|
يا قيقراوي! حكاية فتح الرحمن دي ما قسّمت معانا
|
رغم ان الكتابة بالاسم المستعار عموما مرفوضة عند البعض لكن هنالك اسماء اصبح له مكان في ذاكرتنا البصرية الملموسة و دي من ناحيتي الكيبورد و العين و كدا
زمان واحد صاحبنا ترك المنبر لانو الناس كانت بتكتب بأسماء مستعارة و شغال في الناس قرف زي واحد صاحبنا و تناقشنا حول الموضوع و توصلنا إلي أنها حرية شخصية جدا يعني زي لون الاسكيرت القصير المفروض تلبسه أي إمرأة سودانية او لون الجلابية او البنطلون او القميص المفروض يلبسه اي سوداني طبعا في ناس لمن قروا الاسكيرت القصير ( الميني الضيق داك ) تحسسوا فتاويهم و ترسانتهم من احكام دينية علي شاكة شاتم الرسول الاباحي الملحد و أخيرا عامل لينا فيها سلمان رشدي و بالمناسبة سلمان رشدي مالو؟ ما كاتب زي العجب و عالمي كمان او ناشر الرذيلة بين "المؤمنين" و ديل طبعا البديل الاسلامي للشعب السوداني و المقصود هو الشعب السوداني الذي تم تجويعه و قتله و فرض الهجرة القسرية عليه هذا غير الرفت من الشغل مع التعذيب و سهر الجداد
المهم يا قيقراوي ما هي احتمالات الردة عن الاسم و كفاكم الله شر الردة عن المعتقد يعني لو واحد بوذي مثلا يحافظ علي بوذيته لأنه الأمور ما معروفة يقوم يطلع ليك راهب من التبت بي صلعة كدا و جلابية حمراء يلخبط عليك ايامك
فتح الرحمن اسم جميل جدا و هو اسمكم السامي و نعم بالله لكن قيقراوي دا بقي حقنا و نحنا عاوزينو بطل حركات و تغيير اسماء كمان دا الفضل
طه جعفر
|
|
|
|
|
|
|
|
Re: يا قيقراوي! حكاية فتح الرحمن دي ما قسّمت معانا (Re: طه جعفر)
|
سلامات صديقتاذنا طه جعفر
يازول قيقراوي يومو تم .. كملت المعدودة ولكل اجل كتاب
الدوبيت بنداوِّر البَكْرة ونمصرُو ثديها وكم بنشِّق عتاميراً بعيدة وتيها يا نفس السواد المتعة كمَّلتيها أبقي لَزُومة وكت القُرْعة وقعت فيها (ود ضحوية على فراش الموت)
----------
زي ما قال المسطول للغريق المستنجد برمضاء مزاجو الرائق من هجير موت محتوم:
يا زول انت كافر؟ دا يومك .. موت موتك ساااي!!
كفية يا طه .. كفاية
لو سويت غناي في عود .. كان خدّر ملأ الواطة .. وما كان اتحزم ويقود
عشرة الف، وعشرة خمسة سنين .. افتكر بعد دا كفاية تأليف وعشرة!!
دا لو رثيتبو حياتي .. ما احتجت لي منااااااااااح
وهكذا
هو حال الدنيا .. وديالكتيك الوجود (السيرورة والزوال) انتفت الشروط الموضوعية لـ(قيقاراوي) فوافاه الأجل [اثر علة اصابت مسقط راس .. آلمته جداً جدن .. ولم تمهله طويلاً] كما جاء في نعي الفقيد .. المقتضب. مشيناها خطاً كتبت علينا .. ومن كتبت عليه خطاً مشاها
شاكرين حسن ظنك يا حبيب .. انا والفقيد .. وللفقيد الرحمة
سأعود
| |
|
|
|
|
|
|
Re: يا قيقراوي! حكاية فتح الرحمن دي ما قسّمت معانا (Re: طه جعفر)
|
Quote: يا قيقراوي الولف كتال
طه جعفر
|
الله يلهمكم الصبر والسلوان .. او اقرا بلسانٍ سوداني مبين:
(الشالو من عيونكم .. يشيلو من قلوبكم)
الكلام دا فيو قسوة ما عادية .. حيث امس الحاجة للمؤاساة .. مش؟ ما عارف .. لكن يتراءى لي كدا غايتو!
