(حسن سينما) عليه رحمة الله كان من شخصيات بيت المال المشهورة وهو من أوائل من وضعو على محالهم يافطة (ترزي نسائي) وقد كان رحمه الله شخصية لطيفة ومحبوبه صادقته حيناً من الدهر في ثمانينات القرن الماضي وعرفت فيه معني (اللطافة) والذوق والتهذيب وكان من فرط تهذيبه له عبارة واحدة يرددها إذا إختلف مع شخص مهما كانت حدة الإختلاف إذ كان يقول له : (ياخ إنتا زول عديم إحساس) !! تذكرت (حسن سينما) وأنا أقرا خبراً عن كشف المراجع العام لإعتداءآت علي المال العام بولاية سنار بلغت 318 مليون جنيه و314 جنيها، من جملة ميزانية الولاية والتي لاتقل عن 600 مليون جنيه !! يعني القصة فاتت ذلك المثل الذي يقول (ادى العيش الى خبازو ولو ياكل نصو) والذي أصبح يحتاج إلى تعديل طفيف حتى يواكب (المشروع الحضاري) ليصبح بعد التعديل (ادى العيش الى خبازو ولو ياكل تلات ترباعو) ! طيب والـ 282 دي خالينها ليه؟ نظام (شفقة وحنية) على المواطنين وللا الفهم شنو؟! طيب تعالو نشوف ماذا قال رئيس اللجنة الاقتصادية بالمجلس التشريعي بالولاية المنكوبة الأستاذ (يوسف محمد عثمان) : قال سيادته واصفاً حجم هذه المخالفات بـ (القليلة) مقارنة بالميزانية الكلية للولاية ! يا حضرات القضاة والمستشارين ويا هيئة علماء السودان ويا اعضاء المجمع الفقهي .. ويا لجان الحسبة بالمجلس الوطني والمجلس الطبي والمجلس البلدي ومجلس الأمن ويا من تطالبون (الوزيرة) بغطاء الرأس ... السيد رئيس اللجنة الإقتصادية بالمجلس التشريعي لولاية سنار بيقول 318 مليار جنيه حاجة بسيطة .. 318 مليار جنيه حاجة (بسيطة) في بلد تتوقف فيه ماكينات غسيل الكلي بسبب (كم مليون) فيخرج المرضي محتجين ليلقوا بأجسادهم الواهنة على ظلط شارع المستشفي .. الله يرحم حسن سينما ! ولم يكتف رئيس اللجنة الإقتصادية بالمجلس التشريعي لولاية سنار بتبسيط المسألة بالرغم من جسامتها وكارثيتها بل صرح بان الامر مقدور عليه .. تفتكروا مقدور عليهو ليه؟ يجيب سعادته : (لانها في النهاية اخطاء بشر) ؟ وهنا فليسمح لي السيد (يوسف محمد عثمان) أن اخالفه الراي إذ ان هذا النوع من (الهبر الجماعي) لا يمكن أن يقوم به بشر .. قول أبالسة ... قول شياطين (كده ممكن) لأن هذه المسألة تستعصي على أكثر البشر (تدرباً وإحترافاً على اللصوصية) ... يا اخي لو أن هذه الميزانية وضعت في العراء (يعني في السهلة) ليأخذ منها السابله (واللصوص) لتبقى منها أكثر من ذلك ! الله يرحم حسن سينما نعم ليس هنالك من شخص في الدنيا أو جماعة تستطيع القيام بإختلاس اوتبديد أكثر من نصف ميزانية ولاية (او مقاطعة) وهذا رقم إن تم تسجيله في موسوعة جينيس لما تم كسره حتى يرث الله الأرض وما عليها ! أما تصريح سيادته بأن الأمر مقدور عليه فقد قمت بتركيب الفهامة علني أستطيع فهم مسالة (الأقتدار) دي لكن الفهامة لم تسعفني بل خاطبتني قائلة : عليك الله هو لو في إقتدار كان (صار) ما (صار) ؟ إلى هنا عزيزي القارئ المسألة بس محتاجه ليها شوية (إسعافات أولية) لكن لو (ركبتا راسك) وعايز تواصل المقال وتعرف خاتمة تصريح السيد رئيس اللجنة الإقتصادية بالمجلس التشريعي لولاية سنار فواحد من إتنين يا تبلع حبوبك وللا بعدين القصة ح تجيب ليها (عناية مكثفة ) وإحتمال (أحمد شرفي) على طريقة (عارف وصيوان عرس البت) والتي تجعل من (مال المسلمين) وممتلكاتهم شأناً (خاصا) الزول يعمل فيهو (العاوزو) قال لا فض فوه (نحن مع التقويم وليس التجريم) ... يعني سادة يا أفاضل بالعربي كده (لا بلاغات لا محاكم ولا يحزنون) .. تجريم أيه يا سعادتك هي الناس دي عملت (جريمة) وللا حاجة (وحشة) لا سمح الله .. هم شويتين مليارات من الميزانية .. الجماعة ديل بس شالو (النص وزيادة) وخلو (للمواطنين كوووولهم) الباقي (دي فيها حاجة؟) !!
العبد لله بيفتكر التقويم (برضو حلو) عشان كده بيقترح على (حكومة سنار) يقوموا كده يجمعوا الناس(اللهطت) القروش دي ويصلوا (المغرب) جماعة وبعد الصلاة يقولو ليهم .. يا جماعة كمان ما تبالغو .. 318 مليار حته واحدة؟ خلوها حلوة .. مية مليار .. ميتين هي الدنيا طارت ما الميزانيات الجايات أكتر من الرايحات !! الله يرحم حسن سينما !!
كسرة : تقويم ايه الإنتا جاي تقول عليه؟ هو زول (القرآن) الذي يهدي إلى الرشد ماقومو في حاجة تانية في الدنيا ممكن تقومو ... قومتو نفسنا معاكم !!
كسرة ثابتة (قديمة) : أخبار ملف خط هيثرو العند النائب العام شنو(وووو وووو وووو وووو)؟
Post: #2 Title: Re: .. قول أبالسة ... قول شياطين Author: محمد علي عثمان Date: 04-01-2013, 07:10 PM Parent: #1
Quote: الله يرحم حسن سينما
Post: #3 Title: Re: .. قول أبالسة ... قول شياطين Author: محمد علي عثمان Date: 04-01-2013, 09:15 PM Parent: #2