-07-2013, 07:02 AM
Parent: #0
كسر رقبة تكتب يوم ميلادك في الفيس بوك
اها انا بكتب ساكت أئ يوم اجي قدامي وخلاس
لقيت نفسي كاتب يوم 12 أبريل
ولا احرى ولا ادرى كان القاك ليك الاصدقاء والصديقات مالين صفحتي عوك عوك
ياناس في شنو
اقولي ليك يا عمك الليلة عيد ميلادك
تسود ختوتو سوادا عيدي ميلادي وما عارفو
فشنو والله يا جماعة وما طالبني حليفة انا ما عارف روحي مولود متين
مش انا وبس والدني ذاتم ابوي الله ارحمو وامو الله اديها العافية واطول عمرا
ما عارفين انا مولود متين مش اليوم والشهر السنة ذاتا تدور فيها شكلة لرب السماء
وغلات لا ليهو اول ولا ليهو آخر
ابوي الله ارحمو بقول مولود سنة التخديرة
وامي الله اديها العافية بتقول لا سنة الكتلة
والمشكلة العويصة ولا سنة التخديرة ولا سنة الكتلة
غير معرفات بأئ من التقاويم المعروفة هههههههههه
أها من اسع ايها الاصدقاء والصديقات ما تتعبوا رقبتكم في الفاضي ساهي
|
Post: #2
Title: Re: يا ناس الفيس بوك والله انا ما عارف نفسي مولود متين فما تتعبوا ساكت
Author: أيمن محمود
Date: 04-07-2013, 07:13 AM
Parent: #1
سلام يا ود البوش
Quote: ابوي الله ارحمو بقول مولود سنة التخديرة
وامي الله اديها العافية بتقول لا سنة الكتلة
والمشكلة العويصة ولا سنة التخديرة ولا سنة الكتلة
غير معرفات بأئ من التقاويم المعروفة ههههههههه |
ظنيتك من مواليد سنة حفرو البحر يا اخوي ! 
|
Post: #3
Title: Re: يا ناس الفيس بوك والله انا ما عارف نفسي مولود متين فما تتعبوا ساكت
Author: حيدر حسن ميرغني
Date: 04-07-2013, 07:19 AM
Parent: #2
يادبيب قول النصيحة
كم شمعة اتحرقت في الاغتراب بس
الباقي نعدو نجوم ليل
|
Post: #7
Title: Re: يا ناس الفيس بوك والله انا ما عارف نفسي مولود متين فما تتعبوا ساكت
Author: عبدالله ود البوش
Date: 04-07-2013, 07:49 AM
Parent: #3
| Quote: الباقي نعدو نجوم ليل |
حلاة لِق لِق يا حيدر اقوليك ليك عشان تعدي لي صفر معاك الواحد
ولا أجد سكة غير اللاعب 
يا زول نحن ناس بنعيش حياتنا الغالية بالنية السليمة
ممتن جدا لوجودك هنا عزيزي حيدر
تحياتي
|
Post: #5
Title: Re: يا ناس الفيس بوك والله انا ما عارف نفسي مولود متين فما تتعبوا ساكت
Author: عبدالله ود البوش
Date: 04-07-2013, 07:33 AM
Parent: #2
| Quote: ظنيتك من مواليد سنة حفرو البحر يا اخوي ! |
قاليك يا ايمن البت جات تبكي من المدرسة لاقتها حبوبتها في الباب
مالك يا بت ؟
قالت ليها دقتني الاستاذة
دقتك في شنو ؟
الاستاذة قالت لي الحفر قناة السويس منو ؟
قلت ليها ما عارفة يا استاذة ودقتني
فردت حبوبتها بتكوني حفرتيها اتي يا الشويطينة
مرورك اسعدني يا هندسة
تحياتي
|
Post: #4
Title: Re: يا ناس الفيس بوك والله انا ما عارف نفسي مولود متين فما تتعبوا ساكت
Author: عبدالله ود البوش
Date: 04-07-2013, 07:20 AM
Parent: #1
أمي اياها المتصورة معاي في صورة البروفايل
