الرئيس و الخيارات البديلة !!

البشير ... علي عثمان ... نافع ... عبدالرحمن الصادق .... الرئيس و الخيارات البديلة !!
يا للتعاسة و بؤس الخيارات !!

هل عقمت هذه الامة كيما تكون هذه خياراتها ؟!!
بقى ما عندي تفسير لما يحدث سوى إنو ربنا بيعاقب فينا بذنوبنا .... و لا حول و لا قوة إلا بالله !!

عزيزنا أمين،

ثمة شعور فطري عند البشر ألا يتركوا ما يعتقدونه نعمة دون أن يستوثقوا
من أن تلك (النعمة) لن تتلاشى كلها دون أن يمتد أثرها فيهم ولو إلى حين
لذا تجد أهل السلطة ، ممن يظنون أن السلطة النعمة، يحرصون على ترك ما
يشبه ال (خميرة) أو (الروَّاب) ليخلفهم على الكرسي حتى يقللوا من اثر (الفقد)
من جانب ومن جانب آخر يضمنوا انحسار مد المساءلة عما جنت يداهم أثناء
فترة حكمهم و (يكسبوا الودين) ولعل الأمثلة المعروفة لديك في هذا الإتجاه لاحصر لها..
وكي يبلغ مثل ذلك الشخص مبتغاه لابد أن يكون الخليفة الوريث من
أقرب الناس إلى قلبه - وليس إلى منصبه - وحيث أن ظاهر الحال لايشي
بشئ من تلك الحظوة لدى أي ممن ذكرت فلا أظنن أن منهم من يخلف الرجل..

رغم بعدي برسل سلامي.

حبيبنا محمد المرتضى، الشوق من هنا لعندك، و لعلك بخير يا صديق

Quote: عزيزنا أمين، ثمة شعور فطري عند البشر ألا يتركوا ما يعتقدونه نعمة دون أن يستوثقوا من أن تلك (النعمة) لن تتلاشى كلها دون أن يمتد أثرها فيهم ولو إلى حين لذا تجد أهل السلطة ، ممن يظنون أن السلطة النعمة، يحرصون على ترك ما يشبه ال (خميرة) أو (الروَّاب) ليخلفهم على الكرسي حتى يقللوا من اثر (الفقد) من جانب ومن جانب آخر يضمنوا انحسار مد المساءلة عما جنت يداهم أثناء فترة حكمهم و (يكسبوا الودين) ولعل الأمثلة المعروفة لديك في هذا الإتجاه لاحصر لها.. وكي يبلغ مثل ذلك الشخص مبتغاه لابد أن يكون الخليفة الوريث من أقرب الناس إلى قلبه - وليس إلى منصبه - وحيث أن ظاهر الحال لايشي بشئ من تلك الحظوة لدى أي ممن ذكرت فلا أظنن أن منهم من يخلف الرجل.. رغم بعدي برسل سلامي.

يا مرتضى ياخي الانقاذ قتلت فينا كل شئ، حتى القدرة علي القدرة علي الدهشة !!!
الأسماء دي ما مقصودة بعينها، لكنها كلها مطروحة في الساحة كبدائل محتملة، حتي من هم "أقرب الناس إلى قلبه" كما تفضلت ... بتتخيل زول قريب من قلب الرئيس يكون خيار لقيادة الشعب السوداني الفضل ؟!!

الأحزاب و التجمعات السياسية المعارضة، الناشطين السياسيين المعارضين و كل معارضي الانقاذ، مفروض يقيمو تجاربهم و يفهمو إنو ثمة خطأ و خطأ كبير في طريقة معارضة النظام و إلا ما تمددت الانقاذ لدرجة تنحي الرئيس و البحث عن خيارات بديلة من نفس (وكر الأشرار ) الذي خرج منه الرئيس إبتداء !!

مكان الفرد تتقدم قيادتنا الجماعية




نوتة شوقنا فات حد النصاب

Quote: مكان الفرد تتقدم قيادتنا الجماعية

كان القيادة الجماعية كيزان، أخير لينا الفرد منهم والله !!

Quote: نوتة شوقنا فات حد النصاب

غايتو دي يا قرو بالغت فيها !!

Quote: بقى ما عندي تفسير لما يحدث سوى إنو ربنا بيعاقب فينا بذنوبنا .... و لا حول و لا قوة إلا بالله !!