الناس تكرر (السلوان) ساااي وما عارفة انو هو بالضبط نقيض الحب (حالة اللاحب واللا كره .. او العدم تماماً) هل معقولة دي الحاجة المطلوبة بالدعاء دا!؟ عشان شنو لكن؟ ياخي بضدها تمايز الاشياء .. لكنها نقائضها مكافئة للعدم.
---------
شيدوا حيلكم .. زولكم (قيقراوي) يومو تم اما (فتح الرحمن) فمازال منتظر .. يومو تاني
نواحي العام 2001 كنت نازل السودان بعربية من (حفر الباطن) في اقصى شمال المملكة (الرحلة لجدة بس 18 ساعة)، عملت حادث في منطقة درديب .. اتقلبت العربية 3 مرات، وطلعت منها زي الدبيب .. انفض في هدومي، لا انا لا العفش ما جاتنا حاجة .. لكن احمد اخوي جاتو! قررررررربت اديو كف .. ما مصدق اني طلعت ؤ ساااالم!! ولا محمد اوشيك الراعي العينتو غفير عليها، لمن امش اعرس وارجع اشوف مشهاد الفقيدة -كانت كريسيدا 1986م .. عاجبــــاني جنس عجب!!- ونوسدا الباردة في مسقط جماركا (مسقط راسها دا هناااك في بلد ترسم كتابتها) بغهم (اليوم خمرٌ وغداً أمر) .. والاخير -محمد اوشيك- كل ما يلاقيني يكرر لي: يومك تاني!! .. يومك تاني!! .. يومك تاني!!
اهو ترانا منتظرين يوم تقع القرعة في ي ي ي نفس السواد دي!
يا باخ ياخي والله مشتاقين وانا برضو قدر ما اجتهدت ما ظبطت معاي الباقات مالن بقن كل ستة في حتة؟
| |
|
|
|
|
|
|
Re: يا قيقراوي! حكاية فتح الرحمن دي ما قسّمت معانا (Re: فتح الرحمن حمودي)
|
الشفيف قيقا او كما آلت ليه الحال فتح الرحمن .. دوام الحال من المحال يا اخي .. واعتقد انك لخصت الامر في بعض الأسطر ..
Quote: انتفت الشروط الموضوعية لـ(قيقاراوي) فوافاه الأجل [اثر علة اصابت مسقط راس .. آلمته جداً جدن .. ولم تمهله طويلاً] كما جاء في نعي الفقيد .. المقتضب. مشيناها خطاً كتبت علينا .. ومن كتبت عليه خطاً مشاها
|
رغم حبنا لقيقا الاسم .. فلا يهمنا سوي يراعك الذي يخط اروع الكلمات ...
دمت بخير ..
| |
|
|
|
|
|
|
Re: يا قيقراوي! حكاية فتح الرحمن دي ما قسّمت معانا (Re: هشام كمال عبادي)
|
امسك يا باخ
-------
هشام عبادي ياخي تشكرات كميات ماتوا الزينين .. جات على (حالة ذهنية) ساي النجيضة (الراوي) اتوسد تقيلة .. ان شاء الله ثابت اجرو
لعله اشرق في ديارٍ اخرى .. الكافر دا- والعهدة على البطل .. يسأل عنها يوم الموقف العظيم- تلقاهو كان مؤمن بتناسخ الارواح ذاتو .. المافي شنو!؟ هوو نوز!؟
لكن العارفو انا غايتو انو كان بردد:
حباني يا أهلي يا من تعزوني في الدنيا خاب أملي في حظي عزوني أنا لو يحين أجلي ما تبكوا هنوني
ما عارفو ليه كان بردد المقطع دا بالذات!؟ ؤ دا بفتح باب الاحتمالات مشرع في قصة النهاية دي .. بما فيها الانتحار عديييل.
| |
|
|
|
|
|
|
|