مرة حلفت وجزمت باسم ابوها علا تسوي لي عيد ميلاد
مالو ود المفتش السو ليهو عيد ميلاد احسن منك في شنو
قلت ليها يما عيد الميلاد مو كدي .. عيد الميلاد بدور عرفة اليوم والشهر
لازم تكوني عارفة اليوم والشهر
اها انا مولود متين ؟
قالت لي ولدوك سنة الكتلة
طوالي ابوي الله ارحمو اتنحنح وعدل من جلسته وقال يا فالحة هوي
مولود سنة التخديرة
وخليت الشكلة مدورة وطفرت الغوغاية والبنبر اشوف لي لعبة ام اركان
ولا اقلب الهوبة في دورة رملة ناس حاج بشرى
لفيت الحلة بكراع كـلـب وجيت ريحتي صنان صنان لقيت امي خاتة توبا في نص راسا
وقالت أنا قسمت باسم ابوي الداهي دا بسويهو بسويهو وكمان اضبح ليهو جدادة
وتاني الشكلة قامت هوي يا فالحة الولد قاليك الداهي دا كل سنة
وانتي ما شاء الله عندك تسعة اولاد من ولد لبت
اها عندك شنو غير جدادتك الواحدة المزعمطة ام لحقا مر دي
من وين تجيبي تسعة جدادات كل سنة
انا قسمت باسم ابوي اللحسن من الحيين بسويهو كان ببليلة بسويهو
واكلنا بليلة فك تخلي الزول اقيف تيوة
قال happy birth day قال
يااااااااااي
سجم امك يا الخزين
|
Post: #6
Title: Re: يا ناس الفيس بوك والله انا ما عارف نفسي مولود متين فما تتعبوا ساكت
Author: حيدر حسن ميرغني
Date: 04-07-2013, 07:41 AM
Parent: #4
اهدي هذا البوست التحفة لصديقي عاشق كتابات ود البوش أيمن ود الشيكينيبة المقيم في سريلانكا
دائما مايمدح كتاببتك الطاعمة والمرسلة بعفوية ومزاج سمح
|
Post: #8
Title: Re: يا ناس الفيس بوك والله انا ما عارف نفسي مولود متين فما تتعبوا ساكت
Author: عبدالله ود البوش
Date: 04-07-2013, 07:56 AM
Parent: #6
| Quote: أيمن ود الشيكينيبة |
ومن هنا ايضا ارسل له تحياتي
واهدي له مدحة السلسلة
.
.
يا هادي اهدنا .... يا هادي اهدنا
شكرا جزيلا اخي حيدر
|
Post: #9
Title: Re: يا ناس الفيس بوك والله انا ما عارف نفسي مولود متين فما تتعبوا ساكت
Author: الأمين كامل الأمين
Date: 04-07-2013, 08:02 AM
Parent: #1
صدمتنى ياخ
هسع انا كنت محضر ليك الهديه
القاك من ناس 1/1
والله يستر ما تكون النوع المشى للحكيم وفتح خشمو وقدر ليهو عمرو هههههههههههه
|
Post: #10
Title: Re: يا ناس الفيس بوك والله انا ما عارف نفسي مولود متين فما تتعبوا ساكت
Author: عبدالله ود البوش
Date: 04-07-2013, 08:23 AM
Parent: #9
أصلو انا تيمس ههههههههه
ما تعمل فيها من ناس يااااي عضتني قبورة هههههههه
اولاد الخرتوم يا اللمين لمن اشوفو ابو الجندب يحذر بعضهم بعضا
الواحد انط لفوق واقول عقررررب اعمل حسابك هههههههه
سنة يا وِرْوِر .... هوووووي يا دفعة هووووي
اتا كان قايل روحك وقعت من السماء سبعة مرات دفرتك انا اعمل حسابك
واحتفل بعيد الاستغلال من سكات هههههههههه
عندنا مرة في حلتنا اسمها الاستقلال والله صحي لانها مولودة فعلا في
1/1/1956 شقاوتا شقاوة اصلا ما عندها فرصة للغلات
قال افتح خشمو قال
.