ومن انفسكم ولي عليكم

سلام يا بروف

Quote: البشير ... علي عثمان ... نافع ... عبدالرحمن الصادق

البشير : باي باي امره متروك لتقلبات السياسة اما منفى اختياري في هدوء وسكينة واما تسليم الى محكمة الجنايات الدولية لكن رئيس تاني نهي نهي
علي عثمان : فرصه تكاد تكون معدومة بحكم ان الفريق الخصم قوي ولديه اوراقه الني يستطيع ان يمنعه بها حتى من شرف الهزيمة بانتخابات شرعية (الحركة الاسلامية والمؤتمر الوطني والامن والجيش ليسو معه)
نافع : ليس داخلا في السباق اصلا الا كمساعد ياي ودرقة لمرشح القصر وعصا لتهديد الخصوم
عبد الرحمن : ود سيدي ده تذكرة سفر لمرحلة اخرى فلن يرضى المؤتمر ولا دهاقنة الامن والجيش بعودة الصادق بايديهم

الفضل منو تصدق مافي زول ههههههههههه
خليك متابع في الفترة القادمة للاعلام وشوف التلميع ماشي على منو حتعرف خيار البشير وهو المرشح المحتمل

وليد ال mean

Quote: ومن انفسكم ولي عليكم

أظنها كيفما تكونو يولى عليكم !!
غايتو كان كده نحنا أولاد ك ل ب بشكل !!!

بس ياها زاتها يا نوته

اسمع mean يعني شنو ؟

Quote: اسمع mean يعني شنو ؟

يعني سغيل !!

والله صحي !!

عليك الله كوم القروش دي قالت لي انا سغيل


ما حا انبزها هي
لكن سغيلة الشيخة موزة

Quote: البشير : باي باي امره متروك لتقلبات السياسة اما منفى اختياري في هدوء وسكينة واما تسليم الى محكمة الجنايات الدولية لكن رئيس تاني نهي نهي علي عثمان : فرصه تكاد تكون معدومة بحكم ان الفريق الخصم قوي ولديه اوراقه الني يستطيع ان يمنعه بها حتى من شرف الهزيمة بانتخابات شرعية (الحركة الاسلامية والمؤتمر الوطني والامن والجيش ليسو معه) نافع : ليس داخلا في السباق اصلا الا كمساعد ياي ودرقة لمرشح القصر وعصا لتهديد الخصوم عبد الرحمن : ود سيدي ده تذكرة سفر لمرحلة اخرى فلن يرضى المؤتمر ولا دهاقنة الامن والجيش بعودة الصادق بايديهم الفضل منو تصدق مافي زول ههههههههههه خليك متابع في الفترة القادمة للاعلام وشوف التلميع ماشي على منو حتعرف خيار البشير وهو المرشح المحتمل

الله يديك العافية يا باش علي التحليل الضافي !!
طبعا قد تكون في شخصيات تانية مرشحة ده غير الخاتين عينهم و مستعدين يكتلو نص الشعب الفضل عشان يحكمو، و الناس دي كلها لا تختلف عن بعضها في أي شئ، و بسم الله ما شاء الله كلهم جاهزين جاهزين لحماية الدين !!
و طالما مافي زول جاي برغبة الناس يبقى ما بفرق أحمد من حاج أحمد !!

Quote: عليك الله كوم القروش دي قالت لي انا سغيل

قالتها ليك لمن في بوست عيد الميلاد إنت قلت لي عمرك كم، بالله ما ليها حق ؟!

اي يا امين عرفتها

ياخ قدر ما قوقلتها ما لقيت ليها ترحمة ما ياها
وانا عارف الكلام ده شكلو شتيمه شتيمه

لكن قوقل ترانسليتر طلع ########

Quote: يعني سغيل !!

يا بروف بطل السغالة او (الثقالة) علي وليد

يا وليد معناها احسن كتير من القالو ليك البروف السغيل ده

هوي يا سغلاء ... حرفتو البوست !!
و يا باش ... الاسم ده بقى الاسم المعتمد بتاع وليد كان يرضى كان يابا !!
و يا وليد ما تسمع كلام الباش ده، معناتها "سغيل" و بس ... الباش بحاول يخفف عليك ... الله يخفف علينا كلنا !!!

حواء والدة يا امين ...
والشعب لسع ما قال كلمته
تحياتي يا بروف

العوض يا حبيبنا ...

Quote: حواء والدة يا امين ... والشعب لسع ما قال كلمته تحياتي يا بروف

بالحيل حواء والدة يا العوض، لكن نحن في الثلث الاخير من العمر دايرين نحضر الولادة دي قبل ما نموت !! بعدين الشعب ده سكتتو طولت جدا !!
ياخي ما ممكن الخيارت كلها كيزان في كيزان و من تبعهم بغير إحسان !!!

ماغي قالتها زماان: TINA

المهم يكون ود بلد

يابروف تحياتى ,,
بأخ بدل مانفعد نفكر فى خيارات بديله للزئيس مفروض
يكون كل همنا محصور فى خيارات بديله للنظام !!
طبعا الكيزان وإعلامهم عايزين يخلونا نلف فى حتة الرئيس دى .
أصحى يا بريش .

