الجماعة ديل صلّوا ..لاّ لاّ ..دا كبلّو..أو..ياسي مرسي بس خلاص سمع هسس

الزمان : أوائل أو منتصف تسعينات الملينيوم الفات لا أذكر تحديدا" ..ولا أريد.. حيث تدور الآحداث أدناه
المكان : ود مدني عاصمة الأقليم الأوسط سابقا" عاصمة ولاية الجزيرة حاليا"
جرت تسمية المسجد العتيق أو الكبير في ود مدني إصطلاحا" بـ(جامع الحكومة)وإتسمى كدا ليه ماعارف
ودا أصلا" ما موضوعنا هنا ...
فقط تذكرت الأحداث دي وأنا أستمع لخطاب رئيس جمهورية مصر العربية اللي أطال في الحديث وأطال
وسلّ روح الناس ومعطهم معط السواد ..وبشرّهم من تااااااااني بأن غدا" ..
التكامل للوادي ح يصير أكليل ومرسي والبشير هم اللي ح يكونوا المرة دي جمال الشيل...
زيهم وزي الشغيل الأمس دخلوهوا محوّر إرتكاز لمن جاء القون كان لايص وتائه هنااااك
جوار خط سته سو يا سو يا سو حبيبي حبسوهو...دا برضوا ما موضوعنا برغم إنو الفقع واااحد
وعمك مرسى قال في ما قال : قال : أن هناك تراب عالق هنا وهناك في العلاقات وكأن (حلايب ما تراب)
بس دا برضوا ما موضوعنا.....
موضوعنا في الزمان الذي لا أريد أن أتذكره أعلاه وتذكرته غصبا" عني أمس وذكرني موضوع كبلّو دا
في زمن التمكين داك إنه تم تعيين (والي) للجزيرة إسموا مين كدا كبلّو ..كبلّو دا حرشوهوا من هناك وقالوا ليه
ناس مدني الكفار العلمانيين الشيوعين الجمهوريين البعثيين الإشتراكيين الماعرف ايه ديل ..تدخلهم الإسلام ...
وعمك كبلّو ماصدق يقوم يخطب وينفخ في مايك الساون سيستم وينفخ ويفقع مرارتنا ويحدّثنا عن الجهاد
تارة وبعضُ من كرامات تدورهناك تارتين وبلا بلا بلا زي بتاعت مرسي الأمس كبلو سادتي يفقع مرارتنا
و(مرارة) القاعدين يسطلوا في جروف النيل والمساكين والفقراء والأرامل واليتامى المنتظرين الصدقات
اللي بتتوزّع بعد صلاة الجمعة والجماعة اللاحقين كورة فريقي النجوم والدفاع عصرا"
والأهلي والإتحاد مساء" وبعضً من صوفية...بدأت نوبتهم تئن في قبة ود مدني السني
وأولاد شاطوط يفزعنا ويلحقنا وينجدنا ..أها الجماعة بيبدو في الإنسحاب وهم طالعين
بيلاقوهم الناس المقربيين بيضة اللي ياااادوبك جايين ويبدأ سؤالهم المكرر كل جمعة :
أهااااا الجماعة ديل صلّوا وتأتي الإجابة في شكل كورال جماعي لاّ لاّ لاّ...دا كبلّو
ــ
وياسي مرسي إنت ماتجبيشي سيرة حلايب ونحن ماعلينا الأ السمع هسسس والترابة دي في خشومنا
و... ذاتي حسيت بإني زي وزي سئ الذكر كبلّو المذكور أعلاه..فــ..بس خلااااااص