.
اللمين عوافي ياخي ومشتاقين
|
Post: #11
Title: Re: يا ناس الفيس بوك والله انا ما عارف نفسي مولود متين فما تتعبوا ساكت
Author: طه إبراهيم عبد الله
Date: 04-07-2013, 08:56 AM
Parent: #10
أيها الأصدقاء والصديقات
أديكم النجيضة مهما تشيلو وتختو .. وتجيبو وتودو
ولو استخدمتو اللوغريزم والجذر التربيعي
الزول دا بكون أقدم من أي نتيجة تتوصلو ليها
..
والنجيضة الأنجض من الفوقانية
إنو ألذ من أي حاجة لذيذة
وأحلى من أي حاجة حلوة
|
Post: #12
Title: Re: يا ناس الفيس بوك والله انا ما عارف نفسي مولود متين فما تتعبوا ساكت
Author: عبدالله ود البوش
Date: 04-07-2013, 09:22 AM
Parent: #11
Quote: إنو ألذ من أي حاجة لذيذة
وأحلى من أي حاجة حلوة |
أصلو حلاوة لكوم
ياخ دا زن شين
اسع كتابتي دي النصها دبل دق والنص التاني ضلف خاتفاهو حدية فيها حاجة لذيذة
.
.
ولكنها المحبة بيننا يا طه إبراهيم
يشهد الله عليها ويعلم
سلام وشوق ياخي
|
Post: #13
Title: Re: يا ناس الفيس بوك والله انا ما عارف نفسي مولود متين فما تتعبوا ساكت
Author: garjah
Date: 04-07-2013, 10:35 AM
Parent: #12
يا ود البوش
ومن قال لك اننا سنبحث عنك بتاريخ ميلادك
سنبحث عنك بجضومك وراسك المقودس
ههههه ها
|
Post: #14
Title: Re: يا ناس الفيس بوك والله انا ما عارف نفسي مولود متين فما تتعبوا ساكت
Author: عبدالله ود البوش
Date: 04-07-2013, 10:58 AM
Parent: #13
Quote: سنبحث عنك بجضومك وراسك المقودس
|
قاليهو عامل عمتك الزي عمة الكـلـب دي
فرد عليه عمة الكـلـب كيف ؟
قاليهو هو في كـلـب عندو عمة لكن دا تِكِجن مني ليك ساهي
ياقرجة دي كجينة منك ساهي
المدقوسة دي العمة ياخي
.
.
ثم انه الموضوع ليس موضوع بحث ومافي زول في الدنيا دي قاعد اكوس لي
لكن ما داير اتعب الاصدقاء بالفيس بوك عشان اهنوني بعيد ميلاد قاطعوا من دقنوسي ساهي
ههههههههههه
تحياتي يا حبيب
|
Post: #15
Title: Re: يا ناس الفيس بوك والله انا ما عارف نفسي مولود متين فما تتعبوا ساكت
Author: عبد الباقي الجيلي
Date: 04-07-2013, 11:16 AM
Parent: #14
بشبش آلحبيب ...........
كيفنك آ زول ........
والله يا جماعة غايتو .. سنة متين كدي ما عارف ...
وكت جيت مندلي حنتوب دي شايل شنيطة الحديد فوق رويسي ده ... برلوماً داقس ...
لا بعرف صرفاً لا عدلاً ....
أخونا ود البوش ده .... كان في ساتة ... أقصد في تالتة ... راجلاً كبير بي شنبو ....
والتقول علي حضر زمن الأردية ....
الكلام ده غايتو نميري قاااااااااااااااااااااااعد ....