Quote: ماغي قالتها زماان: TINA

ياخي أنا والله قايلك جايباه لينا غنية !!
يا دوك سئيلي الله الاولترنفات راقدات، بس خلي الكيزان ديل يزحو كده ولا كده !!!

محجوب يا حبيبنا ...كيفك ياخي

Quote: المهم يكون ود بلد

يا زول الكيزان ديل مافيهم ود بلد واحد !!
و لو قاصد المعنى بتاع الجلابة في شكل تريقة من العنصرية الحاكمة البلد دي ، فاقول ليك دي مشكلة فرعية نتجت من أصل المشكلة الأساسية .
الديمقراطية و التبادل السلمي للسلطة و التوزيع العادل للثروة فيهم حل شافي لقصة العنصرية و التهميش البالي البلد دي، المشكلة إنو مع الكيزان و سلبيتنا كشعب فضل، الديمقراطية مش ح تئدر تغمض عينيها !!!

كلام عميق جدا يا ياسر، كتر خيرك ياخي

كيمو يا سالم، لعلك طيب ياخي

Quote: يابروف تحياتى ,, بأخ بدل مانفعد نفكر فى خيارات بديله للزئيس مفروض يكون كل همنا محصور فى خيارات بديله للنظام !! طبعا الكيزان وإعلامهم عايزين يخلونا نلف فى حتة الرئيس دى . أصحى يا بريش .

يا كيمو ياخي، البفتش منو لخيارات رئاسية بديله ؟!!
قلنا إنو طالما الخيار كيزان أو من تبعهم بغير إحسان فلا فرق بين أحمد و حاج أحمد.
أنا مع خيار أمل :
قلت: فلتكن الريح في الأرض؛ تكنس هذا العفن !!

و طالما نحن ساكتين نجتر خيباتنا الواحدة تلو الاخرى، إن شاء الله يحكمنا عبدالرحيم محمد حسين ما فارقه !!

Quote: و طالما نحن ساكتين نجتر خيباتنا الواحدة تلو الاخرى، إن شاء الله يحكمنا عبدالرحيم محمد حسين ما فارقه !!

دير أبلع كلامي ده !!
عبدالرحيم ده بالذات لا !!!

بروف امين اختلف الناس حول من يخلف الرئيس منهم من يقول على عثمان ومنهم من يقول نافع ومنهم من شجع انقلاب قوش ومنهم من ينتظر الحرس القديم عبر بوابه الجبهه الثوريه لكننى اقولها لكم منذ الاستقلال ونحن محكومون برجال لا هم لهم سوى اشعال المزيد من الحروب فى اطراف البلاد حتى لم يبق منها شئ لم لا نجرب ان تحكمنا إمرأه .... !
فعسى الله ان يجعل خير هذه البلد على ايديهن .....

سامي يا حبيبنا، سلام ياخي و لعلك بخير

Quote: بروف امين اختلف الناس حول من يخلف الرئيس منهم من يقول على عثمان ومنهم من يقول نافع ومنهم من شجع انقلاب قوش ومنهم من ينتظر الحرس القديم عبر بوابه الجبهه الثوريه لكننى اقولها لكم منذ الاستقلال ونحن محكومون برجال لا هم لهم سوى اشعال المزيد من الحروب فى اطراف البلاد حتى لم يبق منها شئ لم لا نجرب ان تحكمنا إمرأه .... ! فعسى الله ان يجعل خير هذه البلد على ايديهن .....

اتفق معاك في مسألة كترة الترشيحات و اللف حول الدايرة الضيقة حول الرئيس و منو فيهم ح يخلفو و دا ما الموضوع الأساسي زي ما قال كمال سالم، الموضوع الأساسي ما في يحكمنا منو ، الموضوع الأساسي في يحكمنا كيف !! عشان كده ما بفرق لو راجل ولا مرة و لا جن أحمر إذا كان بحمل في جيناته كل أمراض الحكم المزمنة.
الحل في ديمقراطية يتراضى فيها الناس عن من و كيف يحكمو، يحاسب فيها الرئيس قبل الوزير و الوزير قبل الغفير، الحل في تبادل سلمي للسلطة و في توزيع عادل للثروة و في حكم رشيد يتساوى فيه الناس بغض النظر عن خلفياتهم الاثنية و الجهوية .
الكلام الشكلو إنشاء إنشاء دا ، لو كان الكيزان - قبل 25 سنة - خلونا نقوم و نقع مع الديمقراطية - عليها من الله ما تستحق - كان بقى واقع معاش الان !!