ود شعيت و حكاية وزنين

أكان العرب نازلين في "السادة.."( السادة هناك فوق البطانة قريب السباغ ) وجا احمد ود عوض الكريم والصادق من ( البريسي. برضك منطقة في البطانة ).والوطا صباح .. والصادق حلب شدوقو في العرب يعني كورك:اروروروووك..علي طول حسو .. وكل زول شال سيفو وجوا جاريين قايلين في مشكلة .. يا زول الحاصل شنو؟؟ قالهُن: حرّم عوجة مافي ..الجملُو قريب يشِد .. شنو ؟؟ قالهُن "وزنين" (وزنين دي جارية جميلة كانت فاتنة عصرها ) فتوها في (القِليتة منطقة في البطانة .. ) نمشي نشوفا هي ماسكة درب القِداما ولا سوّتلها راي براها .. وهسع الحقيقية الجملو قريب كلو شدّا ..
قيّلوا في الصُباغ وإتراوحو في ريرة ..وباكر الضِحى جوا عِندها .. قدُر ماشافت الرَكُب ماشي علي البيت..وكان نازل في بيتا عبد اللهِ ود شوراني شبّحت البيت زادتو..مرقت علي الجُمال دلّت البِتقدرها..
والكيف جبنة بس .. وجابت الموية اسقتُن ..وولعت الفحم يتهوزز مِتِل مَغس اللقربين ..وإشتغلت علي الجبنة .. وهسع ختت الفناجين متل وليدات الفَصُل ..ومَلتِن على قدر المجتمع.
أحمد ود عوض الكريم قال : في حُكمُ مَجلَس : الما بجيب غَنوة فوق "وزنين"
دي ما يشيل فنجانو. قالولو : غن آ شيخ أحمد.. قال: لا ..السابقك علي الباب قولو يا أرباب .. يغني ود شوران دا .. ود شوران قالُو: الغُنا فوق وزنين دي؟؟ شيخ أحمد قالُو فوق وزنين دي ..


ود شوراني قال:
سمحة وضوقها لبن صهباء ودخلها مبسّط
شرفتا رِيل وكفيتا خيل وطُولها موّسط
من تاتاي قدومها وخطوتا الانرصت
حسيت قلبي فارقني وكبِدتي إنقصت
دا ود شوراني .
ادتو فنجانو .

وإتلفتت وزنين على الصادق كشمت.
الصادق قالها:
لحظ ابصارو خصه اللحظة لي بصّاها
فرّا فواطرو تمرة فؤادي كع قصّاها
قدر ما اقول أتوب الون علي أنساها
مجلوقةً تقبّض في البدن داساها
........
واتناول فنجانو

شيخ العرب احمد ودعوض الكريم
عاين عليها هي ..
قاليها:
شماليقك نُضاف وصباكي ناقِع ماها
رُوبتِك قامِتك المربوعة تب قاسماها
جميل جِيدك مسجل والعقول لا سماها
دعجات خد وفادعاً في البهيم باسماها

وطبعا هو سيد الحكم في المجلس بشرب لانه شيخ العرب لكن المجلس دا فيه هدندوة ورشايدة نشوفهم قالو شنو برضهم عشان يشربو الفنجان

علي بلة ود اب شُكُر.. قالُو:
نفسي الخاينة ابت الزاد وطريّت كيفا
هادي قصبة سقادي الموجا كاضم قيفا
معشوقتي الجميلة وديسا هدلو كتيفا
ركفة شام ظُرة وسمحة دهبة ومُهرة فُلوة وديفا
.......
وناولتو فنجانو

جادين ود المهيوب قاليها:
شرقان في جمالك وغلّبني أوصافك
وفيك جُملاً تمتع كل راوٍ شافك
الفارس اللِبس درع الدويدي بخافك
مايقك عين جدي ودوف أم لبب في اردافك