أها أحسبوها بي طريقتكم ...
|
Post: #17
Title: Re: يا ناس الفيس بوك والله انا ما عارف نفسي مولود متين فما تتعبوا ساكت
Author: مبارك النعمه النعيم
Date: 04-07-2013, 11:34 AM
Parent: #15
اليوم والشهر قنعنا منهم بنحسبك من ناس التسنين 01-01-0000
كدي جاسف لينا السنه بس
مثلا لمن دخلت المدرسه كان عمرك كم ودخلت سنه كم
وبعد داك ساهله
ما تحرم الناس من التهاني لعيد ميلادك
في حاجه مهمه جدا الظاهر فايته عليك ؟؟؟؟؟ الهدايه ...دي الز حاجه
وهدايه الزمن ده قيمه..ايفون وجلاكسي وايباد
جسف السنه عندنا ليك هديه
|
Post: #19
Title: Re: يا ناس الفيس بوك والله انا ما عارف نفسي مولود متين فما تتعبوا ساكت
Author: عبدالله ود البوش
Date: 04-07-2013, 12:10 PM
Parent: #17
Quote: كدي جاسف لينا السنه بس
|
دا اتا ذاتك يا المبارك ود النعمة ؟
ولابتعرف سنة تخديرة المشروح ولابتعرف سنة كتلة اللنصار
اها بالميت وسط التاريخين ديل
انا ما عندي مشكلة لكن خايف افضح حبيبنا عبدالباقي الجيلي المذكور اعلاه
.
.
Quote: في حاجه مهمه جدا الظاهر فايته عليك ؟؟؟؟؟ الهدايه ...دي الز حاجه
|
هههههههههههههههههههههههههههه
يا زول هوي عرفت هداياهم العيد الفات
ايقونات بس ههههههههههه
اقلعو ليك الايقونة من امات صنيقير التحت ديل والصقوها ليك واقوليك هاااااي
هبي بيرس دي والله جد
والله يا المبارك انا عيد رمضان والضحية بهم منهم
خاسة لمن اجن في السقط
ونقول العيد جاكن لبرودو
اصلو عيد ولا عرس ههههههه
قال حلاوة جلاكسي قال انا دي ذاتي ما بحبها عفينة وتتلصق في السنون
يا حليل حلاوة لكوم وحلاوة دربس النايم حس
قال جلكسي قال عفنا بالغبا
شكرا يا عجوز
|
Post: #18
Title: Re: يا ناس الفيس بوك والله انا ما عارف نفسي مولود متين فما تتعبوا ساكت
Author: عبدالله ود البوش
Date: 04-07-2013, 11:48 AM
Parent: #15
يا بقة يا زميل الزمن الجميل
حبابك ومشتاقين ياخي
شوف انا اصلو ما عندي مشكلة في الكبر
بل بالعكس بعجبني التكوبر زيادة
لكن براك جبت المحن لرقبتك واتا زول ساعدتك الشخصية الحجيرية
وخلتك مرات تزن وتقول انا من ناس ضـ ضابط علما بانك من ناس ضـ ضرب
ومن ناس حمد لبد
وحمد سلخ الخروف والخروف سلخ حمد
Quote: الكلام ده غايتو نميري قاااااااااااااااااااااااعد ....
|
لا دي طبعا مبالغة ظاهرة نميري دخل حنتوب في 1947 الدفعة الثانية في حنتوب
يعني قدامنا بكتير أقول نحن في سنة كم ؟ ولاسرك اخليهو في بيرو ؟
كلامك صاح اتا جيت برلوم ونحن في تالتة
اها دا اعتراف جميل منك فرق سنتين ما فارقة كتير
وهاك الصورة دي هدية كنا متصورين مع مدام ميري أستاذة اللغة الفرنسية
بتقدر تطلع صورتك ؟
انقر انا ياتو ؟
ههههههههههه
وقعتا وقعة بزليطا
تاني تجي الدروة ههههههههه
|
Post: #16
Title: Re: يا ناس الفيس بوك والله انا ما عارف نفسي مولود متين فما تتعبوا ساكت
Author: عبدالله ود البوش
Date: 04-07-2013, 11:19 AM
Parent: #14
Quote: ياعبد الله انت لو مولود في الدايات
ممكن يطلعوا ليك شهادة ميلاد
بس وريهم اسم الدكتوره
|
ههههههههههههههههههههههههههههههههههههههههههه
يا بابكر في زمن الديمقراطية نائب الدائرة حقتنا
الجماعة قالوا ليهو يا زول اصلو ما حصل سمعنا حسك في الرادي
النواب ديل كلهن يطالبو علا اتا
قاليهم سمح المرة الجاية اصنتو في الرادي عشان تسمعوني كويس
اها في اول جلسة للبرلمان رفع اصبعو
اتفضل يا العضو المحترم
وقف قدام المكرفون وقال
صقيعة سلامة تحتاج لنفاسة يا سيدي الرئيس
فرد عليه رئيس البرلمان : السودان كلو فيهو نفاستين
ندي منو صقيعة سلامة نفاسة؟ دا طلب مستحيل طبعا
فرد عليه العضو المحترم : شكرا سيدي الرئيس هههههههه
.
.
قال الدايات قال
دي محطة انزل فيها راجل ههههههه
شكرا بابكو
|
Post: #20
Title: Re: يا ناس الفيس بوك والله انا ما عارف نفسي مولود متين فما تتعبوا ساكت
Author: علي محمد الفكي
Date: 04-07-2013, 12:17 PM
Parent: #16
happy birth to you
uncle bosh
وقت عبود زار المناقل كنت في سنة كم ؟
|
Post: #21
Title: Re: يا ناس الفيس بوك والله انا ما عارف نفسي مولود متين فما تتعبوا ساكت
Author: عبدالله ود البوش
Date: 04-07-2013, 12:33 PM
Parent: #20
| Quote: وقت عبود زار المناقل كنت في سنة كم ؟ |
عليك الله يا علي بتتذكر الزيارة التاريخية دي
أنا ما من المناقل من الحلول الجنبها لكن بذكر لمن طيارة عبود جات بحلتنا
كنا بنبذو لان أهلنا كانو معارضنو
الطيارة لمن جات فوق راس بيوت حلتنا قالوا دي طيارة عبود ماشي المناقل
يلا يا شفع نبذوهو
كنا بنكورك ليهو ونقول
عبود آكال الدود والله صحي
وكمان اديناهو ملاح هههههههه يعني كل منا يمسك معصم يده اليمنى بيده اليسرى عدا الناس العسر
مع قبضة الكف ونلولح ليهو في الهواء الطلق يعني اديناهو ملاح ونبذناهو نبذ شديد خلاس
يا زول اتا قديم قدم من زمن شرط شرط والكرتلة ماركة الاسدين مضمونة ومبرشمة
حصل وقعت ليك كرتلة في جدادة راكض ؟ ههههههه
قال انكل قال
شكرا يا علي جزيلا
مع تحياتي
|
Post: #22
Title: Re: يا ناس الفيس بوك والله انا ما عارف نفسي مولود متين فما تتعبوا ساكت
Author: سامى عبد المطلب
Date: 04-07-2013, 01:41 PM
Parent: #16
| Quote: صقيعة سلامة تحتاج لنفاسة يا سيدي الرئيس |
هههه ههههه ههههه
قلت ماك خابر كان ميلود سنه التخديره ولا الكتله غايتو الكتله دى بتكون كتله ناس الماظ والتخديره دى سنه تخدير مشروع الجزيره
علا انا راى بتكون ميلود سنه الغرقه
|
Post: #23
Title: Re: يا ناس الفيس بوك والله انا ما عارف نفسي مولود متين فما تتعبوا ساكت
Author: عبدالله ود البوش
Date: 04-07-2013, 02:53 PM
Parent: #22
Quote: علا انا راى بتكون ميلود سنه الغرقه
|
وفي رواية اخرى يقال سنة ابو الدقيق