.......
ناولوهو فنجانو

أمُحُمّد ود الفكي حمد,ود أب ناجمة
قاليها:
سَماحِك غير حِبُوب بَرتا وقفِيس حُجّاج
سماح اليبست دوف الطريفي الساج
شِعاع زور الغشيم الفي الظلام وجّاج
سماح الفرُوا براق السِرا الفجّاج

خالد ود علي قاليها:
لِسَان باهي الوريد المُو شرِف هراج
هُدود الصي عيون الغافي في السهراج
تفرذ زمهريراً في العضُم تلاج
يحلعُقد الضماير بسمها الفلاج
.................
اتناول فنجانو

ود شعيت قال:
سنهُور حاكم الدولة ابسلاحاً راج
ماخدة عليهو دبورتين علاوة وتاج
دَرعات عُنّز الريل السماهِن هاج
طال حسر العليهُن ختت الاسلاج
.................
ود شعيت عليه رحمة الله زول نشاء اميا ولكنه كان يتحدث باشارات ولغة وادوات عالية الدقة لاحظوا معي (علاة وتاج )

الصِدّيق ود عباس قال :

جمال معشوقتي أبداً في البلد مافِيش
جمالا خِلقة غير عَدلة لَباس وغشيش
ديفةالمرّحن بين ود قِدير وكشيش
جمالك فرضة والتانيات معاكي عويش
..................
والشاعر الصديق ودعباس الحمورابي لو سمعه شخص بصوته الندي ونمته المعروفة ينشد هذه المقطوعة لاحبه من لايعرف فن الدوبيت ولا يتذوقه البتة

رانفي ود اللاافِض قال:

عشوقتي كحيلة الرُميش
أديبة وراسيةمي ام لكعة المشيها رشيش
جرحها نازي دافِق دم فؤادي بشيش
درعاء و للكُلوهاتجوز قُمارها دِشيش

عبد الله ود الفكي الصديق ود اب ناجمة قال:
ناس رانفي بِنُوحوا مقربنين وعطيش
انا مالي؟ مِحارب النوم ومابي العيش
عاشقيالجرحو كاتم دمو ما في بشيش
خلااس داركني ..عِلا الليهو عشة بعيش

ثم كان حضورا في المجلس بعد قبائل المنطقة من الرشائدة والهدندوة فقد جاء شهرهم وبكل صراحة انا اول مرة اشوف دوبيت اهلنا في البطانة بيقولو زول رطاني وهذا لا يعني احتقاري للهجات المحلية ولكن لعدم معرفتي بها

احمد كيتا الهدندوي قال:
"إيداييب كُلها" بي شلاخ واب رشمة
كريكناب هاب للي ليما وتِكنِشما
الخلاني اكسر التوبة وين ما أطرا
اناقريت تيكا ما جلسو الاراملا ما

ودي سيد الجبنة بكون شرب ليه في الرباعية دي فنجان مظبط

ودا هدندوي تاني

سليمان الهدندوي قال:
يا قلبي الولي دمالك بقيت تشلا
قال من شوفة الابس رهيف ومدلا
علي المربوعة قامتو وما الطويل ومخلا
سواي حاكا دهنوك السنوك الولا

وهنا يكون حاضرا في المجلس احد الرشايدة وهو
عيد ود الشيخ عبد الله الزبيدي قال:
نحنا أولاد رشيد الخاصة بالدرهان
نحنا أهل الدعيلات ما بنسعى ا لضان
ننصب لها رايش نحنا نسكها بالسفهان
نرضي ست الجوجلية وكان
الله لا بارك فيها وولابارك فيكم إنتو
يالعجمان
قاصد الهدندوة بانهم عجمان لكن الكلام في ذلك الوقت لا يوخذ الا باعتبار انه قول برئ ولكن الان اليوم حدث ماحدث بين الناس

كرار ودكُردُم قالو:
يا الصِدِيق عشوقي الكتفو هدلو الريش
مضروب الغرام قال الحكيمما بعيش
قبلي أم درعة بدري وصيدت في الديش
كتير الترّكتلُو كتابو وكَترالهيش