ياخي ناسنا الطيبين كانو يُأرخو حسب الاحداث من حولهم ولا خساهم بحركة عقارب الساعة
واصلا ما كان في حاجة اسمها تاريخ
حبوبتي بت الضواها قالت انا كان مستغربة في الناس ديل
الشمش دي كل يوم تطلع بقدام وتغيب من ورا كيفن الناس ديل بعرفو
الليلة اللربحا وبكرة الخميس ؟
أها حبوبتك دي تفرز ليك تقويم ام القرى من قويم حلاوة جكسا كيفن
سنة البرجم
سنة الفار
سنة ام قنطو ههههههه
سنة سبق الحمير
سنة هُس
سنة المجاعة
سنة تاكل ترقد
الخ
الخ
الخ
وشكرا هندسة
|
Post: #24
Title: Re: يا ناس الفيس بوك والله انا ما عارف نفسي مولود متين فما تتعبوا ساكت
Author: عبدالله ود البوش
Date: 04-07-2013, 02:59 PM
Parent: #23
والعجب العجيب الشهور
الويحيد
الكرامات التلاتة
سايق
رجب
قصير
رمضان
اللفطار التنين
الضحايا التلاتة
ناقص شهر النجيض اتمو
|
Post: #25
Title: Re: يا ناس الفيس بوك والله انا ما عارف نفسي مولود متين فما تتعبوا ساكت
Author: سامى عبد المطلب
Date: 04-07-2013, 03:50 PM
Parent: #24
ود البوش يطيبن ايامك ويتعلى مقامل زى ما حبوبتى التريا كانت بتدعى لينا ذكرتنا بالكرتله المضمونه ومبرشمه قلنا نجيبا للناس الما شافوها وان دفعت الشلن يانا القادنها
[IMG]http://i.imgur.com/y5Y9mlE.jpg[/IMG
]
|
Post: #26
Title: Re: يا ناس الفيس بوك والله انا ما عارف نفسي مولود متين فما تتعبوا ساكت
Author: عبدالله ود البوش
Date: 04-08-2013, 06:23 AM
Parent: #25
| Quote: ود البوش يطيبن ايامك ويتعلى مقامل زى ما حبوبتى التريا كانت بتدعى لينا |
والله يا سامي انا دعوات الامات والحبوبات ممشي بيهو حياتي كلها
كلما انزنق جري لي عندهم وحمالتك علي الكمدة بالرمدة
ديل سمحين ونضاااااااااااااااااااااااااااااااااااااااااااااف
شكرا سمسم على الدعوة السمحة دي ولك اضعافها
وشكرا على الصورة بس ما ظاهرة
ولك تحياتي واحترامي والود الذي تعلم
|
Post: #27
Title: Re: يا ناس الفيس بوك والله انا ما عارف نفسي مولود متين فما تتعبوا ساكت
Author: عبدالله ود البوش
Date: 04-08-2013, 11:06 AM
Parent: #26
Quote: والعجب العجيب الشهور
الويحيد
الكرامات التلاتة
سايق
رجب
قصير
رمضان
اللفطار التنين
الضحايا التلاتة
ناقص شهر النجيض اتمو |
يا كافي البلا مافي زول كلو كلو نجيض ترباية حبوبة ؟
|
Post: #28
Title: Re: يا ناس الفيس بوك والله انا ما عارف نفسي مولود متين فما تتعبوا ساكت
Author: عبدالله ود البوش
Date: 04-11-2013, 09:56 AM
Parent: #27
اخونا الفياسي البكبابي الفاتح
اها دي الشغلة الخائف منها بكرة ذاتا
قال بكرة عيد ميلادي قال
|
Post: #29
Title: Re: يا ناس الفيس بوك والله انا ما عارف نفسي مولود متين فما تتعبوا ساكت
Author: وضاحة
Date: 04-11-2013, 10:04 AM
Parent: #28
معقول بث
|
Post: #32
Title: Re: يا ناس الفيس بوك والله انا ما عارف نفسي مولود متين فما تتعبوا ساكت
Author: عزالدين عباس الفحل
Date: 04-11-2013, 10:32 AM
Parent: #29
عـبـدالله ود الـبـوش ،،،
بـوسـتـاتـك حِـلـوي و طـاعـمـة ،
زي الـحـلـوي الـعـمـانـيـة ،
ربـنـا يـخـضـر ضُـراعـك ،
يـا رونـق الجـمـال ،
،،،
عزالدين عباس الفحل
ابوظبي
|
Post: #34
Title: Re: يا ناس الفيس بوك والله انا ما عارف نفسي مولود متين فما تتعبوا ساكت
Author: عبدالله ود البوش
Date: 04-11-2013, 12:43 PM
Parent: #32
شكرا يا عزالدين الفحل ياخي
والله اجبر بخاطرك
تحياتي واشواقي
وما زلنا في انتظار الزيارة الميمونة
.
.
.
ما تنسى الايفون سمح ؟ الكشاف دا دا خلاص غماسو بقا إكَنْتِك
|
Post: #33
Title: Re: يا ناس الفيس بوك والله انا ما عارف نفسي مولود متين فما تتعبوا ساكت
Author: عبدالله ود البوش
Date: 04-11-2013, 12:32 PM
Parent: #29
مش بالله حاجة تحير 
|
Post: #30
Title: Re: يا ناس الفيس بوك والله انا ما عارف نفسي مولود متين فما تتعبوا ساكت
Author: درديري كباشي
Date: 04-11-2013, 10:13 AM
Parent: #28
بوست رائهع ولذيذ ويا ود البوش يا فنان
فعلا النا الكبار كانوا يؤرخوا بأحداث ..
تقول ليك انا لامن ولدتك كان يا دوب نمير دا مسك الحكم ليه خمسة جمعات ..
ولامن ولدت اخوك عمر كان جا بلدنا وفتح نادي السكة حديد .. انت بس عليك تشيل ورقة وقلم وتسجل وتحسب بطريقتك ..
على كل حال انت اعتمد التاريخ الموجود واح0تفل واضرب التورتات وانفخ الشمع .. وعديها يعني ما فارقة كتير
|
Post: #35
Title: Re: يا ناس الفيس بوك والله انا ما عارف نفسي مولود متين فما تتعبوا ساكت
Author: عبدالله ود البوش
Date: 04-11-2013, 12:53 PM
Parent: #30
Quote: تقول ليك انا لامن ولدتك كان يا دوب نمير دا مسك الحكم ليه خمسة جمعات ..
|
يعني يا درديري عايز تعمل لينا فيها مواليد 25 مايو 1969 زائد شهر وخُمُس
حلاة لِقْلِق
قاليك حبشي صاحبو عزمو غداء في عرس اخوهو وقاليهو جيب معاك جماعتك
الحبشي : متين ؟
صاحبو يوم الاربعاء
كويس
الحبشي اكلم في اصحابو ونسى يوم الاربعاء
اها اصحابو قاليهو الغداء متين تيب
قاليهم تعرفو يوم الجمعة اتنين يوم ورا
شكرا درديري يا اميز كتابي المفضلين جدا
تحياتي
|
Post: #31
Title: Re: يا ناس الفيس بوك والله انا ما عارف نفسي مولود متين فما تتعبوا ساكت
Author: رانيه محمد الشيخ
Date: 04-11-2013, 10:18 AM
Parent: #1
:)))))))
|
Post: #36
Title: Re: يا ناس الفيس بوك والله انا ما عارف نفسي مولود متين فما تتعبوا ساكت
Author: عبدالله ود البوش
Date: 04-11-2013, 12:56 PM
Parent: #31
حااااااااااااااضر يا رانية حاضر
عاملة صورتك السمحة دي
|
|